ନୂଆଦିଲ୍ଲୀ: ପୋଲାଣ୍ଡରୁ ଗ୍ରୀସ ଯାଉଥିବା ରାୟନିୟରର ଏକ ବିମାନରେ ରବିବାର ବୋମା ଥିବା ସୂଚନା ମିଳିବା ପରେ ବିମାନର ଜରୁରୀ ଅବତରଣ କରାଯାଇଛି । ତେବେ ଏହି ବିମାନରେ ୧୯୦ରୁ ଅଧିକ ଯାତ୍ରୀ ଥିଲେ । ରାୟନିୟରର ଏହି ବିମାନ ଗ୍ରୀସ ଯାଉଥିଲା । ବୋମା ଧମକ ମିଳିବା ପରେ ସୁରକ୍ଷା ଏଜେନ୍ସି ଆଲର୍ଟ ହୋଇଯାଇଥିଲା । ଯଥାଶୀଘ୍ର କ୍ରୁ ସଦସ୍ୟଙ୍କ ସହ ସମ୍ପର୍କ କରାଯାଇଥିଲା । ବିମାନର ସୁରକ୍ଷା ପାଇଁ ଗ୍ରୀକ ଯୁଦ୍ଧ ବିମାନକୁ ନିୟୋଜିତ କରାଯାଇଥିଲା । ବିମାନକୁ ଏଥେନ୍ସ ଅନ୍ତର୍ଜାତୀୟ ବିମାନ ବନ୍ଦରରେ ଅବତରଣ କରାଯାଇଥିଲା । ଏବେ ଏହାର ଯାଞ୍ଚ କରାଯାଉଛି ।
ଗଞ୍ଜାମ ଜିଲ୍ଲା ପିତାତଳି ଗାଁରେ ପଥର ସହ ବୋମାମାଡ଼
ଗଞ୍ଜାମ: ଅଶାନ୍ତ ଗଞ୍ଜାମ ଜିଲ୍ଲାର ପିତାତଳି ଗାଁ । ଗାଁରେ ପଥର ସହ ବୋମାମାଡ଼ । ଜଣେ ଯୁବକଙ୍କୁ ସଂଘବଦ୍ଧ ଆକ୍ରମଣ ସୂଚନା । ଆକ୍ରମଣରେ ଜଣେ ଗୁରୁତର ହୋଇଥିବାବେଳେ ୩ଜଣ ଆହତ ହୋଇଛି । କେ.ଲୋକନାଥଙ୍କୁ ଗୁରୁତର ଅବସ୍ଥାରେ ପ୍ରଥମେ ଚିକିଟି ଓ ପରେ ଏମକେସିଜିକୁ ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ଗୋଳନ୍ଥରା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ତେବେ କେଉଁ କାରଣରୁ ଏହି ବୋମାମାଡ଼ ସେନେଇ କିଛି ସ୍ପଷ୍ଟ ସୂଚନା ମିଳିପାରିନାହିଁ ।
ଆସିକା ଥାନାକୁ ଦେଶର ଶ୍ରେଷ୍ଠ ଥାନା ପୁରସ୍କାର
