ଭୁବନେଶ୍ବର: ବଢ଼ି ଚାଲିଛି ପିଆଜ ଦର । ଚିନ୍ତାରେ ରହିଛନ୍ତି ଖାଉଟି। ଶତକ ଅଭିମୁଖେ ଏବେ ପିଆଜ ଦର । ତେବେ ହଠାତ ଏମିତି ପିଆଜର ଦରବୃଦ୍ଧି ହେବାର କାରଣ କଣ? ତାକୁ ନେଇ ସବୁଠି ଆରମ୍ଭ ହୋଇଛି ଚର୍ଚ୍ଚା । ସୂଚନା ଥାଉକି, ଓଡ଼ିଶା ପରି ଅନେକ ରାଜ୍ୟ ପିଆଜ ପାଇଁ ନାସିକ ଉପରେ ନିର୍ଭର କରନ୍ତି । ନାସିକରୁ ଯେଉଁ ପରିମାଣର ପିଆଜ ଆସିବା କଥା, ଆସୁନାହିଁ । ସେମାନେ କହୁଛନ୍ତି ଯେ ଭଲ ଅମଳ ହୋଇନି । କ’ଣ ସମସ୍ୟା ହୋଇଛି, କେନ୍ଦ୍ର ବିଚାରବିମର୍ଶ କରିବା ଦରକାର । ଦର ସାରା ଦେଶରେ ବଢୁଛି । ପିଆଜ ଆବଶ୍ୟକତା ଓ ଯୋଗାଣ ମେଳ ଖାଉନି । ତାକୁ ନିୟନ୍ତ୍ରଣ କରିବା କେନ୍ଦ୍ର ସରକାରଙ୍କ ଦାୟିତ୍ୱ ବୋଲି ଯୋଗାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି । ଏହା ଭିତରେ କେନ୍ଦ୍ରରେ ବୈଠକ ହେବା ଖବର ପାଇଛୁ. ହେଲେ ସେପରି କିଛି ପ୍ରତିଫଳନ ହେଉନି । କେନ୍ଦ୍ର ସରକାରଙ୍କ ଭୁଲ ନିଷ୍ପତ୍ତି ଯୋଗୁ ଦର ବଢୁଛି । ଆମେ ହୋର୍ଡିଂ କରୁଥିବା ଅସାଧୁ ବ୍ୟବସାୟୀଙ୍କ ଉପରେ କାର୍ଯ୍ୟାନୁଷ୍ଠାନ ନେଇଛୁ ବୋଲି ଖାଦ୍ୟ ଯୋଗାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି ।
ଆଜି ରାତିରୁ ବିକ୍ରି ହେବ ବିଶ୍ୱକପର ସେମିଫାଇନାଲ ଓ ଫାଇନାଲ ଟିକେଟ୍
ନୂଆଦିଲ୍ଲୀ: ଆଇସିସି ବିଶ୍ବକପ ୨୦୨୩ । ଗୁରୁବାର ରାତିରୁ ସେମିଫାଇନାଲ ଏବଂ ଫାଇନାଲ ସମେତ ବିଶ୍ୱକପ ନକ୍ ଆଉଟ୍ ଖେଳ ପାଇଁ ଏକ ଅନ୍ତିମ ସେଟ୍ ଟିକେଟ୍ ବିକ୍ରି ହେବ। ପ୍ରଥମ ସେମିଫାଇନାଲ ନଭେମ୍ବର ୧୫ ରେ ମୁମ୍ବାଇରେ ଏବଂ ଦ୍ୱିତୀୟ ନଭେମ୍ବର ୧୬ ରେ କୋଲକାତାରେ ଖେଳାଯିବ। ଫାଇନାଲ ନଭେମ୍ବର ୧୯ ରେ ଅହମ୍ମଦାବାଦରେ ଅନୁଷ୍ଠିତ ହେବ। ସମସ୍ତ ଗୁରୁତ୍ୱପୂର୍ଣ୍ଣ ସେମି ଓ ଫାଇନାଲ ମ୍ୟାଚ ପାଇଁ ଟିକେଟ୍ ଆଜି ଅଫିସିଆଲ୍ ୱେବସାଇଟରେ ରାତି ୮ଟାରୁ ବିକ୍ରି ହେବ । ‘ticket.cricketworldcup.com’ ୱେବସାଇଟକୁ ଯାଇ କ୍ରିକେଟ ପ୍ରେମୀ ଟିକେଟ କିଣିପରିବେ।
