spot_img
Home Blog Page 4834

ସାଇକେଲ ଛାଡି ପଦ୍ମ ଧରିଲେ ମୁଲାୟମ ସିଂ ଯାଦବଙ୍କ ବୋହୂ ଅପର୍ଣ୍ଣା ଯାଦବ

Santosh Kumar Sahoo
-
0
ସାଇକେଲ ଛାଡି ପଦ୍ମ ଧରିଲେ ମୁଲାୟମ ସିଂ ଯାଦବଙ୍କ ବୋହୂ ଅପର୍ଣ୍ଣା ଯାଦବ

ଲକ୍ଷ୍ନୌ: ସାଇକେଲ ଛାଡି ପଦ୍ମ ଧରିଲେ ସମାଜବାଦୀ ପାର୍ଟିର ପ୍ରତିଷ୍ଠାତା ମୁଲାୟମ ସିଂ ଯାଦବଙ୍କ ସାନ ବୋହୂ ଅପର୍ଣ୍ଣା ଯାଦବ । ସାମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବଙ୍କ ଭାଇବୋହୂ ବିଧିବଦ୍ଧ ଭାବରେ ଆଜି ବିଜେପିରେ ମିଶିଛନ୍ତି । ଉତ୍ତରପ୍ରଦେଶ ବିଜେପି ସଭାପତି ସ୍ୱତନ୍ତ୍ର ଦେବ ସିଂହ ତାଙ୍କୁ ବିଜେପିରେ ବିଧିବଦ୍ଧ ଭାବେ ସାମିଲ କରାଇଛନ୍ତି। ଏହି ଅବସରରେ ଉତ୍ତରପ୍ରଦେଶ ଡେପୁଟି ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ମଧ୍ୟ ଉପସ୍ଥିତ ଥିଲେ । ମିଶ୍ରଣ ପର୍ବରେ ସ୍ୱତନ୍ତ୍ର ଦେବ ସିଂ ଓ କେଶବ ପ୍ରସାଦ ମୌର୍ଯ୍ୟ, ସମାଜବାଦୀ ପାର୍ଟି ଓ ଅଖିଳେଶ ଯାଦବଙ୍କ ଉପରେ ବର୍ଷିଥିଲେ ।

ବିଜେପିରେ ଯୋଗ ଦେବା ପରେ ଅପର୍ଣ୍ଣା ଯାଦବ କହିଛନ୍ତି କି ମୁଁ ସବୁ ସମୟରେ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ପ୍ରଭାବିତ ହୋଇଛି । ମୋ ପାଇଁ ଦେଶ ପ୍ରଥମେ । ମୁଁ ଏବେ ଦେଶର ସେବା କରିବାକୁ ଆସିଛି, ଯେଉଁଥି ପାଇଁ ମୁଁ ସମସ୍ତଙ୍କ ସହଯୋଗ କାମନା କରୁଛି । ସେ ପ୍ରଧାନମନ୍ତ୍ରୀଙ୍କ ଦ୍ୱାରା ହୋଇଥିବା ସ୍ୱଚ୍ଛ ଭାରତ ଅଭିଯାନ, ମହିଳା ଓ ରୋଜଗାର ପାଇଁ ହୋଇଥିବା ସବୁ ଯୋଜନାର ପ୍ରଶଂସା କରିଥିଲେ ।

ମୁଲାୟମ ସିଂହଙ୍କ ସାନ ବୋହୂ ଅପର୍ଣ୍ଣା ଯାଦବ। ସେ ମୁଲାୟମଙ୍କ ଦ୍ୱିତୀୟ ସ୍ତ୍ରୀ ସାଧାନା ଗୁପ୍ତାଙ୍କ ପୁଅ ପ୍ରତୀକ ଯାଦବଙ୍କ ସ୍ତ୍ରୀ । ୨୦୧୭ ବିଧାନସଭା ନିର୍ବାଚନ ଲକ୍ଷ୍ନୌର କ୍ୟାଣ୍ଟ ଆସନରୁ ଲଢ଼ିଥିଲେ ଅପର୍ଣ୍ଣା । କ୍ୟାଣ୍ଟ ଆସନରୁ ଲଢ଼ି ବିଜେପି ପ୍ରାର୍ଥୀ ରୀତା ବହୁଗୁଣା ଯୋଶୀଙ୍କ ଠାରୁ ହାରିଥିଲେ । ସେତେବେଳେ ତାଙ୍କୁ ୬୩ ହଜାର ଭୋଟ ମିଳିଥିଲା।

ପ୍ରଥମ ଥର ପାଇଁ ବିଧାନସଭା ନିର୍ବାଚନରେ ଭାଗ୍ୟ ପରୀକ୍ଷା କରିବେ ଅଖିଳେଶ

Santosh Kumar Sahoo
-
0
ପ୍ରଥମ ଥର ପାଇଁ ବିଧାନସଭା ନିର୍ବାଚନରେ ଭାଗ୍ୟ ପରୀକ୍ଷା କରିବେ ଅଖିଳେଶ

