spot_img
Home Blog Page 5504

ବ୍ରୋଞ୍ଜ ପଦକ ଜିତିବା ପରେ ବ୍ରିଲିଆଣ୍ଟ ଇନ୍ ବ୍ଲୁ ଲେଖି ଭାରତୀୟ ହକି ଟିମକୁ ପ୍ରଶଂସା କଲେ ମୁଖ୍ୟମନ୍ତ୍ରୀ

ଭୁବନେଶ୍ୱର: ଟୋକିଓ ଅଲିମ୍ପିକ୍ସରେ ଭାରତୀୟ ହକି ଟିମର ଐତିହାସିକ ବିଜୟ। ଦୀର୍ଘ ୪୧ବର୍ଷ ପରେ ଦେଶକୁ ମେଡାଲ୍ ଦେଇଛି ଭାରତୀୟ ହକି ଟିମ୍। ଆଜିର ମ୍ୟାଚ୍‌ରେ ଦେଖିବାକୁ ମିଳିଥିଲା ରୋମ ଟାଙ୍କୁରା ଗେମ୍‌। ପ୍ରତିଟି ମିନିଟରେ ରୋମାଞ୍ଚକର ହେଉଥିଲା ହକି ମ୍ୟାଚ୍‌। ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁଭେଚ୍ଛା ଜଣାଇଛନ୍ତି। ବ୍ରିଲିଆଣ୍ଟ ଇନ୍ ବ୍ଲୁ ଲେଖି ଭାରତୀୟ ହକି ଟିମକୁ ପ୍ରଶଂସା କରିଛନ୍ତି ନବୀନ। ସେପଟେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାରତୀୟ ହକି ଦଳ ସହ ଟେଲିଫୋନ୍ ଯୋଗେ କଥା ହୋଇଛନ୍ତି। କଥା ହୋଇ ଚମତ୍କାର ବିଜୟ ପାଇଁ ଅଭିନନ୍ଦନ ଜଣାଇଛନ୍ତି। ଏହା ସହ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ। ଉଭୟ ପୁରୁଷ ଓ ମହିଳା ହକି ଟିମର ସ୍ପନ୍ସର ହେଉଛି ଓଡ଼ିଶା ସରକାର।

୨୦୧୮ରୁ ଓଡ଼ିଶା ଭାରତୀୟ ହକି ଟିମ୍‌ର ପ୍ରାୟୋଜକ ରହିଛି ଖାଲି ସେତିକି ନୁହେଁ ହକି ପାଇଁ ଓଡ଼ିଶାର ଅବଦାନ ମଧ୍ୟ ଅନନ୍ୟ। ଓଡ଼ିଶାରେ ହକିର ଉନ୍ନତି ହେବାରୁ ଆଜି ଓଡ଼ିଶାରୁ ପୁରୁଷ ହକି ଟିମ୍‌ରେ ଉପ ଅଧିନାୟକ ବିରେନ୍ଦ୍ର ଲାକ୍ରା ଥିବା ବେଳେ ମହିଳା ଟିମ୍‌ରେ ଦିପ୍‌ ଗ୍ରେସ୍‌ ଏକ୍କା ଅଛନ୍ତି। ସେଥିପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଛୁଟୁଛି ବିଭିନ୍ନ ମହଲରୁ ପ୍ରଶଂସାର ସୁଅ।

ଶେଷ ଥର ପାଇଁ ୧୯୮୦ ମସ୍କୋ ଅଲମ୍ପିକ୍ସରେ ଭାରତୀୟ ଟିମ୍ ସେମିଫାଇନାଲରେ ପହଂଚିଥିଲା। ଆଉ ଶେଷ ଥର ପାଇଁ ମଧ୍ୟ ୧୯୮୦ ମସିହାରେ ଭାରତୀୟ ହକି ଟିମ୍ ଅଲମ୍ପିକ୍ସରେ ସ୍ୱର୍ଣ୍ଣ ପଦକ ପାଇଥିଲା।

