spot_img
Home Blog Page 5266

ବିଭିନ୍ନ ଶକ୍ତିପୀଠରେ ଆରମ୍ଭ ହେଲାଣି ନବରାତ୍ର ପୂଜା: ସିନ୍ଦୁର ବର୍ଣ୍ଣରେ ଦର୍ଶନ ଦେବେ ମାଆ ସମଲେଶ୍ୱରୀ

କଟକ: କମ୍ପିଲାଣି ଧରା । ଆସୁଛନ୍ତି ମାଆ । ଧରା ପୃଷ୍ଠକୁ ଅବତରଣ କରିବେ ମାଆ ଦୁର୍ଗା । ରାଜ୍ୟରେ ବିଭିନ୍ନ ଶକ୍ତିପୀଠରେ ନବରାତ୍ର ପୂଜା ଆରମ୍ଭ ହୋଇଯାଇଥିବା ବେଳେ ବିଧି ଅନୁସାରେ ଶୋଡ଼ଷ ଉପଚାରରେ ମାଆଙ୍କର ପୂଜାର୍ଚ୍ଚନା ହେଉଛି । ଆଜି ଭକ୍ତଙ୍କୁ ଶୋଡଷୀ ବେଶରେ ଦର୍ଶନ ଦେଉଛନ୍ତି ମାଆ କଟକ ଚଣ୍ଡି । ନାନା ଅଳଙ୍କାରରେ ସଜ୍ଜିତ ହୋଇଛନ୍ତି ମାଆ । ସେହିପରି ମାଆ ଗଡଚଣ୍ଡୀ ମଧ୍ୟ ବଗଳା ବେଶରେ ସଜ୍ଜିତ ହୋଇ ଭକ୍ତଙ୍କୁ ଦର୍ଶନ ଦେଉଛନ୍ତି ।

ସେପଟେ ମାଆଙ୍କ ଅପେକ୍ଷାରେ ପୁଲକିତ ହେଲାଣି ଧରା । ଆରମ୍ଭ ହୋଇଗଲାଣି ନବରାତ୍ର ପୂଜା । ବିଭିନ୍ନ ଶକ୍ତିପୀଠରେ ଚାଲିଛି ମାଆଙ୍କ ପୂଜାର୍ଚ୍ଚନା । ଆଜି ସିନ୍ଦୁର ବର୍ଣ୍ଣରେ ଭକ୍ତଙ୍କୁ ଦର୍ଶନ ଦେଉଛନ୍ତି ସମ୍ବଲପୁରର ଅଧିଷ୍ଟାତ୍ରୀ ଦେବୀ ମାଆ ସମଲେଶ୍ବରୀ । ଭକ୍ତଙ୍କ ଗହଳିକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ତରଫରୁ ଅନେକ କଟକଣା ଜାରି କରାଯାଇଛି । ମାନସିକଧାରୀଙ୍କୁ ଚଳିତବର୍ଷ ଦୀପ ଦାନ କରିବାକୁ ଅନୁମତି ମିଳିଛି ।

ଏଥିସହିତ ପଢ଼ନ୍ତୁ: ନନ୍ଦିଘୋଷ ଟିଭିର ପ୍ରଭାବ, ମାତାଲ ଡାକ୍ତରଙ୍କୁ ସ୍ୱାସ୍ଥ୍ୟ ବିଭାଗ ପକ୍ଷରୁ କାରଣ ଦର୍ଶାଅ ନୋଟିସ୍‌

 

ଲଖିମପୁର ଖିରି ମାମଲା: ଆଜି ଷ୍ଟାଟସ ରିପୋର୍ଟ ଦାଖଲ କରିବେ ୟୁପି ସରକାର

ନୂଆଦିଲ୍ଲୀ: ଉତ୍ତରପ୍ରଦେଶର ଲଖିମପୁର-ଖେରି ମାମଲାରେ ଆଜି ପୁଣି ସୁପ୍ରିମକୋର୍ଟରେ ହେବ ଶୁଣାଣି । ଏହି ମାମଲାରେ କିଏ ଦୋଷୀ ଓ ଏପର୍ଯ୍ୟନ୍ତ କ’ଣ କାର୍ଯ୍ୟାନୁଷ୍ଠାନ ହୋଇଛିସେ  ଏନେଇ ଆଜି ୟୁପି ସରକାର ସୁପ୍ରିମକୋର୍ଟରେ ଷ୍ଟାଟସ ରିପୋର୍ଟ ଦାଖଲ କରିବେ । ଗତକାଲି ଏହି ମାମଲାର ଶୁଣାଣି କରି ରାଜ୍ୟ ସରକାରଙ୍କୁ ସୁପ୍ରିମକୋର୍ଟ ରିପୋର୍ଟ ତଲବ କରିବା ପରେ ତରବରିଆ ଭାବେ ୟୁପି ପୋଲିସ୍‌ ଦୁଇ ଜଣକୁ ଗିରଫ କରିବା ସହ ଆକ୍ସନ ମୁଡକୁ ଆସିଛି ।