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ଲଢିବେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ । ଦୀର୍ଘ ବିଚାରବିମର୍ଶ ପରେ ମଇଦାନରେ ପାଦ ଦେବା ଲାଗି ନିଷ୍ପତ୍ତି ନେଇଛନ୍ତି ସୁପ୍ରିମୋ । ପୂର୍ବରୁ ସେ ନିର୍ବାଚନ ଲଢିବେ ନାହିଁ ଏବଂ ରାଜ୍ୟର ସମସ୍ତ ଆସନକୁ ଯାଇ ନିର୍ବାଚନ ପ୍ରଚାର କରିବାକୁ ପ୍ରକାଶ କରିଥିଲେ । ବିଜେପି ପକ୍ଷରୁ ଯୋଗୀ ଆଦିତ୍ୟନାଥ ଗୋରଖପୁର ଆସନରୁ ନିର୍ବାଚନ ଲଢୁଥିବାବେଳେ ଅଖିଳେଶ କେଉଁ ଆସନରୁ ଲଢିବେ ତାହା ସ୍ପଷ୍ଟ ହୋଇନାହିଁ । ପୂର୍ବ ଉତ୍ତରପ୍ରଦେଶର ଏକ ଆସନରୁ ସେ ଲଢିବା ସମ୍ଭାବନା ଥିବାବେଳେ ଏକାଦିକ୍ରମେ ଦୁଇଟି ଆସନରୁ ସେ ଲଢିବେ ବୋଲି ଚର୍ଚ୍ଚା ଚାଲିଛି । ବିଜେପିର ଅନେକ ପଛୁଆ ବର୍ଗ ନେତା ଓ ବିଧାୟକ ସମାଜବାଦୀ ପାର୍ଟିରେ ଯୋଗ ଦେଇଥିବାବେଳେ ସେ ନିର୍ବାଚନ ଲଢିବା ଲାଗି ବିଭିନ୍ନ ମହଲରୁ ଚାପ ସୃଷ୍ଟି ହୋଇ ଆସୁଥିଲା ।

ଗତ ନଭେମ୍ବରରେ ନିର୍ବାଚନରେ ଲଢିବେ ନାହିଁ ବୋଲି କହିଥିଲେ ଅଖିଳେଶ ଯାଦବ । ୨୦୧୨ରେ ସମାଜବାଦୀ ପାର୍ଟି ବିପୁଳ ଆସନରେ ବିଜୟ ହେବା ପରେ ଅଖିଳେଶ ମୁଖ୍ୟମନ୍ତ୍ରୀ ହୋଇଥିଲେ । ସେତେବେଳେ ସେ କନୌଜ ଲୋକସଭା ଆସନରୁ ସାଂସଦ ଥିଲେ । ପରେ ସେ ବିଧାନସଭା ପରିଷଦରୁ ନିର୍ବାଚିତ ହୋଇ ମାତ୍ର ୩୮ ବର୍ଷ ବୟସରେ ସର୍ବକନିଷ୍ଠ ମୁଖ୍ୟମନ୍ତ୍ରୀ ହୋଇଥିଲେ । କନୌଜ ଆସନରୁ ଇସ୍ତଫା ଦେବା ପରେ ସେଠାରୁ ଅପ୍ରତିଦ୍ୱନ୍ଦୀ ଭାବେ ନିର୍ବାଚିତ ହୋଇଥିଲେ ତାଙ୍କ ସ୍ତ୍ରୀ ଡିମ୍ପଲ । ବର୍ତ୍ତମାନ ଆଜମଗଡ଼ରୁ ସାଂସଦ ଅଛନ୍ତି ଅଖିଳେଶ ଯାଦବ ।

ମାଲ୍ୟାଙ୍କୁ ବଡ଼ ଧକ୍କା, ପ୍ରାସାଦ ଛାଡିବାକୁ ଲଣ୍ଡନ ହାଇକୋର୍ଟଙ୍କ ନିର୍ଦ୍ଦେଶ

Santosh Kumar Sahoo
-
0
ମାଲ୍ୟାଙ୍କୁ ବଡ଼ ଧକ୍କା, ପ୍ରାସାଦ ଛାଡିବାକୁ ଲଣ୍ଡନ ହାଇକୋର୍ଟଙ୍କ ନିର୍ଦ୍ଦେଶ

ଲଣ୍ଡନ: ପଳାତକ ଘୋଷିତ ବିଜୟ ମାଲ୍ୟାଙ୍କୁ ବଡ ଧରଣର ଧକ୍କା । ଲଣ୍ଡନର ପ୍ରାଚୁର୍ଯ୍ୟ ତଥା ବିଳାସମୟ ପ୍ରାସାଦ ଛାଡିବା ଲାଗି ଲଣ୍ଡନ ହାଇକୋର୍ଟଙ୍କ ନିର୍ଦ୍ଦେଶ । ସୁଇସ ବ୍ୟାଙ୍କ ୟୁବିଏସର ପ୍ରାପ୍ୟ ପ୍ରଦାନରେ ବିଳମ୍ବତା ଯୋଗୁ ତାଙ୍କୁ ଏହି ପ୍ରାସାଦ ଖାଲି କରିବାକୁ ପଡିବ । ଲଣ୍ଡନର ସବୁଠାରୁ ହାଇପ୍ରୋଫାଇଲ ଇଲାକା ତଥା ରିଜେଣ୍ଟସ ପାର୍କ ଓ ମାଡାମ ଟୁସାଦଙ୍କ ଓ୍ୱାକ୍ସ ମ୍ୟୁଜିୟମ ନିକଟରେ ଅବସ୍ଥିତ 18/19 Cornwall Terrace ପ୍ରାସାଦକୁ ହାତଛଡା କରିବେ ମାଲ୍ୟା । ଏହି ପ୍ରାସାଦକୁ ମାଲ୍ୟା ବନ୍ଧକ ରଖିଥିଲେ ବି ପ୍ରାପ୍ୟ ପ୍ରଦାନ କରି ନଥିଲେ ।

