ଭୁବନେଶ୍ୱର:ବିଜେଡି ସାଂସଦ ଡକ୍ଟର ସସ୍ମିତ ପାତ୍ରଙ୍କୁ ଆଉ ଏକ ଦାୟିତ୍ୱ । କୋଇଲା ଓ ଖଣି ମନ୍ତ୍ରାଳୟର ସଂସଦୀୟ ପରାମର୍ଶଦାତା କମିଟିରେ ପାଇଲେ ସ୍ଥାନ । ପୂର୍ବରୁ ଆଇନ ଓ ନ୍ୟାୟ ମନ୍ତ୍ରାଳୟ ପରାମର୍ଶଦାତା କମିଟିରେ ଥିଲେ ସସ୍ମିତ ପାତ୍ର ।
ଭୁବନେଶ୍ୱର: କୋଭିଡ ପାଇଁ ସ୍ବାଧୀନତା ଦିବସରେ ଲାଗିଲା କଟକଣା । ଏଥର ଅଗଷ୍ଟ ୧୫ରେ ରାଜ୍ୟରେ ହେବନି ପରେଡ୍ । ଭାଗ ନେବେନି ସ୍କୁଲ ଛାତ୍ରଛାତ୍ରୀ । କେବଳ ୩ଟି କଣ୍ଟିଜେଣ୍ଟ ଏହି ପରେଡରେ ସାମିଲ ହେବେ । ଓଏସଏପି, ଓଡ୍ରାଫ୍ ଓ ବିଏସଏଫ୍ ପରେଡରେ ସାମିଲ ହେବେ । ଏଥିପାଇଁ ୩ଦିନ ହେବ ପ୍ରାକ୍ଟିସ୍ । ପ୍ରଦର୍ଶନୀ ପଡ଼ିଆରେ ୧୧, ୧୨ ଓ ୧୩ ତାରିଖରେ ଅଭ୍ୟାସ କରିବେ କଣ୍ଟିଜେଣ୍ଟ ।
ରିହସଲ ଦିନ ନିର୍ଦ୍ଧାରିତ ସମୟର ଅଧଘଣ୍ଟା ପୂର୍ବରୁ ପହଞ୍ଚିବେ କଣ୍ଟିଜେଣ୍ଟ । ଯେଉଁ କଣ୍ଟିଜେଣ୍ଟ ସ୍ବାଧୀନତା ଦିବସ କାର୍ଯ୍ୟକ୍ରମରେ ସାମିଲ ହେବେ ସେମାନଙ୍କ କୋଭିଡ ଟେଷ୍ଟ ବାଧ୍ୟତାମୂଳକ । ସାମାଜିକ ଦୂରତା ବଜାୟ ରଖିବେ । ଫ୍ଲାଗ୍ ପୋଷ୍ଟ ପାଖରେ ନିୟୋଜିତ ହେବାକୁ ଥିବା ଅଫିସର କୋଭିଡ ନେଗେଟିଭ ହେବା ସହ ମାସ୍କ ଓ ଗ୍ଲୋବ୍ସ ପିନ୍ଧିବାକୁ ନିର୍ଦ୍ଦେଶ ହୋଇଛିଜନ ସମାଗମକୁ ବି ନା । ତିନି ଦିନ କରାଯିବ ପ୍ରାକ୍ଟିସ୍ । ପ୍ରସ୍ତୁତ ରହିବାକୁ ଗୃହ ବିଭାଗର ନିର୍ଦ୍ଦେଶ । ପ୍ରଦର୍ଶନୀ ପଡ଼ିଆରେ ହେବ ପତାକା ଉତ୍ତୋଳନ ।
ବର୍ମିଂହମ୍: ଉଦଯାପିତ ହେଲା ରାଜ୍ୟଗୋଷ୍ଠୀ କ୍ରୀଡ଼ା । ରଙ୍ଗାରଙ୍ଗ କାର୍ଯ୍ୟକ୍ରମରେ କ୍ରୀଡ଼ା ମହାକୁମ୍ଭକୁ ଉଦଯାପନ କରାଯାଇଛି । ଚଳିତବର୍ଷ ରାଜ୍ୟଗୋଷ୍ଠୀ କ୍ରୀଡ଼ା ଭାରତ ରଚିଛି ସ୍ବର୍ଣ୍ଣିମ ଅଧ୍ୟାୟ । ୨୨ ସ୍ବର୍ଣ୍ଣ ସହିତ ଭାରତ ଖାତାକୁ ଆସିଛି ୧୬ଟି ରୌପ୍ୟ ଓ ୨୩ଟି ବ୍ରୋଞ୍ଜ ପଦକ । ମୋଟ ୬୧ଟି ପଦକ ହାସଲ କରି ତାଲିକାର ଚତୁର୍ଥରେ ରହିଛି ଭାରତ । ପଦକ ତାଲିକାରେ ୬୭ଟି ସ୍ବର୍ଣ୍ଣ ସମେତ ମୋଟ ୧୭୮ ପଦକ ପାଇ ଅଷ୍ଟ୍ରେଲିଆ ରହିଛି ପ୍ରଥମ ସ୍ଥାନରେ । ୫୬ଟି ସ୍ବର୍ଣ୍ଣ ସମେତ ମୋଟ ୧୭୩ ପଦକ ପାଇ ଇଂଲଣ୍ଡ ରହିଛି ଦ୍ବିତୀୟ ସ୍ଥାନରେ । ୨୬ଟି ସ୍ବର୍ଣ୍ଣ ସହ ମୋଟ ୯୨ଟି ପଦକ ପାଇ କାନଡା ରହିଛି ତୃତୀୟ ସ୍ଥାନରେ ।
ରାଜ୍ୟଗୋଷ୍ଠୀ କ୍ରୀଡ଼ାରେ ଶେଷ ଦିନରେ ବ୍ୟାଡମିଣ୍ଟରେ ଭାରତକୁ ହାଟ୍ରିକ୍ ସ୍ବର୍ଣ୍ଣ ପଦକ ମିଳିଥିବାବେଳେ ସୁନା ଆଣିଛନ୍ତି ସୁନା ପୁଅ ଲକ୍ଷ୍ୟ ସେନ୍ । ବ୍ୟାଡମିଣ୍ଟନ ମେନସ ସିଙ୍ଗଲସରେ ମାଲେସିଆର ୟୋଙ୍ଗଙ୍କୁ ହରାଇ ଗୋଲ୍ଡ ମେଡାଲ ଜିତିଛନ୍ତି ଲକ୍ଷ୍ୟ । ମହିଳା ସିଙ୍ଗଲ୍ସ ବ୍ୟାଡମିଣ୍ଟନରେ ବି ସ୍ବର୍ଣ୍ଣ ପଦକ ଜିତିଛନ୍ତି ପି ଭି ସିନ୍ଧୁ । ମହିଳା ସିଙ୍ଗଲ୍ସ ଫାଇନାଲରେ କାନାଡାକୁ ହରାଇ ସିନ୍ଧୁ ସୁନା ଜିତିଛନ୍ତି ।
କାନାଡାର ମିଚେଲ ଲିଙ୍କୁ ୨୧-୧୫ ଓ ୨୧-୧୩ରେ ପରାଜିତ କଲେ ସିନ୍ଧୁ । ପୁରୁଷ ଡବଲସରେ ସାତ୍ତ୍ବିକ ସାଇରାଜ ଓ ଚିରାଗ ସେଠି ସ୍ବର୍ଣ୍ଣ ପାଇଛନ୍ତି । ସେହିପରି ଟେବଲ ଟେନିସ ସିଙ୍ଗଲସରେ ନିଜର କ୍ୟାରିୟରେ ଦ୍ବିତୀୟ ଥର ଲାଗି ସ୍ବର୍ଣ୍ଣ ହାସଲ କରିଛନ୍ତି ସରଥ କମଲ । ଟେବୁଲ ଟେନିସ ମିକ୍ସ ଡବଲସରେ ଅଚନ୍ତା ଶରତ କମଲ ଓ ଶ୍ରୀଜା ଅକୁଲାଙ୍କ ସ୍ବର୍ଣ୍ଣ ସହ ଅନ୍ୟ ଇଭେଣ୍ଟରେ ମୋଟ ୪ଟି ସ୍ବର୍ଣ୍ଣ ଜିତିବାରେ ସକ୍ଷମ ହୋଇଥିଲା ଭାରତ ।
ପାଟଣା: ଆଜି ବିହାର ରାଜନୀତିରେ ହୋଇପାରେ ବଡ଼ ଧରଣର ବିସ୍ଫୋରଣ । ସହଯୋଗୀ ବିଜେପିର ହାତ ଛାଡ଼ିପାରନ୍ତି ଜେଡିୟୁ ମୁଖ୍ୟ ତଥା ସିଏମ ନୀତୀଶ କୁମାର । ଦୀର୍ଘ ଦିନ ଧରି ଅସନ୍ତୋଷ ଘେରରେ ଥିବା ନୀତୀଶ ଆଜି ଡାକିଛନ୍ତି ବିଧାୟକ ଦଳ ବୈଠକ । ବୈଠକରେ ଚୂଡ଼ାନ୍ତ ନିଷ୍ପତ୍ତି ଘୋଷଣା କରିବାର ରହିଛି ସମ୍ଭାବନା । ତେଣେ ବିଜେପି ବି ଡାକିଛି ବିଧାୟକ ଦଳ ବୈଠକ । ତେଣେ ପାଟଣା ଛାଡ଼ି ନଯିବା ଲାଗି ବିଧାୟକଙ୍କୁ ନିର୍ଦ୍ଦେଶ ଦେଇଛନ୍ତି ଆରଜେଡି ନେତା ତେଜସ୍ବୀ ଯାଦବ ।
