ନୂଆଦିଲ୍ଲୀ: ଆଜି ବାରାଣସୀ କୋର୍ଟରେ ଜ୍ଞାନବାପି ମସଜିଦ କମିଟି ପକ୍ଷର ଆଜି ଶୁଣାଣି। ଜିଲ୍ଲା ଜଜ ଏ.କେ. ବିଶ୍ବବେଶଙ୍କ ଇଜଲାସରେ ଏହି ଶୁଣାଣି ହେବ। ୫ ଜଣ ହିନ୍ଦୁ ମହିଳାଙ୍କ ଦ୍ବାରା ଦାଖଲ ହୋଇଥିବା ପିଟିସନ ବିପକ୍ଷରେ ମସଜିଦ କମିଟି ଦାୟର କରିଥିବା ପିଟିସନର ହେବ ଶୁଣାଣି। ମସଜିଦ ଭିତରେ ବିଭିନ୍ନ ହିନ୍ଦୁ ଦେବଦେବୀଙ୍କ ପ୍ରତିମା ରହିଥିବାରୁ ସେମାନଙ୍କୁ ପ୍ରବେଶ ଅନୁମତି ଦେବା ଲାଗି ଆବେଦନ କରାଯାଇଥିଲା।
ମସଜିଦ ପରିସରର ଭିଡିଓଗ୍ରାଫି ସଂକ୍ରାନ୍ତ କୋର୍ଟ ନିଷ୍ପତ୍ତି ପ୍ରସଙ୍ଗରେ ଆପତ୍ତି ଜଣାଇବା ଲାଗି ଦୁଇ ପକ୍ଷଙ୍କୁ କୋର୍ଟ ନିର୍ଦ୍ଦେଶ ଦେଇଥିଲେ। ମସଜିଦ ଭିତରେ ଭିଡିଓଗ୍ରାଫି ଲାଗି ଅନୁମତି ୧୯୯୧ର ଆଇନର ଉଲ୍ଲଂଘନ କରୁଛି ବୋଲି ଦର୍ଶାଇଥିଲେ ମସଜିଦ କମିଟି। ସେପଟେ ଜ୍ଞାନବାପି ମସଜିଦ ଭିତରକୁ ମୁସଲିମଙ୍କ ପ୍ରବେଶ ଉପରେ ନିଷେଧାଦେଶ ଲାଗି ଆଗତ ଅନ୍ୟ ଏକ ପିଟିସନକୁ ଏକ ସିଭିଲ ଜଜ କୋର୍ଟରୁ ଏକ ଫାଷ୍ଟ ଟ୍ରାକ କୋର୍ଟକୁ ସ୍ଥାନାନ୍ତର କରାଯାଇଛି। ଏହି ମାମଲାର ଶୁଣାଣି ଆସନ୍ତା ୩୦ ତାରିଖରେ ହେବ।
ଅଧିକ ପଢନ୍ତୁ- ଲିକ୍ ହେଲା ଜ୍ଞାନବାପୀ ସର୍ଭେ ରିପୋର୍ଟ, ମସଜିଦରେ ହନ୍ଦୁ ସଂସ୍କୃତିର ଚିହ୍ନ…
ଉଲ୍ଲେଖଯୋଗ୍ୟ, ଜ୍ଞାନବାପୀ ମାମଲାରେ ସ୍ୱତନ୍ତ୍ର କୋର୍ଟ କମିଶନର ବିଶାଲ ସିଂ କୋର୍ଟରେ ଉପସ୍ଥାପିତ କରିଥିବା ଏକ ରିପୋର୍ଟ ନିକଟରେ ଲିକ୍ ହୋଇଥିବା ଚର୍ଚ୍ଚା ହୋଇଥିଲା। ଏପରିକି ଏହାର କପି ଏକ ଘରୋଇ ଚ୍ୟାନେଲରେ ଟେଲିକାଷ୍ଟ ହୋଇଥିବା ସୂଚନା ମିଳିଛି । ସର୍ଭେ ସମୟରେ ଟିମକୁ ଯେଉଁସବୁ ଜିନିଷ ମିଳିଥିଲା ସେସବୁ ଜିନିଷ ଉଲ୍ଲେଖ ରହିଛି ।
ସର୍ଭେର ଅନ୍ୟ ଏକ ରିପୋର୍ଟରେ ହିନ୍ଦୁ ପ୍ରତୀକ ଓ ଶିବ ଲିଙ୍ଗ ମିଳିଥିବା ଦର୍ଶାଯାଇଛି। ଏହାବ୍ୟତୀତ ମସଜିଦର କାନ୍ଥରେ ପଦ୍ମ ଫୁଲ, ଡମ୍ବରୁ ଓ ତ୍ରୀଶୁଳର ଚିହ୍ନ ମିଳିଛି । ତେବେ କୋର୍ଟଙ୍କ ଆଦେଶାନୁସାରେ ଜ୍ଞାନବାପୀ ମସଜିଦର ସର୍ଭେ କରାଯାଇଥିଲା । ତିନି ଦିନ ଧରି ଚାଲିଥିବା ସର୍ଭେ ପରେ କମିଶନ ଏକ ରିପୋର୍ଟ ଗୁରୁବାର ଦିନ କୋର୍ଟରେ ଦାଖଲ କରିଥିଲେ । ସର୍ଭେର ଶେଷ ଦିନରେ ହିନ୍ଦୁ ପକ୍ଷ ଦାବି କରିଛି ଯେ ମନ୍ଦିର ଭିତରୁ ଶିବ ଲିଙ୍ଗ ମିଳିଛି । ଯାହାକୁ ଖଣ୍ଡନ କରିଥିଲା ମୁସଲିମ୍ ପକ୍ଷ ।