ଏହି ପ୍ରାସାଦରେ ବର୍ତ୍ତମାନ ମାଲ୍ୟା, ପୁଅ ସିଦ୍ଧାର୍ଥ ଓ ୯୫ ବର୍ଷ ବୟସ୍କା ମାଲ୍ୟାଙ୍କ ମା’ ରହୁଛନ୍ତି । ଆଉ କିଛି ଦିନ ସମୟ ଦେବା ପାଇଁ ମାଲ୍ୟାଙ୍କ ଓକିଲ ଅନୁରୋଧ କରିଥିଲେ ବି କୋର୍ଟ ତାହାକୁ ଅଗ୍ରାହ୍ୟ କରିଛନ୍ତି । ଋଣ ପୈଠ କରିବାର ଡେଡଲାଇନ ଥିଲା ଏପ୍ରିଲ ୨୦୨୦ । ମାତ୍ର କୋଭିଡ ଯୋଗୁ ତାଙ୍କୁ ଏହି ବାସଭବନରୁ ଉଚ୍ଛେଦ କରାଯାଇପାରି ନଥିଲା । ୯ ହଜାର କୋଟି ଟଙ୍କାର ଜାଲିଆତି ତଥା କିଙ୍ଗଫିସର ଏୟାରଲାଇନ୍ସର ପତନ ପରେ ଲଣ୍ଡନରେ ରହୁଛନ୍ତି ମାଲ୍ୟା । ଗତ ୩ ବର୍ଷ ଧରି ମାମଲା ଚାଲି ଆସୁଥିଲେ ବି ଭାରତ ହାତରେ ତାଙ୍କୁ ପ୍ରତ୍ୟର୍ପଣ କରିବା ସମ୍ଭବ ହୋଇନାହିଁ ।

ବୈତରଣୀ ନଦୀକୁ ଧସିଲା ସୁରକ୍ଷାବନ୍ଧ

Santosh Kumar Sahoo
-
0
ବୈତରଣୀ ନଦୀକୁ ଧସିଲା ସୁରକ୍ଷାବନ୍ଧ

ଆରଡି: ବୈତରଣୀ ନଦୀକୁ ଧସିଲା ସୁରକ୍ଷାବନ୍ଧ । ଆଖଣ୍ଡଳମଣି କୁଆଖିଆ ଜାତୀୟ ରାଜପଥର ୨ ଶହ ଫୁଟ ରାସ୍ତା ଦବିଛି । ରାସ୍ତା ଦବିବା ଫଳରେ ଯୋଗାଯୋଗ ବିଛିନ୍ନ ହେବା ଆଶଙ୍କା ରହିଛି । ଆରଡି ନିକଟସ୍ଥ ବୋଡକ ନିକଟରେ ପ୍ରବାହିତ ହେଉଥିବା ବୈତରଣୀ ନଦୀର ସୁରକ୍ଷାବନ୍ଧରେ ଫାଟ ସୃଷ୍ଟି ହେବା ସହ କିଛି ଅଂଶ ନଦୀକୁ ଧସିଯିବାରୁ ଆଖଣ୍ଡଳମଣି-କୁଆଖିଆ ୨୦ ନମ୍ବର ଜାତୀୟ ରାଜପଥର ପାଖାପାଖି ୨ଶହ ଫୁଟ ରାସ୍ତା ଦବି ଯାଇଛି । ମଝିରେ ଏକ ବଡ ଫାଟ ସୃଷ୍ଟି ହୋଇଛି । ଫଳରେ ଯାତାୟତରେ ନାନା ଅସୁବିଧା ସୃଷ୍ଟି ହୋଇଛି ।