ଅଲମ୍ପିକ୍ସରେ ଇତିହାସ ରଚିଲା ଭାରତ, ଜର୍ମାନୀକୁ ହରାଇ ବ୍ରୋଞ୍ଜ ଆଣିଲା

ଭୁବନେଶ୍ୱର: ଟୋକିଓ ଅଲିମ୍ପିକ୍ସରେ ଇତିହାସ ରଚିଲା ପୁରୁଷ ହକି ଦଳ। ଜର୍ମାନୀକୁ ହରାଇ ବ୍ରୋଞ୍ଜ ପଦକ ଉପରେ ନିଜର ଅଧିକାର ସାବ୍ୟସ୍ତ କରିଛି। ଦୀର୍ଘବର୍ଷର ଅପେକ୍ଷାର ଅନ୍ତ ଘଟିଛି। ୧୯୮୦ରେ ପ୍ରଥମ ଥର ପାଇଁ ପଦକ ଆଣିଥିଲା ଭାରତ। ଏହା ପରେ ଅଲମ୍ପିକର ପଦକ ପାଇଁ ଲଢ଼ି ଚାଲିଥିଲା। ପଦକ ସଂଘର୍ଷରେ ଜିତିଛି ଭାରତ। ବ୍ରୋଞ୍ଜ ପଦକ ମ୍ୟାଚରେ ଜର୍ମାନୀକୁ ୫-୪ରେ ପରାସ୍ତ କରିଛି ପଦକରେ ନିଜ ନାମ ଲେଖିଛି।​ ଚାରି ଦଶନ୍ଧିର ସଂଗ୍ରାମକୁ ସମାପ୍ତ କରି ପୁରୁଷ ହକିରେ ଭାରତ ବ୍ରୋଞ୍ଜ ପଦକ ଜିତିଛି। ସିମରନଜିତ୍ ସିଂ ୩ଟି ଗୋଲ୍ ସ୍କୋର କରିଥିଲେ ବ୍ରୋଞ୍ଜ ପଦକ ମ୍ୟାଚ୍‌ରେ। ଏହି ମ୍ୟାଚରେ ଟିମ୍ ଇଣ୍ଡିଆର ଖରାପ ଆରମ୍ଭ ହୋଇଥିଲା। କିନ୍ତୁ ଦମଦାର ପ୍ରଦର୍ଶନ ସହିତ ମ୍ୟାଚ୍‌କୁ ନିଜ ଅଧିନକୁ ନେଇଥିଲା ଭାରତ। ତା’ପରେ କ୍ରମାଗତ ଗୋଲ୍ ସ୍କୋର କରିଥିଲା।  କିନ୍ତୁ ଏହା ପରେ ଜର୍ମାନୀ ଆଉ ଦୁଇଟି ଗୋଲ ସ୍କୋର କରି ଭାରତ ଉପରେ ଚାପ ପକାଇଲା। କିନ୍ତୁ ଟିମ୍ ଇଣ୍ଡିଆ ଏକ ଜବରଦସ୍ତ ପ୍ରତ୍ୟାବର୍ତ୍ତନ କରି ମାତ୍ର ୨ ମିନିଟରେ ମ୍ୟାଚ୍‌କୁ ୫-୪ ଆଗୁଆ ଦୌଡ଼କୁ ଆଣିଥିଲା। ​ମ୍ୟାଚର ପ୍ରଥମ ମିନିଟରେ ଜର୍ମାନୀ ଗୋଲ ସ୍କୋର କରିଥିଲା। ଜର୍ମାନୀ ପାଇଁ ମୁର ଓରୁଜ ଏହି ଫିଲ୍ଡ ଗୋଲ ସ୍କୋର କରିଥିଲେ। ଯାହା ପରେ ଜର୍ମାନୀ ୧-୦ରେ ଆଗରେ ରହିଥିଲା। ପ୍ରତିପକ୍ଷ ଆକ୍ରମଣ ପାଇଁ ଟିମ୍ ଇଣ୍ଡିଆର ସୁଯୋଗ ଥିଲା, କିନ୍ତୁ ଏହା ହାତଛଡା କରିଥିଲା। ୫ମ ମିନିଟରେ ଭାରତ ଏକ ପେନାଲ୍ଟି କର୍ଣ୍ଣର ପାଇଥିଲା। କିନ୍ତୁ ରୁପିନ୍ଦର ପାଲ ସିଂ ଗୋଲ କରିବାରେ ବିଫଳ ହୋଇଥିଲେ।

ପ୍ରଥମ କ୍ୱାର୍ଟରରେ ଜର୍ମାନୀ ଭାରତ ଉପରେ ଚାପ ପକାଇଥିଲା। ଏହି କ୍ୱାର୍ଟରରେ ଜର୍ମାନୀ ବହୁତ ଆକ୍ରମଣାତ୍ମକ ଢ଼ଙ୍ଗରେ ଖେଳିଥିଲା ପ୍ରଥମ ମିନିଟରେ ଏକ ଗୋଲ ସ୍କୋର କରି ଜର୍ମାନୀ ପାଇଁ ଏହି ପଦକ କେତେ ମୂଲ୍ୟବାନ ତାହା ଦେଖାଇଦେଇଥିଲା। ପ୍ରଥମ କ୍ୱାର୍ଟର ଶେଷ ହେବା ପୂର୍ବରୁ ଭାରତକୁ ଏକ ପେନାଲ୍ଟି କର୍ଣ୍ଣର ମିଳିଥିଲା। ଯାହାର ପୁରା ଫାଇଦା ଉଠାଇଥିଲା ଭାରତ। ପେନାଲଟିରେ ଗୋଲ ଦେବା ପରେ ଜର୍ମାନୀକୁ ୧-୧ରେ ଆଗୁଆ ରଖିଥିଲା। ଶ୍ରୀଜେଶଙ୍କୁ ଏଠାରେ ବିଶେଷ ପ୍ରଶଂସା କରିବାକୁ ପଡିବ। ସବୁଠାରୁ ଗୋଲ କିପର ସ୍ରିଜେସ୍‌ ଆଜି ତାଙ୍କର ଭଲ ପ୍ରଦର୍ଶନ କରିଥିଲେ।

