ଖୋର୍ଦ୍ଧା: ଗାଡ଼ି ଚଲାଇବାକୁ ଇଚ୍ଛା ଥିଲା । କିନ୍ତୁ ପାଖରେ ଉପଯୁକ୍ତ ପରିମାଣର ଅର୍ଥ ନଥିଲା । ଗାଡ଼ି କିଣିବେ ବା କେମିତି… । କିନ୍ତୁ ଇଚ୍ଛା ଶକ୍ତି ଆଗରେ ହାର ମାନିଲା ଅର୍ଥ । ଆଉ ତିଆରି କଲେ ବ୍ୟାଟେରି ଚାଳିତ ସାଇକେଲ । ଗାଡ଼ି କିଣି ପାରିଲେନି ହେଲେ ସାଇକେଲରେ ଗାଡ଼ିର ଆବଶ୍ୟକତାକୁ ପୂରଣ କରି ଦେଖାଇଲେ । ସାଧାରଣ ସାଇକେଲରୁ ତିଆରି କଲେ ବ୍ୟାଟେରି ସାଇକେଲ ।  ଯାହା ଥରୁଟିଏ ଚାର୍ଜ କଲେ ୨୫ରୁ ୩୦ କିଲୋମିଟର ଯାଏଁ ଚାଲିପାରିବ ।

ଏଭଳି କରାମତି କରି ଦେଖାଇଛନ୍ତି ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ କଣ୍ଟାବାଡ଼ ଅଞ୍ଚଳର ରାଜେଶ ଦାସ । ରାଜେଶ ହଳଦିଆ କଲେଜରେ +୨ରେ ପାଠ ପଢ଼ନ୍ତି । ଛୋଟବେଳୁ ମାଆ ଛାଡି ଆରପାରିକୁ ଚାଲିଯାଇଛନ୍ତି ଏବଂ ବାପା ଭୁବନେଶ୍ୱରରେ ଫଳ ବ୍ୟବସାୟ କରୁଛନ୍ତି । ଗରିବ ପରିବାରରୁ ଆସିଥିବାରୁ ରାଜେଶଙ୍କର ଅନେକ ସ୍ୱପ୍ନ ଅଧାରେ ରହିଯାଇଛି । କିନ୍ତୁ ରାଜେଶ ତାଙ୍କର ଏହି ଗାଡ଼ି ଚଲାଇବାର ସ୍ୱପ୍ନକୁ ଅଧାରେ ରହିବାକୁ ଦେଇ ନଥିଲେ । ସାଙ୍ଗ ମାନଙ୍କ ଠାରୁ କିଛି ଅର୍ଥ ଧାର କରି ଗୋଟିଏ ସାଇକେଲ କିଣିଥିଲେ । ପରେ ୧୨ ଭୋଲ୍ଟର ଦୁଇଟି ଲିଥିୟମ ଆୟନର ବ୍ୟାଟେରି ଏବଂ କିଛି ଆବଶ୍ୟକୀୟ ସରଞ୍ଜାମ କିଣିଥିଲେ । ଆଉ ତାପରେ ତିଆରି କରିଥିଲେ ଗୋଟିଏ ବ୍ୟାଟେରି ଚାଳିତ ସାଇକେଲ ।

ଏଇ ସାଇକେଲକୁ ଥରେ ଚାର୍ଜ କଲେ ୨୫ରୁ ୩୦ କିଲୋମିଟର ଯାଇପାରିବ  । ବ୍ୟାଟେରି ସରିଗଲାପରେ ସାଇକେଲକୁ ପେଡାଲିଂ କରି ମଧ୍ୟ ଚଲାଇବାର ସୁବିଧା ରହିଛି । ବର୍ତ୍ତମାନ ବାୟୁ ପ୍ରଦୂଷଣକୁ ରୋକିବା ପାଇଁ ବିଭିନ୍ନ ପ୍ରକାରର ବିନା ପ୍ରଦୂଷଣର ଗାଡି ବ୍ୟବହାର କରାଯାଉଥିବା ବେଳେ ରାଜେଶଙ୍କର ଏହି ଗାଡ଼ି ସମସ୍ତଙ୍କୁ ପ୍ରେରଣା ଯୋଗାଇବ ।