ଏହି ରାସ୍ତା ଆଖଣ୍ଡଳମଣି ପୀଠ ଓ ମା’ ବିରଜାକ୍ଷେତ୍ରକୁ ସଂଯୋଗ କରୁଥିବା ବେଳେ ସ୍ଥାନୀୟ ୩୫ ଖଣ୍ଡ ଗାଁ’ର ଲୋକ ପ୍ରତିଦିନ କଟକ- ଭୁବନେଶ୍ୱର ଆଦି ସ୍ଥାନକୁ ଏହି ରାସ୍ତା ଦେଇ ଯାତାୟତ କରିଥାନ୍ତି । ରାସ୍ତା କ୍ରମଃଶ ନଦୀ ଆଡକୁ ଢଳୁଥିବାରୁ ବିଛିନ୍ନ ହେବାର ଆଶଙ୍କା ସୃଷ୍ଟି ହୋଇଛି । ୨୦ ନମ୍ବର ଜାତୀୟ ରାଜପଥର ସୁରକ୍ଷା ପାଇଁ ଯାଜପୁର ଜଳସେଚନ ବିଭାଗ ପକ୍ଷରୁ କୋଟିକୋଟି ଟଙ୍କା ବ୍ୟୟ ବରାଦ କରାଯାଇ ବୈତରଣୀ ନଦୀର ସୁରକ୍ଷାବନ୍ଧ ନିର୍ମାଣ କରାଯାଇଥିଲେ ମଧ୍ୟ ନିମ୍ନମାନର କାମ ଯୋଗୁ ବାରମ୍ବାର ଏହି ସ୍ଥାନରେ ବନ୍ଧ ଧସିବା ସହ ରାସ୍ତା ନଦୀରେ ଲିନ ହେଉଛି । ଫଳରେ ସ୍ଥାନୀୟ ଲୋକଙ୍କ ସହ ଆଗନ୍ତୁକ ନାନା ଅସୁବିଧାରେ ସମ୍ମୁଖିନ ହେଉଛନ୍ତି ବୋଲି ସ୍ଥାନୀୟ ଲୋକ କହିଛନ୍ତି । ଏପରିକି ଏନ.ଏଚ ବିଭାଗ ପକ୍ଷରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ରାସ୍ତା ମରାମତି କରାଯାଉଥିଲେ ମଧ୍ୟ ବିଭାଗୀୟ ଅଧିକାରୀ ଓ ଠିକାଦାରଙ୍କ ଅସାଧୁ ମେଣ୍ଟ ଯୋଗୁ କାମ ଠିକ ହେଉନଥିବାରୁ ଏପରି ସମସ୍ୟା ଦେଖାଦେଇଛି ବୋଲି କହିଛନ୍ତି ବୁଦ୍ଧିଜୀବୀ ।

ବନ୍ଧୁକ ଦେଖାଇ ପେଟ୍ରୋଲ ପମ୍ପରୁ ଲୁଟିଲେ ଲକ୍ଷାଧିକ ଟଙ୍କା

Santosh Kumar Sahoo
-
0
ବନ୍ଧୁକ ଦେଖାଇ ପେଟ୍ରୋଲ ପମ୍ପରୁ ଲୁଟିଲେ ଲକ୍ଷାଧିକ ଟଙ୍କା

ଖୋର୍ଦ୍ଧା: ବନ୍ଧୁକ ଦେଖାଇ ପେଟ୍ରୋଲ ପମ୍ପରୁ ଲୁଟ । ଏହି ଘଟଣା ଘଟିଛି ଜଙ୍କିଆ ଥାନା ଛଣଗିରି ବିକାଶ ଫିଲ୍ଲଂ ଷ୍ଟେସନରେ । ଗତକାଲି ରାତି ୯.୩୦ ମିନିଟରେ ପେଟ୍ରୋଲ ପମ୍ପ କର୍ମଚାରୀ ଟଙ୍କା ହିସାବ କରୁଥିବା ସମୟରେ ୩ ଜଣ ଦୁର୍ବୁତ୍ତ ଏକ ବାଇକରେ ଆସି କର୍ମଚାରୀ ମ୍ୟାନେଜରଙ୍କୁ ବନ୍ଧୁକ ଦେଖାଇ ଭୟଭୀତ କରାଇଥିଲେ । ଏହାପରେ ତାଙ୍କଠାରୁ ଟଙ୍କା ଭର୍ତ୍ତି ବ୍ୟାଗ, ଡ୍ର’ରେ ଥିବା ଅର୍ଥ ସବୁ ଲୁଟି ନେଇଥିଲେ । ଏହି ଲୁଟର ପୂରା ଦୃଶ୍ୟ ସିସିଟିଭିରେ କଏଦ ହୋଇଛି । ତେବେ ଦୁର୍ବୃତ୍ତଙ୍କ ମୁହଁରେ ମାସ୍କ , ମୁଣ୍ଡରେ ମଫୁଲର ପିନ୍ଧିଥିବାରୁ ଚିହ୍ନିବା ମୁସ୍କିଲ ହୋଇଛି । ପେଟ୍ରୋଲ ପମ୍ପ ମାଲିକ ଜଙ୍କିଆ ଥାନା ଖବର ଦେବା ପରେ ପୋଲିସ ତଦନ୍ତ ଚଳାଇଛି  ।

ଖଲିସ୍ତାନୀ ଆତଙ୍କବାଦୀ ଯଶବିନ୍ଦର ସିଂ ମୁଲତାନିର ସୂଚନା ଦେଲେ ମିଳିବ ୧୦ ଲକ୍ଷ, ଘୋଷଣା କଲା NIA

Santosh Kumar Sahoo
-
0
ଖଲିସ୍ତାନୀ ଆତଙ୍କବାଦୀ ଯଶବିନ୍ଦର ସିଂ ମୁଲତାନିର ସୂଚନା ଦେଲେ ମିଳିବ ୧୦ ଲକ୍ଷ, ଘୋଷଣା କଲା NIA