ଭାରତ, ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିଛନ୍ତି। ଚତୁର୍ଥ ସ୍ଥାନ ପାଇଁ ଯୁଦ୍ଧ ନ୍ୟୁଜିଲ୍ୟାଣ୍ଡ, ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ଟକ୍କର ହେବ। ଯେଉଁମାନେ ଆଠଟି ଖେଳରୁ ଚାରିଟି ବିଜୟ ହାସଲ କରିଛନ୍ତି। ଆଜି ନ୍ୟୁଜିଲ୍ୟାଣ୍ଡ ଓ ଶ୍ରୀଲଙ୍କା ମଧ୍ୟରେ ମୁକାବିଲା ରହିଛି। ନ୍ୟୁଜିଲ୍ୟାଣ୍ଡ ଜଦି ଆଜିର ମ୍ୟାଚ ଜିତି ନିଏ ତେବେ ଚତୁର୍ଥ ସ୍ଥାନ ପାଇଁ ସେମିରେ ପ୍ରେବଶ କରିବାର ପ୍ରମୁଖ ଦାବିଦର ରହିବ।
ବିଶ୍ବକପ ୨୦୨୩: ସେମି ପାଇଁ ଆଜି ଶ୍ରୀଲଙ୍କା ସହ ଲଢ଼ୁଛି ନ୍ୟୁଜିଲାଣ୍ଡ
ସେମି ଆଶା ପକ୍କା କରିବାକୁ ଆଜି ଶ୍ରୀଲଙ୍କା ସହ ଲଢୁଛି ନ୍ୟୁଜିଲାଣ୍ଡ । ସେମିର ୪ର୍ଥ ଦଳ ଦୌଡ଼ରେ ଏବେ ରହିଛନ୍ତି ନ୍ୟୁଜିଲାଣ୍ଡ ଓ ପାକିସ୍ତାନ । ନ୍ୟୁଜିଲାଣ୍ଡ ଓ ପାକିସ୍ତାନ ଯଦି ନିଜ ନିଜର ଶେଷ ମ୍ୟାଚ ଜିତନ୍ତି ତେବେ ନେଟ୍ ରନରେଟ ଅନୁସାରେ ୪ର୍ଥ ଦଳ ନିର୍ଦ୍ଧାରଣ ହେବ । ବର୍ତ୍ତମାନର ରନରେଟ ଅନୁସାରେ ନ୍ୟୁଜିଲାଣ୍ଡ ପାକିସ୍ତାନଠାରୁ ଆଗୁଆ ରହିଛି । ବେଙ୍ଗାଲୁରୁର ଚିନ୍ନାସ୍ବାମୀ ଷ୍ଟାଡିୟମଠାରେ ନ୍ୟୁଜିଲାଣ୍ଡ ନିଜର ଶେଷ ଲିଗ୍ ମ୍ୟାଚ ଶ୍ରୀଲଙ୍କା ବିପକ୍ଷରେ ଖେଳିବ ।
ଆଫଗାନିସ୍ତାନକୁ ଅଷ୍ଟ୍ରେଲିଆ ପରାଜିତ କରିବା ପାକିସ୍ତାନ ଓ ନ୍ୟୁଜିଲାଣ୍ଡ ପାଇଁ ଖୁସି ଖବର ଆଣିଛି । ଉଭୟ ଟିମର ସେମିଫାଇନାଲ ଟିକେଟ ହାତେଇବା ଆଶା ଆହୁରି ଉଜ୍ଜିବୀତ ହୋଇଛି । ଆଜି ନ୍ୟୁଜିଲାଣ୍ଡ ବିଜୟୀ ହେଲେ ସେମିଫାଇନାଲ ରେସରେ ସବୁଠୁ ଆଗରେ ରହିବ ।
ମାତ୍ର ନ୍ୟୁଜିଲାଣ୍ଡ ଶ୍ରୀଲଙ୍କା ନିକଟରୁ ପରାଜିତ ହେଲେ ପାକିସ୍ତାନ ଶେଷ ମ୍ୟାଚରେ ଇଂଲଣ୍ଡକୁ ହରାଇ ସେମିଫାଇନାଲରେ ପହଞ୍ଚିପାରିବ । କିନ୍ତୁ ନ୍ୟୁଜିଲାଣ୍ଡ ଓ ଶ୍ରୀଲଙ୍କା ମ୍ୟାଚରେ ବର୍ଷା ସମ୍ଭାବନା ରହିଛି, ଯଦି ବର୍ଷା ହୁଏ ତେବେ ନ୍ୟୁଜିଲାଣ୍ଡକୁ ଏକ ପଏଣ୍ଟ ମିଳିବ । ଯାହା ପାକିସ୍ତାନ ଓ ଆଫଗାନିସ୍ତାନର ସେମିଫାଇନାଲ ସମ୍ଭାବନାକୁ ଆହୁରି ବଳ ଯୋଗାଇବ ।
