spot_img
Home Blog Page 3183

୮ଟି ନୂଆ ଗ୍ରୀଡ ସବ୍‌ଷ୍ଟେସନ ଲୋକାର୍ପିତ କଲେ ନବୀନ, ୨.୨ ଲକ୍ଷ ଲୋକ ହେବେ ଉପକୃତ

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସଂଧ୍ୟାରେ ରାଜ୍ୟର ୮ଟି ଜିଲ୍ଲାରେ ୮ଟି ଗ୍ରୀଡ ସବଷ୍ଟେସନ ଲୋକାର୍ପିତ କରିଛନ୍ତି । ଏହିସବୁ ସ୍ଥାନ ଗୁଡିକ ହେଲା ଅନୁଗୁଳର ମେରାମୁଣ୍ଡଳି, ଖୋର୍ଦ୍ଧାର କଣ୍ଟାବାଡ, କୋରାପୁଟର ବୋରିଗୁମା, ଝାରସୁଗୁଡାର ଲଖନପୁର, ସୁନ୍ଦରଗଡର କୁମାରମୁଣ୍ଡା, ସମ୍ବଲପୁରର ବାମରା, ବରଗଡର ଭଟଲି ଏବଂ ଭଦ୍ରକ । ଏହିସବୁ ଗ୍ରୀଡ ସବ୍‌ଷ୍ଟେସନ ପାଇଁ ରାଜ୍ୟ ସରକାର ୬୫୦ କୋଟି ଟଙ୍କା ବିନିଯୋଗ କରିଛନ୍ତି  । ଏହାଦ୍ବାରା ରାଜ୍ୟର ୨ ଲକ୍ଷ ୨୦ ହଜାର ଉପଭୋକ୍ତା ଉପକୃତ ହେବେ।

ଭିଡିଓ କନ୍‌ଫରେନ୍‌ସିଂ ଜରିଆରେ ଆୟୋଜିତ ଏହି କାର୍ଯ୍ୟକ୍ରମରେ ନିଜର ଅଭିଭାଷଣ ରଖି ମୁଖ୍ୟମନ୍ତ୍ରୀ କହିଲେ ଯେ ଏହାଦ୍ବାରା ଜନସାଧାରଣ ଗୁଣାତ୍ମକ ଓ ନିରନ୍ତର ବିଜୁଳି ପାଇପାରିବେ । ସମସ୍ତଙ୍କ ପାଇଁ ବିଜୁଳିର ଲକ୍ଷ୍ୟ ହାସଲ ଦିଗରେ ମଧ୍ୟ ଏହା ଏକ ବଡ ସଫଳତା  । ମୁଖ୍ୟମନ୍ତ୍ରୀ କହିଛନ୍ତି ଯେ ଆମ ରାଜ୍ୟରେ ୧୬,୩୦୦ ସର୍କିଟ କିଲୋମିଟର ଦୀର୍ଘ ବିଦ୍ୟୁତ ସରବରାହ ନେଟ୍‌ୱାର୍କ ରହିଛି ଏବଂ ୧୯୩ଟି Extra High Voltage ଗ୍ରୀଡ୍ ସବ୍‌ଷ୍ଟେସନ ମଧ୍ୟ ନିର୍ମାଣ କରାଯାଇଛି। ରାଜ୍ୟର ସହରାଞ୍ଚଳର ୯୯ ପ୍ରତିଶତ ଓ ଗ୍ରାମାଞ୍ଚଳର ୯୭ ପ୍ରତିଶତର ଲୋକଙ୍କୁ ବର୍ତ୍ତମାନ ବିଜୁଳିର ସୁବିଧା ମିଳୁଛି ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି ।

ନୀତି ଆୟୋଗର ରିପୋର୍ଟକୁ ଭିତ୍ତିକରି ମୁଖ୍ୟମନ୍ତ୍ରୀ କହିଲେ ଯେ ୨୦୧୫-୧୬ ରୁ ୨୦୧୯-୨୦ ମଧ୍ୟରେ ରାଜ୍ୟର ୬୦ ଲକ୍ଷରୁ ଅଧିକ ଲୋକ ଗରିବୀରୁ ଉପରକୁ ଉଠିଛନ୍ତି । ଏଥିରେ ଗୁଣାତ୍ମକ ବିଦ୍ୟୁତର ଏକ ବଡ ଭୂମିକା ରହିଛି ବୋଲି ସେ ମତ ଦେଇଥିଲେ ।

ମୁଖ୍ୟମନ୍ତ୍ରୀ ପୁଣି କହିଥିଲେ ଯେ ଆଧୁନିକ ଅର୍ଥନୀତିର ମୁଖ୍ୟ ଆଧାର ହେଉଛି ବିଜୁଳି । ଲୋକଙ୍କ ଜୀବନଧାରଣର ମାନରେ ଉନ୍ନତି ପାଇଁ ବିଜୁଳି ଅତି ଜରୁରୀ ବୋଲି ପ୍ରକାଶ କରି ମୁଖ୍ୟମନ୍ତ୍ରୀ କହିଥିଲେ ଯେ ଲୋକଙ୍କୁ ନିରନ୍ତର ବିଜୁଳି ଯୋଗାଇବା ସରକାରଙ୍କ ଏକ ମୁଖ୍ୟ ଲକ୍ଷ୍ୟ ଓ ଏଥିପାଇଁ ଉଦ୍ୟମ ଜାରି ରହିଛି ବୋଲି ସେ କହିଥିଲେ ।

ଏହି ଅବସରରେ ଓଡିଶା ପାୱାର ଜେନେରେସନ କର୍ପୋରେସନ ପକ୍ଷରୁ ୧୦୩.୩୭ କୋଟି ଟଙ୍କା ଏବଂ OPTCL ପକ୍ଷରୁ ୪୨ କୋଟି ଟଙ୍କା ରାଜ୍ୟ ସରକାରଙ୍କ ଅନ୍ତରୀଣ ଲାଭାଂଶ ବାବଦରେ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ପ୍ରଦାନ କରାଯାଇଥିଲା । ଏହାସହିତ OPGC ପକ୍ଷରୁ ୨ କୋଟି ଓ OPTCL ପକ୍ଷରୁ ୩ କୋଟି ଟଙ୍କା ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ପ୍ରଦାନ କରାଯାଇଥିଲା ।

