spot_img
Home Blog Page 5389

ଆପଣ ନେଇଥିବା ଟିକା, ଅସଲି ନା ନକଲି ? ଜାଣିବେ କେମିତି…

ନନ୍ଦିଘୋଷ ବ୍ୟୁରୋ: କେତେ ସୁରକ୍ଷିତ କରୋନା ଟିକା ? ଆପଣ ନେଇଥିବା ଟିକା.. ଅସଲି ନା ନକଲି ? ସେ କୋଭିସିଲ୍ଡ ହେଉ ଅବା କୋଭାକ୍ସିନ୍.. କି ସ୍ପୁଟନିକ୍-ଭି ? କେମିତି ଜାଣିବେ କେଉଁଟା ଅସଲି.. ଆଉ କେଉଁଟା ନକଲି ? ଆପଣ ନେଇସାରିଥିବା ଟିକା ନକଲି ନୁହେଁତ ? ଅସଲି ଆଉ ନକଲି ଟିକାକୁ ଜାଣିବେ କେମିତି ? ଆସନ୍ତୁ ଜାଣିବା ଆଗକୁ ଆସୁଛି କରୋନାର ତୃତୀୟ ଲହର । ଆଉ ତୃତୀୟ ଲହର ଆସିବା ପୂର୍ବରୁ ଅଣ୍ଟା ଭିଡିଛନ୍ତି ସରକାର । ଦେଶ ଓ ରାଜ୍ୟରେ ଟିକାକରଣକୁ ଜୋରଦାର କରାଯାଉଛି । ହେଲେ ଏଥିମଧ୍ୟରେ ବଜାରକୁ ଆସିଲାଣି ନକଲି ଭ୍ୟାକ୍ସିନ୍ । ନକଲି ଟିକା ବ୍ୟବସାୟ ଆନ୍ତର୍ଜାତୀୟ ବଜାରରେ ଦେଖାଦେଲାଣି । ଏଇ ନିକଟରେ ଦକ୍ଷିଣ-ପୂର୍ବ ଏସିଆ ଏବଂ ଆଫ୍ରିକାରେ ନକଲି ଟିକା ମିଳିଥିବା ନଜର ଆସିଛି ।

ନକଲି ଟିକା ଚିହ୍ନଟ ହେବା ପରେ WHO ବା ବିଶ୍ୱ ସ୍ୱାସ୍ଥ୍ୟ ସଂଗଠନ ଏନେଇ ସମସ୍ତ ଦେଶକୁ ସତର୍କ କରାଇଛି । ଏହି ତଥ୍ୟ ପାଇବା ପରେ କେନ୍ଦ୍ର ସରକାର ମଧ୍ୟ ସମସ୍ତ ରାଜ୍ୟକୁ ସୂଚନା ଦେଇଛନ୍ତି । ଯାହାଦ୍ୱରା ଟିକା ଅସଲି କି ନକଲି ତାହା ସ୍ପଷ୍ଟ ଜାଣିହେବ । କେନ୍ଦ୍ର ସରକାରଙ୍କ ଚିଠିରେ ଥିବା ତଥ୍ୟ ଅନୁସାରେ ଦେଶରେ ପ୍ରଚଳିତ ୩ଟି ଟିକା ଅର୍ଥାତ୍ କୋଭାକ୍ସିନ୍, କୋଭିସିଲ୍ଡ ଓ ସ୍ପୁଟନିକ୍-ଭି ସମ୍ପର୍କରେ ସମସ୍ତ ତଥ୍ୟ ଦିଆଯାଇଛି । ଯେଉଁଥିରେ କରୋନା ଟିକା ପ୍ରକୃତରେ ନକଲି କି ଅସଲି ତାହା ସହଜରେ ଜାଣିହେବ । ସରକାରଙ୍କ ତଥ୍ୟ ଅନୁସାରେ କମ୍ପାନୀ ଗୁଡ଼ିକର ବ୍ରାଣ୍ଡର ନାଁ, ଟିକାର ଲେବୁଲ ଓ ରଙ୍ଗକୁ ନେଇ ଜାଣିପାରିବେ ଟିକା ଅସଲି ରହିଛି ନାଁ ନକଲି ।

କୋଭିସିଲ୍ଡ ଭ୍ୟାକ୍ସିନ୍ ଉପରେ SIIର ଉତ୍ପାଦନ ଲେବୁଲ ଇସତ୍ ସବଜ ରଙ୍ଗ ରହିବ । ବ୍ରାଣ୍ଡର ନାଁ ଟ୍ରଡେ୍ ମାର୍କ ସହିତ କୋଭିସିଲ୍ଡ ଲେଖାଯାଇଥିବା ଦେଖିବାକୁ ପାଇବେ । ସବୁଠୁ ବଡ଼ କଥା ହେଉଛି ଏହାରି ଉପରେ ସିଜିଏସ୍ ନଟ୍ ଫର୍ ସେଲ ଲେଖା ରହିଥିବ । ସେହିପରି କୋଭାକ୍ସିନର ଲେବୁଲ୍ ଉପରେ ଅଳ୍ପ ଦେଖାଯାଉଥିବା ପରି.. ୟୁଭି ହେଲିକ୍ସ ଲୋଗ ରହିଥିବ । ଯାହା କେବଳ ୟୁବି ଲାଇଟ୍ ଦ୍ୱାରା ଦେଖାଯିବ । ତାହା ସହ ଲେବୁଲ କ୍ଲେମ୍ ଡଟ୍ ମଧ୍ୟରେ ଛୋଟ ଛୋଟ ଅକ୍ଷରରେ କୋଭାକ୍ସିନ୍ ଲେଖାରହିଥିବ । ଏହି ଭ୍ୟାକ୍ସିନକୁ ଚିହ୍ନିବାର ସବୁଠୁ ବଡ କଥା ହେଉଛି ଲେଖାଥିବା ଏକ୍ସ ଅକ୍ଷରଟି ଦୁଇ ପ୍ରକାରର ସବୁଜ ରଙ୍ଗରେ ଦେଖାଯିବ ।

