spot_img
Home Blog Page 5340

ଭାଗ୍ୟର ବିଡ଼ମ୍ବନା, ଚଷମା ମରାମତି କରୁଛନ୍ତି ଫୁଟବଲ ଖେଳାଳି

0

ନୂଆଦିଲ୍ଲୀ:  ଭାରତୀୟ ଦଳର ପ୍ରତିନିଧିତ୍ୱ କରିବା, ଇଣ୍ଡିଆ କ୍ୟାମ୍ପରେ ଅଂଶଗ୍ରହଣ କରିବା ଏବଂ ସନ୍ତୋଷ ଟ୍ରଫି ସମେତ ଏକାଧିକ ପ୍ରତିଯୋଗୀତାରେ ସାନଦାର ପ୍ରଦର୍ଶନ କରିବା ପରେ ଯଦି ଜଣେ ଖେଳାଳି ନିଜ ପାଇଁ ଆଉ ନିଜ ପରିବାର ପ୍ରତିପୋଷଣ ପାଇଁ ସଂଘର୍ଷ ଜାରି ରଖେ, ତେବେ ଏହା କୌଣସି ଦୁର୍ଭାଗ୍ୟ ଠାରୁ କମ୍ ନୁହେଁ । ଏହି ଦୁର୍ଭାଗ୍ୟପୂର୍ଣ୍ଣ କାହାଣୀ ହେଉଛି ଗୁମଲାର ଫୁଟବଲର ଆସିଫ ଅଲ୍ଲିଙ୍କର । ଯିଏ ଆଜିକାଲି ଖେଳରେ ସକ୍ରିୟ ନାହାଁନ୍ତି ବରଂ ଚଷମା ମରାମତି କରୁଛନ୍ତି, କେବଳ ପରିବାର ମୁହଁରେ ଦୁଇ ଓଳି ଆହାର ଯୋଗାଇବା ପାଇଁ ।

ପିଲାଟି ଦିନରୁ ଫୁଟବଲ ଖେଳିବାର ନିଶା, ଆଉ ତା ସାଙ୍ଗକୁ ଭାରତୀୟ ଫୁଟବଲ ଦଳର ଜଣେ ଖେଳାଳି ହେବାକୁ ନେଇ ଅସୁମାରୀ ଆଶା । ଆଖିରେ ଆଖିଏ ସ୍ୱପ୍ନ ସଜେଇ ୨୦୦୬ରେ ଗୁମଲା ଡେ ବୋର୍ଡ଼ଂ ସେଣ୍ଟରର କୋଚ୍ ରିଜବାନ ଅଲ୍ଲିଙ୍କ ଠାରୁ ପ୍ରଶିକ୍ଷଣ ନେବା ଆରମ୍ଭ କଲେ ଆସିଫ୍ । ୨୦୦୭-୦୮ରେ ପ୍ରଥମ ଥର କୋଲକାତାରେ ଆୟୋଜିତ SGFI ବା ସ୍କୁଲ ଗେମ୍ସ ଫେଡେରେସନ ଅଫ୍ ଇଣ୍ଡିଆର ଜାତୀୟ ପ୍ରତିଯୋଗୀତାରେ ଭଲ ପ୍ରଦର୍ଶନ କରି ଦଳକୁ କାଂସ୍ୟ ପଦକ ଦେବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ଆସିଫ୍।

ଏହାପରେ ଅଲ ଇଣ୍ଡିଆ ଫୁଟବଲ ଫେଡେରେସନର ଅଣ୍ଡର ୧୩ ନ୍ୟାସନାଲ ଚାମ୍ପିଅନସିପରେ ନିଜର ପ୍ରତିଭା ଦେଖାଇଥିଲେ । ଯାହାପରେ ଭାରତୀୟ ଦଳରେ ତାଙ୍କୁ ଚୟନ କରାଗଲା । ଏହାପରେ ଅଭ୍ୟାସ ମ୍ୟାଚ୍ ପାଇଁ ୨୦୧୦ରେ ଇରାନ ଗଲେ ଆସିଫ୍ । ପରେ ଅଣ୍ଡର ୧୪ ଭାରତୀୟ ଦଳର କ୍ୟାମ୍ପ୍ ପାଇଁ ଚୟନ ହେଲେ ।

କିନ୍ତୁ କୁହାଯାଏ, ଭାଗ୍ୟର ବିଡ଼ମ୍ବନା କଥା କିଏ ବା କହିପାରିବ ? ଏତେ ଭଲ ପ୍ରଦର୍ଶନ କରି ଛାଡ଼ଖଣ୍ଡକୁ ଗର୍ବିତ କରିଥିବା ଆସିଫଙ୍କୁ ଏକ ଚାକିରି ମଧ୍ୟ ମିଳିଲା ନାହିଁ । ପରିବାରର ଆର୍ଥିକ ସ୍ଥିତି ମଧ୍ୟ କିଛି ଠିକ୍ ନଥିଲା । ଆସିଫଙ୍କ ବାପା ପେଶାରେ ଥିଲେ ଜଣେ ଶ୍ରମିକ । ପରିବାର ପ୍ରତିପୋଷଣରେ ସମସ୍ୟା ହେବାରୁ ଶେଷରେ ଭିନ୍ନ ରାସ୍ତା ବାଛିନେଲେ ଆସିଫ୍ । ପରିବାରର ବୋଝ ଯେତିକି ବଢ଼ିଲା ଖେଳପ୍ରତି ଆତ୍ମୀୟତା ସେତିକି କମିଲା । ଆଉ ଖେଳିବା ପରିବର୍ତ୍ତେ ଚଷମା ମରାମତି କଲେ ଏହି ଫୁଟବଲ ଖେଳାଳି । ଶେଷରେ ମହାମାରୀ କରୋନା ମଧ୍ୟ ଦାଉ ସାଜିଲା । ଲକଡାଉନ ପାଇଁ ପରିସ୍ଥିତି ଅଧିକ ଶୋଚନୀୟ ହୋଇପଡ଼ିଲା ।

