ନନ୍ଦିଘୋଷ ବ୍ୟୁରୋ: ରାଜ୍ୟରେ ବଜ୍ରାଘାତରେ ୪ ମୃତ । ଜୟପୁରରେ ବୋରିଗୁମ୍ମା ବ୍ଲକର ଅଞ୍ଚଳା ଗାଁରେ ଦୁଇ ଜଣଙ୍କର ମୃତ୍ୟୁ ହୋଇଛି । ମୃତକ ମାଆ ଓ ପୁଅ ହୋଇଥିବା ସୂଚନା ମିଳିଛି । ମୃତକ ହେଲେ ଦୁରୁବତୀ ହାଲବା ଏବଂ ପୁଅ ଦୀପକ ହାଲବା । ଚାଷ ଜମିରେ କାମ କରୁଥିବାବେଳେ ବଜ୍ରପାତ ଘଟି ଉଭୟଙ୍କର ମୃତ୍ୟୁ ହୋଇଛି । ସେପଟେ ଅନୁଗୁଳରେ କାଠ ସଂଗ୍ରହ କରି ଘରକୁ ଫେରୁଥିବାବେଳେ ଦୁଇ ମହିଳାଙ୍କର ମୃତ୍ୟୁ ହୋଇଛି । ଅନୁଗୁଳ ଜିଲ୍ଲା ନାଲକୋ ବଳରାମପ୍ରସାଦ ନିକଟ ଆସପଣ୍ଡଠାରେ ଅଘଟଣ ଘଟିଛି । ମୃତ ମହିଳା ହେଲେ ସୁଷମା ବେହେରା ଓ ବେଣି ବେହେରା ।
ମଣିପୁରରେ ସ୍ଥିତି ନିୟନ୍ତ୍ରଣ ପାଇଁ ସୁପ୍ରିମକୋର୍ଟଙ୍କ ପରାମର୍ଶ ଓ ନିର୍ଦ୍ଦେଶ
ଇମ୍ଫାଲ : ମଣିପୁରରେ ସ୍ଥିତି ନିୟନ୍ତ୍ରଣ ଓ ଶାନ୍ତି ଫେରାଇ ଆଣିବା ପାଇଁ ସୁପ୍ରିମକୋର୍ଟଙ୍କ ସତର୍କବାଣୀ, ପରାମର୍ଶ ଓ ନିର୍ଦ୍ଦେଶ । ସୁପ୍ରିମକୋର୍ଟ କହିଛନ୍ତି, ମଣିପୁରରେ ହିଂସା ବୃଦ୍ଧି ପାଇଁ ସର୍ବୋଚ୍ଚ ଅଦାଲତଙ୍କୁ ଏକ ପ୍ଲାଟଫର୍ମ ଭାବେ ବ୍ୟବହାର କରାନଯାଉ । ଏନେଇ କୁକୀ ଓ ମିତେଇ ସମ୍ପ୍ରଦାୟ ପାଇଁ ପ୍ରତିନିଧିତ୍ବ କରୁଥିବା ଆଇନଜୀବୀଙ୍କୁ ସୁପ୍ରିମକୋର୍ଟ ସତର୍କ କରାଇବା ସହିତ କିଛି ପରାମର୍ଶ ଦେଇଛନ୍ତି ।
ଅଭିଯୋଗ ପରେ ଅଭିଯୋଗ ଆଣି ହିଂସା ବଢ଼ାଇବା କାମରୁ ବିରତ ରହନ୍ତୁ ବୋଲି ସୁପ୍ରିମକୋର୍ଟ କହିଛନ୍ତି । ଆଇନଜୀବୀ କଲିନ ଗନସାଲଭେସ ଅଭିଯୋଗ କରିଥିଲେ ଯେ, କୁକୀ ସଂପ୍ରଦାୟ ବିରୋଧରେ ସରକାରଙ୍କ ପକ୍ଷରୁ ହିଂସାକୁ ପ୍ରୋତ୍ସାହନ ଦିଆଯାଉଛି । ଏଥିରେ ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ ଡି. ୱାଇ ଚନ୍ଦ୍ରଚୂଡ଼ ଓ ଜଷ୍ଟିସ ପି. ଏସ୍. ନରସିଂହ ହସ୍ତକ୍ଷେପ କରିଛନ୍ତି । କହିଛନ୍ତି, ମଣିପୁରରେ ହିଂସା ବୃଦ୍ଧି ପାଇଁ ସୁପ୍ରିମକୋର୍ଟଙ୍କୁ ପ୍ଲାଟଫର୍ମ ଭାବେ ବ୍ୟବହାର କରାନଯାଉ । ବରଂ ଆଇନଜୀବୀ ଗନସାଲଭେସ କିଛି ଗଠନମୂଳକ ପରାମର୍ଶ ଦିଅନ୍ତୁ ।