ଶେଷରେ ରହିଛି ସ୍ପୁଟନିକ୍-ଭି । ଏହି ଟିକା ଦୁଇଟି ପ୍ଲାଣ୍ଟରେ ପ୍ରସ୍ତୁତ କରାଯାଇଛି । ଯାହା ଦ୍ୱାରା ଏହି ଟିକାର ଲେବୁଲ୍ ଅଲଗା ଅଲଗା ହୋଇଥିବା ବେଳେ, ନିର୍ମାତା ବି ଅଲଗା । ହେଲେ ସୂଚନା ଉଭୟଙ୍କର ସମାନ ରହିଛି । ଏଯାଏ ରୁଷ ଭାରତକୁ ଯେତେ ବି ଭ୍ୟାକ୍ସିନ୍ ପଠାଇଛି ସେଥିରୁ କେବଳ ୫ଟି ଏମପୁଲ ପକେଟ୍ରେ ଇଂରାଜୀରେ ଲେବୁଲ ଲେଖା ରହିଛି । ଏବଂ ଅନ୍ୟ ସବୁଥିରେ ରୁଷିଆନରେ ଲେଖାଯାଇଥିବା ଦେଖିବାକୁ ମିଳିଛି ।

ତାଲିବାନକୁ ପଞ୍ଜଶୀର ଦେଲା ପାକିସ୍ତାନ, ଡ୍ରୋନ୍ ଆକ୍ରମଣ କାରଣରୁ ଦେଶ ଛାଡ଼ିଲେ ସାଲେହ

କାବୁଲ: ବିଦ୍ରୋହର ଶେଷ ଗଡ଼ ପଞ୍ଜଶୀରର ପତନ ସହିତ ପୁରା ଆଫଗାନିସ୍ତାନ ତାଲିବାନ କବଜାକୁ ଆସିଛି । ଏହା ସହିତ ନିଜକୁ ଆଫଗାନିସ୍ତାନର ପ୍ରକୃତ ରାଷ୍ଟ୍ରପତି ବୋଲି ଦାବି କରୁଥିବା ଅମରୁଲ୍ଲା ସାଲେହ ଦେଶ ଛାଡି ତାଜିକସ୍ତାନକୁ ପଳାୟନ କରିଛି । ତେବେ ତାଲିବାନର ଏହି ବିଜୟ ପାକିସ୍ତାନର ବିଜୟ ବୋଲି କୁହାଯାଉଛି । କାରଣ ପଞ୍ଜଶୀର ଘାଟି ଉପରେ ପାକ୍ ବାୟୁସେନାର ଡ୍ରୋନ୍ ଆକ୍ରମଣ ହିଁ ଯୁଦ୍ଧର ମୋଡ ବଦଳାଇ ଦେଇଥିଲା ।

ପାକିସ୍ତାନୀ ପାଇଲଟ୍ ଏନଆରଏଫ୍(ନ୍ୟାସନାଲ ରେସିଷ୍ଟାନ୍ସ ଫୋର୍ସ)ର ଆଡ୍ଡା ଉପରେ ଡ୍ରୋନ୍ ଆକ୍ରମଣ କରି ତାଲିବାନକୁ ସାହାଯ୍ୟ କରିଥିଲେ। ରବିବାର ଦିନ ଦୁଇଟି ଗାଡି ଉପରେ ହୋଇଥିବା ଡ୍ରୋନ୍ ଆକ୍ରମଣରେ ଏନଆରଏଫର ମୁଖପାତ୍ର ଫହିମ ଦସ୍ତି ଓ ଅନ୍ୟ ୫ ଜଣ ପ୍ରାଣ ହରାଇଥିଲେ। ଫହିମ ଜଣେ ପୂର୍ବତନ ସାମ୍ବାଦିକ ଥିଲେ । କାବୁଲ ପତନ ପର୍ଯ୍ୟନ୍ତ ସେ କାବୁଲ ଡେଲିର ସମ୍ପାଦକ ଥିଲେ। ତେବେ କାବୁଲ ତାଲିବାନ କବଜାକୁ ଆସିବା ପରେ ସେ ପଂଜଶୀର ପଳାୟନ କରି ରେସିଷ୍ଟାନ୍ସ ଫୋର୍ସରେ ସାମିଲ ହୋଇଥିଲେ। ସେହିଭିଲ ପାକ୍ ଡ୍ରୋନ୍ ଆକ୍ରମଣରେ ଅହମ୍ମଦ ଶାହା ମାସୁଦଙ୍କ ଖାସ ତଥା ପଂଡଶୀର ସୁରକ୍ଷା ବାହିନୀର ପ୍ରମ୍ମୁଖ କମାଣ୍ଡର ସାଲେହ ମହମ୍ମଦ ରେଗିସ୍ତାନୀଙ୍କ ମୃତ୍ୟୁ ହୋଇଛି।

ତାଲିବାନକୁ ସାହାଯ୍ୟ କରିବା ପାଇଁ ପାକିସ୍ତାନ ସିଏଚ୍-୪ ଡ୍ରୋନ୍ ପଂଜଶୀର ଉପରେ ଆକ୍ରମଣ କରିଥିଲା। ଏହି ଡ୍ରୋନରୁ ଅମରୁଲ୍ଲା ସାଲେହ ରହୁଥିବା ଘର ଉପରେ ମଧ୍ୟ ଆକ୍ରମଣ ହୋଇଥିଲା। ତେବେ ସାଲେହ ସୁରକ୍ଷିତ ଭାବେ ତାଜିକସ୍ତାନ ପଳାୟନ କରିଛନ୍ତି। ଏଣେ ଅହମ୍ମଦ ଶାହା ମସୁଦଙ୍କ ପୁଅ ଅହମ୍ମଦ ମାସୁଦ ଏବେ ମଧ୍ୟ ପଂଜଶୀରରେ ଲୁଚିଥିବା କୁହାଯାଉଛି।

