spot_img
Home Blog Page 5992

କରୋନାର ଦ୍ୱିତୀୟ ଲହରି ହେବ ଭୟଙ୍କର, ୨୫ ଲକ୍ଷ ହେବେ ସଂକ୍ରମିତ

ନୂଆଦିଲ୍ଲୀ: କରୋନାର ଦ୍ୱିତୀୟ ଲହରି ପୂର୍ବଅପେକ୍ଷା ଅଧିକ ଭୟଙ୍କର ହେବ। ଦ୍ୱିତୀୟ ଫେଜରେ ପାଖାପାଖି ୨୫ ଲକ୍ଷ ଲୋକ ସଂକ୍ରମିତ ହେବେ । ଏମିତି ଏକ ରିସର୍ଚ୍ଚ ରିପୋର୍ଟରେ ଦାବି କରାଯାଇଛି । ଏହି ରିପୋର୍ଟକୁ ଏସବିଆଇ(ଷ୍ଟେଟ୍ ବ୍ୟାଙ୍କ୍ ଅଫ୍ ଇଣ୍ଡିଆ) ତରଫରୁ ଜାରି କରାଯାଇଛି । ରିପୋର୍ଟ ଅନୁସାରେ କରୋନାର ଦ୍ୱିତୀୟ ଲହରି ଭାରତକୁ ୧୦୦ଦିନ ପାଇଁ ଡରାଇବ । ପ୍ରଥମ ପର୍ଯ୍ୟାୟ ତୁଳନାରେ ଦ୍ୱିତୀୟ ପର୍ଯ୍ୟାୟରେ କରୋନା ଦ୍ରୁତ ଗତିରେ ବୃଦ୍ଧି ପାଇବ ।

ରିପୋର୍ଟରେ କୁହାଯାଇଛି ଯେ, ଫେବ୍ରୁଆରୀ ମାସରୁ ଭାରତରେ କରୋନାର ଦ୍ୱିତୀୟ ପର୍ଯ୍ୟାୟ ଆରମ୍ଭ ହୋଇ ସାରିଛି । ଏପ୍ରିଲ ଦ୍ୱିତୀୟ ସପ୍ତାହ ବେଳକୁ ଏହା ଶିଖର ଛୁଇଁବ । ଏହି ସମୟ ଭିତରେ ଭାରତରେ ଦୈନିକ କରୋନା ସଂକ୍ରମିତଙ୍କ ସଂଖ୍ୟା ପ୍ରଥମ ତୁଳନାରେ ଅଧିକ ଜୋରରେ ବଢିବ । ମେ’ ମାସ ପର୍ଯ୍ୟନ୍ତ ଦ୍ୱିତୀୟ ପର୍ଯ୍ୟାୟ ଚରମରେ ରହିବ । ଷ୍ଟେଟବ୍ୟାଙ୍କର ଆର୍ଥିକ ଅନୁସଂଧାନ ବିଭାଗ ତରଫରୁ ଏହି ରିପୋର୍ଟ ତିଆରି ହୋଇଛି ।

ରିପୋର୍ଟ ଅନୁସାରେ ମାର୍ଚ୍ଚ ୨୩ ତାରିଖର ଟ୍ରେଣ୍ଡକୁ ଯଦି ଧରାଯାଏ ତେବେ ଦ୍ୱିତୀୟ ପର୍ଯ୍ୟାୟରେ ସଂକ୍ରମିତଙ୍କ ସଂଖ୍ୟା ୨୫ ଲକ୍ଷରୁ ଅଧିକ ହେବ । ସ୍ଥାନୀୟ ସ୍ଥରରେ ଲକଡାଉନ ଦ୍ୱାରା କରୋନା ସଂକ୍ରମଣ ରୋକିବା କିମ୍ବା ମୃତ୍ୟୁକୁ କମ କରିବା ସମ୍ଭବ ହୋଇନଥିବା ମହାରାଷ୍ଟ୍ର ଓ ପଂଜାବ ଅନୁଭବରୁ ଜଣାପଡୁଛି ବୋଲି ରିପୋର୍ଟରେ ଦାବି କରାଯାଇଛି ।

ତେବେ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ବିଭିନ୍ନ ରାଜ୍ୟରେ କରୋନା ସଂକ୍ରମଣ ରୋକିବା ପାଇଁ ଯେଉଁ ସବୁ ପଦକ୍ଷେପ ନିଆଯାଉଛି ତା’ର ପ୍ରଭାବ ଆସନ୍ତା ମାସରୁ ଦେଖିବାକୁ ମିଳିବ । କିନ୍ତୁ ଲକଡାଉନ୍ ଯୋଗୁ ଆର୍ଥିକ କ୍ଷତି ହେବା ସହିତ ଜୀବନ ଜୀବୀକା ଉପରେ ପ୍ରଭାବ ପଡିବ ବୋଲି ଏଥିରେ କୁହାଯାଇଛି । ବ୍ୟାପକ ଟିକାକରଣ ହିଁ କରୋନାକୁ ରୋକିବାର ଏକମାତ୍ର ଉପାୟ ବୋଲି ରିପୋର୍ଟ ଦାବି କରିଛି ।

୪୦ ଡିଗ୍ରୀ ଉପରେ ରାଜ୍ୟର ୯ ସହର, ଆଗକୁ ଆହୁରି ବଢ଼ିବ ତାପମାତ୍ରା

ଭୁବନେଶ୍ୱର: ରାଜ୍ୟରେ ଉପରମୁହାଁ ପାରଦ। ପ୍ରଚଣ୍ଡ ଖରା ଯୋଗୁଁ ତନ୍ଦୁରିଭାଟି ହୋଇଛି ରାଜ୍ୟର ୨୩ ସହର। ଖରା କାରଣରୁ ଲୋକେ ଏବେ ଘରୁ ବାହାରିବା ପାଇଁ ଭୟ କରୁଛନ୍ତି। ଘରୁ ବାହାରିବା ସମୟରେ ହାତରେ ଛତା ଏବଂ ପାଣି ସାଙ୍ଗରେ ନେଇ ବାହାରୁ ଛନ୍ତି। ତେବେ ଯଦି ଦେଖିବା ଆସନ୍ତା ୩ ଦିନ ପର୍ଯ୍ୟନ୍ତ ତାତିରୁ ନିସ୍ତାର ନାହିଁ ବୋଲି ସୂଚନା ମିଳିଛି। ଆଞ୍ଚଳିକ ପାଣିପାଗ କେନ୍ଦ୍ର ସୂଚନା ଅନୁଯାୟୀ ରାଜ୍ୟର ୧୪ ସହରର ତାପମାତ୍ରା ୩୯ ଡିଗ୍ରୀ ଉପରେ ରହିଥିବା ବେଳେ ୯ ସହରର ତାପମାତ୍ରା ୪୦ ଡିଗ୍ରୀ ଉପରେ ରହିଛି। ବୌଦ୍ଧରେ ୪୦.୦୮ ଡିଗ୍ରୀ, ଭୁବନେଶ୍ୱରରେ ୪୦.୦୪ ଡିଗ୍ରୀ, ବଲାଙ୍ଗୀରରେ ୪୦.୦୪ ଡିଗ୍ରୀ, ସୋନପୁରରେ ୪୦.୦୨ ଡିଗ୍ରୀ, ଅନୁଗୁଳରେ ୪୦.୦୧ ଡିଗ୍ରୀ ତାପମାତ୍ରା ରହିଛି। ସେହିଭଳି ବାରିପଦା, ଟିଟଲାଗଡ଼, ମାଲକାନାଗିରି ଏବଂ ନୟାଗଡ଼ରେ ୪୦.୦ ଡିଗ୍ରୀ ତାପମାତ୍ରା ରହିଛି।