୧୦ ତାରିଖରେ ଦକ୍ଷିଣ ଆଫ୍ରିକା ବିପକ୍ଷରେ ଆଫଗାନିସ୍ତାନ ମୈଦାନକୁ ଓହ୍ଲାଇବାକୁ ଥିବାବେଳେ ୧୧ ତାରିଖରେ ଇଂଲଣ୍ଡ ବିପକ୍ଷରେ ଖେଳିବ ପାକିସ୍ତାନ । ତେବେ ଆଜି ଶ୍ରୀଲଙ୍କା ବିପକ୍ଷରେ ବୃହତ ବିଜୟ ହାସଲ କରି ପାକିସ୍ତାନ ଓ ଆଫଗାନିସ୍ତାନର ସେମିଫାଇନାଲ ଆଶା ଧୂଳିସାତ କରିବାକୁ ଆଶା ରଖିଛି ନ୍ୟୁଜିଲାଣ୍ଡ ।
ତାମିଲନାଡୁରେ ବର୍ଷା ବିତ୍ପାତ , ଭୂସ୍ଖଳନ ପରେ ୫ ଜିଲ୍ଲାରେ ସ୍କୁଲ ବନ୍ଦ ଘୋଷଣା
ଚେନ୍ନାଇ : ତାମିଲନାଡୁରେ ପ୍ରବଳ ବର୍ଷା । ଭୂସ୍ଖଳନ ପରେ କୋଏମ୍ବାଟୁର ରାସ୍ତା ଅବରୋଧ , ୫ଜିଲ୍ଲାରେ ସ୍କୁଲ ବନ୍ଦ । ତାମିଲନାଡୁରେ ଭୀଷଣ ବର୍ଷାରେ ଜନଜୀବନ ହୋଇଛି ଅସ୍ତବ୍ୟସ୍ତ । ଗୁରୁବାର କୁନଜପା ପଣାଇରେ ଭୂସ୍ଖଳନ ପରେ ରାସ୍ତା ଅବରୋଧ ହୋଇଛି । ତିରୁପୁର,ମଦୁରାଇ,ଥେନି,ଡିନିଡୁଗୁଲ ଏବଂ କିଛି ତାଲୁକରେ ସ୍କୁଲ ଦିନକ ପାଇଁ ବନ୍ଦ ରଖିଛନ୍ତି ସରକାର ।
ଭାରତୀୟ ପାଣିପାଗ ବିଭାଗ-ଆଇଏମଡିଙ୍କ ଆକଳନ ଅନୁସାରେ ଆସନ୍ତା ୩ଦିନ ପର୍ଯ୍ୟନ୍ତ ତାମିଲନାଡୁ ଓ କେରଳର ବିଭିନ୍ନ ସ୍ଥାନରେ ପ୍ରବଳ ବର୍ଷା ନେଇ ହାଇଆଲର୍ଟ ଜାରି କରାଯାଇଛି ।ସେପଟେ ଘୂର୍ଣ୍ଣିବଳୟ ପ୍ରଭାବରେ ଆସନ୍ତା ୨୪ ଘଣ୍ଟା ପ୍ରର୍ଯ୍ୟନ୍ତ ୧୪ଟି ଜିଲ୍ଲାରେ ଭୀଷଣ ବର୍ଷା ନେଇ ହାଇଆଲର୍ଟ ଜାରି କରାଯାଇଛି ।
କ୍ଷେତ୍ରୀୟ ମୌସୁମୀ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି ଆସନ୍ତା ୨ଦିନ ପର୍ଯ୍ୟନ୍ତ ତାମିଲନାଡୁରେ ପୂର୍ବତଟ ମୌସୁମୀ ବାୟୁ ପବାହ ତୀବ୍ର ହେବା କାରଣରୁ ଅଧିକାଂଶ ଜିଲ୍ଲାରେ ବ୍ୟାପକ ବର୍ଷା ହେବାର ସମ୍ଭାବନା ରହିଛି ।
ଜମ୍ମୁ କାଶ୍ମୀର ସୋପିଆନ ଅଞ୍ଚଳରେ ଗୁଳି ବିନିମୟ : ଜଣେ ଆତଙ୍କବାଦୀ ନିପାତ
ଶ୍ରୀନଗର : ଜମ୍ମୁ କାଶ୍ମୀରରେ ସେନାର ଏନକାଉଣ୍ଟର । ଯବାନଙ୍କ ସହ ଗୁଳିବିନିମୟରେ ଜଣେ ଆତଙ୍କଦାବୀ ନିପାତ ହୋଇଛି । ସୋପିଆନରେ ଆଜି ସକାଳୁ ସୁରକ୍ଷାକର୍ମୀଙ୍କ ସହ ମୁହାଁମୁହିଁ ହୋଇଥିଲେ ଆତଙ୍କବାଦୀ । ସୁରକ୍ଷାକର୍ମୀଙ୍କ ଗୁଳିରେ ଟଳି ପଡିଥିଲା ଆତଙ୍କୀ ମାଇସର ଅହମ୍ମଦ ଦାର । ମୃତ ଆତଙ୍କୀ ଦି ରେଜିଷ୍ଟାନ୍ସ ଫ୍ରଣ୍ଟର ସଦସ୍ୟ ।
