spot_img
Home Blog Page 3210

ବିଶ୍ବ ଶୁଣିବ ଓଡ଼ିଶା ସମବାୟ ସଫଳତାର ଗାଥା: ବେଲଜିୟମରେ ଅନ୍ତର୍ଜାତୀୟ ସମବାୟ ଶିଖର ସମ୍ମିଳନୀ

ଭୁବନେଶ୍ୱର : ବିଶ୍ବ ଶୁଣିବ ଓଡ଼ିଶା ସମବାୟ ସଫଳତାର ଗାଥା । ଆଜି ବେଲଜିୟମରେ ଅନୁଷ୍ଠିତ ହେଉଛି ଅନ୍ତର୍ଜାତୀୟ ସମବାୟ ଶିଖର ସମ୍ମିଳନୀରେ । ଏଥିରେ ଯୋଗଦେଉଛନ୍ତି ସମବାୟ ମନ୍ତ୍ରୀଙ୍କ ନେତୃତ୍ବରେ ଏକ ଉଚ୍ଚସ୍ତରୀୟ ଟିମ୍ । ନବୀନ ସରକାରରେ ସମବାୟ ସଂସ୍ଥା ଉପରେ ରହିଛି ଫୋକସ୍ ।

ରାଜ୍ୟର ସମସ୍ତ ୨୪୯୫ ପ୍ୟାକ୍ସ ଓ ୨୧୫ ଲ୍ୟାମ୍ପସକୁ କରାଯାଇଛି ଡିଜିଟାଇଜ୍। ଭିତ୍ତିଭୂମି ପାଇଁ ପ୍ରତି ସମବାୟ ସମିତିକୁ ଦିଆଯାଉଛି ୨୫ଲକ୍ଷ ଟଙ୍କା । ଚାଷୀଙ୍କୁ ବିନା ସୁଧରେ ଋଣ ପରିମାଣ ୫୦ହଜାରରୁ ଲକ୍ଷେ ଟଙ୍କାକୁ ବୃଦ୍ଧି କରାଯାଇଛି ।

୧୩ଶହ ନୂଆ ପ୍ୟାକ୍ସ ଗଢ଼ାଯାଇ ସମବାୟକୁ ଅଧିକ କରାଯାଉଛି ଲୋକାଭିମୁଖୀ । ଓଡ଼ିଶାରେ ସମବାୟର ଏହି ସଫଳତା କଥା ଅନ୍ତଜାର୍ତୀୟ ଫୋରମରେ ଉଠିବ । ସମବାୟ ବ୍ୟାଙ୍କ ସଶକ୍ତ ଓ ଶକ୍ତିଶାଳୀ ହେଲେ ଚାଷୀ ଓ ନିମ୍ନ ମଧ୍ୟବିତ୍ତ ପରିବାରଙ୍କ ଆର୍ଥିକ କାରବାର ସହଜ ହେବ । ଜାତୀୟକରଣ ବ୍ୟାଙ୍କ ଭଳି ସମବାୟ ବ୍ୟାଙ୍କ ସବୁ ପ୍ରକାର ଗ୍ରାହକଙ୍କୁ ସବୁ ପ୍ରକାର ସେବା ଯୋଗାଇପାରିବ ।

ଶ୍ରାବଣର ପ୍ରଥମ ସୋମବାରରେ ଚଳଚଞ୍ଚଳ ଶୈବପୀଠ

ଭୁବନେଶ୍ୱର : ଆଜି ଶ୍ରାବଣ ମାସର ପ୍ରଥମ ସୋମବାର । ଚଳଚଞ୍ଚଳ ରାଜ୍ୟର ସମସ୍ତ ଶୈବ ପୀଠ । ଦେବଦେବ ମହାଦେବଙ୍କ ଉପରେ ପାଣି ଢାଳି ଶୁଭ ମନାସୁଛନ୍ତି କାଉଡ଼ିଆ । ଗତକାଲି ବିଭିନ୍ନ ନଦୀରୁ ପାଣି ଉଠାଇ କାଉଡ଼ିଆମାନେ ଶିବ ମନ୍ଦିର ଯାତ୍ରା କରିଥିଲେ । ଭୁବନେଶ୍ବରର ଲିଙ୍ଗରାଜ, ପୁରୀର ଲୋକନାଥ, ନୟାଗଡର ଲଡୁବାବା, ଢେଙ୍କାନାଳର କପିଳାଶ ମନ୍ଦିରରେ ପାଣି ଢାଳୁଛନ୍ତି ଭକ୍ତ ।

ମନସ୍କାମନା ପୂରଣ ଲାଗି ଜଳାଭିଷେକ କରୁଛନ୍ତି ଶ୍ରଦ୍ଧାଳୁ । ଚଳିତବର୍ଷ ଯୋଡ଼ା ଶ୍ରାବଣ ପଡୁଥିବାବେଳେ ଜୁଲାଇ ମାସରେ ଆଜି ଓ ୧୭ ତାରିଖ ଦିନ ଜଳଲାଗି କରାଯିବ । ସେହିପରି ଅଗଷ୍ଟ ମାସର ଶେଷକୁ ଦୁଇଟି ସୋମବାର ୨୧ ତାରିଖ ଓ ୨୮ ତାରିଖ ଦିନ ମଧ୍ୟ ଜଳଲାଗିର ବ୍ୟବସ୍ଥା ରହିଛି । କାଉଡ଼ିଆଙ୍କର ସୁରକ୍ଷା, ଟ୍ରାଫିକ ବ୍ୟବସ୍ଥା, ଅପ୍ରୀତିକର ପରିସ୍ଥିତିକୁ ରୋକିବା ଲାଗି କମିଶନରେଟ ପୋଲିସ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।

ରାଜଧାନୀରେ କାଉଡ଼ିଆ ଯିବା ଆସିବା ବାଟରେ ୧୨ ଟି ମୋବାଇଲ ପେଟ୍ରୋଲିଂ ଟିମ, ୧୩ ଟି ପିସିଆର ରହିଛି । ଛକ ମାନଙ୍କରେ ଫାଷ୍ଟ ଏଡ ଓ ମୋବାଇଲ ମେଡିକାଲ ୟୁନିଟ ରଖାଯାଇଛି । ଜଳ ଉଠାଇବା ସ୍ଥାନ ବା ବିଭିନ୍ନ ନଦୀ ପଠାରେ ଓଡ୍ରାଫ ଓ ଫାୟାର ଫାଇଟିଂ ୟୁନିଟ ନିୟୋଜିତ ହୋଇଛନ୍ତି । ସମସ୍ତ ସୁରକ୍ଷା ବ୍ୟବସ୍ଥାର ତଦାରଖ ପାଇଁ ଜଣେ ଅତିରିକ୍ତ ଡିସିପିଙ୍କ ଅଧୀନରେ ପାଞ୍ଚ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି ।

ପଶ୍ଚିମବଙ୍ଗ ପଞ୍ଚାୟତ ନିର୍ବାଚନ ପାଇଁ ପୁନଃମତଦାନ, ୬୯୬ ବୁଥରେ ସାନି ଭୋଟିଂ

ପଶ୍ଚିମବଙ୍ଗ : ପଶ୍ଚିମବଙ୍ଗରେ ପୁଣି ଥରେ ପଞ୍ଚାୟତ ନିର୍ବାଚନ ହେବ । ୬୯୬ ବୁଥ୍‌ରେ ସାନି ମତଦାନ ହେବ । ପଞ୍ଚାୟତ ନିର୍ବାଚନ ବେଳେ ପଶ୍ଚିମବଙ୍ଗରେ ବ୍ୟାପକ ହିଂସା ଓ ବୁଥ କବ୍‌ଜା ପରେ ଏହି ଘୋଷଣା କରିଛନ୍ତି ରାଜ୍ୟ ନିର୍ବାଚନ କମିଶନ । ଆଜି ସକାଳ ୭ଟାରୁ ଆରମ୍ଭ ହୋଇଛି ମତଦାନ । ସଂଧ୍ୟା ୫ଟା ଭିତରେ ଲୋକେ ମତଦାନ କେନ୍ଦ୍ରକୁ ଆସି ପୁନଃ ମତଦାନ କରିବେ ।

ମୁର୍ଶୀଦାବାଦ୍‌ର ୧୭୫ଟି ବୁଥ୍‌ରେ, ମାଲଦାର ୧୧୨ ବୁଥ୍‌ରେ, ନଦୀଆର ୮୯ ବୁଥ୍‌ରେ, ଉତ୍ତର ୨୪ ପ୍ରଗଣାର ୪୬ ବୁଥ୍‌ରେ, ଦକ୍ଷିଣ ୨୪ ପ୍ରଗଣାର ୩୬ ବୁଥ୍‌ରେ, ପୂର୍ବମେଦିନୀପୁରର ୩୧ ବୁଥ୍‌ରେ, ହୁଗୁଳିର ୨୯ ବୁଥ୍‌ରେ, ଦକ୍ଷିଣ ଦିନାଜପୁରର ୧୮ ବୁଥ୍‌ରେ, ଜାଲପାଇଗୁରୀର ୧୪ ବୁଥ୍‌ରେ, ବୀରଭୂମୀର ୧୪ ବୁଥ୍‌ରେ, ପଶ୍ଚିମ ମେଦିନାପୁରର ୧୦ ବୁଥ୍‌ରେ, ବାଙ୍ଗରାର ୮ ବୁଥ୍‌ରେ, ହାୱଡ଼ାର ୮ ବୁଥ୍‌ରେ, ପଶ୍ଚିମ ବର୍ଦ୍ଧମାନର ୬ ବୁଥ୍‌ରେ, ପୁରୁଲିର ୪ ବୁଥ୍‌ରେ, ପୂର୍ବ ବର୍ଦ୍ଧମାନର ୩ ବୁଥ୍‌ରେ ଓ ଆଲିପୁରଦୁଆରର ଗୋଟିଏ ବୁଥ୍‌ରେ ସାନି ମତଦାନ ହେବ ।

ସେପଟେ ପଶ୍ଚିମବଙ୍ଗରେ ନିର୍ବାଚନ ସରିଥିଲେ ବି ଥମୁନି ହିଂସା । ହିଂସାରେ ଏପର୍ଯ୍ୟନ୍ତ ଗଲାଣି ୧୯ ଜଣଙ୍କ ଜୀବନ । ଶନିବାର ମତଦାନ ହୋଇଥିବା ବେଳେ, ବିଭିନ୍ନ ସ୍ଥାନରେ ହିଂସା ଓ ବୋମାମାଡ଼ ହୋଇଥିଲା । ଯେଉଁଥିରେ ୧୯ ଜଣଙ୍କ ମୃତ୍ୟୁ ହୋଇଛି । ବିଭିନ୍ନ ରାଜନୈତିକ ଦଳ ମଧ୍ୟରେ ଗଣ୍ଡଗୋଳ ହୋଇଛି । ବୁଥରେ ଭଙ୍ଗାରୁଜା କରିବା ସହ ବୋମାମାଡ଼ କରିଥିଲେ ଦୁର୍ବୃତ୍ତ ।