ବିହାରର ବରିଷ୍ଠ ଜେଡିୟୁ ମନ୍ତ୍ରୀ ବିଜୟ ଚୌଧୁରୀ କହିଛନ୍ତି ବୈଠକରେ ନିଆଯିବ ଚୂଡ଼ାନ୍ତ ନିଷ୍ପତ୍ତି । ନୀତୀଶ କୁମାରଙ୍କ ନିଷ୍ପତ୍ତି ନେଇ କୌଣସି ମନ୍ତବ୍ୟ ନଦେବାକୁ ନିଜ ଦଳର ନେତାଙ୍କୁ ନିର୍ଦ୍ଦେଶ ଦେଇଛି ବିଜେପି । ବିହାରରେ ସଂଖ୍ୟା ଗରିଷ୍ଠ ଦଳ ଭାବେ ବର୍ତ୍ତମାନ ଆରଜେଡି ରହିଛି । ଦଳର ବିଧାୟକ ସଂଖ୍ୟା ୮୦ ରହିଛନ୍ତି । ଯଦି ବିଜେପି-ଜେଡିୟୁ ମେଣ୍ଟ ଭାଙ୍ଗେ ତେବେ ଜେଡିୟୁକୁ ସମର୍ଥନ କରିପାରନ୍ତି ଆରଜେଡି, କଂଗ୍ରେସ ଓ ବାମପନ୍ଥୀ । କ୍ରମାଗତ ବିଜେପିର ଚାପରେ ନୟାନ୍ତ ହୋଇ ଆସିଛନ୍ତି ନୀତୀଶ । ଆରସିପି ସିଂଙ୍କୁ କେନ୍ଦ୍ର ମନ୍ତ୍ରିମଣ୍ଡଳରେ ସାମିଲ କରିବା, ଗତ ସାଧାରଣ ନିର୍ବାଚନରେ ଜେଡିୟୁ ପ୍ରତି ଅବମାନନା, ଜେଡିୟୁରୁ ଅଧିକ ମନ୍ତ୍ରୀ ପଦ ଲାଗି ନୀତୀଶଙ୍କ ଦାବି ପୂରଣ ନହେବା ଆଦି କାରଣକୁ ନେଇ କ୍ଷୁବ୍ଧ ଅଛନ୍ତି ନୀତୀଶ ।
ସେପଟେ ମହାରାଷ୍ଟ୍ର ପରି ବିହାରରେ ଅପରେସନ ଲୋଟସ ହୋଇପାରେ ବୋଲି ଆଶଙ୍କା କରୁଛନ୍ତି ନୀତୀଶ । ନୀତି ଆୟୋଗ ବୈଠକରେ ଯୋଗ ଦେଇ ନଥିବା ନୀତୀଶ ଜୁଲାଇ ୧୭ରେ ଗୃହମନ୍ତ୍ରୀ ଅମିତ ଶାହ ଡାକିଥିବା ମୁଖ୍ୟମନ୍ତ୍ରୀ ସମ୍ମିଳନୀକୁ ବି ବୟକଟ କରିଥିଲେ ।
ଅନୁଗୁଳ: ଡେରେଜାଙ୍ଗ ଜଳଭଣ୍ଡାରରେ ନିଖୋଜ ଯୁବ ଇଞ୍ଜିନିୟରଙ୍କର ମିଳିଲା ମୃତଦେହ । ଆଜି ସକାଳେ ବିଭାଂଶୁ ହୋତାଙ୍କ ମୃତଦେହ ଭାସୁଥିବା ଦେଖିଥିଲେ ସ୍ଥାନୀୟ ଲୋକେ । ରବିବାର ସନ୍ଧ୍ୟାରୁ ବନ୍ଧୁତ୍ୱ ଦିବସ ପାଳନ କରିବାକୁ ଆସି ପାଣିରେ ଭାସି ନିଖୋଜ ଥିଲେ ବିଭାଂଶୁ । ଅଗ୍ନିଶମ ଓ ଓଡ୍ରାଫ ଟିମଙ୍କ ସର୍ଚ୍ଚ ଅପରେସନ ଜାରି ରହିଥିଲା । ହେଲେ ଗତକାଲି ପ୍ରବଳ ବର୍ଷା ଯୋଗୁ ସର୍ଚ୍ଚ ଅପରେସନ ବାଧାପ୍ରାପ୍ତ ହୋଇଥିଲା । ବିଭ୍ରାଂଶୁ ଘରୋଇ କମ୍ପାନୀରେ ଇଂଜିନିୟର ଭାବେ କାର୍ଯ୍ୟରତ ଥିଲେ । ବନ୍ଧୁତ୍ୱ ଦିବସ ପାଳନ ପାଇଁ 4ଜଣ ସାଙ୍ଗ ପ୍ରୋଜେକ୍ଟ ଅଞ୍ଚଳକୁ ଯାଇଥିବା ବେଳେ ଗୋଡ଼ ଖସି ନିଖୋଜ ହୋଇଥିଲେ ।
ଭୁବନେଶ୍ୱର: ଆଜି ଅଗଷ୍ଟ କ୍ରାନ୍ତି ଦିବସ । ଭାରତର ସ୍ବାଧିନତା ଆନ୍ଦୋଳନ ଇତିହାସରେ ଗୁରୁତ୍ବପୂର୍ଣ୍ଣ ଦିନ । ୧୯୪୨ ଅଗଷ୍ଟ ୯ ତାରିଖରେ ଭାରତକୁ ବ୍ରିଟିଶ ମୁକ୍ତ କରିବା ପାଇଁ ଭାରତଛାଡ଼ ଆନ୍ଦୋଳନ ଡାକରା ଦେଇଥିଲେ ଜାତିର ପିତା ମହାତ୍ମା ଗାନ୍ଧି । ଏହାପରେ ଭାରତବାସୀ ଏକଜୁଟ୍ ହୋଇ ବ୍ରିଟିଶଙ୍କ ବିରୋଧରେ ଲଢ଼େଇ କରିଥିଲେ । ମୁମ୍ବାଇର ଅରୁଣା ଆସିକ ଅଲ୍ଲୀ ଗ୍ବାଲିଆ କ୍ରାନ୍ତି ମଇଦାନରେ ପତାକା ଉଡ଼ାଇ ଆନ୍ଦୋଳନ ପାଇଁ ଶଙ୍ଖଧ୍ବନି ଦେଇଥିଲେ। ଏହି ଆନ୍ଦୋଳନ ବ୍ରିଟିଶ ସାମ୍ରାଜ୍ୟକୁ ଦୋହଲାଇ ଦେଇଥିଲା । ଆଜି ସେହି ମହାନ ସଂକଳ୍ପର ସ୍ମୃତି ଚାରଣ କରୁଛି ଭାରତ ବର୍ଷ। ଦେଶ ପାଇଁ ଜୀବନ ଦେଇଥିବା ବୀର ସଂଗ୍ରାମୀମାନଙ୍କ ବଳିଦାନକୁ ମନେ ପକାଉଛନ୍ତି କୋଟି କୋଟି ଭାରତୀୟ। ଇତିହାସକୁ ମନେ ପକାଇ ଦେଶକୁ ବିକାଶ ପଥରେ ଆଗେଇ ନେବାକୁ ଦେଶ ପାଳୁଛି କ୍ରାନ୍ତି ଦିବସ ।
ଭୁବନେଶ୍ୱର: ଘନୀଭୂତ ହେଲା ଓ୍ବେଲମାର୍କ ଲୋ- ପ୍ରେସର । ଆଉ କିଛି ସମୟ ପରେ ନେବ ଅବପାତର ରୂପ । ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତି କରି ଛତିଶଗଡ ମୁହାଁ ହେଉଛି ଅବପାତ । ୪ ଜିଲ୍ଲାକୁ ରେଡ୍ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ବରଗଡ଼, ସମ୍ବଲପୁର, ଅନୁଗୁଳ ଓ କେନ୍ଦୁଝରରେ ୨୦୦ରୁ ୨୫୦ ମିଲିମିଟର ବର୍ଷା ସମ୍ଭାବନା ଥିବାରୁ ସତର୍କତା ଜାରି କରାଯାଇଛି ।
