ଭୁବନେଶ୍ୱର: ଅସହ୍ୟ ଜାଡ଼ ସହ ଘନ କୁହୁଡି ରାଜ୍ୟବାସୀଙ୍କୁ କଲବଲ କରିବ । ୨୮ ତାରିଖରୁ ରାଜ୍ୟରେ ପ୍ରବଳ ଶୀତ ଲହରୀ ଅନୁଭୂତ ହେବ । ଗତ କିଛି ଦିନ ଧରି କୁହୁଡି ଚାଦରରେ ଆଚ୍ଛାଦିତ ଥିବା ରାଜ୍ୟର ଅଧିକାଂଶ ଜିଲ୍ଲାରେ ଆଜି ବି ଅଧା ଦିନ କୁହୁଡି ବଳୟରେ ଥିଲା । ତେବେ ଆସନ୍ତା ୨୪ ଘଣ୍ଟା ଯାଏଁ ଏପରି ସ୍ଥିତି ଲାଗି ରହିବା ନେଇ ଆକଳନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଆଜିଠାରୁ ଆସନ୍ତାକାଲି ସକାଳ ପର୍ଯ୍ୟନ୍ତ ଦକ୍ଷିଣ ଉପକୂଳ ଓଡିଶାର ୮ଟି ଜିଲ୍ଲାକୁ ଘନ କୁହୁଡି ସତର୍କତା ଜାରି ହୋଇଛି । ଆସନ୍ତା ୩ ଦିନ ମଧ୍ୟରେ ରାତିର ସର୍ବନିମ୍ନ ତାପମାତ୍ରା ୩ ରୁ ୫ ଡିଗ୍ରୀ ହ୍ରାସ ପାଇବା ସହ ଆସନ୍ତା ୨୮ ତାରିଖରୁ ଶୀତ ଲହରି ଫେରିବା ନେଇ କିଛି ଜିଲ୍ଲାକୁ ୟେଲୋ ଓ୍ୱାର୍ଣ୍ଣିଂ ଜାରି କରିଛି କେନ୍ଦ୍ର । ଏଥିପାଇଁ ୨୮ରୁ ୨୯ ତାରିଖ ସକାଳ ପର୍ଯ୍ୟନ୍ତ ୪ ଜିଲ୍ଲା ଝାରସୁଗୁଡା, ବରଗଡ଼, ବଲାଙ୍ଗୀର ଏବଂ ସୋନପୁରକୁ ୟେଲୋ ଆଲର୍ଟ ଜାରି କରାଯାଇଛି । ୨୯ ତାରିଖରୁ ୩୦ ତାରିଖ ସକାଳ ପର୍ଯ୍ୟନ୍ତ ୭ ଜିଲ୍ଲା ଝାରସୁଗୁଡା, ବରଗଡ଼, ବଲାଙ୍ଗୀର, ସମ୍ବଲପୁର, ଅନୁଗୁଳ, ଦେବଗଡ ଏବଂ ସୋନପୁର କୁ ପ୍ରବଳ ଶୀତ ନେଇ ୟେଲୋ ଆଲର୍ଟ ଜାରି କରାଯାଇଛି ।
ଆଜି ୭୩ତମ ସାଧାରଣତନ୍ତ୍ର ଦିବସ, ପ୍ରଥମ ଥର ପାଇଁ ରାଜ୍ୟସ୍ତରୀୟ ପରେଡରେ ସାମିଲ ହେବେ BSF
ଭୁବନେଶ୍ୱର: ଆଜି ସାରା ଦେଶ ପାଳୁଛି ୭୩ ତମ ସାଧାରଣତନ୍ତ୍ର ଦିବସ । ଭୁବନେଶ୍ୱର ମହାତ୍ମାଗାନ୍ଧୀ ମାର୍ଗରେ ରାଜ୍ୟସ୍ତରୀୟ ସାଧାରଣତନ୍ତ୍ର ଦିବସ ପାଳିତ ହେବ । କୋଭିଡ କଟକଣାରେ ଉତ୍ସବ ପାଳନ ହେବ । ରାଜ୍ୟପାଳ ପ୍ରଫେସର ଗଣେଶୀ ଲାଲ ପତାକା ଉତ୍ତୋଳନ କରିବେ । ସମ୍ମାନିତ ଅତିଥି ଭାବେ ଯୋଗଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପରେଡରେ ୧୦ଟି କଣ୍ଟିଜେଣ୍ଟ ଭାଗ ନେଇଛନ୍ତି । ବିଏସଏଫ, ସିଆରପିଏଫ, ଏସଓଜି, ଓଏସଏଏପି, ଓଡ୍ରାଫ, ଫାୟାର, ଏସଏସବି ଓ ୩ଟି ବ୍ରାସବ୍ୟାଣ୍ଡ ଯୋଗ ଦେବେ । ଚଳିତବର୍ଷ ପ୍ରଥମ ଥର ରାଜ୍ୟସ୍ତରୀୟ ପରେଡରେ ବିଏସଏଫ ସାମିଲ ହେଉଛି । ଯୁବ ଆଇପିଏସ ରୋହିତ ବର୍ମା ପରେଡ କମାଣ୍ଡିଂ କରିବେ । ରାଜ୍ୟସ୍ତରୀୟ ପରେଡକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ କଡାକଡି କରିଛି କମିଶନରେଟ ପୋଲିସ । ଭୁବନେଶ୍ୱର ଡିସିପିଙ୍କ ନେତୃତ୍ୱରେ ରହିଛି ପରେଡ ଗ୍ରାଉଣ୍ଡ । ୫ ସ୍ତରୀୟ ସୁରକ୍ଷା ବ୍ୟବସ୍ଥା, ୨୫ ପ୍ଳାଟୁନ ପୋଲିସ ଫୋର୍ସ, ୭୦ ଜଣ ବଛା ବଛା ପୋଲିସ ଅଫିସର ସୁରକ୍ଷା ବ୍ୟବସ୍ଥାରେ ନିୟୋଜିତ ହୋଇଛନ୍ତି ।
ସମ୍ପ୍ରତି କୋଭିଡ ଅନୁରୂପ ବ୍ୟବହାର ପାଳନ କରିବା ରାଷ୍ଟ୍ରଧର୍ମ: ରାଷ୍ଟ୍ରପତି
ନୂଆଦିଲ୍ଲୀ:ସାଧାରଣତନ୍ତ୍ର ଦିବସ ଅବ୍ୟବହିତ ପୂର୍ବରୁ ଦେଶବାସୀଙ୍କୁ ସମ୍ୱୋଧିତ କରିଛନ୍ତି ମହାମହିମ ରାଷ୍ଟ୍ରପତି ରାମନାଥ କୋବିନ୍ଦ । କୋଭିଡ୍ ଟିକାକୁ ଏକ ଗଣ ଆନ୍ଦୋଳନରେ ପରିଣତ କରିଥିବାରୁ ଦେଶର ଲୋକମାନେ ଶ୍ରେୟର ହକଦାର ବୋଲି କହିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ ।
କରୋନା ମହାମାରୀ ସମୟରେ ଡାକ୍ତର, ନର୍ସ, ପାରାମେଡିକାଲ କର୍ମଚାରୀମାନେ ଅତ୍ୟନ୍ତ କଠିନ ପରିସ୍ଥିତିରେ ମାନବଜାତିର ସେବା କରିଛନ୍ତି । ଏଥିପାଇଁ ସେମାନେ ଧନ୍ୟବାଦର ହକଦାର । ଅନ୍ୟପକ୍ଷରେ କୋଭିଡକୁ ହରାଇବା ପାଇଁ କୋଭିଡ ଅନୁରୂପ ବ୍ୟବହାର ପାଳନ କରିବାକୁ ରାଷ୍ଟ୍ରଧର୍ମ ଭାବେ ଅଭିହିତ କରିଛନ୍ତି ରାଷ୍ଟ୍ରପତି । ଦେଶର ଯବାନମାନେ ଅତ୍ୟନ୍ତ କଠିନ ପରିସ୍ଥିତି, ପ୍ରବଳ ଥଣ୍ଡା, ତତଲା ମରୁଭୂମିରେ ସେମାନେ ନିଜର ପରିବାରଠାରୁ ଦୂରରେ ରହି ଦେଶମାତୃକାର ସେବା କରୁଛନ୍ତି । ଆମର ସୈନ୍ୟ ଓ ସୁରକ୍ଷାବଳ ଦେଶର ଟେକ ରଖିପାରିଛନ୍ତି । ସେମାନଙ୍କ ଯୋଗୁଁ ଦେଶବାସୀ ଶାନ୍ତିରେ ଶୋଇପାରୁଛନ୍ତି ।
ନିଜର ଏହି ଅଭିଭାଷଣରେ ରାଷ୍ଟ୍ରପତି ଗତ ଡିସେମ୍ବର ମାସରେ ତାମିଲନାଡୁର କୁନ୍ନୁରରେ ହୋଇଥିବା ହେଲିକପ୍ଟର ଦୁର୍ଘଟଣାକୁ ନେଇ ଦୁଃଖ ପ୍ରକାଶ କରିଥିଲେ । ଏହି ଦୁର୍ଘଟଣାରେ ସିଡିଏସ ବିପିନ ରାଓ୍ବାତ, ତାଙ୍କ ପତ୍ନୀ ଓ ଅନ୍ୟ ୧୨ ଜଣ ପ୍ରାଣ ହରାଇଥଲେ । ଅଲିମ୍ପିକ୍ସରେ ଆମ କ୍ରୀଡ଼ାବିତ ପାରଦର୍ଶିତା ଦେଖାଇଛନ୍ତି। ୟଙ୍ଗ ଚମ୍ପିୟନଙ୍କ ଆତ୍ମବିଶ୍ୱାସ କୋଟି କୋଟି ଭାରତୀୟଙ୍କୁ ପ୍ରେରଣା ଦେଇଛି।
