ଭୁବନେଶ୍ୱର: ଭୁବନେଶ୍ୱରରେ ATM ଲୁଟ ପଣ୍ଡ । ଦୁଇ ଲୁଟେରାଙ୍କୁ କାବୁ କଲେ ସ୍ଥାନୀୟ ଲୋକ । ୟୁନିଟ-୮ ଡିଏଭି ଛକ ନିକଟରେ ଥିବା ଏକ ATMରୁ ଲୁଟ କରିବାକୁ ଉଦ୍ୟମ କରୁଥିଲେ । ଲୁଟ୍ କରିବା ସମୟରେ ୨ ଜଣଙ୍କୁ କାବୁ କରିଛନ୍ତି ସ୍ଥାନୀୟ ଲୋକ । ଏହି ଘଟଣାରେ ନୟାପଲ୍ଲୀ ଥାନା ପୋଲିସ ୨ ଜଣଙ୍କୁ ଗିରଫ କରି ପଚରାଉଚରା କରୁଛି । ଗିରଫ ଲୁଟେରାଙ୍କଠାରୁ ଲୁହା ରଡ, କଟର ମେସିନ ଜବତ କରାଯାଇଛି । ତେବେ ଏହି ATM ଲୁଟ୍ ଘଟଣାରେ ଗିରଫ ହୋଇଥିବା ଦୁଇ ଜଣ ହେଉଛନ୍ତି ବାପ- ପୁଅ । ବାପ, ପୁଅ ଉଭୟ ATMରୁ ଲୁଟ୍ କରିବାକୁ ଉଦ୍ୟମ କରିଥିଲେ । ତାଙ୍କ ଘର କନ୍ଧମାଳ ବୋଲି ସୂଚନା ମିଳିଛି ।
ପଞ୍ଜାବରେ AAPର ମୁଖ୍ୟମନ୍ତ୍ରୀ ଚେହେରା ହେଲେ ଭଗବନ୍ତ ମାନ୍, ପବ୍ଲିକ ଭୋଟିଂ ଜରିଆରେ ନିଷ୍ପତ୍ତି ନେଲେ କେଜ୍ରିଓ୍ୱାଲ
ଚଣ୍ଡିଗଡ଼: ପଞ୍ଜାବ ନିର୍ବାଚନ ପାଇଁ ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିଛି ଆମ୍ ଆଦମି ପାର୍ଟି । ଆମ୍ ଆଦମି ପାର୍ଟିର ପଞ୍ଜାବ ମୁଖ୍ୟମନ୍ତ୍ରୀ ଚେହେରା ହେବେ ଭଗବନ୍ତ ମାନ୍ । ଭଗବନ୍ତଙ୍କ ନାମ ଘୋଷଣା କରିଛନ୍ତି ଆମ୍ ଆଦମି ପାର୍ଟି ମୁଖ୍ୟ ଅରବିନ୍ଦ କେଜ୍ରିଓ୍ୱାଲ । ପଞ୍ଜାବରେ ମୁଖ୍ୟମନ୍ତ୍ରୀ ପ୍ରାର୍ଥୀ କାହାକୁ କରାଯିବ ଏନେଇ ହ୍ୱାଟ୍ସଆପ, ଟେଲିଫୋନ ଆଦିରେ ଭୋଟ ଗ୍ରହଣ କରାଯାଇଥିଲା । ଏହି ଭୋଟରେ ମୋଟ ୨୧ ଲକ୍ଷ ଲୋକ ଅଂଶଗ୍ରହଣ କରିଥିଲେ ଏବଂ ଯେଉଁମାନଙ୍କ ମଧ୍ୟରୁ ୯୩ ପ୍ରତିଶତ ଲୋକ ଭଗବନ୍ତଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହାଁନ୍ତି ବୋଲି ଦାବି କରିଥିଲା । ନିର୍ବିବାଦୀୟ ନେତା ଭାବେ ବିଭିନ୍ନ ମହଲରୁ ସମର୍ଥନ ମିଳିବା ନେଇ ଆଶା ରଖିଛି ଆପ୍ ।
AAP's CM Candidate & Punjab's Next CM is….. @BhagwantMann 🎉🥳#AAPdaCM pic.twitter.com/LWS28OSOwz
— AAP (@AamAadmiParty) January 18, 2022
ବର୍ତ୍ତମାନ ଭଗବନ୍ତ ପଞ୍ଜାବ ଆପ୍ର ମୁଖ୍ୟ ଥିବାବେଳେ ସାଙ୍ଗୁରରୁ ଦୁଇ ଥର ଏମପି ଭାବେ ଦାୟିତ୍ୱ ତୁଲାଉଛନ୍ତି । କିଛି ଦିନ ତଳେ ସେ ଅଭିଯୋଗ କରିଥିଲେ ବିଜେପି ତାଙ୍କୁ ଟଙ୍କା ଯାଚିଥିଲା ଏବଂ ଦଳରେ ମିଶିଲେ ତାଙ୍କୁ କ୍ୟାବିନେଟ ପଦବୀ ମିଳିବ ବୋଲି ପ୍ରସ୍ତାବ ଦେଇଥିଲା । ଚଳିତ ପଞ୍ଜାବ ନିର୍ବାଚନରେ ଆପ୍ ବିଜୟୀ ହେବ ବୋଲି କହିଛନ୍ତି ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ୱାଲ । ଆସନ୍ତା ଫେବ୍ରୁଆରୀ ୨୦ରେ ପଞ୍ଜାବ ବିଧାନସଭା ନିର୍ବାଚନ ଅନୁଷ୍ଠିତ ହେବ ଏବଂ ମାର୍ଚ୍ଚ ୧୦ରେ ଫଳ ପ୍ରକାଶ ପାଇବ ।
I congratulate Sardar Bhagwant Mann on being declared CM face of AAP in Punjab. Whole Punjab is looking upto AAP as a hope. Its a huge responsibility and I am sure Bhagwant will bring back smile on the face of every Punjabi.