ଆସନ୍ତା ୩ ଦିନ ପର୍ଯ୍ୟନ୍ତ ରାଜ୍ୟର ଅଧିକାଂଶ ଅଞ୍ଚଳରେ ପାରଦ ବଢିବ। ଆଭ୍ୟନ୍ତରୀଣ ଓଡ଼ିଶାରେ ସ୍ବାଭାବିକ ଠାରୁ ୨ ରୁ ୩ଡିଗ୍ରୀ ତାପମାତ୍ରା ବଢିବାକୁ ଥିବା ବେଳେ ବାକି ଜିଲ୍ଲା ଗୁଡିକରେ ସ୍ବାଭାବିକ ଠାରୁ ୩ ରୁ ୪ ଡିଗ୍ରୀ ତାପମାତ୍ରା ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ୨୯ ଓ ୩୦ ତାରିଖ ବେଳକୁ ଉତ୍ତର ଉପକୂଳ ଓଡ଼ିଶାରେ କାଳବୈଶାଖୀ ଜନିତ ବର୍ଷା ବା ଘଡଘଡି ବିଜୁଳି ସହ ବର୍ଷା ହେବ ବୋଲି ଆକଳନ କରାଯାଇଛି।

ବିଶେଷ କରି ବାଲେଶ୍ବର, ଭଦ୍ରକ, ମୟୁରଭଞ୍ଜ, କେନ୍ଦ୍ରାପଡା ଏବଂ ଯାଜପୁର ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ହେବାର ସମ୍ଭାବନା ରହିଛି। ବର୍ଷା ପାଇଁ ଏହି ସବୁ ଜିଲ୍ଲାରେ ୟେଲୋ ଆଲର୍ଟ ଜାରି କରାଯାଇଛି। ୨୫ ତାରିଖରୁ ୨୮ ତାରିଖ ପର୍ଯ୍ୟନ୍ତ ରାଜ୍ୟର ବିଭିନ୍ନ ସହରରେ ଗ୍ରୀଷ୍ମ ପ୍ରବାହ ଜାରି ରହିବ। ରାଜଧାନୀ ଭୁବନେଶ୍ବର ସମେତ ମାଲକାନଗିରି ଏବଂ ବାରିପଦାରେ ୪୦ଡିଗ୍ରୀରୁ ଉପରେ ତାପମାତ୍ରା ରହିବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ଅଧିକାଂଶ ସହରର ତାପମାତ୍ରା ୩୭ ରୁ ୪୦ ଡିଗ୍ରୀ ମଧ୍ୟରେ ରହିବ ।

 

 

ଶନିବାର ଆସାମରେ ୪୭ ଏବଂ ପଶ୍ଚିମବଙ୍ଗରେ ୩୦ଟି ଆସନ ପାଇଁ ଲଢ଼େଇ

ନୂଆଦିଲ୍ଲୀ: ଧୁ ଧୁ ଖରା, ବାକଯୁଦ୍ଧ ଆରୋପ ପ୍ରତ୍ୟାରୋପର ପ୍ରଥମ ପର୍ବ ସରିଛି। ଆସନ୍ତା ୨୭ରେ ଦୁଇଟି ରାଜ୍ୟ ପାଇଁ ହେବ ପ୍ରଥମ ପର୍ଯ୍ୟାୟ ମତଦାନ। ଏଥିପାଇଁ ଆଜି ଦେଖିବାକୁ ମିଳିଥିଲା ସରଗରମ ପ୍ରଚାର। ପଶ୍ଚିମବଙ୍ଗ ଓ ଆସାମରେ ଜୋରଦାର ପ୍ରଚାର କରିଛନ୍ତି ପ୍ରମୁଖ ରାଜନୈତିକ ଦଳ ଓ ପ୍ରାର୍ଥୀ। କାହା ସମର୍ଥନରେ ଯିବ ମତ ତାକୁ ନେଇ ଏବେଠୁ ଆରମ୍ଭ ହୋଇଗଲାଣି ଅଙ୍କକଷା।

ପଶ୍ଚିମବଙ୍ଗରେ ୩୦ଟି ଆସନ ପାଇଁ ପ୍ରଥମ ପର୍ଯ୍ୟାୟରେ ମତଦାନ ହେବ। ପଶ୍ଚିମ ମେଦିନାପୁର ପାର୍ଟ-୧, ପୂ୍ର୍ବ ମେଦିନାପୁର ପାର୍ଟ-୧, ବାଙ୍କୁରା, ଝାରଗ୍ରାମ ଓ ପୁରୁଲିଆର ୩୦ଟି ଆସନରେ ମତଦାନ ହେବ। ୧୯୧ ଜଣ ପ୍ରାର୍ଥୀଙ୍କର ପ୍ରଥମ ପର୍ଯ୍ୟାୟରେ ଭାଗ୍ୟ ପରୀକ୍ଷା ହେବ। ଏଥିରେ ୧୭୦ ଜଣ ପୁରୁଷ ପ୍ରାର୍ଥୀ ଥିବା ବେଳେ ୨୧ଜଣ ମହିଳା ପ୍ରାର୍ଥୀ ଅଛନ୍ତି। ଏଥିସହ ୪୮ ଜଣଙ୍କ ପ୍ରାର୍ଥୀଙ୍କ ଉପରେ ଅପରାଧୀକ ମାମଲା ମଧ୍ୟ ଚାଲିଛି। ପ୍ରାର୍ଥିପତ୍ର ଦାଖଲ ବେଳେ ୨୫ ଜଣ ନିଜ ଉପରେ ଚାଲିଥିବା ମାମଲାକୁ ନେଇ ମଧ୍ୟ ନିର୍ବାଚନ କମିଶନଙ୍କୁ ଅବଗତ କରିଥିଲେ। ପ୍ରଥମ ପର୍ଯ୍ୟାୟ ପ୍ରାର୍ଥୀଙ୍କ ମଧ୍ୟ ଅଧିକାଂଶ କୋଟିପତି ମଧ୍ୟ ଅଛନ୍ତି। ଆଜି ପ୍ରଚାରର ଶେଷ ଦିନ ଥିବାରୁ ମମତା ବାନାର୍ଜୀ ଓ ଅମିତ ଶାହା କାଦୁଅଫିଙ୍ଗା ପ୍ରଚାର କରିଛନ୍ତି।

