spot_img
Home Blog Page 5480

ଅପରାଧ ନିୟନ୍ତ୍ରଣ କ୍ଷେତ୍ରରେ ଆଗଉଛି ଓଡ଼ିଶା, ଉଦ୍‌ଘାଟିତ ହେଲା ଷ୍ଟେଟ୍ ଫରେନସିକ୍ ଲ୍ୟାବର ନୂଆ ବିଲ୍ଡିଂ

ଭୁବନେଶ୍ୱର: ଉଦଘାଟିତ ହଲା ଷ୍ଟେଟ ଫରେନସିକ ଲ୍ୟାବର ନୂଆ ବିଲ୍ଡିଂ। ଜଟିଳ ମାମଲାକୁ ସହଜରେ ଧରିବା ପାଇଁ କାମ କଲା ନୂଆ ଲାବରେଟୋରୀ। ଭୁବନେଶ୍ୱର ମଞ୍ଚେଶ୍ୱର ଶିଳ୍ପାଞ୍ଚଳରେ ଅତ୍ୟାଧୁନିକ ଜ୍ଞାନକୌଶଳରେ ନିର୍ମାଣ ହୋଇଥିବା ଏହି ଲାବରେଟୋରୀରେ ଅପରାଧ ଏବଂ ଅପରାଧିର ସମସ୍ତ ଟେଷ୍ଟିଂ କରାଯାଇ ପାରିବ। ପୁରୁଣା ବିଲ୍ଡିଂରେ ଥିବା ୭ଟି ବିଭାଗକୁ ନୂଆ ବିଲ୍ଡିଂକୁ ସ୍ଥାନାନ୍ତର କରାଯାଇଛି। ଲାଏ ଡିଟେକ୍ସନ ଟେଷ୍ଟ, ଫିଜିକ୍ସ, ସାଇବର ଫରେନ୍ସିକ, ବାଲିସଟିକ୍ସ, ବାୟୋଲୋଜି, ସେରୋଲୋଜି, କେମେଷ୍ଟ୍ରି ଲ୍ୟାବ ସ୍ଥାନାନ୍ତର ହୋଇଛି। ଏହି ସବୁ ଟେଷ୍ଟିଂ ପାଇଁ ହାଇ ଟେକ୍ନୋନୋଜି ବ୍ୟବହାର କରାଯାଇଛି ବୋଲି କହିଛନ୍ତି ପୋଲିସ ଡିଜି।

ଏହି ନୂତନ ବିଲ୍ଡିଂକୁ ପୋଲିସ ମହାନିର୍ଦ୍ଦେଶକ ଶ୍ରୀ ଅଭୟ ପୋଲିସ ବିଭାଗ ପାଇଁ ଉତ୍ସ୍ୱର୍ଗୀକୃତ କରିଛନ୍ତି। ଖୁବ୍‌ ଶୀଘ୍ର ଏହି କୋଠାରେ ଗୁରୁତ୍ୱପୂର୍ଣ୍ଣ ଡିଏନ୍‌ଏ ଟେଷ୍ଟିଂ ମେସିନ୍ ଏବଂ ସାଇବର ଫରେନ୍ସିକ୍ ଲ୍ୟାବ୍ ନିର୍ମାଣ କରାଯିବ। ଏହି ଦୁଇଟି ଟେଷ୍ଟିଂ ଆରମ୍ଭ ହେଲେ ରାଜ୍ୟରେ ଘଟୁଥିବା ଜଟିଳ ମାମାଲା ଗୁଡିକର ପ୍ରମାଣ ଯୋଗାଡ କରିବା ପାଇଁ ବା ଟେଷ୍ଟିଂ କରିବା ପାଇଁ ଓଡ଼ିଶା ପୋଲିସକୁ ରାଜ୍ୟ ବାହାରକୁ ଯିବାକୁ ପଡିବ ନାହିଁ ବୋଲି ଡିଜି କହିଛନ୍ତି। ଏହି ଲ୍ୟାବ୍‌ରେ ଆବଶ୍ୟକୀୟ ଯନ୍ତ୍ରପାତି ସମେତ ଡାକ୍ତର, ସାଇଣ୍ଟିଷ୍ଟ ନିୟୋଜିତ ଅଛନ୍ତି।

ପୂର୍ବରୁ ଏହି ଲ୍ୟାବରେ ଅନେକ ଜଟିଳ କେଶର ଟେଷ୍ଟିଂ କରି ପୋଲିସ ସଫଳତା ପାଇଛି। ଦୀର୍ଘଦିନର ଶବ ସମେତ ଅନେକ ହତ୍ୟାକାଣ୍ଡର ଗୁରମ ଖୋଲିବାରେ ଏହି ଲ୍ୟାବ ବେଶ ସହାୟକ ହୋଇଛି। ତେବେ ଏହି ଅତ୍ୟାଧୁନିକ ଲ୍ୟାବ ଓଡ଼ିଶା ପୋଲିସକୁ ତଦନ୍ତରେ ଆହୁରି ଅଧିକ ସହାୟତା କରିବ।

ଦୁର୍ବଳ ମୌସୁମୀ କାରଣରୁ ରାଜ୍ୟରେ ବୃଦ୍ଧି ପାଇଛି ନିଅଣ୍ଟିଆ ବର୍ଷା, ଆସନ୍ତା ୧୬ରୁ ବର୍ଷା ସମ୍ଭାବନା

