ରାୟଗଡ଼ା: ଭିଜିଲାନ୍ସ ଜାଲରେ ରାୟଗଡ଼ା ଅବକାରୀ ଅଧିକ୍ଷକ । ନଗଦ ୬ ଲକ୍ଷ ଟଙ୍କା ସହ ଧରାପଡ଼ିଲେ ଅବକାରୀ ଅଧିକ୍ଷକ ନିନା ବେଉରା । ରାୟଗଡ଼ାରୁ ଭୁବନେଶ୍ୱର ଯିବା ସମୟରେ ଧରିଲା ଭିଜିଲାନ୍ସ । ଟଙ୍କା ବିଷୟରେ ସନ୍ତୋଷଜନକ ଉତ୍ତର ଦେଇନପାରିବାରୁ ନିନାଙ୍କୁ ଗିରଫ କରିଛି ଭିଜଲାନ୍ସ । ଏହାପରେ ତାଙ୍କ ଘର, ଅଫିସ ଓ ସମ୍ପର୍କୀୟଙ୍କ ଘରେ ମଧ୍ୟ ଚଢାଉ କରିଛି ଭିଜିଲାନ୍ସ । ନିନାଙ୍କ ସ୍ବାମୀ ମାହାଙ୍ଗା ଥାନା ଆଇଆଇସି ନିହାର ରଞ୍ଜନ ଦାସ । ଏହା ପରେ ମାହାଙ୍ଗା ସ୍ଥିତି କ୍ବାର୍ଟରରେ ମଧ୍ୟ ରେଡ୍ ହୋଇଛି । ହେଲେ ଏହି ଭିଜିଲାନ୍ସ ଚଢ଼ାଉରୁ ବର୍ତ୍ତିବାକୁ ନିଜେ ଆଇଆଇସି କ୍ବାର୍ଟରରେ ତାଲା ପକାଇ ଚାଲିଯାଇଥିବା ସୂଚନା ମିଳିଛି । ତେବେ ତାଙ୍କୁ ଶୀଘ୍ର ଭୁବନେଶ୍ବର ଭିଜିଲାନ୍ସ ଅଫିସରେ ହାଜର ହେବାକୁ ନିର୍ଦ୍ଦେଶ ଦିଆଯାଇଛି ।
ମହଙ୍ଗା ପଡ଼ିଲା ରାତିଅଧିଆ ରେଡ୍, ଚୋର ଭାବି ପୋଲିସକୁ ଛେଚିଲେ ଗ୍ରାମବାସୀ
ମାଲକାନଗିରି: ଗଞ୍ଜେଇ କାରବାର ଖବର ପାଇ ରେଡ୍ ବେଳେ ହଟହଟା ହେଲା ପୋଲିସ । ଚୋର ଭାବି ମାଡ଼ି ବସିଲେ ଗ୍ରାମବାସୀ । ଜଣେ ପୋଲିସକୁ ଅଟକ ରଖିଲେ ଗାଁ ଲୋକ । ସୂଚନା ଅନୁସାରେ କୋରାପୁଟ ମାଛକୁଣ୍ଡ ମାଟିଖାଲରେ ଗଞ୍ଜେଇ ଥିବା ଖବର ପାଇ ମାଲକାନଗିରି ଏସଡିପିଓଙ୍କ ନିର୍ଦ୍ଦେଶରେ ମାଥିଲି, ଗୋବିନ୍ଦପାଳି ଓ ମାଲକାନଗିରି ପୋଲିସ ମିଳିତ ଭାବରେ ରାତିଅଧିଆ ଚଢ଼ାଉ କରିଥିଲା । ପୋଲିସ ଲୋକଙ୍କ କବାଟ ବାଡେଇ ଭୟଭୀତ କରାଇଥିଲା ।
କେବଳ ସେତିକି ନୁହେଁ ରାତି ଅଧରେ ଗାଁ ମଝିରେ ଫାଙ୍କା ଗୁଳି ଚାଳନା ମଧ୍ୟ କରିଥିଲେ ପୋଲିସ । ଗାଁ ମଝିରେ ଫାଙ୍କା ଗୁଳି ଚାଳନା କରିବାରୁ ଗାଁ ଲୋକ ଲୁଟେରା ବୋଲି ଭାବି ଏକାଠି ହୋଇଥିଲେ । ଅସ୍ତ୍ରଶସ୍ତ୍ର ଧରି ପୋଲିସଙ୍କ ଆଡ଼କୁ ମାଡି ଯାଇଥିଲେ । ଗ୍ରାମବାସୀଙ୍କୁ ଦେଖି ପୋଲିସ ଛତ୍ରଭଙ୍ଗ ଦେବା ବେଳେ ଜଣେ ପୋଲିସ କର୍ମଚାରୀ ଗ୍ରାମବାସୀଙ୍କ ହାବୁଡ଼ରେ ପଡ଼ିଯାଇଥିଲା ।
