spot_img
Home Blog Page 5479

ଦୁର୍ନୀତିଖୋରଙ୍କୁ ‘ମୋ ସରକାର’ ଛାଟ, ରାଜ୍ୟ ପୋଲିସିଂ ସିଷ୍ଟମରେ ଆସୁଛି ସୁଧାର

ଭୁବନେଶ୍ୱର: ଭାରତୀୟ ସମ୍ବିଧାନର ଅନୁଚ୍ଛେଦ ୨୧ ଅନୁଯାୟୀ ପ୍ରତ୍ୟେକ ନାଗରିକଙ୍କ ବ୍ୟକ୍ତିଗତ ସ୍ୱାଧୀନତା ଓ ଜୀବନଧାରଣ ଅଧିକାର ଅଛି। କିନ୍ତୁ ଦେଶରେ ୩ ବର୍ଷରେ ୩୪୮ଟି ହାଜତ ମୃତ୍ୟୁ ହୋଇଛି। ଗିରଫଦାରିର ୨୪ ଘଣ୍ଟା ମଧ୍ୟରେ ୬୦ ପ୍ରତିଶତ ଲୋକଙ୍କ ମୃତ୍ୟୁ ଘଟିଛି। ଏଭଳି ଘଟଣା ମହାରାଷ୍ଟ୍ରରେ ସର୍ବାଧିକ ଘଟିଥିବା ବେଳେ ପଛକୁ ରହିଛି ଗୁଜରାଟ ଓ ଆନ୍ଧ୍ରପ୍ରଦେଶ। ଥାନାରେ ହିଁ ସର୍ବାଧିକ ମାନବାଧିକାର ଉଲ୍ଲଂଘନ ହେଉଥିବା ଉଦବେଗର ସହ କହିଛନ୍ତି ପ୍ରଧାନ ବିଚାରପତି ଜଷ୍ଟିସ  ଏନ୍‌.ଭି ରମନା। ଅନ୍ୟପକ୍ଷରେ ଓଡ଼ିଶାରେ ପୋଲିସର ବର୍ବରତା ଜାତୀୟ ହାରଠାରୁ କମ ଥିବା ଅବସରପ୍ରାପ୍ତ ପୋଲିସ ଅଧିକାରୀ କହିଛନ୍ତି।

ଓଡ଼ିଶାରେ ପୂର୍ବରୁ ପୋଲିସ ଅତ୍ୟାଚାରର ଅନେକ ନଜିର ଥିବା ବେଳେ ଏବେ ଏଥିରେ ଲାଗିଛି ଲଗାମ। ‘ମୋ ସରକାର’ ଲାଗୁ ହେବା ଦିନଠାରୁ ନିଆଯାଉଛି ତ୍ୱରିତ କାର୍ଯ୍ୟାନୁଷ୍ଠାନ। ନିକଟରେ ଜଗତସିଂହପୁର ଜିଲ୍ଲାର ଜଣେ ମଦ୍ୟପ ଥାନା ଅଧିକାରୀଙ୍କୁ ହେଡକ୍ୱାର୍ଟରକୁ ବଦଳି, ମହିଳାଙ୍କୁ ଦୁର୍ବ୍ୟବହାର ଘଟଣାରେ ଚନ୍ଦ୍ରଶେଖରପୁର ଥାନାଧିକାରୀଙ୍କ ବଦଳି, ଯାଆଁଳା ଫାଣ୍ଡି ଅଧିକାରୀଙ୍କୁ ସସପେଣ୍ଡ ଓ ବାଲେଶ୍ୱରରେ ଆଇନଜୀବୀଙ୍କୁ ମାଡ଼ ଭଳି ଅଭିଯୋଗରେ ପୋଲିସ ବିରୋଧରେ ହୋଇଛି ବିଭାଗୀୟ କାର୍ଯ୍ୟାନୁଷ୍ଠାନ। ସେହିପରି ସହିଦନଗର ଥାନା କେଶୁରା ଛକରେ ନାବାଳକଙ୍କୁ ଗୋଇଠା ମାରିବା ଘଟଣାରେ ୪ ପିସିଆର କର୍ମଚାରୀଙ୍କ ବିରୋଧରେ ଷ୍ଟ୍ରଙ୍ଗ ଆକ୍ସନ ନେଇଛି ଗୃହ ବିଭାଗ।

ଦିଗପହଣ୍ଡି ବସ୍‌ ଟର୍ମିନାଲ ଓ କପା ଜିନିଂ ମିଲ୍‌କୁ ଉଦ୍‌ଘାଟନ କଲେ ମୁଖ୍ୟମନ୍ତ୍ରୀ

ଗଞ୍ଜାମ: ଛୋଟ ଛୋଟ ସହରର ବିକାଶ ଉପରେ ଅଧିକ ଗୁରୁତ୍ୱ ଦେଉଛନ୍ତି ମୁଖ୍ୟମନ୍ତ୍ରୀ।  ବହୁ ପ୍ରତୀକ୍ଷିତ ଗଞ୍ଜାମ ଜିଲ୍ଲା ଦିଗପହଣ୍ଡି ନୂଆ ବସ ଟର୍ମିନାଲ ଉଦଘାଟିତ ହୋଇଛି। ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନ୍ସିଂ ମାଧ୍ୟମରେ ନୂତନ ବସ୍‌ ଟର୍ମିନାଲର ଉଦଘାଟନ କରିଛନ୍ତି। ୫ କୋଟି ୮୦ ଲକ୍ଷ ଟଙ୍କା ବ୍ୟୟରେ ନିର୍ମାଣ ହୋଇଛି ଏହି ବସଷ୍ଟାଣ୍ଡ। ଗଞ୍ଜାମ ଜିଲ୍ଲାରେ ଥିବା ଏନଏସି ବସଷ୍ଟାଣ୍ଡଗୁଡିକଠାରୁ ଏହା ସର୍ବବୃହତ ବସଷ୍ଟାଣ୍ଡ।