ମଞ୍ଚେଶ୍ବରରେ ମେଡିସିନ ଗୋଦାମରେ ଭୟାବହ ଅଗ୍ନିକାଣ୍ଡ , ଜଳିଗଲା ଲକ୍ଷାଧିକ ଟଙ୍କାର ଔଷଧ

ଭୁବନେଶ୍ୱର : ଭୁବନେଶ୍ୱର ମଞ୍ଚେଶ୍ୱରରେ ମେଡ଼ିସିନ ଗୋଦାମରେ ନିଆଁ ଲାଗି ଜଳିଗଲା ଲକ୍ଷାଧିକ ଟଙ୍କାର ମେଡ଼ିସିନ ସାମଗ୍ରୀ । ଗୋଦାମରେ କୋଭିଡ ପାଇଁ ଷ୍ଟକ ଥିବା ସାନିଟାଇଜର, ମାସ୍କ, ସ୍ପିରିଟ, ଅକ୍ସିଜେନ ସିଲିଣ୍ଡର ଗ୍ୟାସ ଟାଙ୍କି ସମ୍ପୂର୍ଣ ପୋଡି ନଷ୍ଟ ହୋଇଯାଇଛି । ପ୍ରାୟ ୫୦ ଲକ୍ଷ ଟଙ୍କାର ସାମଗ୍ରୀ ନଷ୍ଟ ହୋଇଥିବାର ଅନୁମାନ କରାଯାଉଛି । ରାତି ପ୍ରାୟ ୧୦.୪୫ ରୁ ୧୧ଟା ଭିତରେ ନିଆଁ ଲାଗିଥିବା ଜଣାପଡିଛି ।

ନିଆଁର ବେଗ ଏତେ ପ୍ରଖର ଥିଲା କି ଅଗ୍ନିଶମ ବାହିନୀଙ୍କୁ ନିଆଁ ଆୟତ୍ତ କରିବାକୁ ଦୀର୍ଘ ସମୟ ଲାଗିଥିଲା । ପାଣିମାଡ଼ ପରେ ନିଆଁ ଆୟତ୍ତ ନ ହେବାରୁ ଏକ ହାଇଡ୍ରା ଓ ଆଉ ଗୋଟେ ଜେସିବି ସାହାଯ୍ୟରେ ଗୋଦାମର ଏକ ପାର୍ଶ୍ଵକୁ ଭଙ୍ଗା ଯାଇ ପାଣି ମାଡ଼ କରାଯାଇ ନିଆଁକୁ ଆୟତ୍ତ କରାଯାଇଥିଲା । ପ୍ରାୟ ୫ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ଗୋଦାମରୁ ନିଆଁ ଲିଭାଯାଇ ଆୟତ୍ତ କରାଯାଇଥିଲା ।

ଅଗ୍ନିଶମ ବିଭାଗ ଓ କମିଶନରେଟ ପୋଲିସ ସହଯୋଗରେ ଏହି କାର୍ଯ୍ୟ ସଫଳ ହୋଇଥିଲା । ଯାହା ଫଳରେ ଅନ୍ୟ ଗୋଦାମ କୁ ନିଆଁ ଲାଗିବା ସମ୍ଭବ ହୋଇନଥିଲା । ଏହା ସହିତ ଆକ୍ସିଜେନ ସିଲିଣ୍ଡର ଖାଲି ଥିବାରୁ ଏକ ବଡ଼ ଦୁର୍ଘଟଣାରୁ ମଧ୍ୟ ବର୍ତ୍ତୀ ଯାଇଛି । ଗୋଦାମରେ ଅକ୍ସିଜେନ ଗ୍ୟାସ ସିଲିଣ୍ଡର ଥିବା କାରଣରୁ ସ୍ଥାନୀୟ ଲୋକଙ୍କୁ ଗୋଦାମ ପାଖରୁ ଦୂରେଇ ରାଯାଇଥିଲା ।

ଉତ୍ତର ଭାରତରେ ଜଳ ପ୍ରଳୟ; ଦିଲ୍ଲୀରେ ରେକର୍ଡ ବର୍ଷା, ପଞ୍ଜାବରେ ସ୍ଥିତି ଅସମ୍ଭାଳ, ହିମାଚଳ ସ୍ଥିତି ସଙ୍ଗୀନ

ନୂଆଦିଲ୍ଲୀ: ବର୍ଷୁଛି ମୌସୁମୀ, ଭାସୁଛି ସହର । ଉତ୍ତର ଭାରତରେ ବନ୍ୟା । ରାସ୍ତାରେ ଚାଲୁଛି ଡଙ୍ଗା । ପାଣି ଭିତରେ ବନ୍ଦ ପଡିଛି କାର, ଟ୍ରକ୍‌ । ଦିଲ୍ଲୀ, ହିମାଚଳ ପ୍ରଦେଶ, ପଞ୍ଜାବରେ ପ୍ରବଳ ବର୍ଷା । ଦିଲ୍ଲୀରେ ୪୧ ବର୍ଷର ରେକର୍ଡ ଭାଙ୍ଗିଲା ଏଥରର ବର୍ଷା । ୧୯୮୨ ପରେ ପ୍ରଥମ ଥର ପାଇଁ ଜୁଲାଇ ମାସରେ ଗୋଟିଏ ଦିନରେ ୧୫୩ ମିଲି ମିଟରରୁ ଅଧିକ ବର୍ଷା ହୋଇଛି । ପ୍ରବଳ ବର୍ଷା ଯୋଗୁଁ ଜାମ୍ମୁ କାଶ୍ମୀର, ହିମାଚଳ ଓ ୟୁପିରେ ନଦୀର ଜଳସ୍ତର ବଢିବାରେ ଲାଗିଛି । ଏହି ସବୁ ରାଜ୍ୟରେ ୧୩ରୁ ଅଧିକ ଲୋକଙ୍କ ବନ୍ୟା ପାଣିରେ ଭାସିଯାଇ ମୃତ୍ୟୁ ହୋଇଛି ।