ଭୁବନେଶ୍ୱର: ଦେଶରେ ଶ୍ରେଷ୍ଠ ଥାନାର ପୁରସ୍କାର ନେଇ ଫେରିଲା ଆସିକା ଥାନା ଆଇଆଇସି ପ୍ରଶାନ୍ତ କୁମାର ସାହୁ । ନୂଆଦିଲ୍ଲୀରେ ସମ୍ମାନିତ ହେବା ପରେ ଓଡ଼ିଶା ଫେରିଛନ୍ତି ଆଇଆଇସି । ଲଗାତର ଦୁଇବର୍ଷ ଧରି ଦେଶରେ ଶ୍ରେଷ୍ଠ ବିବେଚିତ ହୋଇଛି ଓଡ଼ିଶାର ଥାନା । ୨୦୨୨ବର୍ଷ ପାଇଁ ଆସିକା ଥାନାକୁ ଦେଶର ଶ୍ରେଷ୍ଠ ଥାନା ଭାବେ ପୁରସ୍କୃତ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ।
ନୂଆଦିଲ୍ଲୀ ଜାତୀୟ କୃଷି ବୈଜ୍ଞାନିକ ଭବନରେ ଆୟୋଜିତ ପୋଲିସ DG ଓ IG ସମ୍ମିଳନୀରେ ସମ୍ମାନଜନକ ପୁରସ୍କାର ଓ ମାନପତ୍ର ଗ୍ରହଣ କରିଛନ୍ତି ଆସିକା ଥାନା ଆଇଆଇସି ପ୍ରଶାନ୍ତ କୁମାର ସାହୁ । କାର୍ଯ୍ୟକ୍ରମରେ ପୋଲିସ ମହାନିର୍ଦ୍ଦେଶକ ସୁନୀଲ କୁମାର ବଂଶଲ, ଗୁଇନ୍ଦା ନିର୍ଦ୍ଦେଶକ ସଞ୍ଜୀବ ପଣ୍ଡା, ଅତିରିକ୍ତ ପୋଲିସ ମହାନିର୍ଦ୍ଦେଶକ ଆର.କେ ଶର୍ମା, ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ, ଅତିରିକ୍ତ ପୋଲିସ ମହାନିର୍ଦ୍ଦେଶକ CID/CB ଅରୁଣ ବୋଥ୍ରା ସମେତ ବହୁ ବରିଷ୍ଠ ପୋଲିସ ଅଧିକାରୀ ଉପସ୍ଥିତ ଥିଲେ ।
ଭାଙ୍ଗିଲା ଭାରତର ହକି ବିଶ୍ୱକପ୍ ସ୍ୱପ୍ନ; ପେନାଲ୍ଟି ସୁଟଆଉଟରେ ନ୍ୟୁଜିଲାଣ୍ଡଠୁ ହାରିଲା
ଭୁବନେଶ୍ୱର: ହକି ବିଶ୍ବକପରୁ ଭାରତର ବିଦାୟ । କ୍ରସ ଓଭର ମ୍ୟାଚରେ ନ୍ୟୁଜିଲାଣ୍ଡ ଠାରୁ ହାରିଲା ଭାରତ । ପେନାଲ୍ଟି ସୁଟ୍ ଆଉଉଟରେ ୪-୫ ଗୋଲରେ ବାଜି ମାରିଲା ନ୍ୟୁଜିଲାଣ୍ଡ । ନିର୍ଦ୍ଧାରିତ ସମୟରେ ୩-୩ ଗୋଲରେ ମ୍ୟାଚ ଡ୍ର ରହିବା ପରେ ସୁଟଆଉଟକୁ ଯାଇଥିଲା ମ୍ୟାଚ । ପ୍ରଥମ ପେନାଲ୍ଟି ସୁଟଆଉଟରେ ଉଭୟ ସମାନ ସ୍ଥିତିରେ ରହିବାରୁ ଦ୍ବିତୀୟ ସୁଟଆଉଟ ଖେଳାଯାଇଥିଲା । ଏଥିରେ ବିଜୟୀ ହୋଇଛି ନ୍ୟୁଜିଲାଣ୍ଡ । ପେନାଲ୍ଟି ସୁଟଆଉଟରେ ୪-୫ରେ ହାରି ବିଶ୍ୱକପରୁ ବିଦାୟ ନେଇଛି ଭାରତ ।
