spot_img
Home Blog Page 5481

‘ରାଜ୍ୟସଭାରେ ସାଂସଦଙ୍କୁ ମାଡ଼ ମରାଯାଉଛି, ଗଣତନ୍ତ୍ରର ହତ୍ୟା କରୁଛନ୍ତି ପ୍ରଧାନମନ୍ତ୍ରୀ’

ନୂଆଦିଲ୍ଲୀ: ସଂସଦର ମୌସୁମୀ ଅଧିବେଶନ ସମୟ ପୂର୍ବରୁ ଶେଷ ହୋଇଛି । ଯାହାକୁ ନେଇ ବିରୋଧୀ କେନ୍ଦ୍ର ସରକାରଙ୍କୁ ସମାଲୋଚନା କରିବା ସହ, ଅନେକ ବିରୋଧୀ ଦଳ ମିଶି ଗୁରୁବାର ଏକ ମିଳିତ ପଦଯାତ୍ରା କରିଛନ୍ତି। କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ନେତୃତ୍ୱରେ ଏହି ପଦଯାତ୍ରାରେ ୧୨ରୁ ଅଧିକ ରାଜନୈତିକ ଦଳ ଏଥିରେ ଅଂଶଗ୍ରହଣ କରିଛନ୍ତି। ଏହି ଅବସରରେ ରାହୁଲ ଗାନ୍ଧୀ କେନ୍ଦ୍ରସରକାରଙ୍କ ବିରୁଦ୍ଧରେ ଗୁରୁତର ଅଭିଯୋଗ ଆଣିବା ସହ ଗୃହରେ ସାଂସଦମାନଙ୍କ ସହ ହୋଇଥିବା ଅସଦାଚରଣ ବିଷୟରେ କହିଛନ୍ତି।

ରାହୁଲ ଗାନ୍ଧୀ ଅଭିଯୋଗ କରିଛନ୍ତି ଯେ ରାଜ୍ୟସଭାରେ ପ୍ରଥମ ଥର ପାଇଁ ସାଂସଦଙ୍କ ସହ ଏଭଳି ବ୍ୟବହାର କରାଯାଇଛି। ପ୍ରଥମ ଥର ପାଇଁ ଗୃହରେ ସାଂସଦଙ୍କୁ ମାଡ଼ ମରାଯାଇଛି, ବାହାରୁ ଲୋକଙ୍କୁ ଡକାଯାଇ ସାଂସଦମାନଙ୍କୁ ଅସାଦାଚରଣ କରାଯାଇଛି। ଅଧ୍ୟକ୍ଷଙ୍କ ଦାୟିତ୍ୱ ହେଉଛି ଗୃହ ଚଳାଇବା, ତେବେ ବିରୋଧୀମାନେ କାହିଁକି ଗୃହରେ ନିଜର ପକ୍ଷ ରଖି ପାରିବେ ନାହିଁ ବୋଲି ପ୍ରଶ୍ନ କରିଛନ୍ତି ରାହୁଲ।

ରାହୁଲ ଆହୁରି କହିଛନ୍ତି ଯେ ଦେଶର ପ୍ରଧାନମନ୍ତ୍ରୀ ଆଜି ଦେଶକୁ ବିକିବା କାମ କରୁଛନ୍ତି, ଦେଶର ଆତ୍ମା ​​ଦୁଇ-ତିନି ଶିଳ୍ପପତିଙ୍କ ଦ୍ୱାରା ବିକ୍ରି ହେଉଛି। ହେଲେ ସଂସଦ ଭିତରେ କୌଣସି ବିରୋଧୀ କିଛି ବି କହିପାରିବେ ନାହିଁ। ସେ କେଦ୍ର ସରକାରଙ୍କୁ ସିଧାସଳକ ଟାର୍ଗେଟ କରି କହିଛନ୍ତି, ଯେ ଦେଶର ୬୦ ପ୍ରତିଶତ ଲୋକଙ୍କ ସ୍ୱର ଦମନ କରାଯାଉଛି।

ରାହୁଲ କହିଛନ୍ତି ଯେ ଗୋଟେପଟେ ରାଜ୍ୟସଭାରେ ସାଂସଦମାନେ ଅସଦାଚରଣ କରାଯାଉଛି, ଅନ୍ୟପଟେ ପେଗାସସ୍ ପ୍ରସଙ୍ଗ ଉପରେ ଆଲୋଚନା କରିବାକୁ ଆମେ ସରକାରଙ୍କୁ କହିଲୁ, ଆମେ କୃଷକ, ଦରଦାମ ବୃଦ୍ଧି ପ୍ରସଙ୍ଗ ଉଠାଇଲୁ। ହେଲେ କୌଣସି ବିଷୟରେ ବି ଆଲୋଚନା କରାଗାଲା ନାହିଁ। ଦେଶରେ ଗଣତନ୍ତ୍ରର ହତ୍ୟା ହେଉଛି ବୋଲି ରାହୁଲ କହିଛନ୍ତି।