ଗୁରୁତ୍ୱପୂର୍ଣ୍ଣ କଥା ହେଉଛି ଖେଳିବାର ଇଛା ଥିଲେ ମଧ୍ୟ ଆର୍ଥିକ ସ୍ଥିତି ତାଙ୍କୁ ବାଧ୍ୟ କରିଛି ନିଜ ସ୍ୱପ୍ନରୁ ଦୂରେଇ ରହିବା ପାଇଁ ।

ଲବଲିନାଙ୍କ ଗ୍ଲୋଭ୍ସ ପାଇଁ ୧.୯ କୋଟି ଏବଂ ନୀରଜଙ୍କ ଜାଭେଲିନ ପାଇଁ ୧.୬ କୋଟି

0

ନୂଆଦିଲ୍ଲୀ: ଶୁକ୍ରବାର  ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ତାଙ୍କ ଜନ୍ମଦିନ ଉପଲକ୍ଷେ ସ୍ମୃତି ସ୍ୱରୂପ ଉପହାର ଦିଆଯାଇଥିବା ଇ-ନିଲାମୀକୁ ଜବରଦସ୍ତ ପ୍ରତିକ୍ରିୟା ମିଳିଛି । ପ୍ରଥମ ଦିନରେ ୧୦ କୋଟିଟଙ୍କାରୁ ଅଧିକର ନିଲାମି ଡକାଯାଇଛି । ନିଲାମୀର ପ୍ରଥମ ଦିନରେ ଯେଉଁଭଳି ଭାବେ  ୧୦ କୋଟି ପର୍ଯ୍ୟନ୍ତ ନିଲାମୀ ଡକାଯାଇଛି ତାହା ଆଗାମୀ ୧୯ ଦିନରେ ଅଧିକ ବଢିବ ବୋଲି ଆଶା କରାଯାଉଛି ।

ନିକଟରେ ଜନ୍ମଦିନ ଉପଲକ୍ଷେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଅଲମ୍ପିକ୍ସ ପଦକ ବିଜେତା ନିଜ ବ୍ୟବହୃତ କ୍ରୀଡା ସାମଗ୍ରୀ ଉପହାର ଭାବେ ଦେଇଥିଲେ । ଯାହାର ନିଲାମ ଡକାଯାଇଛି । ପ୍ରଥମ ଦିନରେ ୧୧ଟି ସାମଗ୍ରୀର ନିଲାମୀ ଡକା ଯାଇଥିଲା । ଯାହା ମଧ୍ୟରୁ  ମହିଳା ବକ୍ସର ଲବଲିନା ବୋର୍ଗଫେନଙ୍କ ଅଲମ୍ପିକ୍ କାଂସ୍ୟ ବିଜେତା ଗ୍ଲୋଭ୍ସ ଦୁଇଟି ପ୍ରତି ଅଧିକ ଆଗ୍ରହ ପରିଲକ୍ଷିତ ହୋଇଥିଲା । ଗ୍ଲୋଭସର ବେସ୍ ପ୍ରାଇସ୍ ୮୦ ଲକ୍ଷ ଧାର୍ଯ୍ୟ ହୋଇଥିବା ବେଳେ ଶୁକ୍ରବାର ସଂନ୍ଧ୍ୟା ସୁଦ୍ଧା ସର୍ବାଧିକ ୧.୯୨ କୋଟି ଟଙ୍କାରେ ବୋଲି ଲଗାଯାଇଛି । ଏହାପରେ ସବୁଠାରୁ ଅଧିକ ବୋଲି ଲାଗିଥିଲା ନୀରଜ ଚୋପ୍ରାଙ୍କ ସ୍ୱର୍ଣ୍ଣ ପଦକ ହାସଲ କରିଥିବା ଜାଭେଲିନ୍ ।  । ନିଲାମି ପାଇଁ ଏହାର ବେସ୍ ପ୍ରାଇସ୍ ୧ କୋଟି ଟଙ୍କା ଧାର୍ଯ୍ୟ ହୋଇଥିବାବେଳେ ଶୁକ୍ରବାର ସୁଦ୍ଧା ୧.୫୫ କୋଟି ପର୍ଯ୍ୟନ୍ତ ବୋଲି ଲଗାଯାଇଛି ।

ପାରା ଅଲମ୍ପିକ୍ ବିଶ୍ୱ ବିଜେତା  ସୁମିତ ଏଣ୍ଟିଲଙ୍କ ଜାଭେଲିନ୍ ବୋଲିର ଧାର୍ଯ୍ୟ ମୂଲ୍ୟ ଥିଲା ୧ କୋଟି । ଯାହା ନିରଜ ଚୋପ୍ରାଙ୍କ ଜାଭେଲିନ ବୋଲି ମୂଲ୍ୟର ପ୍ରାୟ ପାଖାପାଖି ରହିଛି । ଏହାପରେ ସର୍ବାଧିକ ବୋଲି ରହିଛି ମହିଳା ହକି ଦଳର କ୍ୟାପଟେନ ରାନୀଙ୍କ ଷ୍ଟିକ୍ । ଯାହାର ମୂଲ୍ୟ  ୮୦ ଲକ୍ଷ ଧାର୍ଯ୍ୟ ହୋଇଥିଲା , କିନ୍ତୁ ଶୁକ୍ରବାର ସଂନ୍ଧ୍ୟା ସୁଦ୍ଧା ମାତ୍ର ଗୋଟିଏ ଦିନରେ ୧ କୋଟି ୧୦୦ ଟଙ୍କା ବୋଲି ଡକା ଯାଇଥିଲା । ତେବେ ଏହି ସମସ୍ତ ଆୟ ନମାମି ଗାଙ୍ଗେ ପ୍ରକଳ୍ପକୁ ଯିବ ।

