ଚନ୍ଦ୍ରଯାନ-୩ ଲ୍ୟାଣ୍ଡିଂ ପାଇଁ କାହିଁକି ୨୩ ତାରିଖକୁ ବାଛିଲା ଇସ୍ରୋ?

ବେଙ୍ଗାଲୁରୁ: ଚନ୍ଦ୍ରଯାନ-୩ ଏବେ ଚନ୍ଦ୍ରର ନିକଟତର ହେଉଛି । ଆଉ ମାତ୍ର କେଇ ଘଣ୍ଟା ପରେ ଚନ୍ଦ୍ରପୃଷ୍ଠରେ ପାଦ ଥାପିବ ଭାରତ । ଏବେ ମାତ୍ର ୨୫ କିମି ଦୂରରେ ରହିଛି ଚନ୍ଦ୍ର । ଏବେ ଚନ୍ଦ୍ରଯାନ-୩ର ଗତି କମ୍ କରିବାକୁ ଚେଷ୍ଟା କରାଯାଉଛି । ଯାହା ଫଳରେ କି ଚନ୍ଦ୍ରଯାନ ୨୩ ତାରିଖରେ ଚନ୍ଦ୍ରପୃଷ୍ଠରେ ସଫଳ ଲ୍ୟାଣ୍ଡିଂ କରିପାରିବ ।

ହେଲେ ଆପଣଙ୍କ ମନରେ ପ୍ରଶ୍ନ ଆସୁଥିବ କାହିଁକି ୨୩ ଅଗଷ୍ଟରେ ଚନ୍ଦ୍ରଯାନ ଚନ୍ଦ୍ରପୃଷ୍ଠରେ ଲ୍ୟାଣ୍ଡ କରିବ । କାହିଁକି ୨୨ ତାରଖ କିମ୍ବା ୨୪ ତାରିଖ ନୁହେଁ  । ଏହି ତାରିଖକୁ ବାଛିବା ପଛରେ କ’ଣ ରହିଛି କାରଣ ?

କହବାକୁ ଗଲେ, ଚନ୍ଦ୍ରଯାନ-୩ର ଲ୍ୟାଣ୍ଡର ଏବଂ ରୋବର ଚନ୍ଦ୍ରପୃଷ୍ଠରେ ଓହ୍ଲାଇବା ପରେ ମିଶନ ଆରମ୍ଭ ହେବ । ଏହି କାମ କରିବାକୁ ସେଠାରେ ସୂର୍ଯ୍ୟଙ୍କ କିରଣ ଥିବା ନିହାତି ଜରୁରୀ । ଚାନ୍ଦରେ ୧୪ ଦିନ ରାତି ଏବଂ ତା ପର ୧୪ ଦିନ ସୂର୍ଯ୍ୟଙ୍କ କିରଣ ପଡ଼େ । ଯଦି ଚନ୍ଦ୍ରଯାନ ଲ୍ୟାଣ୍ଡ କରିବା ପରେ ସେଠାରେ ରାତି ଥିବ ତାହାଲେ ଠିକରେ କାମ କରି ପାରିବ ନାହିଁ । ଚନ୍ଦ୍ରଯାନ ଛଡ଼ା ହେଲା ବେଳୁ ହିଁ ଏହି ଗଣନା କରି ଛଡ଼ାହୋଇଛି । ୨୨ ତାରିଖ ଯାଏ ସେଠାରେ ରାତି ରହିବ ତା ପରେ ୨୩ ତାରିଖରେ ସୂର୍ଯ୍ୟଙ୍କ କିରଣ ପଡ଼ିବ । ଏଥିପାଇଁ ଇସ୍ରୋ ଏହି ୨୩ ତାରିଖକୁ ହିଁ ବାଛିଛି ।

୨୩ରେ ଲ୍ୟାଣ୍ଡ କରିବା ପରେ ଆଗାମୀ ୧୪ ଦିନ ଯାଏ ରୋଭର ସେଠାରେ ବିଭିନ୍ନ ପ୍ରକାର ରିସର୍ଚ୍ଚ କରିବ । ଯଦି ଏହି ମିଶନ ସଫଳ ହୁଏ ତାହାଲେ ଚନ୍ଦ୍ରର ଦକ୍ଷିଣ ମେରୁ ନିକଟରେ ସଫ୍ଟ ଲାଣ୍ଡିଂ କରିବାରେ ଭାରତ ପ୍ରଥମ ଦେଶ ହେବ ।

ଏହା ସହ ଦକ୍ଷିଣ ମେରୁରେ ତାପମାତ୍ରା -୨୩୦ ଡିଗ୍ରୀ ଯାଏ ଚାଲିଯାଇଥାଏ । ଏହି ସମୟରେ ଚନ୍ଦ୍ରଯାନ ଠିକ୍ ଭାବେ କାମ କରିବା ସମ୍ଭବ ନୁହେଁ । ସେଥିପାଇଁ ଚନ୍ଦ୍ରଯାନ ନିକଟରେ କେବଳ ୧୪ ଦିନ ସମୟ ଅଛି । ସୂର୍ଯ୍ୟଙ୍କ କିରଣ ଥିବା ସମୟରେ ହିଁ ରୋଭର ତାର ସବୁ କାମ ସାରିବାକୁ ପଡ଼ିବ ।