ଜଣାଇଦେବାକୁ ଚାହୁଁ ଯେ ପେଗାସସ୍ ଏବଂ ଅନ୍ୟାନ୍ୟ ପ୍ରସଙ୍ଗ ନେଇ ବିରୋଧୀମାନେ ସଂସଦର ଉଭୟ ଗୃହରେ ହଙ୍ଗାମା କରିଥିଲେ। ଏହି କାରଣରୁ ମୌସୁମୀ ଅଧିବେଶନ ଅକାଳରେ ସମାପ୍ତ ହୋଇଥିଲା। ଗୋଟେପଟେ ରାହୁଲ ସଂସଦରେ ବିରୋଧିଙ୍କୁ କହିବାକୁ ଦିଆଯାଉନି ବୋଲି  ଅଭିଯୋଗ କରିଥିବାବେଳେ ଅନ୍ୟପଟେ ବିରୋଧୀ ସଂସଦର ସମସ୍ତ ମର୍ଯ୍ୟାଦା ଉଲଙ୍ଗନ କରିଛନ୍ତି ବୋଲି ସରକାର ଅଭିଯୋଗ କରିଛନ୍ତି।

ହିମାଚଳ ପ୍ରଦେଶରେ ଭୁସ୍ଖଳନ; ଆକାଶ ମାର୍ଗରୁ ସ୍ଥିତି ସମୀକ୍ଷା କଲେ ମୁଖ୍ୟମନ୍ତ୍ରୀ

କିନୌର: ହିମାଚଳ ପ୍ରଦେଶରେ ପ୍ରକୃତିର କରାଳରୂପ । ଭୂସ୍ଖଳନରେ ଯାଉଛି ଗୋଟିଏ ପରେ ଗୋଟିଏ ଜୀବନ । କିନୌରରେ ଭୁସ୍ଖଳନ ଯୋଗୁଁ ସ୍ଥିତି ଭୟାବହ ଥିବାବେଳେ ମୃତ୍ୟୁ ସଂଖ୍ୟା ୧୩କୁ ବୃଦ୍ଧି ପାଇଛି । ଏଯାବତ କିନୌରରୁ ୧୩ ଜଣକ ମୃତଦେହ ଉଦ୍ଧାର ହୋଇଥିବା ନେଇ ITBP ପକ୍ଷରୁ ସୂଚନା ଦିଆଯାଇଛି ।

ସୂଚନା ଅନୁଯାୟୀ, ଆହତ ହୋଇଥିବା ୧୪ ଜଣକୁ ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ପରିସ୍ଥିତିକୁ ନଜରରେ ରଖି ହେଲ୍ପ ଲାଇନ୍ ନମ୍ବର ଜାରି କରିଛି କିନୌର ପୋଲିସ । ଗତକାଲିଠାରୁ କିନୌରରୁ ITBP , NDRF ଓ ପୋଲିସ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି ।

ଏଭଳି ସ୍ଥଳେ ହିମାଚଳ ମୁଖ୍ୟମନ୍ତ୍ରୀ ଜୟରାମ ଠାକୁର ଉଦ୍ଧାର କାର୍ଯ୍ୟ ସମ୍ପର୍କରେ ପୋଲିସ ଓ ସ୍ଥାନୀୟ ପ୍ରଶାସନ ସହ ଆଲୋଚନା କରିଛନ୍ତି। ଏଥିସହିତ ଆକାଶ ମାର୍ଗରୁ ପ୍ରଭାବିତ ଅଞ୍ଚଳ ବୁଲି ସ୍ଥିତି ସମୀକ୍ଷା କରିଛନ୍ତି ।

ସେପଟେ ଜୟରାମଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗୃହମନ୍ତ୍ରୀ ଅମିତ ଶାହ । କେନ୍ଦ୍ର ପକ୍ଷରୁ ସମସ୍ତ ସହାୟତା ଦିଆଯିବ ବୋଲି କହିଛନ୍ତି ଗୃହମନ୍ତ୍ରୀ । ଅପରପକ୍ଷେ ଏକ ବସରେ ୪୦ ଯାତ୍ରୀ ଯାଉଥିବାବେଳେ ରେକୋଙ୍ଗ ପିଓଠାରେ ଏହି ଦୁର୍ଘଟଣା ଘଟିଥିଲା । ହଠାତ୍ ଭୁସ୍ଖଳନ ହେବାଫଳରେ ମାଟି ତଳେ ଚାପି ହୋଇ ରହିଥିଲେ ଯାତ୍ରୀ ।