ଆଜି କଟକରେ କରୋନା କଟକଣା ସହ ଖୋଲୁଛି ସମସ୍ତ ଧର୍ମାନୁଷ୍ଠାନ

କଟକ: କରୋନାରୁ ଧିରେ ଧିରେ ମୁକୁଳୁଛି ଓଡ଼ିଶା। କରୋନାର ଦ୍ୱିତୀୟ ଲହରରେ ବନ୍ଦ ଥିବା ରାଜ୍ୟର ସମସ୍ତ ଧର୍ମାନୁଷ୍ଠାନ ଧିରେ ଧିରେ ଖୋଲିବାକୁ ଲାଗିଛି। ରାଜ୍ୟ ସରକାର ସମସ୍ତ ଜିଲ୍ଲା ପ୍ରାଶାସନକୁ ସ୍ଥାନୀୟ ସ୍ଥିତି ଦେଖି ମନ୍ଦିର ଖୋଲିବାକୁ ନିଷ୍ପତ୍ତି ଦେଇପାରିବେ ବୋଲି ନିର୍ଦ୍ଦେଶ ଦିଆଯାଇଛି। ତେବେ ବହୁ ଦିନ ପରେ ଆଜିଠାରୁ ଖୋଲିବ କଟକ ସହରର ସମସ୍ତ ଧର୍ମାନୁଷ୍ଠାନ । ସକାଳ ୬ରୁ ରାତି ୮ ଯାଏ ଖୋଲା ରହିବ ଧର୍ମାନୁଷ୍ଠାନ । ୫୦ ଜଣ ଭକ୍ତ କିମ୍ବା ଧର୍ମାନୁଷ୍ଠାନରେ ୫୦ ପ୍ରତିଶତ ଭକ୍ତଙ୍କୁ ପ୍ରବେଶ ପାଇଁ ମିଳିବ ଅନୁମତି। ଶନିବାର ଏବଂ ରବିବାର ସର୍ଟଡାଉନ ପାଇଁ ଭକ୍ତଙ୍କ ପ୍ରବେଶ ଉପରେ ବାରଣ କରାଯାଇଛି । କୋଭିଡ୍ କଟକଣା ମଧ୍ୟରେ ଦର୍ଶନ କରିବେ ଭକ୍ତ । ମନ୍ଦିର ଭିତରେ ଭୋଗ, ପ୍ରସାଦ ବଣ୍ଟନ ବାରଣ ହୋଇଛି । ବହୁଦିନ ପରେ ଧର୍ମାନୁଷ୍ଠାନ ଖୋଲୁଥିବାରୁ ଭକ୍ତମାନେ ଖୁସି ଜାହିର କରିଛନ୍ତି ।

ରିମାଣ୍ଡର ତୃତୀୟ ଦିନରେ ବିରଞ୍ଚି ସାହୁଙ୍କୁ କାରାଥନ ଜେରା

ଭୁବନେଶ୍ୱର: ଖୋଲିବ କୁବେର ପିଏସଙ୍କ କଳାଧନର କୁହୁକ ପେଡ଼ି। କୋଟିପତି ବିରଞ୍ଚି ସାହୁଙ୍କୁ ମାରାଥନ୍ ଜେରା କରୁଛି ଭିଜିଲାନ୍ସ। ଆଜି ତୃତୀୟ ଦିନରେ ବିରଞ୍ଚି ସାହୁଙ୍କୁ କରାଯିବ ଜେରା। ବିରଞ୍ଚିଙ୍କ ୧୦ ଦଶ ବର୍ଷର ଫାଇଲ ଖୋଲିଛି ଭିଜିଲାନ୍‌ସ। ବିରଞ୍ଚିଙ୍କ ପାଖକୁ କେମିତି ଆସିଲା ଏତେ ନଗଦ ଟଙ୍କା। ବେଆଇନ ଆୟର ଉତ୍ସ କଣ, ପ୍ଲଟ ଓ ସୁନା କେଉଁ ଟଙ୍କାରେ କିଣା ହୋଇଛି ? ବିରଞ୍ଚିଙ୍କ ପତ୍ନୀ ଓ ସଢ଼ୁଙ୍କ ନାଁରେ କେତେ ସମ୍ପତ୍ତି ରହିଛି, ଏସବୁର ଟିକିନିଖି ତଥ୍ୟ ସଂଗ୍ରହ କରୁଛନ୍ତି ଭିଜିଲାନ୍ସ ଟିମ୍। ଦୁର୍ନୀତିର ଗୁମର ଫିଟାଇବା ପାଇଁ ବିରଞ୍ଚିଙ୍କ ପତ୍ନୀ ଓ ସଢୁଙ୍କ ରିମାଣ୍ଡରେ ଆଣି ମୁହାଁମୁହିଁ ଜେରା କରିବାକୁ ଯୋଜନା ରହିଛି। ତଦନ୍ତ ପରେ ବିରଞ୍ଚିଙ୍କ ଦୁର୍ନୀତିର କଳା ସାମ୍ରାଜ୍ୟ ଉପରୁ ପରଦା ହଟିବ ବୋଲି ଭିଜିଲାନ୍‌ସ ଆଶା ରଖିଛି। ସେପଟେ କୋଟିପତି ବିରଞ୍ଚିଙ୍କ ଟଙ୍କାର ଉତ୍ସ ଦେଖି ମନି ଲଣ୍ଡରିଂ ଆକ୍ଟରେ ନିଜ ଆଡୁ ମାମଲା କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ।