ଭୁବନେଶ୍ୱର: ରାଜ୍ୟରେ ଦୁର୍ବଳ ରହିଛି ଦକ୍ଷିଣ ପଶ୍ଚିମ ମୌସୁମୀ ବାୟୁ। ଆସନ୍ତା ଏକ ସପ୍ତାହ ପର୍ଯ୍ୟନ୍ତ ମଧ୍ୟ ମୌସୁମୀ ଦୁର୍ବଳ ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। ଦୁର୍ବଳ ମୌସୁମୀ ପାଇଁ ରାଜ୍ୟରେ ନିଅଣ୍ଟିଆ ବର୍ଷାର ପରିମାଣ ମଧ୍ୟ ବୃଦ୍ଧି ପାଇଛି। ଜୁନ୍ ୧ ତାରିଖରୁ ଅଗଷ୍ଟ ୧୨ ତାରିଖ ମଧ୍ୟରେ ରାଜ୍ୟରେ ୭୧୧.୧ ମିଲିମିଟର ବର୍ଷା ହେବା କଥା। କିନ୍ତୁ ଏହି ସମୟ ମଧ୍ୟରେ ରାଜ୍ୟରେ ୪୯୮.୯ ମିଲିମିଟର ବର୍ଷା ରେକର୍ଡ ହୋଇଛି। ଯାହା ସ୍ୱାଭାବିକ ବର୍ଷା ଠାରୁ ୩୦ ପ୍ରତିଶତ କମ୍ ବର୍ଷା। ରାଜ୍ୟରେ ୨୪ଟି ଜିଲ୍ଲାରେ ନିଅଣ୍ଟିଆ ବର୍ଷା ହୋଇଥିବା ବେଳେ ୬ଟି ଜିଲ୍ଲାରେ ସ୍ୱାଭାବିକ ବର୍ଷା ହୋଇଛି।

ଯାଜପୁରେ ୫୫ ପ୍ରତିଶତ, ଭଦ୍ରକରେ ୫୦ ପ୍ରତିଶତ, ଗଜପତିରେ ୪୪ ପ୍ରତିଶତ ଏବଂ ବଲାଙ୍ଗିର ଜିଲ୍ଲାରେ ୪୩ ପ୍ରତିଶତ, ଝାରସୁଗୁଡା ଏବଂ କେନ୍ଦୁଝର ଜିଲ୍ଲାରେ ସ୍ୱାଭାବିକ ଠାରୁ ୪୧ ପ୍ରତିଶତ କମ୍ ବର୍ଷା ରେକର୍ଡ କରାଯାଇଛି। ଓଡ଼ିଶାରେ ଅଗଷ୍ଟ ୧ ତାରିଖରୁ ଆଜି ପର୍ଯ୍ୟନ୍ତ କ୍ରମାଗତ ଭାବରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ଦୁର୍ବଳ ରହିଛି। ଏହି ସମୟ ମଧ୍ୟରେ ରାଜ୍ୟରେ ୧୪୮.୮ ମିଲିମିଟର ବର୍ଷା ରେକର୍ଡ ହେବା କଥା। କିନ୍ତୁ ମାତ୍ର ୪୨.୭ ମିଲିମିଟର ବର୍ଷା ରେକର୍ଡ କରାଯାଇଛି।

କେବଳ ଅଗଷ୍ଟ ମାସରେ ସ୍ୱାଭାବିକ ଠାରୁ ୭୧ ପ୍ରତିଶତ କମ୍ ବର୍ଷା ହୋଇଥିବା ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି। ସେପଟେ ନିଅଣ୍ଟିଆ ବର୍ଷାରେ ମରୁଡି ଆଶଙ୍କା ଥିବା ବେଳେ ଆଶା ସଞ୍ଚାର କରିଛି ପଶ୍ଚିମ କେନ୍ଦ୍ରୀୟ ବଙ୍ଗୋପସାରଗରୁ ସୃଷ୍ଟି ହୋଇ ଝାଡଖଣ୍ଡ ଏବଂ ଉପକୂଳ ଓଡ଼ିଶା ପର୍ଯ୍ୟନ୍ତ ଲମ୍ବିଥିବା ଘୂର୍ଣ୍ଣିବଳୟ। ଏହି ଘୂର୍ଣ୍ଣିବଳୟ ପ୍ରଭାବରେ ଆସନ୍ତା ୧୬ ତାରିଖରୁ ରାଜ୍ୟରେ ବର୍ଷାର ପରିମାଣ ବଢିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର।

ବିଶେଷ କରି ଉତ୍ତର ଉପକୂଳ ଓଡ଼ିଶା ସମେତ ଦକ୍ଷିଣ ଏବଂ ଆଭ୍ୟନ୍ତରୀଣ ଓଡ଼ିଶାର ଜିଲ୍ଲା ଗୁଡିକରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଗଞ୍ଜାମ, ଗଜପତି, କୋରାପୁଟ, ମାଲକାନଗିରି, ନବରଙ୍ଗପୁର, କଳାହାଣ୍ଡି, କନ୍ଧମାଳ, ଅନୁଗୁଳ, ଢେଙ୍କାନାଳ, କେନ୍ଦୁଝର, ବାଲେଶ୍ୱର, ମୟୁରଭଞ୍ଜ, ଭଦ୍ରକ, ଯାଜପୁର, କଟକ ଏବଂ ଖୋର୍ଦ୍ଧା ଜିଲ୍ଲାକୁ ସତର୍କତା ଜାରି କରାଯାଇଛି। ଏହି ଘୂର୍ଣ୍ଣିବଳୟ ଯଦି ଲଘୁଚାପରେ ପରିଣତ ହୁଏ ତେବେ ନିଅଣ୍ଟିଆ ବର୍ଷା କିଛି ପରିମାଣରେ ପୂରଣ ହେବାର ଆଶା ରହିଛଇ।

