ଗଞ୍ଜାମ: ଗଞ୍ଜାମ ଜିଲ୍ଲା ତାରାସିଂ କୋକୋଳବ। ନିକଟରେ ଗତ ମଧ୍ୟ ରାତିରେ ଏକ ଟ୍ରକ ଦୁର୍ଘଟଣା ଘଟି ୨ ଜଣଙ୍କ ମୃତ୍ୟୁ ହୋଇଛି । ମହାରାଷ୍ଟ୍ର ଅଂଚଳରୁ ଏକ ପରିବା ବୋଝେଇ ଟ୍ରକ ତାରାସିଂ କୋକୋଲାବା ଦେଇ ଗଞ୍ଜାମ ଜିଲ୍ଲା ଅଂଚଳକୁ ପରିବା ନେଇ ଆସୁଥିବା ବେଳେ ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଏକ ଗଛକୁ ଧକ୍କା ଦେଇ ଓଲଟି ଥିଲା ଏବଂ ଗାଡ଼ି ଡ୍ରାଇଭର ଓ ଗାଡ଼ିରେ ଥିବା ଆଉଜଣଙ୍କ ମୃତ୍ୟୁ ହୋଇଥିଲା। ଖବର ପାଇ ତାରାସିଂ ଥାନା ପୋଲିସ ଘଟଣା ସ୍ଥଳରେ ପହଂଚି ଶବକୁ ଜବତ କରିବା ସହ ଘଟଣାର ତଦନ୍ତ ଚଳାଇଛନ୍ତି। ଅନ୍ୟ ପଟେ ମୃତକଙ୍କ ପରିଚୟ ମିଳି ପାରିନହିଁ।
କଂଗ୍ରେସ ଭବନରୁ ଚୋରି, କ୍ୟାପିଟାଲ ଥାନାରେ ଏତଲା
ଭୁବନେଶ୍ୱର: ମାଷ୍ଟରକ୍ୟାଣ୍ଟିନ ସ୍ଥିତ କଂଗ୍ରେସ ଭବନରୁ ଚୋରି । ପାର୍ଟି ଅଫିସ ଭିତରୁ ଆସବାବପତ୍ର ଚୋରି ନେଇ ଅଭିଯୋଗ ହୋଇଛି। କଂଗ୍ରେସ ଭବନ ଅଫିସ ଇନଚାର୍ଜ ବୈଦ୍ୟନାଥ ସ୍ବାଇଁଙ୍କ ଏତଲା। କ୍ୟାପିଟାଲ ଥାନାରେ ଏତଲା ଦେଲେ ବୈଦ୍ୟନାଥ। ଫର୍ଣ୍ଣିଚର ସହ ଏସି ଷ୍ଟାବିଲାଇଜର ଓ ତମ୍ବା ତାର ଚୋରି। ରାତିରେ ପାର୍ଟି ଅଫିସ ନିକଟରେ ପୋଲିସ ପାଟ୍ରୋଲିଂକୁ ବ୍ୟାପକ କରିବାକୁ ଅନୁରୋଧ ହୋଇଛି।
ନଭେମ୍ବର ୨୪ରୁ ଶୀତ ଅଧିବେଶନ, ୨୧ରେ ବସିବ ସର୍ବଦଳୀୟ ବୈଠକ
ଭୁବନେଶ୍ୱର: ଶୀତ ଅଧିବେଶନ ପାଇଁ ଆସନ୍ତା ୨୧ ତାରିଖରେ ବାଚସ୍ପତିଙ୍କ ଅଧ୍ୟକ୍ଷତାରେ ବସିବ ସର୍ବଦଳୀୟ ବୈଠକ। ନଭେମ୍ବର ୨୪ରୁ ଡିସେମ୍ବର ୩୧ତାରିଖ ଯାଏ ଲମ୍ବା ସମୟ ଧରି ଚାଲିବାକୁ ଥିବା ଅଧିବେଶନକୁ ସୁରୁଖୁରରେ ଶେଷ କରିବାକୁ ବୈଠକରେ ବାଚସ୍ପତି ସବୁ ଦଳର ସହଯୋଗ ଲୋଡିବେ। ଏଥର ଅଧିବେଶନ କୋଭିଡ କଟକଣା ଭିତରେ ହେବ ନା ନିୟମର କିଛି ପରିବର୍ତ୍ତନ କରାଯିବ ତାହା ଉପରେ ମଧ୍ୟ ବୈଠକରେ ଆଲୋଚନା କରାଯିବ। ଦିନ ୧୧ଟା ୩୦ମିନିଟରେ ବିଧାନ ସଭାର ନୂତନ ସମ୍ମିଳନୀ କକ୍ଷରେ ବାଚସ୍ପତି ବିକ୍ରମ କେଶରୀ ଆରୁଖଙ୍କ ଅଧକ୍ଷତା ରେ ବସିବାକୁ ଥିବା ଏହି ବୈଠକର ବିରୋଧି ଦଳର ମୁଖ୍ୟ ସଚେତକ ମୋହନ ମାଝୀ, କଂଗ୍ରେସ୍ ବିଧାୟକ ଦଳ ନେତା ନରସିଂହ ମିଶ୍ର, ବିଧାୟକ ଦେବୀ ପ୍ରସାଦ ମିଶ୍ର, ପ୍ରଣବ ପ୍ରକାଶ ଦାସ ପ୍ରମୁଖ ସାମିଲ ହୋଇ ପାରନ୍ତି।
ଆଜି ରାଜ୍ୟ କ୍ୟାବିନେଟ ବୈଠକ, ୧୨ରୁ ଅଧିକ ପ୍ରସ୍ତାବ ଉପରେ ବାଜିପାରେ ମୋହର
ଭୁବନେଶ୍ୱର: ଆଜି ସନ୍ଧ୍ୟାରେ ବସିବ ରାଜ୍ୟ କ୍ୟାବିନେଟର ଗୁରୁତ୍ବପୂର୍ଣ୍ଣ ବୈଠକ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଏହି ବୈଠକ ବସିବ। ସୂଚନା ମୁତାବକ ଏହି ବୈଠକରେ ୧୨ରୁ ଅଧିକ ପ୍ରସ୍ତାବ ଉପରେ ମୋହର ବାଜିପାରେ। ତେବେ କ୍ୟାବିନେଟ ବୈଠକ ପୂର୍ବରୁ ମନ୍ତ୍ରୀ ପରିଷଦ ବୈଠକ ବସିବ। ମନ୍ତ୍ରୀ ପରିଷଦ ବୈଠକରେ ୨୦୨୨-୨୩ ଆର୍ଥିକ ବର୍ଷର ଅତିରିକ୍ତ ବଜେଟକୁ ଅନୁମୋଦନ ମିଳିବ।
ପଦମପୁର ଉପନିର୍ବାଚନ ପାଇଁ ଆଜି ଯାଞ୍ଚ ହେବ ନାମାଙ୍କନ ପତ୍ର
ପଦମପୁର: ଆଜି ପଦମପୁର ଉପନିର୍ବାଚନ ପାଇଁ ଯାଞ୍ଚ ହେବ ନାମାଙ୍କନ ପତ୍ର । ଆସନ୍ତା ୨୧ ତାରିଖରେ ପ୍ରାର୍ଥିପତ୍ର ପ୍ରତ୍ୟାହାର ପାଇଁ ଶେଷ ସୁଯୋଗ ରହିଛି । ସେପଟେ ଆଜିଠୁ ଉଠିବ ପଡିବ ଗାଁ । ପ୍ରଚାରରେ କମ୍ପିବ ପଦମପୁର । ବିଧିବଦ୍ଧ ଭାବେ ସମସ୍ତ ରାଜନୌତିକ ଦଳର ପ୍ରାର୍ଥୀ ଆଜିଠୁ ପ୍ରଚାର ମଇଦାନକୁ ଓହ୍ଲାଇବେ । ଭୋଟରଙ୍କ ହୃଦୟ ଜିତିବାକୁ ସମସ୍ତ ପ୍ରୟାସ କରିବେ ପ୍ରାର୍ଥୀ । ପ୍ରଚାରରେ ସବୁଠାରୁ ଆଗରେ ରହିଛି ବିଜେଡି । ଦଳୀୟ ପ୍ରାର୍ଥୀ ବର୍ଷା ସିଂ ବରିହାଙ୍କୁ ମଧ୍ୟ ମିଳୁଛି ଅଧିକ ଜନସମର୍ଥନ । ଗତକାଲି ବିଜେଡି, ବିଜେପି, କଂଗ୍ରେସ ଓ ସ୍ବାଧୀନ ପ୍ରାର୍ଥୀ ପ୍ରାର୍ଥିପତ୍ର ଦାଖଲ କରିଥିଲେ । ମୋଟ ୧୩ ଜଣ କରିଥିଲେ ପ୍ରାର୍ଥିପତ୍ର ଦାଖଲ । ବିଜେଡିରୁ ବର୍ଷା ସିଂ ବରିହା, ବିଜେପିରୁ ପ୍ରଦୀପ ପୁରୋହିତ ଏବଂ କଂଗ୍ରେସରୁ ସତ୍ୟଭୂଷଣ ସାହୁ ନାମାଙ୍କନ ଭରିଥିଲେ ।
ଉପକୂଳ ମୁହାଁ ଲଘୁଚାପ, ଦକ୍ଷିଣ ଓଡିଶାରେ ବର୍ଷା ସମ୍ଭାବନା
ଭୁବନେଶ୍ୱର: ଲଘୁଚାପର ରୂପ ନେଲା ଆଣ୍ଡାମାନ ସାଗରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟ । ବର୍ତ୍ତମାନ ଦକ୍ଷିଣ-ପୂର୍ବ ବଙ୍ଗୋପସାଗରରେ କେନ୍ଦ୍ରୀଭୁତ ହୋଇଛି ଲଘୁଚାପ । ଆସନ୍ତା ୪୮ ଘଣ୍ଟା ମଧ୍ୟରେ ଅଧିକ ଘନୀଭୁତ ହୋଇ ଅବପାତର ପରିଣତ ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । ଅବପାତରେ ପରିଣତ ହେବା ପରେ ତାମିଲନାଡୁ-ପୁଡୁଚେରୀ ଏବଂ ଦକ୍ଷିଣ ଆନ୍ଧ୍ରପ୍ରଦେଶ ଉପକୂଳ ମୁହାଁ ହେବ ଲଘୁଚାପ । ଏହାର ପ୍ରଭାବରେ ଆସନ୍ତା ୨୧ ତାରିଖ ସକାଳ ସାଢେ ଆଠଟାରୁ ୨୨ ତାରିଖ ସକାଳ ସାଢେ ଆଠଟା ପର୍ଯ୍ୟନ୍ତ ଦକ୍ଷିଣ ଓଡ଼ିଶାରେ ହାଲୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି ।
ବିଶେଷ କରି ଗଞ୍ଜାମ, ଗଜପତି, ରାୟଗଡା, କନ୍ଧମାଳ, ମାଲକାନଗିରି ଏବଂ କୋରାପୁଟରେ ଘଡିଘଡି ବିଜୁଳି ସହ ବର୍ଷା ନେଇ ସତର୍କତା ଜାରି କରାଯାଇଛି । ବାକି ଓଡ଼ିଶାର ସବୁ ଜିଲ୍ଲାରେ ପାଗ ଶୁଖିଲା ରହିବ । ଆଭ୍ୟନ୍ତରୀଣ ଓଡ଼ିଶାର ଅଧିକାଂଶ ଜିଲ୍ଲାରେ ପାଗ ଶୁଖିଲା ରହିବା ସହ ଶୀତ ବଢିବ । ଆସନ୍ତା ୪ ଦିନ ପର୍ଯ୍ୟନ୍ତ ସ୍ବାଭାବିକ ଠାରୁ ୨ ରୁ ୪ ଡିଗ୍ରୀ ପର୍ଯ୍ୟନ୍ତ ପାରଦ କମିବ । ଆସନ୍ତା ୨୪ ଘଣ୍ଟା ମଧ୍ୟରେ କଳାହାଣ୍ଡି, କନ୍ଧମାଳ, ଗଜପତି ଏବଂ ରାୟଗଡାରେ ସାମାନ୍ୟରୁ ମଧ୍ୟମ ଧରଣର କୁହୁଡି ଅନୁଭୁତ ହେବ ।
ଗତ ୨୪ ଘଣ୍ଟା ମଧ୍ୟରେ ରାଜ୍ୟର ୯ଟି ସ୍ଥାନରେ ତାପମାତ୍ରା ୧୪ ଡିଗ୍ରୀ ତଳେ ରହିଥିଲା । କୋରାପୁଟର ଶିମିଳିଗୁଡାରେ ସର୍ବନିମ୍ନ ୭.୬ ଡିଗ୍ରୀ ତାପମାତ୍ରା ରେକର୍ଡ କରାଯାଇଥିବା ବେଳେ କନ୍ଧମାଳର ଜି.ଉଦୟଗିରିରେ ୮.୨ ଡିଗ୍ରୀ, ଦାରିଙ୍ଗବାଡିରେ ୧୦ ଡିଗ୍ରୀ, କୋରାପୁଟରେ ୧୦.