ଅନ୍ୟପଟେ ମୁଖ୍ୟ ଅଭିଯୁକ୍ତ ତଥା କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଆଶିଷ ମିଶ୍ରଙ୍କୁ ସମନ କରିଛି SIT। ଆଜି ଦିନ ୧୦ଟାରେ ହାଜର ହେବାକୁ ଆଶିଷଙ୍କୁ ନୋଟିସ ପଠାଇଛି । ମନ୍ତ୍ରୀ ଅଜୟ ମିଶ୍ରଙ୍କ ଘର ଆଗରେ ଏହି ନୋଟିସ ଲଗାଯାଇଥିବା ଦେଖାଯାଇଛି । ପୂର୍ବରୁ ଗିରଫ ଦୁଇ ଅଭିଯୁକ୍ତ ଆଶିଷ ପାଣ୍ଡେ ଓ ଲବ କୁଶଙ୍କୁ ପଚରାଉଚରା କରୁଛି ପୋଲିସ । ଜେରା ବେଳେ ଦୁହିଁଙ୍କଠାରୁ ଘଟଣା ସମ୍ପର୍କରେ ଅନେକ ତଥ୍ୟ ହସ୍ତଗତ ହୋଇଛି । ଏହାସହ ଘଟଣାସ୍ଥଳରୁ ଜବତ ହୋଇଥିବା ଗୁଳିର ଫରେନ୍ସିକ ଯାଞ୍ଚ ପାଇଁ ପଠାଯାଇଛି ଓ ଗିରଫ ଦୁଇ ଅଭିଯୁକ୍ତଙ୍କୁ ଖୁବଶୀଘ୍ର କୋର୍ଟରେ ହାଜର କରାଯିବ ବୋଲି ଏଡିଜି ଏସ ଏନ୍ ସାବତ କହିଛନ୍ତି।

ଅନ୍ୟପଟେ ମୃତ ଚାଷୀ ଗୁରବିନ୍ଦର ସିଂ ଓ ସାମ୍ବାଦିକ ରମଣ କସ୍ୟପଙ୍କ ପରିବାର ଅଟୋପ୍ସି ଟେଷ୍ଟକୁ ନେଇ ପ୍ରଶ୍ନ ଉଠାଇଛନ୍ତି । ମୃତକଙ୍କ ଶରୀରରେ ଗୁଳି ବାଜିଥିବା ଚିହ୍ନ ଥିବା ବେଳେ ଅଟୋପ୍ସି ରିପୋର୍ଟରେ ଏହା ଉଲ୍ଲେଖ ନାହିଁ ।

ରାଜ୍ୟ ସରକାରଙ୍କୁ ପ୍ରଶଂସା କଲେ କେନ୍ଦ୍ରମନ୍ତ୍ରୀ ଅଶ୍ୱିନୀ ଚୌବେ

ଭୁବନେଶ୍ୱର: ୱାନ୍‌ ନେସନ୍‌, ୱାନ୍‌ ରାସନ୍‌ ଯୋଜନାର କାର୍ଯ୍ୟକାରିତା ନେଇ ରାଜ୍ୟ ସରକାରଙ୍କୁ ପ୍ରଶଂସା କଲେ କେନ୍ଦ୍ରମନ୍ତ୍ରୀ ଅଶ୍ୱନୀ ଚୌବେ । କହିଛନ୍ତି, ରାଜ୍ୟରେ ଗରିବଙ୍କ ପାଇଁ ଖାଦ୍ୟ ଯୋଜନା ସୂଚାରୁ ରୁପେ ଚାଲିଛି । ସେହିପରି ପୁରୀର ବ୍ଲୁଫ୍ଲାଗ ବିଚର ରକ୍ଷଣାବେକ୍ଷଣ ନେଇ ମଧ୍ୟ ପ୍ରଶଂସା କରିଛନ୍ତି । ସମୁଦ୍ରତଟର ବିକାଶ ପାଇଁ ଦେଶର ୧୦ଟି ସମୁଦ୍ର କୂଳକୁ ଚିହ୍ନଟ କରାଯାଇଥିଲା । ପୁରୀର ସ୍ୱର୍ଣ୍ଣାଭ ବେଳାଭୂମି ଭଲ ମାନ୍ୟତା ପାଇଛି । ଆଗାମୀ ୫ ବର୍ଷରେ ଦେଶ ସାରା ୧୦୦ଟି ବିଚ୍‌କୁ ବ୍ଲୁଫାଗ୍‌ ବିଚରେ ପରିଣତ କରାଯିବ  ।