 

ସ୍ତ୍ରୀ ସହ କଳହ ପରେ ୩ ବର୍ଷର ପୁଅ ସହ ବେକରେ ଶାଢ଼ୀ ଲଗାଇ ପଙ୍ଖାରେ ଝୁଲି ପଡ଼ିଲା ସ୍ୱାମୀ

ନବରଙ୍ଗପୁର: ନିଜ ପୁଅକୁ ହତ୍ୟା କରିବା ପରେ ଆତ୍ମହତ୍ୟା କଲା ମଦ୍ୟପ ବାପା। ଘରୋଇ କଳହ ପାଇଁ ବଳି ପଡ଼ିଲା ଗେଲବସରିଆ ପୁଅ। ଏଭଳି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଚଚା ପଞ୍ଚାୟତ ଅର୍ଜୁନଗୁଡ଼ା ଗାଁରେ। ଘରୋଇ କଳହ ପାଇଁ ଚାଲିଯାଇଛି ୩ ବର୍ଷର କୁନି ପୁଅର ଜୀବନ। ଅତ୍ୟଧିକ ମଦ ପଇବା ପରେ ସ୍ୱାମୀ ପୀତବାସ ଭତ୍ରା ମାନସିକ ସ୍ଥିତି ହରାଇ ବସିଥିଲା। ଏହା ପରେ ସ୍ତ୍ରୀ ସହ ପାଟି ତୁଣ୍ଡ କରିଥିଲା ପୀତବାସ। ଅଧିକ କଳହ କାରଣରୁ ସ୍ତ୍ରୀ ବିମଳା ମାଝୀ ଘରୁ ବାହାରି ଘର ପଛପଟ ବାରଣ୍ଡାରେ ବସି ରହିଥିଲେ। କିଛି ସମୟ ପରେ ଘରଭିରକୁ ଯାଇ ଦେଖିବା ବେଳେକୁ ପୀତବାସ ଏବଂ ତିନି ବର୍ଷ ବେକରେ ଶାଢ଼ି ଲଗାଇ ଆତ୍ମହତ୍ୟା କରିଛନ୍ତି। ଏହା ଦେଖିବା ପରେ ବିମଳା ଗାଁ ଲୋକଙ୍କୁ ଡାକି ଝୁଲନ୍ତା ମୃତଦେହକୁ ଉଦ୍ଧାର କରିଥିଲେ। ପରେ ପରିବାର ଲୋକେ ଝରିଗାଁ ପୋଲିସ କୁ ଖବର ଦେଇଥିଲେ। ଘଟଣା ସ୍ଥଳରେ ଝରିଗାଁ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।

ତାଲିବାନ କବଳରୁ ରକ୍ଷା ପାଇଲା ଆଫଗାନର ପୂର୍ବତନ ଉପରାଷ୍ଟ୍ରପତିଙ୍କ ଅପହୃତ ପୁଅ

ନୂଆଦିଲ୍ଲୀ: ଆଫଗାନିସ୍ତାନର ପୂର୍ବତନ ଉପରାଷ୍ଟ୍ରପତି ଅବଦୁଲ ରସିଦ ଦୋସ୍ତମଙ୍କ ଅପହୃତ ପୁଅ ୟାର ମହମ୍ମଦ ଦୋସ୍ତମ ତାଲିବାନ କବଳରୁ ରକ୍ଷା ପାଇ ତାଙ୍କ ପିତାଙ୍କ ନିକଟରେ ପହଞ୍ଚିଛନ୍ତି। ବୁଧବାର ରାତିରେ ଜାବଜ୍ଜାନ ବିମାନବନ୍ଦରରେ ତାଲିବାନ ଘେରାବନ୍ଦିରେ ୟାର ମହମ୍ମଦ ଫସିଯାଇଥିଲେ। ଏହାପରେ ଖବର ମିଳିଥିଲା ଯେ ୟାର ମହମ୍ମଦଙ୍କୁ କିଛି ଆଫଗାନି ସୈନିକଙ୍କ ସହ ତାଲିବାନ ବନ୍ଦୀ ବନେଇଛି।

ହେଲେ ପୂର୍ବତନ ଉପରାଷ୍ଟ୍ରପତି ରସିଦ ଦୋସ୍ତମଙ୍କ ତରଫରୁ କୁହାଯାଇଛି ଯେ ‘ୟାର ମହମ୍ମଦ ବିମାନବନ୍ଦରରେ ତାଲିବାନ ଘେରାବନ୍ଦୀରେ ଫସିଥିଲେ ସତ, କିନ୍ତୁ ତାଙ୍କୁ ଅପହରଣ ଖବର ମିଥ୍ୟା ଥିଲା। ସେଠାରେ ତାଲିବାନିଙ୍କ ସହ ପ୍ରବଳ ସଂଘର୍ଷ ପରେ ୟାର ମହମ୍ମଦ ତାଙ୍କ ଅବରୋଧରୁ ବାହାରି ଆସିଛନ୍ତି। ସେ ସମ୍ପୂର୍ଣ୍ଣ ସୁରକ୍ଷିତ ଏବଂ ସେ ବର୍ତ୍ତମାନ ମଜାର-ଇ-ସରିଫରେ ତାଙ୍କ ପିତାଙ୍କ ସହ ଅଛନ୍ତି।

