ନନ୍ଦିଘୋଷ ବ୍ୟୁରୋ: ମଣିପୁରରେ ପୁଣି ଥରେ ରକ୍ତାକ୍ତ ହୋଇଛି ରାଜପଥ। ଦୁଇଟି ଗାଡ଼ି ଉପରେ ଆଖିବୁଜା ଗୁଳିମାଡ଼ କରିଛନ୍ତି ଦୁର୍ବୃତ୍ତ। ଏହି ଆକ୍ରମଣରେ ଜଣେ ମା’ ଓ ପୁଅଙ୍କ ସମେତ ଚାରି ଜଣଙ୍କ ମୃତ୍ୟୁ ହୋଇଛି। ଶୁକ୍ରବାର ଇମ୍ଫାଲ-ଉଖରୁଲ ରାସ୍ତାର ନ୍ୟୁ ହେଭେନ୍ ଅଞ୍ଚଳରେ ଏହି ଘଟଣା ଘଟିଛି।
ମୃତକମାନେ ଦୁଇଟି ପୃଥକ ଗାଡ଼ିରେ ଇମ୍ଫାଲ ଅଭିମୁଖେ ଯାଉଥିଲେ। ଗୋଟିଏ ମାରୁତି ସ୍ୱିଫ୍ଟ ଓ ଅନ୍ୟଟି ବୋଲେରୋ ଗାଡ଼ି ଥିଲା। ଏହି ସମୟରେ ଆକ୍ରମଣକାରୀମାନେ ଉଭୟ ଗାଡ଼ିକୁ ଟାର୍ଗେଟ୍ କରି ଗୁଳି ଚଳାଇଥିଲେ। ଫଳରେ ଘଟଣାସ୍ଥଳରେ ଚାରି ଜଣଙ୍କ ଜୀବନ ଯାଇଥିଲା।
ମୃତକମାନେ ହେଲେ ଶାଂଶାକ ଗାଁର କାପାଙ୍ଗଖୁଇ ଆରଏସ୍ ଓ ହାଓଲେଲା ଆରଏସ୍ ଏବଂ ତାଶାର ଗାଁର ଅଗଷ୍ଟ ନଗାଲୁଙ୍ଗ ଓ ଖାନମିଲା। କାପାଙ୍ଗଖୁଇ ଓ ହାଓଲେଲା ସମ୍ପର୍କରେ ଭାଇଭଉଣୀ ହୋଇଥିବା ବେଳେ ଅଗଷ୍ଟ ନଗାଲୁଙ୍ଗ ଓ ଖାନମିଲା ମା’ ଓ ପୁଅ ବୋଲି ଜଣାପଡ଼ିଛି।
ଏହି ହତ୍ୟାକାଣ୍ଡକୁ ନେଇ କଂଗ୍ରେସ ବିଧାୟକ ଦଳର ନେତା କେ. ମେଘଚନ୍ଦ୍ର କେନ୍ଦ୍ର ଓ ରାଜ୍ୟ ସରକାରଙ୍କୁ ଘେରିଛନ୍ତି। ରାଜ୍ୟରେ ଲଗାତାର ହିଂସା ଓ ସାଧାରଣ ଲୋକଙ୍କ ଦୁର୍ଦ୍ଦଶାକୁ ନେଇ ସେ ଉଦ୍ବେଗ ପ୍ରକାଶ କରିଛନ୍ତି। ତେବେ ଆକ୍ରମଣ ପଛର କାରଣ ଏବଂ ଆକ୍ରମଣକାରୀଙ୍କ ପରିଚୟ ସମ୍ପର୍କରେ ସବିଶେଷ ତଥ୍ୟ ମିଳିନାହିଁ।
ଏହାର ଦିନକ ପୂର୍ବରୁ ସେନାପତି-କାଙ୍ଗପୋକପି ଜିଲ୍ଲା ସୀମାନ୍ତରେ ଥିବା ତାଫୌ କୁକି ଗାଁରେ ଗୁଳିମାଡ଼ରେ ଜଣେ ୪୦ ବର୍ଷୀୟା ମହିଳାଙ୍କ ମୃତ୍ୟୁ ହୋଇଥିଲା। ଅନ୍ୟ ଦୁଇ ଜଣ ଆହତ ହୋଇଥିଲେ। ଏହି ଘଟଣା ପରେ ଜାତୀୟ ରାଜପଥ-୨ରେ ଆତଙ୍କ ଖେଳିଯାଇଥିଲା।
୨୦୨୩ ମେ’ ମାସରୁ ମଣିପୁରରେ ମୈତେଇ ଓ କୁକି ସମ୍ପ୍ରଦାୟ ମଧ୍ୟରେ ଜାତିଗତ ସଂଘର୍ଷ ଜାରି ରହିଛି। ଏହି ହିଂସାରେ ଏଯାଏଁ ଅତି କମରେ ୩୦୬ ଜଣଙ୍କ ମୃତ୍ୟୁ, ୪୯ ଜଣ ନିଖୋଜ ଏବଂ ହଜାର ହଜାର ଲୋକ ବାସହୀନ ହୋଇଥିବା ରିପୋର୍ଟରେ କୁହାଯାଇଛି। ଅନ୍ୟପଟେ ଚଳିତ ବର୍ଷ ଫେବୃଆରୀରୁ ପାହାଡ଼ିଆ ଅଞ୍ଚଳରେ କୁକି ଓ ନାଗା ସମ୍ପ୍ରଦାୟ ମଧ୍ୟରେ ସଂଘର୍ଷରେ ମଧ୍ୟ ଅତି କମରେ ୫୦ ଜଣଙ୍କ ଜୀବନ ଯାଇଛି।