୧୫ ବର୍ଷ ପୁରୁଣା ଅଶ୍ଲୀଳତା ମାମଲାରେ ଶିଳ୍ପା ସେଟ୍ଟୀ ଦୋଷମୁକ୍ତ
ମୁମ୍ୱାଇ: କିସ୍ ମାମଲାରେ ଅଭିନେତ୍ରୀ ଶିଳ୍ପା ସେଟ୍ଟୀ ଦୋଷମୁକ୍ତ । ଦୀର୍ଘ ୧୫ବର୍ଷ ପରେ ବହୁଚର୍ଚ୍ଚିତ ଶିଳ୍ପା-ରିଚାର୍ଡ ଗେରେ ମାମଲାରେ କୋର୍ଟ ଶୁଣାଇଛନ୍ତି ରାୟ । କହିଛନ୍ତି ଏହି ଘଟଣାରେ ଶିଳ୍ପା ଜଣେ ପୀଡ଼ିତା । ୨୦୦୭ ମସିହାରେ ରାଜସ୍ଥାନରେ ଆୟୋଜିତ ଏଡସ୍ ସଚେତନତା କାର୍ଯ୍ୟକ୍ରମରେ ଖୋଦ୍ ମଞ୍ଚ ଉପରେ ଶିଳ୍ପାଙ୍କୁ କିସ୍ କରିଥିଲେ ହଲିଉଡ ଅଭିନେତା ରିଚାର୍ଡ ଗେରେ ।
ଏହି ଘଟଣାକୁ ନେଇ ରାଜସ୍ଥାନ ଓ ଉତ୍ତରପ୍ରଦେଶରେ ଦୁହିଁଙ୍କ ନାମରେ ତିନିଟି ମାମଲା ରୁଜୁ ହୋଇଥିଲା । ମାମଲାର ଶୁଣାଣି କରି ମୁମ୍ବାଇ ମେଟ୍ରୋପଲିଟାନ ମାଜିଷ୍ଟ୍ରେଟ କେତକୀ ଚଭନ ଦର୍ଶାଇଛନ୍ତି ଏହି ଘଟଣା ପରେ ଶିଳ୍ପା ନିଜ ଯୁକ୍ତି ଦର୍ଶାଇଥିଲେ । ସମସ୍ତ ଯୁକ୍ତି ଓ ଅଭିଯୋଗକୁ ଆଧାର କରି ଏହା ପ୍ରମାଣିତ ହୋଇଥିଲା ଯେ ଶିଳ୍ପାଙ୍କ ବିରୋଧରେ ହୋଇଥିବା ଅଭିଯୋଗ ଭିତ୍ତିହୀନ । ଏହି ଘଟଣାରେ ସେ ଜଣେ ପୀଡିତା । ୨୦୧୭ରେ ଏହି ମାମଲା ରାଜସ୍ଥାନରୁ ମୁମ୍ବାଇକୁ ନେବା ଲାଗି ଶିଳ୍ପା ଯେଉଁ ଆବେଦନ କରିଥିଲେ ତାହାକୁ ସୁପ୍ରିମକୋର୍ଟ ମଞ୍ଜୁରୀ ଦେଇଥିଲେ ।
ଏଥିସହିତ ପଢ଼ନ୍ତୁ: ଆଇପିଏସ୍ ଅସିତ୍ କୁମାର ପାଣିଗ୍ରାହୀଙ୍କ ସମେତ ୨୦ ପୋଲିସ କର୍ମଚାରୀଙ୍କୁ ମିଳିବ ରାଜ୍ୟପାଳ ପଦକ
ଏସ୍ଟିଏଫ୍ର ଅପରେସନ୍ ‘ପାଉଡର’: ୩ କେଜି ବ୍ରାଉନ ସୁଗାର, ଚୋରା ବନ୍ଧୁକ ଓ ନଗଦ ୬୫ ଲକ୍ଷ ଟଙ୍କା ଜବତ
ଭୁବନେଶ୍ୱର: ନିଶା ବେପାରୀଙ୍କୁ ଘାରିଛି ଏସଟିଏଫ ଭୟ । ମାରାଥନ ରେଡ୍, ଅତର୍କିତ ଚଢାଉରେ ଅତିଷ୍ଠ ହୋଇ ମାଫିଆ ବଦଲାଉଥିଲା ଠିକଣା । ନୟାଗଡ଼ରୁ ବ୍ରାଉନସୁଗାର ସିଣ୍ଡିକେଟର ନୂଆ ଆଡ୍ଡା ଠାବ ପରେ ଏବେ ଖୋଲିଛି ଗୁମର । ନୟାଗଡ଼ରେ ରହି ନିଶା କାରବାର ଅପରେଟ କରୁଥିଲା ମାଫିଆ ଶିବ ପ୍ରସାଦ ଦାସ । ରେଡ୍ ବେଳେ ଶିବ ଫେରାର ମାରିଥିବା ବେଳେ, ସହଯୋଗୀ କେ, ଭିକି ରାଓଙ୍କୁ ବାନ୍ଧିଛି ଏସଟିଏଫ୍ । ଘଟଣାସ୍ଥଳରୁ ୩ କେଜି ବ୍ରାଉନ ସୁଗାର, ମୁଙ୍ଗେର ମେଡ୍ ଚୋରା ବନ୍ଧୁକ, ନଗଦ ୬୫ ଲକ୍ଷ ଟଙ୍କା, ଟଙ୍କା ଗଣା ମେସିନ୍ ସହ ପ୍ୟାକିଙ୍ଗ ମେସିନ ଜବତ କରିଛି ପୋଲିସ । ସେପଟେ ଆନ୍ତରାଜ୍ୟ ମାଫିଆଙ୍କ ନିଦ ହଜାଇଛି ଏସଟିଏଫ ଡିଆଇଜି ଜୟନାରାୟଣ ପଙ୍କଜଙ୍କ ଟିମ୍ ।
ଏସଟିଏଫର ଅପରେସନ୍ ପାଉଡର । ଖସିଗଲା ମାଷ୍ଟର ମାଇଣ୍ଡ । ଜାଲରେ ପଡିଲେ ଖୁଚୁରା ବେପାରୀ । ମୂର୍ଷିଦାବାଦ ଲାଲଗୁଲାରୁ ନୟାଗଡ଼ ଭାୟା ଭୁବନେଶ୍ୱର । ନୟାଗଡ଼ରେ ବ୍ରାଉନସୁଗାର ସିଣ୍ଡିକେଟର ବଡ ଗୁମର । ୩ କେଜି ବ୍ରାଉନ ସୁଗାର, ମୁଙ୍ଗେର ମେଡ୍ ଚୋରା ବନ୍ଧୁକ, ନଗଦ ୬୫ ଲକ୍ଷ ଟଙ୍କା, ଟଙ୍କା ଗଣା ମେସିନ୍ ସହ ପ୍ୟାକିଙ୍ଗ ମେସିନ ଜବତ କରିଛି ପୋଲିସ । ନୟାଗଡ଼ ସିନ୍ଦୁରିଆ ଉଦୟଲେନରେ ଏକ ଭଡ଼ା ଘରେ ଧନ୍ଦା କରୁଥଲା ଡ୍ରଗ୍ସ ମାଫିଆ ଶିବ ପ୍ରସାଦ ଦାସ । ଏସ୍ଟିଏଫ୍ର ମାରାଥନ ରେଡ୍ ପରେ ମାଷ୍ଟର ମାଇଣ୍ଡ ଶିବ ପ୍ରସାଦର ବଦଳିଥିଲା ନେଟୱର୍କ । ଫିଲ୍ମି ଷ୍ଟାଇଲରେ କରୁ ଥିଲା ଧଳାଜହରର ଧନ୍ଦା । ଡିଲର ନୁହେଁ ଡାଇରେକ୍ଟ ଡିଷ୍ଟ୍ରିବ୍ୟୁଟର ପାଖରୁ ଆଣୁଥିଲା ମାଲ। ଗତ କାଲି ରେଡ୍ ବେଳେ ଶିବ ପ୍ରସାଦ ଫେରାର ମାରିଥିବା ବେଳେ, ସହଯୋଗୀ କେ, ଭିକି ରାଓଙ୍କୁ ଗିରଫ କରିଛି ଏସଟିଏଫ୍ । ତେବେ ଜବତ ହୋଇଥିବା ମୋବାଇଲ ଓ ଟ୍ୟାବରୁ ଖୋଲିବ ଶିବ ଆଣ୍ଡ କୋର ଗୁମର ।
ନିଶା କାରବାରା ବିରୋଧରେ ଏସଟିଏଫର ହଲ୍ଲାବୋଲ ପରେ ଥରହର ନିଶା ସାମ୍ରାଜ୍ୟ । ପଶ୍ଚିମବଙ୍ଗ ଏସଟିଏଫ ସହାୟତାରେ ଆନ୍ତରାଜ୍ୟ ଡ୍ରଗ୍ସ ମାଫିଆଙ୍କ ଆଡ୍ଡାରେ ଧସେଇ ପଶିଛି ଏସଟିଏଫ ଡିଆଇଜି ଜୟନାରାୟଣ ପଙ୍କଜଙ୍କ ଟିମ୍ । ନିଶା ମାଫିଆ ସେକ୍ ଲାଲ ଓ ରାଜସ୍ଥାନରୁ ସେକ୍ ଆଜମଲକୁ ପିନ୍ଧାଇଛନ୍ତି ହାତକଡ଼ି । ଓଡ଼ିଶାର ଡ୍ରଗ୍ସ ହବ୍ ବାଲେଶ୍ଵର ଓ ଜଳେଶ୍ୱରର ସେକ ରାଜା, ଟକୁଲ ରାଜା, ସେକ ହାସିମ, ସେକ ନସିମ୍, ସେକ ଆସିକି ଓ ଲୋକନାଥ ବେହେରା ଭଳି ୧୦ରୁ ଅଧିକ ନିଶା ମାଫିଆଙ୍କୁ କାଳକୋଠରୀକୁ ପଠାଇଛି ଏସଟିଏଫ । ସେହିପରି ସେକ୍ ରାଜା ଓ ଟକୁଲ ରାଜାର କୋଟି କୋଟି ଟଙ୍କାର ସମ୍ପତି ବାଜ୍ୟାପ୍ତି ହୋଇଛି ।