ସେହିପରି ମଣିପୁରରେ ଗୁରୁତ୍ବପୂର୍ଣ୍ଣ ରାଜପଥକୁ ଅବରୋଧମୁକ୍ତ କରିବା ଲାଗି ପଦକ୍ଷେପ ନେବା ପାଇଁ କେନ୍ଦ୍ର ଓ ମଣିପୁର ସରକାରଙ୍କୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ମଣିପୁରର ଜୀବନରେଖା କୁହାଯାଉଥିବା ଏହି ରାଜପଥରେ ଅତ୍ୟାବଶ୍ୟକ ସାମଗ୍ରୀ ପରିବହନ ସ୍ବାଭାବିକ ହୋଇପାରିବ । ଏଥିପାଇଁ ସୁପ୍ରିମକୋର୍ଟଙ୍କୁ ମଣିପୁର ହାଇକୋର୍ଟ ବାର୍ ଆସୋସିଏସନ ଅନୁରୋଧ କରିଥିଲା ।
ବିହାର ସରକାରୀ କାର୍ଯ୍ୟକ୍ରମ ପୋଷ୍ଟର ଓ ବ୍ୟାନରରୁ ଡେପୁଟି ସିଏମ ଗାଏବ
ପାଟନା : ବିହାର ସରକାରୀ କାର୍ଯ୍ୟକ୍ରମ ପୋଷ୍ଟରରୁ ଗାଏବ ଉପମୁଖ୍ୟମନ୍ତ୍ରୀ ତଥା ଆରଜେଡି ମୁଖ୍ୟ ତେଜସ୍ବୀ ଯାଦବ । ମଳମାସ ମେଳା ନେଇ ନାଳନ୍ଦାର ରାଜିଗିରିରେ ପ୍ରସ୍ତୁତି ଜୋରସୋରରେ ଆଗେଇ ଚାଲଥିବାବେଳେ ମରାଯାଇଥିବା ପୋଷ୍ଟର ଓ ହୋର୍ଡିଂରେ ତେଜସ୍ବୀଙ୍କ ଉଭାନ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ନାଳନ୍ଦା ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନିଜ ଜିଲ୍ଲା ହୋଇଥିବାବେଳେ କେବଳ ନୀତୀଶଙ୍କ ଫଟୋ ଲାଗିଛି ।
ପ୍ରତି ତିନିବର୍ଷରେ ଏହି ମେଳା ହେଉଥିବାରୁ ଜନସାଧାରଣଙ୍କୁ ହୋର୍ଡିଂ ଓ ପୋଷ୍ଟରରେ ସ୍ବାଗତ କରୁଛନ୍ତି ନୀତୀଶ । ପୋଷ୍ଟର ଓ ବ୍ୟାନରରେ ତେଜସ୍ବୀ ନଥିବାରୁ ନୀତୀଶ ଓ ତାଙ୍କ ଦଳ ମଧ୍ୟରେ ସୁସଂପର୍କ ନଥିବା ନେଇ ଚର୍ଚ୍ଚା ହେଉଛି । ଚାକିର ପାଇଁ ଜମି ଘୋଟାଲାରେ ସିବିଆଇ ଚାର୍ଜସିଟରେ ତେଜସ୍ବୀଙ୍କ ନାମ ଆସିବା ପରେ ତାଙ୍କୁ ସାଇଡ ଲାଇନ କରିବା ନେଇ ନୀତୀଶ ଉଦ୍ୟମ କରୁଛନ୍ତି ବୋଲି କୁହାଯାଉଛି ।