Central Minister Ashwini Choubey Appreciated Odisha

ସେହିପରି ଓଡ଼ିଶାର ୧୦ଟି ବିଚକୁ ବ୍ଲୁଫ୍ଲାଗ ମାନ୍ୟତା ଦେବାକୁ ଯୋଜନା ଥିବା କହିଛନ୍ତି ମନ୍ତ୍ରୀ । ସେ ଆହୁରି ମଧ୍ୟ କହିଛନ୍ତି ଯେ, ସମୁଦ୍ରତଟର ରକ୍ଷଣାବେକ୍ଷଣ ଯୋଗୁ ଦେଶରେ ୨୦୨୦ ଜାନୁଆରୀରୁ ୨୦୨୧ ଅଗଷ୍ଟ ମଧ୍ୟରେ ପର୍ଯ୍ୟଟକଙ୍କ ସଂଖ୍ୟାରେ ୮୦ ପ୍ରତିଶତ ବୃଦ୍ଧି ହୋଇଛି । ହାତୀ ମଣିଷ ଲଢେଇ ସମ୍ପର୍କରେ କେନ୍ଦ୍ରମନ୍ତ୍ରୀ କହିଛନ୍ତି, ଓଡ଼ିଶାରେ ହାତୀ ଜନବସତି ଆଡ଼କୁ ନଯିବା ପାଇଁ ସୀମାରେ ବିଦ୍ୟୁତ୍ ବାଡ଼ ଦିଆଯିବ । ଏ ନେଇ ଓଡ଼ିଶା ବନ ବିଭାଗ ଅଧିକାରୀଙ୍କ ସହ ଆଲୋଚନା କରାଯାଇଥିବା ସେ ସୂଚନା ଦେଇଛନ୍ତି ।

IPL 2021: କୋଲକାତାର ଅଧା ରନରେ ଅଟକିଲା ରାଜସ୍ଥାନ

ସାରଜାହ: ଚମତ୍କାର ବିଜୟ ହାସଲ କରିଛି କୋଲକାତା ନାଇଟ ରାଇଡର୍ସ  । ଗୁରୁବାର ଖେଳାଯାଇଥିବା ୫୪ତମ ମ୍ୟାଚରେ ପ୍ରଥମେ ଟସ ଜିତି ବୋଲିଂ ନିଷ୍ପତି ନେଇଥିଲା ରାଜସ୍ଥାନ ରୟାଲର୍ସ  । ପ୍ରଥମ ୨୦ ଓଭରରେ କୋଲକତା ନାଇଟ ରାଇଡର୍ସ ୪ ୱିକେଟ ହରାଇ ୧୭୧ ରନ ସଂଗ୍ରହ କରିଥିଲା  । କିନ୍ତୁ ଏହାର ପିଛା କରୁଥିବା ରାଜସ୍ଥାନ ଅଧା ରନରେ ହିଁ ଅଟକି ଯାଇଥିଲା  ।

ନିର୍ଦ୍ଧାରିତ  ଓଭରରେ ୧୭୨ ରନର ପିଛା କରୁଥିବା ରାଜସ୍ଥାନ ପ୍ରଥମରୁ ବ୍ୟାଟିଂ ବିପର୍ଯ୍ୟସ୍ଥ ହୋଇପଡିଥିବା ଦେଖିବାକୁ ମିଳିଥିଲା  । ରାଜସ୍ଥାନ ପକ୍ଷରୁ ଓପନର ଜୈଶାଲ କୈଣସି ରନ ସଂଗ୍ରହ ନକରି ପ୍ୟାଭିଲିୟନ ଫେରିଥିଲେ  । ୧.୧ ଓଭରରେ ଦଳୀୟ ସ୍କୋର ମାତ୍ର ୧ ରନ୍ ହୋଇଥିଲା ଏବଂ ଏହି ସମୟରେ ହିଁ ବ୍ୟାଟ୍ସମ୍ୟାନ ସଂଜୁ ସାମସନ ଆଉଟ ହୋଇଥିଲେ  ।

୩.୪ ଓଭରରେ ଆହୁରି ବିପର୍ଯ୍ୟସ୍ଥ ହୋଇପଡିଥିଲା ରାଜସ୍ଥାନର ବ୍ୟାଟିଂ  । ଦଳୀୟ ସ୍କୋର ଯେତେବେଳେ ୧୩ ହୋଇଥିଲା ସେହି ସମୟରେ ଦଳ ୪ ବ୍ୟାଟ୍ସମ୍ୟାନକୁ ହରାଇଥିଲା  । ସସ୍ପମ ଓଭରରେ ଦଳୀୟ ସ୍କୋର ୩୫ ରହିଥିବା ବେଳେ ଆହୁରି ୨ ଜଡଣଙ୍କ ୱିକେଟ ପତନ ଘଟିଥିଲା  । ଏହିପରି ଭାବରେ ଦଳ ମାତ୍ର ୧୬. ୧ ଓଭରରେ ସମସ୍ତ ୱିକେଟ ହରାଇ ମାତ୍ର ୮୫ ରନ୍ ସଂଗ୍ରହ କରିଥିଲା  ।