ରାଉରକେଲା ଗସ୍ତରେ ମୁଖ୍ୟ ଶାସନ ସଚିବ, ଦ୍ୱିତୀୟ ଦିନରେ ନିର୍ମାଣଧୀନ ହକି ଷ୍ଟାଡିୟମର କରିବେ ଅନୁଧ୍ୟାନ
ସୁନ୍ଦରଗଡ଼: ପ୍ରଗତି ପଥରେ ଆଗଉଛି ସୁନ୍ଦରଗଡ଼ । ଜାରି ରହିଛି ବିଭିନ୍ନ ଉନ୍ନତିମୂଳକ କାର୍ଯ୍ୟ । ବିଭିନ୍ନ ପ୍ରକଳ୍ପର ସୀମାକ୍ଷା କରୁଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର । ଦୁଇ ଦିନିଆ ସୁନ୍ଦରଗଡ଼ ଗସ୍ତର ଆଜି ଦ୍ୱିତୀୟ ଦିନରେ ବିଭିନ୍ନ ପ୍ରକଳ୍ପର ସମୀକ୍ଷା କରିବେ । ବିପିୟୁଟି ପରିସରରେ ନିର୍ମାଣାଧୀନ ହକି ଷ୍ଟାଡିୟମ୍ ନିର୍ମାଣ କାର୍ଯ୍ୟ ଅନୁଧ୍ୟାନ କରିବେ ମୁଖ୍ୟ ଶାସନ ସଚିବ । ରାଉରକେଲା ସ୍ମାର୍ଟ ସିଟି ପଷରୁ ହେଉଥିବା ବିଭିନ୍ନ ଉନ୍ନତିମୂଳକ କାର୍ଯ୍ୟର ତଦାରଖ କରିବେ ସୁରେଶ ମହାପାତ୍ର ।
ଆଜି ଦିନ ୧୧ଟା ସମୟରେ ଟେନସା ଇକୋ ଟୁରିଜିମ ସାଇଟ ଗସ୍ତ କରିବାର କାର୍ଯ୍ୟକ୍ରମ ରହିଛି । ଗତକାଲି ଜିଲ୍ଲାସ୍ତରୀୟ ଅଧିକାରୀଙ୍କ ସହ ବିଭିନ୍ନ କାର୍ଯ୍ୟର ସମୀକ୍ଷା କରିଥିଲେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର । ଇବ୍ ନଦୀରେ ଦୁଇଟି ବ୍ୟାରେଜ ନିର୍ମାଣ ପାଇଁ ଟେଣ୍ଡର ସରିଥିବା ବେଳେ ଖୁବଶୀଘ୍ର ବ୍ୟାରେଜ ନିର୍ମାଣ କାର୍ଯ୍ୟ ଆରମ୍ଭ ହେବ । ଏହା ସହ ସୁନ୍ଦରଗଡ଼ ମେଡିକାଲ କଲେଜ ଏବର୍ଷ କାର୍ଯ୍ୟକ୍ଷମ ହେବ । ରୋଗୀ ଚିକିତ୍ସା ବି ଆରମ୍ଭ ହେବ ବୋଲି ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ । ଏହି ମେଡିକାଲ କଲେଜରେ ପ୍ରିନସିପାଲ, ସୁପରିଣ୍ଟେଣ୍ଡେଣ୍ଟ, ପ୍ରଫେସର, ଆସିଷ୍ଟାଣ୍ଟ ପ୍ରଫେସର ନିଯୁକ୍ତି ସରିଥିବା ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି । ଏହାସହ ମୁଖ୍ୟ ଶାସନ ସଚିବ ସୁନ୍ଦରଗଡରେ ଟ୍ରାଫିକ କଣ୍ଟ୍ରୋଲ ବ୍ୟବସ୍ଥାର ମଧ୍ୟ ଅନୁଧ୍ୟାନ କରିଛନ୍ତି ।
