spot_img
Home Blog Page 5119

ଲୋକସେବା ଭବନରେ ପହଞ୍ଚିଲେ ଜଗନ ମୋହନ, କିଛି ସମୟ ପରେ ମୁଖ୍ୟମନ୍ତ୍ରୀ ନବୀନଙ୍କ ସହ ଆଲୋଚନା

ଭୁବନେଶ୍ୱର: ଓଡ଼ିଶାରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇଏସ୍ ଜଗନ ମୋହନ ରେଡ୍ଡୀ । ଭୁବନେଶ୍ୱର ବିମାନବନ୍ଦରରେ ଆନ୍ଧ୍ର ମୁଖ୍ୟମନ୍ତ୍ରୀଙ୍କୁ ଓଡ଼ିଶା ସରକାରଙ୍କ ପକ୍ଷରୁ ଭବ୍ୟ ସ୍ୱାଗତ କରାଯାଇଛି । ବିମାନବନ୍ଦରରୁ ସିଧା ରାଜ୍ୟ ଅତିଥି ଭବନ ପରେ ଲୋକସେବା ଭବନ ପହଞ୍ଚିଛନ୍ତି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ । ସନ୍ଧ୍ୟା ୫ଟା ୫୦ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଲୋକସେବା ଭବନ କନଭେନସନ ସେଣ୍ଟରରେ ଭେଟିବେ ଆନ୍ଧ୍ର ମୁଖ୍ୟମନ୍ତ୍ରୀ ।

Andhra Pradesh CM Jagan Mohan Reddy Reaches Bhubaneswar To Meet Odisha CM

୨ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କୋଟିଆ ସୀମା ବିବାଦ, ପୋଲାଭରମ ସହ ନେରେଡି ପ୍ରକଳ୍ପ ବାବଦରେ ଆଲୋଚନା ହେବା ଆଶା କରାଯାଉଛି । ଦୁଇ ନେତା ପ୍ରାୟ ୪୫ ମିନିଟ୍ ଧରି ବିଭିନ୍ନ ପ୍ରସଙ୍ଗରେ କଥା ହେବେ । ପରେ ସନ୍ଧ୍ୟା ୭ଟାରେ ଭୁବନେଶ୍ୱର ବିମାନବନ୍ଦରକୁ ଯାଇ ଆନ୍ଧ୍ର ଫେରିଯିବେ ଜଗନ ମୋହନ ରେଡ୍ଡୀ । ଆନ୍ଧ୍ର ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି କମିଶନରେଟ୍ ପୋଲିସ ।

ବିଶ୍ୱ ସ୍ୱାସ୍ଥ୍ୟ ସଂଗଠନର ଅନୁମତି ପରେ ବ୍ରିଟେନ ହଟାଇଲା କଟକଣା, ଆଉ ଆବଶ୍ୟକ ନାହିଁ କ୍ୱାରେଣ୍ଟାଇନ୍

ଲଣ୍ଡନ: ବିଶ୍ବ ସ୍ବାସ୍ଥ୍ୟ ସଂଗଠନର ଅନୁମତି ପରେ ବ୍ରିଟେନ ସରକାରଙ୍କ ନିଷ୍ପତ୍ତି। କୋଭାକ୍ସିନର ସମ୍ପୂର୍ଣ୍ଣ ଡୋଜ ନେଇଥିବା ଯ଼ାତ୍ରୀଙ୍କୁ କ୍ବାରେଣ୍ଟାଇନରେ ରହିବାକୁ ପଡିବ ନାହିଁ। ଆସନ୍ତା ନଭେମ୍ବର ୨୨ରୁ ଲାଗୁ ହେବ ନୂଆ ନିୟମ । ଏହା ସହ ଚୀନର ସିନୋଭାକ, ସିନୋଫାର୍ମ ସମେତ ଭାରତର କୋଭାକ୍ସିନକୁ ବ୍ରିଟେନ ନିଜ ମଞ୍ଜୁରୀ ତାଲିକାରେ ସ୍ଥାନିତ କରିଛି । ନୂଆ ନିଷ୍ପତ୍ତି ଯୋଗୁ ଭାରତ, ମାଲେସିଆ ଓ ୟୁନାଇଟେଡ ଆରବ ଏମିରେଟସ ସମେତ ଅନ୍ୟାନ୍ୟ ଦେଶର ଯାତ୍ରୀମାନେ ଯଦି ବ୍ରିଟେନ ଯାଆନ୍ତି ତେବେ ସେମାନଙ୍କୁ କ୍ବାରେଣ୍ଟାଇନରେ ରହିବାର ଆବଶ୍ୟକ ପଡିବ ନାହିଁ ।

ଏହା ସହ ବ୍ରିଟେନର ପରିବହନ ମନ୍ତ୍ରଣାଳୟ ଟିକା ନିୟମକୁ ଆହୁରି କୋହଳ କରିଛି । କୋଭିଡର ସମ୍ପୂର୍ଣ୍ଣ ଡୋଜ ନେଇଥିବା 18ବର୍ଷରୁ କମ୍ ପିଲାଙ୍କ ଲାଗି ମଧ୍ୟ ଏହି କଟକଣା ହଟାଇଦିଆଯାଇଛି । ଜରୁରୀକାଳୀନ ବ୍ୟବହାର ଲାଗି ବିଶ୍ବ ସ୍ବାସ୍ଥ୍ୟ ସଂଗଠନର ସ୍ବତନ୍ତ୍ର କମିଟି କୋଭାକ୍ସିନକୁ ଅନୁମତି ଦେବା ପରେ ବ୍ରିଟେନ ସମେତ କିଛି ରାଷ୍ଟ୍ର ନିଜ ନିୟମରେ ପରିବର୍ତ୍ତନ କରିବା ଆରମ୍ଭ କରିଛନ୍ତି ।

ପୂର୍ବରୁ ଆମେରିକୀୟ ପ୍ରଶାସନ ମଧ୍ୟ ଏ ନେଇ ବଡ଼ ନିଷ୍ପତ୍ତି ନେଇଛନ୍ତି । ଦୀର୍ଘ ୨୦ ମାସ ପରେ ଆମେରିକା ବିଦେଶୀ ପର୍ଯ୍ୟଟକ ଓ ଯାତ୍ରୀଙ୍କ ଲାଗି କଟକଣା ପ୍ରତ୍ୟାହାର କରିଛି । ଏଣିକି ସମ୍ପୂର୍ଣ୍ଣ କୋଭିଡ ଡୋଜ ନେଇଥିବା ଲୋକ ଆମେରିକା ଯାଇପାରିବେ । ଫଳରେ ଦୀର୍ଘ ଦିନ ଧରି ପରିବାର, ଜ୍ଞାତି ପରିଜନଙ୍କ ସହ ଏକାଠି ହୋଇପାରୁ ନଥିବା ଲୋକେ ଉପକୃତ ହେବେ । ଏହା ସହ କୂଟନୈତିକ, ବାଣିଜ୍ୟିକ, ପର୍ଯ୍ୟଟନଗତ ସମ୍ପର୍କ ମଧ୍ୟ ସାରା ବିଶ୍ବ ସହ ଯୋଡି ହେବ ।