ଆଫଗାନିସ୍ତାନରେ ଦିନକୁ ଦିନ ତାଲିବାନଙ୍କ ବର୍ବରତା ବଢିବାରେ ଲାଗିଛି  । କାନ୍ଦାହାର ଜେଲ ଭାଙ୍ଗିବା ସହ ଗଜନି ସହରକୁ କବଜାକୁ ନେଇଛନ୍ତି ତାଲିବାନ ଆତଙ୍କବାଦୀ । ଜେଲ ଭାଙ୍ଗିବା ସହ ଆତଙ୍କବାଦୀମାନେ ସେଠାରେ ଥିବା ସମସ୍ତ ରାଜନୈତିକ କଏଦୀଙ୍କୁ ନେଇ ପଳାଇଛନ୍ତି । ଗତ କିଛି ଦିନ ପୂର୍ବରୁ କାନ୍ଦାହାର ଜେଲ ଉପରେ ତାଲିବାନ ନଜର ପକାଇଥିଲେ ମଧ୍ୟ ସେଥିରେ ବିଫଳ ହୋଇଥିଲା। ହେଲେ ଏବେ ସେ ତା ମିଶନରେ ସଫଳ ହୋଇଛି। ଯଦି ଏଭଳି ଭାବେ ତାଲିବାନ ଆତଙ୍କବାଦୀଙ୍କ ବର୍ବରତା ଜାରି ରୁହେ ତେବେ ୩ ମାସ ମଧ୍ୟରେ ସମ୍ପୂର୍ଣ୍ଣ ଆଫଗାନିସ୍ତାନକୁ ତାଲିବାନ ନିଜ ଅକ୍ତିଆରକୁ ନେଇଯିବ ବୋଲି ପୂର୍ବାନୁମାନ କରିଛି ଆମେରିକାର ଗୁଇନ୍ଦା ସଂସ୍ଥା।

ସେବା ପାଇଁ ସମ୍ମାନ: ଓଡ଼ିଶାର ୪ ପୋଲିସଙ୍କୁ ମିଳିବ ଉତ୍କର୍ଷ ସେବା ପଦକ

ଭୁବନେଶ୍ୱର: କାର୍ଯ୍ୟ କ୍ଷେତ୍ରରେ ଉଲ୍ଲେଖନୀୟ ଭୂମିକା ପାଇଁ ସମ୍ମାନ  । ସ୍ୱାଧିନତା ଦିବସ ଉପଲକ୍ଷେ ସମ୍ମାନିତ ହେବେ ଓଡ଼ିଶାର ୪ ପୋଲିସ ଅଧିକାରୀ  ।   ଓଡ଼ିଶାରୁ ୪ଜଣଙ୍କୁ ମିଳିବ ଉତ୍କର୍ଷ ସେବା ପଦକ । ରାଜ୍ୟର ୨ ଇନ୍ସପେକ୍ଟର ଓ ୨ସବ୍ ଇନ୍ସପେକ୍ଟରଙ୍କୁ ସମ୍ମାନୀତ କରାଯିବ । ଇନସପେକ୍ଟର ଦେବେନ୍ଦ୍ର ମଲ୍ଲିକ ଓ ଦେବେନ୍ଦ୍ର ବିଶ୍ୱାଳ ଏବଂ ଏସଆଇ ତୃପ୍ତିରଞ୍ଜନ ନାୟକ ଓ ଶ୍ରୀକାନ୍ତ ସାହୁଙ୍କୁ ମିଳିବ ଉତ୍କର୍ଷ ସେବା ପଦକ ।

ସାରାଦେଶରେ ୧୫୨ ପୋଲିସ ଅଧିକାରୀଙ୍କୁ ତଦନ୍ତ କ୍ଷେତ୍ରରେ ଉତ୍କର୍ଷ ସେବା ପଦକ ପ୍ରଦାନ କରାଯିବ । ସେମାନଙ୍କ ମଧ୍ୟରେ ଓଡ଼ିଶାରୁ ୪ ଜଣ ରହିଛନ୍ତି । ଏ ନେଇ କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ତାଲିକା ପ୍ରକାଶ ପାଇଛି । କର୍ତ୍ତବ୍ୟକୁ ସୂଚାରୁ ରୂପେ ପ୍ରତିପାଦିତ କରିଥିବା ଓଡ଼ିଶାର ଏହି ୪ ପୋଲିସ ଅଧିକାରୀ ସମ୍ମାନିତ ହେବେ ବୋଲି କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି  ।

‘ଅତ୍ୟାବଶ୍ୟକ ଦ୍ରବ୍ୟ ଆଇନ ପ୍ରତ୍ୟାହାର ନ କଲେ ଦରଦାମ ଏମିତି ବଢ଼ୁଥିବ’