ତୃତୀୟ ଲହର ପାଇଁ ସତର୍କ ସରକାର: ବଢିବ ପେଡ଼ିଆଟ୍ରିକ ବେଡ଼ ସଂଖ୍ୟା

ଭୁବନେଶ୍ୱର: ତୃତୀୟ ଲହର ପାଇଁ ପ୍ରସ୍ତୁତ ଅଛନ୍ତି ରାଜ୍ୟ ସରକାର । ଜେନେରାଲ ବେଡ଼ ସଂଖ୍ୟା ବଢିଥିବାବେଳେ ସରକାରଙ୍କ ଗାଇଡ଼ଲାଇନ୍ ଅନୁସାରେ ପେଡ଼ିଆଟ୍ରିକ ବେଡ଼ ସଂଖ୍ୟା ବଢିବା ନେଇ ପ୍ରସ୍ତୁତି ଚାଲିଛି । ସ୍ବାସ୍ଥ୍ୟ ଉପକରଣ, ଅକ୍ସିଜେନ ଓ ଭିତ୍ତିଭୂମି ମହଜୁଦ ରହିଛି । ଅକ୍ସିଜେନ ପ୍ଲାଣ୍ଟର ବ୍ୟବସ୍ଥା ମଧ୍ୟ କରାଯାଉଛି । ଚାହିଦା ଅନୁଯାୟୀ ପୂର୍ବାପେକ୍ଷା ଅଧିକ ଔଷଧ ରଖାଯାଇଛି ।

ତୃତୀୟ ଲହରରେ ଶିଶୁମାନେ ଅଧିକ ଆକ୍ରାନ୍ତ ହେବାର ସମ୍ଭାବନା ଥିବାରୁ , ସେଥିପାଇଁ ସ୍ବାସ୍ଥ୍ୟକର୍ମୀଙ୍କୁ ଆବଶ୍ୟକ ଟ୍ରେନିଂ ଦିଆଯାଉଥିବା ସୂଚନା ଦେଇଛନ୍ତି ସ୍ୱାସ୍ଥ୍ୟ ନିର୍ଦେଶକ ଡାକ୍ତର ବିଜୟ ମହାପାତ୍ର । ବର୍ତ୍ତମାନ ରାଜ୍ୟରେ ଦ୍ଵିତୀୟ ଲହର ଜାରି ରହିଛି । ଯେଉଁ ଅଞ୍ଚଳରେ ଅଧିକ ଲୋକ ରହୁଛନ୍ତି, ସେଠି ସଂକ୍ରମଣ ରହୁଛି । ଅନ୍ୟ ଦେଶ ଓ ରାଜ୍ୟରେ ସଂକ୍ରମଣ ବଢ଼ିଲାଣି, ଏଥି ପାଇଁ ସବୁବେଳେ ସତର୍କ ରହିବାକୁ ପଡ଼ିବ । ଲୋକ ନିୟମ ପାଳିଲେ କରୋନା ନିୟନ୍ତ୍ରଣ ଆସିବ ବୋଲି କହିଛନ୍ତି ବିଜୟ ମହାପାତ୍ର ।

ଖରସ୍ରୋତା ବିବାଦରେ ଲାଗୁନି ରୋକ, ଆନ୍ଦୋଳନକୁ ବ୍ୟାପକ ପାଇଁ ସମିତିର ଚେତାବନୀ

କେନ୍ଦ୍ରାପଡା: ଆହୁରି ଉଗ୍ର ରୂପ ନେଉଛି ଖରସ୍ରୋତା ବିବାଦ । ଗତ 10 ତାରିଖରେ ଖରସ୍ରୋତା ବଞ୍ଚାଅ ସଂଗ୍ରାମ ସମିତିର ବିକ୍ଷୋଭ ପ୍ରଦର୍ଶନ ପରେ ବିକ୍ଷୋଭ କରୁଥିବା କିଛି ନେତାଙ୍କୁ ପୋଲିସ ଉଠାଇ ନେଇଥିଲା । ତେବେ ଟାୟାର ଜାଳି ଲୋକେ ରାସ୍ତାରୋକ କରିବା ପରେ ସଂଗ୍ରାମ ସମିତିର କର୍ମକର୍ତ୍ତାଙ୍କୁ ଛାଡି ଦେଇଥିଲା ପୋଲିସ । ଏବେ ଆନ୍ଦୋଳନକୁ ଆହୁରି ବ୍ୟାପକ କରିବାକୁ ଚେତାବନୀ ଦିଆଯାଇଛି ।

ସେପଟେ  ଆଜି ପୁଣି ଥରେ ମୁହାଁମୁହିଁ ହୋଇଛନ୍ତି ପୋଲିସ ଓ ସଂଗ୍ରାମ ସମିତି । ଘଟଣା ସ୍ଥଳରେ ଅଧିକ ୩ ପ୍ଲାଟୁନ ଫୋର୍ସ ମୁତୟନ କରାଯାଇଛି । ସୂଚନା ମୁତାବକ ରାଜ୍ୟ ସରକାର ଭଦ୍ରକ ଜିଲ୍ଲାର ବିଭିନ୍ନ ପଞ୍ଚାୟତକୁ ପାନୀୟ ଜଳ ଯୋଗାଇବା ପାଇଁ ଏକ ମେଗା ପାନୀୟ ଜଳ ପ୍ରକଳ୍ପ କରୁଛନ୍ତି। ଏହି ପାନୀୟ ଜଳ ପ୍ରକଳ୍ପ ପାଇଁ ରାଜକନିକା ଜିଲା ଭାରୀଗଦା ପାଖ ଖରସ୍ରୋତା ନଦୀରୁ ଜଳ ନେବାକୁ ଯୋଜନା ହୋଇଛି। କିନ୍ତୁ ରାଜକନିକା ବ୍ଳକର ବୁଦ୍ଧିଜୀବୀ ଓ ବରୁଣାଡ଼ିଆ-ଭାରିଗଦା ଗ୍ରାମ ପଞ୍ଚାୟତଙ୍କ ସମେତ କଂଗ୍ରେସ ଓ ବିଜେପି ଏହାକୁ ବିରୋଧ ତିବ୍ର ବିରୋଧ କରୁଛି।

ଖରାସ୍ରୋତା ନଦୀର ଜଳ ନଦେବା ପାଇଁ ଖରସ୍ରୋତା ବଞ୍ଚାଅ ସଂଗ୍ରାମ ସମିତି ମଧ୍ୟ ଗଠନ କରାଯାଇଛି। ଏହି ସଙ୍ଗଠନ ରାଜ୍ୟ ସରକାରଙ୍କ ମେଗା ପାନୀୟ ଜଳ ପ୍ରକଳ୍ପକୁ ତୀବ୍ର ବିରୋଧ କରୁଥିବା ​‌ବେଳେ ଦୀର୍ଘଦିନ ହେବ ଆନ୍ଦୋଳନ ଜାରି ରଖିଛି। କେନ୍ଦ୍ରାପଡାରେ ଭୂତଳ ଜଳ ସଙ୍କଟରେ ଜର୍ଜରିତ ହେଉଥିବା ବେଳେ ଅନ୍ୟ ଜିଲାକୁ ଖରସ୍ରୋତାର ମଧୁର ପାଣି ଦେବାକୁ ତୀବ୍ର ବିରୋଧ କରାଯାଉଛି।  ଖରସ୍ରୋତା ନଦୀ ଆନ୍ଦୋଳନକୁ ନେଇ ପ୍ରତିବାଦ ସ୍ଥଲୀରେ ହୋ ହଲ୍ଲା ଦେଖିବାକୁ ମିଳିଛି  । ଏମିତିକି ଅନେକ ସମୟରେ ପୋଲିସ ଏବଂ ଆନ୍ଦୋଳନକାରୀ ମୁହାଁ ମୁହିଁ ଭଳି ସ୍ଥିତି ଉପୁଜିଛି  ।

ନିର୍ଦ୍ଧାରିତ ସମୟର ୨ ଦିନ ପୂର୍ବରୁ ସରିଲା ସଂସଦର ମୌସୁମୀ ଅଧିବେଶନ

ନୂଆଦିଲ୍ଲୀ: ନିର୍ଦ୍ଧାରିତ ସମୟ ସୀମାର ୨ ଦିନ ପୂର୍ବରୁ ସରିଲା ସଂସଦର ମୌସୁମୀ ଅଧିବେଶନ। ତେବେ ଚଳିତ ଥର ପେଗାସସ ଓ କୃଷି ଆଇନ ପ୍ରସଙ୍ଗରେ ଗୃହ ଆରମ୍ଭରୁ ରହିଥିଲା ଅଚଳ। ଏହି ଦୁଇ ଘଟଣାରେ ସରକାରଙ୍କୁ ଘେରିଥିଲେ ପ୍ରାୟ ସମସ୍ତ ବିରୋଧୀ ଦଳ । ଜୁଲାଇ ୧୯ରୁ ଆରମ୍ଭ ହୋଇଥିବା ଏହି ଅଧିବେଶନ ସ୍ବଳ୍ପ ସମୟ ଲାଗି ଚାଲିଥିଲା ।