ସମାଜର ପୂର୍ବତନ ସମ୍ପାଦିକା ମନୋରମା ମହାପାତ୍ରଙ୍କ ଦେହାନ୍ତ

କଟକ: ଆଖି ବୁଜିଛନ୍ତି ମନୋରମା ମହାପାତ୍ର । ସମାଜର ପୂର୍ବତନ ସମ୍ପାଦିକା ମନୋରମାଙ୍କ ୮୭ ବର୍ଷ ବୟସରେ ପରଲୋକ ହୋଇଛି । କଟକ ଏସସିବିରେ ଚିକିତ୍ସାଧିନ ଅବସ୍ଥାରେ ମନୋରମାଙ୍କ ଦେହାନ୍ତ ଘଟିଛି । ସାମ୍ବାଦିକା, ଲେଖିକା, ସମାଜସେବୀ ଭାବେ ବେଶ୍ ଖ୍ୟାତି ଅର୍ଜନ କରିଥିବା ମନୋରମା ୧୯୩୪ ଜୁନ୍ ୧୦ ତାରିଖରେ ଜନ୍ମ ହୋଇଥିଲେ । ସ୍ୱାଧୀନତା ସଂଗ୍ରାମ ସମୟରେ ଯୁବାବସ୍ଥା ଅତିବାହିତ କରିଥିଲେ ମନୋରମା । ତାଙ୍କ ବାପା ଡକ୍ଟର ରାଧାନାଥ ରଥ ଥିଲେ ଜଣେ ସ୍ୱାଧୀନତା ସଂଗ୍ରାମୀ ।

Ex-Editor Of Odia Daily Samaj Manorama Mohapatra Passes Away 

ସେ ରେଭେନ୍ସା କଲେଜ ଏବେର ବିଶ୍ୱବିଦ୍ୟାଳୟରେ ଅର୍ଥନୀତିର ଅଧ୍ୟାପକ ଭାବେ କାର୍ଯ୍ୟ କରିଥିଲେ । ୪୦ରୁ ଅଧିକ ବହି ଲେଖିଥିବା ବେଳେ ଏକାଧିକ ବହି ଅନ୍ୟ ଭାରତୀୟ ଭାଷାରେ ଅନୁବାଦିତ ହୋଇଛି । ଏକାଧିକ ଥର ସେ ପୁରସ୍କୃତ ହୋଇଛି । ତାଙ୍କ ଲିଖିତ ଗଦ୍ୟ ଓ ପଦ୍ୟ ପୁସ୍ତକରେ ସମୟ ଓ ସମାଜର କଥା ବର୍ଣ୍ଣିତ । ତାଙ୍କ ଲିଖିତ ପ୍ରଥମ ପୁସ୍ତକ ହେଉଛି ‘ଜୁଆର ଯେଉଁଠି ଉଠେ’ ।

Ex-Editor Of Odia Daily Samaj Manorama Mohapatra Passes Away 

୧୯୭୬ରେ ସେ ସାହିତ୍ୟ ପାଇଁ ଝଙ୍କାର ସମ୍ମାନ ପାଇଥିଲେ । ୧୯୮୪ରେ ତାଙ୍କୁ ସାହିତ୍ୟ ଏକାଡେମୀ ପୁରସ୍କାର ମିଳିଥିଲା । ଜଗନ୍ନାଥ ସଂସ୍କୃତି ଉପରେ ତାଙ୍କର ଅଗାଧ୍ୟ ପାଣ୍ଡିତ୍ୟ ଥିଲା । ସେ ୧୯୮୨ରୁ ୧୯୯୦ ଯାଏଁ ଉତ୍କଳ ସାହିତ୍ୟ ସମାଜର ସମ୍ପାଦକ ଓ ୧୯୯୧ରୁ ୧୯୯୪ ଯାଏଁ ଓଡ଼ିଶା ସାହିତ୍ୟ ଏକାଡେମୀର ସଭାପତି ଥିଲେ । ୨୦୧୯ରେ ରମାଦେବୀ ବିଶ୍ୱବିଦ୍ୟାଳୟ ପକ୍ଷରୁ ତାଙ୍କୁ ଡି.ଲିଟ୍ ଉପାଧି ଦିଆଯାଇଥିଲା । ୧୯୯୮ରେ ଦୈନିକ ସମାଜର ସମ୍ପାଦକ ଭାବେ ଦାୟିତ୍ୱ ନେଇଥିଲେ । ତାଙ୍କ ବିୟୋଗ ଓଡ଼ିଶା ସାମ୍ବାଦିକ ଜଗତ ପାଇଁ ଏକ ଅପୂରଣୀୟ କ୍ଷତି । ଯାହାର ଭରଣା ଅସମ୍ଭବ ।

ଯୁକ୍ତ ତିନି ପ୍ରଥମ ବର୍ଷ ଛାତ୍ରଛାତ୍ରୀଙ୍କ ଲାଗି ଆରମ୍ଭ ହେବ ଶ୍ରେଣୀଗୃହ ପାଠପଢ଼ା

ଭୁବନେଶ୍ୱର: ଯୁକ୍ତ ତିନି ପ୍ରଥମ ବର୍ଷ ଛାତ୍ରଛାତ୍ରୀଙ୍କ ଲାଗି ଆସନ୍ତା ୨୦ ତାରିଖରୁ ଶ୍ରେଣୀଗୃହ ପାଠପଢ଼ା ଆରମ୍ଭ ହେବ । କଲେଜ ଓ ବିଶ୍ୱବିଦ୍ୟାଳୟ ଖୋଲିବ । ଏନେଇ ଉଚ୍ଚଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ରାଜ୍ୟରେ କରୋନା ସଂକ୍ରମଣ ମାମଲା ହ୍ରାସ ପରେ ଏହି ନିଷ୍ପତ୍ତି ନିଆଯାଇଛି । କୋଭିଡ୍ କଟକଣା ମଧ୍ୟରେ ୧୯ ତାରିଖ ଠାରୁ ହଷ୍ଟେଲ ଖୋଲିବ ।

କରୋନା ଗାଇଡଲାଇନ୍ ମାନି ଶ୍ରେଣୀଗୃହରେ ଶିକ୍ଷା ଦାନ କରାଯିବ । ଏଥିପାଇଁ ଗାଇଡଲାଇନ୍ ଜାରି ହୋଇଛି । କଣ୍ଟେନମେଣ୍ଟ ଜୋନରେ ରହୁଥିବା ଅଧ୍ୟାପକ, କର୍ମଚାରୀ କିମ୍ବା ଛାତ୍ରଛାତ୍ରୀ କେହି କଲେଜ କି ବିଶ୍ୱବିଦ୍ୟାଳୟ ଆସିବେ ନାହିଁ । କ୍ୟାମ୍ପସ ଓ ଶ୍ରେଣୀଗୃହରେ ସମସ୍ତଙ୍କୁ ମାସ୍କ ପିନ୍ଧିବାକୁ ପଡ଼ିବ । ନିୟମିତ ବ୍ୟବଧାନରେ ହାତ ଧୋଇବେ କିମ୍ବା ସାନିଟାଇଜ୍ କରିବେ ।

ଶ୍ରେଣୀଗୃହ, ଲାଇବ୍ରେରୀ ସହ ଲାବୋରେଟୋରିରେ ସାମାଜିକ ଦୂରତା ରକ୍ଷା କରାଯିବ । ସଂଖ୍ୟା ଦୃଷ୍ଟିରୁ ଆବଶ୍ୟକ ସ୍ଥଳେ ଛାତ୍ରଛାତ୍ରୀଙ୍କୁ ନେଇ ଅଲଗା ବ୍ୟାଚ୍ କରି ପଢ଼ାଯିବ । କ୍ୟାମ୍ପସରେ ଛେପ ପକାଇବାକୁ ସମ୍ପୂର୍ଣ୍ଣ ବାରଣ କରାଯାଇଛି । ଜରୁରୀକାଳୀନ ସ୍ଥିତି ପାଇଁ ଆଇସୋଲେସନ୍ ରୁମ୍ ରଖିବାକୁ କୁହାଯାଇଛି ।

୨୦୨୧-୨୨ ଶିକ୍ଷା ବର୍ଷର ସ୍ନାତକ ଓ ସ୍ନାତକୋତ୍ତର ଛାତ୍ରଛାତ୍ରୀଙ୍କ ପ୍ରଥମ ସେମିଷ୍ଟାର ପରୀକ୍ଷା ନେଇ ଏବେ କୌଣସି ନିଷ୍ପତ୍ତି ନିଆଯାଇ ନାହିଁ ।

ଭାଦ୍ର ପୂର୍ଣ୍ଣିମା ୨୦୨୧: ଜାଣନ୍ତୁ କେବେ ଭାଦ୍ର ପୂର୍ଣ୍ଣିମା, ଏହାର ଶୁଭ ମୁହୂର୍ତ୍ତ ଏବଂ ବ୍ରତର ମହତ୍ତ୍ୱ

0

ଶୁକ୍ଳପକ୍ଷର ପୂର୍ଣ୍ଣିମା ତିଥିକୁ ଭାଦ୍ର ପୂର୍ଣ୍ଣିମା କୁହାଯାଏ । ଏହିଦିନ ଉମା ମାହେଶ୍ୱର ବ୍ରତ କରାଯାଏ । ଏହି ଦିନଠାରୁ ପିତୃପକ୍ଷ ବା ଶ୍ରାଦ୍ଧ ଆରମ୍ଭ ହୋଇଥାଏ । ଚଳିତ ଥର ଭାଦ୍ର ପୂର୍ଣ୍ଣିମା ସୋମବାର, ୨୦ ସେପ୍ଟେମ୍ବରରେ ପାଳନ ହେବ । ୨୦ ସେପ୍ଟେମ୍ବରରୁ ୬ ଅକ୍ଟୋବର ପର୍ଯ୍ୟନ୍ତ ଶ୍ରାଦ୍ଧ ରହିବ ।

