spot_img
Home Blog Page 5991

ଶୋଇଥିବା ସମୟରେ ଘରେ ଲାଗିଲା ନିଆଁ, ଜଣେ ମହିଳା ଜୀବନ୍ତ ଦଗ୍ଧ

ଭଦ୍ରକ: ଘରେ ଶୋଇଥିବା ସମୟରେ ଲାଗିଲା ନିଆଁ। ୪ ପରିବାରର ୧୨ ବଖରା ଘର ପୋଡ଼ି ପାଉଁଶ ହୋଇଯାଇଛି। ନିଁଆ ଲାଗିବା ଫଳରେ ଜଣେ ମହିଳା ଜୀବନ୍ତ ଦଗ୍ଧ ହୋଇଯାଇଛନ୍ତି। ଏଭଳି ଏକ ଅଭାବନୀୟ ଘଟଣା ଭଦ୍ରକ ଜିଲ୍ଲାର ବାସୁଦେବପୁର ପୌରପାଳିକାର ଉଚ୍ଚଡିଆ ୨୩ ନମ୍ବର ୱାର୍ଡରେ ଦେଖିବାକୁ ମିଳିଛି।

ଗତକାଲି ବିଳମ୍ବିତ ରାତିରେ ସମସ୍ତେ ନିଦରେ ଶୋଇଥିବା ବେଳେ ଉଚ୍ଚଡିଆର ସୁରେନ୍ଦ୍ର ବାରିକଙ୍କ ଘର କୌଣସି କାରଣରୁ ନିଆଁ ଲାଗିଯାଇଥିଲା। ପାଖ ପଡ଼ୋଶୀ ଦେଖି ପାଟି କରି ଡାକ ପକାଇ ଥିଲେ। ଚାହୁଁ  ଚାହୁଁ ନିଆଁ ଚାରିଆଡ଼କୁ ବ୍ୟାପି ଯାଇଥିଲା। ଗୌରାଙ୍ଗ ବାରିକ, ନିଶାକର ବାରିକ, ନରେନ୍ଦ୍ର ବାରିକ ଓ ସୁରେନ୍ଦ୍ର ବାରିକଙ୍କ ୪ଟି ପରିବାରର ୧୨ ବଖରା ଘର ଜଳି ପୋଡ଼ି ପାଉଁଶ ହୋଇଛି। ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ଘରର କୌଣସି ଆସବାବପତ୍ର ବାହାର କରିବା ପାଇଁ ସୁଯୋଗ ପାଇନଥିଲେ ପରିବାର ଲୋକେ।

ଗ୍ରାମବାସୀ  ବାଲ୍ଟିରେ ପାଣି ଢାଳି ନିଆଁ ଲିଭାଇବା ପାଇଁ ଚେଷ୍ଟା କରିଥିଲେ। ବାସୁଦେବପୁର ଦମକଳ ଅନ୍ୟତ୍ର ନିଆଁ ଲିଭାଇବା କାର୍ଯ୍ୟରେ  ଯାଇଥିବାରୁ ସୋର ଦମକଳ ୨ ଘଣ୍ଟା ପରେ ପହଞ୍ଚି ସକାଳ ପର୍ଯ୍ୟନ୍ତ ନିଆଁକୁ ଆୟତ୍ତ କରିଥିଲେ। ତେବେ ଘର ମଧ୍ଯରେ ଥିବା ଜଣେ ମହିଳା ବାହାରକୁ ବାହାରି ନପାରିବାରୁ ଜୀବନ୍ତ ଦଗ୍ଧ ହୋଇଥିଲେ।