— Arvind Kejriwal (@ArvindKejriwal) January 18, 2022
ମୁଖ୍ୟମନ୍ତ୍ରୀ ଚେହେରା ଘୋଷଣା କରିବାରେ ଆପ୍ ପଞ୍ଜାବରେ ପ୍ରଥମ ଦଳ ହୋଇଛି । ଗତ ୨୦୧୭ ନିର୍ବାଚନରେ ୧୧୭ ଆସନରୁ କଂଗ୍ରେସକୁ ୭୭ ଆସନ ମିଳିଥିବାବେଳେ ଆପ୍କୁ ମିଳିଥିଲା ୨୦ ଆସନ । ଅକାଳୀ ଦଳକୁ ୧୫ ଓ ବିଜେପିକୁ ୩ ଆସନ ମିଳିଥିଲା । ୧୯୭୩ରେ ଜନ୍ମିତ ଭଗବନ୍ତ ରାଜନେତା ଭାବେ ଯେତିକି ଖ୍ୟାତି ଲାଭ କରିନାହାନ୍ତି କମେଡି ଲାଗି ତାଠାରୁ ଅଧିକ ଖ୍ୟାତି ପାଇଛନ୍ତି । ରାଜନୀତି, ବ୍ୟବସାୟ, କ୍ରୀଡା ଆଦି ପ୍ରସଙ୍ଗରେ ସେ କମେଡି ପ୍ରଦର୍ଶନ କରି ଦେଶବିଦେଶରେ ସମ୍ମାନ ସାଉଁଟିଛନ୍ତି । ଦେଶରେ କିଛି ପ୍ରତିଷ୍ଠିତ ଚାନେଲରେ ନିଜର ସୋ ପ୍ରଦର୍ଶନ କରି ଚର୍ଚ୍ଚାରେ ଥିବା ଭଗବନ୍ତ ଅନେକ ଆଲବମ୍ ବି ତିଆରି କରିଛନ୍ତି । ସେ ୨୦୧୧ରେ ପିପୁଲ୍ସ ପାର୍ଟି ଅଫ ପଞ୍ଜାବରେ ଯୋଗଦେଇଥିଲେ । ପରେ ସେ ୨୦୧୪ରେ ଆପରେ ସାମିଲ ହୋଇ ସାଙ୍ଗୁର ଲୋକସଭା ଆସନରୁ ସାଂସଦ ଭାବେ ନିର୍ବାଚିତ ହୋଇଥିଲେ । ୨୦୧୯ ନିର୍ବାଚନରେ ପୁଣି ଥରେ ସାଂସଦ ଭାବେ ନିର୍ବାଚିତ ହୋଇଛନ୍ତି ମାନ୍ ।
ଲିଫ୍ଟରୁ ପଡ଼ି ବୃଦ୍ଧ ମୃତ
ଭୁବନେଶ୍ୱର: ଏମିତି ବି ଆସେ ମୃତ୍ୟୁ । ଲିଫ୍ଟରୁ ଖସି ପଡି ବୃଦ୍ଧ ମୃତ । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଭୁବନେଶ୍ୱର ସୁନ୍ଦରପଦା ହାଇଟେକ୍ ପ୍ଲାଜାରେ । ଲିଫ୍ଟରୁ ପଡ଼ି ମୃତ୍ୟୁ ବରଣ କରିଥିବା ବୃଦ୍ଧଜଣଙ୍କ ସେଇ ପ୍ଲାଜାରେ ରହୁଥିଲେ । ମିଳିଥିବା ସୂଚନା ଅନୁସାରେ, ଲିଫ୍ଟର ଡୋର ଲକ୍ ଖରାପ ଥିବାରୁ ଏଭଳି ଅଘଟଣ ହୋଇଥିବା ଅଭିଯୋଗ ହୋଇଛି । ବୃଦ୍ଧ ଜଣଙ୍କ ଲିଫ୍ଟର ସୁଇଚ୍ ମାରିଥିଲେ । ଲିଫ୍ଟ ସୁଇଚ୍ ମାରିବା ପରେ ଡୋର ଖୋଲିଥିଲା କିନ୍ତୁ ଲିଫ୍ଟ ଆସି ନଥିଲା । ଯାହା ଫଳରେ ବୃଦ୍ଧ ଜଣଙ୍କ ତଳକୁ ପଡି ଯାଇଥିଲେ ଏବଂ ଘଟଣାସ୍ଥଳରେ ମୃତ୍ୟୁ ବରଣ କରିଥିଲେ । ଖବର ପାଇ ଘଟଣା ସ୍ଥଳରେ ଏୟାରଫିଲଡ଼ ଥାନା ପୋଲିସ ପହଞ୍ଚି ମୃତଦେହକୁ ଜବତ କରି ତଦନ୍ତ ଆରମ୍ଭ କରିଛି ।