ଏଥିରେ ଖୁସିବ୍ୟକ୍ତ କରି ମୁଖ୍ୟମନ୍ତ୍ରୀ କହିଥିଲେ ଯେ ଏହି ଦୁଇଟି public sector unit ରାଜ୍ୟ ସରକାରଙ୍କ ଗୁରୁତ୍ବପୂର୍ଣ୍ଣ ଶିଳ୍ପାନୁଷ୍ଠାନ ଭାବରେ ପରିଣତ ହେବା ଖୁସିର କଥା । ଆଗାମୀ ଦିନରେ ଏହି ଦୁଇ ଅନୁଷ୍ଠାନ ଆହୁରି ସଫଳତା ହାସଲ କରିବେ ବୋଲି ସେ ଆଶାପ୍ରକାଶ କରିଥିଲେ ।

ଶକ୍ତି ମନ୍ତ୍ରୀ ପ୍ରତାପ କେଶରୀ ଦେବ କହିଥିଲେ ଯେ ଏହାଦ୍ବାରା ଶିଳ୍ପ, କୃଷି, ଶିକ୍ଷା ଆଦି କ୍ଷେତ୍ରରେ ବିକାଶ ତ୍ବରାନ୍ବିତ ହେବା ସହିତ ଲୋକଙ୍କୁ ଗୁଣାତ୍ମକ ବିଜୁଳି ମିଳିପାରିବ। ରାଜ୍ୟରେ ବର୍ତ୍ତମାନ ସୁଦ୍ଧା ୪୬୩ଟି ଗ୍ରୀଡ ସବ୍‌ଷ୍ଟେସନ ନିର୍ମାଣ କରାଯାଇଥିବା ବେଳେ, ଆଉ ୧୦୦ଟି ନିର୍ମାଣାଧୀନ ଅଛି ବୋଲି ସେ କହିଥିଲେ ।

ଏହି ଅବସରରେ ମେରାମୁଣ୍ଡଳିରେ ଉପବାଚସ୍ପତି ରଜନୀକାନ୍ତ ସିଂହ, କଣ୍ଟାବାଡରେ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ମନ୍ତ୍ରୀ ଶ୍ରୀ ଅଶୋକ ପଣ୍ଡା, କୁମାରମୁଣ୍ଡାରେ ଶ୍ରମ ମନ୍ତ୍ରୀ ସାରଦା ପ୍ରସାଦ ନାୟକ, ବୋରିଗୁମାରେ ସାଂସଦ ରମେଶଚନ୍ଦ୍ର ମାଝୀ, ଲଖନପୁରରେ ବିଧାୟିକା ଶ୍ରୀମତୀ ଅଳକା ମହାନ୍ତି, ବାମରାରେ କୁଚିଣ୍ଡା ବିଧାୟକ କିଶୋର ଚନ୍ଦ୍ର ନାୟକ ଏବଂ ଭଟଲିରେ ବିଧାୟକ ସୁଶାନ୍ତ ସିଂହ ପ୍ରମୁଖ ଯୋଗ ଦେଇ ରାଜ୍ୟର ବିକାଶରେ ମୁଖ୍ୟମନ୍ତ୍ରୀଙ୍କ ଦୃଢ ନେତୃତ୍ବ ଓ ଦୂରଦୃଷ୍ଟିର ଉଚ୍ଚପ୍ରଶଂସା କରିଥିଲେ । ଏହି ସବ୍‌ଷ୍ଟେସନ ଦ୍ବାରା ସ୍ଥାନୀୟ ଅଞ୍ଚଳରେ ଲୋ-ଭୋଲଟେଜ ସମସ୍ୟା ଦୂର ହେବା ସହିତ ସାଧାରଣ ଲୋକଙ୍କ ଜୀବନଯାପନ ଆହୁରି ସହଜ ହେବ ବୋଲି ସେମାନେ କହିଥିଲେ ।

ଏହି କାର୍ଯ୍ୟକ୍ରମକୁ 5T ସଚିବ ଭି.କେ. ପାଣ୍ଡିଆନ ପରିଚାଳନା କରିଥିଲେ । ଶକ୍ତି ବିଭାଗର ଅତିରିକ୍ତ ଶାସନ ସଚିବ ନିକୁଞ୍ଜ ଧଳ ସ୍ବାଗତ ଭାଷଣ ଦେଇଥିଲେ ଏବଂ OPTCLର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ଧନ୍ୟବାଦ ଦେଇଥିଲେ ।

ମାସିକିଆ ବଟି ଆଦାୟ କରି ASI ବିଦା, IICଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ଡିଜିଙ୍କୁ ସୁପାରିଶ

ବାଲେଶ୍ବର: ମହଙ୍ଗା ପଡ଼ିଲା ମାସିକିଆ ବଟି ଆଦାୟ । ଭିଜିଲାନ୍ସ ଜାଲରେ ବାଲେଶ୍ବର ଜିଲ୍ଲା ଚାନ୍ଦିପୁର ଥାନା ଆଇଆଇସି ଓ ଏଏସଆଇ । ଆଇଆଇସି ଗଣେଶ୍ବର ପ୍ରଧାନ ଓ ଏଏସଆଇ ବଳି ମହାନ୍ତିଙ୍କୁ ଧରିଛି ଭିଜିଲାନ୍ସ । ଏଏସଆଇଙ୍କୁ ଏସପି ସାଗରିକା ନାଥ ନିଲମ୍ବିତ କରିଥିବା ଆଇଆଇସିଙ୍କ ଉପରେ କାର୍ଯ୍ୟାନୁଷ୍ଠାନ ପାଇଁ ଡିଜିଙ୍କୁ ସୁପାରିଶ କରାଯାଇଛି ।