ସୂଚନା ଅନୁଯାୟୀ,  ଲୋକସଭା ନିର୍ଦ୍ଧାରିତ ୯୬ ଘଣ୍ଟା ବଦଳରେ ଚାଲିଥିଲା ମାତ୍ର ୨୧ ଘଣ୍ଟା ୧୪ ମିନଟ । ଏହି ସମୟରେ ୧୩ଟି ବିଲ୍ ଆଗତ ହୋଇଥିଲା ଏବଂ ୨୦ଟି ବିଲ୍ ଗୃହୀତ ହୋଇଥିଲା । ଏଥିରେ ଗୁରୁତ୍ବପୂର୍ଣ୍ଣ ବିଲ ଥିଲା ସମ୍ବିଧାନର ୧୨୭ତମ ସଂଶୋଧନ ବିଲ ଯାହାକି ଓବିସି ବିଲ୍ ଲାଗି ଉଦ୍ଦିଷ୍ଟ ଥିଲା । ଏହାସହ ସାଧାରଣ ବୀମା ବ୍ୟବସାୟ ଜାତୀୟକରଣ ସଂଶୋଧନ ବିଲ୍ ବି ଗୃହୀତ ହୋଇଥିଲା ।

ସେହିପରି ରାଜ୍ୟସଭା ନିର୍ଦ୍ଧାରିତ ୯୭ଘଣ୍ଟା ବଦଳରେ ଚାଲିଥିଲା ମାତ୍ର ୨୮ ଘଣ୍ଟା ୨୧ ମିନିଟ । ନଷ୍ଟ ହୋଇଥିଲା ୭୬ ଘଣ୍ଟା ଓ ୨୬ ମିନିଟ । ରାଜ୍ୟସଭାରେ ମୋଟ ୧୯ଟି ବିଲ୍ ଗୃହୀତ ହୋଇଥିଲା ଏବଂ ୪ଟି ବିଲ୍ ଆଗତ ହୋଇଥିଲା । ଗତ ଦୁଇ ଦଶନ୍ଧି ମଧ୍ୟରେ ଏହି ଅଧିବେଶନ ଥିଲା ସବୁଠାରୁ କମ ସମୟ ଲାଗି ଚାଲିଥିବା କ୍ଷେତ୍ରରେ ଚତୁର୍ଥ ଅଧିବେଶନ । ଏହି ଅଧିବେଶନରେ ରାଜ୍ୟସଭାର କାର୍ଯ୍ୟକାରିତା ହାର ରହିଥିଲା ୨୧ ପ୍ରତିଶତ ଓ ଲୋକସଭାର କାର୍ଯ୍ୟକାରିତା ହାର ରହିଥିଲା ୨୮ ପ୍ରତିଶତ । ୨୦ ବର୍ଷ ମଧ୍ୟରେ ୨୦୧୦ରେ ହୋଇଥିଲା ସବୁଠାରୁ କମ୍ ସମୟ ଲାଗି ଅଧିବେଶନ ।

ରାଜ୍ୟସଭା ଲାଗି କାର୍ଯ୍ୟକାରିତା ହାର ରହିଥିଲା ୨ ପ୍ରତିଶତ ଏବଂ ଲୋକସଭା ଲାଗି ରହିଥିଲା ୬ ପ୍ରତିଶତ । 2ଜି ସ୍ପେକ୍ଟ୍ରମ ଦୁର୍ନୀତିକୁ ନେଇ ଗୃହ କାର୍ଯ୍ୟ ରହିଥିଲା ଅଚଳ । ୨୦୧୩ରେ ସ୍ବତନ୍ତ୍ର ତେଲଙ୍ଗାନା ରାଜ୍ୟକୁ ନେଇ ଗୃହ କାର୍ଯ୍ୟ ଅଚଳ ରହିଥିବା ବେଳେ ୨୦୧୩ ଓ ୨୦୧୬ରେ ଲୋକସଭାର କାର୍ଯ୍ୟକାରିତା ହାର ରହିଥିଲା ୧୫ ପ୍ରତିଶତ । ୨୦୧୮ରେ ଲୋକସଭାର କାର୍ଯ୍ୟକାରିତା ହାର ଥିଲା ୨୧ ପ୍ରତିଶତ । ୨୦୧୯ର ବଜେଟ ଅଧିବେଶନର ଅବସ୍ଥା ବି ତଦ୍ରୁପ ଥିଲା । ନିର୍ଦ୍ଧାରିତ ୧୩ ଦିନର ଅଧିବେଶନ କାଳରେ ରାଫେଲ ଦୁର୍ନୀତି ପ୍ରସଙ୍ଗରେ ଉଭୟ ଗୃହ ଆଦୌ ଚାଲିପାରି ନଥିଲା । ଏହି କାଳରେ ଲୋକସଭାର କାର୍ଯ୍ୟକାରିତା ହାର ଥିଲା ନଗଣ୍ୟ ୭ ପ୍ରତିଶତ । ୨୦୧୫ରେ ବ୍ୟାପମ ଦୁର୍ନୀତି ଓ ଲଳିତ ମୋଦି ପ୍ରସଙ୍ଗରେ ଗୃହକାର୍ଯ୍ୟ ବ୍ୟାଘାତ ହୋଇଥିଲା ଏବଂ ରାଜ୍ୟସଭାର କାର୍ଯ୍ୟକାରିତା ହାର ଥିଲା ମାତ୍ର ୯ ପ୍ରତିଶତ ।