ଭୁବନେଶ୍ୱର: ଲଗାମ ଛଡ଼ା ଦରଦାମ । କେନ୍ଦ୍ର ସରକାର ଅତ୍ୟାବଶ୍ୟକ ଦ୍ରବ୍ୟ ଆଇନ ପ୍ରତ୍ୟାହାର ନ କଲେ ଦରଦାମ ଏମିତି ବଢ଼ୁଥିବ । ଏପରି ଏହା ବଢି ଚାଲିବ । ଯେତେବେଳେ ଯାଏ ଜରୁରୀ ସାମଗ୍ରୀ ଉପରୁ ସଂଶୋଧିତ ନୂଆ ଆଇନ ଓ ନୂତନ କୃଷି ନୀତିକୁ ପ୍ରତ୍ୟାହାର କରାନଯିବ । ଅନ୍ତର୍ଜାତୀୟ ବଜାରରେ ବି ଦାମ ବଢ଼ିଥିବା ଯୋଗୁଁ ବଜାର ପ୍ରଭାବିତ ହେଉଛି ବୋଲି କହିଛନ୍ତି ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ । ସେପଟେ କଂଗ୍ରେସ କହିଛି, ଅତ୍ୟାବଶ୍ୱକୀୟ ଦ୍ରବ୍ୟ ଆଇନ କର୍ପୋରେଟ ସଂସ୍ଥାଗୁଡିକର ଲାଭ ପାଇଁ ହୋଇଥିଲା ।

ସେମାନେ ଡାଲି, ସୋରିଷ ପରି ଅତ୍ୟାବଶ୍ୟକ ଦ୍ରବ୍ୟର ଗୋଦାମକୁ କିଣି ଦେଇ ଦର ବଢିବା ବେଳେ ଚଢା ଦାରରେ ବିକୁଥିଲେ ବୋଲି କଂଗ୍ରେସ କହିଛି । ଆଗରୁ କଳା ବଜାରୀ ଲୁଚାଛପାରେ ହେଉଥିଲା । ଏବେ ଖୋଲାଖୋଲି ଭାବେ ହେଉଛି ବୋଲି କହିଛନ୍ତି ବରିଷ୍ଠ ନେତା ପଞ୍ଚାନନ କାନୁନଗୋ । କଂଗ୍ରେସ ଏହା ଉପରେ ନଜର ରଖିଥିଲା । ହେଲେ ଏନଡିଏ ଏହାକୁ ଏବେ ଦୁର୍ବଳ କରିଛି । ଏହା ଉଚ୍ଛେଦ ନ ହେଲେ, ଦର ବଢ଼ୁଥିବ ବୋଲି ପଞ୍ଚାନନ କହିଛନ୍ତି ।

୬ଶହ ବେଡ୍ ପ୍ରସ୍ତୁତ ରଖିବାକୁ କେନ୍ଦ୍ରର ନିଷ୍ପତି, ରାଜ୍ୟ ପ୍ରସ୍ତୁତ କରୁଛି ୩ ହଜାର ବେଡ଼

ଭୁବନେଶ୍ୱର: ସମ୍ଭାବ୍ୟ ତୃତୀୟ ଲହର ପାଇଁ ରାଜ୍ୟ ସରକାର ପୂରା ଦମରେ ପ୍ରସ୍ତୁତି ଚଳାଇଛନ୍ତି । କେନ୍ଦ୍ର ସରକାରଙ୍କ ହିସାବ ଅନୁସାରେ ଠିକ୍ ସମୟରେ ଶିଶୁ ମାନଙ୍କ ପାଇଁ 600 ବେଡ ପ୍ରସ୍ତୁତ ରଖିବାକୁ କହିଛନ୍ତି । ରାଜ୍ୟ ସରକାର 3000 ବେଡ ପାଇଁ ପ୍ରସ୍ତୁତି ଚଳାଇଛନ୍ତି । ଏଥିରୁ 200ରୁ 250 ଆଇସିୟୁ ବା ଏଚଡିୟୁ ବେଡ ହେବ । 3000 ବେଡ ବିଭିନ୍ନ ହସ୍ପିଟାଲ, ଘରୋଇ କୋଭିଡ୍ ହସ୍ପିଟାଲ, ସରକାରୀ ଡାକ୍ତରଖାନା, ମେଡିକାଲ କଲେଜ, ଜିଲ୍ଲା ମୁଖ୍ୟ ଚିକିତ୍ସାଳୟରେ ରହିବ ।

କେନ୍ଦ୍ରର ଆକଳନ ଅନୁସାରେ ଦୈନିକ 10 ହଜାର ପିକ୍ ହେଲେ 600 ବେଡ ଶିଶୁଙ୍କ ପାଇଁ ଦରକାର ହେବ । ରାଜ୍ୟରେ ପିକ୍ ସମୟରେ 10ରୁ 12 ହଜାର ସଂକ୍ରମଣ ହୋଇଥିଲା । ସେହି ଆକଳନ ଅନୁସାରେ ତୃତୀୟ ଲହର ସମୟରେ ଯଦି ସେମିତି ସଂକ୍ରମଣ ହୁଏ ତେବେ ଶିଶୁଙ୍କ ପାଇଁ 600 ବେଡ ଦରକାର ପଡ଼ିବ । କିନ୍ତୁ ରାଜ୍ୟ ସରକାର 3000 ବେଡ ବ୍ୟବସ୍ଥା କରୁଛନ୍ତି ।