ଜ୍ୟୋତିଷାଚାର୍ଯ୍ୟ ଡାକ୍ତର ଅରବିନ୍ଦ ମିଶ୍ରଙ୍କ କହିବା ହେଉଛି ଭାଦ୍ରପଦ ପୂର୍ଣ୍ଣିମା ଦିନ ପ୍ରଭୁ ସତ୍ୟ ନାରାୟଣଙ୍କୁ ପୂଜା କରିବା ଦ୍ୱାରା ବଡ଼ ଲାଭ ମିଳିଥାଏ । ଏହି ଦିନ ବ୍ରତ କରିବା ଦ୍ୱାରା ସମସ୍ତ କଷ୍ଟ ଦୂର ହୋଇଥାଏ । ଜୀବନରେ ସୁଖ ଓ ସମୃଦ୍ଧି ମିଳିଥାଏ ଏବଂ ଭଗବାନ ସତ୍ୟ ନାରାୟଣଙ୍କ କୃପା ବୃଷ୍ଟି ହୁଏ । ଭାଦ୍ର ପୂର୍ଣ୍ଣିମା ଦିନ ନଦୀ, ପୋଖରୀରେ ସ୍ନାନ କରିବା ଦ୍ୱାରା ବିଶେଷ ଲାଭ ମିଳିଥାଏ ।

ଭାଦ୍ର ପୂର୍ଣ୍ଣିମାରେ ଚନ୍ଦ୍ରମା ୧୬ କଳାରେ ପରିପୂର୍ଣ୍ଣ ରହିଥାଏ । ଏହି ଦିନ ବ୍ରତ ରଖି ଚଦ୍ରମାଙ୍କ ବିଶେଷ ଉପାସନା କରାଯାଏ । ତେବେ ଚଳିତ ଥର ପୂର୍ଣ୍ଣିମା ତିଥି ଭୋର୍‌ ୫ଟା ୨୮ ମିନିଟରେ ଆରମ୍ଭ ହେବ । ଏହାର ସମାପନ ୨୧ ସେପ୍ଟେମ୍ବର ୨୦୨୧ ସକାଳ ୫ଟା ୨୪ ମିନିଟରେ ହେବ ।

ମତ୍ସ୍ୟ ପୁରାଣରେ ଏହି ବ୍ରତ ବିଷୟରେ ଉଲ୍ଲେଖ ରହିଛି । ପୌରାଣିକ କଥା ଅନୁସାରେ, ଏକଦା ମହର୍ଷି ଦୁର୍ବାଶା ଭଗବାନ ଶଙ୍କରଙ୍କ ଦର୍ଶନ କରି ଫେରୁଥିଲେ । ଫେରିବା ସମୟରେ ରାସ୍ତାରେ ତାଙ୍କ ସାକ୍ଷାତ ଭଗବାନ ବିଷ୍ଣୁଙ୍କ ସହିତ  ହେଲା । ଭଗବାନ ଶଙ୍କରଙ୍କ ଠାରୁ ଆଣିଥିବା ବେଲପତ୍ର ମାଳା ଭଗବାନ ବିଷ୍ଣୁଙ୍କୁ ଦେଲେ । ଭଗବାନ ବିଷ୍ଣୁ ସେହି ମାଳାକୁ ନିଜେ ନ ପିନ୍ଧି ଗରୁଡ଼ଙ୍କୁ ଦେଲେ । ଏଥିପାଇଁ ମହର୍ଷି ଦୁର୍ବାଶା ରାଗିଯାଇ ଭଗବାନ ବିଷ୍ଣୁଙ୍କୁ ଅଭିଶାପ ଦେଲେଯେ, ମା ଲକ୍ଷ୍ମୀ ତାଙ୍କଠାରୁ ଦୂରେଇ ଯିବେ ଏବଂ କ୍ଷୀର ସାଗର ଛଡ଼ାଇ ନିଆଯିବ । ଶେଷନାଗ ମଧ୍ୟ ସାହାଯ୍ୟ କରିପାରିବେ ନାହିଁ । ଏହାପରେ ଦୁର୍ବାଶାଙ୍କୁ ପ୍ରଣାମ କରି ଏଥିରୁ ମୁକ୍ତି ପାଇଁ ଉପାୟ ପଚାରିଲେ ବିଷ୍ଣୁ । ଯାହାପରେ ଉମା-ମହେଶ୍ୱର ବ୍ରତ କରିବା ପାଇଁ ଉପାୟ କହିଥିଲେ ଦୁର୍ବାଶା । ଏହାପରେ ଭଗବାନ ବିଷ୍ଣୁ ଏହି ବ୍ରତ କଲେ ଏବଂ ସବୁକିଛି ଫେରି ପାଇଲେ ।

ପୋଡ଼ା ଟ୍ରାନ୍ସଫର୍ମର ବଦଳାଇ ପାରୁନି ବିଦ୍ୟୁତ୍ ବିଭାଗ, ବିତିଲାଣି ୧୧ ବର୍ଷ

ବାଲିଗୁଡ଼ା: ଟ୍ରାନ୍ସଫର୍ମର ଲଗାଇପାରୁନି ବିଦ୍ୟୁତ୍ ବିଭାଗ, ବିତିଲାଣି ୧୧ ବର୍ଷ । ବିଦ୍ୟୁତ୍ ସଂଯୋଗ ଥାଇ ମଧ୍ୟ ଅନ୍ଧାରରେ ରହୁଛନ୍ତି ଲୋକେ । ୨୦୧୦ ମସିହାରେ କନ୍ଧମାଳ ଜିଲ୍ଲା ପାଡ଼ିବାଡ଼ା ଗାଁରେ ଟ୍ରାନ୍ସଫର୍ମରଟି ପୋଡ଼ି ଯାଇଥିଲା । ଆଉ ଆଜି ପର୍ଯ୍ୟନ୍ତ ତାହାକୁ ଠିକ୍ କରିପାରିନି ବିଦ୍ୟୁତ୍ ବିଭାଗ । ନୂତନ ଟ୍ରାନ୍ସଫର୍ମର ଲଗାଇବା ପାଇଁ ଗ୍ରାମବାସୀ ବାରମ୍ବାର ବିଦ୍ୟୁତ୍ ବିଭାଗକୁ ଜଣାଇଥିଲେ ବି କର୍ମଚାରୀ ସାଜିଛନ୍ତି ନିଦା ବିଷ୍ଣୁ । ଲୋକେ ଅନ୍ଧାରରେ ହନ୍ତସନ୍ତ ହେଉଛନ୍ତି ।