କେନ୍ଦ୍ର ସରକାରଙ୍କ ବିରୋଧରେ ବିରୋଧୀଙ୍କ ଶକ୍ତି ପ୍ରଦର୍ଶନ

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ବିରୋଧରେ  ମୋର୍ଚ୍ଚା ଖୋଲିଲେ ତମାମ ବିରୋଧୀ ଦଳ। ସଂସଦରୁ ବିଜୟ ଚୌକ ପର୍ଯ୍ୟନ୍ତ ସଂସଦ ମାର୍ଚ୍ଚ କରିଛନ୍ତି ବିରୋଧୀ। କଂଗ୍ରେସ ସାଂସଦ ରାହୁଲ ଗାନ୍ଧି ଏହି ସଂସଦ ମାର୍ଚ୍ଚରେ ସାମିଲ ହୋଇଥିଲେ। କଂଗ୍ରେସ ସହ DMK, NCP, RJD, CPM, ସମାଜବାଦି ପାର୍ଟି ସହ ତମାମ ବିରୋଧୀ ଦଳ ସଂସଦ ମାର୍ଚ୍ଚରେ ସାମିଲ ହୋଇଥିଲେ।

ରାହୁଲ ଗାନ୍ଧି  ଅଭିଯୋଗ କରିଛନ୍ତି ଯେ ସରକାର ଜାଣିଶୁଣି ଦେଶବାସୀଙ୍କ ସମୟ ନଷ୍ଟ କରିଛନ୍ତି। ବିରୋଧୀଙ୍କ ଦାବି ସତ୍ତ୍ୱେ ପେଗାସସ ପ୍ରସଙ୍ଗରେ ସରକାର ଆଲୋଚନା କଲେ ନି, କି ଯାଞ୍ଚ ପାଇଁ ନିର୍ଦ୍ଦେଶ ବି ଦେଲେନି। ବିରୋଧୀଙ୍କୁ ସଂସଦରେ କହିବା ପାଇଁ ସୁଯୋଗ ବି ଦିଆଗଲାନି।

ନୂଆ କୃଷି ଆଇନ୍, ଦରଦାମ ବୃଦ୍ଧି ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ବିରୋଧୀ ଆଲୋଚନା କରିବା ପାଇଁ ଚାହୁଁଥିଲେ ମଧ୍ୟ ସରକାର ଏଥିରେ ରାଜି ହୋଇନଥିଲେ। ମହିଳା ସାଂସଦଙ୍କ ସହ ସଂସଦରେ ଦୁର୍ବବ୍ୟହାର ହୋଇଥିବା କହିଛି ସମାଜବାଦି ପାର୍ଟି। ସଂସଦରେ ଯେଭଳି ଘଟଣା ଘଟିଲା ତାହା କେବେ ବି ପୂର୍ବରୁ ଘଟନିଥିବା କହିଛି ଏନସିପି। ବିନା କୌଣସି ଚର୍ଚ୍ଚାରେ ଅନେକ ବିଲ୍ ପାସ୍ କରାଯାଇଛି, ଯାହା ଗଣତନ୍ତ୍ର ପ୍ରତି ଅପମାନ ଅଟେ ବୋଲି କହିଛି ଆରଜେଡି। ସରକାର ଅଂହଙ୍କାର ଭାବେ କାମ କରୁଥିବା ଅଭିଯୋଗ କରିଛନ୍ତି ବିରୋଧୀ ।