ଅକ୍ସିଜେନ ଯଥେଷ୍ଟ ପରିମାଣରେ ଅଛି। ଜିଲ୍ଲା ହସ୍ପିଟାଲ ମାନଙ୍କରେ ଏଲଏମଓ ପ୍ଲାଣ୍ଟ ଓ ଡିଏସଏ ପ୍ଲାଣ୍ଟ ଲାଗିବା କାମ ଚାଲିଛି । ତୃତୀୟ ଲହର ବେଳକୁ କିଛି ଅସୁବିଧା ନଥିବ । ଏହି ମାସ ଶେଷ ସୁଦ୍ଧା ସବୁ ଜିଲ୍ଲା ମୁଖ୍ୟାଳୟରେ ଆରଟିପିସିଆର ଟେଷ୍ଟ ବ୍ୟବସ୍ଥା ହୋଇପାରିବ । ରାଜ୍ୟରେ ଭିତ୍ତିଭୂମି, ଟ୍ରେନିଂ ଓ ଆବଶ୍ୟକୀୟ ଉପକରଣ ସବୁ ଠିକ୍ ଅଛି । ପିଲା ମାନଙ୍କ ସ୍ବତନ୍ତ୍ର ଚିକିତ୍ସା ଲାଗି 30 କୋଟି ଟଙ୍କାର 36ଟି ଉପକରଣ, 30 ପ୍ରକାର ଔଷଧ ତାଲିକା ପ୍ରସ୍ତୁତ କରି କିଣିବା ଆରମ୍ଭ କରିଛନ୍ତି ସରକାର ।

ଗୁଳି ମାରିଲେ ବିଲ୍ଡିଂକୁ ଉଡାଇଦେବି, ପୋଲିସକୁ ଏଭଳି ଧମକ ଦେଲା ଆମିର

ନୂଆଦିଲ୍ଲୀ: ଦିଲ୍ଲୀର ଖଜୁରି ଖାସ୍ ଅଞ୍ଚଳରେ ପୋଲିସ ଓ ଗୁଣ୍ଡା ମାନଙ୍କ ମଧ୍ୟରେ ଗୁଳି ବିନିମୟ ହୋଇଛି । ଏହି ଏନକାଉଣ୍ଟରରେ ୨ ଜଣ ବଦମାସ ନିହତ ହୋଇଥିବା ବେଳେ ପୋଲିସ କର୍ମୀ ମଧ୍ୟ ଆହତ ହୋଇଛନ୍ତି ।

ନିହତ ଦୁଇ ଜଣଙ୍କ ନାମ ଆମିର ଖାନ୍ ଓ ରାଜମାନ ବୋଲି ଜଣାପଡିଛି । ଏମାନଙ୍କ ଉପରେ ଚୋରୀ, ଲୁଟ୍, ଡକାୟତି, ହତ୍ୟା ଓ ହତ୍ୟା ଉଦ୍ୟମ ଭଳି ମାମଲା ରହିଛି । ସୂଚନା ଅନୁଯାୟୀ, ବିଳମ୍ବିତ ରାତିରେ ଉତ୍ତରପୂର୍ବ ଜିଲ୍ଲା ଓ ରୋହିଣୀ ଜିଲ୍ଲା ପୋଲିସର ମିଳିତ ଉଦ୍ୟମରେ ଏହି ଏନକାଉଣ୍ଟର ହୋଇଥିଲା । ସେମାନଙ୍କ ନିକଟରୁ ଦୁଇଟି ପିସ୍ତଲ, ୪ଟି ମେଗଜିନ୍ ସହ ୧.୫ ଲକ୍ଷ ଟଙ୍କାର ନଗଦ ଟଙ୍କା ଜବତ ହୋଇଛି ।

ପୋଲିସର ରିପୋର୍ଟ ଅନୁଯାୟୀ, ସ୍ଥାନୀୟ ଅଞ୍ଚଳରେ ଦୁଇ ଜଣ ଗୁଣ୍ଡା ଲୁଚି ରହିଥିବା ନେଇ ଖବର ମିଳିଥିଲା । ପରେ ପୋଲିସ ଘଟଣାସ୍ଥଳରେ ପହଞ୍ଚିବା ବେଳେ ଦୁବୃର୍ତ୍ତ ମାନେ ଅଚାନକ ଗୁଳି ଚଳାଇଥିଲେ ।

ତେବେ ଏହି ଏନକାଉଣ୍ଟର ସମୟରେ ଅପରାଧି ମାନେ ଏକ ବିଲ୍ଡିଂରେ ପଶିଯାଇଥିଲେ । ଉକ୍ତ ବିଲ୍ଡିଂରେ ୧୫ଟି ପରିବାର ରହିଥିଲେ । ଏହି ସମୟରେ ସମ୍ପୃକ୍ତ ବ୍ୟକ୍ତି ଜଣକ ନିଜ ମୁଣ୍ଡରେ ବନ୍ଧୁକ ଲଗାଇଥିଲା । ଏଥିସହିତ କହିଥିଲା ଯେ, ‘‘ଯଦି ପୋଲିସ ଗୁଳି ଚଳାଇବ ତାହେଲେ ମୁଁ ନିଜକୁ ମାରିବା ସହ ପୂରା ବିଲ୍ଡିଂକୁ ଉଡାଇଦେବି’’ ।

ପରବର୍ତ୍ତୀ ସମୟରେ ପୋଲିସ ଉକ୍ତ ବିଲ୍ଡିଂରେ ଥିବା ସମସ୍ତ ୧୫ ପରିବାରକୁ ଉଦ୍ଧାର କରିଥିଲା । ଯାହା ପରେ ସେମାନଙ୍କୁ ସରେଣ୍ଡର କରିବା ଲାଗି ପୋଲିସ ଚେତାବନୀ ଦେଇଥିଲେ ସୁଦ୍ଧା ବଦମାସ ମାନେ କିଛି ଶୁଣିନଥିଲେ । ଆଉ ଅଚାନକ ଗୁଳି ଚାଳନା କରିଥିଲେ । ଯାହା ଫଳରେ ପ୍ରତି ଜବାବରେ ପୋଲିସ ମଧ୍ୟ ଗୁଳି ଚାଳନା କରିଥିଲା ।

୯୦ ଦିନ ଭିତରେ ସମ୍ପୂର୍ଣ୍ଣ ଆଫଗାନିସ୍ତାନକୁ ନିଜ ଅକ୍ତିଆରକୁ ନେଇଯିବ ତାଲିବାନ !