କାଠୋହଲିନ ଅଞ୍ଚଳରେ ଆତଙ୍କବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ହୋଇଥିଲା ଏହି ଲଢେଇ । ଆତଙ୍କବାଦୀ ନିପାତ ନେଇ କାଶ୍ମୀର ଜୋନ ପୋଲିସ ପକ୍ଷରୁ ସୂଚନା ଦିଆଯାଇଛି । ଏବେବି ଅନେକ ଆତଙ୍କବାଦୀ ଲୁଚି ରହିଥିବା ସନ୍ଦେହ କରାଯାଉଛି । ଏନକାଉଣ୍ଟର ପରେ ଅଂଚଳକୁ ଘେରାଉ କରି ସର୍ଚ୍ଚ ଅପରେସନ ଜାରି ରଖିଛି ସେନା।
ସେପଟେ ସାମ୍ବା ଜିଲ୍ଲାର ରାମଗଡ଼ ସେକ୍ଟରେ ପାକିସ୍ତାନ ରେଞ୍ଜର୍ସ ଗୁଳିମାଡ କରିଛନ୍ତି । ଭାରତୀୟ ସେନାର ଯବାନଙ୍କ ପୋଷ୍ଟ ଉପରକୁ ଟାର୍ଗେଟ କରି ଗୁଳିମାଡ଼ କରିଛି ପାକିସ୍ତାନ ରେଞ୍ଜର୍ସ । ଏଥିରେ ବିଏସଏଫର ଜଣେ ଯବାନ ଆହତ ହୋଇଛନ୍ତି ।
୨୪ ଦିନ ମଧ୍ୟରେ ପାକିସ୍ତାନୀ ସେନା ପୁଣି ସୀମାରେ ଅସ୍ତ୍ରବିରତି ନିୟମର ଉଲ୍ଲଂଘନ କରିଛି । ଏସବୁ ମଧ୍ୟରେ ଜମ୍ମୁ କାଶ୍ମୀରରେ ପୋଲିସ ଆତଙ୍କବାଦୀ ଲିଙ୍କରେ ଥିବା ବ୍ୟକ୍ତିଙ୍କୁ ଚଢାଉ ଜାରି ରହିଛି । ଅନନ୍ତନାଗ ଜିଲ୍ଲାରେ ଜୈସ-ଏ-ମହମ୍ମଦ ଆତଙ୍କବାଦୀ ସଂଗଠନ ଲିଙ୍କରେ ଉମର ଅମିନ ନାମକ ବ୍ୟକ୍ତିଙ୍କ ଦୋକାନରେ ଚଢାଉ କରିଛି କାଶ୍ମୀର ପୋଲିସ । ଗତ ମେ ମାସରେ ଉମର ଅମିନ ଜଣେ ସର୍କସ କର୍ମଚାରୀଙ୍କୁ ହତ୍ୟା କରିଥିବା ମାମଲାରେ ସମ୍ପୃକ୍ତି ଥିବା ଅଭିଯୋଗ ହୋଇଥିଲା।
MP, MLAଙ୍କ ବିରୋଧରେ ରହିଥିବା ମାମଲାର ତୁରନ୍ତ ଫଏସଲା କର : ସୁପ୍ରିମକୋର୍ଟ
ଦିଲ୍ଲୀ : ନିର୍ବାଚିତ ଏମପି, ଏମଏଲଏଙ୍କ ବିରୋଧରେ ଦାୟର ଅପରାଧିକ ମାମଲାଗୁଡିକର ତୁରନ୍ତ ଫଏସଲା ଲାଗି ହାଇକୋର୍ଟଗୁଡିକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ । ଯେଉଁ ସବୁ ରାଜ୍ୟରେ ଏମପି, ଏମଏଲଏମାନଙ୍କ ବିରୋଧରେ ପଡିରହିଛି ମାମଲା ତାହାର ତୁରନ୍ତ ଫଏସଲା ଲାଗି ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଏହା ସହ ଏହି ଧରଣର ମାମଲାଗୁଡିକୁ ନିଜ ଆଡୁ ପଞ୍ଜୀକରଣ କରିବା ସହ ମାମଲାର ସମାଧାନ ଦିଗରେ ପଦକ୍ଷେପ ନେବା ଲାଗି ହାଇକୋର୍ଟଗୁଡିକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ମାମଲାଗୁଡିକର ସମାଧାନଦିଗରେ ମନିଟରିଂ କରିବା ଲାଗି ହାଇକୋର୍ଟର ମୁଖ୍ୟବିଚାରପତିମାନଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ସରକାରୀ କର୍ମଚାରୀ ଓ ବିଚାର ବିଭାଗୀୟ ସଦସ୍ୟ ସମ୍ପର୍କିତ ଅପରାଧିକ ମାମଲାଗୁଡିକର ବିଚାର ଲାଗି ସ୍ବତନ୍ତ୍ର କୋର୍ଟ ପ୍ରତିଷ୍ଠା ସଂକ୍ରାନ୍ତ ଏକ ଜନସ୍ବାର୍ଥ ମାମଲାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ସେହିପରି ଦୋଷୀସାବ୍ୟସ୍ତ ଅଧିକାରୀଙ୍କୁ ନିଜ ପଦବିରୁ ବାହାର କରିବା ଲାଗି ହୋଇଥିବା ଜନସ୍ବାର୍ଥ ମାମଲାର ଶୁଣାଣି କରିଥିଲେ କୋର୍ଟ । ବିଭିନ୍ନ ହାଇକୋର୍ଟରୁ ମିଳିଥିବା ତଥ୍ୟ ଅନୁସାରେ ବିଭିନ୍ନ ସାଂସଦ ଓ ବିଧାୟକଙ୍କ ବିରୋଧରେ ୫ ହଜାର ୧୭୫ଟି ମାମଲା ପଡିରହିଛି ।
ଏହି ଖବର ଉପରେ ନଜର ପକାନ୍ତୁ : ବୀମା ଟଙ୍କା ପାଇଁ ଭିକାରୀକୁ ହତ୍ୟା, ୧୭ ବର୍ଷ ପରେ ଖୋଲିଲା ରାଜ୍
ସେଥିରୁ ୪୦ ପ୍ରତିଶତ ମାମଲା ଅର୍ଥାତ ୨ ହଜାର ୧୧୬ଟି ମାମଲା ଗତ ୫ ବର୍ଷ ଧରି ଚାଲି ରହିଛି । ପ୍ରଧାନ ବିଚାରପତି ଜଷ୍ଟିସ ଡିଓ୍ବାଇ ଚନ୍ଦ୍ରଚୂଡ଼ଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଆଗତ ଜନସ୍ବାର୍ଥ ମାମଲାର ଶୁଣାଣି କରି ନିଷ୍ପତ୍ତି ନେବା ଲାଗି ହାଇକୋର୍ଟଗୁଡିକୁ ନିର୍ଦ୍ଦେଶ ଦେଇଛନ୍ତି । ସବୁକ୍ଷେତ୍ରରେ ଏକକ ଗାଇଡଲାଇନ ଗଠନ କରିବା କଷ୍ଟସାଧ୍ୟ ବୋଲି ବିଚାର କରିଛନ୍ତି କୋର୍ଟ । ଉତ୍ତରପ୍ରଦେଶରେ ସର୍ବାଧିକ ମାମଲା ପଡିରହିଛି । ୨୦୧୮ରେ ୯୯୨ଟି ମାମଲା ହୋଇଥିବାବେଳେ ୨୦୨୨ରେ ଏହି ସଂଖ୍ୟା ଥିଲା ୧୩୭୭ । ସେଥିରୁ ୭୧୯ଟି ମାମଲାର ସମାଧାନ କରାଯାଇଛି ।
ବୀମା ଟଙ୍କା ପାଇଁ ଭିକାରୀକୁ ହତ୍ୟା, ୧୭ ବର୍ଷ ପରେ ଖୋଲିଲା ରାଜ୍
ଅହମ୍ମଦାବାଦ : ବୀମା ଟଙ୍କା ହଡପ କରିବା ପାଇଁ ଜଘନ୍ୟ କାଣ୍ଡ । ୧୭ ବର୍ଷପରେ ଖୋଲିଲା ଷଡ଼ଯନ୍ତ୍ରର ରହସ୍ୟ । ଗୁଜୁରାଟର ନୋଏଡାରେ ଦେଖିବାକୁ ମିଳିଛି ଏପରି ଏକ ଘଟଣା ଯେଉଁଥିରେ ଜଣେ ବ୍ୟକ୍ତି ୮୦ ଲକ୍ଷର ବୀମା ଟଙ୍କା ହାତେଇବା ପାଇଁ ନିଜେ ରଚିଥିଲେ ନିଜର ମିଛ ମୃତ୍ୟୁର ନାଟକ । ନିଜ ମୃତ୍ୟୁ ନାଟକକୁ ସତ ଦେଖାଇବା ପାଇଁ ସେ ଏକ ଭିକାରୀର ହତ୍ୟା ମଧ୍ୟ କରିବାକୁ ପଛାଇ ନଥିଲେ ।