ତେବେ ଏସବୁକୁ ଚର୍ଚ୍ଚାକୁ ଖଣ୍ଡନ କରିଛନ୍ତି ଆରଜେଡି ମୁଖପାତ୍ର ଶକ୍ତି ସିଂ ଯାଦବ । ଯେଉଁମାନେ ମେଳାରେ ମୁଖ୍ୟ ଅତିଥିଭାବେ ଯୋଗଦେବେ ସେମାନଙ୍କ ଫଟୋ ହୋର୍ଡିଂ ଓ ପୋଷ୍ଟରରେ ଲାଗିଛି । ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବଙ୍କ ଫଟୋ ଲାଗିବା ନ ଲାଗିବା ନେଇ କିଛି ଅର୍ଥ ନାହିଁ ବୋଲି କହିଛନ୍ତି ଶକ୍ତି ସିଂ ଯାଦବ । ସେହିପରି ଜେଡିୟୁ ଜାତୀୟ ସାଧାରଣ ସଂପାଦକ ରାଜୀବ ରଞ୍ଜନ ମଧ୍ୟ କଥାକୁ ଏଡାଇ ଦେଇ କହିଛନ୍ତି, ଏଥିରେ କୌଣସି ପଲିଟିକ୍ସ ନାହିଁ ।
ବିହାରରେ ଜ୍ୟୋତି ମୋର୍ଯ୍ୟ ଷ୍ଟୋରି ରିପିଟ୍ : ଶିକ୍ଷୟିତ୍ରୀ ପତ୍ନୀ ସ୍ୱାମୀକୁ ଛାଡି ପ୍ରିନ୍ସପାଲ ସହ ଫେରାର
ପାଟନା : ପୁଣି ଜ୍ୟୋତି ମୋର୍ଯ୍ୟ କେସ୍ ରିପିଟ୍ । ପ୍ରଥମେ ପ୍ରେମ ବିବାହ କରିଥିଲେ, ପରେ ସ୍ତ୍ରୀକୁ ପାଠ ପଢିବାକୁ ଦେଇଥିଲେ ସୁଯୋଗ । ହେଲେ ଶିକ୍ଷୟତ୍ରୀ ହେବାର ଦେଢ ବର୍ଷ ପରେ ସ୍କୁଲର ପ୍ରିନ୍ସିପାଲ ସହ ଫେରାର ହୋଇଗଲା ସ୍ତ୍ରୀ । ଉତ୍ତରପ୍ରଦେଶର ଜ୍ୟୋତି ମୋର୍ଯ୍ୟ ଏବଂ ଆଲୋକ ମୋର୍ଯ୍ୟଙ୍କ କାହାଣୀ ପରି ପୁଣି ବିହାରରେ ଆଉ ଏକ ଘଟଣା ଦେଖିବାକୁ ମିଳିଛି । ଏପରି ଅଭିଯୋଗ ନେଇ ନିଜ ସ୍ତ୍ରୀକୁ ଖୋଜି ବୁଲୁଛନ୍ତି ବିହାରର ମହୀପୁରା ଗାଁର ଚନ୍ଦନ ।
ସୂଚନା ଅନୁଯାୟୀ, ମହୀପୁରା ଗାଁର ବାସିନ୍ଦା ଚନ୍ଦନ ୧୩ ବର୍ଷ ପୂର୍ବେ ଅର୍ଥାତ ୨୦୧୦ ମସିହାରେ ସରିତା ନାମକ ଯୁବତୀଙ୍କୁ ପ୍ରେମ ବିବାହ କରିଥିଲେ । ବିବାହ ପରେ ସେ ସରିତାଙ୍କୁ ନିଜ ପଢା ଜାରି ରଖିବାକୁ ସୁଯୋଗ ଦେଇଥିଲେ । ଏହାପରେ ୨୦୨୨ ଫେବୃଆରୀରେ ସେ ସରକାରୀ ଶିକ୍ଷୟତ୍ରୀ ଭାବେ ଏକ ସ୍କୁଲରେ ଚାକିରି ଆରମ୍ଭ କଲେ । ଏହାର ଠିକ୍ ଦେଢ ବର୍ଷ ପରେ ସେହି ସ୍କୁଲର ପ୍ରଧାନ ଶିକ୍ଷକ ରାହୁଲ କୁମାର ସହ ସେ ଫେରାର ହୋଇଯାଇଥିବା ତାଙ୍କ ସ୍ୱାମୀ ଥାନାରେ ଅଭିଯୋଗ କରିଛନ୍ତି । ଅଭିଯୋଗ କରିବା ବେଳେ ନିଜ ସ୍ତ୍ରୀକୁ ଫେରାଇ ଆଣିବାକୁ ପୋଲିସକୁ ଗୁହାରି କରିଛନ୍ତି ।
ସ୍ୱାମୀ ଚନ୍ଦନଙ୍କ କହିବା ଅନୁଯାୟୀ, ସେ ନିଜ ଭଉଣୀଙ୍କ ଶାଶୁଘରେ ସରିତା ସହ ପ୍ରଥମେ ଭେଟ ହୋଇଥିଲେ । ଏହା ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢିଉଠିଥିଲା ଓ ଦୁହେଁ ଦୁହିଁଙ୍କୁ ପ୍ରେମ ବିବାହ କରିଥିଲେ । ସେହି ସମୟରେ ସରିତା ଦଶମ ପାଶ୍ କରିଥିଲେ । ସ୍ତ୍ରୀର ପାଠପଢା ସ୍ୱପ୍ନ ଅଧାରେ ନରହୁ ସେଥିପାଇଁ ତାଙ୍କୁ ପାଠ ପଢିବାର ସୁଯୋଗ ଦେଇଥିଲେ । ଉଭୟଙ୍କର ଏକ ୧୨ ବର୍ଷର ଝିଅ ଓ ୭ ବର୍ଷର ପୁଅ ମଧ୍ୟ ଅଛି ।
ପ୍ରଥମ ସୋମବାରରେ ଅଘଟଣ : ଝାଡେଶ୍ୱର ମନ୍ଦିରରେ ବୋଲବମ କାଉଡିଆଙ୍କ ମୃତ୍ୟୁ
ଦେବଗଡ : ଶ୍ରାବଣ ପ୍ରଥମ ସୋମବାରରେ ଶିବ ମନ୍ଦିରରେ ଅଘଟଣ । ଝାଡେଶ୍ୱର ମନ୍ଦିରରେ ବୋଲବମ କାଉଡିଆଙ୍କ ମୃତ୍ୟୁ । ମନ୍ଦିରରେ ଶୋଇଥିବା ଅବସ୍ଥାରେ ବୋଲବମ କାଉଡିଆଙ୍କ ମୃତ୍ୟୁ । ଦେବଗଡ ପ୍ରସିଦ୍ଧ ଶୈବପୀଠ ଝାଡେଶ୍ୱର ମନ୍ଦିରରେ ଘଟିଛି ଏହି ଅଘଟଣ । ମୃତକ ଜଣକ ହେଲେ ଦେବଗଡ ଜିଲା କୁଣ୍ଢେଇଗୋଳା ଦେଓଝରଣର ୪୨ ବର୍ଷୀୟ ବିଭୁତି ବେହେରା।
ସୂଚନା ଅନୁଯାୟୀ ବିଭୁତି ଢେଙ୍କାନାଳ ଜିଲ୍ଲା ବାଲିମୀ ସ୍ଥିତ ପଠାଣୀ ସାମନ୍ତ ଡିପ୍ଲୋମା କଲେଜରେ ପିଅନ ଭାବେ କାର୍ଯ୍ୟ କରୁଥିଲେ । ଗତକାଲି ୨ଟି ଗାଡିରେ ବାଲିମୀ ଥାନା ନୁଆଁଗାଁର ୫୦ ଜଣିଆ କାଉଡିଆ ଦଳ ଜଳାଭିଷେକ ପାଇଁ ଦେବଗଡ ଝାଡେଶ୍ୱର ମନ୍ଦିରକୁ ଆସିଥିଲେ । ସଂଧ୍ୟାରେ ନିକଟସ୍ଥ ବାଳିଆପିଟା ନାଳରୁ ଜଳ ସଂଗ୍ରହ କରି ମନ୍ଦିର ପରିସରରେ ସାଇତି ରଖିଥିଲେ । ରାତି ପ୍ରାୟ ୧୧ଟାରେ ଖାଇ ସାରି ମନ୍ଦିର ମଣ୍ଡପରେ ଶୋଇଥିଲେ । ଆଜି ପ୍ରତ୍ୟୂଷ ପ୍ରାୟ ୩ ଟା ସମୟରେ ସାଥୀ ମାନେ ତାଙ୍କୁ ଜଳାଭିଷେକ ପାଇଁ ଉଠାଇ ଥିଲେ ମଧ୍ୟ ସେ ଆଉ ଉଠିନଥିଲେ । ଫଳରେ ୧୦୮ ଆମ୍ବୁଲାନ୍ସ ଯୋଗେ ତାଙ୍କୁ ଦେବଗଡ ଜିଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା । ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ ।
ବାହାନଗା ଟ୍ରେନ ଟ୍ରାଜେଡି : ସିବିଆଇ ଖୋଜୁଛି ଦୁର୍ଘଟଣା ପଛର ସତ
ବାଲେଶ୍ୱର : ବାହାନଗା ଟ୍ରେନ ଟ୍ରାଜେଡି ମାମଲା । ୩ ଅଭିଯୁକ୍ତଙ୍କ ରିମାଣ୍ଡର ଆଜି ଚତୁର୍ଥ ଦିନ । ଅଭିଯୁକ୍ତଙ୍କୁ ମାରାଥନ ଜେରା କରୁଛି ସିବିଆଇ । ଖୋଜୁଛି ଦୁର୍ଘଟଣା ପଛର ସତ । ବାହାନଗା ଟ୍ରେନ ଟ୍ରାଜେଡି ପଛରେ ରହିଛି କି ଷଡ଼ଯନ୍ତ୍ର ।
ଅଭିଯୁକ୍ତଙ୍କ ମୁହଁ ସତ ଆଦାୟ କରିବାକୁ ଗୁଡ଼େଇତୁଡ଼େଇ ପ୍ରଶ୍ନ କରୁଛି ତଦନ୍ତକାରୀ ଟିମ୍ ଟ୍ରେନ ଟ୍ରାଜେଡି ମାମଲାରେ ଆଉ କାହାର ସଂପୃକ୍ତି ରହିଛି , ଅବହେଳା ଯୋଗୁଁ ନା ଉଦ୍ଦେଶ୍ୟମୂଳକ ଭାବେ ଏପରି କରାଯାଇଛି ତାକୁ ନେଇ ଖୋଳତାଡ କରୁଛି ସିବିଆଇ । ସିଆରଏସ ରିପୋର୍ଟରେ ଷ୍ଟେସନ ମ୍ୟାନେଜର ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠାଇଥିଲେ । ତେଣୁ ଷ୍ଟେସନ ମାଷ୍ଟରଙ୍କୁ ସିବିଆଇ ସମନ କରିଥିବା ସୂଚନା ମିଳିଛି । ଆସନ୍ତାକାଲି ରିମାଣ୍ଡର ଶେଷଦିନ ଥିବାବେଳେ ସିବିଆଇକୁ ଗୁରୁତ୍ବପୂର୍ଣ୍ଣ ତଥ୍ୟ ପ୍ରମାଣ ମିଳିଛି । ମାମଲାରେ ଆଗକୁ ଗିରଫଦାରୀ ସଂଖ୍ୟା ବଢିପାରେ ବୋଲି ଚର୍ଚ୍ଚା ହେଉଛି