ହିମାଚଳ ପ୍ରଦେଶରେ ସବୁଠୁ ଅଧିକ କ୍ଷତି ଦେଖିବାକୁ ମିଳିଛି । ପ୍ରବଳ ବର୍ଷା ଯୋଗୁଁ ବ୍ୟାସ ନଦୀର ଜଳସ୍ତର ବଢିବା ସହ ଜନବସତି ଆଡକୁ ମାଡି ଆସିଛି ବନ୍ୟା ଜଳ । ଲୋକଙ୍କ ଘରେ ମଧ୍ୟ ପାଣିପଶି ଛାରଖାର ହୋଇଯାଇଛି । ଉଚ୍ଚସ୍ଥାନରେ ଥିବା ଲୋକଙ୍କ ଘର ମଧ୍ୟ ବନ୍ୟା ଜଳରୁ ସୁରକ୍ଷିତ ନାହାନ୍ତି । ଘରୁ ବାହାରିବାକୁ ହେଲେ ପହଁରି ପହଁରି ଯିବାକୁ ପଡୁଛି । ବନ୍ୟାପାଣି ପ୍ରଖର ଗତିରେ ମାଡିବା ଯୋଗୁଁ ଚଣ୍ଡିଗଡ଼-ମନାଲି ଜାତୀୟ ରାଜପଥର ଏକ ଅଂଶ ଧୋଇ ହୋଇଯାଇଛି । ହଠାତ୍ ନଦୀର ପାଣି ପଶି ଆସିବାରୁ ଆଖପାଖରେ ଥିବା କାର, ଦୋକାନ ଏବଂ ଏଟିଏମ୍ ବୁଥ୍ ଭାସିଯାଇଥିବା ଦେଖିବାକୁ ମିଳିଛି ।

ଫଶିରହିଥିବା ଲୋକଙ୍କୁ ଉଦ୍ଧାର ପାଇଁ ଏନଡିଆରଏଫ ଟିମ୍‌ ବନ୍ୟାଞ୍ଚଳରେ ପହଞ୍ଚିଛନ୍ତି । ଲୋକଙ୍କୁ ଉଦ୍ଧାର କରୁଛନ୍ତି । ସୁରକ୍ଷିତ ସ୍ଥାନକୁ ନେବା ସହ ସେମାନଙ୍କ ଖାଦ୍ୟ ଓ ପାନୀୟର ବ୍ୟବସ୍ଥା କରୁଛନ୍ତି । କିଛି ସ୍ଥାନରେ ବନ୍ୟା ଜଳ ଏତେ ପ୍ରଖର ଯେ ସେ ଅଞ୍ଚଳକୁ ଯିବା ଆସିବା ସମ୍ପୂର୍ଣ୍ଣ ବନ୍ଦ ରହିଛି । ଫଶି ରହିଥିବା ଲୋକଙ୍କୁ ନିଜ ନିଜକୁ ସୁରକ୍ଷିତ ରଖିବା ପାଇଁ ଅପିଲ କରାଯାଇଛି । କୁଲୁ ମନାଲିରେ ମଧ୍ୟ ସ୍ଥିତି ଅତି ଭୟଙ୍କର ହୋଇଛି । ଗତରାତିରେ ବନ୍ୟା ପାଣି ମାଡି ମାସିବାରୁ ଅନେକ ସ୍ଥାନ ଏବେ ନଦୀର ଭ୍ରମ ସୃଷ୍ଟି କରିଛି ।

ମନାଲୀରେ ପାର୍କ ହୋଇଥିବା କାର ଗୁଡିକ ଭାସୁ ଯାଉଥିବା ଦେଖିବାକୁ ମିଳିଛି । ପ୍ରବଳ ବର୍ଷା ଯୋଗୁଁ ଜମ୍ମୁକୁ ଖାଦ୍ୟ ଯୋଗାଣ ବାଧାପ୍ରାପ୍ତ ହୋଇଛି । ଲମ୍ବା ଲାଇନ ହୋଇ ରାସ୍ତାରେ ସବୁ ଟ୍ରକ ଠିଆ ହୋଇଛନ୍ତି । ରାସ୍ତା ଭାସିଯିବାରୁ ଜନଜୀବନ ବ୍ୟାପକ ପ୍ରଭାବିତ ହୋଇଛି । ଦିଲ୍ଲୀରେ ବର୍ଷା ବିତ୍ପାତର ମୁକାବିଲା ନିମନ୍ତେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସମସ୍ତ ବିଭାଗୀୟ ଅଧିକାରୀଙ୍କ ଛୁଟିକୁ ବାତିଲ କରିଛନ୍ତି । ସେମାନଙ୍କୁ ଫିଲ୍ଡ ସର୍ଭେ କରି ଲୋକଙ୍କ ଦୁଃଖ ବୁଝିବାକୁ ନିର୍ଦ୍ଦେଶ ଦେଇଛନ୍ତି ।