କଳିଙ୍ଗ ଷ୍ଟାଡିୟମରେ ଖେଳାଯାଇଥିବା ଏହି କ୍ରସଓଭର ମ୍ୟାଚରେ ଲଲିତ କୁମାର ଉପାଧ୍ୟାୟ (୧୭ତମ ମିନିଟ), ସୁଖଜିତ ସିଂ (୨୪ତମ ମିନିଟ) ଏବଂ ବରୁଣ କୁମାର (୪୦ତମ ମିନିଟ) ଭାରତ ପାଇଁ ଗୋଲ୍ କରିଥିଲେ । ସେହିପରି ନ୍ୟୁଜିଲାଣ୍ଡ ପକ୍ଷରୁ ସାମ ଲେନ (୨୮ତମ ମିନିଟ), ରସେଲ କେନ (୪୩ତମ ମିନିଟ) ଏବଂ ସିନ ଫିଣ୍ଡଲେ (୪୯ତମ ମିନିଟ) ଗୋଲ୍ କରିଥିଲେ । ଶୁଟଆଉଟରେ ହରମନପ୍ରୀତ ସିଂହ ଏବଂ ସୁଖଜିତ ସିଂହ ଭାରତ ପାଇଁ ଗୋଟିଏ ଲେଖାଏଁ ଗୋଲ୍ କରିଥିଲେ । ଯେତବେଳେ କି ରାଜ କୁମାର ପାଲ ଦୁଇଟି ଗୋଲ୍ କରିଥିଲେ । ନ୍ୟୁଜିଲାଣ୍ଡ ପକ୍ଷରୁ ସୁଟଆଉଟରେ ନିକ ବୁଡସ, ଫିଲିପ୍ସ ହେଡେନ ଏବଂ ସାମ ଲେନ ଗୋଟିଏ ଲେଖାଏଁ ସୁଟଆଉଟ ଗୋଲ କରିଥିଲେ । ସେହିପରି ଫିଣ୍ଡଲେ ଦୁଇଟି ଗୋଲ୍ କରି କିୱି ଟିମକୁ ବିଜୟୀ କରାଇଥିଲେ । ନ୍ୟୁଜିଲାଣ୍ଡ ଏହି ବିଜୟ ସହ ବେଲଜିୟମ ବିପକ୍ଷରେ ହେବାକୁ ଥିବା କ୍ୱାଟରଫାଇନାଲରେ ସ୍ଥାନ ପକ୍କା କରିଛି । ଆୟୋଜକ ଭାରତ କ୍ୱାଟରଫାଇନାଲ ଦୌଡରୁ ବାହାରି ଯାଇଛି ।
ମୁଖ୍ୟମନ୍ତ୍ରୀଙ୍କୁ ଭେଟିଲେ ବଲିଉଡ ସିଙ୍ଗର ଉଦିତ୍ ନାରାୟଣ ଓ ଅଭିନେତା ଅନୁପମ ଖେର୍
ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କୁ ସୌଜନ୍ୟମୂଳକ ସାକ୍ଷାତ କଲେ ବଲିଉଡ୍ ସିଙ୍ଗର ଉଦିତ୍ ନାରାୟଣ । ନବୀନ ନିବାସ ଯାଇ ନବୀନଙ୍କୁ ସାକ୍ଷାତ କରିଥିଲେ ଉଦିତ୍ । ଏହି ସାକ୍ଷାତକାର ବେଳେ ଉଭୟଙ୍କ ମଧ୍ୟରେ ବିଭିନ୍ନ ବିଷୟକୁ ନେଇ ଆଲୋଚନା ହୋଇଥିଲା । ଉଦିତଙ୍କ ସହ ପତ୍ନୀ ଉପସ୍ଥିତ ରହିଥିଲେ । ଉଭୟଙ୍କୁ ମୁଖ୍ୟମନ୍ତ୍ରୀ ହକି ଜର୍ସି