No Power In Tribal Village Since 11 Year Kandhamal

ବିଦ୍ୟୁତ୍ ସଂଯୋଗ ଅଛି, ଘରେ ଘରେ ମିଟର ଲାଗିଛି । ହେଲେ ନା ଆଲୁଅ ଜଳୁଛି, ନା ପଙ୍ଖା ବୁଲୁଛି । ୧୧ବର୍ଷ ହେଲା ଏମିତି ଅନ୍ଧାରରେ ରହୁଛନ୍ତି କନ୍ଧମାଳ ଜିଲ୍ଲା ଦାରିଙ୍ଗବାଡ଼ି ବ୍ଲକ୍ ପାଡ଼ିବାଡ଼ା ଗାଁ ଲୋକେ । ୨୦୦୮ ମସିହାରେ ବିଜୁ ଗ୍ରାମ୍ୟ ଜ୍ୟୋତି ଯୋଜନାରେ ପାଡ଼ିବାଡ଼ାକୁ ବିଜୁଳି ସଂଯୋଗ କରାଯାଇଥିଲା । ମାତ୍ର ୨ ବର୍ଷ ପରେ ଟ୍ରାନ୍ସଫର୍ମର ପୋଡ଼ିଯିବା ପରେ ଅନ୍ଧାରରେ ରହିଛି ଏହି ଆଦିବାସୀ ଗାଁ । ବିଦ୍ୟୁତ୍ ବିଭାଗର ଅବହେଳା ପାଇଁ ବିଜୁଳି ଆଲୋକରୁ ବଞ୍ଚିତ ହୋଇଛନ୍ତି ଲୋକେ ।

No Power In Tribal Village Since 11 Year Kandhamal

ବିଜୁଳି ସେବାକୁ ପୁନଃ କାର୍ଯ୍ୟକ୍ଷମ କରିବାକୁ ଗ୍ରାମବାସୀ ୧୧ ବର୍ଷ ହେଲା ଦାବି କରି ଆସୁଛନ୍ତି । ହେଲେ ଲୋକଙ୍କର ସମସ୍ୟା ସମାଧାନ କରିବା ବଦଳରେ ବିଦ୍ୟୁତ୍ ବିଭାଗ ଆଖି ବୁଜି ଦେଇଥିବା ଲୋକେ କହିଛନ୍ତି । ସେପଟେ ଏସମ୍ପର୍କରେ କୌଣସି ଅଭିଯୋଗ ଆସିନାହିଁ, ଅଭିଯୋଗ ଆସିଲେ ତୁରନ୍ତ ସମସ୍ୟା ସମାଧାନ କରାଯିବ ବୋଲି କହିଛନ୍ତି ବାଲିଗୁଡ଼ା ବିଦ୍ୟୁତ୍ ବିଭାଗର ଉପଖଣ୍ଡ ସହକାରୀ ଯନ୍ତ୍ରୀ ।

No Power In Tribal Village Since 11 Year Kandhamal

୧୧ ବର୍ଷ ଅନ୍ଧାରରେ ରହି ଆସୁଛନ୍ତି ପାଡ଼ିବାଡ଼ା ଗ୍ରାମବାସୀ । ଆଗାମୀ ଦିନରେ ବିଦ୍ୟୁତ୍ ସେବା ନ ମିଳିଲେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛନ୍ତି ଗ୍ରାମବାସୀ ।

ପଞ୍ଜାବ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ ଅମରିନ୍ଦର, ସୁନୀଲ ଝକଡ଼ ହୋଇପାରନ୍ତି ନୂଆ ମୁଖ୍ୟମନ୍ତ୍ରୀ

ଚଣ୍ଡିଗଡ଼: ପଞ୍ଜାବ କଂଗ୍ରେସରେ କନ୍ଦଳ ପରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି କ୍ୟାପଟେନ ଅମରିନ୍ଦର ସିଂ । ରାଜଭବନରେ ରାଜ୍ୟପାଳଙ୍କୁ ଭେଟି ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି ଅମରିନ୍ଦର । ଅମରିନ୍ଦରଙ୍କ ସହ ତାଙ୍କ ମନ୍ତ୍ରୀମଣ୍ଡଳ ମଧ୍ୟ ଇସ୍ତଫା ରାଜ୍ୟପାଳଙ୍କୁ ଦେଇଛନ୍ତି । ଦ୍ୱିତୀୟ ଥର ପାଇଁ ପଞ୍ଜାବର ମୁଖ୍ୟମନ୍ତ୍ରୀ ହୋଇଥିବା ଅମରିନ୍ଦର ଦ୍ୱିତୀୟ ପାଳିର ୫ ବର୍ଷ ପୂରଣ ପୂର୍ବରୁ ଇସ୍ତଫା ଦେଇଛନ୍ତି ।

