ଗଞ୍ଜାମ: କାରୋନା ମୁକାବିଲା ନେଇ ଗଞ୍ଜାମ ଜିଲ୍ଲା ପ୍ରଶାସନର ପ୍ରେସ୍‌ମିଟ୍‌ । ବ୍ରହ୍ମପୁର ମୁନିସପାଲ କମିଶନରଙ୍କ ସୂଚନା । ଗଞ୍ଜାମରେ ଏବେ କରୋନା ସ୍ଥିତି ସାମାନ୍ୟ ରହିଛି । ଧିରେ ଧିରେ କରୋନା ସଂକ୍ରମଣ ଗଞ୍ଜାମରେ କମିବାରେ ଲାଗିଲାଣି । ସେଥିପାଇଁ ଗଞ୍ଜାମରେ କୋଭିଡ କଟକଣାକୁ କୋହଳ କରାଯିବ । ଏବେ ଗଞ୍ଜାମ ଜିଲ୍ଲାରେ ଦୋକାନ ଖୋଲିବା ସମୟ ସୀମା ବଢ଼ିବ । ସୋମବାର ଠାରୁ ଦୋକାନ ଖୋଲିବା ସମୟ ବଢ଼ିବ । ସକାଳ ୫ଟା ଠାରୁ ରାତି ୮ଟା ଯାଏଁ ଦୋକାନ ଖୋଲାଯାଇପାରିବ ବୋଲି ବିଏମ୍‌ବି କମିଶନର ସୂଚନା ଦେଇଛନ୍ତି । ବ୍ରହ୍ମପୁରରେ ୧୦ ହଜାରରୁ ଅଧିକ ବ୍ୟବସାୟୀ ରହିଛନ୍ତି । ତେବେ ଯଦି ଦୋକାନୀ ନିୟମ ଭାଙ୍ଗନ୍ତି ସେମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସେପଟେ ଗଣେଶ ପୂଜା ସହ ବଡ଼ ଉତ୍ସବକୁ ବାରଣ କରାଯାଇଛି । ସର୍ବସାଧାରଣସ୍ଥାନରେ ଗଣେଶ ପୂଜା ମନା କରାଯାଇଛି ।

ଏବେ ଜିଲ୍ଲାରେ କରୋନାଜନିତ ମୃତ୍ୟୁସଂଖ୍ୟା କମିଛି । ସବୁ ସ୍ଥାନରେ ଟେଷ୍ଟିଂ ବ୍ୟବସ୍ଥାକୁ ବୃଦ୍ଧି କରାଯାଇଛି । ଲକ୍ଷଣ ଦେଖାଦେଲେ ସଂଗେ ସଂଗେ ପରୀକ୍ଷା କରାଇବାକୁ ପରାମର୍ଶ ଦିଆଯାଉଛି । ବାହାରକୁ ବାହାରିଲେ ନିଜେ ସତର୍କତା ଅବଲମ୍ବନ କରିବାକୁ ନିର୍ଦ୍ଦେଶ ଦିଆଯାଇଛି । ଏଭଳି ସୂଚନା ଦେଇଛନ୍ତି ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ । ଗଞ୍ଜାମରେ ବହୁଦିନ ପରେ ୨୦୦ରୁ କମ୍ ପଜିଟିଭ ଚିହ୍ନଟ ହୋଇଛନ୍ତି ବୋଲି ସେ କହିଛନ୍ତି । ଏଥିରୁ ଜଣାଯାଉଛି ଯେ କରୋନା ସଂଖ୍ୟା ବୃଦ୍ଧିରେ ରୋକ ଲାଗିଛି । ଦୈନିକ ୯ ହଜାରରୁ ଅଧିକ ନମୁନା ପରୀକ୍ଷା କରାଯାଉଛି । ଏବେ ଗଞ୍ଜାମରେ ସଂକ୍ରମିତଙ୍କ ସଂଖ୍ୟା ମୋଟ ୧୫,୮୮୬ ରହିଛି । ସେମାନଙ୍କ ମଧ୍ୟରୁ ଆକ୍ଟିଭ କେସ୍‌ ୧୯୩୫ ରହିଥିବା ବେଳେ ଜିଲ୍ଲାରେ ୧୩,୭୭୩ ଜଣ ସୁସ୍ଥ ହୋଇସାରିଲେଣି । ଜିଲ୍ଲାରେ ସୁସ୍ଥତା ହାର ୮୭ ପ୍ରତିଶତକୁ ବଢ଼ିଛି । ୭ ଦିନରେ ୨ ବ୍ଲକରୁ କୌଣସି ଆକ୍ଟିଭ କେସ ଆସିନି । ଜିଲ୍ଲାରେ ’ଜିରୋ ଆକ୍ଟିଭ କେସ’ ମିଶନ ଆରମ୍ଭ କରିଛୁ ବୋଲି କହିଛନ୍ତି ଜିଲ୍ଲାପାଳ । ଜୁଲାଇ ତୁଳନାରେ ଅଗଷ୍ଟରେ ମୃତ୍ୟୁହାର କମିଛି ।

