ଭୁବନେଶ୍ୱର: ଓଡ଼ିଶା ସିଭିଲ ସର୍ଭିସ-୨୦୨୧ ପ୍ରିଲିମ୍ ତାରିଖ ଘୋଷଣା ହୋଇଛି । ଅକ୍ଟୋବର ୧୬ରେ ହେବ ଓଡ଼ିଶା ସିଭିଲ ସର୍ଭିସ- ପ୍ରିଲିମ୍ । ରାଜ୍ୟର ୫ଟି ଜୋନରେ ପରୀକ୍ଷା ନେଇ OPSC ପକ୍ଷରୁ ସୂଚନା ଦିଆଯାଇଛି । ଏଥିସହ ଭିନ୍ନକ୍ଷମ ପରୀକ୍ଷାର୍ଥୀଙ୍କୁ ଅଧିକ ୪୦ ମିନିଟ ସମୟ ମିଳିବ ବୋଲି ସୂଚନା ରହିଛି ।
୧୬ ତାରିଖରେ ୨ଟି ସିଟିଂରେ ଏହି ପରୀକ୍ଷା ହେବ। ସକାଳ ୧୦ଟାରୁ ମଧ୍ୟାହ୍ନ ୧୨ଟା ଯାଏ ଜେନେରାଲ ଷ୍ଟଡିଜ ପେପର -୧ ଏବଂ ଅପରାହ୍ନ ୧ଟା ୩୦ରୁ ୩ଟା ୩୦ଯାଏ ଜେନେରାଲ ଷ୍ଟଡିଜ ପେପର-୨ ପରୀକ୍ଷା ହେବ ।
ନୟାଗଡ଼: ଶିକ୍ଷୟିତ୍ରୀ କଲେ ସ୍କୁଲ ମଧ୍ୟାହ୍ନ ଭୋଜନ ଅଣ୍ଡା ଚୋରି । ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଅଭିଯୋଗ ମୁତାବକ, ନୟାଗଡ଼ ଜିଲ୍ଲା ରଣପୁର ବ୍ଲକ୍ ଚମ୍ପାଗଡ଼ ସରକାରୀ ମଧ୍ୟ ଇଂରାଜୀ ବିଦ୍ୟାଳୟର ଶିକ୍ଷୟିତ୍ରୀ ହେଉଛନ୍ତି ବିଜୟଲକ୍ଷ୍ମୀ । ଦିଦି ଗତକାଲି ନିଜ ଟିଫିନରେ ସ୍କୁଲ ମଧ୍ୟାହ୍ନ ଭୋଜନ ପାଇଁ ଆସିଥିବା ୧୨ଟି ଅଣ୍ଡା ରଖିଥିଲେ । ଛାତ୍ରଛାତ୍ରୀଙ୍କ ନଜର ପଡ଼ିବାରୁ ସେମାନେ ଏ ବିଷୟରେ ଅଭିଭାବକଙ୍କୁ ଜଣାଇଥିଲେ । ଅଭିଭାବକମାନେ ଆସି ଦିଦିଙ୍କ ବ୍ୟାଗ ତନଖି କରିବାରୁ ଅଣ୍ଡା ମିଳିଥିଲା ।
ଚାନ୍ଦପୁର ପୋଲିସ ଓ ରଣପୁର ବିଇଓଙ୍କୁ ଏ ନେଇ ଖବର ଦିଆଯାଇଥିଲା । ପୋଲିସ ଓ ବିଇଓ ଆସି ତଦନ୍ତ କରିଥିଲେ । ଶିକ୍ଷୟିତ୍ରୀ ବିଜୟଲକ୍ଷ୍ମୀ ସବୁ ସତ କଥା ମାନି ଯାଇଥିଲେ । ଏ ନେଇ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ୫ ଦିନ ମଧ୍ୟ୍ୟରେ ଶିକ୍ଷୟିତ୍ରୀଙ୍କୁ ଅନ୍ୟତ୍ର ବଦଳି କରାଯିବ ବୋଲି ଉଚ୍ଚ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଛନ୍ତି ।