କଟକରେ ହଜିଲା ଭୁବନେଶ୍ୱରରୁ ମିଳିଲା, ୧୨ ଦିନ ପରେ ଘରକୁ ଫେରିଲା ଶୁଆ
କଟକ: ୧୨ ଦିନ ପରେ ମିଳିଲା କୋକୋ । ଶେଷରେ ଘରକୁ ଫେରିଲା ହଜିଯାଇଥିବା ଶୁଆ । ପାଳିତ ଶୁଆକୁ ହରାଇ ପାଗଳ ହୋଇଯାଇଥିବା ସସ୍ମିତା ବେହେରା ଏବେ ଭାରି ଖୁସି । ଗତକାଲି ଭୁବନେଶ୍ୱର କେସୁରା ଅଞ୍ଚଳର ଗୋଟିଏ ପରିବାର ଶୁଆଟିକୁ ପାଇ ରଖିଥିଲେ । ଆଜି ସେହି ଶୁଆକୁ ସସ୍ମିତାଙ୍କୁ ଫେରାଇଛନ୍ତି । ଶୁଆଟି ହଜିଯିବା ପରେ ଶୁଆକୁ ପାଇବା ପାଇଁ ସହର ସାରା ପୋଷ୍ଟର, ଲିଫଲେଟ୍ ମାରିବା ସହ ଶୁଆକୁ ଆଣିଦେଲେ ୫ହଜାର ଟଙ୍କା ପୁରସ୍କାର ଦେବେ ବୋଲି ଘୋଷଣା କରିଥିଲେ ସସ୍ମିତା ।
ଆଉ ଏବେ କୋକୋକୁ ପାଇ ସସ୍ମିତା ବେଶ୍ ଖୁସି ଅଛନ୍ତି । ସମସ୍ତଙ୍କ ଉଦ୍ୟମ ପାଇଁ କୋକୋ ମିଳିଯାଇଥିବାରୁ ପ୍ରଶଂସା କରିଛନ୍ତି ପରିବାର ଲୋକ । ଖୋଲାରେ ବୁଲୁଥିବା ବେଳେ ଗତ ୫ ତାରିଖରେ କୁଆଡେ ଉଡିଯାଇଥିଲା ଆଉ ଫେରିନଥିଲା । ବହୁ ଖୋଜାଖୋଜି ପରେ ମଧ୍ୟ ମିଳିନଥିଲା କୋକୋ । ଯାହା ଫଳରେ ସେ କଟକରେ ପୋଷ୍ଟର ଓ ଲିଫଲେଟ୍ ବାଣ୍ଟିଥିଲେ ଏବଂ ଯିଏ ଶୁଆକୁ ଖୋଜି ଦେବେ ତାଙ୍କୁ ୫ ହଜାର ଟଙ୍କା ଦେବେ ବୋଲି ମଧ୍ୟ କହିଥିଲେ ସସ୍ମିତା । ତେବେ ୧୨ ଦିନ ପରେ ଆଜି ସସ୍ମିତାଙ୍କ ଘରକୁ ପୁଣି ଫେରିଛି କୋକୋ ।
ବଢ଼ିଲା ବିଜେଡି ବଳ, ବିଜେପି ଛାଡି ବିଜେଡିରେ ମିଶିଲେ ଚିଲିକା ବ୍ଲକ ଅଧ୍ୟକ୍ଷ
ଭୁବନେଶ୍ୱର: ବିଜେଡିରେ ମିଶିଲେ ଚିଲିକା ବ୍ଲକ ଅଧ୍ୟକ୍ଷା ଝରଣା ବାରିକ । ବିଜେପି ଛାଡି ଆଜି ବିଜେଡିରେ ମିଶିଛନ୍ତି ଝରଣା । ୨୦୧୭ରେ ବିଜେପି ସମର୍ଥନରେ ସେ ବ୍ଲକ ଅଧ୍ୟକ୍ଷା ହୋଇଥିଲେ । ଗତ ୧୫ ବର୍ଷରୁ ଝରଣା ବାରିକ ବିଜେପିରେ ରହିଥିଲେ । କିନ୍ତୁ ଆଜି ତାଙ୍କ ସହଯୋଗୀଙ୍କ ସହ ସେ ବିଜେଡିରେ ସାମିଲ ହୋଇଛନ୍ତି । ଏହାସହ ବାଣପୁର ବ୍ଲକ ନନ୍ଦପୁର ଗ୍ରାମ ପଞ୍ଚାୟତର ୧୫ ନମ୍ବର ଜୋନର ଜିଲ୍ଲା ପରିଷଦ ସଭ୍ୟ ଦମୟନ୍ତୀ ବସ୍ତି ବିଜେପି ଛାଡି ବିଜେଡିରେ ମିଶିଛନ୍ତି । ସେ ତାଙ୍କ ସମର୍ଥକଙ୍କ ସହ ମିଶି ବିଜେଡିରେ ଯୋଗଦେଇଛନ୍ତି । ବିଜେଡିରେ ଯୋଗ ଦେଇଥିବା ସମସ୍ତଙ୍କୁ ଦଳକୁ ସ୍ୱାଗତ କରିଛନ୍ତି ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଏହାସହ ଦଳରେ ସେମାନଙ୍କ ସମ୍ମାନ ଓ ଆଦର ବିଜେପିଠାରୁ ଅଧିକ ରହିବ ବୋଲି ମୁଖ୍ୟମନ୍ତ୍ରୀଙ୍କ ପକ୍ଷରୁ ପ୍ରତିଶ୍ରୁତି ଦେଇଛନ୍ତି ।