ଅନ୍ୟପକ୍ଷରେ ପଂଜଶୀର ଉପରେ ପାକିସ୍ତାନୀ ଡ୍ରୋନ୍ ଆକ୍ରମଣକୁ ନେଇ ଇରାନ ଉତକ୍ଷିପ୍ତ ହୋଇଛି । ଇରାନ ପାକିସ୍ତାନକୁ ପୁନଃ ଏଭଳି ନକରିବାକୁ ଧମକ ଦେଇଛି । ଇରାନ ଏହି ଆକ୍ରମଣକୁ ନିନ୍ଦା କରି କହିଛି ଯେ, ରବିବାର ରାତିରେ ଯେଉଁ ଆକ୍ରମଣ ହୋଇଛି ଆମେ ତାକୁ ନିନ୍ଦା କରୁଛୁ । ଆମେ ମଧ୍ୟ ଏହି ଆକ୍ରମଣରେ ପ୍ରାଣ ହରାଇଥିବା ନେତାଙ୍କ ପ୍ରତି ଶ୍ରଦ୍ଧାଞ୍ଜଳୀ ଜଣାଇଛି।

ତାଲିବାନ ମଧ୍ୟରେ କ୍ଷମତା ଭାଗବଣ୍ଟା ଛିଡି ପାରୁନଥିବା ବେଳେ ପାକିସ୍ତାନ ତାଲିବାନ ନେତାଙ୍କ ମଧ୍ୟରେ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ କରୁଛି । ସୂଚନାଯୋଗ୍ୟ ଯେ, ପାକିସ୍ତାନର ଆର୍ଥିକ ଓ ସାମରିକ ସହଯୋଗରେ ଜନ୍ମ ନେଇଥିବା ତାଲିବାନ ଭିତରେ ଗୋଟିଏ ଗୋଷ୍ଠୀ ଆଇଏସଆଇର ଅଧିକ ହସ୍ତକ୍ଷେପକୁ ପସନ୍ଦ କରୁନାହାନ୍ତି । ପାକିସ୍ତାନ ତାଲିବାନର ହକ୍କାନୀ ନେଟୱର୍କକୁ ସମର୍ଥନ କରୁଥିବା ବେଳେ ତାଲିବାନ ପ୍ରତିଷ୍ଠାତା ମୁଲ୍ଲା ଓମାରର ପୁଅ ମୁଲ୍ଲା ୟାକୁବ ଓ ମୁଲ୍ଲା ବରାଦର ହକ୍କାନୀ ଗ୍ରୁପକୁ ଅଧିକ ମହତ୍ୱ ଦେବାକୁ ଚାହୁଁନାହାନ୍ତି । ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ତିକ୍ତତା ସୃଷ୍ଟି ହୋଇଛି । କୁହାଯାଉଛି ଯେ, ହକ୍କାନୀ ଗ୍ରୁପର ଆକ୍ରମଣରେ ମୁଲ୍ଲା ବରଦାର ଆହତ ହୋଇଛି ।

ଆଜିଠୁ ଓଜେଇଇ ପ୍ରବେଶିକା ପରୀକ୍ଷା, ୩୦ ଜିଲ୍ଲାରେ ପରୀକ୍ଷା କେନ୍ଦ୍ର

ଭୁବନେଶ୍ୱର: ଆଜିଠୁ ଓଜେଇଇ ପ୍ରବେଶିକା ପରୀକ୍ଷା । ପରୀକ୍ଷା ସମ୍ପୂର୍ଣ୍ଣ ସିବିଟି ବା କମ୍ପ୍ୟୁଟର ବେସ୍‌ଡ ମୋଡ୍‌ରେ ହେଉଛି । ଆସନ୍ତା ୧୮ ତାରିଖ ପର୍ଯ୍ୟନ୍ତ ହେବ ଏହି ଓଡିଶା ଯୁଗ୍ମ ପ୍ରବେଶିକା ପରୀକ୍ଷା। ପ୍ରଥମ ଦିନରେ ବି. ଫାର୍ମା ପରୀକ୍ଷା ହେଉଛି । ୩ଟି ସିଫ୍ଟ ରେ ପରୀକ୍ଷା କରାଯାଉଛି । ରାଜ୍ୟରେ ଏଥିଲାଗି ୫୭ଟି କେନ୍ଦ୍ର ଓ ରାଜ୍ୟ ବାହାରେ ୩ଟି ଭାବେ ମୋଟ ୬୦ ଟି ପରୀକ୍ଷା କେନ୍ଦ୍ର ହୋଇଛି। ପରୀକ୍ଷା ଲାଗି ୫୫ ହଜାରରୁ ଉର୍ଦ୍ଧ୍ବ ଛାତ୍ରଛାତ୍ରୀ ଆବେଦନ କରିଛନ୍ତି । ତେବେ ଏଥର ପ୍ରଥମ ଥର ଲାଗି ରାଜ୍ୟର ସମସ୍ତ ୩୦ ଜିଲ୍ଲାରେ ପରୀକ୍ଷା କେନ୍ଦ୍ର ହୋଇଛି ।