ସ୍ଥାନୀୟ ମଦ ବ୍ୟବସାୟୀଙ୍କ ଠୁ ମାସିକିଆ ଚାନ୍ଦା ନେଉଥିଲେ ଆଇଆଇସି । ଏଥିପାଇଁ ଏଏସଆଇ ବଳି ମହାନ୍ତି ମଧ୍ୟସ୍ଥତା କରୁଥିଲେ । ୫୦ ହଜାର ଟଙ୍କା ଲାଞ୍ଚ ନେବାବେଳେ ରେଡ୍ କରିଥିଲା ତଦନ୍ତକାରୀ ଟିମ୍ । ସେମାନଙ୍କ ନିକଟରୁ ରଙ୍ଗ ଲଗା ଟଙ୍କା ଜବତ କରିବା ସହ ମାମଲାର ତଦନ୍ତ କରୁଛି ଭିଜିଲାନ୍ସ । ଉଭୟଙ୍କୁ ହେପାଜତକୁ ନେଇ ଛାନବିନ ଜାରି ରହିଛି ତଦନ୍ତକାରୀ ଟିମ୍ ।

୩ଟି ଟିମ୍‌ ସୋର ସମେତ ଅନ୍ୟ ୩ଟି ସ୍ଥାନରେ ଚଡ଼ାଉ କରୁଛି । ସୋର ସ୍ଥିତ ବାସଭଵନରେ ବଳି ମହାନ୍ତିଙ୍କ ଘରେ ଭିଜିଲାନ୍ସର ୬ ଜଣିଆ ଟିମ ଛାନଭିନ ଜାରି ରଖିଛନ୍ତି ।

5T ସ୍କୁଲ ରୂପାନ୍ତର ନକ୍‌ସା ପ୍ରସ୍ତୁତ, ଛାତ୍ରଛାତ୍ରୀ, ପ୍ରଧାନଶିକ୍ଷକଙ୍କ ସହ 5T ସଚିବଙ୍କ ଆଲୋଚନା ଆରମ୍ଭ

ଭୁବନେଶ୍ବର: 5T ସ୍କୁଲ ରୂପାନ୍ତର କାର୍ଯ୍ୟକ୍ରମ, ଛାତ୍ରଛାତ୍ରୀ ତଥା ଅଭିବାବକଙ୍କ ମଧ୍ୟରେ ବିପୁଳ ଉତ୍ସାହ ସୃଷ୍ଟି କରିଛି। ସ୍କୁଲ ଭିତ୍ତିଭୂମିର ରୂପାନ୍ତର ସହିତ ପାଠ ପଢିବା ପାଇଁ ନୂତନ ସୁବିଧା ସୁଯୋଗର ବିକାଶ ଯଥା E ଲାଇବ୍ରେରୀ, ଅଧୁନିକ ବିଜ୍ଞାନାଗାର, ସ୍ମାର୍ଟ କ୍ଲାସରୁମ  ଇତ୍ୟାଦି ପିଲାମାନଙ୍କ ଭିତରେ ପାଠ ପଢିବା ପାଇଁ ଆଗ୍ରହ ସୃଷ୍ଟି କରିଥିବା ପରିଲକ୍ଷିତ ହେଉଛି।

ଏ ପର୍ଯ୍ୟନ୍ତ ରାଜ୍ୟରେ ତିନୋଟି ପର୍ଯ୍ୟାୟରେ ୬୮୮୩ ହାଇସ୍କୁଲ ରୂପାନ୍ତର କାମ ସମ୍ପୂର୍ଣ୍ଣ ହୋଇଛି। ଡିସେମ୍ବର ୨୦୨୩ ସୁଦ୍ଧା ରାଜ୍ୟର ସମସ୍ତ ୮୬୫୪ ସରକାରୀ ହାଇସ୍କୁଲ ଗୁଡିକରେ ରୂପାନ୍ତର କାମ ଶେଷ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିର୍ଦ୍ଦେଶ ଦେଇଛନ୍ତି।

ଏ ପରିପେକ୍ଷୀରେ 5T ସଚିବ ଶ୍ରୀ ଭି.କେ. ପାଣ୍ଡିଆନ ଗତକାଲି ଓ ଆଜି ଦୁଇଦିନ ଧରି ଗଂଜାମ, ବରଗଡ, କେନ୍ଦୁଝର, କଟକ, ମୟୁରଭଞ୍ଜ, ମାଲକାନଗିର, ପୁରୀ, ଗଜପତି, ଢେଙ୍କାନାଳ ଆଦି ୯ଟି ଜିଲ୍ଲାର ୧୦୧ଟି ବ୍ଲକର ଓ ୨ଟି ମୁନିସିପାଲିଟି କର୍ପୋରେସନର ୭୫୨ଟି ହାଇସ୍କୁଲର ପ୍ରଧାନଶିକ୍ଷକ, ଛାତ୍ରଛାତ୍ରୀ, ପୁରାତନ ଛାତ୍ରଛାତ୍ରୀ, ସରପଞ୍ଚ ଓ ସ୍କୁଲ ପରିଚାଳନା କମିଟିର ସଦସ୍ୟମାନଙ୍କ ସହିତ ମାରାଥନ ବୈଠକ କରି ସେମାନଙ୍କ ସ୍କୁଲରେ 5T ସ୍କୁଲ ରୂପାନ୍ତର କାର୍ଯ୍ୟକ୍ରମ କିଭଳି କାର୍ଯ୍ୟକାରୀ କରାଯିବ ସେ ସମ୍ପର୍କରେ ବିସ୍ତୃତ ଆଲୋଚନା କରିଛନ୍ତି। ଆଲୋଚନା ସମୟରେ ଛାତ୍ରଛାତ୍ରୀମାନେ ବିଶେଷ ଭାବରେ ଅଂଶ ଗ୍ରହଣ କରିଥିଲେ। ସେମାନଙ୍କ ଆବଶ୍ୟକତା ସମ୍ପର୍କରେ ଖୋଲା ମତ ପୋଷଣ କରିଥିଲେ।

ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀଙ୍କ ନିର୍ବାଚନ ମଣ୍ଡଳୀ ହିଞ୍ଜଳି ଶେରଗଡରୁ ୨୦୨୧ ମସିହାରୁ ଆରମ୍ଭ ହୋଇଥିଲା 5T ସ୍କୁଲ ରୂପାନ୍ତର କାର୍ଯ୍ୟକ୍ରମ। ତିନୋଟି ପର୍ଯ୍ୟାୟରେ ସାରା ରାଜ୍ୟରେ ୬୮୮୩ ଟି ହାଇସ୍କୁଲର ରୂପାନ୍ତର ପ୍ରକ୍ରିୟା ସମ୍ପୂର୍ଣ୍ଣ ହୋଇଛି । ଚତୁର୍ଥ ପର୍ଯ୍ୟାୟରେ ୧୭୭୧ ହାଇସ୍କୁଲ ରୂପାନ୍ତର ଏହି ପ୍ରକ୍ରିୟାକୁ ଚୁଡାନ୍ତ ରୂପ ଦେବ। ରାଜ୍ୟର ସମସ୍ତ ୮୬୫୪ ଟି ହାଇସ୍କୁଲର ଭିତ୍ତିଭୂମି ରୂପାନ୍ତର ସମ୍ପୂର୍ଣ୍ଣ ହେବ  । 5T ସ୍କୁଲ ରୂପାନ୍ତର କାର୍ଯ୍ୟକ୍ରମ ଆଜି ଅନ୍ୟ ରାଜ୍ୟମାନଙ୍କ ପାଇଁ ଏକ ମଡେଲ ହେବା ସଙ୍ଗେ ସଙ୍ଗେ ସରକାରୀ ଶିକ୍ଷାନୁଷ୍ଠାନ ପ୍ରତି ଛାତ୍ରଛାତ୍ରୀ ତଥା ଅଭିବାବକଙ୍କ ଆଗ୍ରହ ବୃଦ୍ଧିରେ ସହାୟକ ହୋଇପାରିଛି ।

‘ଇଣ୍ଡିଆ’ର ଗାଇଡଲାଇନ, ବିରୋଧୀ ଦଳ ନେତାଙ୍କୁ ଲାଲୁ କହିଲେ ଗୋଡ଼ ଟଣାଟଣି ବନ୍ଦ ହେଉ

ନନ୍ଦିଘୋଷ ବ୍ୟୁରୋ: ବେଙ୍ଗାଲୁରୁରେ ବିରୋଧୀ ଦଳ ବୈଠକ ସରିବା ପରେ ମହାମେଣ୍ଟକୁ ଏକ ନୂଆ ନାଁ ମିଳିଯାଇଛି  । ନାଁ  ମିଳିବା ପରେ ବିରୋଧୀ ମେଳି ପରସ୍ପର ପାଇଁ କିଛି ଗାଇଡଲାଇନ ମାନିବାକୁ ପରାମର୍ଶ ଦେଇଛନ୍ତି  । ଅନେକ ପ୍ରସଙ୍ଗକୁ ନେଇ ବିରୋଧୀ ମେଳି ପରସ୍ପରକୁ କଟାକ୍ଷ କରିବା ଘଟଣା ଅତୀତରେ ଦେଖିବାକୁ ମିଳିଛି  । ପରସ୍ପରକୁ ଟାର୍ଗେଟ କରିବା ଘଟଣା ଏବେ ଏନଡିଏକୁ ପାୱାର ଯୋଗାଇବା ଲକ୍ଷ୍ୟ କରି କିଛି ନୂଆ ନିଷ୍ପତ୍ତି ନେଇଛନ୍ତି ବିରୋଧୀ ଦଳ ।

ବିରୋଧୀ ମେଳିର ନାଁ ଇଣ୍ଡିଆ ରଖାଯାଇଥିବାବେଳେ ପରସ୍ପର ସହ ସମନ୍ବୟ ଓ ସହଯୋଗ ରଖିବା ପାଇଁ ଜଣେ ସଂଯୋଜକଙ୍କୁ ଦାୟିତ୍ବ ଦେବାପାଇଁ ନିଷ୍ପତ୍ତି ହୋଇଛି  । ସୋନିଆ ଗାନ୍ଧୀ କିମ୍ବା ନିତିଶ କୁମାରଙ୍କ ମଧ୍ୟରୁ କାହାକୁ ବି ଏହି ଦାୟିତ୍ବ ମିଳିପାରେ  । ସୋନିଆ ଗାନ୍ଧୀଙ୍କୁ ସମର୍ଥନ ଦେବାରେ କୌଣସି ବିରୋଧୀ ଦଳଙ୍କ ଆପତ୍ତି ନଥିବା  ଜଣାପଡୁଛି  ।

ସେହିପରି ବିରୋଧୀ ଦଳ ପରସ୍ପର ମଧ୍ୟରେ ଥିବା ତିକ୍ତତାକୁ ଭୁଲି ଯେପରି ଟାର୍ଗେଟ ନ କରିବେ ସେ ନେଇ ବୈଠକରେ ନିଷ୍ପତ୍ତି ହୋଇଛି  । ବୈଠକରେ ବରିଷ୍ଠ ନେତା ଲାଲୁ ଯାଦବ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭରପୁର ସମର୍ଥନ କରିଛନ୍ତି  । କଂଗ୍ରେସ ଓ ତାର ନେତାମାନେ ମମତାଙ୍କ ବିରୋଧରେ ବୟାନ ନ ଦେବାକୁ ସେ ନିବେଦନ କରିଛନ୍ତି  । ବାମଦଳକୁ ବି ସେ ମଧ୍ୟ ସମାନ ଅନୁରୋଧ କରିଛନ୍ତି  ।