 

 

+୨ ଆଡ଼ମିଶନ ପ୍ରକ୍ରିୟା ଆରମ୍ଭ, SAMS ପୋର୍ଟାଲରେ ହେବ ଆବେଦନ

ଭୁବନେଶ୍ୱର: ଯୁକ୍ତ ଦୁଇ ପ୍ରଥମ ବର୍ଷ ଆଡ଼ମିଶନ ପାଇଁ ଆରମ୍ଭ ହେଲା ପ୍ରକ୍ରିୟା। ଇଚ୍ଛୁକ ଛାତ୍ର ଛାତ୍ରୀଙ୍କ ପାଇଁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଜାରି ହେଲା ଆଡ଼ମିଶନ ସଂକ୍ରାନ୍ତୀୟ ମାର୍ଗଦର୍ଶିକା। ଆଡ଼ମିଶନ ପାଇଁ କେବଳ ସାମସ ପୋର୍ଟାଲରେ ଅନଲାଇନରେ ଆବେଦନ ଗ୍ରହଣ ହେବ। ଏନେଇ ଖୁବଶୀଘ୍ର ବିଜ୍ଞପ୍ତି ପ୍ରକାଶ ପାଇବ ବୋଲି ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ଜାରି କରାଯାଇଛି  ।

ଯେଉଁ ଛାତ୍ରଛାତ୍ରୀ ଯୁକ୍ତ ଦୁଇ ପ୍ରଥମ ବର୍ଷ ଆଡମିଶନ କରିବା ପାଇଁ ଇଚ୍ଛୁକ ଥିବେ, ସେମାନେ ସାମ୍ସ ପୋର୍ଟଲରେ ହିଁ ନିଜ ଆବେଦନ ପତ୍ର ଦାଖଲ କରିପାରିବେ  ।  ଆବେଦନ ସମୟରେ କୌଣସି ଘରୋଇ ଏଜେଣ୍ଟ କିମ୍ବା ଏଜେନ୍ସିକୁ ଛାତ୍ରଛାତ୍ରୀମାନେ ଡକ୍ୟୁମେଣ୍ଟ ନଦେବା ଲାଗି ନିର୍ଦ୍ଦେଶାଳୟ ପକ୍ଷରୁ ସତର୍କ କରାଇ ଦିଆଯାଇଛି ।

ଅନ୍ଧାରୁଆରେ ଭାରତ ବାୟୋଟେକ ଭ୍ୟାକ୍ସିନ୍ ପ୍ଲାଣ୍ଟ, ବୁଲି ଦେଖିଲେ କମ୍ପାନୀ ପ୍ରତିଷ୍ଠାତା

ଭୁବନେଶ୍ୱର: ରାଜଧାନୀ ଉପକଣ୍ଠ ଅନ୍ଧାରୁଆରେ ଚାଲିଛି ଭ୍ୟାକ୍ସିନ୍ ପ୍ଲାଣ୍ଟ । ଏହାର ତଦାରଖ କରିଛନ୍ତି ଭାରତ ବାୟୋଟେକର ପ୍ରତିଷ୍ଠାତା ଡକ୍ଟର କ୍ରିଶା ଇଲା । ଏଥିସହ ବିଜ୍ଞାନ ଓ କାରିଗରୀ ବିଭାଗର ସଚିବ ମନୋଜ ମିଶ୍ରଙ୍କୁ ମଧ୍ୟ ଲୋକସେବା ଭବନରେ ଭେଟିଛନ୍ତି । ଟିକା ପ୍ଲାଣ୍ଟର ଅଗ୍ରଗତି ନେଇ ଆଲୋଚନା କରିଛନ୍ତି । ଆସନ୍ତା ବର୍ଷ ଜୁନ ସୁଦ୍ଧା ପ୍ଲାଣ୍ଟରେ କାମ ସରିବା ସହ ଟିକା ପ୍ରସ୍ତୁତ ହେବ ବୋଲି ଜଣାପଡିଛି ।

ଭୁବନେଶ୍ୱରରେ ଭାରତ ବାୟୋଟେକର ପ୍ଲାଣ୍ଟ ନିର୍ମାଣ ଲାଗି ପୂର୍ବରୁ ରାଜ୍ୟ ସରକାର ସମସ୍ତ ସହଯୋଗ କରିଥିଲେ  । ସେପଟେ ଯଥା ଶୀଘ୍ର ପ୍ଲାଣ୍ଟ କାର୍ଯ୍ୟ ସରିବା ସହ କିପରି ଟିକା ପ୍ରସ୍ତୁତ ହେବ ସେନେଇ କମ୍ପାନୀ ଜୋରସର କାର୍ଯ୍ୟ ଚଳାଇଛି  ।