ଦିଲ୍ଲୀର ଅଗ୍ନିଶମ ବିଭାଗ ଅଧିକାରୀଙ୍କ ସୂଚନା ଅନୁଯାୟୀ, ପ୍ରବଳ ବର୍ଷା ଯୋଗୁ ଦିଲ୍ଲୀରେ ୧୫ଟି ଘର ମାଟିରେ ମିଶି ଯାଇଥିବା ବେଳେ କାନ୍ଥ ପଡ଼ି ଜଣେ ମହିଳାଙ୍କ ମୃତ୍ୟୁ ହୋଇଛି । ମୃତ ମହିଳାଜଣକ ହେଉଛନ୍ତି ୫୮ ବର୍ଷୀୟା ରଞ୍ଜିତ କୌର । ବର୍ଷା ଯୋଗୁ ଦିଲ୍ଲୀର କାଲକାଜୀ ଅଞ୍ଚଳରେ ଏକ କାନ୍ଥୁ ଭୁଶୁଡ଼ି ୧୫ ଲକଜୁରୀ କାର୍‌ ଓ ୧୦ଟି ୨ ଚକିଆ ଯାନ ଭାଙ୍ଗିରୁଜି ଯାଇଛି । ହରିୟାଣା, ହିମାଚଳ ପ୍ରଦେଶ, ଉତ୍ତରାଖଣ୍ଡ, ରାଜସ୍ଥାନ, ପଞ୍ଜାବ, ଜମ୍ମୁ କଶ୍ମୀରରେ ପ୍ରବଳ ବର୍ଷା ଲାଗି ରହିଛି । ଏହି ସବୁ ଜିଲ୍ଲାରେ ଆହୁରି ଭୀଷଣ ବର୍ଷା ହେବା ନେଇ ପାଣିପାଗ ବିଭାଗ ସତର୍କ କରାଇଛି ।

ବାହାନଗା ଟ୍ରେନ ଟ୍ରାଜେଡି ମାମଲାରେ ୩ ଅଭିଯୁକ୍ତଙ୍କୁ ମାରାଥନ ଜେରା

ନନ୍ଦିଘୋଷ ବ୍ୟୁରୋ: ବାହାନଗା ଟ୍ରେନ ଟ୍ରାଜେଡି ମାମଲାରେ ୩ ଅଭିଯୁକ୍ତଙ୍କୁ ମାରାଥନ ଜେରା । ଆଜି ରିମାଣ୍ଡରେ ତୃତୀୟ ଦିନରେ ସ୍ବାସ୍ଥ୍ୟ ପରୀକ୍ଷା ପରେ ଗୁଡେଇ ତୁଡେଇ ଜେରା କରିଛି ୫ ଜଣିଆ ଟିମ । ସେପଟେ ଷ୍ଟେସନ ମାଷ୍ଟରକୁ ସିବିଆଇ ସମନ କରିଛି । ସିବିଆଇରେ ହାଜର ହେବାକୁ କୁହା ଯାଇଥିବା ଜଣାପଡିଛି । ସେପଟେ ଟ୍ରେନ ଟ୍ରାଜେଡି ମାମଲାରେ ଆଉ କାହାର ସଂପୃକ୍ତି ରହିଛି , ଅବହେଳା ଯୋଗୁଁ ନା ଉଦ୍ଦେଶ୍ୟ ରଖି ଏପରି କରାଯାଇଛି ତାକୁ ନେଇ ଖୋଳତାଡ କରୁଛି ସିବିଆଇ । ତୃତୀୟ ଦିନ ଜେରାରେ ଷଡଯନ୍ତ୍ର ଦିଗରେ ତନାଘନା କରୁଛି ଟିମ । ସିଆରଏସ ରିପୋର୍ଟରେ ଷ୍ଟେସନ ମ୍ୟାନେଜର ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠାଇଥିଲେ । ତେଣୁ ସିବିଆଇ ସମନ କରିଛି । ତେବେ ଆଗକୁ ଆଉ କାହାର ପାଳି ପଡୁଛି । ଏ ମାମଲାରେ ଗିରଫ ଦାରୀ ସଂଖ୍ଯା ବଢିପାରେ ବୋଲି ଚର୍ଚ୍ଚା ହେଉଛି ।

କଳାହାଣ୍ଡିରେ ଚାଞ୍ଚଲ୍ୟ, ନାବାଳକ ଓ ନାବାଳିକାଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର

ଧର୍ମଗଡ଼: କଳାହାଣ୍ଡିରେ ଚାଞ୍ଚଲ୍ୟ । ଧର୍ମଗଡ ଥାନା ବାଞ୍ଜିପଦର ଗାଁ ନିକଟରୁ ଦୁଇ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର । ମୃତକ ଜଣେ ନାବାଳକ ଓ ଅନ୍ୟଜଣେ ନାବାଳିକା । ଉଭୟ ବାଞ୍ଜିପଦର ଗାଁର । ମୃତକ ପ୍ରେମୀଯୁଗଳ ବୋଲି ସୂଚନା ମିଳିଛି । ଅଭିଯୋଗ ଅନୁସାରେ ଉଭୟ ଗତ ଜୁନ ମାସ ୩୦ତାରିଖରେ ଘରୁ କେଉଁଆଡ଼େ ପଳାଇଯାଇଥିଲେ । ପରିବାର ଲୋକ ଖୋଜାଖୋଜି କରିବାପରେ ସେମାନଙ୍କୁ ପାଇନଥିଲେ ।

ସାବୁନିଭାଡ଼ି ଓ ବାଞ୍ଜିପଦର ଗାଁ ମଝି ସ୍ଥାନରେ ଉଭୟଙ୍କ ମୃତଦେହ ଦେଖି କିଛି ଲୋକ ଖବର ଦେବାପରେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ନାବାଳକର ଶରୀର ପଚିଯାଇଥିବାବେଳେ ନାବାଳିକାର ମୃତଦେହ ଖଣ୍ଡବିଖଣ୍ଡିତ ହୋଇଛି । ଘଟଣାସ୍ଥଳରେ ସାଇଣ୍ଟିଫିକ ଟିମ ଓ ଧର୍ମଗଡ ପୋଲିସ ପହଞ୍ଚି ତଦନ୍ତ କରୁଛି । ଉଭୟଙ୍କର କିଭଳି ମୃତ୍ୟୁ ହେଲା ଛାନବିନ କରାଯାଉଛି । କେହି ହତ୍ୟା କରିଥିବା ସନ୍ଦେହ କରାଯାଉଛି । ପରିବାର ଲୋକଙ୍କ ସହିତ ଗ୍ରାମବାସୀଙ୍କୁ ପଚରାଉଚୁରା କରୁଛି ପୋଲିସ ।

ମନ୍ଦିର ବାହାରୁ ଚୋରି ହୋଇଗଲା ଚପଲ, ଥାନାରେ ମାମଲା ରୁଜୁ କଲେ ଯୁବକ

କାନପୁର: ଉତ୍ତରପ୍ରଦେଶର କାନପୁର ସହରରୁ ଏକ ଅଜବ ମାମଲା ସାମ୍ନାକୁ ଆସିଛି । ଆପଣ ଜାଣିଥିବେ କିଛି ମୂଲ୍ୟବାନ ଜିନିଷ ଚୋରି ହୋଇଗଲେ କିମ୍ବା ହଜିଗଲେ ଥାନାରେ ମାମଲା ରୁଜୁ କରାଯାଇଥାଏ । ହେଲେ ଜଣେ ଯୁବକ ଚପଲ ଚୋରି ହୋଇଯିବାକୁ ନେଇ ଥାନାରେ ମାମଲା ରୁଜୁ କରିଛନ୍ତି । ପୀଡିତ ବ୍ୟକ୍ତିଜଣଙ୍କ ମନ୍ଦିରକୁ ଦର୍ଶନ ପାଇଁ ଯାଇଥିଲେ । ଫେରିବା ପରେ ଦେଖିଥିଲେ ଯେ ତାଙ୍କ ଚପଲ ମନ୍ଦିର ବାହାରେ ନଥିଲା । ଏଥିପାଇଁ ଯେଉଁ ଏଫଆଇଆର ଲେଖାଯାଇଛି ତାହା ଅତ୍ୟନ୍ତ କୌତୁହଳପ୍ରଦ । ପୀଡିତ ବ୍ୟକ୍ତିଜଣଙ୍କ ଲେଖିଛନ୍ତି ଯେ ସେ ସଚ୍ଚୋଟ ରୋଜଗାରରୁ ଚପଲ କିଣିଥିଲେ ।

ନୂଆ ଚପଲ ଗାଏବ ହୋଇଯାଇଛି । ଏହାର ଅର୍ଥ ଯେ କାହାର ନଜର ମୋ ଚପଲ ଉପରେ ରହିଥିଲା । ଏଥିପାଇଁ ମୁଁ ଏଫଆଇଆର ରୁଜୁ କରିଛି । ଏହି ଏଫଆଇଆର ଏବେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ସୂଚନାନୁଯାୟୀ, କାନପୁରର ଦବୌଲି ଅଞ୍ଚଳରେ ରହୁଥିବା କାନ୍ତିଲାଲ ନିଗମ ଏକ ଇଲେକ୍ଟ୍ରିକ କମ୍ପାନୀରେ କାର୍ଯ୍ୟ କରନ୍ତି । ସେ ରବିବାର ଭୈରବ ବାବା ମନ୍ଦିରକୁ ଦର୍ଶନ ପାଇଁ ଯାଇଥିଲେ । ମନ୍ଦିର ଭିତରକୁ ଯିବା ପୂର୍ବରୁ ନିଜ ଚପଲ ବାହାରେ କାଢ଼ି ରଖିଥିଲେ । ଦର୍ଶନ କରିବା ପରେ ଯେବେ ସେ ଫେରି ଦେଖନ୍ତି ତ ତାଙ୍କ ଚପଲ ବାହାରେ ନଥିଲା ।