ପଶ୍ଚିମବଙ୍ଗ ପଞ୍ଚାୟତ ନିର୍ବାଚନ ପରେ ପ୍ରଥମ ଥର ଏହି ବୈଠକରେ ସୋନିଆ ଗାନ୍ଧୀ ଓ ମମତା ବାନାର୍ଜୀ ମୁହାଁମୁହିଁ ହୋଇଛନ୍ତି  । ବୈଠକରେ ଉଭୟଙ୍କୁ ୨୦ ମିନିଟ ଧରି କଥା ହେଉଥିବା ଦେଖିବାକୁ ମିଳିଛି  । ବାମଦଳ ଓ କଂଗ୍ରେସ ମେଣ୍ଟ ସହ ଲଢେଇ କରି ମମତାଙ୍କ ଟିଏମସି ପଞ୍ଚାୟତ ନିର୍ବାଚନରେ ବାଜିମାତ କରିଛି  ।

ଉତ୍ତରରୁ ପଶ୍ଚିମ ଭାରତ ସବୁଠି ଜଳପ୍ରଳୟ, ବୁଡ଼ିଛି ଘର ଓ ରାସ୍ତାରେ ଭାସୁଛି କାର୍

ନୂଆଦିଲ୍ଲୀ: ପଶ୍ଚିମରୁ ଉତ୍ତର ସବୁଠି ଜଳ ପ୍ରଳୟର ଚିତ୍ର । ମୌସୁମୀ ବର୍ଷାରେ ଉବୁଟୁବୁ ଅଧା ଭାରତ । ଗୁଜରାଟରୁ ମହାରାଷ୍ଟ୍ର, ଦିଲ୍ଲୀରୁ ଜାମ୍ମୁ-କାଶ୍ମୀର ସବୁ ଆଡ଼େ ବନ୍ୟା ବିପତ୍ତି । ବର୍ଷା ପରେ ଗୁଜରାଟ ଅଧିକାଂଶ ଜିଲ୍ଲା ଜଳମଗ୍ନ । ସହରରୁ ଗାଁ ସବୁଠି ଜଳାର୍ଣ୍ଣବ ସ୍ଥିତି । ବୁଡ଼ିଛି ଘର, ରାସ୍ତାରେ ଭାସୁଛି ଶହ ଶହ କାର୍ । ଲଗାଣ ବର୍ଷା ଯୋଗୁ ରାଜକୋଟ, ସୁରଟ, ଗିରି ସୋମନାଥ ଆଦି ଜିଲ୍ଲାରେ କିଛି ଘଣ୍ଟାରେ ୩ ଶହ ମିମି ବର୍ଷା ପରେ ଓ୍ବାଟରଲଗିଂ ସ୍ଥିତି ଉପୁଜିଛି । ଆଜି ସୌରାଷ୍ଟ୍ର ସମେତ ଅନ୍ୟ କିଛି ଜିଲ୍ଲାରେ ଆଜି ପ୍ରବଳରୁ ଅତି ପ୍ରବଳ ବର୍ଷା ସମ୍ଭାବନା ରହିଥିବା ପୂର୍ବାନୁମାନ କରିଛି ପାଣିପାଗ ବିଭାଗ । ରେସ୍କ୍ୟୁ ପାଇଁ ଏନଡିଆରଏଫ ଓ ଏସଡିଆରଏଫ୍ ଟିମକୁ ଆଲର୍ଟରେ ରଖାଯାଛି ।

ସେପଟେ ଯମୁନା ଜଳସ୍ତର ବୃଦ୍ଧି ଯୋଗୁ ତାଜମହଲ ପାଚେରି ଛୁଇଁଛି ବନ୍ୟାଜଳ । ପର୍ଯ୍ୟଟକମାନେ ତାଜମହଲ ଉପରେ ବନ୍ୟାପାଣିର ଫଟୋ ଉଠାଉଥିବା ଦେଖାଯାଛି । ମହାରାଷ୍ଟ୍ରରେ ବି ପ୍ରବଳ ବର୍ଷା ଯୋଗୁ କିଛି ଜିଲ୍ଲାରେ ବନ୍ୟା ସ୍ଥିତି ଉପୁଜିଛି । ଅନ୍ୟପଟେ ଅବିଶ୍ରାନ୍ତ ବର୍ଷା ସାଙ୍ଗକୁ ଲ୍ୟାଣ୍ଡସ୍ଲାଇଡ୍ ଯୋଗୁ ଜାମ୍ମୁ-କାଶ୍ମୀରରେ ସ୍ଥିତି ଗମ୍ଭୀର ହୋଇଛି । ପ୍ରବଳ ବର୍ଷା ପରେ ନଦୀ ଜଳସ୍ତର ବୃଦ୍ଧି ପାଉଥିବା ବେଳେ ସମ୍ଭାବ୍ୟ ବନ୍ୟା ସ୍ଥିତି ଉପୁଜିଛି । କାଠୁଆ ଜିଲ୍ଲାରେ ୬ରୁ ଅଧିକ ଘରର କାନ୍ଥ ଭୁଶୁଡ଼ି ପଡ଼ିଥିବା ବେଳେ ୪ଜଣଙ୍କର ମୃତ୍ୟୁ ହୋଇଛି । ସାରମୋଲିଠାରେ ଲ୍ୟାଣ୍ଡସ୍ଲାଇଡ୍ ଯୋଗୁ ଜାମ୍ମୁ-ଶ୍ରୀନଗର ହାଇଓ୍ବେର ଗୋଟିଏ ପଟେ ଯାନବାହନ ଚଳାଚଳ ଠପ୍ ହୋଇଯାଇଛି । ସପ୍ତାହେ ପରେ ଦିଲ୍ଲୀରେ ବନ୍ୟାସ୍ଥିତିରେ ସୁଧାର ଆସିଛି । ପାଣି ଛାଡ଼ିବା ପରେ ଅଧିକାଂଶ ରାସ୍ତାରେ ଗାଡ଼ି ମୋଟର ଚଳାଚଳ ସ୍ବାଭାବିକ ହୋଇଛି । ଆସାମର କିଛି ଜିଲ୍ଲା ଏବେ ବି ପାଣିଘେରରେ ରହିଛି । ପ୍ରଭାବିତ ଅଞ୍ଚଳରେ ରିଲିଫ ଯୋଗାଣ ସହ ରେସ୍କ୍ୟୁ ଅପରେସନ ଜାରି ରହିଛି ।