୫ଡିଗ୍ରୀ, ଫୁଲବାଣୀରେ ୧୧ ଡିଗ୍ରୀ, ଭବାନୀପାଟଣାରେ ୧୨ଡିଗ୍ରୀ, ସୁନ୍ଦରଗଡର କିରେଇରେ ୧୨ ଡିଗ୍ରୀ, ସମ୍ବଲପୁରର ଚିପିଲିମାରେ ୧୩.୨ ଡିଗ୍ରୀ ଏବଂ ଝାରସୁଗୁଡାରେ ୧୩.୬ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି ।
ପ୍ରଜାପିତା ବ୍ରହ୍ମକୁମାରୀ ଈଶ୍ୱରୀୟ ବିଶ୍ବବିଦ୍ୟାଳୟରେ ଜାତୀୟ ସାମ୍ବାଦିକତା ଦିବସ ପାଳିତ
ଭୁବନେଶ୍ୱର: ଜାତୀୟ ସାମ୍ବାଦିକତା ଦିବସ ପାଳନ ଅବସରରେ ଭୁବନେଶ୍ୱର ପଟିଆ ପ୍ରଜାପିତା ବ୍ରହ୍ମକୁମାରୀ ଈଶ୍ୱରୀୟ ବିଶ୍ବବିଦ୍ୟାଳୟରେ ଆଜି ଏକ ସେମିନାର ଅନୁଷ୍ଠିତ ହୋଇଯାଇଛି । ଏହାର ଶିର୍ଷକ ଥିଲା ସିଚୁଏସନ ବେସ୍ଡ ଜର୍ଣ୍ଣାଲିଜିମ ଟୁଆର୍ଡସ ପ୍ରସ୍ପରିୟସ ଇଣ୍ଡିଆ । କାର୍ଯ୍ୟକ୍ରମରେ ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟର ଆଇଟି ଓ୍ବିଇଙ୍ଗ ମୁଖ୍ୟାଳୟ ସଂଯୋଜିକା ବ୍ରହ୍ମକୁମାରୀ ସବିତା ଦିଦି ଯୋଗଦେଇଥିଲେ ।
କାର୍ଯ୍ୟକ୍ରମରେ ନନ୍ଦିଘୋଷ ଟିଭିର ସମ୍ପାଦକ ଶିଶିର କୁମାର ଭଟ୍ଟମିଶ୍ର ସାମିଲ ହୋଇ, ସମୃଦ୍ଧ ଭାରତ ଗଠନରେ ଗଣମାଧ୍ୟମର ଭୂମିକା ବେଶ ଗୁରୁତ୍ବପୂର୍ଣ ବୋଲି କହିଥିଲେ । ଗଣମାଧ୍ୟମ ବିଭିନ୍ନ ସମୟରେ ନୂଆ ନୂଆ ରୂପ ନେଇ ଆସିଥାଏ ଏବଂ ଏହାର କାମ ହେଲା ସମାଜର ମଙ୍ଗଳ କରିବା । ତେବେ ପ୍ରତ୍ୟେକ ବର୍ଗଙ୍କୁ ସମାନସ୍ତରକୁ ଆଣି ସାମାଜିକବୋଧ ସୃଷ୍ଟି ଦ୍ବାରା ହିଁ ସମୃଦ୍ଧ ଭାରତର ସ୍ବପ୍ନ ଦେଖାଯାଇପାରେ ବୋଲି କହିଥିଲେ । କାର୍ଯ୍ୟକ୍ରମରେ ଅନ୍ୟ ବରିଷ୍ଠ ସାମ୍ବାଦିକମାନେ ମଧ୍ୟ ଯୋଗଦେଇ ନିଜ ନିଜର ମତ ରଖିଥିଲେ ।
ମୁଖ୍ୟମନ୍ତ୍ରୀଙ୍କୁ ଭେଟି ନିମନ୍ତ୍ରଣ କାର୍ଡ ଦେଲେ ଶେଷ କିଷାନ୍