ବସଷ୍ଟାଣ୍ଡ ନଥିବା ଯୋଗୁଁ ଦିଗପହଣ୍ଡି ଅଞ୍ଚଳରୁ ବିଭିନ୍ନ ଗାଁକୁ ଯିବା ନିମନ୍ତେ ଯାତ୍ରୀମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଥିଲା। ଏହା ସହିତ ବସ ଗୁଡିକ ରାସ୍ତାରେ ରହୁଥିବା ଯୋଗୁ ଦୁର୍ଘଟଣା ମଧ୍ୟ ଘଟୁଥିଲା। ଦିଗପହଣ୍ଡି ଦକ୍ଷିଣ ଓଡ଼ିଶାର ଏକ ପ୍ରମୁଖ୍ୟ କେନ୍ଦ୍ରସ୍ଥଳ। ମୁଖ୍ୟମନ୍ତ୍ରୀ ଗତବର୍ଷ ଏହାର ଶିଳାନ୍ୟାସ କରିଥିଲେ। ବର୍ତ୍ତମାନ ବସଷ୍ଟାଣ୍ଡଟି କାର୍ଯ୍ୟକ୍ଷମ ହେବା ପରେ ଯାତ୍ରୀମାନଙ୍କ ଆଉ ସମସ୍ୟା ରହିବ ନାହିଁ। ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଅଞ୍ଚଳବାସୀ ଧନ୍ୟବାଦ ଜଣାଇଛନ୍ତି।

ସେହିପରି କପା ଜିନିଂ ମିଲକୁ ମଧ୍ୟ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ। କପା ମିଲ ନଥିବା ଯୋଗୁଁ ଚାଷୀମାନେ କପା ବିକ୍ରି କରିବା ପାଇଁ ଅସୁବିଧାର ସମ୍ମୁଖୀନ ହୋଇ ଦଲାଲଙ୍କ ଶିକାର ହେଉଥିଲେ। ଏହାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଗତବର୍ଷ ଜିନିଂ ମିଲ୍ ପାଇଁ ଶିଳାନ୍ୟାସ କରିଥିଲେ। ଆଜି ଏହାକୁ ଉଦଘାଟନ କରିଛନ୍ତି। ଏହି ଜିନିଂ ମିଲ ୩ କୋଟି ୨୮ ଲକ୍ଷ ଟଙ୍କାରେ ନିର୍ମିତ ହୋଇଥିବା ବେଳେ ଏହାଦ୍ୱାର ୧୫ ଶହ କପାଚାଷୀ ଉପକୃତ ହେବେ। କାର୍ଯ୍ୟକ୍ରମରେ ବାଚସ୍ପତି ସୂର୍ଯ୍ୟ ନାରାୟଣ ପାତ୍ର, ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ପ୍ରମୁଖ ଯୋଗଦେଇଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ ଛୋଟ ଛୋଟ ଟାଉନ୍‌ରେ ଲୋକଙ୍କ ରୋଜଗାର ବୃଦ୍ଧି ସହ ବିଭିନ୍ନ ନାଗରିକଙ୍କ ସୁବିଧାର ବିକାଶ ପାଇଁ କାର୍ଯ୍ୟ କରାଯାଉଛି, ଏହା ସହ ରାସ୍ତାଘାଟ, ଡ୍ରେନେଜ୍‌ ସୁବିଧା ସହିତ ପିଇବା ପାଣିର ସୁବିଧା ଉପରେ ଅଧିକ ଗୁରୁତ୍ୱ ଦିଆଯାଉଛି। ଦିଗପହଣ୍ଡିର ସବୁ ପରିବାରକୁ ପାଇପ ପାଣି ସଂଯୋଗ ଦିଆଯାଇଛି ମୁଖ୍ୟମନ୍ତ୍ରୀ କହିଥିଲେ।

୫ ରାଷ୍ଟ୍ରାୟତ କମ୍ପାନୀକୁ ବିକ୍ରି କରିବେ ମୋଦି ସରକାର, ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଘୋଷଣା

ନୂଆଦିଲ୍ଲୀ: ଚଳିତ ବର୍ଷ କେନ୍ଦ୍ର ସରକାର ୫ଟି ରାଷ୍ଟ୍ରାୟତ କମ୍ପାନୀକୁ ବିକ୍ରି କରିବେ । ଏହା କହିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଭାରତୀୟ ଉଦ୍ୟୋଗ ମହାସଂଘ (ସିଆଇଆଇ)ର ବାର୍ଷିକ ଅଧିବେଶନକୁ ସମ୍ବୋଧିତ କରିବା ବେଳେ ଅର୍ଥମନ୍ତ୍ରୀ ଏହା କହିଛନ୍ତି । କରୋନା ମହାମାରୀ ପାଇଁ ଲଗାଯାଇଥିବା ଲକଡାଉନ କୋହଳ ହେବା ପରେ ଆର୍ଥିକ କ୍ଷେତ୍ରରେ ସୁଧାର ଆସୁିଛି ବୋଲି ସେ କହିଛନ୍ତି । ଚଳିତ ଆର୍ଥିକ ବର୍ଷରେ ପ୍ରତ୍ୟକ୍ଷ ପୁଞ୍ଜିନିବେଶରେ ୩୭ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଛି । ବୈଦେଶିକ ମୁଦ୍ରା ଭଣ୍ଡାରରେ ବୃଦ୍ଧି ଘଟି ଏହା ୬୨୦ ବିଲିଅନ ଡଲାର ହୋଇଛି ବୋଲି ଅର୍ଥମନ୍ତ୍ରୀ କହିଛନ୍ତି ।