ବ୍ଲୁମବର୍ଗ -୨୦୨୧ ଗ୍ଲୋବାଲ ମେୟର୍ସ ଚ୍ୟାଲେଞ୍ଜରେ ଷ୍ଟିଲ ସିଟି
ରାଉରକେଲା: ଅନ୍ତର୍ଜାତୀୟ ପ୍ରତିଯୋଗିତାରେ ରାଉରକେଲାର ସଫଳତା । ବ୍ଲୁମବର୍ଗ-୨୦୨୧ ଗ୍ଲୋବାଲ ମେୟର୍ସ ଚ୍ୟାଲେଞ୍ଜରେ ସ୍ଥାନ ପାଇଛି ଷ୍ଟିଲ ସିଟି ରାଉରକେଲା । ବିଶ୍ୱର ୧୫ଟି ସହର ଭିତରେ ସ୍ଥାନ ପାଇଛି ରାଉରକେଲା । ଭାରତର ଏକ ମାତ୍ର ସହର ଭାବେ ବିଶ୍ୱରେ ସ୍ୱତନ୍ତ୍ର ସ୍ଥାନ ପାଇଛି ରାଉରକେଲା । ୧ ନିୟୁତ ଡଲାର ପାଇବା ପାଇଁ ଯୋଗ୍ୟତା ଅର୍ଜନ କରିଛି ରାଉରକେଲା । ଅନ୍ତର୍ଜାତୀୟ କାର୍ଯ୍ୟକ୍ରମରେ ଏକ ଅଭିନବ ପ୍ରକଳ୍ପ ଉପସ୍ଥାପନ କରି ଅନ୍ତର୍ଜାତୀୟ ସ୍ତରରେ ସ୍ୱତନ୍ତ୍ର ନାଁ କରିଛି ଷ୍ଟିଲ ସିଟି । ବିଶ୍ୱର ୯୯ ଦେଶ ଓ ୬୩୦ ପ୍ରସ୍ତାବ ଭିତରେ ଚୂଡ଼ାନ୍ତ ପର୍ଯ୍ୟାୟରେ ଭାରତର ଦୁଇ ପ୍ରମୁଖ ସହର ରାଉରକେଲା ଓ ପୁନେ ସ୍ଥାନ ପାଇଥିଲେ । ତେବେ ୫୦ଟି ପ୍ରମୁଖ ସହର ମଧ୍ୟରୁ ନିଜର ଉତ୍ତମ କାର୍ଯ୍ୟଦକ୍ଷତା ଉପସ୍ଥାପନ କରି ରାଉରକେଲା ଭାରତର ଏକ ମାତ୍ର ସହର ବିଶ୍ୱର ପ୍ରମୁଖ ୧୫ଟି ସହର ମଧ୍ୟରେ ସ୍ଥାନ ପାଇବାକୁ ଯୋଗ୍ୟ ବିବେଚିତ ହୋଇଛି । ବ୍ଲୁମବର୍ଗ ପକ୍ଷରୁ ରାଉରକେଲାକୁ ୧ ନିୟୁତ ଡଲାର ପୁରସ୍କାର ରାଶି ମିଳିବା ସହିତ ବିଭିନ୍ନ ସ୍ତରରେ ବୈଷୟିକ ସହଯୋଗ ଏବଂ ପରାମର୍ଶ ମଧ୍ୟ ଯୋଗାଇ ଦିଆଯିବ ।
ରାଉରକେଲା ମହାନଗର ନିଗମ ପକ୍ଷରୁ ଦିଆଯାଇଥିବା ପ୍ରସ୍ତାବ ଅନୁଯାୟୀ ପରୀକ୍ଷାମୂଳକ ଭାବେ ସହରର ଛେଣ୍ଡ ସ୍ଥିତ ଭିଏସଏସ ମାର୍କେଟଠାରେ ଶୀତଳଭଣ୍ଡାର ସ୍ଥାପନ କରାଯାଇଛି । ଫଳରେ ଚାଷୀ, ଛୋଟ ଛୋଟ ପରିବା ଏବଂ ଫଳ ବ୍ୟବସାୟୀମାନେ ନିଜ ସାମଗ୍ରୀର ସଂରକ୍ଷଣ କରିପାରିବା ସହ ଅପଚୟ ରୋକା ଯାଇପାରିଛି । କରୋନା ମହାମାରୀ ଭଳି ପରିସ୍ଥିତିରେ ଲୋକଙ୍କ ଦୁଆର ମୁହଁରେ ତାଜା ପନିପରିବା