ସେହିପରି ୧୪ ଜିଲ୍ଲାକୁ ଅରେଞ୍ଜ ଓ ୧୨ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ବର୍ଷାରେ ଦକ୍ଷିଣ, ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାର ସବୁ ଜିଲ୍ଲା ପ୍ରଭାବିତ ହେବ । ବର୍ଷା ବେଳେ ଘଣ୍ଟାପ୍ରତି ୪୫ରୁ ୫୫ ଝଟକା ପବନ ୬୫ କିଲୋମିଟର ପର୍ଯ୍ୟନ୍ତ ଯାଇପାରେ । ଫଳରେ ସମୁଦ୍ର ଅଶାନ୍ତ ରହିବା ସହ ଉଚ୍ଚ ଜୁଆର ସୃଷ୍ଟି ହେବ ।
ସେଥିପାଇଁ ଆସନ୍ତା ୧୧ ତାରିଖ ଯାଏ ମତ୍ସ୍ୟଜୀବୀଙ୍କୁ ସମୁଦ୍ରକୁ ଯିବାକୁ ବାରଣ କରାଯାଇଛି । ଅବପାତ ଛତିଶଗଡ଼ ମୁହାଁ ହେବା ପରେ ନଦୀ ଅବବାହିକାରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଫଳରେ ମହାନଦୀ, ବୈତରଣୀ, ବ୍ରାହ୍ମଣୀ, ବଂଶଧାରା ଓ ନାଗାବଳୀରେ ଜଳସ୍ତର ବଢ଼ିବା ସହ ବନ୍ୟା ଆଶଙ୍କା ରହିଛି । ପାହାଡ଼ିଆ ଅଞ୍ଚଳରେ ଭୂସ୍ଖଳନ ହେବା ସମ୍ଭାବନା ଥିବାରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦିଆଯାଇଛି । ପ୍ରବଳ ବର୍ଷାରେ ଦୃଶ୍ୟମାନ କ୍ଷମତା କମିବା ସହ ସହରାଞ୍ଚଳରେ କୃତ୍ରିମ ବନ୍ୟା ଓ ତଳିଆ ଅଞ୍ଚଳରେ ଜଳବନ୍ଦୀ ସ୍ଥିତି ଉପୁଜିପାରେ । ସେଥିପାଇଁ ଆବଶ୍ୟକୀୟ ପଦକ୍ଷେପ ନେବାକୁ ଜିଲ୍ଲାପାଳମାନଙ୍କୁ ସତର୍କ କରିଛନ୍ତି ଏସଆରସି ।
ନୂଆଦିଲ୍ଲୀ: ଚାରି ଦିନ ଆଗରୁ ଅନିର୍ଦ୍ଦିଷ୍ଟ କାଳ ଯାଏଁ ମୁଲତବୀ ହେଲା ସଂସଦର ମୌସୁମୀ ଅଧିବେଶନ । ତେବେ ଏହି ଅଧିବେଶନରେ ଅଧିକାଂଶ ବିଧେୟକ ସଂକ୍ରାନ୍ତ କାର୍ଯ୍ୟ ସମ୍ପନ୍ନ ହୋଇଛି । ଆସନ୍ତା ଅଗଷ୍ଟ ୯ରେ ମହରମ ଥିବାବେଳେ ୧୧ରେ ରାକ୍ଷୀ ପୂର୍ଣ୍ଣିମା ରହିଛି ।