କୋଭିଡର ଭୟାବହତା ଯୋଗୁଁ ଗତବର୍ଷ ପ୍ରଥମ ଭାଗରେ ତତକାଳୀନ ରାଷ୍ଟ୍ରପତି ଡୋନାଲଡ ଟ୍ରମ୍ପ ଏହି କଟକଣା ଜାରି କରିଥିଲେ । ତାଙ୍କ ପରେ ରାଷ୍ଟ୍ରପତି ଜୋ ବାଇଡେନ ଏହି କଟକଣା ପ୍ରତ୍ୟାହାର କରିଛନ୍ତି । ଆମେରିକାର ଏହି କଟକଣା ଯୋଗୁଁ ସାରା ବିଶ୍ବର ଲକ୍ଷ ଲକ୍ଷ ଲୋକ ସମସ୍ୟାରେ ପଡିଥିଲେ । ବିଶେଷ କରି ୟୁରୋପ, ବ୍ରିଟେନ, ଚୀନ, ଭାରତ, ମେକ୍ସିକୋ ଓ କାନାଡା ପକ୍ଷରୁ ତୀବ୍ର ବିରୋଧ ହୋଇ ଆସୁଥିଲା ।

ଏଥିସହିତ ପଢ଼ନ୍ତୁ: ଭାରତୀୟ କ୍ରିକେଟରେ ରବି ଶାସ୍ତ୍ରୀଙ୍କ ଯୁଗ ଶେଷ; ଏବେ ଦ୍ରାବିଡଙ୍କ ପାଇଁ ଅଗ୍ନି ପରୀକ୍ଷା

ଚୋରା ଚାଲାଣ ବେଳେ ୨ଟି ହାତୀଦାନ୍ତ ଜବତ, ୨ ଗିରଫ

କେନ୍ଦୁଝର: ହାତୀଦାନ୍ତ କିଣିବା ବାହାନାରେ ଗଲେ, ଚୋରା ଚାଲାଣକାରୀଙ୍କୁ ଧରିଲେ । କେନ୍ଦୁଝର ବନ ବିଭାଗ ୭.୧୯୫ କେଜି ଓଜନର ୨ଟି ହାତୀଦାନ୍ତକୁ ଜବତ କରିଛି । ଏହି ମାମଲାରେ ୨ ଜଣଙ୍କ ଗିରଫ କରିଛି ବନ ବିଭାଗ । କେନ୍ଦୁଝର ବନଖଣ୍ଡର ଲୁଣଘର ଗାଁ ନିକଟରେ ହାତୀଦାନ୍ତ ଚୋରା ଚାଲାଣ ନେଇ ବିଶ୍ୱସ୍ତ ସୂତ୍ରରୁ ଖବର ମିଳିଥିଲା । ଏସିଏଫ୍ ଘନଶ୍ୟାମ ମହାନ୍ତଙ୍କ ନେତୃତ୍ୱରେ ଏକ ଚିମ୍ ହାତୀଦାନ୍ତ କିଣିବା ବାହାନା କରି ଚାଲାଣକାରୀଙ୍କ ପାଖରେ ପହଞ୍ଚିଥିଲେ ।

Keonjhar Forest Department Seized Two Tusk Of Elephant And Held 2

ମାମଲାରେ ବନ ବିଭାଗ କେନ୍ଦୁଝର ସଦର ଥାନା ଅଞ୍ଚଳ ଆମ୍ବଡହରା ଗାଁର ଡାକ୍ତର ମୁଣ୍ଡା ଓ ମୟୂରଭଞ୍ଜ ବାଙ୍ଗିରିପୋଶି ଥାନା ଅଞ୍ଚଳର ଚିତ୍ତରଞ୍ଜନ ବଇଠାଙ୍କୁ ଗିରଫ କରିଛି । ଉଭୟଙ୍କ ଠାରୁ ୨ଟି ହାତୀଦାନ୍ତ ଜବତ କରାଯାଇଛି । ଏହି ରାକେଟରେ ଆଉ କାହାର ସମ୍ପୃକ୍ତି ରହିଛି, ହାତୀ ଦାନ୍ତ କେଉଁଠି ଆସିଲା, କେଉଁଠିକୁ ଯାଉଥିଲା । ଏସବୁ ଦିଗରେ ତଦନ୍ତ ଦାରି ରହିଛି ସୂଚନା ଦେଇଛନ୍ତି କେନ୍ଦୁଝର ଡିଏଫ୍ଓ ।

ଲଖିମପୁର ଖେରୀ ହିଂସା ମାମଲାରେ ନୂଆ ଖୁଲାସା: ଆଶିଷ ମିଶ୍ରଙ୍କ ବନ୍ଧୁକରୁ ହୋଇଥିଲା ଫାୟାରିଂ

0

ଲକ୍ଷ୍ଣୌ: ୩ ଅକ୍ଟୋବର ଲକ୍ଷ୍ମୀପୁର ଖେରୀରେ କୃଷକଙ୍କୁ କାର୍‌ରେ ଦଳିଦେବା ମାମଲାରେ ନୂଆ ତଥ୍ୟ ସାମ୍ନାକୁ ଆସିଛି । ଫରେନ୍ସିକ ରିପୋର୍ଟ ଅନୁଯାୟୀ ଦାବି କରାଯାଇଛି ଯେ, ସେହି ଜଙ୍ଘନ୍ୟକାଣ୍ଡ ସମୟରେ ଫାୟରିଂ କେନ୍ଦ୍ର ଗୃହ ରାଜ୍ୟ ମନ୍ତ୍ରୀ ଅଜୟ ମିଶ୍ରାଙ୍କ ପୁତ୍ର ଆଶିଷ ମିଶ୍ରଙ୍କ ବନ୍ଧୁକରୁ ହୋଇଥିଲା । ତେବେ  ମାମଲାର ତଦନ୍ତ ଅଗ୍ରଗତି ନେଇ ମଧ୍ୟ ଅସନ୍ତୋଷ ପ୍ରକାଶ କରିଥିଲେ ସୁପ୍ରିମକୋର୍ଟ । ଏବଂ କୌଣସି ଜଣେ ବ୍ୟକ୍ତିଙ୍କୁ ସୁରକ୍ଷା ଦେବାକୁ ତଦନ୍ତ ଏଭଳି ମନ୍ଥର ଗତିରେ ଚାଲୁଥିବା ମାନ୍ୟବର କୋର୍ଟ କହିଛନ୍ତି ।