ଏହି ସରକାରି କମ୍ପାନୀକୁ ବିକିବେ ମୋଦି ସରକାର

ଅର୍ଥବ୍ୟବସ୍ଥାରେ ଅଧିକ ପୁଞ୍ଜିନିବେଶ ପାଇଁ ଭାରତୀୟ ଶିଳ୍ପ ଜଗତକୁ ଆହ୍ୱାନ କରି ସେ କହିଛନ୍ତି ଯେ,ଚଳିତ ଆର୍ଥିକ ବର୍ଷରେ ସରକାର ୧ ଲକ୍ଷ ୭୫ ହଜାର କୋଟିର ପୁଞ୍ଜି ପ୍ରତ୍ୟାହାର ଲକ୍ଷ୍ୟକୁ ହାସଲ କରିବା ପାଇଁ ୫ ରାଷ୍ଟ୍ରାୟତ କମ୍ପାନୀକୁ ବିକ୍ରି କରିବେ । ବିକ୍ରି ହେବାକୁ ଥିବା କମ୍ପାନୀ ମଧ୍ୟରେ ଏୟାର ଇଣ୍ଡିଆ,ଭାରତ ପେଟ୍ରୋଲିୟମ,ବିଇଏମଏଲ,ଶିପିଂ କର୍ପୋରେସନ୍ ଓ କଣ୍ଟେନର କର୍ପୋରେସନ ରହିଛନ୍ତି । କରୋନା କାଳରେ ଅର୍ଥନୀତିକୁ ସୁଧାରିବା ପାଇଁ ସରକାର ଆରବିଆଇ ସହିତ ମିଶି କାମ କରୁଛନ୍ତି ବୋଲି ଅର୍ଥମନ୍ତ୍ରୀ କହିଛନ୍ତି ।

ପୁଣି ଲଜ୍ଜା: ବାଳିକା ଗୃହରେ ଖାଦ୍ୟରେ ନିଶା ଦେଇ ଯୁବତୀଙ୍କ ସହ ଦୁଷ୍କର୍ମ ଅଭିଯୋଗ

ଗୟା: ଭଗବାନ ବୁଦ୍ଧଙ୍କ ତପଭୂମି ବୋଧଗୟାରୁ ଆସିଛି ଚାଞ୍ଚଲ୍ୟକର ଖବର। ବୁଧଗୟାର ବାଳିକା ଗୃହରେ ଯୁବତୀଙ୍କ ସହ ଯୌନ ଶୋଷଣ କରାଯଉଥିବା ଅଭିଯୋଗ ଆସିଛି। ଏହି ଖବର ପୁଣିଥରେ ବିହାର ସରକାରଙ୍କ ମହିଳା ସୁରକ୍ଷା ଉପରେ ପ୍ରଶ୍ନ ଉଠାଇଛି।

ସୂଚନା ମୁତାବକ ନବାତା ଜିଲ୍ଲାର ଜଣେ ଯୁବତୀଙ୍କ ସହ ବୋଧଗୟା ବାଳିକା ଗୃହରେ ସେଠାକାର କର୍ମଚାରୀ ହିଁ ତାଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ଆସିଛି। ତେବେ ସବୁଠୁ ଚକିତ କରୁଛି ଯେ ଯୁବତୀ ଜଣଙ୍କ ସହ ଥରେ ନୁହେଁ ବାରମ୍ବାର ଦୁଷ୍କର୍ମ ହୋଇଥିବା ଅଭିଯୋଗ ଆସିଛି। ଏହି ଖବର ପୂରା ନବାତା ଜିଲ୍ଲାକୁ ସ୍ତବ୍ଧ କରିଦେଇଛି।

ପୀଡ଼ିତା ଜଣକ ଅଭିଯୋଗ କରିଛନ୍ତି ଯେ ପ୍ରତ୍ୟେକ ରାତିରେ ତାଙ୍କୁ ଖାଦ୍ୟ ପରେ କ୍ଷୀରରେ କିଛି ନିଶାଦ୍ରବ୍ୟ ମିଶାଇ ପିଇବାକୁ ଦିଆଯାଉଥିଲା । ଯାହାପରେ ସେ ବେହୋସ ହୋଇଯାଉଥିଲେ । ଆଉ ପରଦିନ ସକାଳେ ଉଠିଲାବେଳେ ତାଙ୍କ ଦେହ ଦରଜ ହେବା ସହ ତାଙ୍କ ଲୁଗାପଟା ଅସଂଜତ ଅବସ୍ଥାରେ ଥାଏ।