ନୂଆଦିଲ୍ଲୀ: କୁଖ୍ୟାତ ଖଲିସ୍ତାନୀ ଆତଙ୍କବାଦୀ ଯଶବିନ୍ଦର ସିଂ ମୁଲତାନି ଲାଗି ୧୦ ଲକ୍ଷ ଟଙ୍କାର ପୁରସ୍କାର ଘୋଷଣା କଲା ଜାତୀୟ ତଦନ୍ତକାରୀ ସଂସ୍ଥା ବା ଏନଆଇଏ । ବହୁଚର୍ଚ୍ଚିତ ଲୁଧିଆନା କୋର୍ଟ ବ୍ଲାଷ୍ଟ ମାମଲାରେ ଜଡିତ ଥିଲା ମୁଲତାନି । ଆସନ୍ତା ମାସରେ ପଞ୍ଜାବରେ ବିଧାନସଭା ନିର୍ବାଚନ ହେବାକୁ ଯାଉଥିବା ବେଳେ ମୁଲତାନି ହିଂସାକାଣ୍ଡ ଘଟାଇପାରେ ବୋଲି ଆଶଙ୍କା ବ୍ୟକ୍ତ କରିଛି ଏନଆଇଏ । ପାକିସ୍ତାନରୁ ପଞ୍ଜାବକୁ ବିପୁଳ ବିସ୍ଫୋରକ ଯୋଗାଇବା ଲାଗି ସେ ଯୋଜନା କରୁଛି ବୋଲି ସୂଚନା ମିଳିବା ପରେ ଏନଆଇଏ ତତ୍ପରତା ପ୍ରକାଶ କରିଛି । ଡିସେମ୍ବର ୨୩  ଲୁଧିଆନା କୋର୍ଟ ବିସ୍ଫୋରଣ ଘଟଣାରେ ଜଣେ ବ୍ୟକ୍ତି ପ୍ରାଣ ହରାଇଥିବା ବେଳେ ୫ ଜଣ ଆହତ ହୋଇଥିଲେ ।

ଆତଙ୍କବାଦ କାର୍ଯ୍ୟକଳାପ ପାଇଁ ଅର୍ଥ ଯୋଗାଡ କରିବା, ଷଡଯନ୍ତ୍ର, ଭାରତ ବିରୋଧରେ ଆକ୍ରମଣ ଯୋଜନା ଆଦି ଅଭିଯୋଗ ପରେ ଗୃହ ମନ୍ତ୍ରଣାଳୟ ନିର୍ଦ୍ଦେଶରେ ମୁଲତାନି ବିରୋଧରେ ଏନଆଇଏ ମାମଲା ରୁଜୁ କରିଛି । ଗତ ମାସରେ ମୁଲତାନିକୁ ଜର୍ମାନୀରୁ ଗିରଫ କରାଯାଇଥିବା ବେଳେ ତାକୁ ଖଲାସ କରି ଦିଆଯାଇଥିଲା । ନିଷିଦ୍ଧ ଘୋଷିତ ସଂଗଠନ ଶିଖସ୍ ଫର ଜଷ୍ଟିସ ସହ ସେ ସମ୍ପୃକ୍ତ ଥିଲା । ୨୦୦୭ରେ ପ୍ରତିଷ୍ଠିତ ଏସଏଫଜେ ସଂଗଠନ ପଞ୍ଜାବରେ ସ୍ୱତନ୍ତ୍ର ଶିଖ୍ ଭୂଖଣ୍ଡ ଦାବି କରିଆସୁଛି ।

ଦେଶରେ ପୁଣି ବଢ଼ିଲା କରୋନା, ୨୪ ଘଣ୍ଟାରେ ୨ ଲକ୍ଷ ୮୨ ହଜାରରୁ ଅଧିକ ଆକ୍ରାନ୍ତ ଚିହ୍ନଟ

Santosh Kumar Sahoo
-
0
ଦେଶରେ ପୁଣି ବଢ଼ିଲା କରୋନା, ୨୪ ଘଣ୍ଟାରେ ୨ ଲକ୍ଷ ୮୨ ହଜାରରୁ ଅଧିକ ଆକ୍ରାନ୍ତ ଚିହ୍ନଟ

ନୂଆଦିଲ୍ଲୀ: ଦେଶରେ ବେକାବୁ କରୋନା । ଗତକାଲିଠାରୁ ପୁଣି ଥରେ ଦେଶରେ କରୋନା ସଂକ୍ରମଣ ବୃଦ୍ଧି ପାଇଛି । ଗତକାଲିଠାରୁ ୪୪ ହଜାର ୮୮୯ ଅଧିକ ସଂକ୍ରମିତ ଚିହ୍ନଟ ହୋଇଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ ୨୪ ଘଣ୍ଟାରେ ୨ ଲକ୍ଷ ୮୨ ହଜାର ୯୭୦ ଜଣ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ୨୪ ଘଣ୍ଟାରେ ୪୪୧ ଆକ୍ରାନ୍ତଙ୍କ ଜୀବନ ନେଇଛି କିଲର କରୋନା । ଦେଶର ଦୈନିକ ପଜିଟିଭ ରେଟ୍ ୧୫.୧୩ ପ୍ରତିଶତ ରହିଛି । ଯଦି ଓମିକ୍ରନ ଆକ୍ରାନ୍ତଙ୍କ ସଂଖ୍ୟା କହିବା ତାହାଲେ ଦେଶରେ ମୋଟ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୮ ହଜାର ୯୬୧ରେ ପହଞ୍ଚିଛି ।