ଆସାମରେ ମଧ୍ୟ ପ୍ରଚାର ଶେଷ ଦିନ ଥିବାରୁ ସବୁ ରାଜନୈତିକ ଦଳ ଜନତାଙ୍କ ମନ କିଣିବା ପାଇଁ କଳ ବଳ କୌଶଳ ଲଗାଇଦେଇଛନ୍ତି ନେତା ଓ ପ୍ରାର୍ଥୀ। ପ୍ରଥମ ପର୍ଯ୍ୟାୟରେ ଏଠାରେ ୪୭ଟି ଆସନ ପାଇଁ ମତଦାନ ହେବ। ଏଥିମଧ୍ୟରୁ ୮ଟି ଆସନରେ ଅନୁସୂଚିତ ଜାତି ଓ ଜନଜାତି ଏବଂ ସଂଖ୍ୟାଲଘୁ ସମ୍ପ୍ରଦାୟର ଭୋଟରଙ୍କ ମୁଖ୍ୟ ଭୂମିକା ରହିବ। ନେପାଳୀ, ଓ ବେଙ୍ଗଲୀ ଭାଷାଭାଷୀ ଲୋକଙ୍କ ମଧ୍ୟ ଏଥର ଆସାମ ମତଦାନରେ ରହିବ ଭୂମିକା। ୧୨ଟି ଜିଲ୍ଲାରେ ପ୍ରଥମ ପର୍ଯ୍ୟାୟ ମତଦାନ ହେଉଥିବା ବେଳେ ଏଥିପାଇଁ ୨୬୭ ଜଣ ପ୍ରାର୍ଥୀ ମଇଦାନରେ ଅଛନ୍ତି। କୋଭି଼ଡ କଟକଣା ପାଇଁ ଏଥର ୧୧ ହଜାର ୫୩୭ଟି ମତଦାନ କେନ୍ଦ୍ରରେ ମତଦାନ ହେବ।

ପଶ୍ଚିମବଙ୍ଗରେ ୨୯୪ଟି ଆସନ ପାଇଁ ୮ଟି ପର୍ଯ୍ୟାୟରେ ମତଦାନ ହେବାକୁ ଥିବା ବେଳେ ଆସାମରେ ୧୨୬ଟି ଆସନ ପାଇଁ ୩ଟି ପର୍ଯ୍ୟାୟରେ ମତଦାନ ହେବ। ମେ ୨ରେ ଅନ୍ୟରାଜ୍ୟ ସହ ଏଠାରେ ମଧ୍ୟ ଫଳ ପ୍ରକାଶ ପାଇବ।

ଟିକା ପରେ ଏବେ ଆସିବ କରୋନା ବଟିକା, ଆରମ୍ଭ ହେଲା ମାନବ ପରୀକ୍ଷଣ

ନୂଆଦିଲ୍ଲୀ: ଟିକା ପରେ ଏବେ ଆସିବ କରୋନା ବଟିକା। ଆମେରିକାର ଫାଇଜର କମ୍ପାନୀ ଏନେଇ ମାନବ ପରୀକ୍ଷଣ ଆରମ୍ଭ କରିଛି। ଏହି ବଟିକା ଖାଇଲେ ପ୍ରାଥମିକ ଲକ୍ଷଣରୁ କରୋନା ଭଲ ହୋଇଯିବ  । କରୋନାକୁ ମାତ୍‌ ଦେବା ପାଇଁ ଉଭୟ ଟିକା ଓ ବଟିକାର ଆବଶ୍ୟକ ବୋଲି ଫାଇଜର ପକ୍ଷରୁ କୁହାଯାଇଛି। ଆମେରିକାରେ ବଟିକାର ପ୍ରଥମ ପର୍ଯ୍ୟାୟ ପରୀକ୍ଷଣ ଆରମ୍ଭ ହୋଇଥିବା ବେଳେ ଏହା ସଫଳ ହେବ ବୋଲି କମ୍ପାନୀ ଆଶା ରଖିଛି। ଏହି ଟାବେଲଟ କରୋନାର ନୂଆ ଷ୍ଟ୍ରେନ ଉପରେ ମଧ୍ୟ ପ୍ରଭାବଶାଳୀ। ଫାଇଜର ସହ ଜର୍ମାନ କମ୍ପାନୀ ବାୟୋଏନଟେକ୍‌ର ସହଭାଗିତା ଥିବାରୁ ସେଠାରେ ମଧ୍ୟ ବଟିକା ବ୍ୟବହାର ପାଇଁ ଅନୁମତି ମିଳିବ ବୋଲି ସୂଚନା ମିଳିଛି ।

ସଫଳ ହୋଇଛି ୩୫ ପ୍ରତିଶତ ଜଳସେଚନ ଲକ୍ଷ୍ୟ, ୪୩ ଲକ୍ଷ ହେକ୍ଟର ଜମିକୁ ହୋଇଛି ଜଳସେଚନ

ଭୁବନେଶ୍ୱର: ଗୋଟିଏ ପରେ ଗୋଟିଏ ବ୍ଲକରେ ଜଳସେଚନ ପ୍ରକଳ୍ପ ସଫଳ ହେଉଛି। ଜଳସେଚନ ପ୍ରକଳ୍ପ ମାଧ୍ୟମରେ ପ୍ରାୟ ୧୪ଲକ୍ଷ ୮୪ହଜାର ହେକ୍ଟର ବୃହତ ଉଠା ଜଳସେଚନ ପ୍ରକଳ୍ପ, ଏକ ଲକ୍ଷ ୨୫ ହଜାର ହେକ୍ଟର କ୍ଷୁଦ୍ର ଜଳସେଚନ, ୭ଲକ୍ଷ ୩୪ହଜାର ହେକ୍ଟର ଗୋଷ୍ଠୀ ଉଠାଜଳସେଚନ, ୧୨ ଲକ୍ଷ ୫୭ ହଜାର ହେକ୍ଟର ଗଭୀର ନଳକୂପ ଦ୍ବାରା ମୋଟ୍ ୩୫ଲକ୍ଷ ୯୯ ହଜାର ଚାଷ ଜମି ଜଳସେଚିତ ହୋଇଛି। ଗତ ୫ବର୍ଷରେ ମୋଟ ୭ଲକ୍ଷ ୪୩ହଜାର ହେକ୍ଟର ଜଳସେଚିତ ହୋଇଛି।

କେବଳ ସେତିକି ନୁହେଁ, ମୋଟ୍‌ ୩୧୪ ବ୍ଲକରୁ ୨୫୧ଟିରେ ୩୫ ପ୍ରତିଶତ ଜଳସେଚନ କରାଯାଇଛି। ପ୍ରଶ୍ନକାଳରେ ଜଳସମ୍ପଦ ମନ୍ତ୍ରୀ ଏହି ସୂଚନା ଦେଇଛନ୍ତି। ଜଳସେଚନ ନେଇ ଗୃହରେ ଉଦ୍‌ବେଗ ପ୍ରକାଶ ପାଇବା ପରେ ବାଚସ୍ପତି ରୁଲିଂ ଦେଇଥିଲେ। ବିଧାନସଭା ସରିବା ପରେ ଦୁଇଟି ଲେଖାଏଁ ଜିଲ୍ଲାର ସଦସ୍ୟ ଓ ଅଧିକାରୀମାନଙ୍କୁ ଡାକି ଜଳସେଚନ ସମ୍ପର୍କରେ ଆଲୋଚନା କରି ସମସ୍ୟାର ସମାଧାନ କରିବାକୁ ନିର୍ଦ୍ଦେଶ ଦେଇଛନ୍ତି।

