ନନ୍ଦିଘୋଷ ବ୍ୟୁରୋ: ବଲିଉଡ୍ର ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ରାମାୟଣ’କୁ ନେଇ ଆରମ୍ଭ ହୋଇଛି ନୂଆ ବିବାଦ। ଅଭିନେତା ରଣବୀର କପୁରଙ୍କ ଅଭିନୀତ ଏହି ଚଳଚ୍ଚିତ୍ରକୁ ପୂର୍ବରୁ ପ୍ରଶଂସା କରିଥିବା ମହାଭାରତରେ ଶ୍ରୀକୃଷ୍ଣ ଭୂମିକାରେ ଅଭିନୟ କରିଥିବା ନିତୀଶ ଭରଦ୍ୱାଜ ଏବେ ନିଜ ମତ ବଦଳାଇଛନ୍ତି। ଚଳଚ୍ଚିତ୍ରରେ ରାବଣଙ୍କ ଚରିତ୍ର ଚିତ୍ରଣକୁ ନେଇ ସେ ଅସନ୍ତୋଷ ପ୍ରକାଶ କରିବା ସହ ପୂର୍ବରୁ କରିଥିବା ପ୍ରଶଂସାକୁ ପ୍ରତ୍ୟାହାର କରିଛନ୍ତି।
ସୋସିଆଲ ମିଡିଆରେ ଏକ ପୋଷ୍ଟ ମାଧ୍ୟମରେ ନିତୀଶ କହିଛନ୍ତି, ‘ରାମାୟଣ କେବଳ ଏକ କାହାଣୀ ନୁହେଁ, ବରଂ ଭାରତର ସାଂସ୍କୃତିକ ଓ ଆଧ୍ୟାତ୍ମିକ ପରିଚୟର ଏକ ଅବିଚ୍ଛେଦ୍ୟ ଅଂଶ। ଏହାର ମୁଖ୍ୟ ଚରିତ୍ରଗୁଡ଼ିକୁ ନିଜ ଇଚ୍ଛା ଅନୁସାରେ ପରିବର୍ତ୍ତନ କରିବା ଉଚିତ୍ ନୁହେଁ। ଧର୍ମ, ପରମ୍ପରା ଓ ମର୍ଯ୍ୟାଦାର ସୁରକ୍ଷା ପାଇଁ ଭଗବାନ ବିଷ୍ଣୁ ଭଗବାନ ଶ୍ରୀ ରାମଙ୍କ ଅବତାର ନେଇଥିଲେ। କିନ୍ତୁ ଚଳଚ୍ଚିତ୍ରରେ ରାବଣଙ୍କୁ ଜଣେ ଅତ୍ୟନ୍ତ ଉଦାର, ସାମାଜିକ ନ୍ୟାୟପରାୟଣ ଓ ନିରପେକ୍ଷ ଶାସକ ଭାବେ ଦେଖାଯାଇଥିବାରୁ ମୂଳ ରାମାୟଣର ନୈତିକ ବାର୍ତ୍ତା ପ୍ରଭାବିତ ହୋଇଛି ବୋଲି ସେ କହିଛନ୍ତି।
ସେ ଆଉ ମଧ୍ୟ କହିଛନ୍ତି, ଆଖିଦୃଶିଆ ଭିଜୁଆଲ୍ ଇଫେକ୍ଟସ୍ କେବେ ମଧ୍ୟ ରାମାୟଣର ଦାର୍ଶନିକ ଗଭୀରତା ଓ ଆଧ୍ୟାତ୍ମିକ ମହତ୍ତ୍ୱର ସ୍ଥାନ ନେଇପାରିବ ନାହିଁ। ଚଳଚ୍ଚିତ୍ରକୁ ନେଇ ସେ ଏତେ ଅସନ୍ତୁଷ୍ଟ ଯେ, ଏହାକୁ ନେଇ ପୂର୍ବରୁ କରିଥିବା ପ୍ରଶଂସାକୁ ଫେରାଇ ନେଇଛନ୍ତି। ଏପରିକି ଏହି ଚଳଚ୍ଚିତ୍ର ବିଷୟରେ କହିବାକୁ ତାଙ୍କ ପାଖରେ ଗୋଟିଏ ବି ଭଲ ଭାଗ କି କଥା ନାହିଁ ବୋଲି ଉଲ୍ଲେଖ କରିଛନ୍ତି। ସେ ଆଉ ମଧ୍ୟ କହିଛନ୍ତି, ‘ମୋ ମତରେ, ଏହି ଚଳଚ୍ଚିତ୍ରଟି ଭାରତୀୟ ସିନେମାକୁ ଆନ୍ତର୍ଜାତୀୟ ସ୍ତରରେ ପ୍ରତିନିଧିତ୍ୱ କରିବାର ଯୋଗ୍ୟ ନୁହେଁ। ଏହି ଚଳଚ୍ଚିତ୍ରଟି ଭାରତର ଇତିହାସ, ସଂସ୍କୃତି ଓ ଆଧ୍ୟାତ୍ମିକ ମୂଲ୍ୟବୋଧକୁ ଭୁଲ ଭାବରେ ଉପସ୍ଥାପନ କରୁଛି। ଆମର ସଂସ୍କୃତି ଓ ଐତିହ୍ୟକୁ ସମ୍ମାନ କରାଯିବା ସହ ପରଦାରେ ସଠିକ୍ ଓ ଦାୟିତ୍ୱପୂର୍ଣ୍ଣ ଭାବରେ ଚିତ୍ରଣ କରାଯିବା ଉଚିତ୍।”
ପ୍ରକାଶ ଥାଉ କି, ଚଳଚ୍ଚିତ୍ରର ଟ୍ରେଲର ରିଲିଜ୍ ହେବା ପରେ ନିତୀଶ ଏହାକୁ ଖୁବ୍ ପ୍ରଶଂସା କରିଥିଲେ। ଏପରିକି ଏହା ଶ୍ରେଷ୍ଠ ବିଦେଶୀ ଚଳଚ୍ଚିତ୍ର ବର୍ଗରେ ଓସ୍କାର ପୁରସ୍କାର ଜିତିପାରିବ ବୋଲି ଆଶା ପ୍ରକାଶ କରିଥିଲେ। ଅନ୍ୟପକ୍ଷରେ ଅଭିନେତା ମୁକେଶ ଖାନ୍ନା ମଧ୍ୟ ଚଳଚ୍ଚିତ୍ରରେ ନିଆଯାଇଥିବା କିଛି ସୃଜନଶୀଳ ସ୍ୱାଧୀନତାକୁ ନେଇ ପ୍ରଶ୍ନ ଉଠାଇଛନ୍ତି। ବିଶେଷକରି ସୀତାଙ୍କୁ ନେଇ ରହିଥିବା ଏକ ଯୁଦ୍ଧ ଦୃଶ୍ୟ ଉପରେ ସେ ଆପତ୍ତି ଉଠାଇଛନ୍ତି । ରଣବୀର କପୁର, ସାଇ ପଲ୍ଲବୀ ଓ ୟଶଙ୍କ ଅଭିନୀତ ଏହି ଫିଲ୍ମର ପ୍ରଥମ ପାର୍ଟ ନଭେମ୍ବର ୧ ତାରିଖରେ ରିଲିଜ ହୋଇଥିଲା ।