ନୂଆଦିଲ୍ଲୀ: ଚଳିତବର୍ଷ ଭାରତ ଛାଡ଼ିବେ ୮ହଜାର ଧନୀ । ଡିସେମ୍ବର ସୁଦ୍ଧା ଭାରତର ୮ହଜାର ଅତି ଧନୀଲୋକ ଦେଶ ଛାଡ଼ି ବିଦେଶର ନାଗରିକତା ଗ୍ରହଣ କରିପାରନ୍ତି ।
କଠୋର ଟ୍ୟାକ୍ସ ବ୍ୟବସ୍ଥା ଓ ପାସପୋର୍ଟ ନିୟମ ଯୋଗୁ ସୁପର ରିଚମାନେ ଦେଶ ଛାଡ଼ିପାରନ୍ତି ବୋଲି ଏକ ସର୍ଭେରୁ ଜଣାପଡ଼ିଛି । ଏମାନଙ୍କ ମଧ୍ୟରେ ଅନେକ ବ୍ୟବସାୟୀ, ନୂଆ ଉଦ୍ୟୋଗୀ, କର୍ପୋରେଟ୍ କାର୍ଯ୍ୟନିର୍ବାହୀ ଅଛନ୍ତି ।
ବ୍ୟବସାୟ ବିସ୍ତାର, ବିକଳ୍ପ ରୋଜଗାର ବ୍ୟବସ୍ଥା, ଉନ୍ନତ ଜୀବନଯାପନ ପାଇଁ ଧନୀମାନେ ଭାରତର ବିକଳ୍ପ ଖୋଜୁଛନ୍ତି ବୋଲି ହେନଲୀ ଗ୍ଲୋବାଲ ସିଟିଜେନର ସର୍ଭେରୁ ଜଣାପଡ଼ିଛି ।
ଭାରତ ଛାଡ଼ିବା ପରେ ଅଧିକାଂଶ ଧନୀ ୟୁନାଇଟେଡ ଆରବ ଏମିରେଟସ ବା UAE, ଅଷ୍ଟ୍ରେଲିଆ ଓ ସିଙ୍ଗାପୁରରେ ରହିବାକୁ ଯୋଜନା କରୁଛନ୍ତି । ୨୦୧୫ରୁ ୨୦୨୧ ମଧ୍ୟରେ ୯ ଲକ୍ଷ ଭାରତୀୟ ଦେଶ ଛାଡ଼ିଛନ୍ତି । ପ୍ରତିବର୍ଷ ଏହି ସଂଖ୍ୟା ବଢୁଛି । କରୋନା ପରେ ଅନ୍ୟଦେଶ ତୁଳନାରେ ଭାରତର ଅର୍ଥ ବ୍ୟବସ୍ଥାରେ ଯଥେଷ୍ଟ ସୁଧାର ଆସିଥିବା ବେଳେ ବିଦେଶୀ ନିବେଶକ ମଧ୍ୟ ଭାରତରେ ନିବେଶ ପାଇଁ ମନ ବଳାଉଛନ୍ତି । ତେବେ ବିଦେଶରେ ମିଲିୟନ ଡଲାର ନିବେଶ କରିବା ଦ୍ବାରା ସେହି ଦେଶରେ ନାଗରିକତା ମିଳିଯାଉଥିବାରୁ ଧନୀମାନେ ବିଦେଶରେ ସ୍ଥାୟୀ ନାଗରିକ ହେବାକୁ ମନ ବଳାଉଥିବା ବିଶେଷଜ୍ଞ ମତ ଦେଇଛନ୍ତି ।
ନୂଆଦିଲ୍ଲୀ: ଆହୁରି ଭୟଙ୍କର ହେବ ଋଷ ଓ ୟୁକ୍ରେନ୍ ମଧ୍ୟରେ ଯୁଦ୍ଧ । ଋଷର ସୁରକ୍ଷା ପାଇଁ ଆମେ ସବୁ ପ୍ରକାର ଅସ୍ତ୍ର ପ୍ରୟୋଗ କରିବୁ ବୋଲି କହିଲେ ରାଷ୍ଟ୍ରପତି ପୁଟିନ୍ । ପାଶ୍ଚାତ୍ୟ ଦେଶରୁ ଆକ୍ରମଣ ଆଶଙ୍କା କରି ପରମାଣୁ ଆକ୍ରମଣ ପାଇଁ ଧମକ ଦେଇଛନ୍ତି ପୁଟିନ୍ । ଏଥିସହ ସେନାକୁ ମଧ୍ୟ ଆଲର୍ଟରେ ରହିବାକୁ ପୁଟିନ୍ ନିର୍ଦ୍ଦେଶ ଦେଇଛନ୍ତି ।