ତେବେ ଚଳିତ ଥର ସମୟ ପୂର୍ବରୁ ସଂସଦର ମୌସୁମୀ ଅଧିବେଶନ ଶେଷ ହୋଇଛି। ଯାହାକୁ ନେଇ ବିରୋଧୀ ଦଳ ସରକାରଙ୍କୁ ସମାଲୋଚନା କରୁଛନ୍ତି। ସେପଟେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ଆସନ୍ତା ୨୦ତାରିଖରେ ଡିନର ପାର୍ଟି ରଖିଛନ୍ତି। ଯେଉଁଥିରେ ତମାମ ବିରୋଧୀ ଦଳର ବରିଷ୍ଠ ନେତା ସାମିଲ ହେବେ।

୨୪ ଘଣ୍ଟାରେ ୬୭ ମୃତ୍ୟୁ, ୧୧୦୭ ନୂଆ ସଂକ୍ରମିତ ଚିହ୍ନଟ

ଭୁବନେଶ୍ୱର: ରାଜ୍ୟରେ ଆଉ ୬୭ ଜଣଙ୍କ ଜୀବନ ନେଇଛି ମହାମାରୀ କରୋନା । ଗତ ୨୪ ଘଣ୍ଟାରେ ରାଜ୍ୟରୁ ଚିହ୍ନଟ ହୋଇଛନ୍ତି ଆଉ ୧୧୦୭ ପଜିଟିଭ୍ । କ୍ବାରେଣ୍ଟାଇନରୁ ୬୪୬ ଜଣ ଥିବା ବେଳେ, ଲୋକାଲ କେସ୍ ରହିଛି ୪୬୧ । ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ଖୋର୍ଦ୍ଧାରୁ ସର୍ବାଧିକ ୩୯୭ ଜଣ ଥିବା ବେଳେ କଟକରୁ ୧୩୦ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି ।

ସେହିପରି ଷ୍ଟେଟ ପୁଲରୁ ୮୨ ଜଣ ଥିବା ବେଳେ, ବାଲେଶ୍ବରରୁ ୬୬, ଜଗତସିଂହପୁରରୁ ୫୩, ଯାଜପୁରରୁ ୫୨, କେନ୍ଦ୍ରାପଡ଼ାରୁ ୪୨, ମୟୂରଭଞ୍ଜରୁ ୪୦, ଭଦ୍ରକରୁ ୩୬, ନୟାଗଡ଼ରୁ ୨୯, ପୁରୀରୁ ୨୮, ଅନୁଗୁଳରୁ ୨୪ ଜଣ ସଂକ୍ରମିତ ଅଛନ୍ତି । ସମ୍ବଲପୁରରୁ ୨୦ ଜଣ ଥିବା ବେଳେ, କେନ୍ଦୁଝରରୁ ୧୮, ସୁନ୍ଦରଗଡ଼ରୁ ୧୭, ଢେଙ୍କାନାଳରୁ ୧୨, ମାଲକାନଗିରିରୁ ୧୦, ଝାରସୁଗୁଡ଼ାରୁ ୯, କଳାହାଣ୍ଡି ଓ କନ୍ଧମାଳରୁ ୭ ଜଣ ଲେଖାଏଁ ଚିହ୍ନଟ ହୋଇଛନ୍ତି  ।

ବରଗଡ଼ ଓ ରାୟଗଡ଼ାରୁ ୫ ଜଣ ଲେଖାଏଁ, ଗଞ୍ଜାମ, ସୋନପୁରରୁ ୪ ଜଣ ଲେଖାଏଁ, ଦେବଗଡ଼ ଓ ବଲାଙ୍ଗୀରରୁ ୩ ଜଣ ଲେଖାଏଁ, ଗଜପତି, ନୂଆପଡ଼ା, ନବରଙ୍ଗପୁର ଓ କୋରାପୁଟରୁ ଜଣେ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଆଜି ବୌଦ୍ଧରୁ କୌଣସି ସଂକ୍ରମିତ ଚିହ୍ନଟ ହୋଇନାହାନ୍ତି । ଗତ ୨୪ ଘଣ୍ଟାରେ ରାଜ୍ୟରୁ ସୁସ୍ଥ ହୋଇ ଘରକୁ ଫେରିଛନ୍ତି ୮୬୯ ଜଣ ଆକ୍ରାନ୍ତ ।