ଯେତେବେଳେ ପୀଡିତା ଜଣକ ବାଳିକା ଗୃହର ଅଧକ୍ଷଙ୍କ ନିକଟରେ ଅଭିଯୋଗ କରିଥିଲେ, ସେତେବେଳେ ତାଙ୍କୁ ଗାଳିଗୁଲଜ କରାଯାଇଥିଲା ଏବଂ ଏ ବିଷୟରେ କୌଣସି ବାହାର ଲୋକଙ୍କୁ ନ ଜଣାଇବାକୁ ଧମକ ମଧ୍ୟ ଦେଇଥିଲେ। ଏହି ଘଟଣା ସେତେବେଳେ ଭିନ୍ନ ମୋଡ଼ ନେିଥିଲା ଯେତେବେଳେ ବାଳିକାଗୃହର ଅନ୍ୟ ୪ ଜଣ  ଝିଅଙ୍କ ସହ ମଧ୍ୟ ସମାନ ଘଟଣା ଘଟିଥିବା ଅଭିଯୋଗ ଆସିଲା। ଏହି ଘଟଣା ସାମ୍ନାକୁ ଆସିବା ପରେ ବିହାରର ବାଳିକା ଗୃହରେ ରହୁଥିବା ଝିଅମାନଙ୍କର ସୁରକ୍ଷା ଉପରେ ପୁଣି ଏକ ପ୍ରଶ୍ନ ଚିହ୍ନ ସୃଷ୍ଟି ହୋଇଛି।

ସୂଚନାଯୋଗ୍ୟ, ବିହାରରେ ୨୦୧୮ରେ ପ୍ରଥମ ଥର ପାଇଁ ଟାଟା ଇନଷ୍ଟିଚ୍ୟୁଟ୍ ଅଫ୍ ସୋସିଆଲ୍ ସାଇନ୍ସର ରିପୋର୍ଟରେ ତିନି ବର୍ଷ ପୂର୍ବେ ରାଜ୍ୟରେ ଏକ ବାଳିକା ଗୃହରେ ନାବାଳିକାଙ୍କ ସହ ଯୌନ ଶୋଷଣ ମାମଲା ସାମ୍ନାକୁ ଆସିଥିଲା। ତା’ପରେ ମୁଜାଫରପୁରର ବାଲିକା ଗୃହରେ ମଧ୍ୟ ସମାନ ଖବର ସାମ୍ନାକୁ ଆସିଥିଲା। ଏହି ମାମଲାର ତଦନ୍ତ ସିବିଆଇକୁ ଦିଆଯାଇଥିଲା। ଏଥିରେ ୨୧ ଜଣଙ୍କୁ ଗିରଫ କରାଯାଇଥିଲା ଯେଉଁଥିରୁ ୧୦ ଜଣ ମହିଳା, ଥିଲେ ଯେଉଁମାନେ ଏଭଳି ଘଟଣା ସବୁ ଲୁଚାଉଥିଲେ।

ପେଟ୍ରୋଲ ପମ୍ପରେ ମିଳୁଛି ପାଣି ମିଶା ପେଟ୍ରୋଲ, ଟାଙ୍କିରେ ପଡ଼ିଲେ ଅଧ ଘଣ୍ଟାରେ ବନ୍ଦ ହେଉଛି ଷ୍ଟାର୍ଟ

କଟକ: ପେଟ୍ରୋଲରେ ପାଣି। ଟାଙ୍କିରେ ପକାଇ ଗଲେ ଅଧା ବାଟରେ ବନ୍ଦ ହୋଇଯାଉଛି ଗାଡ଼ି। ଏକ ଲିଟର ପେଟ୍ରୋଲ କିଣିରେ ସେଥିରେ ୨୦ ଭାଗ ପାଣି ଆସୁଛି। ପ୍ରତିବାଦ କଲେ ଶୁଣୁ ନାହାନ୍ତି ପେଟ୍ରୋଲ ପମ୍ପ ମାଲିକ। ଏମତି ଅଭିଯୋଗ ଆସିଛି କଟକ ଗଣ୍ଡରପୁର ଭାରତ ପେଟ୍ରୋଲ ପମ୍ପରୁ। ଘଟଣା ପରେ ଗ୍ରାହକଙ୍କ ମହଲରେ ଅସନ୍ତୋଷ ଦେଖାଦେଇଛି।

ପେଟ୍ରୋଲ କିଣିଲେ ମିଳୁଛି ପାଣି। ଏକ ଲିଟର ପେଟ୍ରୋଲରେ ୨୦ ପ୍ରତିଶତ ପାଣି। ଟାଙ୍କିରେ ପକାଇ ଗଲେ ଅଧା ରାସ୍ତାରେ ଗାଡ଼ି ବନ୍ଦ। ଅଭିଯୋଗ କଲେ ଶୁଣୁ ନାହାନ୍ତି ପମ୍ପ ମାଲିକ। ଏମତି ଅଭିଯୋଗ ଆସିଛି କଟକ ଗଣ୍ଡରପୁର ଭାରତ ପେଟ୍ରୋଲ ପମ୍ପରୁ। ଅଙ୍କିତ ଗୋଛାୟାତ ନାମକ ଜଣେ ଛାତ୍ର ତାଙ୍କ ସ୍କୁଟିରେ ପେଟ୍ରୋଲ୍ ପକାଇ ଘରକୁ ଯିବାବେଳେ ଗାଡି ରାସ୍ତାରେ ବନ୍ଦ ହୋଇଯାଇଥିଲା। ଗ୍ୟାରେଜରେ ଦେଖାଇବା ପରେ ପ୍ରକୃତ କଥା ପଦାକୁ ଆସିଥିଲା।
ଅନ୍ୟପଟେ ଟାଙ୍କି ମାଲିକ ଅଭିଯୋଗକୁ ଖଣ୍ଡନ କରିଛନ୍ତି। ଟାଙ୍କିରେ ଲାଗିଥିବା ମେସିନ ସବୁ ଠିକ୍ ଥିବାବେଳେ କିପରି ପାଣି ଆସୁଛି ବୋଲି ସେ ପାଲଟା ପ୍ରଶ୍ନ କରିଛନ୍ତି। ସେପଟେ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଗ୍ରାହକ। ଦିନକୁ ଦିନ ପେଟ୍ରୋଲ ମୂଲ୍ୟ ବଢୁଥିବାବେଳେ ପାଣିମିଶା ତେଲ ବାହାରିବା ଘଟଣା ଗ୍ରାହକଙ୍କ ମହଲରେ ଅସନ୍ତୋଷ ସୃଷ୍ଟି କରିଛି।