ଓ ଫଳ ପହଞ୍ଚାଇବା କାମ ହୋଇପାରୁଛି । ଏ ସମସ୍ତ କାର୍ଯ୍ୟ ସ୍ୱୟଂ ସହାୟକ ଗୋଷ୍ଠୀର ମହିଳାମାନେ ପରିଚାଳନା କରୁଛନ୍ତି । ଏହା ଦ୍ୱାରା ସେମାନଙ୍କ ଜୀବନଶୈଳୀରେ ମଧ୍ୟ ଉନ୍ନତି ହୋଇଛି । ଏହି ପ୍ରକଳ୍ପକୁ କାର୍ଯ୍ୟକାରୀ କରିବା ଲାଗି କୃଷି ଷ୍ଟାର୍ଟଅପ୍ କୋଏଲ ଫ୍ରେସ ସହଯୋଗ କରିଥିଲା । ଏହି ବିଶ୍ୱସ୍ତରୀୟ ପ୍ରତିଯୋଗିତାରେ ଗତ ବର୍ଷ ଜୁନ ମାସରେ ହୋଇଥିଲା ।
ନିର୍ବାଚନ ଡ୍ୟୁଟିରେ ଯାଉଥିବା କର୍ମଚାରୀଙ୍କ ପାଇଁ ବଡ଼ ଘୋଷଣା, ଡ୍ୟୁଟିରେ ମୃତ୍ୟ ହେଲେ ମିଳିବ ୩୦ ଲକ୍ଷ
ଭୁବନେଶ୍ୱର: ରାଜ୍ୟରେ ପଞ୍ଚାୟତ ନିର୍ବାଚନ ପାଇଁ ସମସ୍ତ ପ୍ରକାର ପ୍ରସ୍ତୁତି ଜାରି ରହିଛି । ରାଜ୍ୟରେ ପାଞ୍ଚଟି ପର୍ଯ୍ୟାୟରେ ଅନୁଷ୍ଠିତ ହେବ ପଞ୍ଚାୟତ ନିର୍ବାଚନ । ପଞ୍ଚାୟତ ନିର୍ବାଚନ ପାଇଁ ନାମାଙ୍କନ ପତ୍ର ଦାଖଲ ମଧ୍ୟ ଆରମ୍ଭ ହୋଇସାରିଛି । ପଞ୍ଚାପତ ନିର୍ବାଚନ ସୁରୁଖୁରୁରେ କରିବା ପାଇଁ ସମସ୍ତ ପ୍ରକାର ପଦକ୍ଷେପ ଗ୍ରହଣ କରିଛି ରାଜ୍ୟ ନିର୍ବାଚନ ଆୟୋଗ । କରୋନା କାଳରେ ଏହି ନିର୍ବାଚନ ସମସ୍ତଙ୍କ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି । ପଞ୍ଚାୟତ ନିର୍ବାଚନ ଠିକ୍ ଭାବରେ କରିବା ପାଇଁ ବହୁ ସଂଖ୍ୟାରେ ସରକାରୀ କର୍ମଚାରୀ ନିୟୋଜିତ ହେବେ । ତେବେ ଚଳିତ ପଞ୍ଚାୟତ ନିର୍ବାଚନରେ ଡ୍ୟୁଟି କରିବା ପାଇଁ ଯାଉଥିବା ସମସ୍ତ କର୍ମଚାରୀଙ୍କ ବଡ଼ ଘୋଷଣା କରିଛନ୍ତି ରାଜ୍ୟ ନିର୍ବାଚନ ଅଧିକାରୀ ।
ପଞ୍ଚାୟତ ନିର୍ବାଚନ ସମୟରେ ଡ୍ୟୁଟିରେ ଥାଇ ମୃତ୍ୟୁ ହେଲେ ପରିବାରକୁ ମିଳିବ ୩୦ଲକ୍ଷ ଟଙ୍କା । ସେହିପରି ହିଂସାକାଣ୍ଡ, ବିସ୍ଫୋରଣ ବା ଆତଙ୍କବାଦୀ ଆକ୍ରମଣଜନିତ ମୃତ୍ୟୁରେ ମିଳିବ କ୍ଷତିପୂରଣ । ଅନ୍ୟ କୌଣସି କାରଣରୁ ମୃତ୍ୟୁ ହେଲେ ମଧ୍ୟ ପରିବାରକୁ ୧୫ ଲକ୍ଷ ଟଙ୍କା ମିଳିବ । ଆକ୍ରମଣରେ ସମ୍ପୂର୍ଣ୍ଣ ବିକଳାଙ୍ଗ ହେଲେ ମଧ୍ୟ ମିଳିବ ୧୫ ଲକ୍ଷ ଟଙ୍କାର ସହାୟତା । ସେହିପରି ଦୁର୍ଘଟଣାରେ ବିକଳାଙ୍ଗ ହେଲେ ମିଳିବ ୭ ଲକ୍ଷ ୫୦ ହଜାର ଟଙ୍କାର ସହାୟତା ମିଳିବ । ଦୁର୍ଘଟଣାରେ ଗୁରୁତର ଆହତ ହେଲେ ସର୍ବାଧିକ ୨ଲକ୍ଷ ପର୍ଯ୍ୟନ୍ତ ସହାୟତା ଦିଆଯିବ । ଏଥିସହ ନିର୍ବାଚନ ଡ୍ୟୁଟି ସମୟରେ କୋଭିଡ-୧୯ରେ ମୃତ୍ୟୁ ହେଲେ ୩୦ ଲକ୍ଷ ଟଙ୍କାର ସହାୟତା ମିଳିବ । ସେହିପରି ଡ୍ୟୁଟିରେ ଯଦି କୋଭିଡ-୧୯ରେ ସଂକ୍ରମିତ ହେବେ ତେବେ ମାଗଣାରେ ଚିକିତ୍ସା କରାଯିବ ।
ଗଞ୍ଜାମରେ ପ୍ରାକ୍ ନିର୍ବାଚନୀ ହିଂସା, ଗୋଷ୍ଠୀ ସଂଘର୍ଷରେ ୪ ଆହତ
ଗଞ୍ଜାମ: ପଞ୍ଚାୟତ ନିର୍ବାଚନ ପାଇଁ ଘୋଷଣା ହୋଇସାରିଛି ତାରିଖ । ନାମାଙ୍କନ ପତ୍ର ଦାଖଲ ମଧ୍ୟ ଆରମ୍ଭ ହୋଇସାରିଛି । ପଞ୍ଚାୟତ ନିର୍ବାଚନ ପାଇଁ ସରଗରମ ହେବାରେ ଲାଗିଛି ଗାଁ ରାଜନୀତି । ଆଜି ପଞ୍ଚାୟତ ନିର୍ବାଚନ ପାଇଁ ନାମାଙ୍କନ ଦାଖଲ କରିବାର ଦ୍ୱିତୀୟ ଦିନ । ଦ୍ୱିତୀୟ ଦିନରେ ନାମାଙ୍କନ ଦାଖଲ ବେଳେ ହୋଇଛି ଗୋଷ୍ଠୀ ସଂଘର୍ଷ । ନାମାଙ୍କନ ଦାଖଲ ଲାଗି ଗଞ୍ଜାମ ଜିଲ୍ଲା ଧରାକୋଟ ଥାନା ମୁଣ୍ଡମରାଇରେ ଦେଖାଯାଇଛି ଗୋଷ୍ଠୀ ସଂଘର୍ଷ । ଦୁଇଗୋଷ୍ଠୀ ମଧ୍ୟରେ ଗୋଷ୍ଠୀ ସଂଘର୍ଷରେ ୪ରୁ ଅଧିକ ଲୋକ ଆହତ ହୋଇଥିବା ସୂଚନା ମିଳିଛି । ଦୁଇ ଗୋଷ୍ଠୀଙ୍କ ମଧ୍ୟରେ ସଂଘର୍ଷ ପରେ ଧରାକୋଟ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।
କୋଭିଡ ଚିକିତ୍ସା ପାଇଁ ଆସିଲା ନୂଆ ଗାଇଡଲାଇନ, କରୋନା ସଂକ୍ରମିତଙ୍କୁ ଦରକାର ନାହିଁ ଷ୍ଟେରଏଡ
ନୂଆଦିଲ୍ଲୀ: କୋଭିଡ ସଂକ୍ରମିତଙ୍କ ଲାଗି ଦରକାର ନାହିଁ ଷ୍ଟେରଏଡ । କରୋନା ଭାଇରସ ଚିକିତ୍ସାର ସଂଶୋଧିତ କ୍ଲିନିକାଲ ଗାଇଡଲାଇନ ଜାରି କରିଛନ୍ତି ସରକାର । କୋଭିଡ ଟାସ୍କ ଫୋର୍ସ ମୁଖ୍ୟ ତଥା ନିତି ଆୟୋଗ ସଦସ୍ୟ ଡାକ୍ତର ଭି.କେ. ପଲ୍ କହିଛନ୍ତି କୋଭିଡ ଦ୍ୱିତୀୟ ଲହର କାଳରେ ଡାକ୍ତରମାନେ ଅନେକ ଔଷଧର ବହୁଳ ଅପବ୍ୟବହାର କରିଥିଲେ । ଷ୍ଟେରଏଡ ବ୍ୟବହାର କରିବା ଦ୍ୱାରା ମ୍ୟୁକୋମାଇକୋସିସ୍ ବା ବ୍ଲାକ ଫଙ୍ଗ୍ସ ପରି ରୋଗର ସଂକ୍ରମଣ ସମ୍ଭାବନା ଅଧିକ ହୋଇଥାଏ । ସ୍ୱଳ୍ପ, ମଧ୍ୟମ ଓ ଗୁରୁତର ରୋଗୀଙ୍କୁ ଚିହ୍ନଟ କରି ସେମାନଙ୍କ ଉଦ୍ଦେଶ୍ୟରେ ଆବଶ୍ୟକ ମାତ୍ରାର ଔଷଧ ଦରକାର ।