ରାଜ୍ୟ ବାହାରେ ପାଟନା, ରାଂଚି ଓ କୋଲକାତାରେ ଗୋଟିଏ ଲେଖାଏଁ ପରୀକ୍ଷା କେନ୍ଦ୍ର ହୋଇଛି । କୋଭିଡ କଟକଣାକୁ ଦୃଷ୍ଟିରେ ରଖି ପରୀକ୍ଷାକୁ କଣ୍ଟାକ୍ଟ ଲେସ୍ କରାଯାଇଛି । ବିନା ପେନ୍ ପେପର୍‌ରେ କେବଳ ଅନଲାଇନ ମୋଡ୍‌ରେ ପରୀକ୍ଷା ହେଉଛି । କେନ୍ଦ୍ରରେ ସାମାଜିକ ଦୂରତା ସହ ମାସ୍କ ପରିଧାନ ଓ ଆବେଦନକାରୀ ନିଜସ୍ଵ ପାଣି ବୋତଲ ଆଣିବାକୁ କୁହାଯାଇଛି । ପ୍ରତି ସିଫ୍ଟ ପୂର୍ବରୁ ଓ ପରେ ବିଶୋଧନକୁ ଗୁରୁତ୍ଵ ଦିଆଯାଇଥିବା ବେଳେ ପ୍ରବେଶ ଓ ପ୍ରସ୍ଥାନ ପଥରେ ସ୍ବତନ୍ତ୍ର ବ୍ୟବସ୍ଥା କରାଯାଇଥିବା ଓଜେଇଇ ଅଧ୍ୟକ୍ଷ ସୁଦୀପ୍ କୁମାର ଚାନ୍ଦ ସୂଚନା ଦେଇଛନ୍ତି।

ପଞ୍ଜଶୀରରେ ଉଡିଲା ତାଲିବାନୀ ପତାକା, ସମ୍ପୂର୍ଣ୍ଣ କବଳିତ କରିଥିବା ଦାବି

କାବୁଲ: ଦୀର୍ଘ ଦିନର ବିଦ୍ରୋହ ଏବଂ ସଂଘର୍ଷ ପରେ ତାଲିବାନ ହାତକୁ ଚାଲିଯାଇଛି ପଞ୍ଜଶୀର । କିଛି ଦିନର ଲଢେଇ ପରେ ପରାଜୟ ବରଣ କରିଛନ୍ତି ବିଦ୍ରୋହୀ । ପଞ୍ଜଶୀର ଗଭର୍ଣ୍ଣର କାର୍ଯ୍ୟାଳୟ ସମେତ ଅନ୍ୟାନ୍ୟ ସ୍ଥାନରେ ଉଡିଛି ତାଲିବାନୀ ପତାକା । ତାଲିବାନ ମୁଖପାତ୍ର ଜୁବିଉଲ୍ଲା ମୁଜାହିଦ୍ଦ କହିଛନ୍ତି ପଞ୍ଜଶୀର ଏବେ ତାଲିବାନ କବଳକୁ ଯାଇଛି । ସଂଘର୍ଷରେ ବିଦ୍ରୋହୀ ବାହିନୀର ମୁଖ୍ୟ କମାଣ୍ଡର ସାଲେହ ମହମ୍ମଦଙ୍କ ମୃତ୍ୟୁ ଘଟିଛି । ଅନେକ ବିଦ୍ରୋହୀ ଏବେ ପଞ୍ଜଶୀର ଛାଡି ଚାଲିଯିବା ପରିଲକ୍ଷିତ ହୋଇଛି ।

ଏହି ସଂଘର୍ଷରେ ତାଲିବାନକୁ ସମ୍ପୂର୍ଣ୍ଣ ସମର୍ଥନ ଦେଇଛି ପାକିସ୍ତାନ । ବିଦ୍ରୋହୀଙ୍କ ବିଭିନ୍ନ ଘାଟି ଉପରେ ପାକିସ୍ତାନ ବାୟୁସେନା ବିମାନ ପକ୍ଷରୁ ବୋମା ବର୍ଷଣ କରାଯାଇଛି । ଶାନ୍ତିପୂର୍ଣ୍ଣ ଆଲୋଚନାକୁ ଆସିବା ଲାଗି ତାଲିବାନକୁ ଆହ୍ବାନ ଦେଇଥିଲା ପଞ୍ଜଶୀର ବିଦ୍ରୋହୀ ବାହିନୀ । ସହମତି ଭିତ୍ତିରେ ଏହି ସଂଘର୍ଷର ଅବସାନ ଲାଗି ସଂଗଠନ ତାଲିବାନକୁ ପ୍ରସ୍ତାବ ଦେଇଥିଲେ ବିଦ୍ରୋହୀ ନେତା । ମାତ୍ର ଘମାଘୋଟ ଲଢେଇରେ ପଞ୍ଜଶୀରକୁ କବଜାକୁ ନେଇଛନ୍ତି ତାଲିବାନ ।

ସେପଟେ ତାଲିବାନ ସହ ସଂଘର୍ଷରେ ଅହମ୍ମଦ ମାସୁଦଙ୍କ ଘନିଷ୍ଠ ସହଯୋଗୀ, ବରିଷ୍ଠ ସାମ୍ବାଦିକ, ରାଜନୀତିଜ୍ଞ ତଥା ମୁଖପାତ୍ର ଫହିମ ଦାସ୍ତିଙ୍କ ମୃତ୍ୟୁ ଘଟିଛି । ଏହାସହ ଜେନରାଲ ସାହିବ ଅବଦୁଲ ଓ୍ବାଦୁଦ ଝୋର ମଧ୍ୟ ସଂଘର୍ଷରେ ପ୍ରାଣ ହରାଇଛନ୍ତି । ଗତକାଲି 700ରୁ ଅଧିକ ତାଲିବାନୀଙ୍କୁ ବିଦ୍ରୋହୀମାନେ ହତ୍ୟା କରିବା ପରେ ଯୁଦ୍ଧ ଅଧିକ ଘନୀଭୂତ ହୋଇଥିଲା ଏବଂ ତାଲିବାନୀମାନେ ଅଧିକ ସୈନ୍ୟ ସହ ଲଢେଇ ଜାରି ରଖିଥିଲେ । ସେପଟେ ଯୁଦ୍ଧରେ ତାଲିବାନକୁ ଖୋଲାଖୋଲି ସମର୍ଥନ ଦେଇଥିଲା ପାକିସ୍ତାନ । ପଞ୍ଜଶୀରକୁ କବଜା କରିବା ଲାଗି ପାକିସ୍ତାନ ପକ୍ଷରୁ ତାଲିବାନକୁ ସୈନ୍ୟ, ଅସ୍ତ୍ରଶସ୍ତ୍ର ଆଦି ସହାୟତା ଦିଆଯାଉଛି ।