କେନ୍ଦ୍ରମନ୍ତ୍ରୀ ସାଧ୍ୱୀ ନିରଞ୍ଜନ ଜ୍ୟୋତିଙ୍କ ଉତ୍ତରରେ ଅସନ୍ତୁଷ୍ଟ ବିଜେଡି

ନୂଆଦିଲ୍ଲୀ: ପ୍ରଧାନମନ୍ତ୍ରୀ ଆବାସ ଯୋଜନା ସମ୍ପର୍କରେ ସଂସଦରେ ଉତ୍ତର ରଖିଥିବା ବିଭାଗୀୟ ମନ୍ତ୍ରୀ ସାଧ୍ୱୀ ନିରଞ୍ଜନ ଜ୍ୟୋତିଙ୍କ ଉତ୍ତରକୁ ନେଇ ପ୍ରତିକ୍ରିୟା ରଖିଛି ବିଜେଡି । ମନ୍ତ୍ରୀଙ୍କ ଉତ୍ତର ଭୁଲ୍ ଓ ବିଭ୍ରାନ୍ତିକର ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି । ଗ୍ରାମ୍ୟ ପକ୍କାଘର ନିର୍ମାଣରେ ଓଡ଼ିଶା ସାରା ଦେଶରେ ଏକ ଅଗ୍ରଣୀ ରାଜ୍ୟ ହୋଇଥିବା ବେଳେ ରାଜ୍ୟ ସରକାରଙ୍କୁ ବଦନାମ କରିବା ଏବଂ ଗରିବ ଲୋକଙ୍କୁ ଘର ପାଇବାରୁ ବଞ୍ଚିତ କରିବା ପାଇଁ ବିଜେପିର ଏହା ଏକ ଷଡ଼ଯନ୍ତ୍ର ।

ମନ୍ତ୍ରୀ ତାଙ୍କ ଉତ୍ତରରେ ବିଜେପି ସାଂସଦମାନଙ୍କ ଅଭିଯୋଗ ଦର୍ଶାଇବା ନିନ୍ଦନୀୟ । କୌଣସି ରାଜେନୖତିକ ଦଳର ଅଭିଯୋଗ ବାବଦରେ ଉତ୍ତରରେ କେବେ ଦିଆଯାଏ ନାହିଁ । ଏହା କେବଳ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ । ସଂସଦକୁ ରାଜନୈତିକ ଡ୍ରାମାର ମଞ୍ଚ କରିବା ଏବଂ ଆବାସ ଯୋଜନା ବାବଦରେ ରାଜ୍ୟ ସରକାର ସମସ୍ତ ତଥ୍ୟ ଦେଇସାରିଥିବା ବେଳେ ବିଜେପିକୁ ସୁହାଇବା ଭଳି ମନ୍ତ୍ରୀଙ୍କ ଉତ୍ତର ଦୁଭାର୍ଗ୍ୟଜନକ ।

ଏଭଳି କରିବା ଦ୍ୱାରା ମନ୍ତ୍ରୀ ତାଙ୍କ ମର୍ଯ୍ୟାଦା ହାନି କରିଛନ୍ତି । ବିଜେଡି ଏହାକୁ ଦୃଢ଼ ଭାବେ ନିନ୍ଦା କରିବା ସହ ପ୍ରଶ୍ନ ନମ୍ବର ୨ ହଜାର ୫୦୫ର ଉତ୍ତର ସଂଶୋଧନ କରିବାକୁ ଦାବି କରିଛି । ପୂର୍ବରୁ ଗ୍ରାମ୍ୟ ଗୃହ ନିର୍ମାଣ ପ୍ରସଙ୍ଗରେ ରାଜ୍ୟ ସରକାରଙ୍କୁ ପ୍ରଶଂସା କରିବା ସହ ପୁରସ୍କୃତ ମଧ୍ୟ କରିଛି । ଏବେ ରାଜ୍ୟ ସରକାରଙ୍କ ଭଲ କାମକୁ ରାଜନୈତିକ ଉଦ୍ଦେଶ୍ୟ ରଖି ଭୁଲ ବୋଲି ଦର୍ଶାଇବା କେବେ ଗ୍ରହଣୀୟ ନୁହେଁ ବୋଲି ସସ୍ମିତ ପାତ୍ର କହିଛନ୍ତି ।

ବାଲେଶ୍ୱର ଜିଲ୍ଲା ଓକିଲ ସଂଘ ଆନ୍ଦୋଳନ ସ୍ଥଗିତ, ପୋଲିସ ବିରୁଦ୍ଧରେ ଚାଲିଥିଲା କାର୍ଯ୍ୟବନ୍ଦ ଆନ୍ଦୋଳନ

ବାଲେଶ୍ୱର: ସ୍ଥଗିତ ହେଲା ବାଲେଶ୍ୱର ଜିଲ୍ଲା ଓକିଲ ସଂଘର ପୋଲିସ ବିରୁଦ୍ଧରେ ଚାଲିଥିବା କାର୍ଯ୍ୟବନ୍ଦ ଆନ୍ଦୋଳନ । ଅଭିଯୁକ୍ତ 2ଜଣ ପୋଲିସ ଅଫିସରଙ୍କୁ ବିଭାଗ ତରଫରୁ ନିଲମ୍ବନ କରାଯିବା ଓ ଅନ୍ୟ ଦୁଇଜଣଙ୍କୁ କାରଣ ଦର୍ଶାଅ ନୋଟିସ୍‌ ଜାରୀ କରାଯାଇ ଥିବାରୁ ଆନ୍ଦୋଳନକୁ ସ୍ଥଗିତ ରଖାଯାଇଥିବା ବାଲେଶ୍ୱର ବାର୍‌ ଏସୋସିଏସନ୍‌ ତରଫରୁ ଘୋଷଣା କରାଯାଇଛି ।