ସେଦିନର ଜଙ୍ଘନ୍ୟକାଣ୍ଡ ସମୟରେ ଆଶିଷ ମିଶ୍ର ନିଜ ବନ୍ଧୁକ ଏବଂ ତାଙ୍କ ବନ୍ଧୁ ଅଙ୍କିତ ଦାସଙ୍କ ରିପିଟର ଗନ ପିଷ୍ଟଲରୁ ଫାୟରିଂ କରିଥିଲେ । ବର୍ତ୍ତମାନ ସମୟରେ ଉଭୟ ଅଭିଯୁ୍କ୍ତ ଲକ୍ଷ୍ମୀପୁର ଖେରୀ ଜିଲ୍ଲା ଜେଲରେ ବନ୍ଦ ଅଛନ୍ତି । ଏଏସ୍‌ପି ଅରୁଣ କୁମାର ସିଂହ କହିଛନ୍ତି ଯେ ମାମଲାରେ ଜଡ଼ିତ ସାକ୍ଷୀଙ୍କୁ ତଦନ୍ତ ପାଇଁ ପଠାଯାଇଛି । ଯାହାର ଆଧାରରେ ଆଗକୁ ତଦନ୍ତ ହେବ । ସୋମବାର ସୁପ୍ରିମକୋର୍ଟ ମାମଲା  ଉପରେ ଶୁଣାଣି କରି କହିଥିଲେ ଯେ, ଲକ୍ଷ୍ମୀପୁର ଖେରୀ ହିଂସା ମାମଲାରେ ସ୍ପେଶାଲ ଇନ୍‌ଭେଷ୍ଟିଗେଟିଂ ଟିମ୍ (ଏସ୍‌ଆଇଟି) ତଦନ୍ତର ତଦାରଖ ନେଇ ୟୁପି ସରକାର ପକ୍ଷରୁ ଗଠିତ ନୂଆ ନ୍ୟାୟିକ ଆୟୋଗ ଉପରେ ତାଙ୍କର ଭରସା ନାହିଁ । ମାନ୍ୟବର କୋର୍ଟ ଏସ୍ଆଇଟି ତଦନ୍ତ ରିପୋର୍ଟ ଉପରେ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି । ସର୍ବୋଚ୍ଚ ନ୍ୟାୟାଳୟ ପକ୍ଷରୁ କୁହାଯାଇଛି ଯେ, ନିରପେକ୍ଷ ତଦନ୍ତ ଲାଗି ଅନ୍ୟ ରାଜ୍ୟର ସେବାନିବୃତ୍ତ ବିଚାରପତି ଦ୍ୱାରା ମାମଲାର ତଦାରଖ କରାଯାଉ । ତେବେ ମାମଲା ଉପରେ ଆଗାମୀ ଶୁଣାଣି ୧୨ ନଭେମ୍ୱରର ଧାର୍ଯ୍ୟ କରାଯାଇଛି ।

ସର୍ବୋଚ୍ଚ ନ୍ୟାୟାଳୟ ମୁଖ୍ୟ ନ୍ୟାୟାଧିଶ ଜଷ୍ଟିସ୍ ଏନ୍‌ବି ରମଣ, ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ ହିମା କୋହଲୀଙ୍କ ଖଣ୍ଡପୀଠ ରିପୋର୍ଟ ଦେଖିବା ପରେ ତଦନ୍ତର ମନ୍ଥର ଗତି ନେଇ ଅସନ୍ତୋଷ ପ୍ରକାଶ କରିଛନ୍ତି । ଖଣ୍ଡପୀଠକୁ ଏଭଳି ଅନୁଭବ ହେଉଛି ଯେ, ଜଣେ ନିର୍ଦ୍ଦିଷ୍ଟ ବ୍ୟକ୍ତିଙ୍କୁ ସୁରକ୍ଷା ଦେବା ପାଇଁ ପ୍ରମାଣ ସଂଗ୍ରହ ହେଉଛି ।

ଏଥିସହିତ ପଢ଼ନ୍ତୁ: ୨୦ ନଭେମ୍ୱରରେ ଇପିଏଫ୍‌ଓ ଟ୍ରଷ୍ଟ ବୋର୍ଡର ବୈଠକ: ଖାତାଧାରକଙ୍କୁ ସୁଧ ଦିଆଯିବ ନେଇ ହେବ ନିଷ୍ପତ୍ତି

କରୋନା ଭ୍ୟାକ୍ସିନ କଲା କୋଟିପତି

ଆପଣ ଭ୍ୟାକ୍ସିନ ନେଇଛନ୍ତି କି ? ଭ୍ୟାକ୍ସିନ ନେବା ପରେ ଆପଣଙ୍କ ଭାଗ୍ୟ ପରିବର୍ତ୍ତନ ହୋଇଛି କି ? ହୁଏତ ଆପଣଙ୍କ ଭାଗ୍ୟରେ ଏଭଳି ନ ହୋଇପାରେ । କିନ୍ତୁ ଆମେ ଆପଣଙ୍କୁ ଆଜି ଜଣେ ଏଭଳି ମହିଳାଙ୍କୁ ପରିଚିତ କରାଇବୁଯେ କି କରୋନା ଭ୍ୟାକ୍ସିନ ନେବା ପରେ ହୋଇଛନ୍ତି କୋଟିପତି । ଏହା ଶୁଣି ଆପଣ ନିଶ୍ଚୟ ଆଶ୍ଚର୍ଯ୍ୟ ହେଉଥିବେ ମାତ୍ର ଏହା ସମ୍ପୂର୍ଣ୍ଣ ସତ ।

କରୋନା ମହାମାରୀରୁ ବର୍ତ୍ତିବା ପାଇଁ ସାରା ଦେଶରେ ଭ୍ୟାକ୍ସିନେସନ ଅଭିଯାନ ଜାରି ରହିଛି । ଏହି ସମୟରେ ଜଣେ ଅଷ୍ଟ୍ରେଲିଆନ ମହିଳା ଭ୍ୟାକ୍ସିନ ନେବା ପାଇଁ ଅନଲାଇନ ସ୍ଲଟ୍ ବୁକ୍ କରିଥିଲେ । ଭ୍ୟାକ୍ସିନ ନେବା ପରେ ସେ ରାତାରାତି କୋଟିପତି ହୋଇଯାଇଥିଲେ । ଆସନ୍ତୁ ଜାଣିବା ସେହି କୋଟିପତି ମହିଳାଙ୍କ ବିଷୟରେ :-

ଆମେରିକାର ଡେଲି ମେଲ୍ ରିପୋର୍ଟ ଅନୁସାରେ ‘ମିଲିୟନ ଡଲାର ଭ୍ୟାକ୍ସ’ ତରଫରୁ ଭ୍ୟାକ୍ସିନ ଲଗାଇଲେ ପୁରସ୍କାର ରାଶି ରଖାଯାଇଥିଲା । ଏଥିରେ ପାଖାପାଖି ୩୦ ଲକ୍ଷ ଲୋକ ରେଜିଷ୍ଟ୍ରସନ କରିଥିଲେ । ଏମାନଙ୍କ ମଧ୍ୟରୁ ୨୫ ବର୍ଷୀୟ ମହିଳା ଜୋଆନ ଝୁ ନାମକ ମହିଳାଙ୍କର ଲଟେରୀ ଲାଗିଥିଲା । ଯେଉଁଥିରେ ତାଙ୍କୁ ୧ ମିଲିୟନ ଡଲାର ଅର୍ଥାତ୍ ଭାରତୀୟ ମୂଲ୍ୟରେ ୭.୨୮ କୋଟି ଟଙ୍କା ପୁରସ୍କାର ରାଶି ମିଳିଥିଲା ।

