ନୂଆଦିଲ୍ଲୀ: ଆଗକୁ କମିପାରେ ତେଲ ଦର । ୟୁକ୍ରେନ ଓ ଋଷ ଯୁଦ୍ଧ ମଧ୍ୟରେ ଭାରତ ହୋଇପାରେ ଲାଭବାନ । କାରଣ ଶସ୍ତାରେ ଋଷଠାରୁ ତେଲ କିଣିବା ବିଷୟରେ ଗମ୍ଭୀରତାର ସହ ବିଚାର କରୁଛି ଭାରତ ।  ନିଜ ଆବଶ୍ୟକତାର ୮୨% ତେଲ ଆମଦାନି କରୁଥିବା ଭାରତ ରିହାତିରେ ମିଳୁଥିବା ଋଷର ତେଲ କିଣିବା ବିଷୟରେ ଚିନ୍ତା କରୁଛି । କେବଳ ତେଲ ନୁହେଁ ଅନ୍ୟାନ୍ୟ ସାମଗ୍ରୀ ମଧ୍ୟ ଏହା ଋଷରୁ ମଗାଇବାକୁ ଚାହୁଁଛି । ସାରା ଉପ୍ତାଦନରେ ବ୍ୟବହାର ହେଉଥିବା କଞ୍ଚାମାଲ ଋଷ ଓ ବେଲାରୁଷରୁ ଆମଦାନି କରିବା ଲାଗି ଭାରତ ପ୍ରସ୍ତୁତ ହେଉଛି । ଯେହେତୁ ଋଷ ଉପରେ କଟକଣା ଲାଗିଛି ତେଣୁ ଡଲାରରେ କାରବାର ହୋଇପାରିବ ନାହିଁ । ତେଣୁ ଭାରତୀୟ ମୁଦ୍ରା ଟଙ୍କାରେ ପେମେଣ୍ଟ କରିବାକୁ ଭାରତ ଚାହୁଁଛି । ଟଙ୍କା ଓ ଋଷର ମୁଦ୍ରା ରୁବଲ ମଧ୍ୟରେ କରିବାର କରିବା ଲାଗି ଏକ ବ୍ୟବସ୍ଥା ବିକଶିତ କରିବା ଉପରେ ମଧ୍ୟ ବିଚାର କରାଯାଉଛି ।

ଅତୀତରେ ଇରାନ ସହ ତେଲ କାରବାର ହେଉଥିଲା । ସାଧାରଣତଃ ଋଷରୁ ଭାରତ ୨-୩ ପ୍ରତିଶତ ତେଲ ମଗାଇ ଥାଏ । ମାତ୍ର ୟୁକ୍ରନେ ଉପରେ ଋଷ ଆକ୍ରମଣ କରିବା ପରେ ଅଶୋଧିତ ତୈଳ ଦରରେ ୪୦ ପ୍ରତିଶତ ବୃଦ୍ଧି ହୋଇଥିବାରୁ ଭାରତ ଚିନ୍ତିତ ହୋଇପଡ଼ିଛି । ଗତବର୍ଷ ନଭେମ୍ବର ବେଳକୁ ତେଲ ଦାମ୍ ୮୨ ଡଲାର ପାଖାପାଖି ଥିଲା । ଯୁଦ୍ଧ ଆରମ୍ଭ ହେବା ପରେ ୧୪ ବର୍ଷର ସର୍ବୋଚ୍ଚ ସ୍ତର ୧୪୦ ଡଲାରକୁ ବୃଦ୍ଧି ପାଇଥିଲା । ଏବେ ତାହା ୧୨୦-୧୩୦ ଡଲାର, ପାଖାପାଖି ରହିଛି । ଏଭଳି ଏକ ସମୟରେ ଋଷ ମୋଟା ଅଙ୍କର ରିହାତିରେ ଭାରତକୁ ତେଲ ବିକ୍ରି କରିବ ବୋଲି ପ୍ରସ୍ତାବ ଦେଇଛି । ସେହି ପ୍ରସ୍ତାବକୁ ଖୁସିର ସହ ଗ୍ରହଣ କରିବା ବିଷୟରେ ସରକାର ବିଚାର କରୁଛନ୍ତି । ଟ୍ୟାଙ୍କର ବୀମା ସୁବିଧା ଓ ତୈଳ ମିଶ୍ରଣକୁ ନେଇ ରହିଥିବା ସମସ୍ୟା ଦୂର ହେବା ପରେ ଋଷ ଦେଇଥିବା ରିହାତି ପ୍ରସ୍ତାବକୁ ଭାରତ ଗ୍ରହଣ କରିବ । ଋଷ ଉପରେ ଆମେରିକା ଓ ଅନ୍ୟାନ୍ୟ କ୍ଷମତାଶୀଳ ଦେଶ  କଠୋର କଟକଣା ଲଗାଇଥିବାରୁ ପୁଟିନଙ୍କ ନେତୃତ୍ୱାଧିନ ଦେଶରୁ ତେଲ କିଣିବା ଲାଗି ବହୁ ଦେଶ କୁଣ୍ଠା ପ୍ରକାଶ କରୁଛନ୍ତି । ସେମାନେ ଆମେରିକା ରୋଷର ଶିକାର ହେବାକୁ ଚାହୁଁନାହାଁନ୍ତି । ମାତ୍ର ଭାରତ କହୁଛି ଯେ, ଋଷ ଉପରେ ଲଗାଯାଇଥିବା କଟକଣା ତୈଳ ଦର କାରବାର ଉପରେ ଲାଗୁ ହୋଇନାହିଁ ।

ଯଦିଓ ଭାରତ କେତେ ତେଲ ଋଷରୁ ମଗାଇବ ଏବଂ କେତେ ରିହାତି ମିଳିବ ତାହା ସ୍ପଷ୍ଟ ହୋଇନାହିଁ । ଋଷ ହେଉଛି ଭାରତର ଏକ ମାତ୍ର ରାଷ୍ଟ୍ର ଯିଏକି ପ୍ରତିରକ୍ଷା କ୍ଷେତ୍ରରେ ସହଯୋଗିତା ବ୍ୟତୀତ ଜାତିସଂଘରେ ମଧ୍ୟ ଭାରତ ସପକ୍ଷରେ ଏହା ବହୁବାର ସ୍ୱର ଉତ୍ତୋଳନ କରିଛି । ତେଲକୁ ନେଇ ଭାରତ ଏକ ବଡ଼ ଯୋଜନା ଉପରେ କାର୍ଯ୍ୟ କରୁଛି । କେବଳ ଋଷ ତେଲ ବ୍ୟତୀତ ଏହା ଇରାନ ଓ ଭେନେଜୁଏଲାରୁ ଅଧିକ ତେଲ କିଣବାକୁ ଚାହୁଁଛି । ସାଉଦି ଆରବ ନେଥୃତ୍ୱଧୀନ ଓପେକ୍ ରାଷ୍ଟ୍ର ସମୂହ ଉତ୍ପାଦନ ବଢାଇବା ପରେ ତେଲ ଦର ହ୍ରାସ ପାଇବ ବୋଲି କୁହାଯାଉଛି ।