ଆଜି ପବିତ୍ର ନୃସିଂହ ଚତୁର୍ଦ୍ଦଶୀ, ପୁରୀ ରଥଖଳାରେ ଅନୁଷ୍ଠିତ ହେବ ଗୁଜ ଅନୁକୁଳ ନୀତି
ପୁରୀ: ଆଜି ପବିତ୍ର ନୃସିଂହ ଚତୁର୍ଦ୍ଦଶୀ । ଏହି ଅବସରେ ପୁରୀ ରଥଖଳାରେ ଗୁଜ ଅନୁକୁଳ ନୀତି ସମ୍ପାଦନ କରାଯିବ । ରୂପକାର ସେବାୟତମାନେ ପାରମ୍ପରିକ ରୀତିନୀତି ଅନୁଯାୟୀ ନଡ଼ିଆ ବାଡେଇ ରଥ ସହିଂତା ଅନୁସାରେ ଗୁଜ ଅନୁକୂଳ କରିବାର କାର୍ଯ୍ୟକ୍ରମ ରହିଛି । ଅନୁକୂଳ ପରେ ଗୁଜ ଗୁଡ଼ିକରେ ନୃସିଂହ ବିରାଳ, ନର ବିରାଳ, ହସ୍ତୀ ବିରାଳ, ସିଂହ ବିରାଳ ଆଦି ଖୋଦେଇ କରାଯିବ । ଏହା ସହ ଭୋଇ ସେବକମାନେ ଯନ୍ତାଗାଡ଼ ନିର୍ମାଣ ଆରମ୍ଭ କରିବେ ।
ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଜୋରସୋରରେ ଚାଲିଛି ରଥ ନିର୍ମାଣ କାମ । ରଥ ନିର୍ମାଣରେ ନିୟୋଜିତ ହୋଇଛନ୍ତି ୧୩୨ ଜଣ କାରିଗର । ପର୍ଯ୍ୟାୟରେ ୩ ରଥର ଚକ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବାବେଳେ ତୁମ୍ବ ନିର୍ମାଣ କରୁଛନ୍ତି ମହାରଣା ସେବାୟତ । କରତି ସେବକଙ୍କ ଦ୍ୱାରା ଫାସୀ କାଠରେ ସମସ୍ତ ୪୨ଟି ତୁମ୍ବ କଟାଯାଇ ମହାରଣାଙ୍କୁ ଯୋଗାଇ ଦିଆଯାଇଛି । ସୂତାବାଡିଆ ପରେ ୪୨ଟି ଯାକ ତୁମ୍ବରେ ବିନ୍ଧ ଖୋଦେଇ କାର୍ଯ୍ୟ ଜାରି ରହିଛି ।
ପୁରୀରେ 5T ସଚିବ ଭି.କେ ପାଣ୍ଡିଆନ, ପରିକ୍ରମା ପ୍ରକଳ୍ପ କାର୍ଯ୍ୟର କଲେ ଅନୁଧ୍ୟାନ
ପୁରୀ: ପୁରୀରେ 5T ସଚିବ ଭି.କେ. ପାଣ୍ଡିଆନ । ଆଜି ସକାଳୁ ଶ୍ରୀମନ୍ଦିର ଯାଇ ଶ୍ରୀଜୀଉଙ୍କ ଦର୍ଶନ କରିଛନ୍ତି 5T ସଚିବ । ଶ୍ରୀଜୀଉଙ୍କ ଦର୍ଶନ କରିବା ପରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟ ବୁଲି ଅନୁଧ୍ୟାନ କରିଛନ୍ତି । ଉତ୍ତର ଦ୍ୱାର, ପଶ୍ଚିମଦ୍ୱାର ଓ ଦକ୍ଷିଣଦ୍ୱାର ଅଞ୍ଚଳରେ ନିର୍ମାଣ ହେଉଥିବା ପ୍ରକଳ୍ପ କାର୍ଯ୍ୟ କିପରି ଚାଲିଛି ତା’ର ତଦାରଖ କରିଛନ୍ତି 5T ସଚିବ ଭି.କେ ପାଣ୍ଡିଆନ ।
ରାଜ୍ୟ ସରକାରଙ୍କ ମେଗା ଡ୍ରାଇଭ୍, ଅଧାରୁ ପାଠ ଛାଡ଼ିଥିବା ପିଲା ଫେରିବେ ସ୍କୁଲ
ଭୁବନେଶ୍ୱର: ଅଧାରୁ ପାଠ ଛାଡ଼ିଥିବା ପିଲାଙ୍କୁ ସ୍କୁଲ୍ ଫେରାଇ ଆଣିବାକୁ ରାଜ୍ୟ ସରକାରଙ୍କ ମେଗା ଡ୍ରାଇଭ୍ । ସ୍କୁଲ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ସମସ୍ତ ଜିଲ୍ଲାପାଳଙ୍କୁ ଏନେଇ ନିର୍ଦ୍ଦେଶ ଦେଇଛନ୍ତି । କରୋନା ଯୋଗୁଁ ଗଲା ଦୁଇବର୍ଷ ହେଲା ପାଠପଢ଼ାରେ ବ୍ୟାଘାତ ଘଟିଥିଲା । ଏବେ ଧିରେ ଧିରେ ପରିସ୍ଥିତିରେ ସୁଧାର ଆସିଛି । ସ୍କୁଲ ପୁଣିଥରେ ଖୋଲିବା ପରେ ଗ୍ରୀଷ୍ଣପ୍ରବାହକୁ ଦୃଷ୍ଟିରେ ରଖି ସକାଳୁଆ ସ୍କୁଲ ଚାଲିଛି । ପ୍ରଥମରୁ ଅଷ୍ଟମ ଶ୍ରେଣୀର ପିଲାଙ୍କୁ ସ୍କୁଲରେ ମଧ୍ୟାହ୍ନ ଭୋଜନର ବ୍ୟବସ୍ଥା ହୋଇଛି ।
ପାଠ ପଢ଼ିବାକୁ ଦୈନିକ ସ୍କୁଲକୁ କେତେ ପିଲା ଆସୁଛନ୍ତି, ଉପସ୍ଥାନ ତଥ୍ୟକୁ ଟ୍ରାକ କରାଯାଉଛି । ରିପୋର୍ଟ ଅନୁସାରେ ୭୦ ପ୍ରତିଶତରୁ ଅଧିକ ପିଲା ନିୟମିତ ସ୍କୁଲ୍ ଆସୁଛନ୍ତି । ତେବେ ମାଲକାନଗିରି, ବୌଦ୍ଧ, ଗଜପତି, ସମ୍ବଲପୁର ଓ ନୂଆପଡ଼ା ଜିଲ୍ଲାରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ଉପସ୍ଥାନ ରାଜ୍ୟର ଉପସ୍ଥାନ ହାର ତୁଳନାରେ କମ୍ ରହିଛି । ଆଉ କିଛି ଜିଲ୍ଲାରେ ପଞ୍ଚମରୁ ଅଷ୍ଟମ ଶ୍ରେଣୀରେ ଉପସ୍ଥାନ ମଧ୍ୟ କମ୍ ରହୁଛି । ଏଭଳି ଚିତ୍ରକୁ ଦେଖି ଜଣା ପଡୁଛି ଯେ ଯେଉଁମାନେ ଅଫଲାଇନ୍ କ୍ଳାସରେ ଯୋଗ ଦେଉନାହାଁନ୍ତି, ସେମାନେ ଅଧାରୁ ପାଠ ଛାଡି ଦେଇଛନ୍ତି । ଆଉ କିଛି ପିଲା ନିଜ ଅଭିଭାବକଙ୍କ ସହ ଅନ୍ୟସ୍ଥାନକୁ ଚାଲି ଯାଇଛନ୍ତି । ଏପରିକି କିଛି ସ୍କୁଲରେ ଅଷ୍ଟମ ପାଶ୍ କରିଥିବା ପିଲା ନବମରେ ଆଉ ନାଁ ଲେଖାଇ ନାହାଁନ୍ତି । ଏସବୁକୁ ଦୃଷ୍ଟିରେ ରଖି ପିଲାଙ୍କୁ ପୁଣି ସ୍କୁଲ୍ ଫେରାଇ ଆଣିବାକୁ ଜିଲ୍ଲସ୍ତରରୁ ଉଦ୍ୟମ ଆରମ୍ଭ କରିଥିବାକୁ ସଚିବ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି ।