ବସ୍‌ ଓ ଟ୍ରକ୍ ମୁହାଁମୁହିଁ ଧକ୍କା ଫଳରେ ୧୫ ଯାତ୍ରୀ ଆହତ

ବୌଦ୍ଧ: ବସ୍‌  ଓ ଟ୍ରକ୍ ମୁହାଁମୁହିଁ ଧକ୍କା ଫଳରେ ୧୫ ଯାତ୍ରୀ ଆହତ। ବୌଦ୍ଧ ଜିଲ୍ଲା ପୁରୁଣା କଟକ ଥାନା ୫୭ ନମ୍ବର ଜାତୀୟ ରାଜପଥର ଖଜୁରୀପଡା ନିକଟରେ ଘଟିଛି ଏହି ଦୁର୍ଘଟଣା। ଯାତ୍ରୀବାହୀ ବସ୍‌ ଓ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ଫଳରେ ବସରେ ଥିବା ୧୫ ଜଣ ଯାତ୍ରୀ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ତିନି ଜଣଙ୍କ ଅବସ୍ଥା ଗୁରୁତର ରହିଛି।

ଆହତମାନଙ୍କୁ ଆମ୍ବୁଲାନ୍ସ ଯୋଗେ ବୌଦ୍ଧ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ବୌଦ୍ଧ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି। ତିରୁପତି ନାମକ ଏକ ଘରୋଇ ବସ୍ ଭୁବନେଶ୍ବରରୁ ଭବାନୀପାଟଣା ଯାଉଥିବା ସମୟରେ ଦୁର୍ଘଟଣା ହୋଇଥିଲା। କେମିତି ଦୁର୍ଘଟଣା ଘଟିଲା ତାହା ଏବେ ପର୍ଯ୍ୟନ୍ତି ଯଣାପଡ଼ିନାହିଁ। ସବୁଠାରୁ ବଡ଼କଥା ହେଉଛି ଏହି ଦୁର୍ଘଟଣାରେ କାହାରି ଜୀବନହାନି ହୋଇନାହିଁ।

ବାହାଘର ସାରି ଫେରୁଥିବା ବେଳେ ବରଯାତ୍ରୀ ଗାଡ଼ିକୁ ଧକ୍କା ଦେଲା ଟ୍ରକ୍‌

ସୋନପୁର: ବରଯାତ୍ରୀ ଗାଡି-ଟ୍ରକ୍ ମୁହାଁମୁହିଁ ଧକ୍କା। ଧକ୍କା ହେବା ଫଳରେ ୮ ଜଣ ବରଯାତ୍ରୀ ଆହତ ହୋଇଛନ୍ତି। ବାହାଘର ସାରି ଫେରୁଥିବା ସମୟରେ ହୋଇଛି ଦୁର୍ଘଟଣା। ସୁବର୍ଣ୍ଣପୁର ଜିଲ୍ଲା ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥର ଝିଙ୍କି ନିକଟରେ ଏହି ଦୁର୍ଘଟଣା ଘଟିଛି। ବରଯାତ୍ରୀ ବଲେରୋ ସହ ସାମ୍ନାରୁ ଧକ୍କା ଦେଲା ଟ୍ରକ।

ମୁହାଁମୁହିଁ ଧକ୍କା  ହେବା ଫଳରେ ୮ ଜଣ ବରଯାତ୍ରୀ ଆହତ ହୋଇଛନ୍ତି। ସମସ୍ତ ଆହତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଦୁଇ ଜଣ ବରଯାତ୍ରୀଙ୍କ ଅବସ୍ଥା ଗୁରୁତର ରହିଛି। ସୋନପୁର ଦମକଳ ବାହିନୀ ଆହତ ମାନଙ୍କୁ ଉଦ୍ଧାର କରି ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଛି। ବରାଯାତ୍ରୀ ମାନେ ହରିନାପାଲି ଗାଁରୁ ପାଟଣାଗଡ଼ ବରଯାତ୍ରୀ ଯାଇ ଘରକୁ ଫେରୁଥିବାବେଳେ ଏହି ଦୁର୍ଘଟଣା ହୋଇଥିଲା। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।

