ନୂଆଦିଲ୍ଲୀ: କରୋନାର ନୂଆ ଭାରିଆଣ୍ଟ ଓମିକ୍ରନ୍ ସଂକ୍ରମଣ ମାମଲା ଭାରତରେ ଦ୍ରୁତ ଗତିରେ ବୃଦ୍ଧି ପାଉଛି । ଓମିକ୍ରନ୍ ମାମଲା ବଢ଼ି ଚାଲିଥିବା ବେଳେ ବଡ଼ ନିଷ୍ପତ୍ତି ନେଇଛି ଆଇସିଏମ୍ଆର୍ । ICMR ଓମିକ୍ରନ ଭାରିଆଣ୍ଟକୁ ଚିହ୍ନଟ କରିବା ପାଇଁ ଏକ ସ୍ୱତନ୍ତ୍ର କିଟକୁ ମଞ୍ଜୁରି ଦେଇଛି । ଏହି କିଟକୁ ଟାଟା ମେଡିକାଲ ତିଆରି କରିଛି । ଯାହାର ନାମ ହେଉଛି ’Omisure’ ।
ସୂଚନା ଅନୁସାରେ ଟାଟା ମେଡିକାଲ ଦ୍ୱାରା ତିଆରି ହୋଇଥିବା ଏହି କିଟକୁ ୩୦ ଡିସେମ୍ବରରେ ମଞ୍ଜୁରି ମିଳିସାରିଥିଲା । ଯାହାର ସୂଚନା ଏବେ ସାମ୍ନାକୁ ଆସିଛି । ତେବେ ବର୍ତ୍ତମାନ ଦେଶରେ ଓମିକ୍ରନ ମାମଲା ଚିହ୍ନଟ କରିବା ପାଇଁ ଅନ୍ୟ ଏକ କିଟର ବ୍ୟବହାର କରାଯାଉଛି । ଏହି ମଲ୍ଟିପ୍ଲେକ୍ସ କିଟ୍ ଆମେରିକାର ଥର୍ମୋ ଫିସର ଦ୍ୱାରା ତିଆରି କରାଯାଇଛି । ତେବେ ବର୍ତ୍ତମାନ ଟାଟାର ଯେଉଁ କିଟକୁ ICMR ମଞ୍ଜୁରି ଦେଇଛି ଏହାର ନାମ ହେଉଛି TATA MD CHECK RT-PCR Omisure ଅଟେ ।
କରୋନାର ନୂଆ ଭାରିଆଣ୍ଟ ଓମିକ୍ରନ ବର୍ତ୍ତମାନ ସାରା ଦେଶରେ ହୁ ହୁ ହୋଇ ବଢ଼ିଚାଲିଛି । ତେବେ ଓମିକ୍ରନ କରୋନାର ଡେଲଟା ଓ ଡେଲଟା ପ୍ଲସ ଭାରିଆଣ୍ଟ ପରି ଭୟଙ୍କର ନୁହେଁ । କିନ୍ତୁ ଏହା ଦ୍ରୁତ ଗତରେ ମାଡି ଚାଲିଛି । ସ୍ୱାସ୍ଥ୍ୟ ମନ୍ତ୍ରଣାଳୟର କହିବା ଅନୁସାରେ ଭାରତରେ ମୋଟ ଓମିକ୍ରନ ସଂଖ୍ୟା ୧୮୯୨ରେ ପହଞ୍ଚିଛି । ସେଥିମଧ୍ୟରୁ ଦିଲ୍ଲୀରେ ୫୬୮ କେସ୍ ଚିହ୍ନଟ ହୋଇଥିବାବେଳେ ମୁମ୍ବାଇରେ ୩୮୨ କେସ୍ ଚିହ୍ନଟ ହୋଇଛି ।