ଭୁବନେଶ୍ୱର: ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଲେ ଯୁବ ବୈଜ୍ଞାନିକ ଶେଷ କିଷାନ । ବିବାହ ଭୋଜି ପାଇଁ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରିଛନ୍ତି ଶେଷ । ଆସନ୍ତା ୨୨ ତାରିଖରେ ସମ୍ବଲପୁର ଜିଲ୍ଲା ବଲାସିଂଘା ଗାଁରେ ବୈଦିକ ରୀତିନୀତିରେ ଶେଷଙ୍କ ବିବାହ କାର୍ଯ୍ୟ ଅନୁଷ୍ଠିତ ହେବ । ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଦେଇଛନ୍ତି ନିମନ୍ତ୍ରଣ ପତ୍ର ।
ପିଲାଟି ଦିନରୁ ବହୁ ସଂଷର୍ଷ ପରେ ଶେଷ କିଷାନ ସଫଳାତାର ସ୍ୱାଦ ଚାଖିଥିଲେ । ଏକ ଅଭାବ ପରିବାରରୁ ବୈଜ୍ଞାନିକ ହୋଇପାରିଛନ୍ତି ଶେଷ କିଷାନ । ସେ ଏବେ ଜର୍ମାନରେ ବୈଜ୍ଞାନିକ ଭାବେ କାର୍ଯ୍ୟରତ ଅଛନ୍ତି । କିଛି ଦିନ ତଳେ ବାନ୍ଧବୀଙ୍କ ସହ କୋର୍ଟରେ ମ୍ୟାରେଜ କରିଥିଲେ । ମୁଖ୍ୟମନ୍ତ୍ରୀଙ୍କ ସହାୟତାରେ ଗରିବ ଘରର ଶେଷ କିଷାନ ପାଠ ପଢି ବୈଜ୍ଞାନିକ ହୋଇଛନ୍ତି ।
ସରୁଛି ୧୦ ଦିନର ବାଲିଯାତ୍ରା, ଜମୁଛି ଭିଡ଼
କଟକ: ଶେଷ ଦିନରେ କଟକ ବାଲିଯାତ୍ରା । ଦଶ ଦିନର ଐତିହାସିକ ବାଲିଯାତ୍ରାକୁ ନେଇ ଏଥର ସବୁଠି ଚର୍ଚ୍ଚା । ଦୁଇବର୍ଷ ପରେ ଯାତ୍ରା ହୋଇଥିବାରୁ ପ୍ରତି ସଂଧ୍ୟାରେ ଲକ୍ଷାଧିକ ଲୋକଙ୍କ ସମାଗମ ହୋଇଥିଲା । ତେବେ ପଡିଆକୁ ସଫାସୁତୁରା କରିବା ଥିଲା ଚ୍ୟାଲେଞ୍ଜ । ଏଥିରେ ପ୍ରମୁଖ ଭୁମିକା ନେଇଥିଲେ ଛାତ୍ରଛାତ୍ରୀ, ସ୍କାଉଟ୍ ଓ ଗାଇଡ୍, ସିଏମସି ସଫେଇ କର୍ମଚାରୀ ଏବଂ ସ୍ବେଚ୍ଛାସେବୀ ସଂଗଠନ । ଯାତ୍ରାରେ ଚଳିତବର୍ଷ ସମସ୍ତଙ୍କ ଧ୍ୟାନ ଆକର୍ଷଣ କରିଥିଲେ କେନ୍ଦୁଝର ସ୍ବୟଂ ସହାୟକ ଗୋଷ୍ଠୀ ଦ୍ବାରା ପ୍ରସ୍ତୁତ ଝୋଟ ତିଆରି ସାମଗ୍ରୀ ।ସମସ୍ତଙ୍କ ମିଳିତ ସହଯୋଗରେ ଚଳିତବର୍ଷ ଆକର୍ଷଣୀୟ ହୋଇଛି କଟକ ଐତିହାସିକ ବାଲିଯାତ୍ରା ।
ଦୁଇବର୍ଷ ପରେ ଯାତ୍ରା ହୋଇଥିବାରୁ ସବୁଦିନ ଦେଖିବାକୁ ମିଳିଛି ଲକ୍ଷାଧିକ ଲୋକଙ୍କ ସମାଗମ । ତେବେ ଯାତ୍ରା ପଡ଼ିଆକୁ ସଫାସୁତରା କରିବା ଥିଲା ବଡ଼ ଚ୍ୟାଲେଞ୍ଜ । ଯାହାକୁ କୁନିକୁନି ଛାତ୍ରଛାତ୍ରୀ, ସ୍କାଉଟ ଓ ଗାଇଡ୍, ସିଏମସି ସଫେଇ କର୍ମଚାରୀ ଓ ସ୍ବଚ୍ଛାସେବୀ ସଂଗଠନ ସୂଚାର ରୂପେ ସମ୍ପାଦନ କରି ସମସ୍ତଙ୍କ ପ୍ରଶଂସା ସାଉଁଟିଛନ୍ତି ।