କଳା କୃଷି ଆଇନ୍ ପ୍ରତ୍ୟାହାର ଦାବିରେ ସଂଯୁକ୍ତ କିଷାନ ମୋର୍ଚ୍ଚାର ଭାରତ ବନ୍ଦ ପାଳନ

ଆଜି ୧୨ ଘଣ୍ଟା ଅଟକିବ ଭାରତ। କୃଷି ଆଇନକୁ ବିରୋଧ କରି ସଂଯୁକ୍ତ କିଷାନ ମୋର୍ଚ୍ଚା ପକ୍ଷରୁ ଭାରତ ବନ୍ଦ ଡାକରା ଦିଆଯାଇଛି। କୃଷି ଆଇନ ବିରୁଦ୍ଧରେ ସକାଳ ୬ରୁ ସନ୍ଧ୍ୟା ୬ଟା ଯାଏଁ ଚକ ଅଖ ସବୁ ବନ୍ଦ ପାଇଁ ଆହ୍ବାନ ଦିଆଯାଇଛି। ବନ୍ଦରୁ ଅତ୍ୟାବଶ୍ୟକ ସେବାକୁ ବାଦ ଦିଆଯାଇଛି। ଏହି ଡାକରାକୁ ସଫଳ କରିବା ପାଇଁ ଓଡ଼ିଶାରେ ମଧ୍ୟ ବିଭିନ୍ନ କୃଷକ ସଂଗଠନ, ଶ୍ରମିକ ସଂଗଠନ ଓ ବ୍ୟବସାୟୀକ ସଂଗଠନ ଅଣ୍ଟା ଭିଡ଼ିଛନ୍ତି । ଭାରତ ବନ୍ଦକୁ ଦୃଷ୍ଟିରେ ରଖି ରାଜ୍ୟର ସମସ୍ତ ଶିକ୍ଷାନୁଷ୍ଠାନ ବନ୍ଦ ନେଇ ଘୋଷଣା କରାଯାଇଛି । ବନ୍ଦକୁ ଦୃଷ୍ଟିରେ ରଖି ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ବନ୍ଦ ସମୟରେ ଗାଡି ମଟର, ଦୋକାନ ବଜାର ବନ୍ଦ ରଖିବାକୁ ଅନୁରୋଧ କରାଯାଇଛି ।

ସେପଟେ ଭାରତ ବନ୍ଦ ଡାକରା ପ୍ରଭାବ ଗୁଣୁପୁର ଠାରେ ଦେଖିବାକୁ ମିଳିଛି। ରାୟଗଡାଜିଲ୍ଲା ଗୁଣୁପୁର ଏସ୍ପିଗୁଡା ଛକ ନିକଟରେ ଆଜି ଅଖିଳ ଭାରତୀୟ କୃଷକ ମହାସଭା ପକ୍ଷରୁ ଟାୟାର୍ ଜାଳି ପ୍ରତିବାଦ କରି ରାସ୍ତା ଅବରୋଧ କରିଛନ୍ତି। ଫଳରେ ଗାଡି ଚଳାଚଳ ଦୋକାନ ବଜାର ବନ୍ଦ ରହିଥିବା ଦେଖିବାକୁ ମିଳିଛି।

ସେହିପରି ଭାରତ ବନ୍ଦର ପ୍ରଭାବ ରାଉରକେଲା ସହରରେ ମଧ୍ୟ ପଡ଼ିଛି। ସହରରେ ବସ ଚଳାଚଳ ବନ୍ଦ ରହିଥିବା ବେଳେ ଦୋକାନ ବଜାର ବନ୍ଦ ରହିଛି। ରାଉରକେଲା ଘରୋଇ ଵସଣ୍ଟାଣ୍ଡ ଠାରେ ସିଟୁ ଶ୍ରମିକ ସଂଗଠନ, ସୁନ୍ଦରଗଡ଼ ମୋଟର କର୍ମଚାରୀ ସଂଘ, ରାଉରକେଲା ହକର୍ସ ଆସୋସିଏସନ୍ ଓ ରାଉରକେଲା ମିନି ଵସ ଆସୋସିଏସନ୍ ପକ୍ଷରୁ ଵନ୍ଦକୁ ସମର୍ଥନ କରାଯାଇ ଵିଷୋଭ ପ୍ରଦର୍ଶନ କରାଯାଉଛି।