ଯଦି କଫ ଦୁଇରୁ ତିନି ସପ୍ତାହ ଜାରି ରୁହେ ତେବେ ରୋଗୀମାନେ ଯକ୍ଷ୍ମା ଓ ଅନ୍ୟାନ୍ୟ ରୋଗର ଚିକିତ୍ସା କରିବା ଆବଶ୍ୟକ । ଷ୍ଟେରଏଡ ପରି ଔଷଧର ଅଧିକ ମାତ୍ରାର ବ୍ୟବହାର ଓ ଅପବ୍ୟବହାର ଅନୁଚିତ । ସଂଶୋଧିତ ଗାଇଡଲାଇନ ଅନୁସାରେ ନିଶ୍ୱାସ ପ୍ରଶ୍ୱାସରେ ସମସ୍ୟା ବା ହାଇପୋକ୍ସିଆ ବିନା ଅପର ରେସପିରେଟୋରୀ ଟ୍ରାକ୍ଟରେ ଯଦି ସଂକ୍ରମଣ ପରିଲକ୍ଷିତ ହୋଇଥାଏ ତେବେ ତାହାକୁ ସ୍ୱଳ୍ପ ରୋଗ ବୋଲି ଧରାଯିବ ଏବଂ ଘରେ ରହିବାକୁ ପରାମର୍ଶ ଦିଆଯିବା ଆବଶ୍ୟକ । ଯଦି ସ୍ୱଳ୍ପ କୋଭିଡ ସଂକ୍ରମିତ ରୋଗୀ ନିଶ୍ୱାସ ପ୍ରଶ୍ୱାସରେ କଷ୍ଟ ଅନୁଭବ କରନ୍ତି, ଅତ୍ୟଧିକ ଜ୍ୱର ଲାଗି ରହେ ଏବଂ ୫ ଦିନରୁ ଅଧିକ ଦିନ ଧରି କଫ ଲାଗି ରହେ ତେବେ ସେମାନେ ମେଡିକାଲରେ ଚିକିତ୍ସିତ ହେବା ଦରକାର ।
ଅନ୍ୟପକ୍ଷରେ ଯଦି ନିଶ୍ୱାସ ପ୍ରଶ୍ୱାସରେ କଷ୍ଟ ଅନୁଭବ ସହ ଅକ୍ସିଜେନ ସାଚୁରେସନ ୯୦-୯୩ ପ୍ରତିଶତ ରୁହେ ତେବେ ସେମାନେ ହସ୍ପିଟାଲରେ ଆଡମିଶନ ହୋଇପାରିବେ । ସେମାନଙ୍କୁ ଅକ୍ସିଜେନ ସପୋର୍ଟ ଦେବା ଆବଶ୍ୟକ । ଯଦି ନିଶ୍ୱାସ ପ୍ରଶ୍ୱାସ ହାର ମିନିଟ ପିଛା ୩୦ ଥର ହେବ, ନିଶ୍ୱାସ ପ୍ରଶ୍ୱାସରେ କଷ୍ଟ ଅନୁଭବ ସହ ଅକ୍ସିଜେନ ସାଚୁରେସନ ୯୦ ପ୍ରତିଶତରୁ କମ୍ ରୁହେ ତେବେ ତାହାକୁ ଗୁରୁତର ବୋଲି ଧରାଯିବ ଏବଂ ସେମାନଙ୍କୁ ICUରେ ରଖିବା ସହ ଅକ୍ସିଜେନ ସପୋର୍ଟ ଦେବା ଦରକାର । ଯେଉଁମାନେ ଅକ୍ସିଜେନ ସପୋର୍ଟରେ ନାହାନ୍ତି ଏବଂ ଘରେ ରହିଛନ୍ତି ସେମାନଙ୍କୁ କୌଣସି ପ୍ରକାର ଔଷଧ ନ ଦେବା ଲାଗି ପରାମର୍ଶ ଦିଆଯାଇଛି । ଯେଉଁମାନେ ଗୁରୁତର ଅଛନ୍ତି ସେମାନେ ହିଁ ଆଇସିୟୁରେ ଭର୍ତ୍ତି ହେବା ଲାଗି ପରାମର୍ଶ ଦିଆଯାଇଛି । ହୃଦରୋଗ, ଉଚ୍ଚ ରକ୍ତଚାପ, ଡାଏବେଟିସ, ଏଚଆଇଭି, ଯକ୍ଷ୍ମା, ଫୁସଫୁସ, କିଡନୀ, ଲିଭର ଓ ଅନ୍ୟାନ୍ୟ ରୋଗ ଥିବା ୬୦ ବର୍ଷରୁ ଅଧିକ ବୟସର ଲୋକଙ୍କ କ୍ଷେତ୍ରରେ କୋଭିଡକୁ ହାଇରିସ୍କ ବୋଲି ବିବେଚନା କରିବାକୁ ଗାଇଡଲାଇନରେ କୁହାଯାଇଛି ।
କମିପାରେ ହୋମ୍ ଆଇସୋଲେସନ ଅବଧି, ୭ ଦିନ ପରିବର୍ତ୍ତେ ହେବ ୫ ଦିନ!