BKSY କାର୍ଡରେ ମାଗଣାରେ ହେଲା ଚାଷୀଙ୍କ ଅପରେସନ୍

ରାଉରକେଲା: ସୁନ୍ଦରଗଡ଼ର ଚାଷୀ ଉଠାଇଲେ ବିଏସକେୱାଇ କାର୍ଡର ଲାଭ । ମାଗଣାରେ ପାଇଲେ ସ୍ୱାସ୍ଥ୍ୟ ସେବା । ଲେଫ୍ରିପଡ଼ା ବ୍ଲକ ଅନ୍ତର୍ଗତ ବଡଭଙ୍ଗା ଗାଁର ନାମମାତ୍ର ଚାଷୀ ନିରଞ୍ଜନ ପଟେଲ ଦୀର୍ଘ ଦିନରୁ ହାର୍ଣ୍ଣିଆରେ ପୀଡ଼ିତ ଥିଲେ । ଅର୍ଥ ସମସ୍ୟା ଯୋଗୁ ଅପରେସନ୍ କରାଇ ପାରୁନଥିଲେ ।

Sundargarh Farmer Treatment By BSKY

ଏବେ ସେ ରାଉରକେଲା ହାଇଟେକ୍ ମେଡିକାଲ କଲେଜ ଓ ହସ୍ପିଟାଲରେ ହାର୍ଣ୍ଣିଆ ଅପରେସନ୍ କରି ସୁସ୍ଥ ହୋଇଛନ୍ତି । BSKY କାର୍ଡରେ ମାଗଣା ଚିକତ୍ସା ପାଇ ସେ ଖୁସି ଅନୁଭବ କରିଛନ୍ତି । ଆଜି ସେ ଘରକୁ ଫେରିବା ବେଳେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେବା ବେଳେ କାନ୍ଦି ପକାଇଛନ୍ତି ।

ଯୋଗୀ ସରକାରକୁ ସୁପ୍ରିମ ନିର୍ଦ୍ଦେଶ, ତୁରନ୍ତ ଦାଖଲ କର ଷ୍ଟାଟସ ରିପୋର୍ଟ

ଲକ୍ଷ୍ନୌ: ଲକ୍ଷୀମପୁର ଖେରୀ ଘଟଣାରେ ସୁପ୍ରିମକୋର୍ଟଙ୍କ କଡ଼ା ନିର୍ଦ୍ଦେଶ  ।  ଯୋଗୀ ସରକାରଙ୍କୁ ଘେରିଛନ୍ତି ସର୍ବୋଚ୍ଚ ଅଦାଲତ । ମାଗିଛନ୍ତି ଷ୍ଟାଟସ ରିପୋର୍ଟ । ଅଭିଯୁକ୍ତ କିଏ, ବର୍ତ୍ତମାନ ସୁଦ୍ଧା କି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି, କାହା କାହା ନାଁରେ ମାମଲା ରୁଜୁ ହୋଇଛି ସେ ସମ୍ପର୍କରେ ସବିଶେଷ ତଥ୍ୟ ଦେବାକୁ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ୍ଟ। ଜବାବରେ ଜଣିକିଆ କମିଶନଙ୍କ ନେତୃତ୍ବରେ ଘଟଣାର ତଦନ୍ତ ଚାଲିଛି ବୋଲି କୋର୍ଟରେ ଉତ୍ତର ରଖିଛନ୍ତି ୟୁପି ସରକାର ।

ସେପଟେ ଶୁକ୍ରବାର ମାମଲାର ପରବର୍ତ୍ତୀ ଶୁଣାଣି ହେବ । ଶୁଣାଣି ବେଳେ ଜଣେ ମୃତ ଚାଷୀଙ୍କ ମାଆ ଗୁରୁତର ହେବା ଖବରକୁ ନେଇ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି କୋର୍ଟ । ଆଜୟ ମିଶ୍ରଙ୍କ ଘରେ ନୋଟିସ ଲାଗିବା ଦେଖାଗଲାଣି  । ଅନ୍ୟପଟେ ପୁଅ ଆଶିଷ ମିଶ୍ରଙ୍କୁ କ୍ରାଇମବ୍ରାଞ୍ଚ  ନୋଟିସ ଜାରି କରିଛି  । ଅକ୍ଟୋବର ୮ ତାରିଖରେ ହାଜିର ହେବା ନେଇ ନୋଟିସରେ ଉଲ୍ଲେଖ ରହିଛି  ।  ତେଣୁ ଅନ୍ୟ ଅଭିଯୁକ୍ତଙ୍କୁ ପୋଲିସ ଗୁରୁବାର ଗିରଫ କରିଥିଲାବେଳେ ମନ୍ତ୍ରୀଙ୍କ ପୁଅ ଆଶିଷ ମିଶ୍ରଙ୍କୁ କାହିଁକି ଗିରଫ କରାଯାଇ ନାହିଁ, ତାହାକୁ ନେଇ ରାୈଜନୀତି ସରଗରମ ହୋଇଛି  ।