ଦୀର୍ଘ ୧୭ ବର୍ଷ ପରେ ଏହି ବୀମା ପାଇଁ ରଚାଯାଇଥିବା ମିଛ ମୃତ୍ୟୁ ନାଟକର ପର୍ଦ୍ଦାଫାସ କରିଛି ପୋଲିସ ଏବଂ ଅସଲି ଅଭିଯୁକ୍ତକୁ ଗିରଫ କରିଛି । ଏହା ଜାଣି ଆଶ୍ଚର୍ଯ୍ୟ ହେବେ ଯେ, ଅଭିଯୁକ୍ତର ଏପରି କାରାନାମା ପଛର କାରଣ ତାଙ୍କ ସ୍ତ୍ରୀ ମଧ୍ୟ ଜାଣି ନଥିଲେ, ବରଂ ଦୀର୍ଘ ୧୭ ବର୍ଷ ଧରି ସ୍ୱାମୀଙ୍କ ମୃତ୍ୟୁ ଘଟିଛି ଭାବି ନିଜକୁ ବିଧବା ବୋଲି ମାନି ଆସିଥିଲେ ।
ଉତ୍ତରପ୍ରଦେଶର ବୁଦ୍ଧନଗରର ରହୁଥିବା ଅଭିଯୁକ୍ତ ଅନିଲ ସିଂ ମାଲେକ ନିଜ ନାଁ ଏବଂ ପରିଚୟ ବଦଳାଇ ଗୁଜୁରାଟର ଅହମ୍ମଦାବାଦରେ ରହୁଥିଲା । ଶେଷରେ ଏକ ଗୁପ୍ତ ସୂଚନା ଅନୁଯାୟୀ ତାକୁ ଗିରଫ କରିଛି ପୋଲିସ ଏବଂ ଏପରି ଷଡଯନ୍ତ୍ର ଉପରୁ ପରଦା ହଟିଛି । ପୋଲିସର କହିବା ଅନୁଯାୟୀ, ଏହି ବ୍ୟକ୍ତି ୮୦ ଲକ୍ଷର ବୀମା ଟଙ୍କା ପାଇବା ଲୋଭରେ ନିଜ ମୃତ୍ୟୁର ଷଡ଼ଯନ୍ତ୍ର ରଚିଥିଲା । ୨୦୦୪ ମସିହାରେ ବାପା ଏବଂ ଭାଇଙ୍କ ସହ ମିଶି ଏହି ଷଡ଼ଯନ୍ତ୍ର ରଚିଥିଲା ଅଭିଯୁକ୍ତ ।
ମାଣ୍ଡିଆକୁ ମିଳିବ ବିଶ୍ବ ମାନ୍ୟତା : ଭୁବନେଶ୍ବରରେ ଦୁଇ ଦିନିଆ ଅନ୍ତର୍ଜାତୀୟ ମିଲେଟ୍ ସମ୍ମିଳନୀ ଉଦଘାଟିତ
ଭୁବନେଶ୍ବର : ଭୁବନେଶ୍ବରରେ ଆଜିଠାରୁ ଆରମ୍ଭ ହୋଇଛି ଦୁଇ ଦିନିଆ ଅନ୍ତର୍ଜାତୀୟ ମିଲେଟ୍ ସମ୍ମିଳନୀ । ଜନତା ମଇଦାନରେ ଏହାକୁ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ମୁଖ୍ୟମନ୍ତ୍ରୀ କହିଛନ୍ତି, ପୁଷ୍ଟିଶସ୍ୟ ମାଣ୍ଡିଆର ବହୁଳ ଉତ୍ପାଦନ ଓ ବ୍ୟବହାରକୁ ପ୍ରୋତ୍ସାହନ ଦେବା ପାଇଁ ୨୦୧୭ରେ ଓଡ଼ିଶା ମିଲେଟ ମିଶନ ଆରମ୍ଭ ହୋଇଥିଲା । ଏହି ଶସ୍ୟ ଯେକୌଣସି ଜଳବାୟୁ ଏବଂ ଭୂଭାଗରେ ଅମଳ ହେଉଥିବାରୁ କ୍ଷୁଦ୍ର ଏବଂ ନାମମାତ୍ର ଚାଷୀଙ୍କୁ ଏହା ବିଶେଷ ସାହାଯ୍ୟ କରିଥାଏ ।
ମିଲେଟ୍ ଚାଷରେ ସ୍ଵଳ୍ପ ପାଣି ବ୍ୟବହାର ହେଉଥିବାରୁ ଓ ଏହି ପ୍ରକ୍ରିୟାରେ ଅଙ୍ଗାରକାମ୍ଳ ଉତ୍ପନ କମ୍ ରହୁଥିବାରୁ ଏହା ପରିବେଶ ଅନୁକୂଳ । ୨୦୨୩ ବର୍ଷକୁ ଜାତିସଂଘ ଅନ୍ତର୍ଜାତୀୟ ମିଲେଟ୍ ବର୍ଷ ଭାବରେ ଘୋଷଣା କରି ଏହି ଶସ୍ୟପ୍ରତି ସମସ୍ତଙ୍କ ଦୃଷ୍ଟି ଆକର୍ଷଣ କରିପାରିଛନ୍ତି । ଏଥିଲାଗି ଜାତିସଂଘକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କୃତଜ୍ଞତା ଜ୍ଞାପନ କରିଥିଲେ ।