ବ୍ୟବସାୟୀଙ୍କୁ ଅପହରଣ ଓ ନିର୍ଯାତନା ଘଟଣା: ମୁଖ୍ୟ ଅଭିଯୁକ୍ତ ୱେବ୍ ପୋର୍ଟାଲ ସିଇଓ ଗିରଫ

ଭୁବନେଶ୍ୱର: ଜଣେ ବ୍ୟବସାୟୀଙ୍କୁ ସାମ୍ବାଦିକ ଅପହରଣ କରିନେବା ଘଟଣାରେ ଗିରଫ ହେଲେ ମୁଖ୍ୟ ଅଭିଯୁକ୍ତ ତଥା ଉକ୍ତ ୱେବ ପୋର୍ଟାଲର ସିଇଓ  । ୱେବ ପୋର୍ଟାଲ ସିଇଓଙ୍କୁ ଓଡିଶା ପୋଲିସର ଏକ ଟିମ କୋଲକାତାରୁ ଗିରଫ କରିବାରେ ସଫଳ ହୋଇଛି । ମିଳିଥିବା ସୂଚନା ମୁତାବକ ୱେବ ପୋର୍ଟାଲ ଲାଇଭ କଳିଙ୍ଗ ସିଓଓ ତଥା ମୁଖ୍ୟ ଅଭିଯୁକ୍ତ ହେଉଛି ରଘୁନାଥ ଓରଫ ରାଜା ।

ଜଣେ ବ୍ୟବସାୟୀଙ୍କୁ ଉକ୍ତ ସଂସ୍ଥାର କିଛି ସାମ୍ବାଦିକ ଅପହରଣ କରିନେଇଥିବା ଥାନାରେ ଅଭିଯୋଗ ହୋଇଥିଲା  । ପରବର୍ତ୍ତୀ ସମୟରେ ଅଭିଯୁକ୍ତ ମାନେ  ବ୍ୟବସାୟୀ ପୂର୍ଣଚନ୍ଦ୍ର ସ୍ୱାଇଁକୁ ଅପହରଣ କରି ନିର୍ଯାତନା ଦେବା ନେଇ ଅଭିଯୋଗ ହୋଇଥିଲା । ମୁଣ୍ଡ ବନ୍ଧକ ରଖି ଟଙ୍କା ମଧ୍ୟ ମାଗୁଥିଲେ  ।  ପୂର୍ବରୁ ଏହି ଘଟଣାରେ ୱେବ ପୋର୍ଟଲର ମହିଳା ସ୍ବାମ୍ବାଦିକାଙ୍କ ସମେତ 5 ଜଣଙ୍କୁ ଗିରଫ କରିଥିଲା ପୋଲିସ ।

ଅଦାଲତ ରାୟକୁ ସମ୍ମାନ ଦେଉନି କେନ୍ଦ୍ର, ଟ୍ରିବ୍ୟୁନାଲ ଆକ୍ଟକୁ ନେଇ ସୁପ୍ରିମକୋର୍ଟଙ୍କ କେନ୍ଦ୍ରକୁ ଚେତାବନୀ

ନୂଆଦିଲ୍ଲୀ: ସୋମବାର ଦିନ କେନ୍ଦ୍ର ସରକାରଙ୍କ ଆଚରଣକୁ ନେଇ ସୁପ୍ରିମକୋର୍ଟ କଟୁ ଟିପ୍ପଣୀ କରିଛନ୍ତି । ସର୍ବୋଚ୍ଚ ଅଦାଲତ କହିଛନ୍ତି ଯେ, କେନ୍ଦ୍ର ସରକାର ଅଦାଲତ ଦେଉଥିବା  ଆଦେଶକୁ ସମ୍ମାନ ଦେଉ ନାହାନ୍ତି । ସରକାରଙ୍କୁ ଚେତାବନୀ ଦେଇ ସୁପ୍ରିମକୋର୍ଟ କହିଛନ୍ତି ଯେ, ସରକାର ଆମ ଧୈର୍ଯ୍ୟର ପରୀକ୍ଷା ନିଅନ୍ତୁ ନାହିଁ । ପ୍ରଧାନ ବିଚାରପତି ଏନଭି ରମନ୍ନା,ଜଷ୍ଟିସ ଡି ୱାଇ ଚନ୍ଦ୍ରଚୁଡ ଓ ଜଷ୍ଟିସ ଏଲ ନାଗେଶ୍ୱର ରାଓଙ୍କୁ ନେଇ ଗଠିତ ସ୍ୱତନ୍ତ୍ର ବେଞ୍ଚ ସଲିସିଟର ଜେନରାଲ ତୁଷାର ମେହତାଙ୍କୁ ଭର୍ତ୍ସନା କରିଛନ୍ତି ।