କାର୍ଯ୍ୟକାରିଣୀରୁ ବିଦା ବରୁଣ-ମେନକା, ଇନ୍ ହେଲେ ସିନ୍ଧିଆ-ମିଥୁନ୍

ନୂଆଦିଲ୍ଲୀ: ବିଜେପି ଜାତୀୟ କାର୍ଯ୍ୟକାରିଣୀରୁ ବିଦାହେଲେ ବରୁଣ ଗାନ୍ଧୀ ଏବଂ ମେନକା ଗାନ୍ଧୀ । ଲେଖିପୁର ହିଂସାକୁ ନେଇ ସୋସିଆଲ ମିଡିଆରେ ଫଟୋ, ଭିଡିଓ ସେୟାର କରିଥିବା ଦଳୀୟ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି ବିଜେପି । ଦଳର କାର୍ଯ୍ୟକାରିଣୀରୁ ବିଦା ହୋଇଛନ୍ତି ବରୁଣ ଗାନ୍ଧି ଓ ମାନେକା ଗାନ୍ଧି । ଉତ୍ତରପ୍ରଦେଶ, ପଞ୍ଜାବ, ଉତ୍ତରାଖଣ୍ଡରେ ଆସନ୍ତା ବର୍ଷ ନିର୍ବାଚନ ଥିବା ବେଳେ ଏହା ପୂର୍ବରୁ କାର୍ଯ୍ୟକାରିଣୀ ପରିବର୍ତ୍ତନ କରିଛି ବିଜେପି ।

ଦଳ ପକ୍ଷରୁ ନୂତନ କାର୍ଯ୍ୟକାରିଣୀ ଘୋଷଣା କରାଯାଇଛି । ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ୮୦ ଜଣିଆ କାର୍ଯ୍ୟକାରିଣୀ ସଦସ୍ୟ ଘୋଷଣା କରିଛନ୍ତି । ନିକଟରେ ଅନ୍ୟ ଦଳଛାଡ଼ି ବିଜେପିରେ ସାମିଲ ହୋଇଥିବା ନେତାଙ୍କ ମଧ୍ୟରୁ ୧୦ଜଣଙ୍କୁ କାର୍ଯ୍ୟକାରିଣୀରେ ସ୍ଥାନ ମିଳିଛି । ମଧ୍ୟପ୍ରଦେଶ କଂଗ୍ରେସ ଛାଡ଼ି ବିଜେପିକୁ ଆସିଥିବା ଜ୍ୟୋତିରାଦିତ୍ୟ ସିନ୍ଧିଆ, ବିଏସପି ଛାଡ଼ିଥିବା ସ୍ବାମୀପ୍ରସାଦ ମୌର୍ଯ୍ୟ,ବ୍ରୁଜେଶ ପାଠକ, ଦାରାସିଂ ଚୌହାନ ପ୍ରମୁଖଙ୍କୁ କାର୍ଯ୍ୟକରିଣୀରେ ସାମିଲ କରାଯାଇଛି ।

ସେହିପରି ଦଳ ପକ୍ଷରୁ ମିଥୁନ ଚକ୍ରବର୍ତ୍ତୀଙ୍କୁ ମଧ୍ୟ କାର୍ଯ୍ୟକାରିଣୀରେ ସାମିଲ କରିଛି ଦଳ  ।  ଗୋଟେପଟେ ଦଳବଦଳ କରିଥିବା ନେତାଙ୍କୁ ପ୍ରାଥମିକତା ଦିଆଯାଇଥିବା ବେଳେ ଦଳର ଦୁଇ ପୁରୁଖା ନେତା ମାନେକା ଗାନ୍ଧି, ତାଙ୍କ ପୁଅ ବରୁଣ ଗାନ୍ଧିଙ୍କୁ କାର୍ଯ୍ୟକାରିଣୀରୁ ବିଦା କରାଯାଇଛି । ଆଗାମୀ ଦିନରେ ୟୁପି ବିଧାନସଭା ନିର୍ବାଚନ ଥିବାବେଳେ ବରୁଣ ଗାନ୍ଧି ଏବଂ ତାଙ୍କ ମାଆ ମେନକା ଗାନ୍ଧୀଙ୍କୁ କାର୍ଯ୍ୟକାରିଣୀରୁ ହଟାଇବା କିଛି ଭିନ୍ନ ସନ୍ଦେଶ ଦେଉଥିବା ରାଜନୈତିକ ଶିବିରରେ ଚର୍ଚ୍ଚା ହେଉଛି  ।