ଓଡ଼ିଶା ନଭେମ୍ବର ୧୦ ତାରିଖକୁ ମାଣ୍ଡିଆ ଦିବସ ଭାବେ ପାଳନ କରୁଛି । ଏହି ପୁଷ୍ଟିଶସ୍ୟର ପୁନରୁଦ୍ଧାର ସହିତ ଏହାକୁ ମୁଖ୍ୟସ୍ରୋତରେ ସାମିଲ କରିବା ପାଇଁ ଓଡ଼ିଶା ସରକାର କାମ କରୁଛନ୍ତି । ପ୍ରତ୍ୟେକ ଲୋକଙ୍କ ଖାଇବା ଥାଳିରେ ମିଲେଟ୍ ଭଳି ସର୍ବୋତ୍ତମ ଖାଦ୍ୟ ପହଞ୍ଚାଇବାକୁ ଚେଷ୍ଟା କରାଯିବ । ମିଲେଟ୍ ଓ ମିଲେଟ୍ ଭିଭିକ ଉଦ୍ୟୋଗ ମାଧ୍ୟମରେ ଆଦିବାସୀ ସମ୍ପ୍ରଦାୟକୁ ସଶକ୍ତ କରିବା ଆମର ଉଦ୍ଦେଶ୍ୟ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଓଡ଼ିଶାରେ ଏହାକୁ ବିଶେଷତଃ ଆଦିବାସୀମାନେ ଚାଷ କରି ଆସୁଛନ୍ତି । ସେମାନଙ୍କ ପାଇଁ ଏହି ମୂଲ୍ୟବାନ ଶସ୍ୟ ଆଜି ବି ବଞ୍ଚି ରହିଛି ଓ ବର୍ତ୍ତମାନର ପିଢ଼ି ପାଖରେ ପହଞ୍ଚିଛି । ଏହି ଅନନ୍ୟ ଶସ୍ୟ ଆଜିର ସମାଜରେ ତା’ର ଯୋଗ୍ୟ ସ୍ଵୀକୃତି ଫେରିପାଇବ ଏବଂ ସୁସ୍ଥ ଜୀବନଯାପନ କରିବାରେ ଆମ୍ଭମାନଙ୍କୁ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ମାନସିକ ବିକୃତ ମହିଳାଙ୍କୁ ଦୁଷ୍କର୍ମ ସହ ଛୁରା ମାଡ଼ ଅଭିଯୋଗ
ନୟାଗଡ଼ : ମାନସିକ ବିକୃତ ମହିଳାଙ୍କୁ ଦୁଷ୍କର୍ମ ପରେ ଛୁରିମାଡ କଲା ଦୁର୍ବୃତ୍ତ । ମହିଳାଙ୍କୁ ଗୁରୁତର ଅବସ୍ଥାରେ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଇଟାମାଟି ଥାନା ବାଉଅଁଶିଆପଡା ଗାଁରେ ଘଟିଛି ଏପରି ଅଭାବନୀୟ ଘଟଣା ।
ସୂଚନା ଅନୁଯାୟୀ, ଗତକାଲି ରାତିରେ ଜଣେ ମାନସିକ ବିକାରଗ୍ରସ୍ତ ମହିଳା ଗାଁର ଜଣେ ବ୍ୟକ୍ତିଙ୍କ ବାରଣ୍ଡାରେ ଶୋଇଥିବା ବେଳେ ଜଣେ ଯୁବକ ନିଶାଗ୍ରସ୍ତ ଅବସ୍ଥାରେ ଆସି ତାଙ୍କୁ ଦୁର୍ଷ୍କମ କରିବାର ସହ ଛୁରା ମାଡ଼ କରିଥିବା ଅଭିଯୋଗ ହୋଇଛି।
ସକାଳୁ ମହିଳାଙ୍କୁ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ଦେଖି ସ୍ଥାନୀୟ ଲୋକେ ତାଙ୍କୁ ନୟାଗଡ଼ ମେଡିକାଲରେ ଭର୍ତ୍ତି କରାଇଥିଲେ । ପୀଡିତା ଜଣକ ପାଣ୍ଡା ନାମକ ବ୍ୟକ୍ତି ଏଭଳି କରିଥିବା କହିଛନ୍ତି । ପାଣ୍ଡା ସ୍ଥାନୀୟ ଅଞ୍ଚଳର ଜଣେ ଗାଡ଼ି ଚାଳକ ଥିବା ବେଳେ ସେ ବ୍ରାଉନ ସୁଗାର ଭଳି ନିଶାରେ ବୁଡି ରହୁଥିବା ସ୍ଥାନୀୟ ବାସିନ୍ଦା କହିଛନ୍ତି । ପୋଲିସ ଏବେ ପୀଡିତା ଏବଂ ତାଙ୍କ ପରିବାର ଲୋକଙ୍କୁ ପଚରାଉଚରା କରି ତଦନ୍ତ ଆରମ୍ଭ କରିଛି ।