ପିଲା କାହିଁକି ସ୍କୁଲ୍ ଆସୁନାହାଁନ୍ତି ତା’ର କାରଣ ଜାଣିବାକୁ ସ୍କୁଲସ୍ତରରୁ ମାଇକ୍ରୋ ଲେବେଲ୍ ସର୍ଭେ କରିବାକୁ କୁହାଯାଇଛି । କନିଷ୍ଠ ଶିକ୍ଷକମାନେ ଘର ଘର ବୁଲି ଅଭିଭାବକଙ୍କୁ ବୁଝାଇବାକୁ ନିର୍ଦ୍ଦେଶ ଦେଇଛନ୍ତି ସରକାର । ମାଗଣା ବହି, ୟୁନିଫର୍ମ ଓ ମଧ୍ୟାହ୍ନ ଭୋଜନ ବାବଦରେ ବୁଝାଇବାକୁ କୁହାଯାଇଛି । ପଞ୍ଚାୟତ ପ୍ରତିନିଧିଙ୍କ ସାହାଯ୍ୟ ନେଇ ପରିବାର ସଦସ୍ୟଙ୍କୁ ଉତ୍ସାହିତ କରିବାକୁ ମଧ୍ୟ କୁହାଯାଇଛି ।
ଆସିକାର ପୂର୍ବତନ ବିଧାୟକ ସରୋଜ ପାଢ଼ୀ ନିଖୋଜ
ଆସିକା: ଆସିକାର ପୂର୍ବତନ ବିଧାୟକ ସରୋଜ ପାଢ଼ୀ ନିଖୋଜ । ଗତ ୧୨ ତାରିଖରୁ ସରୋଜ ନିଖୋଜ ରହିଥିବା ନେଇ ଭୁବନେଶ୍ବର କ୍ୟାପିଟାଲ ଥାନାରେ ଏତଲା ଦେଇଛନ୍ତି ପୁଅ ସଂଗୀତ ପାଢ଼ୀ । ଗତକାଲି ସକାଳ ସାଢ଼େ ୮ଟାରୁ ୟୁନିଟ ୬ ଘରୁ ବାହାରକୁ ଯାଇଥିଲେ ମଧ୍ୟ ସେ ଆଉ ଘରକୁ ଫେରି ନଥିଲେ । ତାଙ୍କୁ ବାରମ୍ବାର ମୋବାଇଲରେ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ମୋବାଇଲ ସୁଇଚ ଅଫ ରହିଥିଲା । ପରେ ପୁଅ ସଂଗୀତ ଏନେଇ ଥାନାରେ ଏତଲା ଦେଇଥିଲେ । ଗତ ୨୦୦୪ରେ ସେ ସ୍ବାଧୀନ ଭାବେ ଲଢିବା ସହ ବିଜେଡିର ସହଯୋଗୀ ସଦସ୍ୟ ଭାବେ ଆସ୍କାରୁ ବିଧାୟକ ନିର୍ବାଚିତ ହୋଇଥିଲେ । ପରେ ସେ ୨୦୦୯ରେ କଂଗ୍ରେସରେ ସାମିଲ ହୋଇଥିଲେ । ୨୦୧୯ରେ ସରୋଜ ବିଜେପିରେ ଯୋଗ ଦେଇଥିଲେ ।
ମିଶନ ଶକ୍ତିରେ ମହିଳା ସ୍ବାବଲମ୍ବୀ, ମାଛଚାଷ କରି ଆତ୍ମନିର୍ଭର ସୁବର୍ଣ୍ଣପୁରର ସର୍ଗୁଣାମୁଣ୍ଡାର ମହିଳା
ସୁବର୍ଣ୍ଣପୁର: ବଦଳୁଛି ସମୟ, ପରିବର୍ତ୍ତନ ଦିଗରେ ମହିଳା । ସରକାରଙ୍କ ପ୍ରୋତ୍ସାହନରେ ସ୍ବାବଲମ୍ବୀ ମହିଳା । ନିଜେ ରୋଜଗାରକ୍ଷମ ହେବା ସହିତ ପରିବାର ଆର୍ଥିକ ଅବସ୍ଥା ମଧ୍ୟ ଦୂର କରୁଛନ୍ତି ମହିଳାମାନେ । ସୁବର୍ଣ୍ଣପୁର ଜିଲ୍ଲା ସହର ବ୍ଲକ ସର୍ଗୁଣାମୁଣ୍ଡା ଗାଁରେ ୩ଟି ପୋଖରୀ ଲିଜ୍ ନେଇ ମାଛ ଚାଷ କରୁଛନ୍ତି । ସକାଳୁ ସଂଜ ଯାଏ ପୋଖରୀ ରକ୍ଷଣାବେକ୍ଷଣରେ ଲାଗିଛନ୍ତି ମାହିଳାମାନେ । ଦଳ ସଫା କରିବା ସହିତ ମାଛଙ୍କୁ ଦାନା ଦେବା ପର୍ଯ୍ୟନ୍ତ ମହିଳାମାନେ ସବୁ କାମ କରିଥାନ୍ତି । ଆଉ ପ୍ରତି ୪ ମାସରେ ଥରେ ମାଛ ଧରି ଲାଭବନ କରୁଛନ୍ତି ।