ଦେଇ ସମ୍ବର୍ଦ୍ଧିତ କରିଥିଲେ । ଆୟୋଜିତ ଡଟଫେଷ୍ଟ କାର୍ଯ୍ୟକ୍ରମରେ ଯୋଗଦେବାକୁ ଭୁବନେଶ୍ବର ଆସିଛନ୍ତି ଉଦିତ । ସେପଟେ ବଲିଉଡ୍ ଅଭିନେତା ଅନୁପମ୍ ଖେର ମଧ୍ୟ ନବୀନଙ୍କୁ ଭେଟି କିଛି ସମୟ ଧରି କଥାବାର୍ତ୍ତା ହୋଇଥିଲେ । ତାଙ୍କୁ ମଧ୍ୟ ଏକ ହକି ଜର୍ସି ଉପହାର ଦେଇଥିଲେ ମୁଖ୍ୟମନ୍ତ୍ରୀ ।
ବିଜେପିର କାର୍ଯ୍ୟକାରିଣୀକୁ ନେଇ ବର୍ଷିଲା ବିଜେଡି; କର୍ମୀଙ୍କ ମନରେ ଉତ୍ସାହ ଭରିବାକୁ ବୈଠକ ହୋଇଥିଲା
ଭୁବନେଶ୍ୱର: ଓଡ଼ିଶା ବିଜେପିର କାର୍ଯ୍ୟକାରିଣୀକୁ ନେଇ ବିଜେଡିର ପ୍ରେସମିଟ୍ । ପ୍ରେସମିଟରେ ବିଜେପି ଉପରେ ବର୍ଷିଛନ୍ତି ଲେନିନ ମହାନ୍ତି । ରାଜ୍ୟର ୩୦ଟି ଯାକ ଜିଲ୍ଲାରେ ଜିଲ୍ଲା ପରିଷଦ ନିର୍ବାଚନରେ ହାରିବା ପରେ ବିଜେପି ନିରାଶ ହୋଇଯାଇଛି । ଏଣୁ କର୍ମୀଙ୍କ ମନରେ ଉତ୍ସାହ ଆଣିବାକୁ ରାଜ୍ୟ ବିଜେପି କାର୍ଯ୍ୟକାରିଣୀ ବୈଠକ କରାଯାଇଥିବା ବିଜେଡି ମୁଖପାତ୍ର ଲେନିନ ମହାନ୍ତି କହିଛନ୍ତି ।
ଲୋକଙ୍କ ସମସ୍ୟା ସମ୍ପର୍କରେ ଓଡ଼ିଶା ବିଜେପି କେବେ ଚର୍ଚ୍ଚା କରେନି । ବିଜେପିର ଆଭିମୁଖ୍ୟ ମିଥ୍ୟା ଉପରେ ଆଧାରିତ । ସେଥିପାଇଁ ରାଜ୍ୟବାସୀଙ୍କ ଦ୍ବାରା ଦଳ ବାରମ୍ବାର ପ୍ରତ୍ୟାଖ୍ୟାତ ହୋଇଛି । ରାଜ୍ୟରୁ ୮ଜଣ ବିଜେପି ସାଂସଦ ନିର୍ବାଚିତ ହୋଇଛନ୍ତି । ସେମାନଙ୍କୁ ଏବେ ଓଡ଼ିଶାବାସୀ ପ୍ରଶ୍ନ କରିବେ । ଗରିବ ଲୋକଙ୍କ ଘର କାଟିବାକୁ କ’ଣ ନିର୍ବାଚିତ ହୋଇଛି ବୋଲି ରାଜ୍ୟବାସୀ ପ୍ରଶ୍ନ କରିବେ ।