ଆଖି ବୁଜିଲା ଇଣ୍ଟରନେଟ ସେନସେସନ ଗରିଲା ନାଦାକସି

ନୂଆଦିଲ୍ଲୀ:  କିଏ କେତେବେଳେ ଇଣ୍ଟରନେଟ୍‌ ସେନସେସନ ହେବ କହିବା କାଠିକର । ସେ କୌଣସି ଫିଲ୍ମର ହିରୋ ହୋଇପାରନ୍ତି ବା କୌଣସି ପର୍ବତାଞ୍ଚଳ ସୁନ୍ଦରୀ । ୨୦୧୯ରେ ସେହିଭଳି ଏକ ଇଣ୍ଟରନେଟ ସେନସସନ ସାମ୍ନାକୁ ଆସିଥିଲା ।  । କିନ୍ତୁ ସେ କୌଣସି ହିରୋ ବା ହିରୋଇନ ନୁହଁନ୍ତି ବରଂ ଏକ ଗୋରିଲା । ବିଗତ ୨୦୧୯ରେ ଜଣେ ପାର୍କ ରେଞ୍ଜରଙ୍କ ସହ ସେଲଫି ଦେଇ ବିଶ୍ୱବ୍ୟାପୀ ଚର୍ଚ୍ଚାର କାରଣ ସାଜିଥିଲା ନାଦାକସି ନାମକ ୧୨ ବର୍ଷୀୟ ଏକ ଗରିଲା । ଗରିଲାକୁ ନେଇ ଅନେକ ଚର୍ଚ୍ଚା ମଧ୍ୟ ହୋଇଥିଲା । ସେହି ଗରିଲା ସହିତ ସେଲ୍ଫି ନେବାପାଇଁ ସମସ୍ତଙ୍କ ମଧ୍ୟରେ ଏକ ପ୍ରକାର କ୍ରେଜ୍‌ ଦେଖିବାକୁ ମିଳିଥିଲା ।

ଏହି ଇଣ୍ଟରନେଟ ସେନସେସନ  ବା ନାଦାକାସିକୁ ନେଇ ଆସିଛି ଏକ ଦୁଃଖଦ ଖବର ।  ନାଦାକସି  କଙ୍ଗୋର ଭିରୁଙ୍ଗା ନ୍ୟାସନାଲ ପାର୍କରେ ଦୀର୍ଘ ଦିନ ଧରି ଅସୁସ୍ଥ ରହିବା ପରେ ସବୁଦିନ ପାଇଁ ଆଖି ବୁଜିଛି । ଗରିଲାର ମୃତ୍ୟୁ ନେଇ ସୂଚନା ଦେଇଛନ୍ତି ପାର୍କ କର୍ତ୍ତୃପକ୍ଷ।  କୁହାଯାଏ କେବେ କେବେ ମଣିଷ ଆଉ ମଣିଷ ମଧ୍ୟରେ ଯେଉଁ ସମ୍ପର୍କ ଗଢ଼ିବାକୁ ବର୍ଷ ବର୍ଷ ସମୟ ଲାଗିଯାଏ, ତାହା କିଛି କ୍ଷଣ ମଧ୍ୟରେ ନିରୀହ ପଶୁ ସହିତ ଯୋଡ଼ି ହୋଇଯାଏ । ସେମାନେ ସାମାନ୍ୟ ସ୍ନେହ ମମତା ପାଇବାମାତ୍ରେ ଏଭଳି ମଣିଷ ପ୍ରେମରେ ବାନ୍ଧି ହୋଇଯାନ୍ତିଯେ, ସାରା ଜୀବନ ସେଇଠି ବନ୍ଧା ପଡ଼ିଯାନ୍ତି ନିଜ ଇଛାରେ । ସେହିଭଳି ସମାନ ଘଟଣା ଘଟିଥିଲା ନାଦାକାସି ନାମକ ଗରିଲା ନିକଟରେ । ସେ ମଧ୍ୟ ମଣିଷ ପ୍ରେମରେ ବନ୍ଧା ପଡ଼ିଥିଲା ।  ସୂଚନା ଅନୁସାରେ ଆନ୍ଦ୍ରେ ବମା ନାମକ ଜଣେ ବ୍ୟକ୍ତି ଗରିଲା ଛୋଟ ହୋଇଥିବା ବେଳେ ଖୁବ୍‌ ଆଦରର ସହିତ କୋଳେଇ ନେଇଥିଲେ ।

 ରିପୋର୍ଟ ଅନୁସାରେ ମାତ୍ର ୨ ମାସର ହୋଇଥିଲା ଗରିଲା । ଆତଙ୍କବାଦୀଙ୍କ ଗୁଳିରେ ମା ଗରିଲା  ଚିରଦିନ ପାଇଁ ନିଘୋର ନିଦ୍ରାରେ ଶୋଇ ଯାଇଥାଏ, କିନ୍ତୁ ନାଦାକସି ଯେ, ନିରୀହ ଶିଶୁ ସେ, ମା’କୁ ଜାବୁଡ଼ି ଧରି ସେମିତି ପଡ଼ି ରହିଥାଏ । ମା’ ଉଠିବ ଆଉ ତାକୁ କୋଳେଇ ନେବ । କିନ୍ତୁ ତା ମା କେବେ ଆଉ ଉଠିବନି ସେ ଜାଣିନଥିଲା । ଏହି ସମୟରେ ତା ପାଇଁ ଦେବଦୂତ ସାଜିଥିଲେ ଫରେଷ୍ଟ ରେଞ୍ଜର । ତା ପରେ ପାର୍କ ଅନ୍ତର୍ଗତ ସେଙ୍କେଓ୍ୱେକେ ସେଣ୍ଟରକୁ ପିଲା ଗରିଲାକୁ ନିଆଯାଇ ଲାଳନପାଳନ କରାଯାଇଥିଲା । ଏହି ସେଙ୍କେଓ୍ୱେକେ ସେଣ୍ଟର ହେଉଛି ବିଶ୍ୱର ଏକମାତ୍ର ସ୍ଥାନ ଯେଉଁଠି ଅନାଥ ଗରିଲାମାନଙ୍କୁ ରଖାଯାଇଥାଏ । କିନ୍ତୁ ୨୦୧୯ରେ ପାର୍କ ରେଞ୍ଜର ମାଥ୍ୟୁ ସମ୍ଭୁ ନାମକ ଜଣେ ବ୍ୟକ୍ତିଙ୍କ ସହିତ ସେଲ୍ଫି ନେବାପରେ ଇଣ୍ଟରନେଟ ସେନସେସନ ହୋଇ ଯାଇଥିଲା ନାଦାକସି ।