ଏହି ଦୁଇଟି ଉତ୍ସବରେ ସାଂସଦମାନେ ନିଜ ନିଜ ନିର୍ବାଚନ ମଣ୍ଡଳୀକୁ ଯିବାକୁ ଥିବାରୁ ସଂସଦ ବନ୍ଦ ରଖିବାକୁ ଅନୁରୋଧ କରାଯାଇଥିଲା । ଆଉ କିଛି ବିଧେୟକ ଉପସ୍ଥାପିତ ହେବାକୁ ବାକି ଥିବାବେଳେ ସାଂସଦଙ୍କ ଅନୁରୋଧ କ୍ରମେ ସଂସଦକୁ ଆଗୁଆ ମୁଲତବୀ ଘୋଷଣା କରାଯାଇଛି । ଲୋକସଭା ବାଚସ୍ପତି ଓମ ବିରଲା କହିଛନ୍ତି- ମୌସୁମୀ ଅଧିବେଶନ ୧୬ ଦିନ ଲାଗି ଚାଲିଥିଲା ଏବଂ ୭ଟି ବିଧେୟକ ଗୃହୀତ ହୋଇଛି ।
ରାଜ୍ୟସଭାରେ ୩୮ ଘଣ୍ଟା କାର୍ଯ୍ୟ ହୋଇଥିବାବେଳେ ହଙ୍ଗାମାରେ ନଷ୍ଟ ହୋଇଥିଲା ୪୭ ଘଣ୍ଟା । ତେବେ ଆଗୁଆ ସଂସଦ ଅଧିବେଶନ ବନ୍ଦକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି ତୃଣମୂଳ ସାଂସଦ ଡେରେକ ଓ ବ୍ରିଏନ ।
ଭୁବନେଶ୍ବର: ଏଥର ଦେଶ ପାଳିବ ୭୬ତମ ସ୍ବାଧୀନତା ଦିବସ । ରାଜ୍ୟରେ ଜାତୀୟ ପତାକା ଉତ୍ତୋଳନ ପାଇଁ ଅତିଥିଙ୍କ ତାଲିକା ପ୍ରକାଶ ପାଇଛି । ସ୍ବାଧୀନତା ଦିବସରେ ରାଜ୍ୟସ୍ତରୀୟ ପରେଡରେ ସାମିଲ ହେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପରେଡରେ ଅଭିବାଦନ ଗ୍ରହଣ କରିବା ସହ ପତାକା ଉତ୍ତୋଳନ କରିବେ ମୁଖ୍ୟମନ୍ତ୍ରୀ । ସେହିପରି କନ୍ଧମାଳ ଜିଲ୍ଲା ହେଡକ୍ବାର୍ଟରରେ ପତାକା ଉତ୍ତୋଳନ କରିବେ SC ST ବିଭାଗର ମନ୍ତ୍ରୀ ଜଗନ୍ନାଥ ସାରକା ।
ପୁରୀରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ, ଢେଙ୍କାନାଳରେ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ବଲାଙ୍ଗୀରରେ ମନ୍ତ୍ରୀ ପ୍ରଦୀପ ଅମାତ ଜାତୀୟ ପତାକା ଉତ୍ତୋଳନ କରିବେ । ସେହିପରି କେନ୍ଦୁଝର ଜିଲ୍ଲା ମୁଖ୍ୟାଳୟରେ ମନ୍ତ୍ରୀ ପ୍ରମିଳା ମଲ୍ଲିକ, ନୟାଗଡ ମୁଖ୍ୟାଳୟରେ ମନ୍ତ୍ରୀ ଉଷା ଦେବୀ, କଟକରେ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ସୁନ୍ଦରଗଡରେ ମନ୍ତ୍ରୀ ପ୍ରତାପ ଦେବ ପତାକା ଉତ୍ତୋଳନ କରିବେ ।