୩୦ ଲକ୍ଷ ଲୋକଙ୍କୁ ପଛରେ ପକାଇ ଭାଗ୍ୟଶାଳୀ ବିଜେତା ହୋଇଥିଲେ ଜୋଆନ ଝୁ । ମିଲିୟନ ଡଲାର ଭ୍ୟାକ୍ସ କହିଥିଲେ କି ଭ୍ୟାକ୍ସିନେସନ ପ୍ରକ୍ରିୟାକୁ ଆହୁରି ଦ୍ରୁତ କରିବାକୁ ଚେଷ୍ଟା କରି ସେମାନେ ଏଭଳି ପୁରସ୍କାର ରାଶି ରଖିଥିଲେ ।

ଭ୍ୟାକ୍ସିନ ବଦଳରେ ପୁରସ୍କାର :

ରିପୋର୍ଟ ଅନୁସାରେ ଦେଶରେ ଭ୍ୟାକ୍ସିନେସନ ପ୍ରକ୍ରିୟା ଆରମ୍ଭ ହେବାର ଅନେକ ମାସ ବିତିଯାଇଥିଲେ ମଧ୍ୟ ଭ୍ୟାକ୍ସିନ ଲଗାଇବାରେ ଲୋକଙ୍କର ଆଦୌ ଆଗ୍ରହ ନଥିଲା । ଏହି କାରଣରୁ ମିଲିୟନ ଡଲାର ଭ୍ୟାକ୍ସ ଲଟେରୀ ପୁରସ୍କାର ପାଇଁ ଚିନ୍ତା କଲେ । ଝୁ ଏହାର ବିଜେତା ହୋଇ ୧ ମିଲିୟନ ପାଇଥିବା ବେଳେ ଅନ୍ୟମାନଙ୍କୁ ମଧ୍ୟ ଉପହାର ଦିଆଯାଇଥିଲା ।

 

 

ପାକିସ୍ତାନ ଯାହାଙ୍କୁ ଖୋଜୁଛି ତାଙ୍କୁ ଭାରତ ଦେଲା ପଦ୍ମଶ୍ରୀ, ଜାଣନ୍ତୁ କ’ଣ ପାଇଁ ଇମ୍ରାନ ଆଣ୍ଡ୍ କୋ ଏହି ଛବିକୁ ଭୁଲିବାକୁ ଚାହିଁବ ..

0

ନୂଆଦିଲ୍ଲୀ: ବୁଧବାର ଦିନ ରାଷ୍ଟ୍ରପତି ଭବନରୁ ଏମିତି ଏକ ଦୃଶ୍ୟ ସାମ୍ନାକୁ ଆସିଛି ଯାହାକୁ ଯଦି ପାକିସ୍ତାନୀ ଶାସକ ଦେଖିଥିବେ ତେବେ ସେମାନଙ୍କ ନିଦ ହଜିଯାଇଥିବ । ରାଷ୍ଟ୍ରପତି ରାମ ନାଥ କୋବିନ୍ଦ ବୁଧବାର ଦିନ ୧୯୭୧ ମସିହା ବଙ୍ଗଳାଦେଶ ମୁକ୍ତି ସଂଗ୍ରାମର ହିରୋ ଏବଂ ପାକିସ୍ତାନ ସେନାରେ କର୍ଣ୍ଣେଲ ଥିବା କାଜୀ ସଜ୍ଜାଦ ଅଲ୍ଲୀ ଜହିରଙ୍କୁ ପଦ୍ମଶ୍ରୀରେ ସମ୍ମାନିତ କରିଛନ୍ତି। ଯାହା ପାକିସ୍ତାନର ଘା’କୁ ପୁଣିଥରେ ଉଖୁରାଇ ଦେଇଛି। ୧୯୭୧ ଭାରତ-ପାକ୍ ଯୁଦ୍ଧକୁ ଭୁଲିବାକୁ ଚାହୁଁଥିବା ପାକିସ୍ତାନୀ ସେନା ଓ ଇମ୍ରାନଙ୍କ ସେଇ ଘା’ ପୁଣି ତାଜା ହୋଇଥିବ। କାରଣ ପାକିସ୍ତାନ ସେନାରେ ସେତେବେଳେ କର୍ଣ୍ଣେଲ ଥିବା ବାଂଲା ମୁକ୍ତିଯୁଦ୍ଧକୁ ସମର୍ଥନ କରି ପାକିସ୍ତାନୀ ସେନାର ଅନେକ ଗୁପ୍ତ ତଥ୍ୟ ଭାରତକୁ ହସ୍ତାନ୍ତର କରିଥିଲେ। କେବଳ ଏତିକି ନୁହେଁ, ସେ ବାଂଲାଦେଶର ମୁକ୍ତ ବାହିନୀଙ୍କ ହଜାର ହଜାର ଯୋଦ୍ଧାଙ୍କୁ ସାମରିକ ତାଲିମ ମଧ୍ୟ ଦେଇଥିଲେ। କ୍ଷୁବ୍ଧ ପାକିସ୍ତାନ ସେତେବେଳ ତାଙ୍କ ନାଁରେ ମୃତ୍ୟୁ ୱାରେଣ୍ଟ ଜାରି କରିଥିଲା। କିନ୍ତୁ କାଜିଙ୍କୁ ପାକ୍ ସେନା କେବେ ମଧ୍ୟ ଧରି ପାରିନଥିଲା । ପାକିସ୍ତାନୀ ସେନାକୁ ଚକମା ଦେଇ ସେ ଭାରତ ପଳାଇ ଆସିଥିଲେ । ଆଉ ସେବେଠାରୁ ପାକିସ୍ତାନ ତାଙ୍କୁ ଖୋଜୁଛି । ସିଏ ପାଲଟି ଯାଇଛନ୍ତି ପାକିସ୍ତାନର ମୋଷ୍ଟ ୱାଣ୍ଟେଡ୍ ।

କାଜୀ ସାଜଜାଦ ଅଲି ଜହିର ଭାରତକୁ ପଳାୟନ କରିବା ପରେ ସେତେବେଳର ଇଷ୍ଟ ପାକିସ୍ତାନରେ ଥିବା ତାଙ୍କ ଘରକୁ ପାକିସ୍ତାନୀ ସେନା ଜାଳି ଦେଇଥିଲା । ତାଙ୍କ ମା ଏବଂ ଭଉଣୀଙ୍କୁ ମଧ୍ୟ ପାକିସ୍ତାନୀ ସେନା ଟାର୍ଗେଟ ମଧ୍ୟ କରିଥିଲେ, କିନ୍ତୁ ସେ ଦୁହେଁ ସୁରକ୍ଷିତ ସ୍ଥାନକୁ ପଳାଇଥିଲେ । ୧୯୬୯ ଶେଷରେ କର୍ଣ୍ଣେଲ ଜହିର ପାକିସ୍ତାନୀ ସେନାରେ ଯୋଗ ଦେଇଥିଲେ । ସେତେବେଳେ ବାଂଲାଦେଶ ମଧ୍ୟ ପାକିସ୍ତାନ ଦ୍ୱାରା ଶାସିତ ହେଉଥିଲା। ପାକିସ୍ତାନୀ ସେନାର ଆର୍ଟିଲିରି କର୍ପସ (ଆର୍ଟିଲିରି)ରେ ଯୋଗ ଦେଇଥିବା ଜହିରଙ୍କୁ ତାଲିମ ପାଇଁ ପାକିସ୍ତାନର ବିଭିନ୍ନ ସ୍ଥାନକୁ ପଠାଯାଇଥିଲା।