ନାବାଳିକା ଅପହରଣର ୭ ମାସ ପରେ ବି ନାବାଳିକାକୁ ଖୋଜି ପାଉନି ପୋଲିସ୍‌

ମୟୂରଭଞ୍ଜ: ଦିନ ଗଡୁଛି, ହେଲେ ମିଳୁନି ନ୍ୟାୟ। ଅପହୃତା ନାବାଳିକାଙ୍କୁ ଉଦ୍ଧାର କରିବାରେ ବିଫଳ ମୟୂରଭଞ୍ଜ ଜିଲ୍ଲା କେଶିଙ୍ଗା ପୋଲିସ୍। ମାନଗୋବିନ୍ଦପୁର ଗାଁର ନାବାଳିକା ଅପହରଣକୁ ୭ମାସ ବିତିଯାଇଥିଲେ ମଧ୍ୟ ଏଯାଏ ନାବାଳିକା ଓ ଅପହରଣକାରୀଙ୍କ ପତ୍ତା ପାଇନି ପୋଲିସ। ସେପଟେ ସରକାରୀ ଦପ୍ତରକୁ ଦୌଡି ଦୌଡି ନାବାଳିକା ପରିବାର ଲୋକ ନୟାନ୍ତ ହେଲେଣି। ଝିଅ ନମିଳିଲେ ଆତ୍ମହତ୍ୟା ଶେଷ ରାସ୍ତା ବୋଲି କହିଛନ୍ତି ପରିବାର ଲୋକ। ଗତ ଫେବ୍ରୁଆରି ୧୦ ତାରିଖରେ ଦୁବୃର୍ତ୍ତମାନେ ନାବାଳିକାଙ୍କୁ ତାଙ୍କ ଘରୁ ଅପହରଣ କରିନେଇଥିଲେ। ଏନେଇ ନାବାଳିକାଙ୍କ ପରିବାର ଲୋକ କେଶିଙ୍ଗା ଥାନାରେ ଏତଲା ଦେଇଥିଲେ। ଆଜକୁ ୭ ମାସ ପୂରି ଯାଇଥିଲେ ମଧ୍ୟ ଏଯାଏ ପୋଲିସ ଦୁବୃର୍ତ୍ତଙ୍କ ଟେର ବି ପାଇନଥିବା ଅଭିଯୋଗ କରିଛନ୍ତି ସମ୍ପର୍କୀୟ। ସେପଟେ ଦୁର୍ବୃଙ୍କୁ ଖୁବଶୀଘ୍ର ଗିରଫ କରି ନାବାଳିକାକୁ ଉଦ୍ଧାର କରାଯିବ ବୋଲି କହିଛନ୍ତି ମୟୂରଭଂଜ ଏସପି କହିଛନ୍ତି।

କିଛି ବର୍ଷ ପରେ ଛୋଟ ପିଲାଙ୍କର ସାଧାରଣ ଥଣ୍ଡା ଜ୍ୱରରେ ପରିଣତ ହେବ କରୋନା

ଭୁବନେଶ୍ୱର: ଆସନ୍ତା କିଛି ବର୍ଷ ମଧ୍ୟରେ ସାଧାରଣ ଥଣ୍ଡା ରୋଗରେ ପରିଣତ ହୋଇଯିବ କରୋନା। ଏହା ବିଶେଷତଃ ଶିଶୁ ରୋଗରେ ପରିଣତ ହେବ। ଏଭଳି କିଛି ତଥ୍ୟ ଏବେ ସାମ୍ନାକୁ ଆସିଛି। ଆମେରିକା ଓ ନରଓ୍ୱେର ଗବେଷକ ଏଭଳି ତଥ୍ୟ ପ୍ରଦାନ କରିଛନ୍ତି। ରିପୋର୍ଟ ଅନୁସାରେ କରୋନାର ଗମ୍ଭୀରତା ଶିଶୁଙ୍କ ନିକଟରେ ବିଶେଷ ପରିଲକ୍ଷିତ ହେଉନାହିଁ। ଆକ୍ରାନ୍ତ ହୋଇ ମଧ୍ୟ ଶିଶୁମାନେ ଗୁରୁତର ହେଉନାହାନ୍ତି। କେବଳ ବୟସ୍କମାନେ କରୋନାରେ ଅଧିକ କ୍ଷତିଗ୍ରସ୍ତ ହୋଇଛନ୍ତି।

ତେବେ ପ୍ରଥମେ ସଂକ୍ରମିତ ହେଲା ପରେ ଦ୍ୱିତୀୟ ଥର ସଂକ୍ରମିତ ହେଲେ ରୋଗୀ ପୂର୍ବାପେକ୍ଷା ଅଧିକ ଗୁରୁତର ହେଉନାହାନ୍ତି। କରୋନାର ଶକ୍ତିକୁ ହ୍ରାସ କରିବାରେ ଭ୍ୟାକ୍ସିନେସନ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି। ଟିକାକରଣ ପରେ ଲୋକଙ୍କ ମଧ୍ୟରେ ରୋଗପ୍ରତିରୋଧକ ଶକ୍ତି ବଢୁଛି। ଫଳରେ ଲୋକ ସଂକ୍ରମିତ ହେଲେ ମଧ୍ୟ ବିପଦ କମୁଛି।

ଏଣୁ କରୋନାର ଭୟାବହତା ଦିନକୁ ଦିନ କମିବା ସହିତ ଏହା ସାଧାରଣ ଥଣ୍ଡା ରୋଗରେ ପରିଣତ ହେବ ବୋଲି ଗବେଷକ କହିଛନ୍ତି। କେବଳ ଟିକା ନେଇନଥିବା ଯୁବକଙ୍କ ପାଇଁ ଭୟ ରହିଛି। ରିପୋର୍ଟ ଅନୁସାରେ ପୂର୍ବରୁ ବିଶ୍ୱକୁ ଅନେକ ମହାମାରୀ ଆସିଛି। ଯାହାକି କିଛି ବର୍ଷ ପରେ ଦୁର୍ବଳ ହେବା ସହିତ ସାଧାରଣ ରୋଗରେ ପରିଣତ ହୋଇଛି।

ସୁରକ୍ଷାକର୍ମୀ ଓ ସାଂସଦଙ୍କ ମଧ୍ୟରେ ଜୋରଦାର ହଙ୍ଗାମା, ମହିଳା ସାଂସଦଙ୍କୁ ମାଡ଼ ମାରିବା ଅଭିଯୋଗ ଆଣିଲା କଂଗ୍ରେସ

ଭୁବନେଶ୍ୱର: ମୌସୁମୀ ଅଧିବେଶନର ଶେଷ ଦିନରେ ସବୁ ସୀମା ପାର୍‌। ସରକାରଙ୍କ ଜିଦ୍‌ ପାଇଁ ବିରୋଧୀ ଗରମ। ପେଗାସସ୍‌ ଭାଇରସକୁ ନେଇ ବିରୋଧୀ ଆଲୋଚନା କରିବା ପାଇଁ ଚାହୁଁଥିବା ଗୃହରେ ଅନୁମତି ଦେଇନଥିଲେ ସରକାର। କୋଭିଡ ପରିଚାଳନା ଓ କୃଷି ଆଇନ୍‌ ଉପରେ ଆଲୋଚନା କରିବା ପାଇଁ ଚାହୁଥିଲେ ସରକାର। ପୁରା ଅଧିବେସନ ସରକାରଙ୍କ ଇଛାରେ ଚାଲିବା ପାଇଁ ପ୍ରସ୍ତୁତ ହୋଇଥିଲା ବ୍ଲୁ ପ୍ରିଣ୍ଟ। ହେଲେ ବିରୋଧୀ ସମର୍ଥନ କରିବାରୁ ପ୍ରତିଦିନ ହଙ୍ଗାମା ଗଣ୍ଡଗୋଳ ଭିତରେ ସଂସଦର ଉଭୟ ଗୃହ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ହୋଇଛି।

ଅଧିବେଶନର ଶେଷ ଦିନରେ ହୋଇଥିବା ହଙ୍ଗାମା ସରକାରଙ୍କ ପାରିବା ପଣିଆ ଉପରେ ପ୍ରଶ୍ନ ଉଠାଇଛି। ନିଜ ଇଚ୍ଛାରେ ଗୃହ ନଚାଲିଲେ ସୁରକ୍ଷାକର୍ମୀ ଲଗାଇ ମାଡ ମାରିଥିବା ଅଭିଯୋଗ ହୋଇଛି। ଏହା ବିରୋଧରେ କଂଗ୍ରେସ ସହ ଅନ୍ୟ ଦଳର ନେତା ସଂସଦ ବାହାରେ ପ୍ରତିବାଦ କରିଥିବା ବେଳେ ବିଜୟ ଚୌକ ପର୍ଯ୍ୟନ୍ତ ଏକ ରାଲି କରିଥିଲେ। ଲୋକସଭାକୁ ବାଚସ୍ପତି କାହିଁକି ଚଳାଇଦେଲେ ନାହିଁ ବୋଲି ପ୍ରଶ୍ନ କରିଛନ୍ତି ରାହୁଲ ଗାନ୍ଧୀ। ବିରୋଧୀଙ୍କୁ ଚୁପ୍‌ କରିବା ପାଇଁ କାହିଁକି ବାଧ୍ୟ କରାଯାଇଥିଲା। ଗୃହକୁ ସୁରୁଖୁରୁ ନଚଳେଇ, ଦେଶର ସ୍ୱରକୁ ଦବେଇବା ପାଇଁ ସରକାର ଚେଷ୍ଟା କରିଥିବା ଅଭିଯୋଗ ହୋଇଛି।

ସେପଟେ ସଂସଦରେ ଏଭଳି ଆଚରଣ ପାଇଁ ସଫେଇ ଦେଇଛନ୍ତି ୮ ଜଣ କେନ୍ଦ୍ରମନ୍ତ୍ରୀ। ସମସ୍ତେ ଏକାଥରକେ ଆସି ବିରୋଧୀଙ୍କ ଉପରେ ବର୍ଷିଛନ୍ତି। ବିରୋଧୀଙ୍କ ଏଭଳି କାଣ୍ଡ ପାଇଁ ଦେଶକୁ କ୍ଷମା ମାଗିବା ଦରକାର ବୋଲି କହିଛନ୍ତି। ରାଜ୍ୟସଭା ଅଧକ୍ଷ୍ୟ ଘଟଣାର ତଦନ୍ତ କରି ଦୋଷୀ ସାଂସଦଙ୍କୁ ଉଚିତ୍‌ ଦଣ୍ଡ ଦେବା ଦରକାର ବୋଲି ସରକାର କହିଛନ୍ତି।