ନୂଆଦିଲ୍ଲୀ: ଆଫଗାନିସ୍ତାନରେ ଦିନକୁ ଦିନ ତାଲିବାନଙ୍କ ବର୍ବରତା ବଢିବାରେ ଲାଗିଛି। ବର୍ତ୍ତମାନ ସୁଦ୍ଧା ତାଲିବାନ ୬୫ ପ୍ରତିଶତ ଆଫଗାନିସ୍ତାନକୁ ନିଜ ଅକ୍ତିଆରକୁ ନେଇସାରିଲାଣି। ତେବେ ଏହାରକି ମଧ୍ୟରେ ଆମେରିକାର ଗୁଇନ୍ଦା ସଂସ୍ଥା ଚେତାବନୀ ଦେଇଛନ୍ତି ଯେ ତାଲିବାନ ଆତଙ୍କବାଦୀମାନେ ଆସନ୍ତା ୩୦ ରୁ ୯୦ ଦିନ ମଧ୍ୟରେ ଆଫଗାନିସ୍ତାନ ସମ୍ପୂର୍ଣ୍ଣ ଦଖଲ କରିପାରନ୍ତି। ଏହି ସୂଚନା ପରେ ଆଫଗାନିସ୍ତାନର ଆଶରଫ ଘାନି ସରକାରରେ ହଇଚଇ ସୃଷ୍ଟି ହୋଇଯାଇଛି। ତାଲିବାନକୁ ପରାସ୍ତ କରିବାକୁ ଆଫଗାନିସ୍ତାନ ସରକାର ତିନି ପର୍ଯ୍ୟାୟର ମାଷ୍ଟରପ୍ଲାନ ପ୍ରସ୍ତୁତ କରିଛନ୍ତି।

ଆଫଗାନିସ୍ତାନର  ଗୃହମନ୍ତ୍ରୀ ଜେନେରାଲ ଅବଦୁହଲ ସତ୍ତା ଏବଂ ମିର୍ଜାକୱାଲ କହିଛନ୍ତି, ‘ଆମେ ତିନିଟି ପର୍ଯ୍ୟାୟରେ କାର୍ଯ୍ୟ କରୁଛୁ। ପ୍ରଥମ ପଦକ୍ଷେପ ହେଉଛି ଆମ ସୈନ୍ୟଙ୍କ ପରାଜୟକୁ ରୋକିବା। ଦ୍ୱିତୀୟ ପର୍ଯ୍ୟାୟରେ, ସୌନ୍ୟମାନଙ୍କୁ ଏକତ୍ରିତ କରାଯିବ ଯାହା ଦ୍ୱାରା ସେମାନଙ୍କ ସାହାଯ୍ୟରେ ସହରଗୁଡିକ ଟାରିପଟେ ଏକ ସୁରକ୍ଷା କବଚ ପ୍ରସ୍ତୁତ କରାଯାଇପାରିବ। ସେ କହିଛନ୍ତି ଯେ ଯେଉଁ ସୁରକ୍ଷାକର୍ମୀମାନେ ନିଜ ପଦ ଛାଡିଛନ୍ତି, ଆମେ ସେମାନଙ୍କୁ ସେଠାକୁ ଫେରାଇ ଆଣୁଛୁ। ଆଉ ଏହା ପରେ ତୃତୀୟ ପର୍ଯ୍ୟାୟ ଆରମ୍ଭ ହେବ ଯେଉଁଥିରେ ତାଲିବାନ ବିରୋଧରେ ଆକ୍ରମଣାତ୍ମକ କାର୍ଯ୍ୟାନୁଷ୍ଠାନ ଆରମ୍ଭ ହେବ। ତେବେ ସେ କହିଛନ୍ତି ଯେ ବର୍ତ୍ତମାନ ଆପଫଗାନିସ୍ତାନ ଦ୍ୱିତୀୟ ପର୍ଯ୍ୟାୟ ଆଡକୁ ଯାଉଛି।