ଦେଶରେ ମଙ୍ଗଳବାର ୨ ଲକ୍ଷ ୩୮ ହଜାର ୦୧୮ ଜଣ ଆକ୍ରାନ୍ତ ଚିହ୍ନଟ ହୋଇଥିଲେ । କିନ୍ତୁ ଆଜି ଏହି ସଂଖ୍ୟା ବୃଦ୍ଧି ପାଇ ୨ ଲକ୍ଷ ୮୨ ହଜାର ୯୭୦ରେ ପହଞ୍ଚିଛି । ଆକ୍ଟିଭ୍ କେସ୍ କଥା ଯଦି କହିବା ତାହାଲେ ଦେଶରେ ବର୍ତ୍ତମାନ ଆକ୍ଟିଭ୍ କେସ୍ ୧୮ ଲକ୍ଷ ୩୧ ହଜାର ୬୨୮ ରହିଛି । ସେହିପରି ୨୪ ଘଣ୍ଟାରେ ଦେଶରେ ୧ ଲକ୍ଷ ୮୮ ହଜାର ୧୫୭ ଜଣ ସୁସ୍ଥ ହୋଇଛନ୍ତି ।

ରାଜ୍ୟରେ ବେକାବୁ କରୋନା, ୨୪ ଘଣ୍ଟାରେ ୧୧ ହଜାର ୬୦୭ ଆକ୍ରାନ୍ତ ଚିହ୍ନଟ

Santosh Kumar Sahoo
-
0
ରାଜ୍ୟରେ ବେକାବୁ କରୋନା, ୨୪ ଘଣ୍ଟାରେ ୧୧ ହଜାର ୬୦୭ ଆକ୍ରାନ୍ତ ଚିହ୍ନଟ

ଭୁବନେଶ୍ୱର: ରାଜ୍ୟରେ ହୁ ହୁ ହୋଇ ବଢ଼ିବାରେ ଲାଗିଛି କରୋନା ସଂକ୍ରମଣ । ପ୍ରତିଦିନ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି । ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ ରାଜ୍ୟରେ ୨୪ ଘଣ୍ଟାରେ ୧୧ ହଜାର ଟପିଛି କରୋନା ସଂକ୍ରମଣ । ୨୪ ଘଣ୍ଟାରେ ରାଜ୍ୟରେ ୧୧ ହଜାର ୬୦୭ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ୨୪ ଘଣ୍ଟାରେ ରାଜ୍ୟରେ ଚିହ୍ନଟ ହୋଇଥିବା ମୋଟ ସଂକ୍ରମିତଙ୍କ ମଧ୍ୟରୁ କ୍ୱାରେଣ୍ଟାଇନରୁ ୬ ହଜାର ୭୨୮ କେସ୍ ଚିହ୍ନଟ ହୋଇଥିବାବେଳେ ଲୋକାଲ୍ କେସ୍ ୪ ହଜାର ୮୭୯ ଜଣ ଚିହ୍ନଟ ହୋଇଛନ୍ତି । ସେହିପରି ୦ରୁ ୧୮ ବର୍ଷ ମଧ୍ୟରେ ରାଜ୍ୟରେ ୯୯୧ ଜଣ ଚିହ୍ନଟ ହୋଇଛନ୍ତି ।

୨୪ ଘଣ୍ଟାରେ ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ଖୋର୍ଦ୍ଧାରୁ ସର୍ବାଧିକ ସଂକ୍ରମିତ ଚିହ୍ନଟ ହୋଇଛନ୍ତି । ଖୋର୍ଦ୍ଧାରୁ ସର୍ବାଧିକ ୪ ହଜାର ୩୪୭ ସଂକ୍ରମିତ ଚିହ୍ନଟ ହୋଇଛନ୍ତି । ସେହିପରି ଅନୁଗୁଳରୁ ୧୮୫, ବାଲେଶ୍ୱରରୁ ୩୦୫, ବରଗଡ଼ରୁ ୧୪୫, ଭଦ୍ରକରୁ ୧୫୩, ବଲାଙ୍ଗୀରରୁ ୨୨୯, ବୌଦ୍ଧରୁ ୭୮, କଟକରୁ ୮୯୮, ଦେଓଗଡ଼ରୁ ୭୫, ଢେଙ୍କାନାଳରୁ ୭୧, ଗଜପତିରୁ ୮୭, ଗଞ୍ଜାମରୁ ୯୩, ଜଗତସିଂହପୁରରୁ ୧୩୪, ଯାଜପୁରରୁ ୨୩୧, ଝାରସୁଗୁଡ଼ାରୁ ୨୧୯, କଳାହାଣ୍ଡିରୁ ୧୦୩, କନ୍ଧମାଳରୁ ୮୦, କେନ୍ଦ୍ରାପଡ଼ାରୁ ୧୧୯, କେନ୍ଦୁଝରରୁ ୧୨୧, କୋରାପୁଟରୁ ୧୬୮, ମାଲକାନଗିରିରୁ ୮୫, ମୟୁରଭଞ୍ଜରୁ ୧୭୪, ନବରଙ୍ଗପୁରରୁ ୧୪୯, ନୟାଗଡ଼ରୁ ୨୦୬, ନୂଆପଡ଼ାରୁ ୧୬୬, ପୁରୀରୁ ୧୫୭, ରାୟଗଡ଼ାରୁ ୨୨୯, ସମ୍ବଲପୁରରୁ ୩୯୦, ସୋନପୁରରୁ ୧୧୪, ସୁନ୍ଦରଗଡ଼ରୁ ୧୨୧୯, ଷ୍ଟେଟ ପୁଲରୁ ୮୭୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ୨୪ ଘଣ୍ଟାରେ ରାଜ୍ୟରେ ୭୭୪୫ ଆକ୍ରାନ୍ତ ସୁସ୍ଥ ହୋଇଛନ୍ତି ।