ଋଷର ପାର୍ଶ୍ବବର୍ତ୍ତି ଅଞ୍ଚଳରେ ପାଖାପାଖି ୩ ଲକ୍ଷ ସେନାକୁ ସ୍ଥାନାନ୍ତର କରାଯାଇଛି । ଆମେରିକା ଓ ୟୁରୋପ ଋଷ ଉପରେ ଆକ୍ରମଣ କରିପାରନ୍ତି ବୋଲି ପୁଟିନ୍ ସନ୍ଦେହ କରିଛନ୍ତି । ଆଗକୁ ବଡ଼ ମୁକାବିଲା ହେବ । ଏଥିପାଇଁ ପ୍ରସ୍ତୁତ ରହିବାକୁ ଦେଶବାସୀଙ୍କୁ ଆହ୍ବାନ କରିଛନ୍ତି ।
କେନ୍ଦ୍ରାପଡ଼ା: ଘରେ କେହି ନଥିବା ବେଳେ ଚୋରମାନେ ଘରେ ପଶିଲେ, ଘରେ ଥିବା ମୁଢ଼ି ଖାଇଲେ, ତା’ପରେ ଟଙ୍କା ଓ ସୁନା ଲୁଟି ଫେରାର ହୋଇଗଲେ ।
ସିସିଟିଭିରେ କଏଦ ହୋଇଛି ଲୁଟେରାଙ୍କ କାରନାମା । କେନ୍ଦ୍ରାପଡ଼ା ଜିଲ୍ଲା ପାଟକୁରା ଥାନା ଭଗବାନପୁର ପଞ୍ଚାୟତ ଗଜିପୁରରେ ଗତକାଲି ବିଳମ୍ବିତ ରାତିରେ ଏହି ଚୋରି ହୋଇଛି । ଗଜିପୁରର ଅବସରପ୍ରାପ୍ତ ଶିକ୍ଷକ ପ୍ରତାପ ଚନ୍ଦ୍ର ଜେନା ଘରେ ତାଲା ପକାଇ ଭୁବନେଶ୍ୱର ଯାଇଥିବା ବେଳେ ବିଳମ୍ବିତ ରାତିରେ ପାଞ୍ଚ-ଛଅ ଜଣ ଚୋର ତାଲା ଭାଙ୍ଗି ଓ ଆଲମିରା ତାଡ଼ି ଟଙ୍କା ଏବଂ ସୁନା ନେଇଯାଇଛନ୍ତି ।
ଘରେ ଥିବା ଚୁଡ଼ାଭଜା, ମିକ୍ସଚର ଓ ମୁଢ଼ି ଖାଇଥିଲେ ଚୋର । ସେହିପରି ପାଖ ଧାନମଣ୍ଡଳ ଗାଁର ଲକ୍ଷ୍ମୀଧର ସ୍ୱାଇଁଙ୍କ ଘରୁ ମଧ୍ୟ ଚୋରି ହୋଇଛି । ଏହାର ଭିଜୁଆଲ ମଧ୍ୟ ସିସିଟିଭିରେ କଏଦ ହୋଇଥିଲା । ତା’ ମଧ୍ୟରୁ ଗୋଟିଏ ସିସିଟିଭିକୁ ଚୋରମାନେ ଭାଙ୍ଗି ଦେଇଛନ୍ତି । ଏନେଇ ପାଟକୁରା ଥାନାରେ ଏତଲା ଦିଆଯାଇଛି ।
