ରାଜସ୍ଥାନ: ପ୍ରଥମେ ମିଠା ମିଠା କଥା କୁହନ୍ତି । ବଲିଉଡ୍ ଗୀତରେ ମତୁଆଲା କରନ୍ତି । ଆଉ ତା‘ ପରେ ଭାରତୀୟ ଯବାନଙ୍କୁ ଫସାନ୍ତି ।
ଏବେ ନିକଟରେ ଜଣେ ସେନା ଯବାନଙ୍କୁ ଗିରଫ କରାଯାଇଛି । ISI ଏଜେଣ୍ଟଙ୍କୁ ସେନାର ଗୁପ୍ତ ତଥ୍ୟ ଦେଉଥିବା ଅଭିଯୋଗ ଲାଗିଛି ଯବାନଙ୍କ ଉପରେ। ଯବାନଙ୍କୁ ପଚରା ଉଚରା କରାଯିବାରୁ ସାଂଘାତିତ ତଥ୍ୟ ସାମ୍ନାକୁ ଆସିଛି ।
ଇଣ୍ଟେଲିଜେନ୍ସର ଅନୁସନ୍ଧାନ ଏବଂ ପଚରାଉଚରା ବେଳେ ହନିଟ୍ରାପରେ ଜଡ଼ିତ ଜଣେ ପାକିସ୍ତାନୀ ଏଜେଣ୍ଟଙ୍କ କିଛି ଭିଡିଓ ସାମ୍ନାକୁ ଆସିଛି। ଅନୁସନ୍ଧାନରୁ ଜଣାପଡିଛି ଯେ, ସେ ବଲିଉଡ ଗୀତରେ ରିଲ୍ ତିଆରି କରି ସେନା ଯବାନଙ୍କୁ ଜାଲରେ ଫସାଉଥିଲେ ।
ଗିରଫ ହୋଇଥିବା ପ୍ରଦୀପ କୁମାରଙ୍କ ବୟସ ୨୪ ବର୍ଷ । ସେ ଉତ୍ତରାଖଣ୍ଡ ବାସୀନ୍ଦା । ତାଙ୍କୁ ତିନି ବର୍ଷ ପାଇଁ ଯୋଧପୁରରେ ପୋଷ୍ଟିଂ କରାଯାଇଥିଲା। ନଭେମ୍ବର ୨୦୨୧ ରେ, ଜଣେ ପାକିସ୍ତାନୀ ମହିଳା ଏଜେଣ୍ଟ ପ୍ରଥମେ ପ୍ରଦୀପଙ୍କୁ ଫୋନ୍ କରିଥିଲେ । ସେବେଠାରୁ ପ୍ରଦୀପ ତାଙ୍କ ଜାଲରେ ଫସିଯାଇଥିଲେ ।
ପ୍ରଦୀପଙ୍କ ସମେତ ଅନେକ ସେନା କର୍ମଚାରୀ ପାକିସ୍ତାନୀ ମହିଳା ଏଜେଣ୍ଟଙ୍କ ଟାର୍ଗେଟରେ ଥିଲେ। ସୁନ୍ଦର ଦେଖାଯାଉଥିବା ମହିଳା ଏଜେଣ୍ଟ ସୋସିଆଲ ମିଡିଆରେ ଅନେକ ପ୍ରକାରର ରିଲ୍ ତିଆରି କରୁଥିଲେ । ବଲିଉଡ ଗୀତ ଠାରୁ ଆରମ୍ଭ କରି ଅନେକ ଚଳଚ୍ଚିତ୍ରର ସଂଳାପରେ ମଧ୍ୟ ସେ ରିଲ୍ ତିଆରି କରୁଥିଲେ । ଏପରି ରିଲ କରି ସେ ଯବାନଙ୍କୁ ପଠାଉଥିଲେ । ଯାହାଦ୍ବାରା ଯବାନ ଅତି ସହଜରେ ତାଙ୍କ ଜାଲରେ ଫସି ଯାଉଥିଲେ ।
ଏହି ପାକିସ୍ତାନୀ ଏଜେଣ୍ଟଙ୍କର ଅନେକ ନାମ ଅଛି । ପାୟଲ୍ ଶର୍ମା, ପ୍ରିୟା ଶର୍ମା । ହର୍ଲିନ୍ କୌର୍, ପୂଜା ରାଜପୁତ ଭଳି ଅଲଗା ଅଲଗା ନାମରେ ଯବାନଙ୍କୁ ଫସାଉଥିଲେ ।
ଭିଡିଓ ପଠାଇ ସେ ଯବାନଙ୍କୁ ବିଶ୍ବାସ କରାଉଥିଲେ ଯେ, ମୁଁ ଆପଣଙ୍କର ସୁଖ ଦୁଃଖର ସାଥି ହୋଇ ରହିବି । ଏପରି କଥାରେ ପଦୀପ ଫସି ଯାଇଥିଲେ । ଏମିତିକି ମହିଳା ଜଣଙ୍କ ପ୍ରଦୀପଙ୍କୁ ବାହା ହେବାର ସ୍ବପ୍ନ ବି ଦେଖାଇଥିଲେ ।
ମହିଳାଙ୍କ ଜାଲରେ ସେ ଏପରି ଫସି ଯାଇଥିଲେ ଯେ, ଯାହା ଯାହା ଡକ୍ୟୁମେଣ୍ଟ ମାଗୁଥିଲେ ପ୍ରଦୀପ ତାଙ୍କୁ ଦେଇଥିଲେ । ଦୁହିଁଙ୍କର ଭିଡିଓ କଲରେ ବି କଥାବାର୍ତ୍ତା ହୋଇଥିଲା । ବାହା ହେବା ପ୍ରତିଶ୍ରୁତି ଦେବା ସହ ଦିଲ୍ଲୀରେ ଦେଖା ହେବାକୁ ବି କଥା ଦେଇଥିଲେ । ଏପରିକି ଯବାନଙ୍କୁ ଫସାଇବା ପାଇଁ ମହିଳା ଅଶ୍ଲୀଳ କାର୍ଯ୍ୟ ବି କରିଥିଲେ ।