ପାକିସ୍ତାନୀ ସେନାର ୧୪ ପାରା ବ୍ରିଗେଡ୍ ସ୍ପେଶାଲ୍ ଫୋର୍ସରେ କର୍ଣ୍ଣେଲ ଜାହିରଙ୍କୁ ପାକିସ୍ତାନର ସ୍ପେଶାଲ୍ ଫୋର୍ସରେ ଅନ୍ତର୍ଭୁକ୍ତ କରାଯାଇଥିଲା । ତାଙ୍କର ପ୍ରଶିକ୍ଷଣ ମଧ୍ୟ ପାକିସ୍ତାନର ସାଧାରଣ ସେନାର ସୈନିକଙ୍କଠାରୁ ବହୁତ ଭିନ୍ନ ଥିଲା ।ଇଏ ସେଇ ସମୟ ଥିଲା ଯେତେବେଳେ ଭାଷାକୁ ନେଇ ପଶ୍ଚିମ ଓ ପୂର୍ବ ପାକିସ୍ତାନ ମୁହାଁମୁହିଁ ହେଉଥିଲେ। ପାକିସ୍ତାନୀ ସେନା ପୂର୍ବ ପାକିସ୍ତାନ ବା ଏବର ବାଂଲାଦେଶ ର ସୈନିକ ଓ ଅଫିସରଙ୍କୁ ସନ୍ଦେହ କରୁଥିଲା । ସେମାନଙ୍କ ଉପରେ ନଜର ରଖୁଥିଲା । କାରଣ ପାକିସ୍ତାନୀ ସେନାର ଆଶଙ୍କା ଥିଲା ବଙ୍ଗାଳୀ ଅଫିସର ବିଦ୍ରୋହ କରି ପାରନ୍ତି।

ପାକିସ୍ତାନୀ ସେନାର ବଙ୍ଗାଳୀ ଅଧିକାରୀଙ୍କ ଉପରେ ଆଇଏସଆଇ ଏବଂ ଆଭ୍ୟନ୍ତରୀଣ ଗୁପ୍ତଚର ବିଭାଗ ନଜର ରଖିଥିଲା । ସନ୍ଦେହ ଏତେ ଅଧିକ ଥିଲା ଯେ, ଅଧିକାଂଶ ବାଂଲାଦେଶୀ ସୈନିକ ଏବଂ ଅଧିକାରୀଙ୍କୁ ଗ୍ରାଉଣ୍ଡ ଡ୍ୟୁଟିରୁ ହଟାଇ ଦିଆଯାଇଥିଲା ।ଦୁଇ ଜଣ ବଙ୍ଗାଳୀ ସେନା ଅଧିକାରୀଙ୍କ ଏକାଠି ମିଶିବା ବାରଣ ଥିଲା । ସେମାନେ ଏକାଠି ଡ୍ୟୁଟି ମଧ୍ୟ କରିପାରୁନଥିଲେ । ଏହା ସତ୍ତ୍ବେ ଏହି ଅନେକ ବଙ୍ଗାଳୀ ସୈନିକ ଓ ଅଧିକାରୀ ପାକ୍ ସେନା ବିରୋଧରେ ଫୁଙ୍କିଥିଲେ ବିଦ୍ରୋହର ବିଗୁଲ । ଯେଉଁମାନଙ୍କ ମଧ୍ୟରେ ଥିଲେ କର୍ଣ୍ଣେଲ ଜାହିର ।

ଜାମ୍ମୁ କାଶ୍ମୀର ସୀମା ଦେଇ ଜାହିର ଭାରତ ମଧ୍ୟକୁ ପ୍ରବେଶ କରିଥିଲେ । ସେହି ସମୟରେ ତାଙ୍କ ପାଖରେ ୨୦ ଟଙ୍କା ଓ କେବଳ ପିନ୍ଧିଥିବା ଡ୍ରେସ ଥିଲା । କିନ୍ତୁ ସେ ପାକିସ୍ତାନରୁ ଆସିଥିବା ସମୟରେ ପାକିସ୍ତାନ ସୀମାକୁ ନେଇଥିବା କିଛି ଗୁରୁତ୍ବପୂର୍ଣ୍ଣ କାଗଜ ପତ୍ର ଲୁଚେଇକି ସାଙ୍ଗରେ ଆଣିଥିଲେ ଏବଂ ସେ ସବୁ କାଗଜ ପତ୍ରକୁ ଭାରତୀୟ ସେନାକୁ ହସ୍ତାନ୍ତର କରିଥିଲେ । ଭାରତ କର୍ଣ୍ଣେଲ ଜାହିରଙ୍କୁ ପୂର୍ଣ୍ଣ ସମ୍ମାନ ଦେଇଥିଲା ଏବଂ ତାଙ୍କୁ ବାଂଲାଦେଶର ମୁକ୍ତି ବାହିନୀ ଯୋଦ୍ଧାମାନଙ୍କୁ ତାଲିମ ଦେବା ଦାୟିତ୍ୱ ଦେଇଥିଲା | ଜହିର ହଜାର ହଜାର ବାଂଲାଦେଶୀ ନାଗରିକଙ୍କୁ ସାମରିକ ତାଲିମ ଦେଇଥିଲେ। ତାଙ୍କ ତତ୍ତ୍ବାବଧାନରେ ଭାରତୀୟ ସେନାକୁ ଦିଆଯାଇଥିବା ତୋପ ସହିତ ସିଲହେଟ ନିକଟରେ ଏକ ଫ୍ରଣ୍ଟ ମଧ୍ୟ ସ୍ଥାପନ କରାଯାଇଥିଲା।

ବ୍ୟାଙ୍କ ଲୁଟିବାକୁ ଯାଇ ପୋଲିସ ପୁଅ ଗିରଫ

ରାଉରକେଲା: ବାପା ପୋଲିସ, ପୁଅ ଲୁଟେରା ! ସୁନ୍ଦରଗଡ଼ ଏକ୍ସିସ୍ ବ୍ୟାଙ୍କରୁ ୧୫ ଲକ୍ଷ ଲୁଟ୍ ଘଟଣାରେ ପୋଲିସକୁ ସଫଳତା ମିଳିଛି । ଲୁଟର କିଛି ସମୟ ମଧ୍ୟରେ ସମସ୍ତ ଟଙ୍କା ଜବତ କରିଛି ପୋଲିସ । ବ୍ୟାଙ୍କ ଲୁଟ୍ କରିଥିବା ଅଭିଯୁକ୍ତକୁ ପୋଲିସ ଗିରଫ କରିଛି । ସୂଚନା ଅନୁସାରେ, ଗିରଫ ଲୁଟେରା ଜଣଙ୍କ ଜଣେ ଏଏସ୍ଆଇଙ୍କ ପୁଅ । ଅଭିଯୁକ୍ତ ବାପାଙ୍କ ବନ୍ଧୁକ ଦେଖାଇ ବ୍ୟାଙ୍କରୁ ୧୫ ଲକ୍ଷ ଟଙ୍କା ଲୁଟ୍ କରିଥିବା ଅଭିଯୋଗ ହୋଇଛି ।