ମୁମ୍ବାଇ: କିଏ ଜାଣିଥିଲା ତାଙ୍କର ଏପରି ଦେହାନ୍ତ ହେବ । କିଏ ଜାଣିଥିଲା ସମସ୍ତଙ୍କୁ ହସାଉଥିବା ଲୋକ ଆଜି କନ୍ଦାଇ ଚାଲିଯିବ । ଆଜି ୫୮ ବର୍ଷ ବୟସରେ ଦିଲ୍ଲୀ ଏମସରେ ରାଜୁ ଶ୍ରୀବାସ୍ତବଙ୍କ ଦେହାନ୍ତ ହୋଇଛି । ୪୨ ଦିନ ସଂଘର୍ଷ କରି ଶେଷରେ ଆଖି ବୁଜିଛନ୍ତି ରାଜୁ । ଜିମରେ ଓ୍ୱାର୍କଆଉଟ କରୁଥିବାବେଳେ ତାଙ୍କର ହୃଦଘାତ ହୋଇଥିଲା । ଯାହାଫଳରେ ତାଙ୍କୁ ତୁରନ୍ତ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଥିଲା ।
କିନ୍ତୁ ଆପଣ ଜାଣିଛନ୍ତି କି ରାଜୁଙ୍କ ହସ ପଛରେ ଥିଲା ସଂଘର୍ଷ ହିଁ ସଂଘର୍ଷ । ଏତେ ସହଜ ନ ଥିଲା ତାଙ୍କ ଜୀବନ । କମେଡି କିଙ୍ଗ ନାମରେ ନାମିତ ହେବା ଆଗରୁ ସେ ଥିଲେ ସାଧାରଣ ଲୋକ । ସେ ଥିଲେ ମୁମ୍ବାଇର ଜଣେ ଅଟୋ ଚାଳକ ।
ରୋଜଗାର କରିବାକୁ କାନପୁରରୁ ମୁମ୍ବାଇ ଆସିବା ପରେ ଆରମ୍ଭ ହୋଇଥିଲା ରାଜୁଙ୍କ ପ୍ରକୃତ ସଂଘର୍ଷ । ପଦବୀ ହାସଲ କରିବାକୁ ତାଙ୍କୁ କରିବାକୁ ପଡ଼ିଥିଲା କଠିନ ପରିଶ୍ରମ ।
ପିଲାଦିନରୁ ରାଜୁ କମେଡି କରୁଥିଲେ । ସେ କମେଡି କରିବାକୁ ଭଲ ପାଉଥିଲେ । କିନ୍ତୁ ତାଙ୍କର ଏହି ନିଶା ତାଙ୍କ ପରିବାରକୁ ଚିନ୍ତାରେ ପକାଇଥିଲା । ହେଲେ ରାଜୁ ସବୁ ବାଧା ବିଘ୍ନକୁ ପଛରେ ପକାଇ ଚାଲିଆସିଥିଲେ ମୁମ୍ବାଇ ।
କାମ ଖୋଜିବାକୁ ସେ ମୁମ୍ବାଇ ଆସିଲାବେଳେ ତାଙ୍କ ପକେଟରେ ଟଙ୍କାଟିଏ ବି ନଥିଲା । ଅଭାବ ପରିସ୍ଥିତିରେ ଏକ ଅଟୋ ଚଳାଇ ଟଙ୍କା ରୋଜଗାର କରୁଥିଲେ |
ଏହା ପରେ ରାଜୁ ଟେଲିଭିଜନ ଦୁନିଆରେ ପାଦ ଥାପିଥିଲେ । ଏଥିରୁ କ୍ୟାରିଅର୍ ଆରମ୍ଭ କରିଥିଲେ ରାଜୁ। ‘ଦି ଗ୍ରେଟ୍ ଇଣ୍ଡିଆନ୍ ଲାଫ୍ଟର ଚ୍ୟାଲେଞ୍ଜ’ରୁ ଲୋକପ୍ରିୟତା ପାଇଥିଲେ ରାଜୁ। ଏହି ଶୋ ମାଧ୍ୟମରେ ରାଜୁ ଗଜୋଧର ଭାୟା ହୋଇ ଲକ୍ଷ ଲକ୍ଷ ପ୍ରଶଂସକଙ୍କ ହୃଦୟ ଜିତିଥିଲେ। ଯଦିଓ ରାଜୁ ଶ୍ରୀବାସ୍ତବ ଶୋ’ର ବିଜେତା ହୋଇପାରିନଥିଲେ, କିନ୍ତୁ ସେ ସୋ ମାଧ୍ୟମରେ ଏକ ଭିନ୍ନ ପରିଚୟ ସୃଷ୍ଟି କରିଥିଲେ ।