ଉତ୍ତରାଖଣ୍ଡ ଚମୋଲିରେ ବିଦ୍ୟୁତ୍ ହରର, କରେଣ୍ଟ ଲାଗି ୪ ପୋଲିସ ସମେତ ୧୫ ମୃତ

ଚମୋଲି: ଉତ୍ତରାଖଣ୍ଡ ଚମୋଲିରେ ବିଦ୍ୟୁତ୍ ହରର । କରେଣ୍ଟ ଲାଗି ୧୫ ଜଣଙ୍କ ମୃତ୍ଯୁ ଘଟିଥିବାବେଳେ ଅନେକ ଲୋକ ଆହତ ହୋଇଥିବା ସୂଚନା ମିଳିଛି । ନମାମି ଗଙ୍ଗେ ପ୍ରୋଜେକ୍ଟରେ ଅଳକାନନ୍ଦା ନଦୀରେ ପ୍ରକଳ୍ପ କାର୍ଯ୍ୟ ଚାଲିଥିବାବେଳେ ଟ୍ରାନ୍ସଫର୍ମର ଅକସ୍ମାତ ବିସ୍ଫୋରଣ ଘଟିବାରୁ ଏହି ଦୁର୍ଘଟଣା ଘଟିଥିଲା । ଆହତ ୫ ଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏହି ଘଟଣାର ନ୍ୟାୟିକ ତଦନ୍ତ ନିର୍ଦ୍ଦେଶ ଦେଇଛନ୍ତି ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ।

ମୃତକଙ୍କ ମଧ୍ୟରେ ଅଛନ୍ତି ଜଣେ ପୋଲିସ ସବଇନ୍ସପେକ୍ଟର ଓ ୩ ଜଣ ହୋମଗାର୍ଡ । ଦୁର୍ଘଟଣାରେ ୧୫ ଜଣଙ୍କ ମୃତ୍ୟୁ ଘଟିଛି ବୋଲି କହିଛନ୍ତି ପୋଲିସ ଡିଜି ଅଶୋକ କୁମାର । ପ୍ରବଳ ବର୍ଷା ଓ ବନ୍ୟା ଯୋଗୁ ଟ୍ରାନ୍ସଫର୍ମର ପାଣିରେ ବୁଡ଼ି ରହିଥିଲା । ଓଦା ଥିବାରୁ ଆଜି ସକାଳୁ ଟ୍ରାନ୍ସଫର୍ମର ଅନ୍ କରିବା ମାତ୍ରେ ଏହା ବ୍ଲାଷ୍ଟ କରିଥିଲା । ଘଟଣାସ୍ଥଳରେ ଏସଡିଆରଏଫ ଉଦ୍ଧାର କାର୍ଯ୍ୟ ଜାରି ରଖିଛନ୍ତି ।

 

ସଂସଦ ମୌସୁମୀ ଅଧିବେଶନ ପୂର୍ବରୁ ସର୍ବଦଳୀୟ ବୈଠକ, ସୁରୁଖୁରୁରେ ଅଧିବେଶନ ପାଇଁ ହେବ ଆଲୋଚନା

ନୂଆଦିଲ୍ଲୀ: ଆସନ୍ତାକାଲିଠୁ ସଂସଦ ମୌସୁମୀ ଅଧିବେଶନ । ସୁରୁଖୁରୁରରେ ଗୃହ ପରିଚାଳନା ନେଇ ଆଜି ସର୍ବଦଳୀୟ ବୈଠକ ଡାକିଛନ୍ତି ବାଚସ୍ପତି । ବୈଠକରେ ପ୍ରଧାନମନ୍ତ୍ରୀଙ୍କ ସମେତ ସମସ୍ତ ମନ୍ତ୍ରୀ ଓ ବିରୋଧୀ ଦଳ ସାଂସଦମାନେ ଯୋଗଦେବେ । କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀଙ୍କ ଅଧ୍ୟକ୍ଷତାରେ ବୈଠକ ବସିବ । ଆଜି ବୈଠକରେ ବିଜେଡି ଲୋକସଭା ସଂସଦୀୟ ଦଳ ନେତା ପିନାକୀ ମିଶ୍ର ଏବଂ ରାଜ୍ୟସଭା ସଂସଦୀୟ ଦଳ ନେତା ସସ୍ମିତ ପାତ୍ର ଉପସ୍ଥିତ ରହିବେ ।

ସେପଟେ ସଂସଦ ଅଧିବେଶନରେ ସରକାରଙ୍କୁ ବିଭିନ୍ନ ପ୍ରସଙ୍ଗରେ ଘେରିବାକୁ ରଣନୀତି ପ୍ରସ୍ତୁତ କରିଛନ୍ତି ବିରୋଧୀ । ଦରବୃଦ୍ଧି, ରେଳ ସୁରକ୍ଷା ଓ ମଣିପୁର ହିଂସା ଆଦି ପ୍ରସଙ୍ଗରେ ସରକାରଙ୍କୁ ଘେରିବାକୁ ବିରୋଧୀ ମାଷ୍ଟର ପ୍ଲାନ ପ୍ରସ୍ତୁତ କରିଛନ୍ତି । ଦିଲ୍ଲୀରେ କେନ୍ଦ୍ର ଆଣିଥିବା ନୂଆ ଅଧ୍ୟାଦେଶ ରାଜ୍ୟସଭାରେ ପାସ୍ କରାଇ ନଦେବାକୁ ସବୁ ବିରୋଧୀ ଏକ ହୋଇ ବିରୋଧ କରିବାକୁ ମଧ୍ୟ ରଣନୀତି କରାଯାଇଛି । ଏଥର ମନସୁନ ସେସନରେ ୨୧ଟି ନୂଆ ବିଲ ପାରିତ କରିବାକୁ ଶାସକ ଦଳ ଯୋଜନା କରିଛନ୍ତି । ଆସନ୍ତାକାଲିଠୁ ଆରମ୍ଭ ହେଉଥିବା ମୌସୁମୀ ଅଧିବେଶନ ଅଗଷ୍ଟ ୧୧ ତାରିଖ ପର୍ଯ୍ୟନ୍ତ ଚାଲିବ । ଏଥର ପାର୍ଲାମେଣ୍ଟରେ ଓଡ଼ିଶାକୁ କେନ୍ଦ୍ରୀୟ ଅବହେଳା ପ୍ରସଙ୍ଗ ଉଠାଇବ ବିଜେଡି ।