ଓଡ଼ିଶାରେ ପହଞ୍ଚିଲା ଓମିକ୍ରନ ଟେଷ୍ଟିଂ କିଟ୍ ଓମିସିୟୋର

Santosh Kumar Sahoo
-
0
ଓଡ଼ିଶାରେ ପହଞ୍ଚିଲା ଓମିକ୍ରନ ଟେଷ୍ଟିଂ କିଟ୍ ଓମିସିୟୋର

ଭୁବନେଶ୍ୱର: ଓଡ଼ିଶାରେ ପହଞ୍ଚିଲା ଓମିକ୍ରନ ଟେଷ୍ଟିଂ କିଟ୍ ଓମିସିୟୋର । ରାଜ୍ୟରେ ଏଣିକି ସହଜ ହେବ ଓମିକ୍ରନ ଟେଷ୍ଟ । ଓମିକ୍ରନ ଟେଷ୍ଟିଂ କିଟ୍ ଓଡ଼ିଶାରେ ପହଞ୍ଚିବା ପରେ ଆଉ ଜେନମ ସିକ୍ୱେନ୍ସିଂ କରିବା ଆବଶ୍ୟକ ପଡିବନି । ପ୍ରଥମ ପର୍ଯ୍ୟାୟରେ କିଛି ପରିମାଣର କିଟ୍ ରାଜ୍ୟକୁ ଆସିଛି । ମେଡିକାଲ ଆଣ୍ଡ ଡାଇଗ୍ନୋଷ୍ଟିକ୍ସ ଲିମିଟେଡ୍ ଟାଟା ଏମଡି ଓଡ଼ିଶାକୁ ଏହି କିଟ୍ ପଠାଇଛି । ଓମିକ୍ରନ କିଟ୍ ଓମିସିୟୋରର ୫ ଲକ୍ଷ କିଟ୍ ପାଇଁ ଅର୍ଡର ଦେଇଛନ୍ତି ରାଜ୍ୟ ସ୍ୱାସ୍ଥ୍ୟ ବିଭାଗ । ପ୍ରଥମ ରାଜ୍ୟ ଭାବେ ଓଡ଼ିଶା ଓମିସିୟୋର କିଟ୍ ଆଣିଛି । ଓମିକ୍ରନର ଲକ୍ଷଣ ଥିଲେ ସଙ୍ଗେ ସଙ୍ଗେ ଏହି କିଟ୍‌ରେ ଟେଷ୍ଟ କରିବା ଦ୍ୱାରା ଓମିକ୍ରନ ଭୂତାଣୁ ଚିହ୍ନଟ ହୋଇପାରିବ ।

ପ୍ରଥମ ପର୍ଯ୍ୟାୟରେ ୩୦ ହଜାର ଓମିସିୟୋର କିଟ୍ ବ୍ରହ୍ମପୁର, କଟକ, ରାଉରକେଲା ଓ ଭୁବନେଶ୍ୱରରେ ବ୍ୟବହାର ହେବ । ଟେଷ୍ଟିଂ କିଟ୍ ଆସିବା ପରେ ଡ୍ରାଏ ରନ ଚାଲିଛି । କିଟ୍ ଠିକ ଅଛି କି ନା ନାହିଁ ଟେଷ୍ଟ କରାଯାଉଛି । ଇଣ୍ଟରନାଲ ଷ୍ଟଡି ପାଇଁ ବ୍ୟବହାର କରାଯିବ । ଯେଉଁ ଜିଲ୍ଲାରେ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି ସେହି ଜିଲ୍ଲାକୁ କିଟ୍ ପଠାଯିବ ।

ଆଜିଠୁ ଭାରତ-ଦକ୍ଷିଣ ଆଫ୍ରିକା ଦିନିକିଆ ସିରିଜ ଆରମ୍ଭ, ଡେବ୍ୟୁ କରିପାରନ୍ତି ଭେଙ୍କଟେଶ ଆୟର

Santosh Kumar Sahoo
-
0
ଆଜିଠୁ ଭାରତ-ଦକ୍ଷିଣ ଆଫ୍ରିକା ଦିନିକିଆ ସିରିଜ ଆରମ୍ଭ, ଡେବ୍ୟୁ କରିପାରନ୍ତି ଭେଙ୍କଟେଶ ଆୟର

