ନୂଆଦିଲ୍ଲୀ: ବଢୁଛି ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ଅଡୁଆ। ସିସୋଦିଆଙ୍କ ବାସଭବନରେ ସିବିଆଇ ଚଢାଉ ପରେ  ଦିଲ୍ଲୀ କଂଗ୍ରେସ ମୁଖପାତ୍ର ଶାମା ମହମ୍ମଦ ଉପମୁଖ୍ୟମନ୍ତ୍ରୀ ସିସୋଦିଆଙ୍କ ଇସ୍ତଫା ଦାବି କରିଛନ୍ତି । ମଦ ଲାଇସେନ୍ସ ପ୍ରଦାନରେ ଘୋଟାଲା ଅଭିଯୋଗ କ୍ରମେ ଗତକାଲି ସିସୋଦିଆଙ୍କ ବାସଭବନରେ ସିବିଆଇ ରେଡ କରିଥିଲା ।

ଆଜି ପ୍ରେସ କନ୍ଫରେନ୍ସରେ ଏହା ବିରୋଧରେ କେନ୍ଦ୍ରକୁ ଟାର୍ଗେଟ କରିଛନ୍ତି ସିସୋଦିଆ  ।  ଯେଉଁ ମଦ ନୀତି ଆଧାରରେ ବିବାଦ ଆରମ୍ଭ ହୋଇଛି ଏହା କେନ୍ଦ୍ର ସରକାରର ସର୍ବୋତ୍ତମ ବିକଳ୍ପ  । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସରକାରଙ୍କୁ ଡରି ଯାଇଛନ୍ତି ମୋଦି ସରକାର  । ସ୍ବାସ୍ଥ୍ୟ ଏବଂ ଶିକ୍ଷାରେ କେଜ୍ରିୱାଲଙ୍କ ସଫଳତାକୁ ଦେଖି କେନ୍ଦ୍ର ଏହି ଦୁଇଟି ବିଭାଗର ମନ୍ତ୍ରୀଙ୍କୁ ଟାର୍ଗେଟ କରୁଛି  । ଦୁଇ ଚାରି ଦିନ ମଧ୍ୟରେ ମୋତେ ବି ଗିରଫ କରାଯିବ ବୋଲି ଗଣମାଧ୍ୟମରେ କହିଛନ୍ତି ସିସୋଦିଆ  ।

ସେପଟେ ଦିଲ୍ଲୀ ଲେଫ୍ଟନାଣ୍ଟ ଗଭର୍ଣ୍ଣର ଭି.କେ. ସକ୍ସେନା ଦିଲ୍ଲୀର ୧୨ ବରିଷ୍ଠ ଆଇଏଏସ ଅଧିକାରୀଙ୍କୁ ବଦଳି କରିଛନ୍ତି । ଗତକାଲି ସିସୋଦିଆଙ୍କ ବାସଭବନ ସମେତ ବିଭିନ୍ନ ରାଜ୍ୟର ୨୧ଟି ସ୍ଥାନରେ ସିବିଆଇ ରେଡ କରିଥିଲା । ସେହିପରି ସିସୋଦିଆଙ୍କ ଇସ୍ତଫା ଦାବି କରିଛନ୍ତି କଂଗ୍ରେସ ନେତା ଅଳକା ଲାମ୍ବା ଓ ଅଭିଷେକ ଦତ୍ତ । ସେମାନେ କହିଛନ୍ତି ଦିଲ୍ଲୀ ସରକାରଙ୍କ ଦୁର୍ନୀତିକୁ କଂଗ୍ରେସ ବିରୋଧ କରୁଛି ।

ତୁରନ୍ତ ଏହି ଘଟଣାରେ ସିସୋଦିଆ ଇସ୍ତଫା ଦିଅନ୍ତୁ । ସେପଟେ ସିସୋଦିଆ କହିଛନ୍ତି ତାଙ୍କ ବାସଭବନରେ ହୋଇଥିବା ଚଢାଉରୁ ସିବିଆଇ ଏକ  କମ୍ପ୍ୟୁଟର, ଫୋନ ଓ କେତେକ ନଥି ଜବତ କରିଛି । ଅବକାରୀ ନୀତି ୨୦୨୧-୨୨ ନୀତିକୁ କାର୍ଯ୍ୟକାରୀ କରିବା ପରେ ଲେଫ୍ଟନାଣ୍ଟ ଗଭର୍ଣ୍ଣର ସକ୍ସେନାଙ୍କ ମାମଲା ଦାଏର ପରେ ଚଢାଉ କରିଥିଲା ସିବିଆଇ । ୧୫ ଜଣଙ୍କ ନାଁରେ ସିବିଆଇ ମାମଲା ରୁଜୁ କରିଥିବା ବେଳେ ତାଲିକାରେ ସବୁଠୁ ଟପରେ ଅଛନ୍ତି ସିସୋଦିଆ  । ସିସୋଦିଆଙ୍କ ସମ୍ପର୍କୀୟ ମଦ ମାଫିଆଙ୍କ ଠାରୁ ଏକ କୋଟି ଟଙ୍କା ନେଇଥିବା ସିବିଆଇ ଟିମ୍ ଜାଣିବାକୁ ପାଇଛି  । ତେଣେ ଦିଲ୍ଲୀ ଆପ୍ ଅଫିସରେ କର୍ମୀମାନେ ନାରାବାଜି କରିଥିବାରୁ ପୋଲିସ ମୁତୟନ କରାଯାଇଛି । ତେଣେ ସିସୋଦିଆଙ୍କ ଇସ୍ତଫା ଦାବିରେ କଂଗ୍ରେସ ବିକ୍ଷୋଭ ପ୍ରଦର୍ଶନ କରିଛି ।