Sundergarh AXIS Bank Loot Case, Police Arrested ASI Son

ଏକ୍ସିସ୍ ବ୍ୟାଙ୍କରୁ ଲୁଟ୍ ସୂଚନା ପାଇ ପୋଲିସ ତତକ୍ଷଣାତ୍ ପହଞ୍ଚି ଥିଲା । ଅଭିଯୁକ୍ତ ଲୁଟେରା ପୋଲିସ ଉପରକୁ ପ୍ରଥମେ ଫାୟାରିଂ କରି ଖସିବାକୁ ଉଦ୍ୟମ କରିଥିଲା । ପୋଲିସର ପାଲଟା ଗୁଳିରେ ଅଭିଯୁକ୍ତ ଆହାତ ହୋଇଛି । ଅଭିଯୁକ୍ତକୁ ମେଡିକାଲରେ ଭର୍ତ୍ତି କରାଯାଇଛି । ତେବେ ଅଭିଯୁକ୍ତ ବାପାଙ୍କ ସର୍ଭିସ୍ ରିଭରବଲ୍ ଲୁଟରେ ବ୍ୟବହାର କରିଥିବା ଅଭିଯୋଗ ହେଉଛି । ଏନେଇ ତଦନ୍ତ କରାଯାଉଥିବା ସୂଚନା ଦେଇଛନ୍ତି ସୁନ୍ଦରଗଡ଼ ଏସପି ସାଗରିକା ନାଥ ।

ଏଥର ବି କରୋନା ପାଇଁ କଟକର ଐତିହାସିକ ବାଲିଯାତ୍ରା ବନ୍ଦ

କଟକ: କମ୍ପିବନି ମହାନଦୀ କୂଳ, ସନ୍ଧ୍ୟା ହେଲେ ବଢ଼ିବନି ଭିଡ଼ । ଗତବର୍ଷ ପରି ଚଳିତବର୍ଷ ମଧ୍ୟ କଟକର ଐତିହାସିକ ବାଲିଯାତ୍ରା ଉପରେ ରୋକ୍ ଲଗାଇଛି ପ୍ରଶାସନ । ଏବର୍ଷ ବି ହେବନି କଟକର ଐତିହାସିକ ବାଲିଯାତ୍ରା । ଜିଲ୍ଲା ସଂସ୍କୃତି ବିଭାଗ ଏହି ନିଷ୍ପତ୍ତି ନେଇଛି । କୋଭିଡ୍ କଟକଣାକୁ ଆଖିରେ ରଖି ଏଭଳି ନିଷ୍ପତ୍ତି ନିଆଯାଇଥିବା କଟକ ଜିଲ୍ଲାପାଳ ଭବାନୀ ଶଙ୍କର ଚୟନୀ ସୂଚନା ଦେଇଛନ୍ତି ।

No Bali Jatra In Cuttack This Year For Covid19

ରାଜ୍ୟର ସର୍ବବୃହତ ଯାତ୍ରା ହେଉଛି ବାଲିଯାତ୍ରା । କାର୍ତ୍ତିକ ପୂର୍ଣ୍ଣମୀରୁ ଆରମ୍ଭ ହେଉଥିବା ଏହି ଯାତ୍ରାରେ ୨ହଜାରରୁ ଅଧିକ ଛୋଟ ବଡ଼ ବ୍ୟବସାୟୀ ସାମିଲ୍ ହୋଇଥାନ୍ତି । ପ୍ରତିଦିନ କୋଟି କୋଟି ଟଙ୍କାର ବ୍ୟବସାୟ ହୋଇଥାଏ । ରାଜ୍ୟରେ କରୋନା ସଂକ୍ରମଣ ମାମଲା ହ୍ରାସ ପାଇଥିବା ବେଳେ ଅଧିକ ଜନସମାଗମ ହେଲେ ସଂକ୍ରମଣ ବୃଦ୍ଧି ପାଇବା ଆଶଙ୍କାରେ ଏହି ନିଷ୍ପତ୍ତି ନିଆଯାଇଛି । ଗତବର୍ଷ ମଧ୍ୟ କରୋନା କଟକଣା ପାଇଁ ବାଲିଯାତ୍ରା ଆୟୋଜନ ହୋଇ ନଥିଲା ।

ଭିଜିଲାନ୍ସ ଖୋଲିଲା ପ୍ରତାପଙ୍କ ପାପ ଅର୍ଜିତ ସମ୍ପତ୍ତି ପେଢ଼ି: ଏଯାଏଁ ମିଳିଲାଣି ୧୬ କୋଟିର ସମ୍ପତ୍ତି, ଆହୁରି ଅଛି..

ଭୁବନେଶ୍ୱର/ଭଦ୍ରକ: ଭିଜିଲାନ୍ସ ହାତରେ ଆଉ ଜଣେ କୁବେର ଅଧିକାରୀ । ଓଡ଼ିଶା ଷ୍ଟେଟ୍ ପୋଲିସ ହାଉସିଂ କର୍ପୋରେସନ୍ ଆଣ୍ଡ ଓ୍ୱେଲଫେୟାର (OPHWC)ର ଡେପୁଟୀ ମ୍ୟାନେଜର ପ୍ରତାପ ଏବେ ଭିଜିଲାନ୍ସ ଜାଲରେ  । ୨୫ଟି ସ୍ଥାନରେ ଭିଜିଲାନ୍ସ ରେଡ୍ ଖୋଲିଛି ପ୍ରତାପଙ୍କ ପାପ ଅର୍ଜିତ ସମ୍ପତ୍ତି ପେଢ଼ି ।ସମ୍ପତ୍ତି ଏତେ ଯେ ଏ ଯାଏଁ ସରିନି ହିସାବ । ତେବେ ଏଯାବତ୍ ମିଳିଥିବା ସମ୍ପତ୍ତି ତାଲିକା ମଧ୍ୟରେ ରହିଛି ଭଦ୍ରକ ବାସୁଦେବପୁରର ୫ଟି ପ୍ଲଟ୍ ଓ ଗୋଟିଏ ୪ମହଲା ବିଲଡିଂ, ଖୋର୍ଦ୍ଧା ଓ ଭୁବନେଶ୍ବରରେ ୧୭ଟି ପ୍ଲଟ୍ ଓ ୨ ବିଲଡିଂ ରହିଛି ପ୍ରତାପଙ୍କ ନାଁରେ । ପ୍ରତାପଙ୍କ ନାଁରେ ୧୦ ଓ ପତ୍ନୀ ସସ୍ମିତା ସାମଲଙ୍କ ନାଁରେ ରହିଛି ୧୫ଟି ପ୍ଲଟ୍ ।