ପିପିଲି ଉପନିର୍ବାଚନ ପାଇଁ ପ୍ରାର୍ଥୀ ଘୋଷଣା କଲା ବିଜେପି

ପିପିଲି: ପିପିଲି ବିଧାନସଭା ଉପନିର୍ବାଚନ ପାଇଁ ବିଜେପି ପ୍ରାର୍ଥୀ ଘୋଷଣା କରିଛି। ୨୦୧୯ରେ ଦଳର ପ୍ରାର୍ଥୀ ହୋଇଥିବା ଆଶ୍ରୀତ ପଟ୍ଟନାୟକଙ୍କୁ ବିଜେପି ପୁଣିଥରେ ଉପନିର୍ବାଚନରେ ପ୍ରାର୍ଥୀ କରିଛି। ଏ ନେଇ ରାଷ୍ଟ୍ରୀୟ କାର୍ଯ୍ୟାଳୟରୁ ବିଧିବଦ୍ଧ ଘୋଷଣା କରାଯାଇଛି। ଆଜି ନାମାଙ୍କନ ପତ୍ର ଦାଖଲ କରିବେ ଆଶ୍ରିତ ପଟ୍ଟନାୟକ। ଆଶ୍ରୀତ ଏବେ ବିଜେପିର ପୁରୀ ଜିଲ୍ଲା ସଭାପତି ଅଛନ୍ତି। କଂଗ୍ରେସ ଦଳରୁ ନିଜର ରାଜନୈତିକ ଜୀବନ ଆରମ୍ଭ କରିଥିବା ଆଶ୍ରୀତ ୨୦୧୪ ନିର୍ବାଚନ ପରେ ବିଜେପିରେ ସାମିଲ ହୋଇଥିଲେ। ୨୦୧୪ରେ ଆଶ୍ରୀତ ସ୍ୱାଧୀନ ଭାବେ ନିର୍ବାଚନ ଲଢ଼ି ୧୮ ହଜାର ଭୋଟ୍ ହାତେଇଥିଲେ। ପରେ ୨୦୧୯ରେ ବିଜେପି ତାଙ୍କୁ ଟିକେଟ୍ ଦେଇଥିଲା। ୨୦୧୯ରେ ଆଶ୍ରୀତ ୭୨ ହଜାର ୭୩୧ ଖଣ୍ଡ ଭୋଟ୍ ପାଇ ଦ୍ୱିତୀୟ ସ୍ଥାନରେ ରହିଥିଲେ। ବିଜେଡିର ପ୍ରଦୀପ ମହାରଥି ୮୮ ହଜାର ୫୧୮ ଖଣ୍ଡ ଭୋଟ୍ ପାଇ ୧ ନମ୍ବର ସ୍ଥାନରେ ରହିଥିଲେ। ଆସନ୍ତା ଏପ୍ରିଲ ୧୭ ତାରିଖରେ ପିପିଲିରେ ଉପ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ, ମାର୍ଚ୍ଚ ୩୦ ତାରିଖ ରହିଛି ପ୍ରାର୍ଥୀ ପତ୍ର ଦାଖଲର ଶେଷ ଦିନ।