ଗତ ୨ବର୍ଷରେ ଏସ୍ଟିଏଫ୍ ୫୭ କେଜି ବ୍ରାଉନସୁଗର ସହ ୮୭ କୁଇଣ୍ଟାଲ ଗଂଜେଇ ଜବତ କରିଛି । ୧୨୨ ଜଣ ନିଶା ମାଫିଆଙ୍କୁ ଗିରଫ କରିଛି । ସେହିପରି ଜଙ୍ଗଲ ତସ୍କରୀ ରୋକିବାକୁ ସ୍ପେଶାଲ ଡ୍ରାଇଭ ଜାରି ରଖିଛି ଏସଟିଏଫ । ଗତ ୨ ବର୍ଷରେ ୨୫ଟି ବାଘଛାଲ, ୭ଟି ହାତୀଦାନ୍ତ, ୧୦ଟି ଜୀବନ୍ତ ବଜ୍ରାକାପ୍ତା ଓ ୧୬ କେଜି ବଜ୍ରାକାପ୍ତା କାତି ଜବତ ସହ ୫୬ ଜଣ ଗିରଫ ହୋଇଛନ୍ତି ।
ବୁଲିବାଠୁ ନେଇ ଭିଡିଓ ଦେଖିବା ଯାଏ, ଆପଣଙ୍କ ଉପରେ ନଜର ରଖିଛି ଗୁଗଲ୍
ନୂଆଦିଲ୍ଲୀ: ବିଶ୍ୱର ସବୁଠୁ ବଡ଼ ସର୍ଚ୍ଚ ଇଞ୍ଜିନ୍ ଗୁଗଲ ଆପଣଙ୍କ ଡାଟା ସଂଗ୍ରହ କରୁଛି । ଗୁଗଲ୍ ସଂଗ୍ରହ କରୁଥିବା ଡାଟା ଆପଣଙ୍କ ଭାବନା ଠାରୁ ଢ଼େର୍ ଅଧିକ । ଆପଣ ୟୁଟ୍ୟୁବରେ ଦେଖୁଥିବା ଭିଡିଓଠୁ ନେଇ ଆପଣ କେଉଁ ଆଡ଼େ, କେଉଁ ରାସ୍ତାରେ ଯାଉଛନ୍ତି ତାର ଟିକିନିଖି ଡିଟେଲ୍ସ ରଖୁଛି ଗୁଗଲ୍ ମ୍ୟାପ୍ । ତେବେ ଆପଣ ଏସବୁ ତଥ୍ୟକୁ ଡିଲିଟ୍ କରି ଆପଣଙ୍କ ଗୋପନୀୟତାକୁ ସୁରକ୍ଷିତ ରଖିପାରିବେ ।
ଆପଣଙ୍କ ହାତରେ ଆଇଫୋନ୍ କିମ୍ବ ଏଣ୍ଡ୍ରୟଡ୍ ଯାହା ବି ଥାଉ । କିନ୍ତୁ ଆପଣଙ୍କ ବ୍ୟକ୍ତିଗତ ସୂଚନା ଗୁଗଲ୍ ସର୍ଭରରେ ରହୁଛି । ୨୦୧୯ରିୁ ଗୁଗଲ୍ ଲୋକେସନ୍ ଡାଟାରେ ପରିବର୍ତ୍ତନ ଆଣିଛି । ଯେଉଁଥିରେ ରହିଛି ଅଟୋଡିଲିଟ୍ ବିକଳ୍ପ । ଯାହାଦ୍ୱାରା ଆପଣ ଲୋକେସନ୍ ଡାଟାକୁ ସ୍ୱତଃପ୍ରବୃତ ସମୟାନୁସାରେ ଡିଲିଟ୍ କରିପାରିବେ । ଏଥିସହ ଗୁଗଲ୍ ମ୍ୟାପରେ ଇକୋଗ୍ନିଟୋ ମୋଡ୍ ରହିଛି ।
ତେବେ ଗୁଗଲ୍ ନିକଟରେ ଥିବା ଆପଣଙ୍କ ତଥ୍ୟକୁ ଆକ୍ସେସ୍ କରି ହଟାଇ ହେବ । ସେଥିପାଇଁ ସର୍ବପ୍ରଥମେ ଆପଣଙ୍କୁ ଦେଖିବାକୁ ପଡ଼ିବ ଆପଣଙ୍କ ବିଷୟରେ ଇଣ୍ଟରନେଟ୍ ୟୁଜର୍ସଙ୍କୁ କଣ ଦେଖାଉଛି । ଏଥିପାଇଁ ବ୍ରାଉଜରରେ ଗୁଗଲ୍ ଆକାଉଣ୍ଟ ପେଜରେ କ୍ଲିକ୍ କରନ୍ତୁ । ଆଉ ସେଠାରେ ଆପଣଙ୍କ ୟୁଜରନେମ୍ ଟାଇପ୍ କରନ୍ତୁ । ଏହାପରେ ଆପଣଙ୍କୁ ମେନ୍ୟୁ ବାର ଦେଖାଯିବ । ସେଥିରୁ ଆପଣ ପର୍ସନାଲ ଇନଫୋ ଚୟନ କରି ସୂଚନା ଦେଖନ୍ତୁ । ସେଠାରେ ଆପଣଙ୍କ ଫଟୋ, ନାଁ, ଇମେଲ ଆଡ୍ରେସ, ଲିଙ୍ଗ, ଜନ୍ମଦିନ ଆଦିକୁ ପରିବର୍ତ୍ତନ ସହ ଡିଲିଟ୍ କରିପାରିବେ ।
