ଉଦ୍ୟାନ କୃଷି ବିଭାଗ ସହଯୋଗରେ ଉପାନ୍ତ ଅଞ୍ଚଳରେ ହେଉଛି ଆଳୁ ଚାଷ

ଧର୍ମଗଡ଼: ଉପାନ୍ତ ଅଞ୍ଚଳରେ ସୁନାର ଫସଲ । କଳାହଣ୍ଡି ଜିଲ୍ଲା ଧର୍ମଗଡ଼ ଉପଖଣ୍ଡରେ ହେଉଛି ଆଳୁ ଚାଷ । ଉଦ୍ୟାନ କୃଷି ବିଭାଗ ପକ୍ଷରୁ ପ୍ରୋତ୍ସାହନ ମିଳିବା ପରେ ଗୋତମୁଣ୍ଡା ଅଞ୍ଚଳର ପାହାଡିଆ ଜମିରେ ଆଳୁ ଚାଷ କରୁଛନ୍ତି ଚାଷୀ । ଫସଲର ଏବେ ଅମଳ ସମୟ ହୋଇଥିବା ବେଳେ ଭଲ ଦୁଇ ପଇସା ଲାଭ ହେବ ବୋଲି ଆଶା ରଖିଛନ୍ତି ଚାଷୀ ।

ଉପାନ୍ତରେ ଆଳୁ ଚାଷ । ଉପଯୋଗୀ ହେଉଛି ପାହାଡ଼ିଆ ଦୋରସା ମାଟି । ପ୍ରତିକୂଳ ଜଳବାୟୁ ସତ୍ତ୍ୱେ କ୍ଷେତରେ ଖେଳୁଛି ସୁନାର ଫସଲ । କଳାହାଣ୍ଡି ଜିଲ୍ଲାର ପାହାଡିଆ ଜମି ସବୁଜମୟ ହୋଇଥିବା ବେଳେ ସଫଳ ହୋଇଛି ଆଳୁ ମିଶନ । ଉଦ୍ୟାନ କୃଷି ବିଭାଗର ପ୍ରୋତ୍ସାହନ ପରେ ଧର୍ମଗଡ଼ ଉପଖଣ୍ଡରେ ଆଳୁ ଚାଷ ପ୍ରତି ଆକୃଷ୍ଟ ହୋଇଛନ୍ତି ଚାଷୀ । ଜଳସେଚନର ସୁବିଧା ଥିବାରୁ ସବସିଡ୍ ବିହନ ଆଣି ଚାଷ କରୁଛନ୍ତି । ଆଉ ଭଲ ଦୁଇ ପଇସା ଲାଭ ହେବ ବୋଲି ଆଶା ରଖିଛନ୍ତି ଚାଷୀ ।

ଧର୍ମଗଡ଼ ଉପଖଣ୍ଡର ଗୋତମୁଣ୍ଡା, କୋକସରା, ଜୁନାଗଡ଼ ଆଦି ଅଞ୍ଚଳରେ ପ୍ରାୟ ଶହେ ହେକ୍ଟର ଜମିରେ ଆଳୁ ଚାଷ ହୋଇଛି । ଉଦ୍ୟନ କୃଷି ବିଭାଗ ପକ୍ଷରୁ ଚଳିତ ବର୍ଷ ୩୦୦ କ୍ୱିଣ୍ଟାଲ ବିହନ ଯୋଗାଇ ଦିଆଯାଇଛି । ହେକ୍ଟର ପିଛା ଚାଷୀଙ୍କୁ ୫୮ ହଜାର ଟଙ୍କା ପର୍ଯ୍ୟନ୍ତ ସବସିଡ୍ ସହାୟତା ଦିଆଯାଇଛି । ଏଥି ସହ ଆଳୁ ସଂରକ୍ଷଣ ସହ ବିକ୍ରି ବ୍ୟବସ୍ଥା କରାଯିବ ବୋଲି ଉଦ୍ୟନ ବିଭାଗର ସହକାରୀ ନିର୍ଦ୍ଦେଶକ କହିଛନ୍ତି ।

କଳାହାଣ୍ଡି ଜିଲ୍ଲାରେ ଧାନ, ମକା, କପା ଚାଷ ପରେ ଏବେ ସ୍ୱତନ୍ତ୍ର ପରିଚୟ ସୃଷ୍ଟି କରି ଆଳୁ ଚାଷ । ଚଳିତ ଭଲ ଫସଲ ଅମଳ ହେବା ସହ ଦୁଇ ପଇସା ଲାଭ ହେବ ବୋଲି ଆଶା ରଖିଛନ୍ତି ଚାଷୀ ।