 

 କିନ୍ତୁ ଗତ କିଛି ଦିନ ହେବ ନାଦାକସିର ଶରୀର ଖୁବ୍‌ ଅସୁସ୍ଥ ହୋଇ ପଡ଼ିଥିଲା । ଅନେକ ଚେଷ୍ଟାପରେ ନାଦାକାସିର ସ୍ୱାସ୍ଥ୍ୟବସ୍ଥାରେ କୌଣସି ସୁଧାର ଆସିଲାନାହିଁ । ଶେଷରେ ୨୬ ସେପ୍ୱେମ୍ବରରେ ନାଦାକାସି କେୟାରଟେକର  ବମାଙ୍କ କୋଳରେ ସବୁଦିନ ପାଇଁ ଆଖି ବୁଜିଦେଲା । ଗରିଲା ବମାଙ୍କ କୋଳରେ ଆଖି ବୁଜିଥିବା ଫଟୋ ସୋସିଅଲ ମିଡିଆରେ ଖୁବ୍‌ ଭାଇରାଲ ହେଉଛି ।

ବମା କୁହନ୍ତି ନାଦାକସିର ସ୍ୱଭାବ ଏବଂ ଜ୍ଞାନ ପଶୁଙ୍କୁ ବୁଝିବା ଶିଖେଇ ଦେଇଥିଲା ।  ତେଣୁ ସେମାନଙ୍କ ସୁରକ୍ଷା ଆମର ଗୁରୁ ଦାୟିତ୍ୱ ହେବା ଉଚିତ୍‌ ମୁଁ ବୁଝି ଯାଇଥିଲି ।

ଓଡ଼ିଶାର ୧୫ ଲକ୍ଷ ପିଲାଙ୍କ ପାଖରେ ନାହିଁ ମୋବାଇଲ୍

ଭୁବନେଶ୍ୱର: କୋଭିଡ୍ ପାଇଁ ଅନଲାଇନ୍ କ୍ଲାସକୁ ଦିଆଯାଉଛି ପ୍ରୋତ୍ସାହନ । ହେଲେ ଓଡ଼ିଶାର ୧୫ ଲକ୍ଷ ପିଲାଙ୍କ ପାଖରେ ନାହିଁ ମୋବାଇଲ୍ । ୧୫ଲକ୍ଷ ୮ହଜାର ୯୩୭ପିଲାଙ୍କ ପାଖରେ ଡିଜିଟାଲ ଡିଭାଇସ୍ ନଥିବା ଜଣାପଡ଼ିଛି । କୋଭିଡ୍ ସମୟରେ ପାଠପଢ଼ା ନେଇ କେନ୍ଦ୍ରକୁ ଏ ରିପୋର୍ଟ ଦେଇଛନ୍ତି ରାଜ୍ୟ ସରକାର ।

Online Classes During Covid, 15 Lakh Students Of Odisha Have No Phones

ଦେଶରେ ଝାଡ଼ଖଣ୍ଡରେ ସର୍ବାଧିକ ୩୨ ଲକ୍ଷ ପିଲାଙ୍କ ପାଖରେ ମୋବାଇଲ ନଥିବା ବେଳେ କର୍ଣ୍ଣାଟକରେ ୩୧ ଲକ୍ଷ ପିଲାଙ୍କ ପାଖରେ ମୋବାଇଲ୍ ନାହିଁ । ମଧ୍ୟପ୍ରଦେଶ ଓ ଜାମ୍ମୁ-କଶ୍ମୀରରେ ୭୦% ପିଲାଙ୍କ ପାଖରେ ମୋବାଇଲ ନଥିବା ବେଳେ, ତାମିଲନାଡୁର ୧୭ହଜାରରୁ ଅଧିକ ପିଲାଙ୍କ ପାଖରେ ନାହିଁ ମୋବାଇଲ ।

ଏଥିସହ ପଢ଼ନ୍ତୁ: କରୋନାର ବିନାଶକାରୀ ପରିଣାମ, ଗ୍ରାମାଞ୍ଚଳରେ ୩୭ ପ୍ରତିଶତ ଛାତ୍ରଛାତ୍ରୀ ପଢ଼ାରୁ ବଞ୍ଚିତ