ପ୍ରଧାନମନ୍ତ୍ରୀ ଗ୍ରାମୀଣ କଲ୍ୟାଣ ଅନ୍ନ ଯୋଜନାରେ ଚାଉଳ ବନ୍ଦ କରି ୩ କୋଟି ୨୫ ଲକ୍ଷ ଲୋକଙ୍କ ପେଟରେ ଲାତ ମାରିଛି କେନ୍ଦ୍ରର ବିଜେପି ସରକାର । ଏ ସମ୍ପର୍କରେ ବିଜେପି କେବେ ଚର୍ଚ୍ଚା କରିନି । ବିଜେପି ସାଂସଦ ଲୋକଙ୍କ ସହିତ କି ସମସ୍ୟା ସହ ନାହାନ୍ତି ବୋଲି ଲେନିନ ଅଭିଯୋଗ କରିଛନ୍ତି । ଦୁର୍ବଳ ଓ ହତାଶ କ୍ୟାଡରଙ୍କ ମନରେ ଉତ୍ସାହ ଭରିବା ପାଇଁ କାର୍ଯ୍ୟକାରିଣୀ ବୈଠକ କରାଯାଇଛି ବୋଲି ବିଜେଡି କହିଛି ।
ହକି ବିଶ୍ବକପରେ ରୋମାଞ୍ଚ: ପେନାଲ୍ଟି ସୁଟ୍ ଆଉଟରେ ମାଲେସିଆକୁ ହରାଇଲା ସ୍ପେନ
ଭୁବନେଶ୍ୱର: ହକି ବିଶ୍ବକପରେ ରୋମାଞ୍ଚ । ପେନାଲ୍ଟି ସୁଟ୍ ଆଉଟରେ ମାଲେସିଆକୁ ହରାଇଲା ସ୍ପେନ । ଆଜି କ୍ରସ ଓଭରର ପ୍ରଥମ ମ୍ୟାଚରେ ମୁହାଁମୁହିଁ ହୋଇଥିଲେ ସ୍ପେନ ଓ ମାଲେସିଆ । ତେବେ ଖେଳ ଶେଷ ସୁଦ୍ଧା ଉଭୟ ୨ଟି ଲେଖାଏଁ ଗୋଲ ଦେଇଥିବାରୁ ମ୍ୟାଚ ପେନାଲ୍ଟି ସୁଟଆଉଟକୁ ଯାଇଥିଲା । ତେବେ ପ୍ରଥମ ସୁଟଆଉଟରେ ୫ଟି ସୁଯୋଗ ପାଇ ଦୁହେଁ ୩-୩ ଗୋଲ ଦେବାପରେ ଦ୍ବିତୀୟ ପେନାଲ୍ଟି ସୁଟ୍ ଆଉଟ୍ ଖେଳ ହୋଇଥିଲା ।
ଦ୍ବିତୀୟରେ ସ୍ପେନ ପ୍ରଥମ ଗୋଲ ଦେଇ ମାଲେସିଆକୁ ୪-୩ ଗୋଲରେ ପରାସ୍ତ କରିଛି । ଫଳରେ କ୍ବାର୍ଟରରେ ଅଷ୍ଟ୍ରେଲିଆକୁ ଭେଟିବ ସ୍ପେନ । ୨୪ ତାରିଖରେ ଖେଳାଯିବ ଏହି ମ୍ୟାଚ । ସେହିପରି ଆଜି ଦ୍ବିତୀୟ କ୍ରସ ଓଭରରେ ନ୍ୟୁଜିଲାଣ୍ଡକୁ ଭେଟିଛି ଟିମ୍ ଇଣ୍ଡିଆ । କଳିଙ୍ଗ ଷ୍ଟାଡିୟମରେ ମୁହାଁମୁହିଁ ହୋଇଛନ୍ତି ଉଭୟ ଟିମ୍ । କ୍ରସ ଓଭରରେ ବିଜୟୀ ହେଲେ ଭାରତକୁ କ୍ବାର୍ଟର ପାଇଁ ମିଳିବ ସୁଯୋଗ ।
ବିଜେଡି କାର୍ଯ୍ୟାଳୟରେ ରକ୍ତଦାନ ଶିବିର ଅନୁଷ୍ଠିତ