ଏହାପରେ ଚଳଚ୍ଚିତ୍ରରେ ଛୋଟ ଭୂମିକା ଗ୍ରହଣ କରି ନିଜର କ୍ୟାରିଅର୍ ଆରମ୍ଭ କରିଥିଲେ ରାଜୁ | ମେନ୍ ପ୍ୟାର୍ କିୟା ଏବଂ ବାଜିଗର ଏବଂ ବମ୍ବେ ଟୁ ଗୋଆ ଭଳି ଚଳଚ୍ଚିତ୍ରରେ ଛୋଟ ଭୂମିକା ଗ୍ରହଣ କରିଥିଲେ |
ନୂଆଦିଲ୍ଲୀ: ଜୀବନ ଯୁଦ୍ଧରେ ହାରିଗଲେ କମେଡି କିଙ୍ଗ ରାଜୁ ଶ୍ରୀବାସ୍ତବ । ୪୨ ଦିନ ସଂଘର୍ଷ କରି ଶେଷରେ ଆଖି ବୁଜିଛନ୍ତି ରାଜୁ । ୫୮ ବର୍ଷ ବୟସରେ ଦିଲ୍ଲୀ ଏମସରେ ରାଜୁ ଶ୍ରୀବାସ୍ତବଙ୍କ ଦେହାନ୍ତ ହୋଇଛି । ଏ ନେଇ ତାଙ୍କ ପରିବାର ପକ୍ଷରୁ ସୂଚନା ଦିଆଯାଇଛି ।
ରାଜୁ ଜିମରେ ଓ୍ୱାର୍କଆଉଟ କରୁଥିବାବେଳେ ତାଙ୍କର ହୃଦଘାତ ହୋଇଥିଲା । ଯାହାଫଳରେ ତାଙ୍କୁ ତୁରନ୍ତ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଥିଲା । ରାଜୁଙ୍କର ପୁରା ନାଁ ଥିଲା ସତ୍ୟ ପ୍ରକାଶ ଶ୍ରୀବାସ୍ତବ । ୨୫ ଡିସେମ୍ବର ୧୯୬୩ରେ ଉତ୍ତରପ୍ରଦେଶ କାନପୁରରେ ଜନ୍ମ ଗ୍ରହଣ କରିଥିଲେ ରାଜୁ । ରାଜୁଙ୍କ ଦେହାନ୍ତ ଖବର ଶୁଣି ବଲିଉଡରେ ଶୋକର ଛାୟା ଖେଳିଯାଇଛି । ଏହା ତାଙ୍କ ଫ୍ୟାଙ୍କୁ ବଡ଼ ଝଟକା ଦେଇଛି ।
କିଛି ଦିନ ତଳେ ତାଙ୍କୁ ହୋସକୁ ଆଣିବାକୁ ବିଗ୍ ବି ଅମିତାଭ ବଚ୍ଚନଙ୍କ ଅଡିଓ କ୍ଲିପ୍ ଶୁଣାଯାଇଥିଲା । ହସ୍ପିଟାଲରେ ଭର୍ତ୍ତି ହେବାର ୧୫ ଦିନ ପରେ ସେ ଆଖି ବି ଖୋଲିଥିଲେ । ବିଗ୍ ବିଙ୍କ ମୋଟିଭେସନାଲ୍ ସ୍ପିଚ ଯୋଗୁ ତାଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଥିଲା ।
କମେଡିଆନ ରାଜୁ ଶ୍ରୀବାସ୍ତବ ବିଗ ବି ଅମିତାଭ ବଚ୍ଚନଙ୍କ ଜଣେ ବଡ ପ୍ରଶଂସକ। ଅମିତାଭଙ୍କ ମିମିକ୍ରି କରି ବହୁ ପ୍ରଂଶସା ସାଉଣ୍ଟିଛନ୍ତି ରାଜୁ । ଷ୍ଟେଜ ସୋ ହେଉକି ବଡ ପ୍ରୋଗାମ ସବୁଠି ଅମିତାଭଙ୍କ ଡାଇଲଗ କହି ତାଳିର ହକଦାର ହୋଇଛନ୍ତି ରାଜୁ ।