ଇସ୍ତଫା ଦେବା ପରେ ଅମରିନ୍ଦର କହିଛନ୍ତି, ସକାଳୁ ଇସ୍ତଫା ଦେବା ନେଇ ମୁଁ ଦଳର ସଭାପତିଙ୍କୁ ଜଣାଇଥିଲି । ସରକାର ନ ଚଳାଇ ପାରିବା ନେଇ ମୋ ଉପରେ ସନ୍ଦେହ ଥିଲା । ୨ ମାସ ମଧ୍ୟରେ ୩ ମାସ ଦିଲ୍ଲୀ ଡକାଇ ଥିଲେ । ମୋତେ ଲାଗିଥିଲା ମୋର ଅପମାନ ହୋଇଛି । ଭବିଷ୍ୟ ରାଜନୀତି ନେଇ ମୋ ପାଖରେ ବିକଳ୍ପ ରହିଛି । ମୋ ଶୁଭେଛୁ, ସମର୍ଥକଙ୍କ ସହ ଆଲୋଚନା ପରେ ଯାହା ନିଷ୍ପତ୍ତି ନେବି । ଏବେ ସେ କଂଗ୍ରେସ ସହ ରହିବେ ବୋଲି କହିଛନ୍ତି ।

୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ନେଇ ୩ ଜିଲ୍ଲାକୁ ୟେଲୋ ଆଲର୍ଟ

ଭୁବନେଶ୍ୱର: ଉତ୍ତର ପଶ୍ଚିମ ତତ୍ ସଂଲଗ୍ନ ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇଛି । ଏହା ଆସନ୍ତା ୧୨ ଘଣ୍ଟା ମଧ୍ୟରେ ଓଡ଼ିଶା ଉପକୂଳ ଆଡ଼କୁ ଗତି କରିବ । ଏହାର ପ୍ରଭାବରେ ଆସନ୍ତା ୨୪ ଘଣ୍ଟାରେ ୩ ଜିଲ୍ଲା ବାଲେଶ୍ବର, ଭଦ୍ରକ ଏବଂ ମୟୂରଭଞ୍ଜରେ ପ୍ରବଳ ବର୍ଷା ନେଇ ୟେଲୋ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଏହା ସହ ୧୦ ଜିଲ୍ଲାରେ ବିଜୁଳି ଘଡ଼ଘଡ଼ି ସହ ବର୍ଷା ଆଶଙ୍କା ରହିଛି ।

ବିଜୁଳି ଘଡ଼ଘଡ଼ି ସହ ବର୍ଷା ନେଇ କେନ୍ଦୁଝର, ମୟୂରଭଞ୍ଜ, ଯାଜପୁର, କଟକ, ଢେଙ୍କାନାଳ, ଗଞ୍ଜାମ, ଗଜପତି, ରାୟଗଡ଼ା, ମାଲକାନଗିରି ଓ କୋରାପୁଟ ଜିଲ୍ଲାକୁ ୟେଲୋ ଆର୍ଲଟ ଦିଆଯାଇଛି । ସେହିଭଳି ୧୯ ତାରିଖରେ ପ୍ରବଳ ବର୍ଷା ନେଇ ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ଖୋର୍ଦ୍ଧା, ପୁରୀ, ଢେଙ୍କାନାଳ, ମୟୂରଭଞ୍ଜ, କେନ୍ଦୁଝର ଓ ସୁନ୍ଦରଗଡ଼ ଜିଲ୍ଲାକୁ ଦିଆଯାଇଛି ୟେଲୋ ଆଲର୍ଟ ।

୨୦ ତାରିଖରେ ସୁନ୍ଦରଗଡ଼, ସମ୍ବଲପୁର, ଝାରସୁଗୁଡ଼ା, ବରଗଡ଼, ସୋନପୁର, ନୂଆପଡ଼ା, ବଲାଙ୍ଗିର ଓ ଦେବଗଡ଼ ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ୨୧ ତାରିଖରୁ ୨୨ ତାରିଖ ସକାଳ ୮ଟା ୩୦ ଯାଏଁ ନବରଙ୍ଗପୁର, ନୂଆପଡ଼ା ଓ ବଲାଙ୍ଗିର ଜିଲ୍ଲା ପାଇଁ ୟେଲୋ ଆଲର୍ଟ ରହିଛି ।

ଏସିଏଫ୍ ସୌମ୍ୟ ମୃତ୍ୟୁ ମାମଲା; ଡିଏଫ୍ଓଙ୍କ ହେଲା ପଲିଗ୍ରାଫ ଟେଷ୍ଟ

ଭୁବନେଶ୍ୱର: ପାରଳାଖେମୁମୁଣ୍ଡି ଏସିଏଫ ସୌମ୍ୟରଞ୍ଜନଙ୍କ ମୃତ୍ୟୁ ରହସ୍ୟ ଉପରୁ ହଟିବ ପରଦା । ଆଜି ପାରଳାଖେମୁଣ୍ଡି ଡିଏଫଓ ସଂଗ୍ରାମ ବେହେରାଙ୍କ ଲାଏ ଡିଟେକ୍ସନ ଟେଷ୍ଟ ହୋଇଛି । ଭୁବନେଶ୍ବର ଫରେନସିକ୍ ଲ୍ୟାବରେ ଲାଏ ଡିଟେକ୍ସନ ଟେଷ୍ଟ କରାଯାଇଛି । ପ୍ରାୟ ୩ ଘଣ୍ଟା ଧରି ୫୦ରୁ ଅଧିକ ପ୍ରଶ୍ନର ସାମ୍ନା କରିଛନ୍ତି ଡିଏଫଓ । ଡିଏଫଓଙ୍କ ସହ ରୋଷେୟାଙ୍କର ବି ଲାଏ ଡିଟେକ୍ସନ ଟେଷ୍ଟ ହୋଇଛି ।