ବିରୋଧୀ ମେଣ୍ଟ ଇଣ୍ଡିଆର ଟ୍ୟାଗ ଲାଇନ ରହିଲା ’ଜିତେଗା ଭାରତ’

ନୂଆଦିଲ୍ଲୀ: ବିରୋଧୀ ମେଣ୍ଟର ନାମ ଇଣ୍ଡିଆ ରହିଥିବାବେଳେ ଏହାର ଟ୍ୟାଗ୍ ଲାଇନ୍ ରହିବ ’ଜିତେଗା ଭାରତ’ । ଏନେଇ ମିଳିତ ବିରୋଧୀ ଦଳ ପକ୍ଷରୁ ସହମତି ସୃଷ୍ଟି ହୋଇଛି । ଆସନ୍ତା ୨୦୨୪ ନିର୍ବାଚନ ଲାଗି ବିଜେପି ବିରୋଧରେ ୨୬ ଦଳର ମହାମେଣ୍ଟ ଗଠିତ ହେବା ପରେ ଏହାର ଟ୍ୟାଗ ଲାଇନ୍ ’ଜିତେଗା ଭାରତ’ ରଖାଯାଇଛି । ଗତକାଲି ରାତିରେ ବିଭିନ୍ନ ବିରୋଧୀ ଦଳ ପରସ୍ପର ସହ ଆଲୋଚନା କରିବା ପରେ ଟ୍ୟାଗଲାଇନ୍ ନେଇ ସହମତି ସୃଷ୍ଟି ହୋଇଥିଲା । ଏହି ଟ୍ୟାଗଲାଇନକୁ ବିଭିନ୍ନ ଆଞ୍ଚଳିକ ଭାଷାରେ ଅନୁଦିତ କରାଯିବ । ଗତ ଦୁଇ ଦିନ ଧରି ବେଙ୍ଗାଲୁରୁରେ ବସିଥିବା ୨୬ଟି ଦଳର ବୈଠକରେ ଇଣ୍ଡିଆନ ନ୍ଯାସନାଲ ଡେଭଲପମେଣ୍ଟାଲ ଇନକ୍ଲୁସିଭ ଆଲାଏନ୍ସ ବା ଇଣ୍ଡିଆ ନାମରେ ମେଣ୍ଟକୁ ନାମିତ କରାଯାଇଥିଲା । ବିରୋଧୀ ମେଣ୍ଟର ନାମ ଘୋଷଣା ପରେ କଂଗ୍ରେସ ନେତା ରାହୁଲ ଗାନ୍ଧି କହିଥିଲେ- ବିଜେପିର ଆଦର୍ଶ ବିରୋଧରେ ଆସନ୍ତା ୨୦୨୪ରେ ବିରୋଧୀ ସଂଗ୍ରାମ କରିବେ ।

ବେଙ୍ଗାଲୁରୁରେ ଟେରର ଆଟାକ ପ୍ଲାନ୍, ୫ ସନ୍ଦିଗ୍ଧ ଗିରଫ

ବେଙ୍ଗାଲୁରୁ: ବେଙ୍ଗାଲୁରୁରେ ଟେରର ଆଟାକ ପ୍ଲାନ୍ । ୫ ସନ୍ଦିଗ୍ଧ ଗିରଫ । ସିଲ୍କ୍ ସିଟିରେ ଆତଙ୍କୀ ହମଲା ଯୋଜନା କରୁଥିବା ୫ ଜଣ ସନ୍ଦିଗ୍ଧଙ୍କୁ ଗିରଫ କରିଛି ସେଣ୍ଟ୍ରାଲ କ୍ରାଇମ୍ ବ୍ରାଞ୍ଚ୍ । ISI ସହ ସେମାନଙ୍କର ଲିଙ୍କ୍ ଥିବା ସନ୍ଦେହ କରୁଛି ସିସିବି ଟିମ୍ । ଧର୍ମାନ୍ତୀକରଣ ସହ କିଛି ଆତଙ୍କୀ ଗତିବିଧିରେ ସେମାନଙ୍କର ସମ୍ପୃକ୍ତି ଥିବା ସୂଚନା ପାଇଥିଲା ସେଣ୍ଟ୍ରାଲ କ୍ରାଇମ ବ୍ରାଞ୍ଚ ଟିମ୍ । ଗିରଫ ବେଳେ ସେମାନଙ୍କ ନିକଟରୁ କିଛି ବିସ୍ଫୋରକ ସାମଗ୍ରୀ ମଧ୍ୟ ଜବତ ହୋଇଛି । ସେମାନଙ୍କ ସହ ଅନ୍ୟ ୫ ଜଣଙ୍କର ସମ୍ପୃକ୍ତି ରହିଥିବା ସନ୍ଦେହ କରୁଛି ଯାଞ୍ଚ ଏଜେନ୍ସି ।

ସମସ୍ତ ଅଭିଯୁକ୍ତ ୨୦୧୭ରେ ଏକ ମର୍ଡର କେସର ଅଭିଯୁକ୍ତ ଥିବା ବେଳେ ବେଙ୍ଗାଲୁରୁ ସେଣ୍ଟ୍ରାଲ ଜେଲରେ କଏଦୀ ଥିଲେ । ଏହି ସମୟରେ କେତେଜଣ ଆତଙ୍କବାଦୀଙ୍କ ସହ ସେମାନଙ୍କର ଯୋଗାଯୋଗ ହୋଇଥିଲା । ସେମାନେ ବିସ୍ଫୋରକ ରଖିବା ଓ ଏହାର ବ୍ୟବହାର ନେଇ ପ୍ରଶିକ୍ଷଣ ନେଇଥିଲେ ବୋଲି ପୋଲିସ କହିଛି । ସହରରେ ବ୍ଲାଷ୍ଟିଂ ଯୋଜନା ସମ୍ପର୍କରେ ସୂଚନା ମିଳିବା ପରେ ସିସିବି ଟିମ୍ ୫ ଜଣଙ୍କୁ ଗିରଫ କରିଛି ।