ବିବାହର ପ୍ରଲୋଭନ ଦେଖାଇ ନାବାଳିକାଙ୍କୁ ୭ ମାସର ଗର୍ଭବତୀ କରାଇଲେ ଯୁବକ

ନୟାଗଡ଼: ନୟାଗଡ଼ରେ ପୁଣି ଲଜ୍ୟା। ନବମ ଶ୍ରେଣୀରେ ପଢ଼ୁଥିବା ଛାତ୍ରୀ ହେଲେ ଗର୍ଭବତୀ। ନାବାଳିକା ଛାତ୍ରୀଙ୍କୁ ବିବାହର ପ୍ରତିଶ୍ରୁତି ଦେଇ ଗର୍ଭବତୀ କରାଇଲେ ଯୁବକ। ଦଶପଲ୍ଲା ବାଣିଗୋଛା ଥାନା ଅଞ୍ଚଳରେ ଘଟିଛି ଏଭଳି ଲଜ୍ୟାଜନକ ଘଟଣା। ସରଳତାର ସୁଯୋଗ ନେଇ ନବମ ଶ୍ରେଣୀ ଛାତ୍ରୀକୁ ଗର୍ଭବତି କରିଥିବା ଅଭିଯୋଗ ହୋଇଛି। ଅଭିଯୋଗ ଅନୁଯାୟୀ ନାବାଳିକା ଛାତ୍ରୀ ଜଣଙ୍କ ଗଣିଆ ବ୍ଳକର ଏକ ଆଶ୍ରମ ବିଦ୍ୟାଳୟରେ ନବମ ଶ୍ରେଣୀରେ ପଢ଼ନ୍ତି। ଗତବର୍ଷ ଲକ୍‌ଡାଉନ ଯୋଗୁଁ  ସ୍କୁଲ ବନ୍ଦ ହେବା ପରେ ସେ ନିଜ ଗାଁରେ ରହୁଥିଲେ।

ନାବାଳିକା ଛାତ୍ରୀ  ଜଣଙ୍କର ସରଳତାର ସୁଯୋଗ ନେଇ ସେହି ଗାଁର ବୁଲୁ ମଲ୍ଲିକ ବିବାହ ର ଲୋଭ ଦେଖାଇ  ଶାରୀରିକ ସମ୍ପର୍କ ରଖି ବାରମ୍ବାର ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଏପରି ନାବାଳିକା ଛାତ୍ରୀ ଜଣଙ୍କ ଏବେ ୭ ମାସର  ଗର୍ଭବତୀ ଥିବା ଜଣାପଡ଼ିଛି। ଛାତ୍ରୀଙ୍କ ଠାରୁ ସ୍କୁଲ କତ୍ତୃପକ୍ଷ ଏଭଳି ଘଟଣା ଜାଣିବା ପରେ  ତୁରନ୍ତ ଜିଲ୍ଲାପାଳଙ୍କୁ ଜଣାଇଥିବା କହିଛନ୍ତି ଜିଲ୍ଲା  ମଙ୍ଗଳ ଅଧିକାରୀ। ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ନାବାଳିକା ଛାତ୍ରୀର ସ୍ବାସ୍ଥ୍ୟ ପରୀକ୍ଷା କରାଯାଛି। ସେପଟେ ଥାନାରେ ଅଭିଯୋଗ ପରେ ବୁଲୁ ମଲ୍ଲିକ ଫେରାର ରହିଛି । ତେବେ ତାକୁ ଖୁବଶୀଘ୍ର ଗିରଫ କରାଯିବା ବୋଲି SP କହିଛନ୍ତି କହିଛନ୍ତି ।