ଭୁବନେଶ୍ୱର: କମିବ ହୋମ୍ ଆଇସୋଲେସନ ଅବଧି । ୭ ଦିନ ବଦଳରେ ୫ ଦିନ ହେବ ହୋମ ଆଇସୋଲେସନ ସମୟସୀମା । ପୂର୍ବରୁ ହୋମ ଆଇସୋଲେସନ ଅବଧି ୧୦ ଦିନ ରହିଥିଲା, ଏହାପରେ ଏହାକୁ କମାଇ ୭ ଦିନ କରାଯାଇଥିଲା । ରାଜ୍ୟରେ କୋଭିଡ ସ୍ଥିତିକୁ ଦୃଷ୍ଟିରେ ରଖି ଏହାକୁ ୨ ଦିନ କମାଇବାକୁ ଆଲୋଚନା ଚାଲିଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର । ୧୫ ଦିନ ପୂର୍ବରୁ ହୋମ୍ ଆଇସୋଲେସନ ସମୟ ୫ ଦିନ କଲେ ଅସୁବିଧା ହେବ ନାହିଁ ବୋଲି କହିଛନ୍ତି ସେଣ୍ଟର୍ସ ଫର୍ ଡିଜିଜ୍ କଣ୍ଟ୍ରୋଲ ଆଣ୍ଡ ପ୍ରିଭେନସନ୍ ବା ସିଡିସି । ଧିରେ ଧିରେ ଅନ୍ୟ ଦେଶ ହୋମ୍ ଆଇସୋଲେସନ ଅବଧି କମାଇପାରନ୍ତି ।
ବର୍ତ୍ତମାନ ରାଜ୍ୟରେ କିଛିଦିନ ହେବ ୧୦ରୁ ୧୧ ହଜାର ଭିତରେ ଦୈନିକ ସଂକ୍ରମଣ ରହୁଛି । ସର୍ବନିମ୍ନ ୧୦ ରୁ ୧୫ ଦିନ ସମୟ ଦରକାର ଏହି ଟ୍ରେଣ୍ଡ ବିଷୟରେ ଜାଣିବା ପାଇଁ । ଯେପର୍ଯ୍ୟନ୍ତ ଏ ଟ୍ରେଣ୍ଡ ବିଷୟରେ ନ ଜାଣିଛେ, ତାହା ଆଗକୁ ବଢିବ ନା କମିବ କହିବା ଯୁକ୍ତିଯୁକ୍ତ ନୁହେଁ । ସେପଟେ ହସ୍ପିଟାଲରେ ରୋଗୀଙ୍କ ସଂଖ୍ୟା କମ୍ ରହିଛି । ଜେନେରାଲ ବେଡ଼ ୯ ପ୍ରତିଶତ, ଆଇସିୟୁ ବେଡ଼ ୧୫ ପ୍ରତିଶତ, ଭେଣ୍ଟିଲେଟର ୫ରୁ ୬ ପ୍ରତିଶତ ଥିବା ବେଳେ ପେଡିଆଟ୍ରିକ୍ ଆଡମିସନ ବହୁତ କମ୍ ରହିଛି । ଏହି ଲହରରେ ହସ୍ପିଟାଲ ଆଡମିସନ ଓ ଅକ୍ସିଜେନ ଆବଶ୍ୟକତା କମ୍ ରହିଥିବା କହିଛନ୍ତି ସ୍ୱାସ୍ଥ୍ୟ ନିର୍ଦ୍ଦେଶକ ବିଜୟ ମହାପାତ୍ର ।