କାନ୍ତିଲାଲ ଆଖପାଖରେ ନିଜ ଚପଲ ଖୋଜିଥିଲେ । ହେଲେ ଚପଲ ମିଳିନଥିଲା । ଏହାପରେ ସେ କାନପୁର ପୋଲିସରେ ଅନଲାଇନ ଏଫଆଇଆର ରୁଜୁ କରିଥିଲେ । ଏଫଆଇଆରରେ ସେ ଲେଖିଛନ୍ତି ଯେ, ମୁଁ ଦୁଇ ଦିନ ପୂର୍ବେ ଚପଲ କିଣିଥିଲି । ନୀଳ ରଙ୍ଗର ଟୋପିକା ଟୋପିକା ଚପଲ ଥିଲା । ପ୍ରତି ରବିବାର ମୁଁ ଭୈରବ ବାବାଙ୍କ ଦର୍ଶନ କରିବାକୁ ଆସେ । କିନ୍ତୁ କେବେ ବି ମୋ ଚପଲ ଗାଏବ ହୋଇନଥିଲା । ଆଜି ମଧ୍ୟ ଦୋକାନ ଆଖପାଖରେ ଅନେକ ଚପଲ ପଡ଼ିଥିଲା ହେଲେ ମୋ ନୂଆ ଚପଲ ହିଁ ଗାଏବ ହୋଇଥିଲା ।

ଏଥିରୁ ଜଣାଯାଉଛି ଯେ କାହାର ନଜର ମୋ ଚପଲ ଉପରେ ଥିଲା । ଏପରି ସ୍ଥିତିରେ ମୁଁ ମାମଲା ରୁଜୁ କରିଛି । ସେ ଆଗକୁ ଲେଖିଛନ୍ତି ଯେ ମୁଁ କଠିନ ପରିଶ୍ରମ ଏବଂ ସଚ୍ଚୋଟତାର ପଇସାରୁ ଚପଲ କିଣିଥିଲି । ତାହା ଚୋରି ହେବା ପରେ ମୋତେ ଖାଲି ପାଦରେ ଘରକୁ ଯିବାକୁ ପଡ଼ିଲା । ଯାହାଫଳରେ ମୋତେ ବହୁତ କଷ୍ଟ ଲାଗିଥିଲା । ଏଥିପାଇଁ ମୋର ଚପଲ ଚୋରି କରିଥିବା ବ୍ୟକ୍ତିକୁ ଧରି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯାଉ ।

ଅବସରପ୍ରାପ୍ତ ଶିକ୍ଷୟିତ୍ରୀଙ୍କ କରୁଣ କାହାଣୀ, ୧୦ ବର୍ଷ ହେଲା ପୁଅ ବୋହୂ ଦେଉଛନ୍ତି ନିର୍ଯାତନା

ବଲାଙ୍ଗୀର: ବଲାଙ୍ଗୀର ଶାନ୍ତିପଡ଼ା ଚନ୍ଦ୍ରଶେଖରନଗରୁ ଆସିଛି ଅବସରପ୍ରାପ୍ତ ଶିକ୍ଷୟିତ୍ରୀଙ୍କ କରୁଣ କାହାଣୀ । ପୁଅ ବୋହୂଙ୍କ ନିର୍ଯ୍ୟାତନା ନେଇ ଥାନାର ଦ୍ବାରସ୍ତ ହେଲେ ସୌଦାମିନୀ ବେହେରା । ଦୀର୍ଘ ୧୦ ବର୍ଷ ହେଲା ପୁଅ ବୋହୂ ନିର୍ଯାତନାରେ ଅତିଷ୍ଠ ହୋଇ ପଡିଲେଣି ଅବସରପ୍ରାପ୍ତ ଶିକ୍ଷୟିତ୍ରୀ ସୌଦାମିନୀ । ବଡ ପୁଅ ବୋହୂ ସବୁ ସମ୍ପତ୍ତି ତାଙ୍କ ନାଁରେ କରିଦେବାକୁ ବାଧ୍ୟ କରି ଅକଥନୀୟ ନିର୍ଯ୍ୟାତନା ଦେଉଥିବା ସେ ଅଭିଯୋଗ କରିଛନ୍ତି । ମାଡ ମାରି ରକ୍ତାକ୍ତ କରିବା ସହ ତଣ୍ଟି ଚିପି ବୋହୂ ମାରୁଥିବା କହିଛନ୍ତି ଶାଶୂ । କେବଳ ଏତିକି ନୁହେଁ କୁକୁରକୁ ଇଙ୍ଗିତ କରି କାମୁଡିବାକୁ କହୁଛନ୍ତି ।

ଏମିତି କୋହଭରା କଣ୍ଠରେ କାନ୍ଦି କାନ୍ଦି ନିର୍ଯାତନାର କାହାଣୀ ବଖାଣିଛନ୍ତି ସୌଦାମିନୀ । ପୁଅ ବୋହୂଙ୍କ ନିର୍ଯାତନା ନେଇ ଗତକାଲି ସୌଦାମିନୀ ଟାଉନ ଥାନାରେ ଦ୍ୱାରସ୍ଥ ହୋଇଥିଲେ । ପୋଲିସ ତଦନ୍ତ ଆରମ୍ଭ କରିଛି । କିନ୍ତୁ ସୌଦାମିନୀ ବେହେରାଙ୍କ ବୋହୂ ସୁମନ ପାଣିଗ୍ରାହୀ ଶାଶୁଙ୍କ ଏଭଳି ଅଭିଯୋଗକୁ ଖଣ୍ଡନ କରିବା ସହ ପାଲଟା ଅଭିଯୋଗ କରିଛନ୍ତି । ଶାଶୂ ସୌଦାମିନୀ ବମ୍ବେରେ ରହୁଥିବା ତାଙ୍କ ସାନପୁଅ ସୁବ୍ରତ ପାଣିଗ୍ରାହୀଙ୍କୁ ଲଗାଇ ସ୍ବାମୀ ସ୍ତ୍ରୀଙ୍କୁ ଘରୁ ବାହାର କରିବା ପାଇଁ ଗାଳିଗୁଲଜ, ଆକ୍ରମଣ କରିବା ସହ ବାରମ୍ବାର ଘରୁ ତଡ଼ିବା ପାଇଁ ଯୋଜନା କରୁଛନ୍ତି । ସେପଟେ ସୌଦାମିନୀଙ୍କ ଏତଲା ପରେ ଟାଉନ ଥାନାରେ ମାମଲା ରୁଜ୍ଜୁ ପରେ ପୋଲିସ ତଦନ୍ତ ଆରମ୍ଭ କରିଛି ।