ରାଜୁ ଶ୍ରୀବାସ୍ତବ ଜଣେ ଜଣାଶୁଣା ହାସ୍ୟ ଅଭିନେତା । ସେ ଅନେକ ଚଳଚ୍ଚିତ୍ର ସହ ଟିଭି ସିରିୟଲରେ ମଧ୍ୟ କାର୍ଯ୍ୟ କରିଛନ୍ତି । ଏହା ସହ ରାଜୁ ବିଗ୍ ବସ୍–୩, ନଚ ବଲିଏ ୬ ଭଳି ରିଏଲିଟି ଶୋରେ ଭାଗ ନେଇ ବେଶ୍ ପ୍ରଶଂସା ସାଉଣ୍ଟିଛନ୍ତି ।
#BREAKING | Comedian Raju Srivastava passes away in Delhi at the age of 58, confirms his family.
He was admitted to AIIMS Delhi on August 10 after experiencing chest pain & collapsing while working out at the gym.#NandighoshaTV #updatenews #RajuSrivastav pic.twitter.com/0c07n1AYHa
— NandighoshaTV (@NandighoshaTV) September 21, 2022
ମୟୁରଭଞ୍ଜ: ହାତୀ ଉପଦ୍ରବ ପାଇଁ ବନ କର୍ମଚାରୀ ଅଟକ । ମୟୁରଭଞ୍ଜ ଜିଲ୍ଲାର କରଞ୍ଜିଆ ବନଖଣ୍ଡରେ ଥମୁନି ହାତୀ ଉପଦ୍ରବ । ଦୁଧିଆଣି ରେଞ୍ଜ ଅଞ୍ଚଳରେ ଅଛନ୍ତି ୨୮ ଟିକିଆ ହାତୀପଲ ।
୫ ଟି ବ୍ଲକର ୧୦୦ ରୁ ଉର୍ଦ୍ଧ୍ବ ଗାଁ ଆତଙ୍କିତ ଅବସ୍ଥାରେ ଅଛନ୍ତି । ଗତକାଲି ବିଳମ୍ବିତ ରାତ୍ରରେ ଦୁଧିଆଣି ରେଞ୍ଜ ବାରାପାଣପଶି ଗାଁରେ ହାତୀ ଆକ୍ରମଣରେ ଜଣେ ଆହତ ହେଇଛନ୍ତି । ବାରମ୍ବାର ହାତୀ ଉପଦ୍ରବ ବୃଦ୍ଧି ପାଉଥିବାରୁ ପୁରୁଣା ଦେଓଗାଁଲୋକ ୧୦ ଜଣ ଟିପିଏଫ୍ ଵନ ବିଭାଗ କର୍ମଚାରୀଙ୍କୁ ଗତକାଲି ବିଳମ୍ବିତ ରାତିରୁ ଗୋଟିଏ ଗାଡି ସହ ଅଟକ ରଖିଛନ୍ତି ।
ହାତୀପଲ ଯୋଗୁଁ ଲୋକମାନେ ଘର ସମୁଖରେ ନିଆଁ ଜାଳି ଜଗି ରହିଛନ୍ତି । ଗତକାଲି ବିଳମ୍ବିତ ରାତିରେ ହାତୀପଲ ଏକର ଏକର ଚାଷ ଜମି ନଷ୍ଟ କରିଛନ୍ତି । ନଷ୍ଟ କରୁଥିବା ଫସଲର ଯଥା ଶୀଘ୍ର ଆକଳନ କରି କ୍ଷୟକ୍ଷତି ବାବଦକୁ ତୁରନ୍ତ ପ୍ରଦାନ କରିବା ପାଇଁ ଦାବି ହୋଇଛି ।
