ନୂଆଦିଲ୍ଲୀ: ସାରା ବିଶ୍ୱରେ ଅକ୍ସଫୋର୍ଡ ଆଷ୍ଟ୍ରୋଜେନିକା କରୋନା ଭ୍ୟାକ୍ସିନ୍ର ବ୍ୟବହାର ଜୋରସୋରରେ ଚାଲିଛି । ଏହାରି ମଧ୍ୟରେ ଏକ ରିପାରର୍ଟ ସାମ୍ନାକୁ ଆସିବା ପରେ ଏହି ଭ୍ୟାକ୍ସିନ ପୁଣି ବିବାଦକୁ ଚାଲିଆସିଛି । ଅଭିଯୋଗ ରହିଛି ଯେ, ଭ୍ୟାକ୍ସିନର ଶେଷ ଟ୍ରାଏଲ ବେଳେ ପାଖାପାଖି ୧୫୦୦ ସ୍ୱେଚ୍ଛାସେବୀଙ୍କୁ ଭୁଲ୍ ଡୋଜ୍ ଦିଆଯାଇଥିଲା । ଖାଲି ସେତିକି ନୁହେଁ ଏହି ଭୁଲ୍କୁ ସେହି ସ୍ୱେଚ୍ଛାସେବୀଙ୍କୁ ମଧ୍ୟ ଜାଣିବାକୁ ଦିଆଯାଇନଥିଲା । ସମାଚାର ଏଜେନ୍ସି ରଏଟର୍ସର ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଛି ।
ସ୍ୱେଚ୍ଛାସେବୀଙ୍କୁ ଭୁଲ ଡୋଜ୍ ଦେବା ପରେ ଏମିତି ବ୍ୟବହାର କଲେ ଯେମିତି, ତାଙ୍କୁ ଅଲଗା ଅଲଗା ଡୋଜ୍ ଦିଆଯାଇଥିଲା । କିନ୍ତୁ ୮ ଜୁନ୍ରେ ଅକ୍ସଫୋର୍ଡ ୟୁନିଭର୍ସିଟିର ବିଶେଷଜ୍ଞମାନେ କହିସାରିଥିଲେ ଯେ, ଅଲଗା ଅଲଗା ଡୋଜ୍ ଦେଲେ ମଧ୍ୟ ଏହି ଭ୍ୟାକ୍ସିନ୍ କାମ କରୁଛି । ଏହି ଚିଠି ଉପରେ ଅକ୍ସଫୋର୍ଡର ପ୍ରଫେସର ଓ ଟ୍ରାଏଲ ଚିଫ୍ ଇନ୍ଭେଷ୍ଟିଗେଟର ଆଣ୍ଡ୍ରୁ ଜେ ପୋଲାର୍ଡ ଦସ୍ତଖତ ମଧ୍ୟ କରିଛନ୍ତି ।
ଏହା ପୂର୍ବରୁ ରଏଟର୍ସ ୨୪ ଡିସେମ୍ବରରେ ଏକ ରିପୋର୍ଟ ପ୍ରକାଶ କରିଥିଲା ଯେ, ଅକ୍ସଫୋର୍ଡ ବିଶେଷଜ୍ଞଙ୍କ ଦ୍ୱାରା ମାପିବାରେ ଭୁଲ୍ ହୋଇଥିବାରୁ ଅନେକ ସ୍ୱେଚ୍ଛାସେବିଙ୍କୁ ଡୋଜ୍ଠାରୁ କମ୍ ପରିମାଣର ଭ୍ୟାକ୍ସିନ୍ ଦିଆଯାଇଥିଲା । କିନ୍ତୁ ପୋଲାର୍ଡଙ୍କ ସେହି ଚିଠିରେ ଏଭଳି କୌଣସି ଭୁଲକୁ ସ୍ୱୀକାର କରାଯାଇ ନାହିଁ ।
ସେହି ସମୟରେ ଭୁଲ୍ ଡୋଜ୍ ଖବର ବିଶେଷଜ୍ଞମାନେ ବ୍ରିଟିଶ ମେଡିକାଲ ରେଗୁଲେଟର୍ସଙ୍କୁ ଦେଇଥିଲେ । ରେଗୁଲେଟର୍ସମାନେ ସେତେବେଳେ ଅକ୍ସଫୋର୍ଡକୁ ଟ୍ରାଏଲ ପାଇଁ ପୁଣି ଥରେ ଏକ ସ୍ୱେଚ୍ଛାସେବୀ ଗ୍ରୁପ୍ ଗଠନ କରି ସେମାନଙ୍କୁ ସମ୍ପୂର୍ଣ୍ଣ ଡୋଜ୍ ଦେଇ ଟ୍ରାଏଲ କରିବାକୁ ପରାମର୍ଶ ଦେଇଥିଲେ । ପୋଲାର୍ଡଙ୍କ ପତ୍ରରେ ଏନେଇ ମଧ୍ୟ କୌଣସି ସୂଚନା ଦିଆଯାଇ ନାହିଁ ।
ସ୍ୱେଚ୍ଛାସେବୀମାନଙ୍କୁ ଏହି ସବୁ ଭୁଲ୍ ଲୁଚାଇବାକୁ ଯାଇ ସେମାନଙ୍କୁ ଏହା ମଧ୍ୟ କୁହାଯାଇନଥିଲା ଯେ, ଅଧା ଡୋଜ୍ ନେଲେ ସେମାନଙ୍କର କ’ଣ କ୍ଷତି ହୋଇପାରେ । ବୟସ୍କ ମାନେ ଯଦି ଏହି ଭୁଲ୍ ଡୋଜ୍ ନେଇଛନ୍ତି ସେମାନଙ୍କ ପାଇଁ ବିପଦ ରହିଛି, ସେନେଇ ମଧ୍ୟ କୌଣସି ସୂଚନା ଦେଇନଥିଲେ । ତେବେ ଏହି ସବୁ କାରଣରୁ ଅକ୍ସଫୋର୍ଡ ଆଷ୍ଟ୍ରେଜେନିକା କରୋନା ଭ୍ୟାକ୍ସିନ୍ ଏବେ ପୁଣି ଥରେ ବିବାଦ ଘେରକୁ ଚାଲି ଆସିଛି । ଏହି ଭ୍ୟାକ୍ସିନ୍କୁ ନେଇ ଏବେ ପୁଣି ପରୀକ୍ଷା ନିରୀକ୍ଷା ଆରମ୍ଭ ହୋଇଛି ।
ଫ୍ରିଡମ୍ ଅଫ୍ ଇନ୍ଫରମେସନ୍ ଆଇନ୍ ଆଧାରରେ ନ୍ୟୁଜ୍ ଏଜେନ୍ସି ରଏଟର୍ସ ବିଶ୍ୱବିଦ୍ୟାଳୟରୁ ପାଇପାରିଥିଲା । ଏହି ପତ୍ରରେ ବିଶେଷଜ୍ଞମାନେ ଭିନ୍ନ ଭିନ୍ନ ମତାମତ ରଖିଛନ୍ତି ।