ଅନୁଗୁଳ: ଜଙ୍ଗଲରୁ ମିିଳିଲା ଦନ୍ତା ହାତୀର ମୃତ ଦେହ । ଅନୁଗୁଳ ଜିଲ୍ଲା ଆଠମଲ୍ଲିକ ବ୍ଲକ ହଣ୍ଡାପା ବନାଞ୍ଚଳ ଲକ୍ଷ୍ମୀପୁର ଜଙ୍ଗଲରୁ ହାତୀର ମୃତଦେହ ଠାବ ହୋଇଛି । ହାତୀ ମୃତ୍ୟୁ ନେଇ ଗ୍ରାମବାସୀ ହଣ୍ଡାପା ରେଞ୍ଜ ଅଧିକାରୀ ଚୈତନ୍ୟ ବେହେରାଙ୍କୁ ସୂଚନା ଦେଇଥିଲେ ।

ଅଧିକାରୀ ଘଟଣା ସ୍ଥଳରେ ପହଞ୍ଚି ଦନ୍ତାର ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛନ୍ତି । ବାରହା ଶିକାର ପାଇଁ ଲାଗିଥିବା ବିଦ୍ୟୁତ ତାରରେ ଲାଗି ହାତୀର ମୃତ୍ୟୁ ହୋଇଥିବା ଅନୁମାନ କରାଯାଉଛି । ସେପଟେ ଶବ ବ୍ୟବଚ୍ଛେଦ ପରେ ହାତୀ ମୃତ୍ୟୁର କାରଣ ଜଣାପଡିବ ବୋଲି ବନ ବିଭାଗ ଅଧିକାରୀ କହିଛନ୍ତି ।

ବ୍ରହ୍ମପୁର: ମର୍ଡରର ଲାଇଭ ଭିଜୁଆଲ । ନୃଶଂସତାର ଶେଷ ସୀମା ଟପିଲେ ଦୁର୍ବୃତ୍ତ । ପ୍ରଥମେ ତଳେ ପକାଇ ଗୋଇଠା ପରେ ଗୋଇଠା ମାରୁଛନ୍ତି ଦୁର୍ବୃତ୍ତ । ମୁହଁକୁ ପଥରରେ ବାରମ୍ବାର ଛେଚୁଛନ୍ତି । ରାଗ ସେତିକିରେ ସରିନି, ଯୁବକ ଜଣକ ମରି ଗଲା ପରେ ମଧ୍ୟ ଦୁର୍ବୃତ୍ତ ମାନେ କାଠ ଫାଳିଆରେ ପିଟିବାରେ ଲାଗିଛନ୍ତି ।

ପୂର୍ବଶତ୍ରୁତାକୁ କେନ୍ଦ୍ର କରି ଏଭଳି ହତ୍ୟାକାଣ୍ଡ ହୋଇଥିବା ଅନୁମାନ କରାଯାଉଛି । ଗଞ୍ଜାମ ଜିଲ୍ଲା ଖଲିକୋଟ ଥାନା କେଶପୁରରେ ଥିବା ଇଣ୍ଡିଆନ୍‌ ଅଏଲ୍‌ ପରିସରରେ ଜଣେ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଛି । ଗୁରୁବାର ରାତି ୯ଟାରେ ୩ରୁ ୪ଜଣ ଯୁବକ ଅତି ଅମାନୁଷିକ ଭାବେ ଜଣେ ଯୁବକଙ୍କୁ ପିଟିପିଟି ହତ୍ୟା କରିଛନ୍ତି । ଏହାପରେ ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ ।

https://www.facebook.com/nandighoshatv/videos/2868659913165292/?eid=ARAJK6YTYGZGbefrMk61DWbH6QENZei39PDR7Q9A7QoiglgkA1cQbQ1l2J4V7fq5j4Bp1vujJ2PEkjg6