ସେପଟେ ମହାନଦୀ ଜଳ ବିବାଦ ପ୍ରସଙ୍ଗ ନେଇ ଗୃହରେ ଆଲୋଚନା ହୋଇଛି। ବିଜେଡି ବିଧାୟକ ପ୍ରଦୀପ ଅମାତ କହିଛନ୍ତି, ସିଡବ୍ଲୁସି ମହାନଦୀ ଅବବାହିକାରେ ହେଉଥିବା ୮ଟି ପ୍ରକଳ୍ପ ଫେରାଇ ଦେଇଛି। ଯାହା ଫଳରେ ଓଡ଼ିଶାରେ ଜଳ ସଂକଟ ଦେଖାଦେଇଛି। ତେଣୁ ଏନେଇ ରାଜ୍ୟ ସରକାର କି ପଦକ୍ଷେପ ନେଇଛନ୍ତି ବୋଲି ବିଧାୟକ ପ୍ରଶ୍ନ କରିଥିଲେ। ପୁନର୍ବାର ଏ ପ୍ରକଳ୍ପଗୁଡିକୁ କାର୍ଯ୍ୟକାରୀ କରିବା ପାଇଁ ସିଡବ୍ଲୁସି ସହ ଆଲୋଚନା କରିବେ ବୋଲି ମନ୍ତ୍ରୀ ଗୃହକୁ ଜଣାଇଥିଲେ। ସେପଟେ ମହାନଦୀ ପାଣିକୁ ଛତିଶଗଡ଼ ବ୍ୟବହାର କରିବା ନେଇ ପ୍ରଶ୍ନ ଉଠାଇଛି କଂଗ୍ରେସ।

ଆଗାମୀ ୫୦ ବର୍ଷକୁ ଦୃଷ୍ଟିରେ ରଖି ରାଜ୍ୟ ସରକାର ଜଳ ଯୋଜନା ପ୍ରସ୍ତୁତ କରିଛନ୍ତି। ୨୦୫୧ ମସିହା ସୁଦ୍ଧା ଓଡ଼ିଶାର ପ୍ରମୁଖ ନଦୀଗୁଡ଼ିକରେ ୭୫ ପ୍ରତିଶତ ନିର୍ଭରଯୋଗ୍ୟ ଜଳ ପ୍ରବାହ କରାଯିବାକୁ ଟାର୍ଗେଟ୍ କରାଯାଇଛି।

ସୁଏଜ କେନାଲରେ ଅଟକି ରହିଛି ୪ ଫୁଟବଲ ପଡିଆ ଆକାରର ଜାହଜ, ବଢିପାରେ ପେଟ୍ରୋଲ ଦର

ନୂଆଦିଲ୍ଲୀ: ଏସିଆ ଓ ୟୁରୋପ ମଧ୍ୟରେ ସର୍ଟକଟ୍ ସାମୁଦ୍ରିକ ପଥ ହେଉଛି ସୁଏଜ କେନାଲ । ବିଶ୍ୱର ସାମୁଦ୍ରିକ ବ୍ୟବସାୟର ସବୁଠାରୁ ବ୍ୟସ୍ତତମ ରୁଟ୍ ହେଉଛି ସୁଏଜ୍ କେନାଲ । ତେବେ ଏହି ସୁଏଜ କେନାଲରେ ଲାଗିଛି ଟ୍ରାଫିକ୍ ଜାମ୍ । ସଡକ ପଥରେ ଟ୍ରାଫିକ୍ ଜାମ କଥା ଆପଣ ଶୁଣିଥିବେ କିନ୍ତୁ ବିଶାଳ ସମୁଦ୍ରରେ ଟ୍ରାଫିକ୍ ଜାମ କଥା ଶୁଣିବାକୁ ଟିକେ ଅଖାଡୁଆ ଲାଗୁଥାଇ ପାରେ । ତେବେ ଯାହା ଶୁଣୁଛନ୍ତି ତାହା ସତ । ସୁଏଜ କେନାଲରେ ଗୋଟିଏ ଜାହାଜ ଅଟକି ଯିବା କାରଣରୁ ଏହି ଟ୍ରାଫିକ୍ ଜାମ୍ ହୋଇଛି । ଜାହଜର ଆକାର କାରଣରୁ ଟ୍ରାଫିକ୍ ଜାମ୍ ହୋଇଛି । ୪ଟି ଫୁଟବଲ ପଡିଆକୁ ମିଶାଇଲେ ଯେତିକି ବଡ ହେବ ,ଏହି ଜାହଜର ଆକାର ସେତିକି ବଡ । କେନାଲ ଭିତରେ ଏହି ଜାହାଜ ଅଟକିବା କାରଣରୁ ବାକି ଜାହଜଙ୍କୁ ଆଗକୁ ବଢିବାକୁ ରାସ୍ତା ମିଳୁନାହିଁ । ତେବେ ସୂଦୁର ସୁଏଜରେ ଏହି ଜାହାଜ ଅଟକିବା ଆପଣଙ୍କ ପକେଟକୁ ମହଙ୍ଗା ପଡିପାରେ । ଏବେ ପେଟ୍ରୋଲ ଲିଟର ପିଛା ଯଦି ଆପଣ ପାଖାପାଖି ୧୦୦ ଟଙ୍କା ଦେଉଛନ୍ତି ତେବେ ଯଦି ଶୀଘ୍ର ରାସ୍ତା ଖୋଲେ ନାହିଁ ତେବେ ପେଟ୍ରୋଲ ଦର ଆହୁରି ବଢିବ ।
ଜାହଜର ନାମ କ’ଣ ?
ଜାହଜର ନାମ ହେଉଛି ଏଭର ଗିଭନ । ଏହି ଜାହଜର ମାଲିକାନା ରହିଛି ଏଭରଗ୍ରୀନ୍ କମ୍ପାନି ପାଖରେ । ଏହି ଜାହଜ ପାନାମାରେ ପଂଜିକୃତ ହୋଇଛି କିନ୍ତୁ କମ୍ପାନୀର ଘର ହେଉଛି ତାଇୱାନ । ସେହି ତାଇୱାନ୍ ଯାହାକୁ ଚୀନ୍ ଦେଶ ବୋଲି ମାନେ ନାହିଁ ।

ever given
କେମିତି ଅଟକିଲା ଜାହଜ ?
ମାଲବାହକ ଏଭର ଗିଭନ ଭୂମଧ୍ୟସାଗର ଆଡକୁ ଯାଉଥିବା ବେଳେ ମଙ୍ଗଳବାର ଦିନ ଜୋରରେ ବହୁଥିବା ପବନ କାରଣରୁ ସୁଏଜ କେନାଲରେ ଫଶି ଯାଇଥିଲା । ଜାହଜ ପବନ ମାଡରେ କେନାଲ କୁଳକୁ ଲାଗିଯାଇଥିଲା । ଜାହଜର ଆକାର କାରଣରୁ ଅନ୍ୟ ଜାହଜଙ୍କୁ ରାସ୍ତା ମିଳିନଥିଲା ଫଳରେ ଟ୍ରାଫିକ୍ ଜାମ ଲାଗିଥିଲା । ମିଶର ସରକାର ସାମୁଦ୍ରିକ ଟ୍ରାଫିକକୁ ଡାଇଭର୍ଟ କରିବା ପାଇଁ ଶେଷରେ କେନାଲର ପୁରୁଣା ଚ୍ୟାନେଲକୁ ଖୋଲିଥିଲେ । ଫଳରେ ଅଟକି ରହିଥିବା ଜାହଜ ଆଗକୁ ବଢିଥିଲେ ।

