କୋଲକାତା: ୧୩.୨୫ କୋଟି ଟଙ୍କାର ବ୍ୟାଟ୍ସମ୍ୟାନ୍ ହାରି ବ୍ରୁକଙ୍କ ଶତକୀୟ ଇନିଂସ ବଳରେ ସନରାଇଜର୍ସ ହାଇଦ୍ରାବାଦ୍ କୋଲକାତା ବିପକ୍ଷ ମ୍ୟାଚକୁ ୨୩ ରନରେ ଜିତିନେଇଛି । ନିଜ ଘରୋଇ ମାଟି ଇଡେନ ଗାଡେନରେ ପରାସ୍ତ ହୋଇଛି କୋଲକାତା ନାଇଟ୍ ରାଇଡର୍ସ । ସନରାଇଜର୍ସ ହାଇଦ୍ରାବାଦ୍ ଲଗାତାର ଦ୍ୱିତୀୟ ମ୍ୟାଚରେ ବିଜୟୀ ହୋଇଛି । ପଏଣ୍ଟ ଟେବୁଲରେ ଏବେ ୭ମ ସ୍ଥାନରେ ରହିଛି ହାଇଦ୍ରାବାଦ । ଇଡେନ ଗାର୍ଡେନ ଷ୍ଟାଡିୟମରେ ଆଜି କୋଲକାତା ଅଧିନାୟକ ନୀତିଶ ରାଣା ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲେ ।
ଟସ୍ ହାରି ହାଇଦ୍ରାବାଦ୍ ପ୍ରଥମେ ବ୍ୟାଟିଂ କରି ୨୦ ଓଭରରେ ୪ ୱିକେଟ୍ ହରାଇ ୨୨୮ ରନ୍ କରି ସିଜିନର ସବୁଠୁ ବଡ଼ ସ୍କୋର କରିଥିଲା । ଜବାବରେ କୋଲକାତା ୨୦ ଓଭରରେ ୭ ୱିକେଟ ହରାଇ ୨୦୫ ରନରେ ସୀମିତ ରହିଥିଲା । ହାଇଦ୍ରାବାଦର ପ୍ରାରମ୍ଭିକ ବ୍ୟାଟ୍ସମ୍ୟାନ୍ ହାରି ବ୍ରୁକ ଆଜି ଅପରାଜିତ ରହି ୫୫ ଟି ବଲରେ ୧୦୦ରନର ବିସ୍ଫୋରକ ଇନିଂସ ଖେଳିଥିଲେ । ତାଙ୍କ ବ୍ୟତୀତ ଅଧିନାୟକ ମାକ୍ରମ ୨୬ ଟି ବଲରେ ୫୦ ରନ୍ ଏବଂ ଅଭିଶେକ ଶର୍ମା ୧୭ ଟି ବଲରେ ୩୨ ରନ୍ କରିଥିଲେ ।
କୋଲକାତା ପକ୍ଷରୁ ଆନ୍ଦ୍ରେ ରସେଲ ସର୍ବାଧିକ ୩ ଟି ୱିକେଟ୍ ଅକ୍ତିଆର କରିଥିବା ବେଳେ ବରୁଣ ଚକ୍ରବର୍ତ୍ତୀ ଗୋଟେ ୱିକେଟ୍ ହାସଲ କରିଥିଲେ ।୨୨୯ରନ ବିଜୟ ଲକ୍ଷକୁ ପିଛା କରି କୋଲକାତା ପକ୍ଷରୁ ଗୁରବାଜ ଏବଂ ଜଗଦୀଶନ ପଡ଼ିଆକୁ ଓହ୍ଲାଇଥିଲେ । ଗୁରବାଜ ଶୂନ ରନ୍ କରି ପାଭେଲିଅନ୍ ଫେରିଯାଇଥିଲେ । ଜଗଦୀଶନ ୨୧ ଟି ବଲ୍ ଖେଳି ୩୬ ରନ୍ କରି ଆଉଟ୍ ହୋଇଯାଇଥିଲେ । ଭେଙ୍କଟେସ୍ ଆୟର ୧୦ ରନ୍ କରିଥିବା ବେଳେ ସୁନୀଲ ନାରିନ ଖାତା ନଖୋଲି ପାରି ପାଭେଲିଅନ୍ ଫେରିଯାଇଥିଲେ ।
ଅଧିନାୟକ ନୀତିଶ ରାଣା ଭଲ ଇନିଂସ ଆଜି ଖେଳିଥିଲେ । ୪୧ ଟି ବଲରେ ୭୫ ରନ୍ କରିଥିଲେ । ଆନ୍ଦ୍ରେ ରସେଲ ଆଜି ଭଲ ପ୍ରଦର୍ଶନ କରିବାରେ ବିଫଳ ହୋଇଥଇଲେ । ମାତ୍ର ୩ ରନ୍ କରି ପାଭେଲିଅନ୍ ଫେରିଯାଇଥିଲେ । ରିଙ୍କୁ ସିଂ ମଧ୍ୟ ଆଜି ଚମତ୍କାର ପ୍ରଦର୍ଶନ କରିଥିଲେ । ୩୧ ଟି ବଲ୍ ଖେଳି ୫୮ ରନର ଅପରାଜିତ ଇନିଂସ ଖେଳିଥିଲେ ।
ହେଲେ ତାଙ୍କର ଏହି ପ୍ରଦର୍ଶନ ଦଳକୁ ବିଜୟୀ କରାଇପାରିନଥିଲା । ଦଳ ନିର୍ଦ୍ଧାରିତ ୨୦ ଓଭରରେ ୭ ୱିକେଟ୍ ବିନିୟମରେ ୨୦୫ ରନ୍ କରିବାକୁ ସକ୍ଷମ ହୋଇଥିଲା । ଏଥିସହିତ ୨୩ ରନରେ ପରାଜିତ ହୋଇଥିଲା । ହାଇଦ୍ରାବାଦ ପକ୍ଷରୁ ମାର୍କୋ ଜାନେସନ ଓ ମୟଙ୍କ ଅଗ୍ରୱାଲ ୨ଟି ଲେଖାଏଁ ୱିକେଟ୍ ଅକ୍ତିଆର୍ କରିଥିଲେ । କୋଲତାକା ଆଜିର ମ୍ୟାଚ୍ ହାରିଥିଲେ ମଧ୍ୟ ପଏଣ୍ଟ ଟେବୁଲର ଚତୁର୍ଥ ସ୍ଥାନରେ ରହିଛି ।