ପ୍ରଶ୍ନ ପାଇଁ ଲାଞ୍ଚ ମାମଲା: ଟିଏମସି ସାଂସଦ ମହୁଆ ମୈତ୍ରାଙ୍କ ବଢୁଛି ଅଡୁଆ
ନୂଆଦିଲ୍ଲୀ : ପ୍ରଶ୍ନ ପାଇଁ ଲାଞ୍ଚ ମାମଲାରେ ଟିଏମସି ସାଂସଦ ମହୁଆ ମୈତ୍ରାଙ୍କର ବଢୁଛି ଅଡୁଆ । ତାଙ୍କ ସଂସଦ ସଦସ୍ୟତା ରଦ୍ଦ କରିବା ପାଇଁ ଲୋକସଭା ସଦାଚାର କମିଟି ସୁପାରିଶ କରିଛନ୍ତି । ଏ ସଂକ୍ରାନ୍ତରେ ଅଭିଯୋଗର ତଦନ୍ତ ଏବଂ ଜେରା ପ୍ରକ୍ରିୟା ପରେ ସଦାଚାର କମିଟି ୫ଶହ ପୃଷ୍ଠାର ବିସ୍ତୃତ ରିପୋର୍ଟ ପ୍ରସ୍ତୁତ କରିଛନ୍ତି । ଏଥିରେ ମହୁଆଙ୍କ କାର୍ଯ୍ୟକୁ ଘୋର ଆପତ୍ତିଜନକ, ଅନୈତିକ ଓ ଅପରାଧିକ ବୋଲି ବର୍ଣ୍ଣନା କରାଯିବା ସହ ତାଙ୍କ ସଦସ୍ୟତା ରଦ୍ଦ କରାଯିବା ଉଚିତ ବୋଲି କହିଛନ୍ତି ।
ସଦାଚାର କମିଟିର ଏହି ପଦକ୍ଷେପ ମହୁଆଙ୍କ ପାଇଁ ଅଡୁଆ ବଢାଇ ଦେଇଛି । ଅନ୍ୟପଟେ ମାମଲାରେ ଦୁର୍ନୀତି ନିବାରଣ ପ୍ୟାନେଲ ଏହି ମାମଲାରେ ଏବେ ସିବିଆଇ ତଦନ୍ତ କରିବାକୁ ନିର୍ଦ୍ଦେଶ ଦେଇଛି। ବିଜେପି ସାଂସଦ ନିଶିକାନ୍ତ ଦୁବେ ଏହି ଦାବି କରିଛନ୍ତି । ସେ ସୋସିଆଲ ମିଡିଆରେ ଏନେଇ ଏକ ପୋଷ୍ଟ କରି ସୂଚନା ଦେଇଛନ୍ତି ।
ସରକାରୀ ଆୟୁର୍ବେଦିକ କଲେଜ ଅଧ୍ୟକ୍ଷଙ୍କ ଘରେ ଭିଜିଲାନ୍ସ ରେଡ୍
ବଲାଙ୍ଗୀର : ଆୟୁର୍ବେଦିକ କଲେଜ ଅଧ୍ୟକ୍ଷଙ୍କ ଘରେ ରେଡ୍ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବଲାଙ୍ଗୀର ଆୟୁର୍ବେଦିକ କଲେଜ ଆଣ୍ଡ୍ ହସ୍ପିଟାଲ୍ର ଅଧ୍ୟକ୍ଷ ପ୍ରଫେସର ସୁଦର୍ଶନ ବେହେରାଙ୍କ ଘରେ ଭିଜିଲାନ୍ସ ଚଢାଉ କରିଛି।
ଏକକାଳୀନ ୬ଟି ସ୍ଥାନରେ ଜାରି ରହିଛି ଚଢାଉ । ପୁରୀ ଜିଲ୍ଲାରେ ଥିବା ତାଙ୍କର ୪ଟି ଘରେ ଭିଜିଲାନ୍ସ ଟିମ୍ର ଚଢାଉ ଚାଲିଥିବା ବେଳେ ସମ୍ବଲପୁର ସ୍ଥିତ ସୁଦର୍ଶନ ପତ୍ନୀଙ୍କ କ୍ୱାର୍ଟର୍ସ, ବଲାଙ୍ଗିର ଅଫିସ୍ ଓ ତାଙ୍କ ସମ୍ପର୍କୀୟଙ୍କ ଘରେ ମଧ୍ୟ ଚାଲିଛି ରେଡ୍ । ଏହି ଚଢାଉରେ ୮ ଡିଏସପି ଓ ୬ ଇନିସପେକ୍ଟର ସାମିଲ ଅଛନ୍ତି।