ଭୁବନେଶ୍ୱର: ରାତି ପାହିଲେ ସାପ୍ତାହିକ ସଟଡାଉନ । ଏଥର କରୋନା ପାଇଁ ସଟଡାଉନରେ ପଡ଼ିଛି ଗଣେଷ ପୂଜା । ହେଲେ ପୂଜା ପାଇଁ ବଳିପଡ଼ିଗଲା କଟକଣା । ଭୁବନେଶ୍ୱରରେ ହାଟ ଓ ବଜାରରେ ଅସମ୍ଭାଳ ଭିଡ । ସହରିଆ ଭୁଲିଗଲେ ସାମାଜିକ ଦୂରତା ନିୟମ । ଭୁବନେଶ୍ୱରରେ ୟୁନିଟ-୧ ହାଟରେ ସାମାଜିକ ଦୂରତା ନିୟମ ଖୋଲାଖୋଲି ଉଲଘଂନ କରିଥିଲେ ଲୋକେ । ଯିଏ ଯେଉଁଠି ପାରିଲା ଛିଡା ହୋଇ ମାର୍କେଟିଂ କରୁଥିଲେ ।

ସେହିଭଳି ଭୁବନେଶ୍ୱରରେ ବିଭିନ୍ନ ମାଛ ମାର୍କେଟରେ ମଧ୍ୟ ଦୁଇ ଦିନ ପାଇଁ ନେବା ଲାଗି ଭିଡି ଲାଗିଥିଲା । ସେପଟେ ସଟ଼ାଉନରେ ଗଣେଷ ପୂଜା ଥିବାରୁ ମୁର୍ତ୍ତି ସାଙ୍ଗକୁ ପୂଜା ସାମଗ୍ରୀ ନେବାକୁ ମଧ୍ୟ ଭିଡ ଲାଗିଥିଲା । କୋଭିଡ କଟକଣାକୁ ନଜରରେ ରଖି କଟକ-ଭୁବନେଶ୍ୱରରେ ସାମୁହିକ ଗଣେଶ ପୂଜା ଆୟୋଜନକୁ ବାରଣ କରିଛି କମିଶନରେଟ ପୋଲିସ । ଭୁବନେଶ୍ୱରରେ କ୍ଳବ ଓ ଜଟଣୀର ବିଭିନ୍ନ ପୂଜା କମିଟି ମାନଙ୍କୁ ସାମୁହିକ ଗଣେଷ ପୂଜା ଆୟୋଜନ ନକରିବା ପାଇଁ କଟକଣା ଜାରି କରିଛନ୍ତି ଭୁବନେଶ୍ୱର ଡିସିପି । ନିୟମକୁ ଅବମାନା କରି ପୂଜା ଆୟୋଜନ କଲେ ଆଇନ ଅନୁସାରେ କାର୍ଯ୍ୟନୁଷ୍ଠାନ ନିଆଯିବ ବୋଲି ଭୁବନେଶ୍ୱର ଡିସିପି କହିଛନ୍ତି  ।