ଖାଲି ପଡିଥିବା ଟ୍ରିବ୍ୟୁନାଲ ପଦବୀ ପୁରଣରେ ବିଳମ୍ବ ଓ ଟ୍ରିବ୍ୟୁନାଲ ସଂସ୍କାର ଆକ୍ଟ ପାସ୍ କରିବାକୁ ନେଇ ସୁପ୍ରିମ କୋର୍ଟ ଅସନ୍ତୋଷ ବ୍ୟକ୍ତ କରି  କେନ୍ଦ୍ରକୁ ଚେତାବନୀ ଦେଇଛନ୍ତି । ପ୍ରଧାନବିଚାରପତି ଏନଭି ରମନ୍ନା ସଲିସିଟର ଜେନରାଲଙ୍କୁ ପଚାରିଥିଲେ ଯେ, ଗତଥର ମଧ୍ୟ ଆମେ ଆପଣଙ୍କୁ ଟ୍ରିବ୍ୟୁନାଲରେ କେତେ ପଦବୀ ପୁରଣ ହୋଇଛି ସେସମ୍ପର୍କରେ ସୂଚନା ଦେବାକୁ କହିଥିଲୁ । ଏବେ ଆମକୁ କୁହନ୍ତୁ ଯେ, କେତେ ପଦବୀ ପୁରଣ ହୋଇଛି ।

ଟ୍ରିବ୍ୟୁନାଲ ସୁଧାର ଆକ୍ଟ ଓ ଟ୍ରିବ୍ୟୁନାଲରେ ନିଯୁକ୍ତିରେ ହେଉଥିବା ବିଳମ୍ବକୁ ନେଇ ସୁପ୍ରିମକୋର୍ଟ କେନ୍ଦ୍ର ଉପରେ ବର୍ଷିଥିଲେ । ତେବେ ଏହି ମାମଲାର ଶୁଣାଣିକୁ ଏକ ସପ୍ତାହ ପାଇଁ ଘୁଞ୍ଚାଇ ଦେଇ ସୁପ୍ରିମକୋର୍ଟ କେନ୍ଦ୍ରକୁ ଅଦାଲତ ଅବମାନନାର କାର୍ଯ୍ୟନୁଷ୍ଠାନ ଧମକ ଦେଇଛନ୍ତି ।

ଓଡ଼ିଶାକୁ କେବେ ମିଳିବ ଦ୍ୱିତୀୟ ଏମସ ? ‘କେନ୍ଦ୍ର ନକଲେ ନିଜ ଦମରେ ରାଜ୍ୟ କରିବ ମେଡିକାଲ କଲେଜ’

ଭୁବନେଶ୍ୱର: ପଶ୍ଚିମ ଓଡ଼ିଶାରେ ଆବଶ୍ୟକତା ରହିଛି ଆଉ ଏକ ଏମସ୍ ଅର୍ଥାତ ଦ୍ୱିତୀୟ ଏମସ୍  । ରାଜ୍ୟ ସରକାର ବାରମ୍ବାର ଦାବି ଜଣାଇଲେ, କେନ୍ଦ୍ର ସରକାର ମଧ୍ୟ ଏନେଇ ଏକ ସ୍ୱତନ୍ତ୍ର ପ୍ରତିନିଧି ଟିମ ଆସି କ୍ଷେତ୍ର ପରିଦର୍ଶନ କରି ଫେରିଛନ୍ତି  । କିନ୍ତୁ ନା ଅଛି ପ୍ରତିକ୍ରିୟା ନା କୌଣସି ସୂଚନା  ? ତେଣୁ ଓଡ଼ିଶାରେ ଦ୍ୱିତୀୟ ଏମସ୍ ନିର୍ମାଣ ହେବା ନେଇ ଏବେ ମଧ୍ୟ ଅନିଶ୍ଚିତତାରେ ରାଜ୍ୟ ସରକାର  । ଏନେଇ ବିଧାନସଭାରେ ଉଠିଲା କେନ୍ଦ୍ରର ନିଷ୍କ୍ରିୟତା ପ୍ରସଙ୍ଗ । ଓଡ଼ିଶାରେ ଦ୍ବିତୀୟ ଏମସ ନିର୍ମାଣ ନେଇ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ଘୋଷଣା କରି କୌଣସି ପଦକ୍ଷେପ ନେଉନାହାଁନ୍ତି  ।

ପ୍ରକଳ୍ପ ଆରମ୍ଭ ହେବାକୁ କେନ୍ଦ୍ରକୁ ରାଜ୍ୟ ବାରମ୍ବାର ଦାବି ଜଣାଉଥିଲେ ମଧ୍ୟ କେନ୍ଦ୍ର ଭଣ୍ଡେଇ ଚାଲିଛି । ରାଜ୍ୟ ସରକାର ୨ଶହ ଏକର ଜମି ଏବଂ ଡିଏମ୍ଏଫ୍ ଫଣ୍ଡରୁ ଟଙ୍କା ଓ ସମସ୍ତ ସାହାଯ୍ୟ ସହଯୋଗ ଯୋଗାଇ ଦେବାର ପ୍ରତିଶ୍ରୁତି ଦେଇଥିଲେ ମଧ୍ୟ କେନ୍ଦ୍ର ସରକାର ଦ୍ବିତୀୟ ଏମ୍ସ କରିବେ କି ନାହିଁ  ସ୍ପଷ୍ଟ ସୂଚନା ଦେଉ ନାହାଁନ୍ତି । ଗତ ଏପ୍ରିଲ ମାସରେ ଏକ କେନ୍ଦ୍ରୀୟ ପ୍ରତିନିଧି ଦଳ ଭୁବନେଶ୍ବର ଏମ୍ସ ନିର୍ଦ୍ଦେଶକଙ୍କ ସହ କ୍ଷେତ୍ର ପରିଦର୍ଶନ କରି ଭିତ୍ତିଭୂମି ମଧ୍ୟ ଦେଖିଥିଲେ । ହେଲେ କେନ୍ଦ୍ର ଏ ଦିଗରେ ପାଦେ ବି ଆଗେଇନି ।