ଆଉ ଯଦି ଆପଣଙ୍କ କିଛି ସୂଚନା ସର୍ବସାଧାରଣରେ ଉପଲବ୍ଧ ହେଉଛି ତାକୁ ପରିବର୍ତ୍ତନ କରି ବ୍ୟକ୍ତିଗତ କରିପାରିବେ । ଆଉ ଆପଣଙ୍କ ତଥ୍ୟକୁ ଡିଲିଟ୍ କରିବାକୁ ଚାହୁଁଥିଲେ ଗୁଗଲ୍ ଆକାଉଣ୍ଟରୁ ସାଇନ୍ ଇନ୍ କରି ଡାଟା ଆଣ୍ଡ ପ୍ରାଇଭେସୀକୁ ଯାଇ ଅଟୋ ଡିଲିଟ୍ ବିକଳ୍ପ ଚୟନ କରନ୍ତୁ ।
ଆଇପିଏସ୍ ଅସିତ୍ କୁମାର ପାଣିଗ୍ରାହୀଙ୍କ ସମେତ ୨୦ ପୋଲିସ କର୍ମଚାରୀଙ୍କୁ ମିଳିବ ରାଜ୍ୟପାଳ ପଦକ
ଭୁବନେଶ୍ୱର: ସାଧାରଣତନ୍ତ୍ର ଦିବସ ଅବସରରେ ଉଲ୍ଲେଖନୀୟ ସେବା ନେଇ ରାଜ୍ୟ ପୋଲିସ କର୍ମଚାରୀଙ୍କୁ ପ୍ରଦାନ କରାଯିବ ରାଜ୍ୟପାଳ ପଦକ । ବର୍ଷ ୨୦୨୧ ପାଇଁ ୪ଜଣ ଆଇପିଏସ୍ ଅଧିକାରୀଙ୍କ ସମେତ ମୋଟ ୨୦ ଜଣ ପାଇବେ ଆଓ୍ୱାର୍ଡ । ପୋଲିସ ଆଇଜି ଏସ. ପ୍ରବୀଣ କୁମାର, ଅସିତ ପାଣିଗ୍ରାହୀ, ଭଦ୍ରକ ଏସପି ଚରଣ ସିଂ ମୀନା, ବ୍ରହ୍ମପୁର ଏସପି ପିନାକ ମିଶ୍ର ପାଇବେ ପଦକ । ଏ ନେଇ ଗୃହ ବିଭାଗରୁ ବିଜ୍ଞପ୍ତି ପ୍ରକାଶ ପାଇଛି ।
ଅନ୍ୟମାନେ ହେଲେ ସମ୍ୱଲପୁର ଅତିରିକ୍ତ ଏସ୍ପି ତପନ କୁମାର ମହାନ୍ତି, ଓଏପିଏସ ଆସିଷ୍ଟାଣ୍ଟ କମାଣ୍ଡାଣ୍ଟ ମାଧବାନନ୍ଦ ପ୍ରଧାନ, ରାଜ୍ୟ ଗୁଇନ୍ଦା ବିଭାଗ ଇନ୍ସପେକ୍ଟର ଏ.ଶ୍ରୀନିବାସ ଦୋରା, ସିଆଇଡି ଇନ୍ସପେକ୍ଟର ରତ୍ନାପ୍ରଭା ଶତପଥୀ, ବ୍ରହ୍ମପୁର ଇନ୍ସପେକ୍ଟର ସୁରେଶ କୁମାର ତ୍ରିପାଠୀ, ସିଆଇଡି ସବ୍ ଇନ୍ସପେକ୍ଟର ପ୍ରଦ୍ୟୁମ୍ନ କୁମାର ନନ୍ଦ, କୋରାପୁଟ ସବ୍ ଇନ୍ସପେକ୍ଟର ସୁଦର୍ଶନ ଅଧିକାରୀ, ଡେପୁଟୀ ସୁବେଦାର ଓଏସ୍ଏପି ସେକେଣ୍ଡ ବାଟାଲିୟନ୍ , କୋରାପୁଟ ପୋଲିସ ଏଏସ୍ଆଇ ସୀମାଞ୍ଚଳ ବେହେରା, ଭିଜିଲାନ୍ସ ଏଏସ୍ଆଇ ପ୍ରଣବ କୁମାର ନାୟକ, ଟିଟିଆଇ ଭୁବନେଶ୍ୱର ହାବିଲଦାର ଅଶୋକ କୁମାର ସାମନ୍ତରାୟ, କନେଷ୍ଟବଳ କିରଣ ଚନ୍ଦ୍ର ପାତ୍ର, କନେଷ୍ଟବଳ ଗୌତମ ପାତ୍ର, ଅନୁଗୁଳ କନେଷ୍ଟବଳ ସୁକେଶ ପ୍ରଧାନ, ଗୁଇନ୍ଦା କନେଷ୍ଟବଳ ସୁଶାନ୍ତ କୁମାର ରାଉତରାୟ, ଭିଜିଲାନ୍ସ କନେଷ୍ଟବଳ ରଶ୍ମୀରେଖା ପଣ୍ଡା ସମ୍ମାନଜନକ ରାଜ୍ୟପାଳ ପୁରସ୍କାର ପାଇବେ ।
ଲେଖିକା ପ୍ରତିଭା ରାୟଙ୍କୁ ପଦ୍ମ ଭୂଷଣ, ବାବା ବଳିଆଙ୍କ ସହ ୫ ଜଣଙ୍କୁ ପଦ୍ମଶ୍ରୀ
