ନନ୍ଦିଘୋଷ ବିୁରୋ : ଡାକ୍ତରଙ୍କ ଅବହେଳାରୁ ଗର୍ଭବତୀଙ୍କ ମୃତ୍ୟୁ ଅଭିଯୋଗ। ମୃତ୍ୟୁର ୨୦ ଘଣ୍ଟା ପରେ ମଧ୍ୟ ହେଉନାହିଁ ବ୍ୟବଛେଦ। ଘସିପୁରା ଥାନା ବରିପାଳ ପଞ୍ଚାୟତ ଜରକା ସାହିର ଲକ୍ଷ୍ମଣ ପିଙ୍ଗୁଆଙ୍କ ଗର୍ଭବତୀ ସ୍ତ୍ରୀ ସମ୍ବରୀ ମୁଣ୍ଡା ଙ୍କ ଗର୍ଭ ଯନ୍ତ୍ରଣା ହେବାରୁ ତାଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ହେଲେ ମେଡିକାଲରେ ଅନେକ ସମୟ ଅପେକ୍ଷା ପରେ ଡାକ୍ତର ଛୁଟିରେ ଥିବା କହି ତାଙ୍କୁ ଗୁରୁତର ଅବସ୍ଥାରେ କଟକ ବଡ଼ ମେଡ଼ିକାଲ ସ୍ଥାନାନ୍ତର କରାଯାଇଥିଲା। ଆମ୍ବୁଲାନ୍ସ ଯୋଗେ ତାଙ୍କୁ କଟକ ନେଉଥିବା ବେଳେ ଚଣ୍ଡିଖୋଲ ନିକଟରେ ତାଙ୍କର ମୃତ୍ୟୁ ହୋଇଯାଇଥିଲା । ସେଠାରୁ ମୃତଦେହକୁ ଫେରାଇ ଆଣି ଗାଁ ନିକଟସ୍ଥ କେଶଦୁରାପାଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା । ଖବର ପାଇ ସେଠାରେ ପୋଲିସ୍ ପହଞ୍ଚି ଶବ ବ୍ୟବଚ୍ଛେଦ ପାଇଁ କହିଥିଲେ । ହେଲେ ଗ୍ରାମବାସୀ ବ୍ୟବଚ୍ଛେଦ କରିବା ପାଇଁ ବାରଣ କରିଥିଲେ । ଫଳରେ ଦୀର୍ଘ ୫ ଘଣ୍ଟାରୁ ଉର୍ଦ୍ଧ୍ୱ ସମୟ ଧରି ସ୍ୱାସ୍ଥ୍ୟ କେନ୍ଦ୍ରରେ ଶବଟି ପଡ଼ି ରହିଥିଲା । ପରେ ରାତି ୯ ଟାରେ ପୁନର୍ବାର ଆନନ୍ଦପୁର ମେଡିକାଲ ଅଣା ଯାଇଥିଲା ମୃତଦେହ । ଅଭିଯୋଗ ଅନୁଯାୟୀ ମୃତଦେହକୁ ଦିନ ୧୨ ଯାଏଁ ବ୍ୟବଚ୍ଛେଦ କରାଯାଇ ନାହିଁ । ଅନ୍ୟପଟେ ପୋଲିସ୍ ବ୍ୟବଚ୍ଛେଦ ନିମନ୍ତେ ପ୍ରକ୍ରିୟା ଜାରି ରଖିଥିବା କହିଛି।