ଅଭିଯୁକ୍ତ ମାନଙ୍କ ବିରୁଦ୍ଧରେ ମାମଲା ରୁଜୁକରି ସେମାନଙ୍କୁ କୋର୍ଟକୁ ଆଣିବା ପର୍ଯ୍ୟନ୍ତ ଓକିଲ ସଂଘ ନିରବ ଆନ୍ଦୋଳନ ଚାଲୁ ରଖିବ ବୋଲି କୁହାଯାଇଛି । ଗତ ଜୁଲାଇ ମାସ 4 ତାରିଖରେ ସୋର ଥାନାରେ ଓକିଲ ଧୀରେନ୍ଦ୍ର ଦାସଙ୍କୁ ନୟାପଲ୍ଲୀ ଥାନାର ଏଏସ୍‌ଆଇ ଏ.କେ. ବଳ ମାଡ଼ ମାରିଥିଲେ । ଏହି ଘଟଣାକୁ ନେଇ ଗତ ମାସେ ଧରି ପୋଲିସ-ଓକିଲ ବିବାଦ ଚାଲିଥିଲା । ଗତ ସପ୍ତାହେ ଧରି ଓକିଲମାନେ କାର୍ଯ୍ୟବନ୍ଦ ଆନ୍ଦୋଳନ କରି ଏସ୍‌ପିଙ୍କୁ ଦାବିପତ୍ର ପ୍ରଦାନ କରିଥିଲେ ।

ପୋଲିସ ତଦନ୍ତକରି ନୟାପଲ୍ଲୀ ଥାନାର ଏଏସ୍‌ଆଇ ଏ.କେ.ବଳ ଓ ସୋର ଥାନାର ଏସ୍‌ଆଇ ସି.ଏସ୍‌. ମହାନ୍ତିଙ୍କୁ ନିଲମ୍ବନ କରାଯାଇଛି । ସେହିପରି ସୋର ଥାନାର ତତ୍‌କାଳୀନ ଥାନା ଅଧିକାରୀ ମଧୁମିତା ମହାନ୍ତି ଓ ଏସ୍‌ଆଇ ଏ.କେ. ମହାନ୍ତିଙ୍କୁ କାରଣ ଦର୍ଶାଅ ନୋଟିସ୍‌ ଜାରୀ କରାଯାଇଛି । ଏହି କାର୍ଯ୍ୟାନୁଷ୍ଠାନ ପରେ ଓକିଲ ସଂଘ ଆନ୍ଦୋଳନକୁ ସ୍ଥଗିତ କରିଥିବା ସାମ୍ବାଦିକ ସମ୍ମିଳନୀରେ ଘୋଷଣା କରାଯାଇଛି

ସେଣ୍ଟ ଜୋସଫ୍ ଛାତ୍ରୀ ଶ୍ରୁତି କରଙ୍କୁ ରାଜ୍ୟସ୍ତରୀୟ ଶ୍ରୀସେବା ସମ୍ମାନ

ଭୁବନେଶ୍ୱର: ଦୀର୍ଘଦିନ ଧରି ନିଷ୍ପେସିତ ଜୀବଜନ୍ତୁ ଓ ବୁଲା କୁକୁରଙ୍କ ସେବାଯତ୍ନ ସହ ସେମାନଙ୍କ ଉପରେ ହେଉଥିବା ମାନବୀୟ ଅତ୍ୟାଚାର ବିରୁଦ୍ଧରେ ସ୍ୱର ଉଠାଇଥିବା ଭୁବନେଶ୍ୱରସ୍ଥିତ ସେଣ୍ଟ ଜୋସଫ୍ ହାଇସ୍କୁଲର ଛାତ୍ରୀ ଶ୍ରୁତି କରଙ୍କୁ ଚଳିତବର୍ଷର ‘ରାଜ୍ୟସ୍ତରୀୟ ଶ୍ରୀସେବା ସମ୍ମାନ’ ସମ୍ମାନିତ କରାଯାଇଛି। ସାମାଜିକ ଅନୁଷ୍ଠାନ ‘ହେଲପମେଟ୍‌’ ପକ୍ଷରୁ ଆଜି ଏହି ସମ୍ମାନ ସହ ମାନପତ୍ର ଓ ଉପଢୌକନ ପ୍ରଦାନ କରାଯାଇଛି । କରୋନା ମହାମାରୀ ସମୟରେ ଅନେକ ବୁଲା ଜୀବଜନ୍ତୁଙ୍କ ସେବା ଯତ୍ନ ନେବା ସହ ଗତ ୨ବର୍ଷରୁ ଅଧିକ ସମୟ ଧରି ବୁଲା କୁକୁରକୁ ନିଜର ପୋଷା ଜନ୍ତୁଙ୍କ ଭଳି ରଖିଥିବା ନବମ ଶ୍ରେଣୀ ଛାତ୍ରୀ ଶ୍ରୁତି ଗତ ମାସରେ ଅନଲାଇନରେ ବୁଲା କୁକୁରଙ୍କ ପ୍ରତି ହେଉଥିବା ଆକ୍ରମଣ ବିରୁଦ୍ଧରେ ଏକ ଅଭିଯାନ ଚଳାଇ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ।