ଭୁବନେଶ୍ୱର: ମହାମାରୀ ଯୋଗୁଁ ରାଜ୍ୟ ଅର୍ଥନୀତିର ସ୍ଥିତି ବିଗିଡ଼ିଛି । ଅର୍ଥନୀତି ବ୍ୟବସ୍ଥାରେ ସୁଧାର ଆଣିବା ପାଇଁ ରାଜ୍ୟ ସରକାର ଅଣ୍ଟା ଭିଡ଼ିଛନ୍ତି । ଅର୍ଥ ବିଭାଗ ପରେ ଏବେ ପୂର୍ତ୍ତ ବିଭାଗ ବିଭିନ୍ନ କଟକଣା ଜାରୀ କରିଛି । କରୋନା ଯୋଗୁଁ ବଡ଼ବଡ଼ ପ୍ରକଳ୍ପରେ ହାତ ନମାରିବାକୁ ଚିଠିରେ ନିର୍ଦ୍ଦେଶନାମା ଜାରୀ କରିଛି ବିଭାଗ । ଏପରିକି ନିହାତି  ଆବଶ୍ୟକ ନଥିଲେ ମରାମତି କାମ ବି ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ଯେହେତୁ ପୂର୍ତ୍ତ ବିଭାଗର ଉନ୍ନୟନ କାମରେ କୋଟିକୋଟି ଟଙ୍କା ଖର୍ଚ୍ଚ ହୁଏ ସେଥିଲାଗି ବିଭାଗ ଏପରି ନିଷ୍ପତି ନେଇଛି ।

ଚଳିତ  ଆର୍ଥିକବର୍ଷରେ ନୂଆ ଟେଣ୍ଡର ପ୍ରକ୍ରୀୟା ଉପରେ ରୋକ ଲଗାଇବା ସହ ଅତିଜରୁରୀ ଆବଶ୍ୟକ ନଥିଲେ ପୁରୁଣା ଟେଣ୍ଡର ୱାର୍କ ଅର୍ଡ଼ର ବି ବାତିଲ କରିବା ପାଇଁ ନିର୍ଦ୍ଦେଶନାମା ଜାରୀ କରିଛି ପୂର୍ତ୍ତବିଭାଗ । ଏହାସହ ୫କୋଟିରୁ ଅଧିକ ଟେଣ୍ଡର କାମ ଥିଲେ ଅର୍ଥବିଭାଗର ଅନୁମତି ନେବା ପାଇଁ ନିର୍ଦ୍ଦେଶନାମରେ କୁହାଯାଇଛି । ରାଜ୍ୟ ସରକାରଙ୍କ ଏପରି ଖର୍ଚ୍ଚକାଟ ନିଷ୍ପତିକୁ ଅର୍ଥନୈତିକ ବିଶେଷଜ୍ଞମାନେ ସ୍ୱାଗତ କରିଛି ।

କେବଳ ସେତିକି ନୁହେଁ । ୨ବର୍ଷ ଯାଏ କୌଣସି ସର୍କିଟ ହାଉସ ,ଗେଷ୍ଟ ହାଉସ ଓ ସରକାରଙ୍କ ଘରର ନିର୍ମାଣ ଉପରେ ବି ରୋକ ଲଗାଯାଇଛି । ହେଲେ ବିକାଶମୂଳକ କାର୍ଯ୍ୟକ୍ରମ ଚାଲୁରହିବ । ଯେହେତୁ ୫ମାସ ହେବ ରାଜ୍ୟ ରାଜସ୍ୱ ଆଦାୟ ପୁରା ଠପ ହୋଇଯାଇଛି । ତେଣୁ ରାଜ୍ୟ ସରକାର ଖର୍ଚ୍ଚକାଟ କରିବାକୁ ବାଧ୍ୟ ବୋଲି ପୂର୍ବତନ ଅର୍ଥମନ୍ତ୍ରୀ ପଂଚାନନ କାନୁନଗୋ କହିଛନ୍ତି । ଏହାସହ  ଆହୁରୀ ବିଭିନ୍ନ କ୍ଷେତ୍ରରେ ଖର୍ଚ୍ଚକାଟ କରିବାକୁ ସେ ଦାବି କରିଛନ୍ତି ।

ପୂର୍ବରୁ ଅର୍ଥ ବିଭାଗ ମଧ୍ୟ ଖର୍ଚ୍ଚକାଟ କରିବା ପାଇଁ  ଲମ୍ବା ଖସଡ଼ା ପ୍ରସ୍ତୁତ କରିଛି । ଆଗକୁ ଯଦି ଆର୍ଥିକ ବ୍ୟବସ୍ଥାରେ ସୁଧାର ନଆସେ ତେବେ ସରକାରୀ ସ୍ତରରେ ଅଧିକ ଖର୍ଚ୍ଚକାଟ ଯେ କରାନଯିବ ଏ ସମ୍ଭାବନାକୁ ଏଡ଼ାଇ ଦେଇହେବ ନାହିଁ ।

(ଭୁବନେଶ୍ୱରରୁ ଚିନ୍ମୟ ମହାପାତ୍ର)