ସେପଟେ କେନ୍ଦ୍ର ସରକାର ଯଦି ଦ୍ୱିତୀୟ ଏମସ ନିର୍ମାଣ ନକରନ୍ତି ତେବେ ରାଜ୍ୟ ସରକାର ନିଜ ଦମରେ ମେଡିକାଲ କଲେଜ କରିବେ ବୋଲି ଘୋଷଣା କରିଛନ୍ତି ସ୍ୱାସ୍ଥ୍ୟ ମନ୍ତ୍ରୀ  ନବକିଶୋର ଦାସ  । ଆସନ୍ତା ବର୍ଷ ସୁନ୍ଦରଗଡ଼ରେ କାର୍ଯ୍ୟକାରୀ ହେବ ମେଡିକାଲ କଲେଜ । ଗୃହରେ ସ୍ୱାସ୍ଥ୍ୟମନ୍ତ୍ରୀ ନବ ଦାସ ଏହି ସୂଚନା ଦେଇଛନ୍ତି । ୧୦୦ ସିଟ୍ ଓ ୫୦୦ ଶଯ୍ୟା ବିଶିଷ୍ଟ ମେଡିକାଲ କଲେଜ କାମ ଆରମ୍ଭ ହୋଇଛି । ଏଥିରେ ୨୭୧ଜଣ ଟିଚିଙ୍ଗ୍ ଓ ନନ୍-ଟିଚିଙ୍ଗ୍ ଷ୍ଟାଫ ରହିବେ । NTPCର ସହଭାଗିତାରେ ମେଡିକାଲ କଲେଜ ହେଉଛି । ଆସନ୍ତା ୨୦୨୨-୨୩ ଶିକ୍ଷା ବର୍ଷରୁ ଆଡମିଶନ ପାଇଁ ପଦକ୍ଷେପ ନିଆଯିବ ବୋଲି ଗୃହରେ ସୂଚନା ଦେଇଛନ୍ତି ସ୍ୱାସ୍ଥ୍ୟମନ୍ତ୍ରୀ  ।

ଭାଙ୍ଗୁଛି କଂଗ୍ରେସ ଗଡ଼, ବିଜେଡ଼ିରେ ସାମିଲ ହେଲେ ଶତାଧିକ କର୍ମୀ

କଳାହାଣ୍ଡି: ଶକ୍ତିଶାଳୀ ହେଉଛି ବିଜେଡ଼ି ଦୁର୍ଗ । କଳାହାଣ୍ଡିରେ ବଳ ବଢାଉଛି ବିଜୁ ଜନତା ଦଳ  ।  ଦୁର୍ଗମ ଅଞ୍ଚଳ ଥୁଆମୂଳ ରାମପୁରରେ ଭାଙ୍ଗିଛି କଂଗ୍ରେସ ଗଡ଼ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ସୁଶାସନ ଓ ଆଦର୍ଶରେ ଅନୁପ୍ରାଣିତ ହୋଇ ଶତାଧିକ କଂଗ୍ରେସ କାର୍ଯ୍ୟକର୍ତ୍ତା ବିଜେଡିରେ ଯୋଗଦାନ କରିଛନ୍ତି । ଭୁବନେଶ୍ୱରରେ ଆଜି ଅନୁଷ୍ଠିତ ଏହି ମିଶ୍ରଣ ପର୍ବରେ ଲାଞ୍ଜିଗଡ ବିଧାୟକ ପ୍ରଦୀପ କୁମାର ଦିଶାରୀ, ବିଜେଡି ରାଜ୍ୟ ସାଙ୍ଗଠାନିକ ସମ୍ପାଦକ ପ୍ରଣବ ପ୍ରକାଶ ଦାସ ଉପସ୍ଥିତ ରହିଥିଲେ  ।

ସେହିପରି କଳାହାଣ୍ଡି ଜିଲ୍ଲା ସଭାପତି ପୁଷ୍ପେନ୍ଦ୍ର ସିଂହଦେଓ,  ଗୃହ ରାଷ୍ଟ୍ର ମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର ପ୍ରମୁଖ ଉପସ୍ଥିତ ରହିଥିଲେ  । ଦୀର୍ଘଦିନରୁ କଂଗ୍ରେସରେ ଥିବା ଶତାଧିକ କାର୍ଯ୍ୟକର୍ତ୍ତା ଦଳ ଉପରେ ଭରସା ହରାଇ ବିଜେଡ଼ିରେ ସାମିଲ ହୋଇଛନ୍ତି  । ଜିଲ୍ଲା ଏବଂ ରାଜ୍ୟ ନେତୃତ୍ୱ ସେମାନଙ୍କ ଦାବି, ସମସ୍ୟା ଏବଂ ତୃଣମୂଳ ସ୍ତରରେ ଦଳର କାର୍ଯ୍ୟକର୍ତ୍ତାଙ୍କ ପାଖେ ପହଁଛୁନଥିବା ଅଭିଯୋଗ କରିଛନ୍ତି  ।

ବିଜୁ ଜନତା ଦଳର କାର୍ଯ୍ୟ, ନୀତି ଏବଂ ଆଦର୍ଶକୁ ଅନୁପାଳନ କରିବା ସହ ମୁଖ୍ୟମନ୍ତ୍ରୀଙ୍କ ବିକାଶ ପକ୍ରିୟାରେ ନିଜକୁ ସାମିଲ କରିବାର ସକଳ୍ପ ନେଇ ଶତାଧିକ କଂଗ୍ରେସ କାର୍ଯ୍ୟକର୍ତ୍ତା ଦଳ ପରିତ୍ୟାଗ କରିଛନ୍ତି ଏବଂ ବିଜୁ ଜନତା ଦଳରେ ସାମିଲ ହୋଇଛନ୍ତି  ।