ଅନଲାଇନରେ ତାଙ୍କର ଏହି ଅଭିଯାନକୁ ସମସ୍ତେ ପ୍ରଶଂସା କରିବା ସହ ସ୍ଥାନୀୟ ପୁଲିସ ମଧ୍ୟ ତାଙ୍କୁ ଏ ଦିଗରେ ସହଯୋଗର ହାତ ବଢ଼ାଇଥିଲା। ଏପରିକି ନିକଟରେ ସେ ଦୁର୍ଘଟଣାଗ୍ରସ୍ତ ଗୋଟିଏ ବୁଲା କୁକୁରକୁ ନିଜ ଘରେ ରଖି ତା’ର ସମସ୍ତ ଚିକିତ୍ସା ମଧ୍ୟ କରୁଛନ୍ତି।  ଏତେ କମ୍ ବୟସରେ ବୁଲା କୁକୁର ଓ ନିଷ୍ପେସିତ ଜୀବଜନ୍ତୁଙ୍କ ପ୍ରତି ତାଙ୍କର ଦୁର୍ବଳତା ଓ ଭଲପାଇବାକୁ ସମ୍ମାନ ଜଣାଇ ତଥା ଏହା ଅନ୍ୟ ପିଲାମାନଙ୍କୁ ପ୍ରେରଣା ଯୋଗାଇବ ବୋଲି ଦର୍ଶାଇ ‘ହେଲପମେଟ୍‌’ ଅନୁଷ୍ଠାନ ପକ୍ଷରୁ ଏହି ସମ୍ମାନ ପ୍ରଦାନ କରାଯାଇଥିବା ଅନୁଷ୍ଠାନର ସମ୍ପାଦିକା ନିବେଦିତା ଭଞ୍ଜ କହିଛନ୍ତି।

ନବମ ଶ୍ରେଣୀରେ ପଢ଼ୁଥିବା ଶ୍ରୁତି ଭୁବନେଶ୍ୱରର ଜଣେ ଆଗଧାଡ଼ିର ୟୁ-ଟ୍ୟୁବର ଭାବେ ମଧ୍ୟ ପରିଚିତ। ଏହି ଅବସରରେ ନୟାପଲ୍ଲୀ ଥାନା ଆଇଆଇସି ଶରତ କୁମାର ସାହୁଙ୍କୁ ମଧ୍ୟ ଅନୁଷ୍ଠାନ ପକ୍ଷରୁ ‘ରାଜ୍ୟସ୍ତରୀୟ କରୋନା ଯୋଦ୍ଧା’ ସମ୍ମାନରେ ସମ୍ମାନିତ କରାଯାଇଥିଲା । ଏହି କାର୍ଯ୍ୟକ୍ରମରେ ଅନୁଷ୍ଠାନର ଉପସଭାପତି ନିହାରିକା ପଟ୍ଟନାୟକ ଏବଂ ସମସ୍ତ କର୍ମକର୍ତ୍ତାଙ୍କ ସମେତ ବିଶିଷ୍ଟ ବ୍ୟକ୍ତିମାନେ ଉପସ୍ଥିତ ଥିଲେ।

ଫୋକସ୍‌ରେ ପଶ୍ଚିମ ଓଡ଼ିଶା: ବଲାଙ୍ଗୀରରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ସମୀକ୍ଷା କଲେ 5T ସଚିବ

ବଲାଙ୍ଗୀର: ରାଜ୍ୟ ସରକାରଙ୍କ ଫୋକସ୍‌ରେ ପଶ୍ଚିମ ଓଡ଼ିଶା । ମୁଖ୍ୟ ଶାସନ ସଚିବ ଓ ୫-T ସଚିବ ଆଜି ବଲାଙ୍ଗୀରରେ ବିଭିନ୍ନ ଯୋଜନାର ଅଗ୍ରଗତି ସମୀକ୍ଷା କରିବା ସହ ୨୦୨୨ ଜୁନ ସୁଦ୍ଧା ଲୋୟର ସୁକତେଲ ସ୍ପିଲୱେ ନିର୍ମାଣ ସାରିବାକୁ ନିର୍ଦ୍ଦେଶ ଦେଇଛନ୍ତି । ବଲାଙ୍ଗୀର ମେଡିକାଲ କଲେଜ ଓ ଅକ୍ସିଜେନ ପ୍ଲାଣ୍ଟ ନିର୍ମାଣର ମଧ୍ୟ ସମୀକ୍ଷା କରିଥିଲେ । ପ୍ରକଳ୍ପ ମାନରେ କୌଣସି ପ୍ରକାର ସାଲିସ ନକରିବାକୁ ୫-T ସଚିବ ନିର୍ଦ୍ଦେଶ ଦେଇଛନ୍ତି । ୫-T କାର୍ଯ୍ୟକ୍ରମରେ ଜିଲ୍ଲାର ୨୪ଟି ହାଇସ୍କୁଲରେ ଅତ୍ୟାଧୁନିକ ଭିତ୍ତିଭୂମି ସୃଷ୍ଟି କରାଯିବ ।