ସର୍ଗୁଣାମୁଣ୍ଡା ଗାଁର ୨୦ରୁ ଅଧିକ ମହିଳା ମା’ ଶାରଳା ଓ ମା’ ସୁରେଶ୍ବରୀ ନାଁରେ ଦୁଇଟି ଏସଏଚଜି କରି ମାଛ ଚାଷୀ କରୁଛନ୍ତି । ଏଥିପାଇଁ ମହିଳାମାନଙ୍କୁ ସହଯୋଗ କରୁଛି ମିଶନ ଶକ୍ତି । ଜାଆଁଳ ଯୋଗାଇ ଦେବା ସହିତ ମାଛଙ୍କ ପାଇଁ ଖାଦ୍ୟ ସବସିଡିରେ ଯୋଗାଇ ଦେଉଛନ୍ତି । ୪ ବର୍ଷ ହେଲା ମାହିଳାମାନେ ମାଛ ଚାଷ କରୁଥିବା ବେଳେ ବର୍ଷକୁ ୫୦ରୁ ୬୦ ହଜାର ଟଙ୍କା ଲାଭ ହେଉଛି । ଆଗକୁ ଆହୁରି ଅଧିକ ଲାଭ ହେବ ବୋଲି ଆଶା ରଖିଛନ୍ତି ମହିଳାମାନେ । ରାଜ୍ୟ ସରକାରଙ୍କ ପ୍ରୋତ୍ସାହନରେ ମାହିଳାମାନେ ରୋଜଗାରକ୍ଷମ ହେବା ସହିତ ପରିବାରର ଆର୍ଥିକ ବୋଝକୁ ମଧ୍ୟ ଦୂର କରୁଛନ୍ତି ।
ରାଜଧାନୀରେ ଭୟଙ୍କର ଅଗ୍ନିକାଣ୍ଡ, ୨୬ ମୃତ
ନୂଆଦିଲ୍ଲୀ: ଶୁକ୍ରବାର ସନ୍ଧ୍ୟାରେ ଦିଲ୍ଲୀରେ ଭୟାବହ ଅଗ୍ନକାଣ୍ଡ ଘଟିଛି । ଦିଲ୍ଲୀ ମୁଣ୍ଡକା ଅଞ୍ଚଳରେ ତିନି ମହଲା ବିଶିଷ୍ଟ ଏକ କମର୍ସିଆଲ ବିଲଡିଂରେ ଭୟାବହ ଅଗ୍ନିକାଣ୍ଡ ଘଟିଛି । ଏହି ଅଗ୍ନିକାଣ୍ଡରେ ୨୦ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ତେବେ ଏହି ବିଲଡିଂରୁ ୫୦ ଜଣଙ୍କୁ ଉଦ୍ଧାର କରାଯାଇଛି ବୋଲି କହିଛନ୍ତି ଡିସିପି ସମୀର ଶର୍ମା । ଏବେ ବି ନିଆଁ ଲିଭା କାର୍ଯ୍ୟରେ ୧୭ଟି ଦମକଳ ଗାଡ଼ି ନିୟୋଜିତ ହୋଇଛି । ଏବେ ବି ଅନେକ ଲୋକ ସେହି ବିଲଡିଂରେ ଫସି ରହିଛନ୍ତି । ତେଣୁ ଆଗାମୀ ସମୟରେ ମୃତାହତ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି ।
#UPDATE | 20 bodies recovered in the fire at 3-storey commercial building which broke out this evening near Delhi's Mundka metro station, confirms Delhi Fire Director Atul Garg https://t.co/wrX7hoaw6I