ଜାହଜର ଆକାର କେତେ ?
ତାଇୱାନ କମ୍ପାନୀ ଏଭରଗ୍ରୀନ ମରିନର ଏହି ଜାହଜ ୨୦୧୮ ମସିହାରେ ତିଆରି ହୋଇଥିଲା । ଯାହାର ଲମ୍ବ ୪ଶହ ମିଟର(୧୩୧୨ ଫୁଟ) ଓ ଓସାର ୫୦ ମିଟର । ଏହାର ମାଲବହନ କ୍ଷମତା ହେଉଛି ୧,୧୯,୦୦୦ ଟନରୁ ଅଧିକ । ୪ଟି ଫୁଟବଲ ପଡିଆକୁ ମିଶାଇଲେ ଯେତିକି ହେବ ଏଭର ଗିଭେନର ଆକାର ସେତିକି । ଅନେକ ପ୍ରକାରର ମାଲବାହକ ଜାହଜ ରହିଛନ୍ତି । ଯାହାମଧ୍ୟରୁ ପୈନାମାକ୍ସ ଶ୍ରେଣୀର ଜାହଜଙ୍କ ଲମ୍ବ ୩ଶହ ମିଟରରୁ ଅଧିକ ହୋଇଥାଏ । ସେହିଭଳି ଅଲ୍ଟ୍ରା ଲାର୍ଜ କଣ୍ଟେନର ସିପ୍ ଗୁଡିକଙ୍କ ଲମ୍ବ ୩୬୬ ମିଟର ହୋଇଥାଏ ।ଯେତେବେଳେକି ଏଭର ଗିଭନ ଅଲ୍ଟ୍ରା ଲାର୍ଜ ସିପ୍ ଠାରୁ ୪୦ ମିଟର ଅଧିକ ଲମ୍ବ । ୨୦ଫୁଟ ଲମ୍ବ ବିଶିଷ୍ଟ ୨୦ ହଜାର ସିପିଂ କଣ୍ଟେନରକୁ ବହନ କରିବାର କ୍ଷମତା ଏହି ଜାହଜର ରହିଛି ।

କେତେ ଦିନ ଲାଗିବ ଜାହଜ ଠିକ୍ କରିବାକୁ ?
ସୁଏଜ କେନାଲ ଭୂମଧ୍ୟସାଗର ଓ ଲୋହିତ ସାଗରକୁ ଯୋଡିଥାଏ । ବିଶ୍ୱର ୧୨ ପ୍ରତିଶତ ସାମୁଦ୍ରିକ ବାଣିଜ୍ୟ ଏହି ରୁଟରେ ହୋଇଥାଏ । ୨୦୨୦ରେ ଏହି କେନାଲ ଦେଇ ୧୯ ହଜାର ଜାହଜ ଯାଇଥିଲେ । ଯାହାର ଅର୍ଥ ହେଉଛି ପ୍ରତ୍ୟହ ୫୧ରୁ ଅଧିକ ଜାହଜ ଏହି କେନାଲକୁ ଅତିକ୍ରମ କରିଥାନ୍ତି ।

ସୁଏଜ କେନାଲର ଲମ୍ବ କେତେ ?
ସୁଏଜ କେନାଲ ମାନବ ନିର୍ମିତ କୃତ୍ରିମ କେନାଲ । ଏହାର ନିର୍ମାଣ ୧୮୬୯ରେ ହୋଇଥିଲା । ୧୯୩ କିଲୋମିଟର ଲମ୍ବର ଏହି କେନାଲରେ ତିନୋଟି ହ୍ରଦ ରହିଛି । ୨୦୧୫ ମସିହାରେ ମିଶର ସରକାର ଏହି କେନାଲର ବିସ୍ତାର କରିଥିଲେ । ଏହି କେନାଲ ୨୦୫ ମିଟର ଚଉଡା ଓ ୨୪ ମିଟର ଗଭୀର ।

ଟ୍ରାଫିକ୍ ଜାମ୍ ଯୋଗୁ କେତେ ଖର୍ଚ୍ଚ ?
ବୁଧବାର ଦିନ ଏହି ଜାହଜ ଯୋଗୁ ୧୮୬ ଅଲଗା ମାଲବାହକ ପୋତ କେନାଲରେ ଅଟକି ରହିଥିଲେ । ଏକ ହିସାବ ଅନୁସାରେ ଟ୍ରାଫିକ ଜାମ୍ କାରଣରୁ ସୁଏଜ କେନାଲକୁ ଘଣ୍ଟା ପ୍ରତି ୪ଶହ ମିଲିୟନ ଡଲାର କ୍ଷତି ସହିବାକୁ ପଡୁଛି । ଏହା ସହ ଏହି ରାସ୍ତା ଦେଇ ଯାଉଥିବା ଅଏଲ ଟ୍ୟାଙ୍କରଗୁଡିକ ମଧ୍ୟ ଅଟକି ରହିବେ । ଫଳରେ ତୈଳ ମୁଲ୍ୟରେ ୪ ପ୍ରତିଶତ ବୃଦ୍ଧି ଘଟିବ ବୋଲି ଆଶଙ୍କା କରାଯାଉଛି । ଯାହାର ଅର୍ଥ ହେଉଛି ସୁଏଜ କେନାଲଠାରୁ ୫ ହଜାର୪୩୮ କିଲୋମିଟର ଦୂରରେ ଥିବା ଭୁବନେଶ୍ୱର ଉପରେ ମଧ୍ୟ ଏହାର ପ୍ରଭାବ ପଡିବ ।

ବିଧାନସଭାରେ କେନ୍ଦ୍ରର କୃଷି ଆଇନ ନେଇ ଝଡ଼, ସଂକଳ୍ପ ମାଧ୍ୟମରେ ଆଲୋଚନା ପାଇଁ ଦାବି

ଭୁବନେଶ୍ୱର: ବିଧାନସଭାରେ କେନ୍ଦ୍ରର କୃଷି ଆଇନ ନେଇ ଝଡ଼। କେନ୍ଦ୍ର ଉପରେ ବର୍ଷିଲେ ନରସିଂହ। ସଂକଳ୍ପ ମାଧ୍ୟମରେ ଆଲୋଚନା ପାଇଁ ଦାବି। କୃଷି ଆଇନ ସପକ୍ଷରେ ଯୁକ୍ତି ବାଢ଼ିଲା ବିଜେପି। କେନ୍ଦ୍ରର କୃଷି ଆଇନ ବିରୋଧରେ ବିଧାନସଭାରେ ବର୍ଷିଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର। ତୁରନ୍ତ ଗୃହରେ ଏହା ଉପରେ ସଂକଳ୍ପ ଅଣାଯାଇ ଆଲୋଚନା କରିବାକୁ  ନରସିଂହଙ୍କ ସମେତ କଂଗ୍ରେସ ଟିମ୍ ଦାବି କରିଛନ୍ତି। ଦେଶରେ ତିନିମାସରୁ ଅଧିକ ସମୟ ଧରି କେନ୍ଦ୍ରର କୃଷି ଆଇନ ବିରୋଧରେ କୃଷକମାନେ ଆନ୍ଦୋଳନ ଜାରି ରଖିଛନ୍ତି।