ଚଳିତବର୍ଷର ଯାତ୍ରାରେ ସମସ୍ତଙ୍କ ଧ୍ୟାନ ଆକର୍ଷଣ କରିଥିଲା ଓରମାସ ଷ୍ଟଲ । ଜାତୀୟ ସ୍ତରୀୟ ପଳିଶ୍ରୀ ମେଳାରେ କେନ୍ଦୁଝର ହାଟଡିହି ବ୍ଲକ ମରେଇଗାଁ ସତ୍ୟସାଇ ସ୍ବୟଂ ସହାୟକ ଗୋଷ୍ଠୀ ପ୍ରଥମ ଥର ପାଇଁ ମେଳାରେ ସାମିଲ ହୋଇଥିଲେ । ସେମାନଙ୍କ ଝୋଟ ତିଆରି ଆସନ, ବେଡ୍ସିଟ, ମ୍ୟାଟ୍, ଘରସଜ୍ଜା ଜିନିଷକୁ ଲୋକେ ପସନ୍ଦ କରିଥିଲେ । ସବୁଠାରୁ ବଡ଼କଥା ହେଲା ତାଲପଟା, ବାଉଁସ ଓ ଶାଳ କାଠରେ ଦଉଡ଼ି ଲଗାଇ ଷ୍ଟଲରେ ସମସ୍ତଙ୍କ ସାମ୍ନାରେ ତିଆରି କରୁଛନ୍ତି ଏସବୁ ସାମଗ୍ରୀ । ଏହି ଝୋଟ ସାମଗ୍ରୀ ବେଶ୍ ସୁନ୍ଦର ଓ ମଜବୁତ୍ ଓ ପକେଟରୁ ସୁହାଇଥିବାରୁ ବିକ୍ରିବଟା ମଧ୍ୟ ଭଲ ହୋଇଛି ।
ସରିଲା ପ୍ରାର୍ଥୀପତ୍ର ଦାଖଲ, ଭୋଟ ଉପରେ ନଜର
ବରଗଡ଼: ପଦମପୁର ଉପନିର୍ବାଚନ ପାଇଁ ସରିଛି ପ୍ରାର୍ଥୀପତ୍ର ଦାଖଲ । ଉପନିର୍ବାଚନକୁ ଅବାଧ ଓ ନିରପେକ୍ଷ କରିବା ପାଇଁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ଏନେଇ ସୂଚନା ଦେଇଛନ୍ତି ବରଗଡ଼ ଜିଲ୍ଲାପାଳ ମନୀଷା ବାନାର୍ଜୀ । ପଦମପୁର ନିର୍ବାଚନମଣ୍ଡଳୀରେ ରହିବ ମୋଟ 319 ବୁଥ୍ ।
ସେଥି ମଧ୍ୟରୁ 74 ଅତି ସମ୍ବେଦନଶୀଳ ଓ 52ଟି ସମ୍ବେଦନଶୀଳ । 3ଟି ବ୍ଲକରେ 6ଟି ପିଙ୍କ୍ ବୁଥ ଓ 10ଟି ମଡେଲ ବୁଥ ରହିବ । ମାଓ ଉପଦ୍ରୁତ ଅଞ୍ଚଳ ପାଇଁ 21 ତାରିଖରେ ଆହୁରି ଅର୍ଦ୍ଧ- ସାମରିକ ବାହିନୀ ମୁତୟନ କରାଯିବ ବୋଲି ବରଗଡ଼ ଜିଲ୍ଲାପାଳ ମନୀଷା ବାନାର୍ଜୀ ସୂଚନା ଦେଇଛନ୍ତି ।
ଉପ-ନିର୍ବାଚନକୁ ସୁରିଖୁରୁରେ ଶେଷ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି । ବୁଥ ଗୁଡିକରେ କିପରି ମତଦାତା ଶାନ୍ତି ଶୃଙ୍ଖଳାର ସହ ମତ ସାବସ୍ତ୍ୟ କରିପାରିବେ ସେନେଇ ସୁରକ୍ଷା ବ୍ୟବସ୍ଥା କଡାକଡି କରାଯିବ ।