ରିଲିଜ ହେଲା ସ୍ୱର୍ଗତ ରାଜୁ ମିଶ୍ରଙ୍କର ଶେଷ ହୋଲି ଗୀତ

ଭୁବନେଶ୍ୱର: ରିଲିଜ ହୋଇଛି ସ୍ୱର୍ଗତ ରାଜୁ ମିଶ୍ରଙ୍କର ଶେଷ ନିର୍ଦ୍ଦେଶନାରେ ତିଆରି ହୋଇଥିବା ଗୀତ। ରାଜୁ ମିଶ୍ର ଏବେ ଆଉ ଆମ ପାଖରେ ନାହାଁନ୍ତି କିନ୍ତୁ ତାଙ୍କ ନିର୍ଦ୍ଦେଶନାରେ ତିଆରି ହୋଇଥିବା ଗୀତ ଏବେ ସମସ୍ତଙ୍କ ମନରେ ରଙ୍ଗ ଲଗାଇବା ଆରମ୍ଭ କରିଛି। ଆଗକୁ ହୋଲି ଥିବାରୁ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ଏହି ସୁନ୍ଦର ଗୀତ। ରଙ୍ଗିନ ଛତା ଖୋଲି ଆସିଛି ହୋଲି। ଦେବଦାଶ ଛୋଟରାୟଙ୍କର କବିତାକୁ ନେଇ ତିଆରି ହୋଇଛି ଏହି ଗୀତ। ରାଜୁ ମିଶ୍ର ବଞ୍ଚିଥିବା ବେଳେ ଦେବଦାଶ ଛୋଟରାୟଙ୍କ ସହ ବସି ଅନେକ ଆଲୋଚନା କରି ଏହି ଗୀତକୁ ତିଆରି କରିଥିଲେ। ସେପଟେ ଏହି ଗୀତରେ କଣ୍ଠଦାନ କରିଛନ୍ତି ପ୍ରସିଦ୍ଧ କଣ୍ଠଶିଳ୍ପୀ ସୁସମିତା ଦାସ।

ନଭେମ୍ବର ୨ ତାରିଖରେ ୭୨ ବର୍ଷ ବୟସରେ ହୃଦ୍‌ଘାତରେ ତାଙ୍କର ପରଲୋକ ହୋଇଥିଲା। ଜଟଣୀସ୍ଥିତ ବାସଭବନରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ଅନେକ ସୁପର୍‌ହିଟ୍ ଓଡ଼ିଆ ଫିଲ୍ମରେ ସେ ନିର୍ଦ୍ଦେଶନା ଦେଇଥିଲେ। ଏକାଧାରାରେ ରାଜୁ ମିଶ୍ର ଥିଲେ ସିନେମାଟୋଗ୍ରାଫର, ସଙ୍ଗୀତଜ୍ଞ, ଚଳଚ୍ଚିତ୍ର ନିର୍ଦ୍ଦେଶକ ଓ ଲେଖକ। ରାଜ୍ୟର ସର୍ବୋଚ୍ଚ ଚଳଚ୍ଚିତ୍ର ପୁରସ୍କାର ଜୟଦେବ ପୁରପସ୍କାର ସମେତ ଅନେକ ପୁରସ୍କାର ଓ ସମ୍ମାନର ଅଧିକାରୀ ଥିଲେ ରାଜୁ ମିଶ୍ର।