ଅନେକ ରାଜ୍ୟ ଏହି ଆଇନକୁ ଲାଗୁ କରିନାହାନ୍ତି। ଓଡ଼ିଶାରେ ମଧ୍ୟ କେନ୍ଦ୍ରର ଏହି ତିନି କଳା ଆଇନକୁ ଲାଗୁ ନକରିବା ପାଇଁ ଦାବି କରିଛନ୍ତି ନରସିଂହ। ଏଥିପାଇଁ ଏକ ସଂକଳ୍ପ ଆଣିବା ପାଇଁ ବାଚସ୍ପତିଙ୍କୁ ଦାବିପତ୍ର ଦେଇଛନ୍ତି। ତେବେ କଂଗ୍ରେସ ବିଧାୟକ ଏହି ପ୍ରସଙ୍ଗ ନେଇ ଗୃହରେ ହଟ୍ଟଗୋଳ କରିବାରୁ ବାଚସ୍ପତି ଆସନ୍ତାକାଲି ଏହି ପ୍ରସଙ୍ଗ କାର୍ଯ୍ୟ ପରାମର୍ଶଦାତା କମିଟିରେ ଆଲୋଚନା କରାଯିବ ବୋଲି ରୁଲିଂ ଦେଇଥିଲେ। ଏହାସହ ଆସନ୍ତା ୫ତାରିଖ ଦିନ ପ୍ରାଇଭେଟ ମେମ୍ବର ଦିବସରେ ଆଲୋଚନା କରାଯିବ।

କୃଷି ଆଇନ ନେଇ ନରସିଂହ ପ୍ରଶ୍ନ ଉଠାଇବା ପରେ କେନ୍ଦ୍ର ପାଇଁ ଓକିଲାତି କରିଛି ରାଜ୍ୟ ବିଜେପି। ବିରୋଧୀ ଦଳ ମୁଖ୍ୟ ସଚେତକ କହିଛନ୍ତି, କେନ୍ଦ୍ରୀୟ ଆଇନକୁ ଆମେ ସମର୍ଥନ କରିବା ଦରକାର। ଏହି ଆଇନ ବିରୋଧରେ ଓଡ଼ିଶାରେ ଚାଷୀ ଆନ୍ଦୋଳନ କରୁନାହାନ୍ତି ବୋଲି ସେ ଯୁକ୍ତି ବାଢିଥିଲେ। ସେପଟେ ବିଜେଡି କହିଛି, ସଂକଳ୍ପ ପାଇଁ କଂଗ୍ରେସ ନୋଟିସ ଦେଇଛି। କୃଷି ଆଇନକୁ ଚାଷୀ ବିରୋଧ କରୁଛନ୍ତି। ତେବେ ଆଇନରେ ପରିବର୍ତ୍ତନ କରିବା କେନ୍ଦ୍ର ସରକାରଙ୍କ ଦାୟିତ୍ବ ବୋଲି ବିଜେଡି କହିଛି।

କୃଷି ଆଇନ ବିରୋଧରେ ଆସନ୍ତାକାଲି ଭାରତ ବନ୍ଦ ଡାକରା ଦେଇଛନ୍ତି କୃଷକ ସଂଗଠନ। ଆଉ ବିଧାନସଭାର ଶୂନ୍ୟକାଳରେ ଏ ଆଇନକୁ ନେଇ ଗୃହରେ ମୁହାଁମୁହିଁ  ହୋଇଛନ୍ତି କଂଗ୍ରେସ ଓ ବିଜେପି।

ରଡାରକୁ ଚକମା ଦେଇ ଉଡିଗଲା ଉଡନ୍ତା ଥଳିଆ !

 ଏଲିୟନ ବା ପରଗ୍ରହୀଙ୍କୁ ନେଇ ଅନେକ ଆଲୋଚନା ହେଉଥିଲେ ମଧ୍ୟ ଏପର୍ଯ୍ୟନ୍ତ ଏହାକୁ ନେଇ ସଠିକ୍‌ତଥ୍ୟ ସାମ୍ନାକୁ ଆସିନାହିଁ । କିନ୍ତୁ ଆମେରିକାର ବାୟୁସେନା ଏବଂ ନୌସେନା ଅଧିକାଂଶ ଥର ଏଲିୟନ ଜାହଜ ଦେଖିଥିବା ଖୁଲାସା କରିଛନ୍ତି ଆମେରିକାର ଜାତୀୟ ଗୁଇନ୍ଦା ବିଭାଗର ପୂର୍ବ ନିର୍ଦ୍ଦେଶକ । ଯାହାର ଗତି ଶବ୍ଦର ଗତିଠାରୁ ମଧ୍ୟ ଅଧିକ । ଯାହା ବାୟୁସେନାର ପାଏଲଟଙ୍କୁ ଆଶ୍ଚର୍ଯ୍ୟ ହେବାକୁ ବାଧ୍ୟ କରିଥିଲା । ଅବଶ୍ୟ ପରଗ୍ରହୀ ବା ଏଲିୟନ ଜାହାଜ ନଜର ଆସିଥିବା ଭିଡ଼ିଓ ମଧ୍ୟ ଶେୟାର କରିଛି ଆମେରିକା ନୌସେନା ।

ପୂର୍ବ ନ୍ୟାନସାଲ ଇଣ୍ଟଲିଜେନ୍ସ ନିର୍ଦ୍ଦେଶକ ଜନ୍‌ରଟକ୍ଲିଫଙ୍କ କହିବା ଅନୁସାରେ ଏହିଭଳି ଅନେକ ମାମଲା ସାମ୍ନାକୁ ଆସିଛି । ଥରେ ରଡାରକୁ ଚକମା ଦେଇ ଏହି ଉଡ଼ନ୍ତା ଥାଳିଆ ଉଡ଼ି ଯାଇଥିଲା । ତାହା ମଧ୍ୟ ବିନା ଶବ୍ଦରେ । ନିର୍ଦ୍ଦେଶକ ରଟକ୍ଲିଫ୍‌ଏହା ମଧ୍ୟ କହିଛନ୍ତିଯେ, ଏହାକୁ ନେଇ ଆନୁଷ୍ଠାନିକ ଭାବରେ କିଛି ଘୋଷଣା କରିପାରନ୍ତି ଆମେରିକା ପ୍ରତିରକ୍ଷା ମନ୍ତ୍ରଣାଳୟ । ଏହାକୁ ୧ ଜୁନ୍‌ମଧ୍ୟରେ ସାର୍ବଜନୀନ କରିବାର ଯୋଜନା ରହିଛି । ତେବେ ଏହା ପ୍ରଥମ ଘଟଣା ନୁହେଁ ଯେତେବେଳେ ଆମେରିକା ଏଭଳି କିଛି ବିଚିତ୍ର ପଦକ୍ଷେପ ନେବାକୁ ଯାଉଛି ।

୨୦ ଏପ୍ରିଲ ୨୦୨୦ରେ ଆମେରିକା ନୌସେନା ତିନୋଟି ଭିଡ଼ିଓ ଜାରି କରିଥିଲେ । ଯେଉଁଥିରେ ଉଡ଼ନ୍ତା ଥାଳିଆ ଖୁବ୍‌ତୀବ୍ର ଗତିରେ ଉଡ଼ୁଥିବା ନଜର ଆସିଥିଲା । ଅଚାନକ ଶବ୍ଦଠାରୁ ତୀବ୍ର ଗତିରେ ଉଡ଼ି ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଥିଲା । ସାମରିକ ଭାଷାରେ ଏହାକୁ UFOର UAP ବା ଅନଆଇଡେଣ୍ଟିଫାଏଡ୍‌ଏରିଅଲ ଫେନୋମେନା କୁହାଯାଏ ।