ନୂଆଦିଲ୍ଲୀ: ଦେଶର ସମ୍ମାନଜନକ ପଦ୍ମ ପୁରସ୍କାର ଘୋଷଣା ହୋଇଛି । ୪ ଜଣଙ୍କୁ ପଦ୍ମ ବିଭୂଷଣ ପଦକ ମିଳିବ । ସେହିଭଳି ୧୭ ଜଣଙ୍କୁ ପଦ୍ମ ଭୂଷଣ ଓ ୧୦୭ ଜଣଙ୍କୁ ପଦ୍ମଶ୍ରୀ ପୁରସ୍କାର ମିଳିବ । ଓଡ଼ିଶାର ପ୍ରତିଭା ରାୟ ଶିକ୍ଷା ଓ ସାହିତ୍ୟ କ୍ଷେତ୍ରରେ ପଦ୍ମ ଭୂଷଣ ପାଇବେ ।
ସେହିଭଳି ରାଜ୍ୟର ୫ ଜଣଙ୍କୁ ପଦ୍ମଶ୍ରୀ ପୁରସ୍କାର ମିଳିବ । ସମାଜ ସେବା ପାଇଁ ଶ୍ରୀମଦ ବାବା ବଳିଆ, କ୍ରୀଡ଼ା କ୍ଷେତ୍ରରେ ପ୍ରମୋଦ ଭଗତ, ବୈଷୟିକ ବିଜ୍ଞାନ ପାଇଁ ଆଦିତ୍ୟ ପ୍ରସାଦ ଦାସ, କଳା କ୍ଷେତ୍ରରେ ଶ୍ୟାମାମଣି ଦେବୀ, ଶିକ୍ଷା ଓ ସାହିତ୍ୟ ପାଇଁ ନରସିଂହ ପ୍ରସାଦ ଗୁରୁଙ୍କୁ ମିଳିବ ପଦ୍ମଶ୍ରୀ ପୁରସ୍କାର ।
ଏଥିସହ ପଢ଼ନ୍ତୁ: ପ୍ରଥମ ପାରା ବ୍ୟାଡମିଣ୍ଟନ ଖେଳାଳି ଭାବେ ପ୍ରମୋଦ ଭଗତଙ୍କୁ ପଦ୍ମଶ୍ରୀ ସମ୍ମାନ
ଲୋକସେବା ଭବନରେ ଜାତୀୟ ଭୋଟର ଦିବସ ସଂକଳ୍ପ ପାଠ
ଭୁବନେଶ୍ୱର: ଆଜି ଜାତୀୟ ମତଦାତା ଦିବସ ଅବସରରେ ରାଜ୍ୟ ଲୋକସେବା ଭବନରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଏବଂ ଉନ୍ନୟନ କମିଶନର ପ୍ରଦୀପ କୁମାର ଜେନା ସମସ୍ତ ଅଧିକାରୀ ଓ କର୍ମଚାରୀମାନଙ୍କୁ ସଂକଳ୍ପ ପାଠ କରାଇଥିଲେ ।
ଜାତୀୟ ଭୋଟର ଦିବସର ସଂକଳ୍ପ ଥିଲା ଆମେ ଭାରତର ନାଗରିକବୃନ୍ଦ, ଗଣତନ୍ତ୍ରରେ ନିଜର ପୂର୍ଣ୍ଣ ଆସ୍ଥା ରଖି ଏହି ଶପଥ ନେଉଛୁ କି ଆମେ ନିଜ ଦେଶର ଗଣତାନ୍ତ୍ରିକ ପରମ୍ପରାର ମର୍ଯ୍ୟାଦା ବଜାୟ ରଖିବୁ ତଥା ମୁକ୍ତ, ଅବାଧ, ଏବଂ ଶାନ୍ତିପୂର୍ଣ୍ଣ ନିର୍ବାଚନର ଗରିମାକୁ ଅକ୍ଷୁର୍ଣ୍ଣ ରଖି ନିର୍ଭିକ ହୋଇ, ଜାତି, ବର୍ଣ୍ଣ, ଗୋଷ୍ଠୀ, ଭାଷା ଅଥବା ଅନ୍ୟ କୌଣସି ପ୍ରଲୋଭନରେ ପ୍ରଭାବିତ ନ ହୋଇ ପ୍ରତ୍ୟେକ ନିର୍ବାଚନରେ ନିଜ ମତାଧିକାରର ପ୍ରୟୋଗ କରିବୁ । ମୁଖ୍ୟ ଶାସନ ସଚିବଙ୍କ ଲୋକ ସମ୍ପର୍କ ଅଧିକାରୀ ଡ ଉମାକାନ୍ତ ମହାପାତ୍ର ଏହି ସଂକଳ୍ପପାଠ ସଭାର ସଂଯୋଜନା କରିଥିଲେ ।
ରାଜଧାନୀରେ ବୁଲା କୁକୁରଙ୍କ ବନ୍ଧ୍ୟାକରଣକୁ ତ୍ୱରାନ୍ୱିତ କଲା ବିଏମ୍ସି: ଦିନକୁ ୩୦ କୁକୁରଙ୍କ ହେଉଛି ଅସ୍ତ୍ରୋପଚାର