ପତ୍ନୀ ସସ୍ମିତା ସାମଲଙ୍କ ନାଁରେ ଥିବା ଗୋଠପାଟଣା ସ୍ଥିତ ଘରେ ଚଢାଉ ହୋଇଛି । ୨୦ହଜାର ୩୫୦ ବର୍ଗଫୁଟ୍‌ରେ ୫ମହଲା ପ୍ରାସାଦ ତିଆରି ହୋଇଛି । ବିଲଡିଂର ମୂଲ୍ୟ ୩ କୋଟି ୮୯ଲକ୍ଷ ୬୦ହଜାର ହେବ । ଏବେ ସୁଦ୍ଧା ୧୧ଟି ବ୍ୟାଙ୍କ ଆକାଉଣ୍ଟ, ୩୮ ଲକ୍ଷ ୧୨ ହାଜର ୯ଶହରୁ ଅଧିକ ଟଙ୍କା, ଅଧ କିଲୋ ସୁନା, ଦାମୀ ଗାଡି ମଧ୍ୟ ଠାବ କରିଛି ଭିଜିଲାନ୍ସ ।

ତେବେ ୧୧ଟି ବ୍ୟାଙ୍କ ଆକାଉଣ୍ଟରେ ବାଲାନ୍ସ ଖୋଲତାଡ଼ ଜାରି ରଖିଛି ଭିଜିଲାନ୍ସ । ଏଯାବତ୍ ମୋଟ ୧୬ କୋଟି ଟଙ୍କାର ସମ୍ପତ୍ତି ଠାବ ହେଲାଣି । ପ୍ରତାପଙ୍କ ପରିବାର ନାଁରେ ଲକ୍ଷାଧିକ ଟଙ୍କାର ଫିକ୍ସ ଡିପୋଜିଟ ମଧ୍ୟ ରହିଛି । ଆଡିସନାଲ ଏସ୍ପିଙ୍କ ନେତୃତ୍ୱରେ ୫ ଡିଏସ୍‌ପି କରୁଛନ୍ତି ଚଢ଼ାଉ । ୧୯୮୮ ମସିହାରେ ଚାକିରିରେ ଯୋଗ ଦେଇଥିଲେ ପ୍ରତାପ ।

ଏଥିସହିତ ପଢ଼ନ୍ତୁ: ‘ଆମ ଝିଅକୁ ତା ଶାଶୁଘର ଲୋକେ ଯୌତୁକ ପାଇଁ ମାରିଦେଲେ’

 

 

ପଞ୍ଚାୟତ ନିର୍ବାଚନ: ଆଶାୟୀଙ୍କ ଲବି, ଛକାପଞ୍ଝା ଭିତରେ ବିନ୍ଧିଲାଣି ନେତାଙ୍କ ମୁଣ୍ଡ

ଭୁବନେଶ୍ୱର: ସବୁ କଳ୍ପନା ଜଳ୍ପନାର ଅନ୍ତ ଘଟିଛି। ପଞ୍ଚାୟତ ଭୋଟ ପାଇଁ ଚୂଡ଼ାନ୍ତ ସଂରକ୍ଷଣ ତାଲିକା ଜାରି ହୋଇଛି। ରାଜ୍ୟ ରାଜନୀତି ଏବେ ଚଳଚଞ୍ଚଳ। ଗାଁ ଗଣ୍ଡାରେ ରାଜନୈତିକ ପାଣିପାଗ ବେଶ୍ ତତଲା ହୋଇଛି। ଆଶାୟୀ ପ୍ରାର୍ଥୀମାନେ ଦଳୀୟ ସମର୍ଥନ ପାଇଁ ଉଦ୍ୟମକୁ ଜୋରଦାର କରିଛନ୍ତି। ଅବଶ୍ୟ କେବଳ ଜିଲ୍ଲା ପରିଷଦ ସଭ୍ୟଙ୍କୁ ଛାଡ଼ିଦେଲେ ଅନ୍ୟ କୌଣସି ପଦବି ପାଇଁ ଦଳୀୟ ଚିହ୍ନ ମିଳିବ ନାହିଁ। ମାତ୍ର ଚିହ୍ନ ନମିଳିଲେ ବି ଦଳର ସମର୍ଥନ ପାଇବାକୁ ପ୍ରାର୍ଥୀମାନଙ୍କ ମଧ୍ୟରେ ଆରମ୍ଭ ହୋଇଛି ଲବି ରାଜନୀତି।

ନିଜ ଅଞ୍ଚଳର ବିଧାୟକ, ପ୍ରଭାବଶାଳୀ ନେତାଙ୍କ ସମର୍ଥନ ହାତେଇବାକୁ ଇଛୁକ ପ୍ରାର୍ଥୀମାନେ ଲବି ରାଜନୀତିକୁ ଜୋରଦାର କରିଛନ୍ତି। ଶାସକ ବିଜେଡି ସହ ବିଜେପି ଓ କଂଗ୍ରେସରୁ ଟିକଟ ପାଇବାକୁ ଏବେ ଆରମ୍ଭ ହୋଇଯାଇଛି ଛକାପଞ୍ଝା। ନିଜ ସମର୍ଥକଙ୍କୁ ଧରି ଆଶାୟୀମାନେ ମେଳି ବାନ୍ଧିଲେଣି। ବିଧାୟକ ଓ ମନ୍ତ୍ରୀଙ୍କ ନିକଟରେ ଚକ୍କର କାଟିଲେଣି। ସେହିଭଳି ବିଜେପି ଓ କଂଗ୍ରେସ ନେତାଙ୍କ ଆଶୀର୍ବାଽରେ ଟିକଟ ହାତେଇବାକୁ ଆଶାୟୀ କମର କଷିଛନ୍ତି।

ଆଶାୟୀଙ୍କ ସଂଖ୍ୟା ଯେତିକି ବଢ଼ି ବଢ଼ି ଚାଲିଛି। ସ୍ଥାନୀୟ ନେତାମାନେ ଏବେ ସେତିକି ଟେନ୍ସନରେ। ମୁଣ୍ଡବ୍ୟଥା ଆରମ୍ଭ ହେଲାଣି। କାହାକୁ ସମର୍ଥନ ଦେବେ? ଅନ୍ୟ ଆଶାୟୀ ଯଦି ବିଦ୍ରୋହୀ ଭାବେ ଛିଡ଼ା ହୋଇ ବାଜି ମାରିନେଲେ କ’ଣ ହେବ ରଣକୌଶଳ? ବ୍ଲକ ଅଧ୍ୟକ୍ଷ ଓ ଜିଲ୍ଲା ପରିଷଦ ଅଧ୍ୟକ୍ଷ ପଦକୁ ଆଖିରେ ରଖି ଜିଲ୍ଲାସ୍ତରୀୟ ନେତାମାନେ ଗୋଟି ଚାଳନା ଆରମ୍ଭ କରିଛନ୍ତି।