— ANI (@ANI) May 13, 2022
ସୂଚନା ଅନୁସାରେ ଆଜି ସନ୍ଧ୍ୟା ୪ଟା୪୫ରେ ଦିଲ୍ଲୀର ମୁଣ୍ଡକା ଅଞ୍ଚଳରେ ଏକ ଅଫିସରେ ନିଆଁ ଲାଗିଥିବା ଖବର ମୁଣ୍ଡକା ପୋଲିସ ଷ୍ଟେସନକୁ ମିଳିଥିଲା । ଏହି ଖବର ମିଳିବା ପରେ ଅଗ୍ନିଶମ ବିଭାଗ ଓ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ତେବେ ଏହି କୋଠାରେ ବିଭିନ୍ନ କମ୍ପାନିଙ୍କ କାର୍ଯ୍ୟାଳୟ ଥିଲା ବୋଲି କହିଛନ୍ତି ଡିସିପି ସମୀର ଶର୍ମା । ଏହି ଘଟଣାରେ ଶୋକ ପ୍ରକାଶ କରିଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ ।
ପୁଣି ଚର୍ଚ୍ଚାରେ ଏଲନ ମସ୍କ, ୪୪ ବିଲିୟନ ଡଲାରର ଟ୍ବିଟର ଚୁକ୍ତି ସାମୟିକ ସ୍ଥଗିତ
ଓ୍ୱାଶିଂଟନ: ପୁଣି ଚର୍ଚ୍ଚାରେ ଏଲନ ମସ୍କ । ୪୪ ବିଲିୟନ ଡଲାରର ଟ୍ୱିଟର ଚୁକ୍ତି ସାମୟିକ ସ୍ଥଗିତ । ସ୍ପାମ ଓ ଫେକ୍ ଆକାଉଣ୍ଟ ପ୍ରସଙ୍ଗରେ ସବିଶେଷ ବିବରଣୀକୁ କେନ୍ଦ୍ର କରି ଏହି ଚୁକ୍ତି ସାମୟିକ ସ୍ଥଗିତ ରହିଛି ବୋଲି କହିଛନ୍ତି ମାଲିକ ଏଲନ ମସ୍କ । ଗତ ଏପ୍ରିଲ ୨୫ରେ ଏଲନ ମସ୍କଙ୍କ ୪୪ ବିଲିୟନ ଡଲାର ଚୁକ୍ତିକୁ ଟ୍ବିଟର ଗ୍ରହଣ କରିବା ପରେ ବିଶ୍ବବ୍ୟାପୀ ଚର୍ଚ୍ଚା ହୋଇଥିଲା । ବର୍ତ୍ତମାନ ମସ୍କ ଟ୍ବିଟରର ୯ ଦଶମିକ ୧ ପ୍ରତିଶତ ଅଂଶୀଦାର ରହିଛନ୍ତି । ସେ ହେଉଛନ୍ତି ଟ୍ବିଟରର ଦ୍ୱିତୀୟ ବୃହତ୍ତମ ସେୟାର ହୋଲଡର । ଟ୍ବିଟରକୁ କିଣିବା ଲାଗି ମସ୍କ ୧୨ରୁ ଅଧିକ ବ୍ୟାଙ୍କରୁ ୨୫.୫ ବିଲିୟନ ଡଲାର ଉଠାଇବା ଲାଗି ଯୋଜନା ଚଳାଇଥିବାବେଳେ ଏହି ସାମୟିକ ସ୍ଥଗିତ ଘଟଣାକୁ ନେଇ ବଜାର ହଲଚଲ ହୋଇଛି । ଟ୍ବିଟର ପକ୍ଷରୁ କୁହାଯାଇଛି ମସ୍କଙ୍କ ସହ ଚୁକ୍ତି ହେବା ପରଠାରୁ ବିଭିନ୍ନ ରିସ୍କ ଫାକ୍ଟର ଆସିଛି । ତନ୍ମଧ୍ୟରେ ରହିଛି ବିଜ୍ଞାପନଦାତାଙ୍କ ପ୍ରସଙ୍ଗ । ମସ୍କଙ୍କ ଏହି ନିଷ୍ପତ୍ତି ପରେ ସେୟାର ବଜାରରେ ଟ୍ୱିଟରର ସେୟାର ୩୭.୧୦ ଡଲାରକୁ ଖସିଛି ।