ଭୁବନେଶ୍ୱର: ରାଜଧାନୀବାସୀଙ୍କ ପାଇଁ ଚିନ୍ତା ବଢ଼ାଇଲେଣି ବୁଲା କୁକୁର । ଦିନକୁ ଦିନ ବଢୁଛି ଏମାନଙ୍କ ସଂଖ୍ୟା । ବୁଲା କୁକୁରଙ୍କ ଯୋଗୁଁ ବଢୁଛି ସଡ଼କ ଦୁର୍ଘଟଣା । କୁକୁରଙ୍କ ବନ୍ଧ୍ୟାକରଣ କରି ସଂଖ୍ୟା ହ୍ରାସ କରିବା ଦିଗରେ ପଦକ୍ଷେପ ନେବାକୁ ଦାବି ହୋଇଛି । କର୍ମଚାରୀ ଅଭାବ ପୂରଣ ପରେ ABC ବା ପଶୁ ଜନ୍ମ ନିୟନ୍ତ୍ରଣ ଅଭିଯାନକୁ ତ୍ୱରାନ୍ୱିତ କଲା ବିଏମସି ।
ରାଜଧାନୀରେ ବଢ଼ିଲାଣି ବୁଲା କୁକୁରଙ୍କ ଦୌରାତ୍ମ୍ୟ । କୁକୁରଙ୍କ ପାଇଁ ବଢୁଛି ସଡକ ଦୁର୍ଘଟଣା । ବିଏମସିର ପଶୁ ଜନ୍ମ ନିୟନ୍ତ୍ରଣ ଅଭିଯାନକୁ ନେଇ ଉଠିଲା ପ୍ରଶ୍ନ । କର୍ମଚାରୀଙ୍କ ଅଭାବ ପୂରଣ ସହ ବ୍ୟାପକ ହେଲା କୁକୁର ବନ୍ଧ୍ୟାକରଣ କାର୍ଯ୍ୟ । ଭୁବନେଶ୍ୱର ରାଜରାସ୍ତାରେ ଏପରିକି ଗଳିକନ୍ଦିରେ ବଢି ଚାଲିଛି ବୁଲା କୁକୁରଙ୍କ ସଂଖ୍ୟା । ରାସ୍ତାଘାଟରେ ଯାତାୟତ କରିବା ଏବେ କଷ୍ଟକର । ଏନେଇ ଅତିଷ୍ଠ ରାଜଧାନିବାସୀ । ପୂର୍ବଭଳି ବିଏମସି ପକ୍ଷରୁ ଚାଲିଥିବା କୁକୁରଙ୍କ ବନ୍ଧ୍ୟାକରଣ ହେଉନଥିବା ଅଭିଯୋଗ ହୋଇଛି । ତୁରନ୍ତ ବିଏମସି ଏଥିପ୍ରତି ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି।
ଭୁବନେଶ୍ୱରରେ ଅଛନ୍ତି ପ୍ରାୟ ୬୦ହଜାରରୁ ଅଧିକ ବୁଲା କୁକୁର । ନିୟମିତ ଜାରି ରହିଛି କୁକୁର ବନ୍ଧ୍ୟାକରଣ ଓ ପଶୁ ସହାୟତା କାର୍ଯ୍ୟ । ଦୁଇଟି ସ୍ୱତନ୍ତ୍ର ଟିମ ଜରିଆରେ ଦିନକୁ ୩୦କୁକୁରଙ୍କ ବନ୍ଧ୍ୟାକରଣ କରିବାର ଲକ୍ଷ୍ୟ ରହିଛି । କୁକୁରଙ୍କୁ ଧରିବା ପରେ ଚିକିତ୍ସକଙ୍କ ଦ୍ୱାରା ଅସ୍ତ୍ରୋପଚାର କରି ଚିହ୍ନ ସ୍ୱରୂପ କାନ ଖଣ୍ଡିଆ କରାଯାଉଛି । ସ୍ୱତନ୍ତ୍ର ଆପ ମାଧ୍ୟମରେ ସମ୍ପୁର୍ଣ୍ଣ କାର୍ଯ୍ୟକ୍ରମକୁ ନିୟନ୍ତ୍ରଣ କରାଯାଉଛି । ପ୍ରାଣୀ ଚିକିତ୍ସକ ଓ ସ୍ୱାସ୍ଥ୍ୟକର୍ମୀଙ୍କ ନିଯୁକ୍ତି ପରେ ଦୂର ହୋଇଛି କର୍ମଚାରୀଙ୍କ ଅଭାବ । ଆଗକୁ ଏହି ସମସ୍ୟା ମଧ୍ୟ ଦୂର ହେବ ବୋଲି କହିଛନ୍ତି ବିଏମସି ଡେପୁଟି କମିଶନର । ଏଥିମଧ୍ୟରେ ଚିହ୍ନଟ ୬୦ହଜାର ବୁଲା କୁକୁରଙ୍କ ମଧ୍ୟରୁ ୨୫ହଜାର କୁକୁରଙ୍କ ବନ୍ଧ୍ୟାକରଣ ଶେଷ ହୋଇଛି ।