ମୃତକ ରାମଚନ୍ଦ୍ରପୁର ଗାଁର ଶଙ୍କର ପାହାନ । ଖଲ୍ଲିକୋଟ ଥାନା ଅଧିକାରୀ ସତ୍ୟରଞ୍ଜନ ପ୍ରଧାନ, ଭେଜିପୁଟ ଫାଣ୍ଡି ଅଧିକାରୀ ସୁଶାନ୍ତ କୁମାର ପ୍ରଧାନ ଓ ଏସ୍‌ଆଇ ସିଲୁ ଧଳ ପ୍ରମୁଖ ଘଟଣାସ୍ଥଳରେ ପହଞ୍ଚି ଶବକୁ ଜବତ କରି ତଦନ୍ତ ଆରମ୍ଭ କରିଛନ୍ତି । ସେପଟେ ହତ୍ୟାକାରୀକୁ ଖୁବଶୀଘ୍ର ଧରାଯିବବୋଲି ଥାନା ଅଧିକାରୀ ସୂଚନା ଦେଇଛନ୍ତି ।

ନିବେଶକଙ୍କ ପ୍ରଥମ ପସନ୍ଦ ଓଡ଼ିଶା । ୨୦୨୦ ଆର୍ଥିକ ବର୍ଷ ପ୍ରଥମାର୍ଦ୍ଧରେ ମହାରାଷ୍ଟ୍ରକୁ ପଛରେ ପକାଇ ତାଲିକର ଶୀର୍ଷରେ ରହିଛି ଓଡ଼ିଶା । ସମଗ୍ର ଦେଶରେ ଆର୍ଥିକ ବର୍ଷର ପ୍ରଥମାର୍ଦ୍ଧରେ ହୋଇଥିବା ନିବେଶ ସହ ଓଡ଼ିଶା ପଛକୁ ରହିଛି ମହାରାଷ୍ଟ୍ର ।

ଗତ ଆର୍ଥିକ ବର୍ଷ ୨୧ ପ୍ରତିଶତ ନିବେଶ ସହ ପ୍ରଥମ ସ୍ଥାନରେ ରହିଥିଲା ମହାରାଷ୍ଟ୍ର, କିନ୍ତୁ ଏଥର ଗ୍ରାହକଙ୍କୁ ଆକୃଷ୍ଟ କରିପାରିନାହିଁ ମହାରାଷ୍ଟ୍ର ।  ଗତବର୍ଷ ପ୍ରଥମାର୍ଦ୍ଧରେ ଓଡ଼ିଶାର ନିବେଶ ମାତ୍ର ୪ ପ୍ରତିଶତ ଥିଲା । ସେଣ୍ଟର ଫର୍ ମନିଟରିଂ ଇଣ୍ଡିଆନ ଇକୋନୋମି ପକ୍ଷରୁ  ଏ ସୂଚନା ଦିଆଯାଇଛି ।

ଓଡ଼ିଶା ସମେତ ଗୁଜୁରାଟ, ରାଜସ୍ଥାନ, ପଶ୍ଚିମପଙ୍ଗ, ଉତ୍ତରପ୍ରଦେଶ, ଦିଲ୍ଲୀ, ଆଣ୍ଡାମାନ ଓ ନିକେବରରେ ନିବେଶ ପ୍ରତିଶତ ବଢ଼ିଛି । ଅନ୍ୟପଟେ ତେଲେଙ୍ଗାନା, ବିହାର, ମଧ୍ୟପ୍ରଦେଶ, ଆନ୍ଧ୍ର ପ୍ରଦେଶ, ତାମିଲନାଡୁ, ପଞ୍ଜାବ, ହରିୟାନା ଏବଂ ମହାରାଷ୍ଟ୍ର ନିବେଶ ହ୍ରାସ ପାଇଥିବା ରିପୋର୍ଟରେ କୁହାଯାଇଛି ।