ପ୍ରଦୂଷଣର ସୀମା ଲଂଘିଛି ବନ୍ଦର ନଗରୀ ପାରାଦୀପ

ପାରାଦୀପ: ପ୍ରଦୂଷଣର ସୀମା ଲଂଘିଛି ବନ୍ଦର ନଗରୀ ପାରାଦୀପ । ବନ୍ଦର ପ୍ରଶାସନର ଖାମଖିଆଲି ମନୋଭାବ ଯୋଗୁଁ ପ୍ରଦୂଷଣରେ ପେଶି ହେଉଛନ୍ତି ପାରାଦୀପବାସୀ । ବନ୍ଦରରେ ଗଦା ହୋଇଥିବା କୋଇଲା , ଲାଇମଷ୍ଟୋନ, ଲୁହାପଥର ଗୁଣ୍ଡ ପବନରେ ଉଡି ସ୍ଥାନୀୟ ପରିବେଶକୁ ପ୍ରଦୂଷିତ କରୁଛି । ସ୍ଥିତି ଏପରି ହୋଇଛି ଯେ, ଗୁରୁବାର କୋଇଲା ଗୁଣ୍ଡ ଉଡି ମେଘୁଆ ପାଗର ଭ୍ରମ ସୃଷ୍ଟି ହୋଇଥିଲା । ଅଠରବାଙ୍କି ଠାରୁ ବଡପଡିଆ‌ ରାସ୍ତାରେ ଉତ୍କଟ ପରିସ୍ଥିତି ସୃଷ୍ଟି ହୋଇଥିଲା । ଗଛପତ୍ର ଗୁଡ଼ିକ କଳା ପଡି ଯାଇଥିବା ବେଳେ, ରାସ୍ତାରେ ଯାଆସ କରୁଥିବା ଲୋକଙ୍କ ଆଖି ଲାଲ ପଡ଼ିଯାଇଥିଲା । ବନ୍ଦର ପକ୍ଷରୁ କୋଇଲା ଗଦା ହୋଇଥିବା ସ୍ଥାନରେ ପାଣି ଛିଞ୍ଚିବାର ବ୍ୟବସ୍ଥା କରାଯାଇଛି । ମାତ୍ର ଏହା ଗୁଣ୍ଡକୁ ରୋକିବାରେ ସଫଳ ହୋଇନାହିଁ। ଏଣୁ ତୁରନ୍ତ ବିକଳ୍ପ ବ୍ୟବସ୍ଥା ଗ୍ରହଣ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି । ପଣ୍ୟ କାରବାରରେ ରେକର୍ଡ କରୁଥିବା ବନ୍ଦର କର୍ତ୍ତୃପକ୍ଷ କିନ୍ତୁ ଲୋକଙ୍କ କଥା ଭୁଲି ଯାଉଛନ୍ତି । ସେପଟେ ପାରାଦୀପ ସ୍ଥିତି ପ୍ରଦୂଷଣ ଅଧିକାରୀ ମଧ୍ୟ ସ୍ଥିତିକୁ ହାଲକା ଭାବେ ନେବା ସହ ବନ୍ଦର କର୍ତ୍ତୃପକ୍ଷଙ୍କୁ ପାଣି ପକାଇବାକୁ ନିର୍ଦ୍ଦେଶ ଦେବେ ବୋଲି କହିଛନ୍ତି ।

୨୦୨୦-୨୧ ଆର୍ଥିକ ବର୍ଷରେ ରାଜ୍ୟରେ ୨୦କୋଟି ଶ୍ରମ ଦିବସ ମାର୍କ ହାସଲ କରିଛି

ଭୁବନେଶ୍ୱର: ରାଜ୍ୟ ନିଶ୍ଚିତ ନିଯୁକ୍ତି ପରିଷଦର ଗୁରୁତ୍ବପୂର୍ଣ୍ଣ ବୈଠକ। ଷଷ୍ଠ ବୈଠକରେ ରାଜ୍ୟରେ ମନରେଗା ନିଯୁକ୍ତି ନେଇ ବିସ୍ତୃତ ସୂଚନା ମିଳିଛି। ୨୦୨୦-୨୧ ଆର୍ଥିକ ବର୍ଷରେ ରାଜ୍ୟ ୨୦କୋଟି ଶ୍ରମ ଦିବସ ମାର୍କ ହାସଲ କରିଛି। ଏଥିରେ ୩୭.୧ ଲକ୍ଷ ପରିବାରକୁ ନିଯୁକ୍ତି ଯୋଗାଇ ଦିଆଯାଇଛି। ଯେଉଁଠି କି ୨୦୧୮-୧୯ରେ ୦.୪୭ଲକ୍ଷ ପରିବାର ଶହେ ଦିନ କାର୍ଯ୍ୟ ଦିବସ ପୂରଣ କରିଛନ୍ତି। ସେହିପରି ୨୦୧୯-୨୦ରେ ଏହା ୧.୬୧ଲକ୍ଷ ଏବଂ ୨୦୨୦-୨୧ରେ ୩.୭୫ ଲକ୍ଷ କାର୍ଯ୍ୟ ଦିବସ ସୃଷ୍ଟି କରାଯାଇଛି। ଏସସି ଏସଟି ଏବଂ ମହିଳାଙ୍କୁ ୨୦୨୦-୨୧ରେ ଯଥାକ୍ରମେ ୪୯ପ୍ରତିଶତ ଏବଂ ୪୫ ପ୍ରତିଶତ ଶ୍ରମି ଦିବସ ଯୋଗାଇ ଦିଆଯାଇଛି ।