ଜୁନ୍ ୩୦ ସୁଦ୍ଧା ବିଭିନ୍ନ ରାଜ୍ୟ ସରକାର କେନ୍ଦ୍ରକୁ ଏ ରିପୋର୍ଟ ଦେଇଛନ୍ତି । ସେଥିମଧ୍ୟରୁ ଆଣ୍ଡାମାନ ନିକୋବର, ଅରୁଣାଚଳ ପ୍ରଦେଶ, ଗୋଆ, ମହାରାଷ୍ଟ୍ର, ମଣିପୁର, ଉତ୍ତରପ୍ରଦେଶ ତଥ୍ୟ ଦେଇନଥିବା ବେଳେ ପଶ୍ଚିମବଙ୍ଗରେ ସର୍ଭେ ଜାରି ରହିଛି ।

ସାହିତ୍ୟ ପାଇଁ ନୋବେଲ ପାଇବେ ଅବଦୁଲ ରଜାକ ଗୁର୍‌ନାହ

ଷ୍ଟକହୋମ: ସାହିତ୍ୟ ପାଇଁ ନୋବେଲ ଘୋଷଣା   । ୨୦୨୧ ମସିହା ପାଇଁ ବିଶ୍ବର ସର୍ବୋଚ୍ଚ ସମ୍ମାନଜନକ ପୁରସ୍କାର ନୋବେଲ ପାଇବେ ତାଞ୍ଜାନିଆ ଔପନ୍ୟାସିକ ଅବଦୁଲ ରଜାକ ଗୁର୍‌ନାହ । ସାହିତ୍ୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ତାଞ୍ଜାନିଆ ଔପନ୍ୟାସିକ ଅବଦୁଲ ରଜାକ ଙ୍କୁ ଚଳିତ ଥର ପୁରସ୍କାର ପ୍ରଦାନ କରାଯିବା ନେଇ ଘୋଷଣା କରିଛି ନୋବେଲ ଚୟନ କମିଟି  । 1

948, ତାଞ୍ଜାନିଆର ଜଞ୍ଜିବାରରେ ଅବଦୁଲ ରଜାକ ଗୁର୍‌ନାହଙ୍କ ଜନ୍ମ । ହେଲେ ୬୦ ଦଶନ୍ଧିର ଶେଷରେ ସେ ଜଣେ ଶରଣାର୍ଥୀ ଭାବରେ ଇଂଲଣ୍ଡ ପଳାଇ ଆସିଥିଲେ । ଅବସର ପୂର୍ବରୁ ରଜାକ କେଣ୍ଟ ବିଶ୍ବବିଦ୍ୟାଳୟ, କ୍ୟାଣ୍ଟରବରୀରେ ଇଂରାଜୀ ଓ ଉତ୍ତର ଔପନିବେଶିକ ସାହିତ୍ୟତ ପ୍ରାଧ୍ୟାପକ ଥିଲେ । ଗୁରନାହଙ୍କ ଚତୁର୍ଥ ଉପନ୍ୟାସ ‘ପାରାଡାଇସ'(1994) ତାଙ୍କୁ ଜଣେ ଲେଖିକ ରୂପେ ପରିଚୟ ପ୍ରଦାନ କରିଥିଲା  ।  ୯୦ ଦଶନ୍ଧି ପାଖାପାଖି ପୂର୍ବ ଆଫ୍ରିକାର ଏକ ଅନୁସନ୍ଧାନ ଯାତ୍ରା ସମୟରେ ସେ ଏହାକୁ ଲେଖିଥିଲେ ।

ପାରାଡାଇସ ଉପନ୍ୟାସ ଦର୍ଶକଙ୍କ ଆଦୃତ ହୋଇଥିଲା  । ଏଭଳି ଏକ ମାର୍ମିକ ଲେଖା ସମଗ୍ର ବିଶ୍ୱରେ ତାଙ୍କୁ ପରିଚୟ ପ୍ରଦାନ କରିଥିଲା  ।  ଏହା ଏକ ଦୁଃଖଦ ପ୍ରେମ କାହାଣୀ, ଯେଉଁଥିରେ ଦୁନିଆ ଓ ମାନ୍ୟତା ମଧ୍ୟରେ ପରସ୍ପର ସଂଘର୍ଷର କଥା ଉଲ୍ଲେଖ ରହିଛି । ଅବଦୁଲ ରଜାକ ଯେଉଁଭଳି ଭାବରେ ଶରଣାର୍ଥୀ ଅଭିଜ୍ଞତାକୁ ବର୍ଣ୍ଣନା କରିଛନ୍ତି, ତାହା ବିରଳ ଅଟେ । ସେ ପରିଚୟ ଏବଂ ଆତ୍ମ-ପ୍ରତିଛବି ଉପରେ ଧ୍ୟାନ ଦିଅନ୍ତି ।