କଟକ: ଆସନ୍ତା ୨୬, ୨୭ ଓ ୨୯ ତାରିଖରେ ବାରବାଟୀରେ ଖେଳାଯିବ ଲିଜେଣ୍ଡସ୍ ଲିଗ୍ କ୍ରିକେଟ୍ ମ୍ୟାଚ୍ । ଏଥିରେ ବିଭିନ୍ନ ଦେଶର ପୂର୍ବତନ ଅନ୍ତର୍ଜାତୀୟ କ୍ରିକେଟରମାନେ ଭାଗ ନେବେ । ବାରବାଟୀରେ ହେବାକୁ ଥିବା ତିନୋଟି ମ୍ୟାଚ ପାଇଁ ଆସନ୍ତାକାଲିଠୁ ଅଫଲାଇନ ଓ ଅନଲାଇନ ଟିକେଟ ବିକ୍ରି ହେବ ।
୨୪ ତାରିଖରେ ଓସିଏ ଅନୁବନ୍ଧିତ ସଂଗଠନ, ସ୍କୁଲ ଓ କଲେଜ ପାଇଁ ଟିକେଟ ବିକ୍ରି ହେବ । କ୍ରିସ୍ ଗେଲ, ସେନ ଓ୍ବାଟସନ, ବିରେନ୍ଦ୍ର ସେହେଓ୍ବାଗ, ହରଭଜନ ସିଂ, ଗୌତମ ଗମ୍ଭୀର, ଇର୍ଫାନ ପଠାନ, ୟୁସୁଫ ପଠାନଙ୍କ ଭଳି ପୂର୍ବତନ ଖେଳାଳି ବାରବାଟୀରେ ମ୍ୟାଚ ପାଇଁ ଆସିବେ ।
ଆସନ୍ତା ୨୪ ଓ ୨୫ ତାରିଖରେ ଭୁବନେଶ୍ବରରେ ପହଞ୍ଚିବେ ସମସ୍ତ ଖେଳାଳି । ତିନୋଟି ମ୍ୟାଚ ପାଇଁ ବାରବାଟୀ ପିଚ୍, ଗ୍ରାଉଣ୍ଡ ପ୍ରସ୍ତୁତି ସରିଲାଣି ।
ସୁନ୍ଦରଗଡ଼: ଭିଜିଲାନ୍ସ ଜାଲରେ ସୁନ୍ଦରଗଡ଼ ଜିଲ୍ଲା ଟାଙ୍ଗରପାଲି ତହସିଲ ଅଫିସର ଅତିରିକ୍ତ ତହସିଲଦାର କୁଳମଣି ପଟେଲ । ଆୟ ବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ବିଭାଗ ପକ୍ଷରୁ ଏକକାଳୀନ ୮ ଟି ସ୍ଥାନରେ ଚଢାଉ ଚାଲିଛି ।
ସୁନ୍ଦରଗଡ଼ର ଦୁଇଟି , ଡୁମାଵାହଲର ୪ଟି, ଲେଫ୍ରିପଡାର ଗୋଟିଏ ଓ ଟାଙ୍ଗରପାଲିର ଗୋଟିଏ ସ୍ଥାନରେ ଚାଲିଛି ଚଢାଉ। ସୁନ୍ଦରଗଡ଼ରେ ଗୋଟିଏ ଦୁଇ ମହଲା କୋଠା, ଲେଫ୍ରିପଡାରେ ଗୋଟିଏ ତିନି ମହଲା କୋଠା ଓ ନିଜ ଗ୍ରାମରେ ତିନୋଟି ଘର ଠାବ ହୋଇଛି ।
ଦୁଇଟି ଟ୍ରାକ୍ଟର, ତିନୋଟି ବାଇକ, ଦୁଇଟି ବୋଲେରୋ ଓ ଗୋଟିଏ କମାଣ୍ଡର ଠାବ ହୋଇଛି ।