ପରିବାର ପ୍ରତି ରୋଜଗାରର ହାରାହାରି ଦିନ ୨୦୨୦-୨୧ରେ ୫୪.୬ ପ୍ରତିଶତରୁ ଅଧିକ ରହିଥିବା ବେଳେ ୨୦୧୯-୨୦ରେ ୪୭.୯ ଏବଂ ୨୦୧୮-୧୯ରେ ୩୮.୬ ମାର୍କ ହାସଲ କରାଯାଇଥିଲା । ୨୦ଟି ଦାଦନ ପ୍ରବଣ ବ୍ଲକରେ ଦାଦନ ଦୂର ପାଇଁ ରାଜ୍ୟ ସରକାର ୩୦୮ଟଙ୍କା ଧାର୍ଯ୍ୟ କରିଛନ୍ତି । ଯେଉଁଥିରେ ମନରେଗା ଅଧିନରେ କେନ୍ଦ୍ର ୨୦୭ଟଙ୍କା ଦେଉଥିବା ବେଳେ ରାଜ୍ୟ ସରକାର ୧୦୧ ଟଙ୍କା ଦେଉଛନ୍ତି । ଏହି ଜିଲ୍ଲାଗୁଡ଼ିକରେ ରାଜ୍ୟ ସରକାର ଅତିରିକ୍ତ ୨ଶହ ଦିନ କାର୍ଯ୍ୟଦିବସ ମଂଜୁର କରିଛନ୍ତି । ଏହି ସୁବିଧା ସୁନ୍ଦରଗଡ଼, ଅନୁଗୁଳ, ଝାରସୁଗୁଡ଼ା, ମୟୂରଭଞ୍ଜର ୩ଟି ବ୍ଲକ, କେନ୍ଦୁଝର ଏବଂ ଯାଜପୁର ଭଳି ୬ଟି ଖଣିଜ ସଂପଦରେ ଭରପୁର ଜିଲ୍ଲା ଲାଗି ରାଜ୍ୟ ସରକାର ଯୋଗାଇ ଦେଇଛନ୍ତି ।

ରେଭେନ୍ସା ବିଶ୍ବବିଦ୍ୟାଳୟର ପିଜି, ୟୁଜି ପରୀକ୍ଷା ସ୍ଥଗିତ

କଟକ: କଟକ ରେଭେନ୍ସା ବିଶ୍ବବିଦ୍ୟାଳୟର ପିଜି, ୟୁଜି ପରୀକ୍ଷା ସ୍ଥଗିତ। ପରବର୍ତ୍ତୀ ନୋଟିସ ପର୍ଯ୍ୟନ୍ତ ସ୍ଥଗିତ ରଖାଯାଇଛି। ବିଶ୍ୱବିଦ୍ୟାଳୟ ମନସ୍ତତ୍ବ ବିଭାଗରେ ଦୁଇ ଅଧ୍ୟାପିକାଙ୍କ ସମେତ ତିନି ଜଣ କରୋନା ପଜିଟିଭ ବାହାରିବା ପରେ  ନିଆଯାଇଛି ପଦକ୍ଷେପ। ସେହିପରି  ୧୪ ଦିନ ପର୍ଯ୍ୟନ୍ତ ଅଫଲାଇନ କ୍ଲାସ ବନ୍ଦ କରି କେବଳ ଅନଲାଇନ କ୍ଲାସ କରିବାକୁ ନିଷ୍ପତ୍ତି ନିଆଯାଇଛି। ବିଶ୍ବବିଦ୍ୟାଳୟ ପରିସରକୁ ବାହାର ଲୋକଙ୍କ ପ୍ରବେଶକୁ ବାରଣ କରାଯାଇଛି। ଅନ୍ୟ ପକ୍ଷରେ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ପିଲାଙ୍କୁ ଚିହ୍ନଟ କରାଯାଇ ଲକ୍ଷଣ ଥିଲେ ଟେଷ୍ଟିଂ କରିବାକୁ ନିଷ୍ପତ୍ତି ନିଆଯାଇଛି।