ପାଟନା: ଗଙ୍ଗା ନଦୀ ମଝିରେ ଡଙ୍ଗାରେ ବିସ୍ଫୋରଣ ଘଟି ୪ ଜଣଙ୍କ ମୃତ୍ୟୁ । ବିହାର ରାଜଧାନୀ ପାଟନାର ଗଙ୍ଗା ନଦୀରେ ଏହି ଅଘଟଣ ଶନିବାର ଘଟିଛି । ୪ ଜଣ ଏହି ବିସ୍ଫୋରଣରେ ମୃତ୍ୟୁବରଣ କରିଥିବା ବେଳେ ଅନ୍ୟମାନେ ଗୁରୁତର ଆହତ ହୋଇଛନ୍ତି । ସେମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ସୂଚନା ଅନୁଯାୟୀ ଡଙ୍ଗାରେ ପ୍ରାୟ ୨୦ ଜଣ ଯାତ୍ରା କରୁଥିଲେ । ଘଟଣାର ସୂଚନା ମିଳିବାପରେ ପୋଲିସ ଘଟଣା ସ୍ଥଳରେ ପହଞ୍ଚି ଲୋକମାନଙ୍କୁ ଉଦ୍ଧାର କରିଛି ।
କୁହାଯାଉଛି, ଡଙ୍ଗାରେ ବେଆଇନ ଭାବେ ବାଲିକୁ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ନିଆଯାଉଥିଲା । ତେବେ ବାଲି ପରିବହନ କାର୍ଯ୍ୟରେ ଲାଗିଥିବା ଲୋକଙ୍କ ପାଇଁ ଡଙ୍ଗାରେ ହିଁ ଖାଦ୍ୟ ପ୍ରସ୍ତୁତ କରାଯାଉଥିଲା । ଏହି ସମୟରେ ଗ୍ୟାସ୍ ଲିକ୍ କରି ସିଲିଣ୍ଡର ବ୍ଲାଷ୍ଟ ହୋଇଯାଇଥିଲା । ନଦୀ ମଝିରେ ନିଆଁ ସଂସ୍ପର୍ଶରେ ଆସି ୪ ଜଣ ଯାତ୍ରୀଙ୍କ ମୃତ୍ୟୁ ହୋଇଯାଇଛି । ଅନ୍ୟମାନଙ୍କୁ ପୋଲିସ ଉଦ୍ଧାର କରି ମେଡିକାଲ ପଠାଇଛି ।