ଭୁବନେଶ୍ବର: ରକ୍ତଦାନ ଜୀବନ ଦାନର ବାର୍ତ୍ତାକୁ ଆଧାର କରି ବିଜେଡି କାର୍ଯ୍ଯାଳୟରେ ଆଜି ଏକ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ବିଜୁ ଛାତ୍ର ଜନତା ଦଳର ରାଜ୍ୟ ସାଧାରଣ ସମ୍ପାଦକ ଅସିତ ରଞ୍ଜନ ଦାସଙ୍କ ନେତୃତ୍ବରେ ୫୦ରୁ ଉର୍ଦ୍ଧ୍ବ ୟୁନିଟ ରକ୍ତ ସଂଗ୍ରହ କରାଯାଇଛି । ଛାତ୍ରଛାତ୍ରୀ, ସମାଜସେବୀ ଓ ରକ୍ତଦାତା ମାନେ ଏହି ରକ୍ତଦାନ ଶିବିରରେ ସ୍ବେଛାକୃତ ଭାବେ ରକ୍ତଦାନ କରିଥିଲେ ।
ଅନୁଷ୍ଠିତ ଏହି ରକ୍ତଦାନ ଶିବିର ସକାଳ ୯ଟା ୩୦ରୁ ଆରମ୍ଭ ହୋଇଥିଲ । ସମ୍ମାନୀତ ଅତିଥି ଭାବେ ବାଙ୍କୀ ବିଧାୟକ ତଥା ରାଜ୍ୟ ଛାତ୍ର ସଭାପତି ଦେବୀ ରଞ୍ଜନ ତ୍ରିପାଠୀ, ଓଡ଼ିଶା ମୋ ପରିବାରର ଯୁଗ୍ମ ସମ୍ପାଦକ ରୁଦ୍ର ନାରୟଣ ସାମନ୍ତ ରାୟ, ଭୁବନେଶ୍ବର ମେୟର ସୁଲଚନା ଦାସ ଯୋଗଦେଇ ରକ୍ତଦାତାଙ୍କ ଉତ୍ସାହ ବଢାଇଥିଲେ । ଏହି ମହତ କାର୍ଯ୍ଯକୁ ସଫଳ କରିବା ଦିଗରେ ମହତ୍ୱପୂର୍ଣ୍ଣ ଯୋଗଦାନ ଦେଇଥିବା ସମସ୍ତ ସଦସ୍ୟ, ରକ୍ତଦାତା, ସ୍ବେଚ୍ଛାସେବୀଙ୍କୁ ଅସିତ ରଞ୍ଜନ ଦାସ କୃତଜ୍ଞତା ଜଣାଇଛନ୍ତି ।
ଜଙ୍ଗଲରୁ ସୁଟକେଶ ଭିତରୁ ଅଜଣା ମୃତଦେହ ଜବତ ଘଟଣା, ମିଳିଲା ପରିଚୟ
ଖୋର୍ଦ୍ଧା: ଖୋର୍ଦ୍ଧା ନାଚୁଣୀ ଥାନା ହରିପୁର ନିକଟ ଜଙ୍ଗଲରୁ ସୁଟକେଶ ଭିତରୁ ମୃତଦେହ ଜବତ ଘଟଣା । ମଳିଲା ମୃତକଙ୍କ ପରିଚୟ । ମୃତକ ହେଲେ ରଣପୁର ଥାନା ବଳଭଦ୍ରପୁର ପଂଚାୟତ ଲାଖପଡାର ମନୋରଂଜନ ମହାପାତ୍ର । ପତ୍ନୀ ମୃତଦେହକୁ ଚିହ୍ନଟ କରିଛନ୍ତି । ମନୋରଂଜନ ଜଣେ ଟ୍ରକ୍ ଚାଳକ ହୋଇଥିବା ବେଳେ ଗାଁ ରାଜନୀତିରେ ସକ୍ରିୟ ହୋଇଥିବା ସୂଚନା ରହିଛି । ସୁଟ୍ କେଶ୍ ନିକଟରୁ ଗୋଟିଏ ବିଦେଶୀ ମଦ ବୋତଲ ସହ ପାଣି ପାଉଚ୍ ଓ କିଛି ଖାଦ୍ୟ ସାମଗ୍ରୀ ଜବତ ହୋଇଛି । ମୃତଦେହରେ କୌଣସି କ୍ଷତ ଚିହ୍ନ ନଥିବା ବେଳେ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
