ନୂଆଦିଲ୍ଲୀ: ଟ୍ୱିଟରରେ ଫେକ୍ ଆକାଉଣ୍ଟ ଓ ଦେଶ ବିରୋଧୀ ପୋଷ୍ଟକୁ ନେଇ ସୁପ୍ରିମକୋର୍ଟଙ୍କ ନୋଟିସ୍ । ସର୍ବୋଚ୍ଚ ନ୍ୟାୟାଳୟ ଟ୍ୱିଟର୍ ଓ କେନ୍ଦ୍ର ସରକାରଙ୍କୁ ନୋଟିସ୍ ଜାରି କରିଛନ୍ତି । ବିଜେପି ନେତା ବିନୀତ ଗୋୟନକାଙ୍କ ଆବେଦନର ଶୁଣାଣି କରି କେନ୍ଦ୍ର ସରକାର ଓ ଟ୍ୱିଟରକୁ ସୁପ୍ରିମକୋର୍ଟ ଜବାବତଲବ କରିଛନ୍ତି । ଟ୍ୱିଟରରେ ଭାରତ ବିରୋଧରେ ଆପତ୍ତିଜନକ ପୋଷ୍ଟ ନେଇ ସୁପ୍ରିମକୋର୍ଟରେ ଏକାଧିକ ମାମଲା ଦାଏର ହୋଇଛି । ସମସ୍ତ ଆବେଦନକୁ ଏକତ୍ର କରି ଶୁଣାଣି କରାଯାଇଥିବା କୋର୍ଟ କହିଛନ୍ତି ।
ବିନୀତ ଗୋୟନକା କରିଥିବା ଆବେଦନରେ କୁହାଯାଇଛି- ଟ୍ୱିଟରରେ ସାଧାରଣ ଲୋକ ନୁହେଁ ବରଂ ସାମ୍ବିଧାନିକ ପଦରେ ଥିବା ବ୍ୟକ୍ତିଙ୍କ ନାମ ଓ ଫଟୋ ବ୍ୟବହାର କରାଯାଇ ମିଛ ପ୍ରୋଫାଇଲ୍ କରାଯାଇଛି । ଶିଖ୍ ଫର୍ ଜଷ୍ଟିସ୍ ଭଳି ଭାରତ ବିରୋଧୀ ସଂଗଠନକୁ ତା’ର ପ୍ରଚାର ପାଇଁ ମୁକ୍ତ ଭାବେ ଛାଡ଼ି ଦିଆଯାଇଛି । ଏଭଳି କାର୍ଯ୍ୟ ଉପରେ ସରକାରଙ୍କ ନିୟନ୍ତ୍ରଣ ଆଣିବାକୁ ଆବେଦନ କରାଯାଇଛି ।
ଏହା ପୂର୍ବରୁ ସୁପ୍ରିମକୋର୍ଟ ଏହା ସମ୍ବନ୍ଧିତ ଆବେଦନକୁ ଶୁଣାଣି ପାଇଁ ରାଜି ହୋଇଥିଲେ । ଗୋଟିଏ ଆବେଦନ ଆଇନଜୀବୀ ବୀନିତ ଜିନ୍ଦଲ କରିଥିଲେ । ଯାହା ଉପରେ ଫେବ୍ରୁଆରୀ ୧ରେ ନୋଟିସ୍ ଜାରି କରିଥିଲେ କୋର୍ଟ । ଆଇନ୍ ଛାତ୍ର ସ୍କନ୍ଦ ବାଜପେୟୀ ଓ ଅଭ୍ୟୁଦୟ ମିଶ୍ର କରିଥିବା ଆବେଦନ ଉପରେ ଗତବର୍ଷ ଅକ୍ଟୋବର ୧୩ରେ କୋର୍ଟ ନୋଟିସ୍ ଜାରି କରିଥିଲେ ।