ତେବେ ବାହାରୁ କୌଣସି ସୁରକ୍ଷା କର୍ମୀ ଆସିନାହାନ୍ତି ବୋଲି ସରକାର କହିଛନ୍ତି। ଗୃହ ଭିତରେ ଦାୟିତ୍ୱରେ ଥିବା ୩୦ ଜଣ ସୁରକ୍ଷାକର୍ମୀ ହିଁ ଉପସ୍ଥିତ ଥିଲେ। ୯ ଅଗଷ୍ଟରେ ବିରୋଧୀ ଚେୟାର ଉପରେ ଠିଆ ହୋଇ ହଙ୍ଗାମା କରିଥିବା ବେଳେ ରୁଲ୍‌ ବୁକ୍‌ ଚିରିବା ନିନ୍ଦନୀୟ ବୋଲି କେନ୍ଦ୍ରମନ୍ତ୍ରୀ ପିୟୁଷ ଗୋଏଲ କହିଛନ୍ତି।

ସଂସଦରେ ଏଭଳି ହଙ୍ଗାମା ଇତିହାସରେ କେବେ ହୋଇନଥିଲା। ଦାବି ଉପସ୍ଥାପନ ପାଇଁ ଜିଦ୍‌ରେ ଥିବା ବିରୋଧୀଙ୍କୁ ସୁରକ୍ଷାକର୍ମୀ ଲଗାଇ ଟଣାଓଟରା କରିବା ଆଉ ଏକ କଳଙ୍କିତ ଅଧ୍ୟାୟ ସୃଷ୍ଟି ହୋଇଛି।

କାଠଗଡ଼ାରେ ଅତ୍ୟାବଶୀୟ ଦ୍ରବ୍ୟ ଆଇନ, କର୍ପୋରେଟ ମାଲାମାଲ ଖାଉଟି କାଙ୍ଗାଳ

ଭୁବନେଶ୍ୱର: କୋଭିଡ ସମୟରେ ଖାଉଟିଙ୍କ ଆର୍ଥିକ ମେରୁଦଣ୍ଡ ଭାଙ୍ଗିଯାଇଛି। ହେଲେ ଅତ୍ୟାବଶ୍ୟକୀୟ ସାମଗ୍ରୀର ଦାମ ହୁ ହୁ ହୋଇ ବଢୁଥିବାରୁ ହାଣ୍ଡିଶାଳ ପ୍ରଭାବିତ ହୋଇଛି। ଏଥିପାଇଁ କେନ୍ଦ୍ର ସରକାରଙ୍କ ତୃଟିପୂର୍ଣ୍ଣ ନୀତିକୁ ରାଜ୍ୟ ସରକାର ଟାର୍ଗେଟ କରିଥିବାବେଳେ କଂଗ୍ରେସ ବି କରିଛି ସମର୍ଥନ। ସେହିପରି କର୍ପୋରେଟ ମାର୍କେଟକୁ କେନ୍ଦ୍ର ସରକାର ମାଲାମାଲ କରୁଥିବା ବ୍ୟବସାୟୀ ଅଭିଯୋଗ କରିଛନ୍ତି।

ବଜାରରେ ଖାଦ୍ୟ ସାମଗ୍ରୀକୁ ହାତ ଯାଉନି। ପେଟ୍ରୋଲ ପରି ଅତ୍ୟାବଶ୍ୟକୀୟ ସାମଗ୍ରୀ ଦାମ ବି ଶତକ ମାରିଲାଣି। କେନ୍ଦ୍ର ସରକାରଙ୍କ ଅତ୍ୟାବଶ୍ୟକୀୟ ଦ୍ରବ୍ୟ ଆଇନ ଓ କୃଷି ନୀତିକୁ ଦରଦାମ ବୃଦ୍ଧିର ପ୍ରମୁଖ କାରଣ ଭାବେ ଅଭିଯୋଗ କରିଛନ୍ତି ରାଜ୍ୟ ସରକାର। ଏହା ଦ୍ୱାରା କର୍ପୋରେଟ ସଂସ୍ଥା ଡ଼ାଲି ଓ ସୋରିଷ ପରି ଖାଦ୍ୟ ସାମଗ୍ରୀକୁ ଗଚ୍ଛିତ ରଖି ନିୟମିତ ଦାମ ବଢାଉଥିବାର ଆକଳନ କରିଛି କଂଗ୍ରେସ।

ଦରଦାମ ବୃଦ୍ଧି ନିଆଁରେ କେନ୍ଦ୍ର ସରକାରଙ୍କ ଭୂମିକାକୁ କର୍ପୋରେଟପ୍ରୀତି ଭାବେ କଟାକ୍ଷ କରିଛି ଓଡ଼ିଶା ବ୍ୟବସାୟୀ ମହାସଂଘ। କର୍ପୋରେଟ ସଂସ୍ଥା ଓ ମଲ ଗୁଡ଼ିକର ଚଢା ଦରରେ ବିକ୍ରି କରୁଥିବାର ସତ୍ତ୍ୱେ, ଷ୍ଟକ ଲିମିଟ ରଖି ନାହାନ୍ତି କେନ୍ଦ୍ର ସରକାର। ହେଲେ ହୋଲସେଲରଙ୍କ ପାଇଁ ୫ହଜାର କ୍ୱିଣ୍ଟାଲ ଷ୍ଟକ ଲିମିଟ ରଖିଥିବାରୁ କେନ୍ଦ୍ର ବିରୋଧରେ ବ୍ୟବସାୟୀ ବି ବର୍ଷିଛନ୍ତି।