କେପଟାଉନ: ଟେଷ୍ଟ ପରେ ଆଜିଠୁ ଆରମ୍ଭ ହେବ ଭାରତ-ଦକ୍ଷିଣ ଆଫ୍ରିକା ଦିନିକିଆ ସିରିଜ୍ । ୩ ଟିକିଆ ସିରିଜର ପ୍ରଥମ ମ୍ୟାଚ ଆଜି ଖେଳାଯିବ । ଭାରତୀୟ ସମୟ ଅପରାହ୍ନ ୨ଟାରେ ଖେଳାଯିବ ଏହି ମ୍ୟାଚ । ଆହତ ପାଇଁ ରୋହିତ ଶର୍ମା ଏହି ସିରିଜରୁ ବାଦ୍ ପଡ଼ିବା ପରେ ଦଳର ମଙ୍ଗ ଧରିବେ ରାହୁଲ । ଟେଷ୍ଟ ସିରିଜରେ ପରାଜୟର ବଦଲା ନେବା ଲକ୍ଷ୍ୟରେ ପଡ଼ିଆକୁ ଓହ୍ଲାଇବ ବ୍ଲୁ ବ୍ରିଗେଡ । ସେହିପରି ୨୦୧୬ ମସିହା ପରେ ପ୍ରଥମ ଥର ପାଇଁ ବିନା ଅଧିନାୟକତ୍ୱରେ ଖେଳିବେ ବିରାଟ କୋହଲି । ଏପରି ସ୍ଥିତିରେ ବିରାଟଙ୍କ ପ୍ରଦର୍ଶନ ଉପରେ ସମସ୍ତଙ୍କର ନଜର ରହିବ ।

ଭାରତର ଚୁଡାନ୍ତ ଏକାଦଶ କଥା କହିବା ତାହାଲେ ଅଧିନାୟକ କେଏଲ ରାହୁଲ ଓ ଶିଖର ଧାଓ୍ୱନ ପାରି ଆରମ୍ଭ କରିବେ । ତୃତୀୟ ସ୍ଥାନରେ ବିରାଟ କୋହଲି ଖେଳିବ । ସେହିପରି ଚତୁର୍ଥ ସ୍ଥାନରେ ସୂର୍ଯ୍ୟକୁମାର ଯାଦବ କିମ୍ବା ଶ୍ରେୟସ ଆୟରଙ୍କ ମଧ୍ୟରୁ ଜଣଙ୍କୁ ଚୂଡାନ୍ତ ଏକାଦଶରେ ସ୍ଥାନ ମିଳିପାରେ । ଋଷଭ ପନ୍ତ ପଞ୍ଚମରେ ବ୍ୟାଟିଂ କରିବେ ଏବଂ ଘରୋଇ ସିଜିନରେ ଦମଦାର ପ୍ରଦର୍ଶନ ପରେ ଦଳରେ ସ୍ଥାନ ପାଇଥିବା ଅଲରାଉଣ୍ଡର ଭେଙ୍କଟେଶ ଆୟର ଷଷ୍ଠ କ୍ରମରେ ବ୍ୟାଟିଂ କରି ପାରନ୍ତି । ସେହିପରି ଦୀର୍ଘ ପାଞ୍ଚ ବର୍ଷ ପରେ ରବିଚନ୍ଦ୍ରନ ଅଶ୍ଵିନୀ ଦିନିକିଆ କ୍ରିକେଟକୁ ଫେରିବେ । ଦ୍ରୁତ ବୋଲରରେ ଜଶପ୍ରୀତ ବୁମ୍ରା, ଭୁବନେଶ୍ଵର କୁମାରଙ୍କ ସହ ଶାର୍ଦ୍ଦୁଳ ଠାକୁର ଖେଳିବାର ସମ୍ଭାବନା ଅଧିକ ରହିଛି।

ଭାରତ ସମ୍ଭାବିତ ଏକାଦଶ:

କେ.ଏଲ ରାହୁଲ (ଅଧିନାୟକ), ଶିଖର ଧାଓ୍ଵନ, ବିରାଟ କୋହଲି, ସୂର୍ଯ୍ୟକୁମାର ଯାଦବ/ଶ୍ରେୟସ ଆୟର, ଋଷଭ ପନ୍ତ (ଓ୍ଵିକେଟ୍ କିପର), ଭେଙ୍କଟେଶ ଆୟର, ଶାର୍ଦ୍ଦୁଳ ଠାକୁର, ଆର ଅଶ୍ଵିନୀ, ୟୁଜବେନ୍ଦ୍ର ଚହଲ, ଭୁବନେଶ୍ଵର କୁମାର, ଯଶପ୍ରୀତ ବୁମ୍ରା

1...4,8334,8344,835...8,103Page 4,834 of 8,103

Latest Stories

Location

Popular Tags

Odisha16658NANDIGHOSHA TV6043INDIA3284BHUBANESWAR3081BJD2151NandighoshaTv2057Naveen Patnaik1914PURI1744BJP1630

Contact us