ଶିକ୍ଷା ଓ ସ୍ୱାସ୍ଥ୍ୟଠାରୁ ଜଳସେଚନ ପର୍ଯ୍ୟନ୍ତ ସବୁ କ୍ଷେତ୍ରରେ ବିକାଶର ଶୀର୍ଷରେ ପହଞ୍ଚିବ ବଲାଙ୍ଗୀର । ଜିଲ୍ଲାରେ କାର୍ଯ୍ୟକାରୀ ହେଉଥିବା ବିଭିନ୍ନ ପ୍ରକଳ୍ପର ଅଗ୍ରଗତି ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଓ 5T ସଚିବ ଭି.କେ ପାଣ୍ଡିଆନ । ଉଭୟ ଅଧିକାରୀ ଦେଓଗାଁ ପଞ୍ଚାୟତ ହାଇସ୍କୁଲ ଓ ପିପି ଏକାଡେମୀକୁ ଗସ୍ତ କରିଥିଲେ । ସ୍କୁଲର ବିକାଶ ନେଇ ଜିଲ୍ଲା ଶିକ୍ଷାଧିକାରୀ ଓ ପ୍ରଧାନ ଶିକ୍ଷକଙ୍କ ସହ ଆଲୋଚନା କରିଛନ୍ତି଼। ଖୁବଶୀଘ୍ର 5-T କାର୍ଯ୍ୟକ୍ରମରେ ୨୪ଟି ହାଇସ୍କୁଲରେ ଇ-ଲାଇବ୍ରେରୀ, ସ୍ମାର୍ଟ କ୍ଲାସରୁମ ଓ ଆଧୁନିକ ବିଜ୍ଞାନ ଲାବରେଟୋରୀ ନିର୍ମାଣ କରାଯିବ ।

ବଲାଙ୍ଗୀର ମେଡିକାଲ କଲେଜରେ ନିର୍ମାଣାଧୀନ ତରଳ ଅକ୍ସିଜେନ ପ୍ଲାଣ୍ଟ ନିର୍ମାଣ କାର୍ଯ୍ୟର ଅଗ୍ରଗତି ସାଙ୍ଗକୁ କୋଭିଡ ତୃତୀୟ ଲହରର ମୁକାବିଲା ପାଇଁ ପ୍ରସ୍ତୁତିର ମଧ୍ୟ ତଦାରଖ କରିଥିଲେ । ଅଗଷ୍ଟ ମାସ ଶେଷ ସୁଦ୍ଧା ଅକ୍ସିଜେନ ପ୍ଲାଣ୍ଟ ଚାଲୁ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଲୋୟର ସୁକ୍‌ତେଲ ଜଳସେଚନ ପ୍ରକଳ୍ପକୁ ବୁଲି ଦେଖିବା ସହ ସ୍ପିଲୱେ ନିର୍ମାଣ କାର୍ଯ୍ୟ ୨୦୨୨ ଜୁନ ସୁଦ୍ଧା ସାରିବାକୁ ନିର୍ଦ୍ଦେଶ ଦେଇଛନ୍ତି ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବଲାଙ୍ଗୀର ଜିଲ୍ଲାର ବିକାଶ ପାଇଁ ଅନେକ ପଦକ୍ଷେପ ନେଇଛନ୍ତି । ଅନେକ କାର୍ଯ୍ୟ ରାଜ୍ୟ ସରକାରଙ୍କ ଅନୁଦାନରେ ଚାଲିଛି । ଗତ ମାର୍ଚ୍ଚରେ 5-T ସଚିବ ଓ ମୁଖ୍ୟ ଶାସନ ସଚିବ ଲୋୟର ସୁକତେଲ ଜଳସେଚନ ପ୍ରକଳ୍ପ ଅନୁଧ୍ୟାନ କରି ଫେରିବା ପରେ ନିର୍ମାଣ କାର୍ଯ୍ୟ ତ୍ବରାନ୍ବିତ ହେବା ସହ ବିସ୍ଥାପିତମାନଙ୍କ ସମସ୍ୟାର ସମାଧାନ ମଧ୍ୟ ହୋଇଥିଲା । ସେହିଭଳି ବଲାଙ୍ଗୀର ସାଇନ୍ସ ପାର୍କ, ପ୍ଲାନେଟାରିୟମ, ନୂଆ ବସ ଟର୍ମିନାଲ, ପାଟଣାଗଡ଼ ଉପଖଣ୍ଡସ୍ତରୀୟ ମେଡିକାଲନିର୍ମାଣ, ବାଇପାସ, ମହାରାଣୀ ସାଗର ଟ୍ୟାଙ୍କ, ବିଭିନ୍ନ ପାନୀୟ ଜଳ ଓ ବିଦ୍ୟୁତ ପ୍ରକଳ୍ପର ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଓ 5-T ସଚିବ ଭିକେ ପାଣ୍ଡିଆନ ।