Polygraph Test Of Paralakhemundi DFO Done On ACF Death Case

ସୌମ୍ୟ ମୃତ୍ୟୁର ସତ ଖୋଜୁଛି କ୍ରାଇମବ୍ରାଞ୍ଚ । ତଦନ୍ତ ବେଳେ ୨ଟି ପର୍ଯ୍ୟାୟରେ ପାରଳାଖେମୁଣ୍ଡି, ଖଇରା ଓ କପ୍ତିପଦାରେ ପଚରାଉଚରା କରିଛି ତଦନ୍ତକାରୀ ସଂସ୍ଥା । ସୌମ୍ୟଙ୍କ ପରିବାର ପକ୍ଷରୁ ପୂରା ଘଟଣା ପାଇଁ ବିଦ୍ୟାଭାରତୀ, ଡିଏଫଓ ଓ ରୋଷେୟାଙ୍କୁ ଦାୟୀ କରାଯାଇଥିଲା । ପୋଲିସ ପକ୍ଷରୁ କ୍ଲିନ୍‌ ଚିଟ୍‌ ଦିଆଯାଇଥିଲେ ମଧ୍ୟ ରୋଷେୟା ଓ ଡିଏଫଓଙ୍କୁ ମାରାଥନ୍‌ ଜେରା କରିଥିଲା କ୍ରାଇମବ୍ରାଞ୍ଚ । ଆଜି ଡିଏଫଓ ଓ ରାତ୍ରୀ ରୋଷେୟାଙ୍କ ଲାଏ ଡିଟେକ୍ସନ ଟେଷ୍ଟ କରାଯାଇଛି ।

ବିଜେପିକୁ ବଡ଼ ଝଟକା, ଟିଏମସିରେ ସାମିଲ୍ ହେଲେ ପୂର୍ବତନ କେନ୍ଦ୍ରମନ୍ତ୍ରୀ ବାବୁଲ୍ ସୁପ୍ରିୟୋ

କୋଲକାତା: ପଶ୍ଚିମବଙ୍ଗରେ ବିଜେପିକୁ ଗୋଟିଏ ପରେ ଗୋଟିଏ ଝଟକା ଦେଉଛି ଟିଏମସି । ପୂର୍ବରୁ ମୋଦି ସରକାରରେ କେନ୍ଦ୍ର ମନ୍ତ୍ରୀ ରହି ସାରିଥିବା ସାଂସଦ ବାବୁଲ ସୁପ୍ରିୟୋ ବିଜେପି ଛାଡ଼ି ଟିଏମସିରେ ସାମିଲ୍ ହୋଇଛନ୍ତି । କିଛିଦିନ ତଳେ ବାବୁଲ୍ ସୁପ୍ରିୟୋ ବିଜେପିରୁ ଇସ୍ତଫା ଦେଇଥିଲେ । ଟିଏମସି ସାଂସଦ ଅଭିଷେକ ବାନାର୍ଜୀ ଓ ଡେରେକ ଓ ବ୍ରାୟନଙ୍କ ଉପସ୍ଥିତିରେ ବାବୁଲ୍ ଦଳରେ ମିଶିଛନ୍ତି ।

ବାବୁଲ୍ ସୁପ୍ରିୟୋ ଟିଏମସିରେ ଯୋଗ ଦେବା ପରେ ଦଳୀୟ ନେତା କୁଣାଳ ଘୋଷ କହିଛନ୍ତି, ଆହୁରି କେତେକ ବିଜେପି ନେତା ଟିଏମସି ନେତାଙ୍କ ସହ ସମ୍ପର୍କରେ ଅଛନ୍ତି । ସେମାନେ ବିଜେପିରେ ସନ୍ତୁଷ୍ଟ ନାହାଁନ୍ତି । ଆଜି ବାବୁଲ୍ ସୁପ୍ରିୟୋ ଯୋଗ ଦେଇଛନ୍ତି, ଅନ୍ୟମାନେ ଟିଏମସି ଆସିବାକୁ ଚାହୁଁଛନ୍ତି । ଏହି ପ୍ରକ୍ରିୟା ଜାରି ରହିବ । ଅପେକ୍ଷା କରନ୍ତୁ, ଦେଖନ୍ତୁ ।…

West Bengal Former Union Minister And Sitting MP Babul Supriyo Joined TMC

ସୂଚନାଯୋଗ୍ୟ, ଗତ ଜୁଲାଇରେ ପୂର୍ବତନ କେନ୍ଦ୍ରମନ୍ତ୍ରୀ ଓ ପଶ୍ଚିମବଙ୍ଗର ବରିଷ୍ଠ ନେତା କୁହାଯାଉଥିବା ବାବୁଲ ସୁପ୍ରିୟୋ ରାଜନୀତିକୁ ବାଏ ବାଏ କରିଥିଲେ । ସେ ସୋସିଆଲ୍ ମିଡିଆରେ ଲେଖିଥିଲେ, ସମାଜସେବା ପାଇଁ ରାଜନୀତିକୁ ଆସିଥିଲି । ଏବେ ବାବୁଲ୍ ସୁପ୍ରିୟୋ ତାଙ୍କ ନିଷ୍ପତ୍ତି ବଦଳାଇଛନ୍ତି ।