 

ଜନଙ୍କ କହିବା ଅନୁସାରେ ସିନେଟରେ ରଖାଯାଇଥିବା ଇଣ୍ଟିଲିଜେନ୍ସ ରିପୋର୍ଟ ଅନୁସାରେ ପେଣ୍ଟାଗନ ଏବେ ମଧ୍ୟ UFO ବା UAPକୁ ଖୋଜିବାରେ ଲାଗିଛନ୍ତି । କିନ୍ତୁ ଆଳୁ ଖୋଳୁ ଖୋଳୁ ମହାଦେବ ନ ବହାରନ୍ତୁ, ଅର୍ଥାତ୍‌ଏଲିୟନ ଶିପ୍‌ନ ପରିବର୍ତ୍ତେ ସିକ୍ରେଟ୍‌ଏୟାରକ୍ରାଫ୍ଟ ନହୋଇଥାଉ । ହୁଏତ ଅନ୍ୟ କୌଣସି ଦେଶ ନଜର ରଖିବା ପାଇଁ ଉଦ୍ୟମ କରୁଥିବ । କିନ୍ତୁ ଏହାକୁ ନେଇ ସର୍ବଦା ସକ୍ରିୟ ଅଛି ଆମେରିକା । ତେବେ ଏଭଳି ରିପୋର୍ଟକୁ ସାର୍ବଜନୀନ କରିବା ପାଇଁ ଇଣ୍ଟଲିଜେନ୍ସ ଅଥୋରାଇଜେସନ ଆକ୍ଟ ଅନୁସାରେ ଅନୁମତି ନେବାକୁ ପଡ଼ିଥାଏ ।

ସାବଧାନ ! ସାନିଟାଇଜର ମାରିଲେ ହେଉଛି କ୍ୟାନସର !

ନୂଆଦିଲ୍ଲୀ: ସାବଧାନ ! ସାନିଟାଇଜର ମାରିଲେ ହେଉଛି କ୍ୟାନସର ! ଆମେରିକାର ଲାବୋରେଟୋରୀ ‘ଭେଲିସୁର’ର ଅନୁସନ୍ଧାନ ପରେ ଆସିଲା ସାଂଘାତିକ ତଥ୍ୟ  । ୧୬୮ଟି ବ୍ରାଣ୍ଡର ସାନିଟାଇଜରକୁ ନେଇ ଏଭଳି ଏକ ଗବେଷଣା କରାଯାଇଥିଲା  ।  କରୋନା ଭାଇରସ ଆସିବା ପରଠାରୁ ଅତ୍ୟାବଶ୍ୟକ ସାମଗ୍ରୀ ଭାବେ ଉଭା ହୋଇଛି ସାନିଟାଇଜର । ମାସ୍କ, ସାମାଜିକ ଦୂରତା ସହ କିଛି ସମୟ ବ୍ୟବଧାନରେ ହାତ ସାନିଟାଇଜ କରିବାକୁ ପରାମର୍ଶ ଦେଉଛନ୍ତି ସ୍ବାସ୍ଥ୍ୟ ବିଶେଷଜ୍ଞ ।

ହେଲେ ସାନିଟାଇଜରକୁ ନେଇ ଆସିଥିବା ତଥ୍ୟ ଏବେ ଚିନ୍ତାଜନକ ପାଲଟିଛି । ଖୁଚୁରା ବଜାରରୁ ବ୍ରାଣ୍ଡେଡ ସାନିଟାଇଜରର ଅଭାବ ପୂରଣ କରିବାକୁ ବହୁ ବେନାମୀ ବ୍ରାଣ୍ଡର ସାନିଟାଇଜର ବଜାରରେ ପ୍ରବେଶ କରିଛି । ହେଲେ ନନ୍ ବ୍ରାଣ୍ଡ ସାନିଟାଇଜରରେ ମିଶାଯାଉଛି ବେନଜିନ୍, ଟ୍ରାଇକ୍ଲୋଜାନ ଭଳି ମାରାତ୍ମକ କେମିକାଲ । ଯାହା ମଣିଷ ଶରୀରରେ କ୍ୟାନସର ଭଳି ଭୟାନକ ରୋଗ ସୃଷ୍ଟି କରୁଛି ।

ସାନିଟାଇଜର ବ୍ୟବହାର କଲେ କ୍ୟାନସର କିମ୍ବା ଚର୍ମ ରୋଗର ଆଶଙ୍କା ରହିଛି କି ନାହିଁ ବୋଲି ଏକ ଗବେଷଣା କରାଯାଇଥିଲା । ଆମେରିକାର ଲାବରୋଟେରୀ ‘ଭେଲିସୁର’ ୨୬୦ ବୋତଲ ସାନିଟାଇଜର ନେଇ ଗବେଷଣା କରିଥିଲା । ସେଥିରୁ ୪୪ଟି ସାନିଟାଇଜରରେ ବେନଜିନ ସମେତ ଅନ୍ୟ ମାରାତ୍ମକ କେମିକାଲ୍ ବ୍ୟବହାର କରାଯାଉଥିବା ଜଣାପଡିଛି ।

ବେନଜିନ ଏକ ତରଳ ରସାୟନ ପଦାର୍ଥ, ଏହା ରଙ୍ଗହୀନ । କିନ୍ତୁ କେବେ କେବେ ସାମାନ୍ୟ ତାପମାତ୍ରାରେ ଏହା ନାଲି ହୋଇଯାଏ । ମାତ୍ରାଧିକ ବେନଜିନ ସଂସ୍ପର୍ଶରେ ଆସିଲେ ଶରୀରର ରକ୍ତ କଣିକା ଠିକ୍‌ ଭାବେ କାମ କରେନାହିଁ । ବେଳେବେଳେ ରକ୍ତ କଣିକା ତିଆରି ବନ୍ଦ ହୋଇଯାଏ । ଏହାଛଡ଼ା ଶରୀରରେ ହ୍ବାଇଟ୍ ବ୍ଲଡସେଲ୍ ହ୍ରାସ ହେବାକୁ ଲାଗେ । ଯେଉଁଥିପାଇଁ ଦେହରେ ରୋଗପ୍ରତିରୋଧକ ଶକ୍ତି କମିଯାଏ  । ଚର୍ମ ରୋଗ, କର୍କଟ ଭଳି କେତେକ ମାରାତ୍ମକ ରୋଗ ଦେଖାଯାଇଥାଏ । ଭେଲୁସୁର ପକ୍ଷରୁ ଆମେରିକାର ଫୁଡ୍ ଏଣ୍ଡ ଡ୍ରଗ୍ସ ଆଡମିନିଷ୍ଟ୍ରେସନକୁ ବା FDAକୁ ଚିଠି ଲେଖି ଅବଗତ କରାଯାଇଛି । ବ୍ୟୁରୋ ରିପୋର୍ଟ ନନ୍ଦିଘୋଷ ଟିଭି  ।