ମୋରବି ପୋଲ ଦୁର୍ଘଟଣା ମାମଲା: ଗିରଫ ହେବେ ଓରେବା କମ୍ପାନୀ ମାଲିକ
ଅହମ୍ମଦାବାଦ: ଗୁଜୁରାଟର ମୋରବି ପୋଲ ଦୁର୍ଘଟଣା ମାମଲାରେ ଓରେବା କମ୍ପାନୀ ମାଲିକ ଜୟସୁଖ ପଟେଲଙ୍କ ବିରୋଧରେ ଗିରଫଦାରୀ ୱାରେଣ୍ଟ ଜାରି ହୋଇଛି । ପୋଲିସ ପଟେଲଙ୍କୁ ଚାର୍ଜସିଟରେ ଅଭିଯୁକ୍ତ କରିଛି, ଅବଶ୍ୟ ଚାର୍ଜସିଟ୍ ବର୍ତ୍ତମାନ ସୁଦ୍ଧା କୋର୍ଟରେ ଦାଖଲ ହୋଇନାହିଁ । ଗିରଫ ପରୱାନା ଜାରି ହେବା ପରେ ପୋଲିସ ଜୟସୁଖଙ୍କ ପାଇଁ ଲୁକଆଉଟ୍ ସର୍କୁଲାର ମଧ୍ୟ ଜାରି କରିଛି । କୁହାଯାଉଛି ଯେ ଖୁବଶୀଘ୍ର ତାଙ୍କୁ ଗିରଫ କରାଯିବ । ପଟେଲ ଦୁଇ ଦିନ ପୂର୍ବେ କୋର୍ଟରେ ଅଗ୍ରୀମ ଜାମିନ ପାଇଁ ଆବେଦନ କରିଥିଲେ ।
ପ୍ରକାଶଥାଉକି, ଗୁଜୁରାଟର ମୋରବିରେ ମଚ୍ଛୁ ନଦୀ ଉପରେ ନିର୍ମିତ ଝୁଲା ପୋଲ ଗତ ବର୍ଷ ଅକ୍ଟୋବରରେ ଛିଡ଼ିପଡ଼ିଥିଲା । ଦୁର୍ଘଟଣା ସମୟରେ ପୋଲ ଉପରେ ୩୦୦ରୁ ୪୦୦ ଲୋକ ଉପସ୍ଥିତ ଥିଲେ । ସମସ୍ତେ ନଦୀକୁ ଖସିପଡିଥିଲେ । ଅବଶ୍ୟ ଏମାନଙ୍କ ମଧ୍ୟରୁ କିଛି ଲୋକଙ୍କୁ ଉଦ୍ଧାର କରାଯାଇଥିଲା । ସେହିପରି ମୋଟ ୧୩୫ ଜଣଙ୍କ ମୃତ୍ୟୁ ହୋଇଥିଲା । ୭ ମାସର ମରାମତି ପରେ ଦୁର୍ଘଟଣାର ୫ ଦିନ ପୂର୍ବେ ଏହି ପୋଲକୁ ଲୋକମାନଙ୍କ ପାଇଁ ଖୋଲାଯାଇଥିଲା । ବ୍ରିଜ ଖୋଲିବା ପୂର୍ବରୁ ଫିଟନେସ୍ ସାର୍ଟିଫିକେଟ ମଧ୍ୟ ନିଆଯାଇନଥିଲା । ଏହି ବ୍ରିଜର ରକ୍ଷଣାବେକ୍ଷଣା ଦାୟିତ୍ୱ ଓରେବା କମ୍ପାନୀ ପାଖରେ ତିଲା । ଏହାପରେ କମ୍ପାନୀ ଏବଂ ତାର ମାଲିକଙ୍କ ବିରୋଧରେ ମାମଲା ରୁଜୁ ହୋଇଥିଲା ।