ନୂଆଦିଲ୍ଲୀ: ବିଜେପିର ପୂର୍ବତନ ପ୍ରବକ୍ତା ନୁପୁର ଶର୍ମାଙ୍କ ଆବେଦନ ଉପରେ ଶୁଣାଣି କରିଥିବା ସୁପ୍ରିମକୋର୍ଟର ବିଚାରପତି ଜେବି ପାରଦିୱାଲା ତାଙ୍କ ସମାଲୋଚକଙ୍କୁ କଡା ଜବାବ ଦେଇଛନ୍ତି  । ସେ କହିଛନ୍ତି ଯେତବେଳେ କୌଣସି ମାମାଲାକୁ ନେଇ ବିଚାରପତିଙ୍କ ଉପରେ ବ୍ୟକ୍ତିଗତ ଆକ୍ରମଣ କରାଯାଏ ତେବେ ତାହା ନ୍ୟାୟିକ ବ୍ୟବସ୍ଥା ଉପରେ ଭୟଙ୍କର ପ୍ରଭାବ ପକାଇଥାଏ । ଏହି କାରଣରୁ ବିଚାରପତିମାନଙ୍କୁ ଚିନ୍ତା କରିବାକୁ ପଡେ ଯେ ଗଣମାଧ୍ୟମ କଣ ଭାବିବ ଯେତବେଳେ କି ନ୍ୟାୟ କଣ ଭାବୁଛି ତାହା ଅଧିକ ଗୁରୁତ୍ୱପୂର୍ଣ୍ଣ  । ପାରଦିୱାଲା କହିଛନ୍ତି ଭାରତରେ ସାମାଜିକ ଗଣମାଧ୍ୟମ ପୂର୍ଣ୍ଣ ନ୍ୟାୟିକ ଏବଂ ସାମ୍ବିଧାନିକ ପ୍ରସଙ୍ଗର ରାଜୀତିକରଣ କରିଥାଏ  ।

ସେ କହିଛନ୍ତି ସାମାଜିକ ଗଣମାଧ୍ୟମ ଅର୍ଦ୍ଧ ସତ ଏବଂ ଅର୍ଦ୍ଧ ତତ୍ୟ ଦେଖାଉଛି । ଭାରତୀୟ ଗଣତନ୍ତ୍ରରେ ନିୟମ ଆଇନରେ ସ୍ୱତନ୍ତ୍ର ସ୍ଥାନ ରହିଛି । ସାମାଜିକ ଗଣମାଧ୍ୟମ ଉପରେ ଅଙ୍କୁଶ ଲଗାଯିବା ଦରକାର । ସମ୍ବେଦନଶୀଳ ମାମଲା ଉପରେ ଖାସ କରି ସାମାଜିକ ଗଣମାଧ୍ୟମରେ ତଥ୍ୟ ଦିଆଯିବା ଉପରେ ଅଙ୍କୁଶ ଲାଗିବା ଦରକାର । ସଂସଦ ଏହା ଉପରେ ବିଚାର କରିବା ଆବଶ୍ୟକ ବୋଲି ସେ କହିଛନ୍ତି । ଆଗକୁ କହିଛନ୍ତି ଆମେ କୌଣସି ଲୋକଙ୍କ ରାୟ ଅନୁସାରେ ମାମଲାର ଶୁଣାଣି କରୁନାହୁଁ, ଭାରତୀୟ ଆଇନ ଅନୁଯାୟୀ କରୁ  । କିଛି ରାୟ ଲୋକମାନଙ୍କ ବିରୋଧରେ ମଧ୍ୟ ଦେବାକୁ ପଡିଥାଏ । ଭାରତୀୟ ଦଣ୍ଡ ସଂହିତା ଆଧାରରେ ପ୍ରତ୍ୟେକ ମାମଲାର ଶୁଣାଣି କରିବାକୁ ପଡିଥାଏ  । ତେଣୁ କୌଣସି ରାୟକୁ ନେଇ ଜଷ୍ଟିସଙ୍କ ଉପରେ ବ୍ୟକ୍ତିଗତ ଆକ୍ରମଣ କରାଯିବା ଦୁର୍ଭାଗ୍ୟପୂର୍ଣ୍ଣ  ।

ନ୍ୟାୟପାଳିକାର ନିଷ୍ପତ୍ତି ଉପରେ ସାଧାରଣ ଲୋକଙ୍କ ମନ୍ତବ୍ୟର ପ୍ରଭାବ ନପଡିବା ଆବଶ୍ୟକ । ସୂଚନାଥାଉକି ପ୍ରଫେଟ ମହମ୍ମଦଙ୍କ ଉପରେ କଥିତ ଟିପ୍ପଣୀକୁ ନେଇ ନୁପୁର ଶର୍ମାଙ୍କୁ ଶୁକ୍ରବାର ଶୁଣାଣି ସମୟରେ ସୁପ୍ରମକୋର୍ଟ ଭର୍ସନା କରିଥିଲେ  । ଅଲଗା ଅଲଗା ରାଜ୍ୟରେ ରୁଜୁ ମାମଲାକୁ ଦିଲ୍ଲୀ ସ୍ଥାନାନ୍ତର କରିବାକୁ ସୁପ୍ରିମକୋର୍ଟରେ ନୁପୁର ଶର୍ମା ଆବେଦନ କରିଥିଲେ । କୋର୍ଟ ତାଙ୍କୁ ଭର୍ସନା କରି କହିଥିଲେ ଗଣମାଧ୍ୟମ ମାଧ୍ୟମରେ ନିଜର ଆପତ୍ତିଜନକ ଟିପ୍ପଣୀ ପାଇଁ ସମସ୍ତ ଦେଶବାସୀଙ୍କୁ କ୍ଷମା ମାଗ । କେବଳ ନୁପୁରଙ୍କ ପାଇଁ ଦେଶରେ ହିଂସା ଏବଂ ହତ୍ୟା ଘଟଣା ଘଟୁଛି । ସୁପ୍ରିମକୋର୍ଟରେ ଜଷ୍ଟିସ ସୂର୍ଯ୍ୟକାନ୍ତ ଏବଂ ଜଷ୍ଟିସ ଜେବି ପାରଦିୱାଲଙ୍କ ଅବକାଶକାଳୀନ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ  ।