ନୂତନ କୃଷି ନୀତି ବିରୋଧରେ ଦିଲ୍ଲୀ ଦରବାରରେ ଚାଷୀମାନେ ଶହ ଶହ ଦିନ ଧାରଣା ଦେଲେ। ଶୀତ କାକରରେ କିଛି ଚାଷୀଙ୍କ ଜୀବନ ଗଲା। ଆଲୋଚନା କରି ସମାଧାନର ବାଟ ଖୋଜିବା ପରିବର୍ତ୍ତେ, ଚାଷୀଙ୍କ ଆତଙ୍କବାଦୀ ପରି ଶଦ୍ଦରେ ଭର୍ସନା କଲେ କେନ୍ଦ୍ରୀୟ ନେତା। ଏହି ରାଜନୈତିକ ଛକାପଞ୍ଜା ଭିତରେ ଘାଣ୍ଟି ହେଉଛନ୍ତି ଖାଉଟି ।

 

ବିଏମ୍‌ସିର ନଜର ଆଢୁଆଳରେ କେ-୭ ଏରିଆ, ବୃଦ୍ଧି ପାଉଛି ଅସାମାଜିକ ଲୋକଙ୍କ ଦୌରାତ୍ମ୍ୟ

ଭୁବନେଶ୍ୱର: ଭୁବନେଶ୍ୱରର ଉପକଣ୍ଠରେ ରହିଛି କଳିଙ୍ଗନଗର। କଳିଙ୍ଗନଗର କେ-୭ ଅଞ୍ଚଳରେ ଦେଖିବାକୁ ମିଳିଛି ନୂଆ ସମସ୍ୟା। ଯାହା ସ୍ଥାନୀୟ ଲୋକଙ୍କ ଚିନ୍ତା ବଢାଇଛି। ବିଦ୍ୟୁତ୍‌ ଖୁଣ୍ଟରୁ ଲାଇଟ୍ ଚୋରୀ ଭଳି ଘଟଣା ଦେଖିବାକୁ ମିଳିଛି। ୨୦ରୁ ଅଧିକ ଖୁଣ୍ଟରେ ଲାଇଟ୍ ନଥିବା କାରଣରୁ ସମ୍ପୂର୍ଣ୍ଣ ଅଞ୍ଚଳ ଅନ୍ଧକାରମୟ। ଅନ୍ଧାରର ସୁଯୋଗ ନେଇ ସମ୍ପୃକ୍ତ ଅଞ୍ଚଳରେ ବଢିବାରେ ଲାଗିଛି ଅସାମାଜିକ ତତ୍ତ୍ୱଙ୍କ ଦୌରାତ୍ମ୍ୟ।

କେ-୭ ଏରିଆରେ ଅଧିକାଂଶ ବରିଷ୍ଠ ନାଗରିକ ବସବାସ କରୁଥିବାରୁ ସେମାନଙ୍କ ସୁରକ୍ଷାକୁ ନେଇ ଉଠିଛି ପ୍ରଶ୍ନ। ପୋଲିସ ପେଟ୍ରୋଲିଂ ଶୂନ। ବାରମ୍ବାର ଅଭିଯୋଗ ପରେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି। ସମସ୍ୟାର ସମାଧାନ ପାଇଁ ଅଣ୍ଟା ଭିଡିଛନ୍ତି ସ୍ଥାନୀୟ ମହିଳା ସଙ୍ଗଠନ। ନିଜ ପାଣ୍ଠିରୁ ଷ୍ଟ୍ରିଟ ଲାଇଟ୍‌ ଲଗାଇବାକୁ ବାଧ୍ୟ ହୋଇଛନ୍ତି। ତେବେ ସମସ୍ୟାର ସ୍ଥାୟୀ ସମାଧାନ ପାଇଁ ଜରୁରୀ ବୈଠକ ପରେ ବିଡିଏ, ବିଏମ୍‌ସି ଓ ପୋଲିସ କମିଶନରଙ୍କ ଦ୍ୱାରସ୍ଥ ହେବାକୁ ନିଷ୍ପତ୍ତି ନେଇଛି ସଂଘ।

କଳିଙ୍ଗନଗର କେ-୭ ଇଲାକାରେ ବିଦ୍ୟୁତ୍‌ ଖୁଣ୍ଟରୁ ଲାଇଟ୍ ଚୋରୀ ଭଳି ଘଟଣା ଚିନ୍ତାର ବିଷୟ । ତୁରନ୍ତ ଘଟଣାର ତଦନ୍ତ କରାଯିବା ସହ ସମସ୍ୟାର ସମାଧାନ ଦିଗରେ ଆବଶ୍ୟକ ପଦକ୍ଷେପ ନିଆଯିବ । ତେବେ ବିଦ୍ୟୁତ୍‌ ଖୁଣ୍ଟରେ ନିଜସ୍ବ ଉଦ୍ୟମ ତଥା ନିଜସ୍ବ ପାଣ୍ଠିରେ ମହିଳା ସଙ୍ଗଠନ ପକ୍ଷରୁ ଲାଇଟ୍‌ ଲଗାଯାଇଥିବା ସମ୍ପର୍କରେ ସେ ଅବଗତ ନଥିବା କହିଛନ୍ତି ବିଏମ୍‌ସି ଅତିରିକ୍ତ କମିଶନର