ସେହିପରି ମାଲକାନଗିର ଜିଲ୍ଲା ସ୍ତରୀୟ ପରେଡରେ ସାମିଲ ହେବେ ଗଣଶିକ୍ଷା ମନ୍ତ୍ରୀ ସମୀର ଦାସ । ସମ୍ବଲପୁରରେ ମନ୍ତ୍ରୀ ଅଶ୍ୱିନୀ ପାତ୍ର, କୋରାପୁଟରେ ମନ୍ତ୍ରୀ ପ୍ରୀତିରଞ୍ଜନ ଘଡାଇ, ଗଜପତିରେ ମନ୍ତ୍ରୀ ଶ୍ରୀକାନ୍ତ ସାହୁ, ଖୋର୍ଦ୍ଧାରେ ମନ୍ତ୍ରୀ ତୁଷାରିକାନ୍ତି ବେହେରା , ସୋନପୁରରେ ମନ୍ତ୍ରୀ ରୋହିତ ପୂଜାରୀ, ନୂଆପଡାରେ ମନ୍ତ୍ରୀ ରୀତା ସାହୁ, ଅନୁଗୁଳରେ ମନ୍ତ୍ରୀ ବାସନ୍ତୀ ହେମ୍ବ୍ରମ ଓ ବ୍ରହ୍ମପୁରରେ RDC ତ୍ରିରଙ୍ଗା ପତାକା ଉତ୍ତୋଳନ କରିବେ । ବାକି ଅନ୍ୟ ୯ଟି ଜିଲ୍ଲାରେ ଜିଲ୍ଲାପାଳମାନେ କରିବେ ପତାକା ଉତ୍ତୋଳନ ।
ଶ୍ରୀନଗର: ଶ୍ରାବଣ ଶେଷ ସୋମବାରରେ ଶିବଖୋଡି ଗୁମ୍ଫା ନିକଟରେ ଅଘଟଣ । ଜମ୍ମୁ କାଶ୍ମୀରରେ ଭୂସ୍ଖଳନ ଘଟି ଦୁଇ ଶିବଭକ୍ତ ପ୍ରାଣ ହରାଇଛନ୍ତି । ଦୁର୍ଘଟଣାରେ ଜଣେ ଶ୍ରଦ୍ଧାଳୁ ଆହତ ହୋଇଛନ୍ତି । ଦୁଇ ମୃତକଙ୍କ ପରିଚୟ ମିଳିଛି । ଜଣେ ତୀର୍ଥଯାତ୍ରୀ ଉତ୍ତର ପ୍ରଦେଶର ହୋଇଥିବାବେଳେ ଅନ୍ୟଜଣେ ଜମ୍ମୁ କାଶ୍ମୀର ରାଜୌରୀ ଜିଲ୍ଲାର ଜଣାପଡିଛି ।
ଶିବଖୋଡିର ପାରମ୍ପରିକ ଗୁମ୍ଫା ନିକଟରେ ଦୁଇ ଶ୍ରଦ୍ଧାଳୁଙ୍କ ଉପରେ ପଥର ପଡି ଯାଇଥିଲା । ଘଟଣାସ୍ଥଲରେ ହିଁ ଦୁଇଜଣ ପ୍ରାଣ ହରାଇଛନ୍ତି । ଆହତ ଶ୍ରଦ୍ଧାଳୁ ଜଣକ ଉତ୍ତର ପ୍ରଦେଶ ଗୋରଖପୁରର ହୋଇଥିବା ଜଣାପଡିଛି ।
ଜମ୍ମୁ ସଂଭାଗରେ ରିୟାସୀ ସ୍ଥିତ ଭଗବାନ ଶିବଙ୍କ ମହତ୍ତ୍ବ ରହିଛି । ଶ୍ରୀ ଶିବଖେଡି ଧାମରେ ଭଗବାନ ଶିବ ଭସ୍ମାସୁରର ବଧ କରିଥିବା ଲୋକକଥା ରହିଛି । ଗୁମ୍ଫା ଭିତରେ ୩ ଫୁଟ ଉଚ୍ଚତାର ଶିବଲିଙ୍ଗ ରହିଛି । ପୁରୁଣା ଗୁମ୍ଫା ଭିତରକୁ ଯିବା ରାସ୍ତା ସଂକୀର୍ଣ୍ଣ ସହ ବିପଦପୂର୍ଣ୍ଣ ରହିଛି । ଆଜି ସ୍ରାବଣ ମାସର ଶେଷ ସୋମବାର ହୋଇଥିବାରୁ ଶିବଖୋଡି ଗୁମ୍ଫା ନିକଟରେ ଶିବ ଶ୍ରଦ୍ଧାଳୁଙ୍କ ଭିଡ ଜମିଥିଲା ।