ସୂଚନାଯୋଗ୍ୟ, ଏବେ ସୁଦ୍ଧା ଆଫଗାନିସ୍ତାନର ଅଧାରୁ ଅଧିକ ଅଞ୍ଚଳକୁ ନିଜ ଅକ୍ତିଆରକୁ ନେଇ କ୍ରୁର ଶାସନ ଆରମ୍ଭ କରିଛି ତାଲିବାନ । ଏଭଳି ସ୍ଥିତିରେ ଆଫଗାନିସ୍ତାନରୁ ସୈନ୍ୟ ପ୍ରତ୍ୟାହାର କରିନେବାକୁ ଘୋଷଣା କରିଛି ଆମେରିକା । ସେପଟେ ପରିସ୍ଥିତିକୁ ନଜରରେ ରଖି ଆଫଗାନିସ୍ତାନ ନିଜର ସେନା ମୁଖ୍ୟ ପରିବର୍ତ୍ତନ କରିଛି। ଅନ୍ୟପଟେ ଆଫଗାନିସ୍ତାନକୁ ଭାରତ ଦେଇଥିବା ଯୁଦ୍ଧ ବିମାନ MI-24କୁ ତାଲିବାନ ନିକ ଅକ୍ତିଆରକୁ ନେଇଛି। ତାଲିବାନ ଆତଙ୍କୀ MI-24ଆଗରେ ଠିଆ ହୋଇ ଫଟୋ ବି ସେୟାର କରିଛନ୍ତି । ୨୦୧୯ରେ ଭାରତ ଆଫଗାନିସ୍ତାନକୁ ଏହି ହେଲିକାପ୍ଟର ଉପହାର ଦେଇଥିଲା।

ଯାଜପୁରରେ ଅଜବ ମଣିଷ: ବିଷାକ୍ତ ସାପକୁ କାମୁଡ଼ି ମାରିଲେ, ରକ୍ତ ପିଇଦେଲେ..

ଯାଜପୁର: ସାପ କାମୁଡିଲା ବୋଲି ସେ ବି ସାପକୁ କାମୁଡିଦେଲେ । କଥାଟି ଅଡ଼ୁଆ ଲାଗୁଥିଲେ ବି ସତ  । ଜଣେ ବ୍ୟକ୍ତିଙ୍କୁ ସାପ କାମୁଡ଼ିଥିଲା, କିନ୍ତୁ ଉକ୍ତ ବ୍ୟକ୍ତି ଜଣଙ୍କ ସାପକୁ କାମୁଡ଼ିଦେବା ଖବର ନିହାତି ପ୍ରଥମେ ଶୁଣୁଥିବେ  । କାରଣ ଏଭଳି ଘଟଣା ସତରେ ଆଶ୍ଚର୍ଯ୍ୟଜନକ  । ଏମିତି ଘଟଣା ଘଟିଛି ଯାଜପୁର ଜିଲ୍ଲା ଦାନଗଦୀ ବ୍ଲକ ଶାଳିଜଙ୍ଗା ପାଞ୍ଚୟତର ଗମ୍ଭାରୀପାଟିଆ ଗ୍ରାମରେ ।

ଏହି ଗ୍ରାମର ୪୫ ବର୍ଷୀୟ କିଶୋର ବଦରା ଗତକାଲି ସନ୍ଧ୍ୟାରେ ନିଜ ଚାଷ ଜମିରୁ ଫେରିବା ସମୟରେ ତାଙ୍କୁ ଏକ ବିଷାକ୍ତ ସାପ କାମୁଡ଼ି ଦେଇଥିଲା । ଫଳରେ କିଶୋର ସାପଟିକୁ ଉତକ୍ଷିପ୍ତ ହୋଇ ଧରି ପକାଇଥିଲେ  । ଏବଂ କାହିଁକି ସାପ କାମୁଡ଼ିଲା ବୋଲି, ପ୍ରତିଶୋଧ ପରାୟଣ ହୋଇ ସେହି ସାପଟିକୁ ଅତି ନିର୍ମମ ଭାବେ ନିଜ ଦାନ୍ତରେ କାମୁଡି ମାରିଦେବା ସହ ସାପର ରକ୍ତ ପିଇଦେଇଥିବା ଜଣାପଡ଼ିଛି  ।

ଏହାପରେ ସାପଟିକୁ ନଫୋପାଡ଼ି ଗାଁ ଧରି ଆସିଥିଲେ  ।  ଘଟଣା ସମ୍ପର୍କରେ ନିଜ ପରିବାର ଓ ଗାଁ ଲୋକଙ୍କୁ ମଧ୍ୟ ଜଣାଇଥିଲେ ବଦରା । ପରେ ଗାଁ ଲୋକେ ତାଙ୍କୁ ମେଡିକାଲ ଯିବାକୁ ପରାମର୍ଶ ଦେଇଥିଲେ  । କିନ୍ତୁ ସାପକୁ କାମୁଡ଼ିଦେଇଥିବା ବ୍ୟକ୍ତି ଜଣଙ୍କ  କୌଣସି ସମ୍ପର୍କୀୟଙ୍କ କଥାକୁ  ଶୁଣି ନଥିଲେ । ଅନ୍ଧ ବିଶ୍ୱାସର ବଶବର୍ତ୍ତୀ ହୋଇ ଗାଁ ନିକଟରେ ଥିବା ଜଣେ ଗୁଣିଆ ପାଖକୁ ଯାଇ ଝଡ଼ା ଫୁଙ୍କା କରିଥିଲେ । କିନ୍ତୁ ଆଶ୍ଚର୍ଯ୍ୟର କଥା ହେଉଛି ବିଷାକ୍ତ ସାପ ଉକ୍ତ ବ୍ୟକ୍ତିଙ୍କୁ କାମୁଡ଼ିବା ଏବଂ ପରବର୍ତ୍ତୀ ସମୟରେ ବ୍ୟକ୍ତି ଜଣଙ୍କ ମଧ୍ୟ ସାପକୁ କାମୁଡ଼ିଦେଇଥିଲେ  । ତଥାପି ସେ ବର୍ତ୍ତମାନ ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡିଛି।