ନୂଆଦିଲ୍ଲୀ: ବ୍ରିଟେନରୁ ମିଳିଥିବା କରୋନାର ନୂଆ ଷ୍ଟ୍ରେନକୁ ନେଇ ସମଗ୍ର ବିଶ୍ୱ ଏବେ ଚିନ୍ତାରେ । ବ୍ରିଟେନରେ ଭାଇରସର ଏହି ନୂଆ ରୂପକୁ ଆଉଟ୍ ଅଫ୍ କଣ୍ଟ୍ରୋଲ ବୋଲି କୁହାଯାଉଛି । ତେଣୁ ସେଠାକାର ସରକାର ପୁଣି କଠୋର ଲକଡାଉନ୍ ଲାଗୁ କରିଛନ୍ତି । ଲକ୍ଷାଧିକ ଲୋକ ଏବେ ଘରେ ରହିବାକୁ ବାଧ୍ୟ । ତେବେ କ’ଣ କରୋନା ଭାଇରସର ଏହି ନୂଆ ରୂପ ଅଧିକ ବିପଜ୍ଜନକ ? ଯେଉଁ ସବୁ ଭ୍ୟାକ୍ସିନ ଏବେ ବଜାରକୁ ଆସିବାର ଅଛି,ସେସବୁ କ’ଣ ଏହି ଭାଇରସ ଆଗରେ ପ୍ରଭାବହୀନ ହୋଇଯିବେ ? ଲୋକଙ୍କ ମନରେ ଏହି ପ୍ରଶ୍ନ ଉଠିଲାଣି । ଆସନ୍ତୁ ଖୋଜିବା ଏହାର ଉତ୍ତର
କେତେ ବିପଜ୍ଜନକ ଏହି ଭାଇରାସ ?
କରୋନା ଭାଇରସର ଏହି ନୂଆ ରୂପ ୭୦ ପ୍ରତିଶତ ଅଧିକ ସଂକ୍ରାମକ । ତେବେ ବିଶେଷଜ୍ଞଙ୍କ କହିବା ହେଉଛି ଏହା ଅଧିକ ମାରକ ବୋଲି ଏପର୍ଯ୍ୟନ୍ତ କୌଣସି ପ୍ରମାଣ ମିଳିନାହିଁ । ଏହସହ ଭାଇରସର ଏହି ନୂଆ ଷ୍ଟ୍ରେନ୍ ଆଗରେ ଟିକା ମଧ୍ୟ ବେକାର ହେବାର କୌଣସି ପ୍ରମାଣ ମିଳିନାହିଁ । ଇମ୍ପେରିଆଲ କଲେଜ ଲଣ୍ଡନର ଡକ୍ଟର ଏରିକ ବୋଲଜଙ୍କ ଅନୁସାରେ,ଏହି ନୂଆ ଷ୍ଟ୍ରେନ୍ ଟିକାକୁ ମାତ୍ ଦେବ କି ନାହିଁ ତାହା ଏବେ କହିବା ସମ୍ଭବ ନୁହେଁ କିନ୍ତୁ ଗୋଟିଏ କଥା ସତ ଯେ, ଏହା ଅତିଶୀଘ୍ର ବ୍ୟାପୁଛି । ପ୍ରଥମ ଭାଇରସ ତୁଳନାରେ ଏହା ଜୋରରେ ବ୍ୟାପୁଛି ।
ଭାଇରସ ନିଜ ରୂପ ବଦଳାଇଛି
ଏହି ନୂଆ ଷ୍ଟ୍ରେନ୍ କରୋନା ଭାଇରସକୁ ବଢାଉଥିବା ପ୍ରୋଟିନରେ ପରିବର୍ତ୍ତନ କରିଛି । ତେବେ ଏଭଳି ପ୍ରଥମ ଥର ପାଇଁ ହୋଇନାହିଁ । ସୂଚନା ଅନୁସାରେ କରୋନା ଭାଇରସ ଆରମ୍ଭରୁ ବର୍ତ୍ତମାନ ସୁଧା ୨୦ ଥର ରୂପ ବଦଳାଇଛି । କରୋନା ଭାଇରସର ପ୍ରଥମ ରୂପ ଏତେ ଅଧିକ ସଂକ୍ରାମକ ନଥିଲା । ବ୍ରିଟେନରେ ମିଳିଥିବା ନୂଆ ରୂପ ଅଧିକ ବିପଜ୍ଜନକ ।କାରଣ ଏହାର ୮ ରୂପ ଜିନରେ ପ୍ରୋଟିନକୁ ବଢାଇଥାଏ । ଏହି ୮ ରୂପରୁ ୨ ଅଧିକ ଭୟଙ୍କର ।ବ୍ରିଟନେରେ ମିଳିଥିବା ଏନ୍୫୦୧ ୱାଇ ଓ H69/B70 ଷ୍ଟ୍ରେନ୍ । ଏହି ଦୁଇ ଷ୍ଟ୍ରେନ୍ ଶରିର ପାଇଁ ଅଧିକ ଘାତକ ହୋଇଥାନ୍ତି
ଟିକା ସମାନ ଭାବେ ପ୍ରଭାବଶାଳୀ ହେବ :CSIR
ସିଏସଆଇର ମହାନିର୍ଦ୍ଦେଷ ଶେଖର ମାଣ୍ଡେଙ୍କ ଅନୁସାରେ ଆଗକୁ ଆସିବାକୁ ଥିବା ଟିକା କରୋନା ଭାଇରସର ନୂଆ ରୂପ ବିରୋଧରେ ମଧ୍ୟ ସମାନ ଭାବେ ପ୍ରଭାବଶାଳୀ ହେବ । ତେଣୁ ଚିନ୍ତାର କାରଣ ନାହିଁ ।