ବାଂଲାଦେଶ ବିପକ୍ଷ ପ୍ରଥମ ଟି-୨୦ ମ୍ୟାଚରେ ଭାରତୀୟ ମହିଳା ଦଳର ବଡ଼ ବିଜୟ

ଢାକା: ଭାରତୀୟ ମହିଳା କ୍ରିକେଟ ଟିମ୍ ବାଂଲାଦେଶ ଗସ୍ତର ଅଭିଯାନ ବିଜୟରୁ ଆରମ୍ଭ କରିଛି । ଭାରତ ରବିବାର ଖେଳାଯାଇଥିବା ପ୍ରଥମ ଟି୨୦ ଅନ୍ତର୍ଜାତୀୟ ମ୍ୟାଚରେ ୭ ୱିକେଟରେ ବଡ଼ ବିଜୟ ହାସଲ କରିଛି । ଏହି ମ୍ୟାଚ୍ ଢାକାର ଶେର-ଏ-ବାଂଲା ନ୍ୟାସନାଲ ଷ୍ଟାଡିୟମରେ ଖେଳାଯାଇଥିଲା । ଭାରତ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ଏବଂ ବାଂଲାଦେଶ ନିର୍ଦ୍ଧାରିତ ୨୦ ଓଭରରେ ୫ ୱିକେଟ୍ ବିନିମୟରେ ୧୧୪ ରନରେ ସୀମିତ ରହିଥିଲା । ସେହିପରି ଭାରତୀୟ ଦଳ ୧୬.୨ ଓଭରରେ ସହଜରେ ୩ ୱିକେଟ୍ ହରାଇ ୧୧୮ ରନ୍ ସଂଗ୍ରହ କରି ବିଜୟୀ ହୋଇଥିଲା ।

ଭାରତ ପାଇଁ ଅଧିନାୟକ ହରମନପ୍ରୀତ କୌର (ଅପରାଜିତ ୫୮ ରନ୍) ଏବଂ ଓପନର ସ୍ମୃତି ମନ୍ଧାନା (୩୮ ରନ୍) ଚମତ୍କାର ବ୍ୟାଟିଂ କରିଥିଲେ । ୧୧୫ରନର ବିଜୟ ଲକ୍ଷ୍ୟକୁ ପିଛା କରି କ୍ରୀଜକୁ ଓହ୍ଲାଇଥିବା ଭାରତୀୟ ଦଳର ଆରମ୍ଭ ଖରାପ ରହିଥିଲା । ଓପନର ବ୍ୟାଟ୍ସମ୍ୟାନ୍ ଶେଫାଳି ବର୍ମା ପ୍ରଥମ ଓଭରରେ ହିଁ ନିଜ ୱିକେଟ୍ ହରାଇଥିଲେ । ତାଙ୍କୁ ମାରୁଫା ଅଖତର ଏଲବିଡବ୍ଲୁ କରିଥିଲେ । ସେଫାଳି ୩ଟି ବଲ୍ ଖେଳି ଖାତା ଖୋଲି ପାରିନଥିଲେ । ଜେମିମା ରୋଡ୍ରିଗ୍ସ ୧୪ ଟି ବଲରେ ୨ଟି ଚୌକା ଜରିଆରେ ୧୧ ରନ୍ ହିଁ କରିପାରିଥିଲେ ।

ଭାରତର ଦୁଇଟି ୱିକେଟ୍ ୨୧ରନରେ ପଡ଼ିଯାଇଥିଲା । ଏହାପରେ ହରମନପ୍ରୀତ ଏବଂ ସ୍ମୃତି ମନ୍ଧାନା ସ୍ଥିତି ସମ୍ଭାଳିଥିଲେ । ଉଭୟ ତୃତୀୟ ୱିକେଟ୍ ପାଇଁ ୭୦ ରନର ଭଲ ପାର୍ଟନରସିପ୍ କରିଥିଲେ । ମନ୍ଧାନାଙ୍କୁ ୧୪ତମ ଓଭରରେ ସୁଲତାନା ଷ୍ଟମ୍ପ ଆଉଟ୍ କରିଥିଲେ । ସେ ୩୪ ଟି ବଲରେ ୫ ଚୌକା ଜରିଆରେ ୩୮ ରନର ଇନିଂସ ଖେଳିଥିଲେ । ଏହାପରେ ହରମନପ୍ରୀତ ଏବଂ ୟାସ୍ତିକା ଭାଟିୟା ଦଳକୁ ଜିତାଇ ଫେରିଥିଲେ । ହରମନପ୍ରୀତ ୩୫ ଟି ବଲରେ ୬ ଚୌକା ଏବଂ ୨ ଛକା ସହାୟତାରେ ୫୮ ରନ୍ କରିଥିଲେ । ତାଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଛି । ୟାସ୍ତିକା ୧୨ ଟି ବଲରେ ୯ ରନ୍ କରିଥିଲେ ।