ରାଜ୍ୟ ନିର୍ବାଚନ କମିଶନଙ୍କ ସୂତ୍ର କହୁଛି, ଆସନ୍ତା ଫେବ୍ରୁଆରୀ ୧୨ରୁ ଅନୁଷ୍ଠିତ ହେବ ତୃଣମୂଳସ୍ତରର ରାଜନୀତି ମହାପର୍ବ ପଞ୍ଚାୟତ ଭୋଟ। ଏ ଭୋଟ୍ ଓଡ଼ିଶାକୁ ଆଖିରେ ରଖି ଆଶାୟୀମାନେ ପ୍ରାୟ ବର୍ଷକ ତଳୁ ବେଶ କସରତ ଆରମ୍ଭ କରିଛନ୍ତି। ବିଧିବଦ୍ଧ ଭାବେ ରାଜନୀତିର ଏ ପ୍ରଥମ ପାହାଚ ଚଢ଼ିବାକୁ ଆଶାୟୀଙ୍କ ମଧ୍ୟରେ ନାହିଁ ନଥିବା ଉତ୍ସାହ। ମାତ୍ର ଏ ରାଜନୈତିକ କ୍ୟାରିୟର ଗଢ଼ିବାକୁ ସଂରକ୍ଷଣ ତାଲିକା ବେଶ ଗୁରୁତପୂର୍ଣ୍ଣ। ସଂରକ୍ଷଣ ବିଜ୍ଞପ୍ତି ପ୍ରକାଶ ପାଇବା ପରେ ବହୁ ଆଶାୟୀ ଉତ୍ସାହିତ ଥିଲା ବେଳେ ଅନେକ ନିରାଶ ଏବଂ ଅସନ୍ତୋଷ ଜୋର୍ ଧରିଛି। ଚୂଡ଼ାନ୍ତ ସଂରକ୍ଷଣ ତାଲିକା ପରେ ଦଳୀୟ ସମର୍ଥନ ପାଇଁ ଏବେ ଆଶାୟୀମାନେ ନିଜ ଅଞ୍ଚଳର ଦଳୀୟ ନେତାଙ୍କ ଘରେ ଡେରା ପକାଇଛନ୍ତି।

ରାଜ୍ୟରେ ୬୭୯୮ ପଞ୍ଚାୟତର ସରପଞ୍ଚ ଓ ସମିତି ସଭ୍ୟ ସହ ୮୫୩ ଜିଲ୍ଲା ପରିଷଦ ଜୋନ୍ ପାଇଁ ଭୋଟ ହେବ। ସେହିଭଳି ୯୨ ହଜାର ୱାର୍ଡମେମ୍ବର ସହ ୩୧୪ ବ୍ଲକ ଅଧକ୍ଷ ଏବଂ ୩୦ ଜିଲ୍ଲା ପରିଷଦ ଅଧ୍ୟକ୍ଷ ପଦବି ପାଇଁ ମଧ୍ୟ ନିର୍ବାଚନ ଅନୁଷ୍ଠିତ ହେବ। ଏ ସବୁ ପଦବିରେ ଲଢ଼ିବାକୁ ସଂରକ୍ଷଣ ତାଲିକା ଜାରି ହେବା ପରେ ନିର୍ବାଚନ କମିଶନର ଭୋଟର ତାଲିକା ଚୂଡ଼ାନ୍ତ କରିବାକୁ ଅଣ୍ଟା ଭିଡ଼ିଛନ୍ତି। ଡିସେମ୍ବର ୪ରେ ପ୍ରକାଶ ପାଇବ ଚୂଡ଼ାନ୍ତ ଭୋଟର ତାଲିକା। ପଞ୍ଚାୟତ ଭୋଟକୁ ନେଇ ରାଜ୍ୟର ରାଜନୈତିକ ପାଣିପାଗ ଉଷ୍ମ ଧରିଛି।

ପ୍ରାର୍ଥୀ ଚୟନ ପାଇଁ ଢେର ସମୟ ଥିଲା ବେଳେ ଏବେଠାରୁ କିନ୍ତୁ ଛକି-ଶୂନ ଖେଳ ଆରମ୍ଭ ହୋଇଛି। ଆଶାୟୀଙ୍କ ମଧ୍ୟରୁ କିଏ ସେ ଅଙ୍କ ଛିଣ୍ଡୁନି। ଜଣେ ସୁପାରିଶ କଲା ବେଳକୁ ଆଉ ଜଣେ ବିରୋଧ କରୁଛି। କିଏ ଲବି ଜୋରଦାର କଲାଣି ତ, ଆଉ କିଏ ଲୋକବଳ ଦେଖାଇଲାଣି। ଏପରିକି ଟିକଟ ନପାଇଲେ ଆଉ କିଏ ଦଳତ୍ୟାଗ କରିବାକୁ ନାଲିଆଖି ମଧ୍ୟ ଦେଖାଉଛନ୍ତି। ଲାଗି ରହିଛି ଛକାପଞ୍ଝା।

 

ମାଳ ମାଳ ଆଶାୟୀ ପ୍ରାର୍ଥୀଙ୍କୁ ନେଇ ନେତାଙ୍କ ମୁଣ୍ଡ ଘୂରିଲାଣି। ସରପଞ୍ଚ ଓ ସମିତି ସଭ୍ୟ ପାଇଁ ଦଳୀୟ ଚିହ୍ନ ନଥିଲେ ମଧ୍ୟ ଶାସକ ବିଜେଡି ସହ ବିରୋଧୀ ବିଜେପି ଓ କଂଗ୍ରେସ ଭିତିିରଆ ସମର୍ଥନ ଦେବେ। ତେଣୁ ଆଶାୟୀମାନେ ଗୋଟିଏ କ୍ୟାମ୍ପରୁ ନିରାଶ ହେଲେ ଅନ୍ୟ କ୍ୟାମ୍ପକୁ ଯିବାକୁ ଗୋଡ଼ ଟେକିଲେଣି। ତ୍ରିସ୍ତରୀୟ ପଞ୍ଚାୟତ ଭୋଟ୍ ପୂର୍ବରୁ ପ୍ରାର୍ଥୀ ଚୟନର ଝାମେଲା ନେତାଙ୍କ ରକ୍ତଚାପ ବଢ଼ାଇଛି।

ଆଶାୟୀ ପ୍ରାର୍ଥୀଙ୍କ ସହ ଦଳୀୟ ନେତାମାନେ ଘନ ଘନ ବୈଠକ କରୁଛନ୍ତି। ପାର୍ଥୀଙ୍କ ବିଜୟର ସମ୍ଭାବନାକୁ ଆକଳନ କରୁଛନ୍ତି। ୨୦୨୪ ସାଧାରଣ ନିର୍ବାଚନର ଫାଇନାଲ୍ ପୂର୍ବରୁ ଆସନ୍ତା ପଞ୍ଚାୟତ ଭୋଟ୍ ସେମିଫାଇନାଲ୍ ହୋଇଥିବାରୁ ବିଜେଡି, ବିଜେପି ଓ କଂଗ୍ରେସ ପ୍ରାର୍ଥୀ ଚୟନକୁ ସର୍ବାଧକ ଗୁରୁତ୍ୱ ଦେଉଛନ୍ତି। ବିଜୟ ସମ୍ଭାବନା ଥିବା ପ୍ରାର୍ଥୀଙ୍କୁ ତିନି ଦଳ ଫୋକସ୍ କରିବାକୁ ପ୍ରସ୍ତୁତ ହେଉଛନ୍ତି। ଆଶାୟୀମାନେ କେହି କାହାକୁ ବାଟ ଛାଡ଼ିବାକୁ ପ୍ରସ୍ତୁତ ନୁହନ୍ତି। କଳି କେମିତି ତୁଟାଇବେ ତାହା ଏବେ ନେତାଙ୍କ ପାଇଁ ପ୍ରଚଣ୍ଡ ଆହ୍ୱାନ ଛିଡ଼ା କରାଇଛି।