ଫୁପି,ଫଳ କୋଡ୍ ୱାର୍ଡ୍ ନେଇ ସୀମାକୁ ଜେରା କରୁଛି ୟୁପି ଏଟିଏସ

ନୂଆଦିଲ୍ଲୀ: ନିଜ ପ୍ରେମ ପାଇଁ ପାକିସ୍ତାନରୁ ଭାରତ ଆସିଥିବା ସୀମା ହାଇଦରଙ୍କ ଉପରେ ଦିନକୁ ଦିନ ସନ୍ଦେହ ବଢ଼ିବାରେ ଲାଗୁଛି । ବେଆଇନ ଅନୁପ୍ରବେଶ ସମ୍ପର୍କରେ ଅନୁସନ୍ଧାନକାରୀ ଏଜେନ୍ସି ଲଗାତର ତାଙ୍କୁ ପଚରାଉଚରା କରୁଛନ୍ତି । ୟୁପି ଏଟିଏସ୍ ମଧ୍ୟ ଏହି ପ୍ରସଙ୍ଗରେ ସୀମା ହାଇଦରଙ୍କୁ ପଚରାଉଚରା କରୁଛି । ମୋବାଇଲ ଫୋନରେ ମେସେଜ୍ କରିବା କିମ୍ବା ଇଣ୍ଟରନେଟରେ ଚାଟିଂ କରିବା ସମୟରେ ସତର୍କ ରହିବାକୁ କହୁଯାଇଥିଲା କି ନାହିଁ ଏନେଇ ସୀମାକୁ ପ୍ରଶ୍ନ କରିଛି ୟୁପି ଏଟିଏସ୍ ।

ପ୍ରାରମ୍ଭିକ ସୂଚନା ଅନୁସାରେ ୟୁପି ଏଟିଏସ୍ ସୀମା ହାଇଦରଙ୍କୁ ପଚାରିଥିଲେ କି ଆପଣ ଯୋଗାଯୋଗ କରିବାକୁ କିଛି କୋଡ୍ ଓ୍ୱାର୍ଡ ବ୍ୟବହାର କରିଛନ୍ତି କି ? କୋଡ୍ ଓ୍ୱାର୍ଡ ’ଫୁଫି’ ଓ ’ଫଳ’ କେବେ ବ୍ୟବହୃତ ହୋଇଛି କି? ସୂଚନା ଅନୁସାରେ ଯିଏ ISIକୁ ଦେଶ ସହିତ ଜଡ଼ିତ କିଛି ସୂଚନା ପଠାଇବା ପାଇଁ କାମ କରେ ତାଙ୍କୁ ’ଫୁଫି’ କୁହାଯାଏ । ସେହିପରି ଟଙ୍କା ପାଇଁ ’ଫଳ’ କୋଡ୍ ଓ୍ୱାର୍ଡ ବ୍ୟବହାର କରଯାଏ ।

ସୀମା ହାଇଦର କିପରି ଏତେ ଶୁଦ୍ଧ ହିନ୍ଦୀ କହୁଛନ୍ତି ତାହା ଉପରେ ମଧ୍ୟ ପ୍ରଶ୍ନ ଉଠିଛି । ତୁମେ ଏପରି ଶୁଦ୍ଧ ହିନ୍ଦୀ କିପରି କହିପାରୁଛ ବୋଲି ସୀମା ହାଇଦରକୁ ପ୍ରଶ୍ନ କରିଛି ୟୁପି ଏଟିଏସ୍ । ସେହିପରି ହିନ୍ଦୁ ରୀତିନୀତି ବିଷୟରେ ଆପଣ କିପରି ଜାଣିଲ ? ନୋଏଡାର ରାବପୁରା ଗ୍ରାମରେ ପହଞ୍ଚିବାରେ ତାଙ୍କୁ କିଏ ସାହାଯ୍ୟ କରିଛି ବୋଲି ପ୍ରଶ୍ନ କରିଥିଲା ଏଟିଏସ୍ । ତେବେ ଏହି ସବୁ ପ୍ରଶ୍ନର ସଠିକ୍ ଉତ୍ତର ଦେଇପାରିନଥିଲା ସୀମା । ଏହା ସହ ଆଉ ଏକ ଚାଞ୍ଚଲ୍ୟକର ତଥ୍ୟ ହାସଲ କରିଛି ୟୁପି ଏଟିଏସ୍ । ସୀମା କିଛି ସେନା ଅଧିକାରୀଙ୍କ ପାଖକୁ ମଧ୍ୟ ଫ୍ରେଣ୍ଡ ରିକ୍ୟୁଷ୍ଟେ ପଠାଇଥିବା ଜାଣିବାକୁ ପାଇଛି ଏଟିଏସ୍ ।

ୟୁପି ଏଟିଏସ୍ ମଙ୍ଗଳବାର ରାତି ୮.୩୦ ପର୍ଯ୍ୟନ୍ତ ଏଟିଏସ୍ କାର୍ଯ୍ୟାଳୟରେ ସୀମାଙ୍କୁ ପଚରାଉଚରା କରିଥିଲା । ଏହାପରେ ତାଙ୍କୁ ରାବପୁରା ପୋଲିସ ଷ୍ଟେସନକୁ ନିଆଯାଇଥିଲା । ରାତି ୯ଟା ପର୍ଯ୍ୟନ୍ତ ରାବପୁରା ପୋଲିସ ଷ୍ଟେସନରେ ସୁରକ୍ଷିତ ଭାବରେ ରହିବା ପରେ ସୀମା ହାଇଦରଙ୍କୁ ଏକ୍ ସୁରକ୍ଷିତ ଘରେ ରଖିଛି ୟୁପି ଏଟିଏସ୍ ।