ପାରିବାରିକ କଳହର କରୁଣ ପରିଣତି, ଶଶ୍ୱୁର ଘରେ ସ୍ତ୍ରୀକୁ ହତ୍ୟା କରି ସ୍ୱାମୀ ଫେରାର

ବଲାଙ୍ଗୀର: ଲୋଇସିଂହା ଥାନା ଫଟାମୁଣ୍ଡା ଗାଁରେ ଅଘଟଣ । ପାରିବାରିକ କଳହରୁ ଶ୍ୱଶୁର ଘରେ ସ୍ତ୍ରୀଙ୍କୁ ତଣ୍ଟି ଚିପି ହତ୍ୟାକଲା ସ୍ୱାମୀ । ନିଶାଶକ୍ତ ଅବସ୍ଥାରେ ସ୍ୱାମୀ ସ୍ତ୍ରୀର ତଣ୍ଟି ଚିପି ହତ୍ୟା କରି ଫେରାର ହୋଇଯାଇଛି  । ସ୍ୱାମୀର ଏପରି ନୃଶଂସ କାର୍ଯ୍ୟରେ ସମଗ୍ର ଅଞ୍ଚଳ ଆଶ୍ଚର୍ଯ୍ୟ ଚକିତ ହୋଇଛି ।  ମିଳିଥିବା ସୂଚନା ମୁତବାକ ମୃତ ମହିଳାଙ୍କ ନାଁ ହେଉଛି କସ୍ତୁରୀ ସାହୁ । ପାରିବାରିକ କଳହ ଯୋଗୁଁ ଗତ ୩/୪ ମାସ ତଳେ କସ୍ତୁରୀ ତାଙ୍କ ଦୁଇ ସନ୍ତାନକୁ ନେଇ ବାପା ଘର ଫଟାମୁଣ୍ଡକୁ ଚାଲିଆସିଥିଲେ ।

ବାପା ଘରେ କିଛି ଦିନ ରହିବା ପରେ ଗାଁରେ ଥିବା ଆଉ ଏକ ଛୋଟିଆ ଘରେ ରହୁଥିଲେ । ତେବେ ଗତ କାଲି ବିଳମ୍ବିତ ରାତିରେ ଅଭିଯୁକ୍ତ ସ୍ୱାମୀ ଗାନ୍ଧିଲାଲ ସାହୁ ତାଙ୍କ ଘରେ ପହଁଚି ହତ୍ୟା କସ୍ତୁରୀଙ୍କୁ ହତ୍ୟା କରି ଫୋରାର ହୋଇଯାଇଥିଲେ  । ଆଜି ସକାଳୁ କସ୍ତୁରୀଙ୍କ ପିଲା ମାନେ ଘର ଭିତରେ କାନ୍ଦୁଥିବା ବେଳେ ଗାଁ ଲୋକେ ପଚରାଉଚୁରା କରିଥିଲେ  । ଘଟଣା ସମ୍ପର୍କରେ ଜାଣିବା ପରେ  ଲୋଇସିଂହା ପୋଲିସକୁ ଖବର ଦେଇଥିଲେ ।  ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି  ।

ଖୋଲିବ ବୈଷୟିକ ଶିକ୍ଷାନୁଷ୍ଠାନ, ସବୁ ସେମିଷ୍ଟାର ପାଇଁ ଚାଲିବ କ୍ଲାସ

ଭୁବନେଶ୍ୱର: ଆଜିଠୁ ଖୋଲିବ ରାଜ୍ୟର ସମସ୍ତ ବୈଷୟିକ ଶିକ୍ଷାନୁଷ୍ଠାନ । ସବୁ ସେମିଷ୍ଟର ପାଇଁ କ୍ଲାସ ରୁମରେ ଶିକ୍ଷାଦାନ ଆରମ୍ଭ ହେବ । ବୈଷୟିକ ବିଶ୍ୱବିଦ୍ୟାଳୟ, ଇଞ୍ଜିନିୟରିଂ ଏବଂ ଧନ୍ଦାମୂଳକ କଲେଜ, ପଲିଟେକ୍‌ନିକ୍‌, ଡିପ୍ଲୋମା କଲେଜ, ଆଇଟିଆଇ କଲେଜର ଛାତ୍ରଛାତ୍ରୀମାନେ ଅଫଲାଇନ କ୍ଲାସରେ ଶିକ୍ଷାଗ୍ରହଣ କରିବେ । କ୍ଲାସ ରୁମରେ ଗହଳି କମାଇବାକୁ ବିଭିନ୍ନ ବ୍ୟାଚ କରି ଅଧିକ ସମୟ ଶିକ୍ଷା ଦାନ ଦିଆଯିବ ।

କଣ୍ଟେନମେଣ୍ଟ ଜୋନ୍‌ରେ ରହୁଥିବା ଛାତ୍ରଛାତ୍ରୀ, ବିଶ୍ୱବିଦ୍ୟାଳୟ ଓ କଲେଜ କର୍ମଚାରୀ ଅଫ୍‌ଲାଇନ୍‌ କ୍ଲାସରେ ଯୋଗ ଦେଇପାରିବେ ନାହିଁ । ସାମାଜିକ ଦୂରତା ସହ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଥିବା ବେଳେ ହ୍ୟାଣ୍ଡଓ୍ଵାସ୍‌ ଓ ସାନିଟାଇଜର ବ୍ୟବହାର କରିବା ପାଇଁ କୁହାଯାଇଛି । ସୋମବାର ଠାରୁ କ୍ଲାସ ଖୋଲିବା ନେଇ ବିଜ୍ଞପ୍ତି ପ୍ରକାଶ ପାଇଥିବାବେଳେ ରବିବାର ଠାରୁ  ଛାତ୍ରଛାତ୍ରୀଙ୍କ ପାଇଁ ସମସ୍ତ ହଷ୍ଟେଲ ଖୋଲାଯାଇଛି ।