ରବିନ ଉଥାପ୍ପାଙ୍କ ବଡ଼ ଖୁଲାସା: CSK ପାଇଁ ତାଙ୍କୁ ବାଛିନାହାଁନ୍ତି ଧୋନି

0

ନୂଆଦିଲ୍ଲୀ: ଏପ୍ରିଲ ୯ରୁ ଆରମ୍ଭ ହେବ କ୍ରିକେଟ ମହାକୁମ୍ଭ ଇଣ୍ଡିଆନ ପ୍ରିମିୟର ଲିଗ୍ । ତେବେ ଟୁର୍ଣ୍ଣାମେଣ୍ଟର ବିଗୁଲ ବାଜିବା ପୂର୍ବରୁ ଟିମ୍ ଇଣ୍ଡିଆର ତାରକା ବ୍ୟାଟ୍ସମ୍ୟାନ ରବିନ ଉଥାପ୍ପା  କରିଛନ୍ତି ଏକ ବଡ଼ ଖୁଲାସା । ସେ, ରାଜସ୍ଥାନ ରୟାଲ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ତାଙ୍କ ଟ୍ରେଡିଂ ପଛର କାରଣ କ’ଣ ଥିଲା ସେ ନେଇ କରିଛନ୍ତି ଖୁଲାସା ।

ଆଇପିଏଲର ସଫଳ ଖେଳାଳିମାନଙ୍କ ମଧ୍ୟରୁ ଅନ୍ୟତମ ରବିନ୍ ଉଥାପ୍ପା । ଏଥର ତାଙ୍କୁ କିଣିଛି ତିନିଥର ଆଇପିଏଲ୍ ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ । ଆଇପିଏଲ୍ ୨୦୨୧ରେ ପ୍ରଥମ ଥର ପାଇଁ  ଚେନ୍ନାଇ ସୁପର କିଙ୍ଗ୍ସ ପାଇଁ ଖେଳିବେ ରବିନ। ହେଲେ ଏହାପୂର୍ବରୁ ସେ ସିଏସକେ ଅଧିନାୟକ ମହେନ୍ଦ୍ର ସିଂ ଧୋନିଙ୍କୁ ନେଇ କରିଛନ୍ତି କିଛି ଖୁଲାସା।

ରବିନ୍ ଉଥାପ୍ପା ଏକ ସାକ୍ଷାତକାରରେ କହିଛନ୍ତି ଯେ ଧୋନି ତାଙ୍କୁ ସିଏସକ ପାଇଁ ବାଛି ନାହାଁନ୍ତି । ଆଉ ଏ କଥା ନିଜେ ଧୋନି ତାଙ୍କୁ କହିଛନ୍ତି । ଉଥାପ୍ପା କହିଛନ୍ତି ‘ମହେନ୍ଦ୍ର ସିଂ ଧୋନି ଟ୍ରେଡିଂ ପରେ ମୋତେ କଲ୍ କରିଥିଲେ । ସେ କହିଥିଲେ ଯେ ମୁଁ ତୁମକୁ ଦଳକୁ ନେବାକୁ ନିଷ୍ପତ୍ତି ନେଇ ନାହିଁ। ଏହା ଟିମ୍ ମ୍ୟାନେଜମେଣ୍ଟ ଓ ଲିଡରଶିପଙ୍କର ଏକ ନିଷ୍ପତ୍ତି, ଯେଉଁଥିରେ କୋଚ୍ ଏବଂ ସିଇଓ ବି ସାମିଲ ଅଛନ୍ତି।”

ସେ ଆହୁରି କହିଛନ୍ତି, ‘ମୋତେ ଧୋନିଙ୍କର ଏହି କଥା ବହୁତ ଭଲ ଲାଗେ । ଧୋନି କେବେ ହେଲେ ଟିମ ପାଇଁ ଖେଳାଳି ବାଛନ୍ତି ନାହିଁ । ବରଂ ଯେଉଁ ଖେଳାଳୀ ଟିମରେ ଥାନ୍ତି ତାଙ୍କୁ ନେଇ ଭଲ ପ୍ରଦର୍ଶନ କରନ୍ତି। ସେ ସବୁବେଳେ ଚାହାଁନ୍ତି ଯେ ଜଣେ ଖେଳାଳୀ ନିଜ ଦକ୍ଷତା ବଳରେ ଟିମକୁ ଆସୁ । ଆଜି ମୁଁ ମଧ୍ୟ ନିଜ ଦକ୍ଷତା ବଳରେ ଏହି ଟିମ୍ରେ ସାମିଲ ହୋଇଛି । ଆଉ ଏହାର ଶ୍ରେୟ ବି ଧୋନିଙ୍କୁ ହିଁ ଯାଉଛି।’ ନିକଟରେ ‘ବଜୟ ହଜାରେ ଟ୍ରଫିରେ’ କେରଳ ଟିମକୁ କ୍ୱାଟର ଫାଇନାଲ ପର୍ଯ୍ୟନ୍ତ ପହଞ୍ଚାଇଥିଲେ ଉଥାପ୍ପା।

ଜଣାଇ ଦେବାକୁ ଚାହୁଁଛୁ ଯେ ଉଥାପ୍ପା ପୂର୍ବରୁ ରାଜସ୍ଥାନ ରୟାଲ୍ସ, ମୁମ୍ବାଇ ଇଣ୍ଡିଆନ୍ସ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର, ପୁଣେ ୱାରିୟର୍ସ ଏବଂ କୋଲକାତା ନାଇଟ୍ ରାଇଡର୍ସ ପାଇଁ ଖେଳିଛନ୍ତି। ସେ ଆରମ୍ଭରୁ ହିଁ ଆଇପିଏଲ ସହ ଜଡ଼ିତ ଅଛନ୍ତି । ସେ  ମୋଟ ୧୮୯ଟି ମ୍ୟାଚ୍ ଖେଳିଥିବାବେଳେ ୧୨୯.୯୯ ଷ୍ରାଇକ୍ ରେଟରେ ୪ ହଜାର ୬୦୭ ରନ କରିଛନ୍ତି । ଆଇପିଏଲରେ ୨୪ଟି ଅର୍ଦ୍ଧଶତକ ବି ମାରିଛନ୍ତି ଏହି ଷ୍ଟାର କ୍ରିକେଟର।

କେବଳ ଏତିକି ନୁହେଁ ସେ ୨୦୧୪ରେ କେକେଆର୍ ପାଇଁ ୬୬୦ ରନ୍ ସ୍କୋର କରି ଜିତିଥିଲେ ଅରେଞ୍ଡ କ୍ୟାପ୍। ଏପରିକି ୨୦୧୪ରେ କୋଲକାତା ନାଇଟ୍ ରାଇଡର୍ସ ହିଁ ଜିତିଥିଲା ଆଇପିଏଲର ୱିନିଂ ଟାଇଟଲ୍। ଏହି ସିଜିନରେ ଗମ୍ଭୀରଙ୍କ ଅଧିନାୟକତ୍ୱରେ ରବିନ୍ ଉଥାପ୍ପା ପ୍ରମୁଖ ଭୂମିକା ଗ୍ରହଣ କରିଥିଲେ। ଚଳିତ ବର୍ଷ ମଧ୍ୟ ଉଥାପ୍ପା ଭଲ ପ୍ରଦର୍ଶ କରିବେ ବୋଲି ଆଶା ରଖିଛି ଚେନାଇ ସୁପରକିଙ୍ଗସ୍ ଟିମ୍।