କେରଳରେ ଚିନ୍ତା ବଢ଼ାଉଛି କରୋନା, ଦିନକରେ ଦେଶରେ ୪୧ ହଜାର କେରଳରେ ୨୩,୫୦୦ ସଂକ୍ରମିତ ଚିହ୍ନଟ

ନୂଆଦିଲ୍ଲୀ: ବର୍ତ୍ତମାନ ଦେଶରେ ଦୈନିକ କରୋନା ସଂକ୍ରମଣ ୪୦ ହଜାର ଉପରେ ରହୁଛି। ଗତ ୨୪ ଘଣ୍ଟାରେ ଦେଶରେ ୪୧ ହଜାର ୧୯୫ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏଥିସହିତ ଗୋଟିଏ ଦିନରେ ୪୯୦ ଜଣକ ମୃତ୍ୟୁ ହୋଇଥିବାବେଳେ ୩୯ ହଜାର ୬୯ ଜଣ କରୋନାରେ ସୁସ୍ଥ ହୋଇଛନ୍ତି।

ସୂଚନା ମୁତାବକ କେରଳରେ ଅଧିକ ସଂକ୍ରମିତ ଚିହ୍ନଟ ହେଉଛନ୍ତି। ୨୪ ଘଣ୍ଟାରେ କେରଳରେ ୨୩ ହଜାର ୫୦୦ ନୂଆ ମାମଲା ସାମ୍ନାକୁ ଆସିଛି। ଯାହାକି ଚିନ୍ତାର କାରଣ ପାଲଟିଛି। ଦେଶରେ କରୋନାରେ ମୃତ୍ୟୁ ହାର ୧.୩୪ ପ୍ରତିଶତ ଥିବାବେଳେ ଆରୋଗ୍ୟ ହାର ୯୭. ୪୫ ପ୍ରତିଶତ ରହିଛି। ସେହିଭଳି ଆକଟିଭ୍ କେସ୍ ରହିଛି ୧.୨୧ ପ୍ରତିଶତ। ଦେଶରେ ୫୨ କୋଟିରୁ ଅଧିକ ଲୋକେ ଟିକାକରଣ ଅଭିଯାନରେ ସାମିଲ ହୋଇଥିବା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି।

ଫେଲ ମାରିଲା ଜିସାଟ୍‌-୧, ଅଧାରେ ଅଟକିଲା ମିଶନ ଆଇ ଇନ୍ ସ୍କାଏ

ଥିରୁଅନନ୍ତପୁରମ୍: ବିଫଳ ହେଲା ଇସ୍ରୋର ମିଶନ । ଫେଲ ମାରିଲା ଜିସାଟ୍‌-୧ । ଯାହାଫଳରେ ଅଧାରେ ଅଟକିଲା ମିଶନ ଆଇ ଇନ୍ ସ୍କାଏ । କ୍ରାୟୋଜନିକ ଇଞ୍ଜିନରେ ତ୍ରୁଟି ଯୋଗୁଁ ମିଶନ ଫେଲ୍ ହୋଇଥିବା ଇସ୍ରୋ ଅଧ୍ୟକ୍ଷ କି ଶିବନ ସୂଚନା ଦେଇଛନ୍ତି ।ଆଜି ଭୋର ୫ଟା ୪୩ ମିନଟରେ ଆନ୍ଧ୍ରର ଶ୍ରୀହରିକୋଟାସ୍ଥିତ ସତୀଶ ଧାଓ୍ବନ ମହାକାଶ କେନ୍ଦ୍ରରୁ ଉତକ୍ଷେପଣ ହୋଇଥିଲା ଜିସାଟ୍‌-୧ ।

ହେଲେ ମିଶନର ମାତ୍ର ୧୦ ସେକେଣ୍ଡ ପୂର୍ବରୁ କ୍ରାୟୋଜନିକ ଇଞ୍ଜିନରେ ତ୍ରୁଟି ସାମ୍ନାକୁ ଆସିଥିଲା । ଯାହାଫଳରେ ବୈଜ୍ଞାନିକମାନେ କୌଣସି ତଥ୍ୟ ପାଇପାରିନଥିଲେ । ଜିସାଟ-୧ ଆର୍ଥ ଅବଜର୍ଭେସନ ସାଟେଲାଇଟ ବା ଇଓଏସର ଲଞ୍ଚ ସଫଳ ହୋଇଥିଲେ ଭାରତୀୟ ମହାକାଶ ବିଜ୍ଞାନ ଲାଗି ଏକ ମାଇଲଖୁଣ୍ଟି ସାବ୍ୟସ୍ତ ହୋଇଥାଆନ୍ତା । ବିଶେଷ କରି ପ୍ରାକୃତିକ ବିପର୍ଯ୍ୟୟ ଓ ଅନ୍ୟାନ୍ୟ ଘଟଣାଗୁଡିକ ସମ୍ପର୍କରେ ନିର୍ଦ୍ଦିଷ୍ଟ ତଥ୍ୟ ପାଇ ପାରିଥାଆନ୍ତା ଇସ୍ରୋ ।