କଟକ : ନିଉ ଓଡ଼ିଶା ବିଡି କମ୍ପାନୀ ଉପରେ ଆୟକର ବିଭାଗର ଚଢ଼ାଉ। କଟକ ଓଡ଼ିଆ ବଜାର ଘର ଏବଂ ଜଗତପୁରରେ ଥିବା କମ୍ପାନୀ ଉପରେ ଗତକାଲି ଦିନ ତମାମ ଚଢ଼ାଉ କରିଛି ଆୟକର ବିଭଗ। ଦୁଇଟି ଟିମ ଏକାକାଳୀନ ଚଢ଼ାଉ କରି ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର ଯାଞ୍ଚ କରିଛି। ଟିକସ ଫାଙ୍କିଥିବା ନେଇ ଆୟକର ବିଭାଗର ଏକ ସ୍ୱତନ୍ତ୍ର ଟିମ ତଦନ୍ତ କରୁଛି। ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର ଖୋଳତାଡ଼ କରିବା ସହ ମାଲିକକୁ ପଚାରଉଚାର କରୁଛି ଆୟକର ବିଭଗ ଟିମ ।
ତତଲା କଢେଇରେ ଭାଜିହେବ ଓଡ଼ିଶା… ରାଜ୍ୟରେ ଏବେଠୁ ଉପରମୁହାଁ ହେଲାଣି ପାରଦ
ଭୁବନେଶ୍ବର : ରାଜ୍ୟରେ ଏବେଠୁ ଉପରମୁହାଁ ହେଲାଣି ପାରଦ । ପ୍ରବଳ ଖରା ସହ ବହୁଛି ଝାଞ୍ଜି ପବନ । ଧିରେ ଧିରେ ରାଜ୍ୟର ଉତ୍ତପ୍ତ ସହର ପାଲଟୁଛି ରାଜଧାନୀ ଭୁବନେଶ୍ବର । ନଭେମ୍ବର ମାସଠାରୁ ବର୍ଷା ହୋଇନଥିବା ବେଳେ ମାଟି ଶୁଷ୍କ ରହିଛି । ସାମୁଦ୍ରିକ ବାୟୁ ସ୍ଥଳଭାଗକୁ ପ୍ରବାହ ନହେବାରୁ ବାୟୁମଣ୍ଡଳରେ ଜଳୀୟବାଷ୍ପ ନାହିଁ । ମେଘମୁକ୍ତ ଆକାଶ ଏବଂ ସୂର୍ଯ୍ୟଙ୍କ ତେଜ୍ କିରଣ ମାଟି ଉପରେ ପଡିବାରୁ ତାପମାତ୍ରା ବଢିବା ସହ ସହର ମଧ୍ୟରେ ଗରମ ପବନ ପ୍ରବାହିତ ହେଉଛି । ଆଗମୀ ଦିନରେ ସ୍ବାଭାବିକଠାରୁ ୩ରୁ ୪ଡିଗ୍ରୀ ପର୍ଯ୍ୟନ୍ତ ବଢିବ ପାରଦ । ଉପକୂଳରେ ୪୦ଡିଗ୍ରୀ ତାପମାତ୍ରା ଛୁଇଁବାର ସମ୍ଭାବନା ରହିଛି । ଗତ ୨୦୨୧ରେ ବିଶ୍ବର ସବୁଠୁ ଉତ୍ତପ୍ତ ସହର ଭାବେ ରେକର୍ଡ କରିଥିଲା ଭୁବନେଶ୍ବର । ଏଥର ମଧ୍ୟ ଭୁବନେଶ୍ବର ସମେତ ବାରିପଦା, ମାଲକାନଗିରି, ଅନୁଗୁଳ, ଢେଙ୍କାନାଳ, ଟିଟିଲାଗଡ ବିଶ୍ବ ତଥା ଦେଶର ଉତ୍ତପ୍ତ ସହର ହେବା ଆଶଙ୍କା ରହିଛି ।
ଶିବସେନାର ଅଧ୍ୟକ୍ଷ ଭାବେ ମୁଖ୍ୟମନ୍ତ୍ରୀ ଏକନାଥ ସିନ୍ଦେ ନିଯୁକ୍ତ
ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ମଙ୍ଗଳବାର ଶିବସେନାର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ କରିଥିଲେ । ଏହି ବୈଠକରେ ଏକନାଥ ସିନ୍ଦେଙ୍କୁ ଦଳର ଅଧ୍ୟକ୍ଷ ନିଯୁକ୍ତ କରାଯାଇଛି । ନିର୍ବାଚନ କମିଶନ ନିକଟରେ ତାଙ୍କ ଗୋଷ୍ଠୀକୁ ପ୍ରକୃତ ଶିବସେନା ରୂପରେ ମାନ୍ୟତା ଦେଇଥିଲେ ଏବଂ ତାଙ୍କୁ ଧନୁ ଓ ତୀର ନିର୍ବାଚନୀ ଚିହ୍ନ ମଧ୍ୟ ଦେଇଥିଲେ । ଆଜିର ଏହି ବୈଠକରେ ଶିବସେନାର ବିଧାୟକ, ସାଂସଦ ଏବଂ ଅନ୍ୟ ନେତା ସାମିଲ ଥିଲେ ।
ମହାରାଷ୍ଟ୍ରର ଉଦ୍ୟୋଗ ମନ୍ତ୍ରୀ ଉଦୟ ସାମନ୍ତ ବୈଠକ ପରେ କହିଥିଲେ ଆଜି ଆମେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱରେ ବୈଠକ କରିଥିଲୁ । ଏକନାଥ ସିନ୍ଦେ ଆମର ଶିବସେନା ଦଳର ପ୍ରମୁଖ ହେବେ । ଆମେ ତାଙ୍କୁ ଶିବସେନାର ନେତା ଭାବେ ସ୍ୱୀକାର କରୁଛି । ଅନ୍ୟପକ୍ଷରେ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ସୁପ୍ରିମକୋର୍ଟଙ୍କ ପାଖରେ ନିର୍ବାଚନ ଆୟୋଗର ଆଦେଶକୁ ରଦ୍ଦ କରିବା ପାଇଁ ଅନୁରୋଧ କରିଛନ୍ତି । କୋର୍ଟ ବୁଧବାର ଅର୍ଥାତ ୨୨ ତାରିଖ ଅପରାହ୍ନରେ ଏହା ଉପରେ ଶୁଣାଣି କରିବେ ।
ଅନ୍ଧ ମୁକ ବଧିର ବିଦ୍ୟାଳୟର ଛାତ୍ରଙ୍କ ଆତ୍ମହତ୍ୟା ସନ୍ଦେହ
କଟକ: କଟକ ଅନ୍ଧ ମୁକ ବଧିର ବିଦ୍ୟାଳୟର ଛାତ୍ରଙ୍କ ଆତ୍ମହତ୍ୟା ସନ୍ଦେହ । କଟକ ବିଡାନାସି ଥାନା ଅନ୍ତର୍ଗତ ନୂଆସାହିରେ ଅଘଟଣ । ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କଲା ପୋଲିସ । ମୃତକ ଅଷ୍ଟମ ଶ୍ରେଣୀର ଛାତ୍ର ରାକେଶ ମହାପାତ୍ର । ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ମୃତଦେହ ଉଦ୍ଧାର କରି ତଦନ୍ତ କରୁଛି ପୋଲିସ୍ । ଶବ ବ୍ୟବଛେଦ ପାଇଁ ଏସସିବି ମେଡାକାଲକୁ ପଠାଯାଇଛି । ରାକେଶ ଜଣେ ଭଲ ପିଲା । ତେବେ ସେ କାହିଁକି ଆତ୍ମହତ୍ୟା କଲା ସେନେଇ ଜାଣି ନଥିବା ଶିକ୍ଷୟିତ୍ରୀ କହିଛନ୍ତି । ସେପଟେ ବିଦ୍ୟାଳୟ ପକ୍ଷରୁ ଅବହେଳା ପାଇଁ ରାକେଶ ଆତ୍ମହତ୍ୟା କରିଥିବା ତାଙ୍କ ପରିବାର ଲୋକେ ଅଭିଯୋଗ କରିଛନ୍ତି ।
ସାଢେ ୬ କୋଟି ଠକେଇ ଘଟଣାରେ ମୁଖ୍ୟ ଅଭିଯୁକ୍ତ ଓ ସହଯୋଗୀ ଗିରଫ
ଭୁବନେଶ୍ୱର: ଗ୍ରାମୀଣ ରୋଗଗାର କଲ୍ୟାଣ ସଂସ୍ଥାନ ନାଁରେ ଫେକ୍ ଓ୍ବେବସାଇଟ ତିଆରି କରି ସାଢେ 6 କୋଟି ଠକେଇ ଘଟଣା । ମୁଖ୍ୟ ଅଭିଯୁକ୍ତ ଧରମପାଲ ସିଂହ ର ସହଯୋଗୀ ଜୟରାମ ତିଓ୍ବାରୀ ଗିରଫ । ଭୁବନେଶ୍ୱରରୁ ଗିରଫ କଲା EOW । ଧର୍ମପାଲଙ୍କ ଜାମିନ କଥା ବୁଝିବାକୁ ଆସିଥିବା ବେଳେ ସନ୍ଦେହ କରି ମାଡି ବସିଲା EOW । ଗ୍ରାମୀଣ ରୋଗଗାର କଲ୍ୟାଣ ସଂସ୍ଥାନ ଆକାଉଣ୍ଟରୁ ଜୟରାମଙ୍କ ଆକାଉଣ୍ଟକୁ ୩୫ ଲକ୍ଷ ୮୩ ହଜାର ଟଙ୍କା ଆସିଥିବା ତଦନ୍ତ ବେଳେ ଜଣାପଡ଼ିଛି ।
ଜବ ରାକେଟରେ ଧର୍ମପାଲ ଏକାଧିକ ସହଯୋଗୀ ଏବେ ଫେରାର ଅଛନ୍ତି । ଜୟରାମ ଠାରୁ ସଂସ୍ଥା ସମ୍ବନ୍ଧୀୟ ଗୁରୁତ୍ବପୂର୍ଣ କାଗଜପତ୍ର ଜବତ ହୋଇଛି । ଫେସବୁକ ଓ ସାମାଜିକ ଗଣମାଧ୍ୟମକୁ ବିଜ୍ଞପନ ଦେଇଥିବା ଟଙ୍କା ବାବଦରେ ମଧ୍ୟ କାଗଜପତ୍ର ଜବତ କରିଛି EOW । ଗତକାଲି ଧରମପାଲକୁ କୋର୍ଟରେ ହାଜର କରିବା ପରେ ୫ ଦିନ ରିମାଣ୍ଡରେ ଆଣିବା ପାଇଁ ଭୁବନେଶ୍ବର SDJMଙ୍କ କୋର୍ଟରେ ଆବେଦନ କରିଛି EOW । ଆଜି ଜୟରାମଙ୍କୁ କୋର୍ଟ ଚାଲାଣ କଟିଛି EOW । ଜୟରାମଙ୍କୁ ମଧ୍ୟ ରିମାଣ୍ଡରେ ଆଣି ମୁହାଁ ମୁହିଁ ଜେରା କରିବ EOW ।
କ୍ୟାରିଅରର ଶେଷ ଟୁର୍ଣ୍ଣାମେଣ୍ଟର ପ୍ରଥମ ରାଉଣ୍ଡରେ ହାରିଲେ ସାନିୟା
ନୂଆଦିଲ୍ଲୀ: ଭାରତୀୟ ଟେନିସ ତାରକା ସାନିୟା ମିର୍ଜା ନିଜ କ୍ୟାରିଅରର ଶେଷ ଟୁର୍ଣ୍ଣାମେଣ୍ଟ ଦୁବାଇ ଟେନିସ୍ ଚମ୍ପିୟନସିପର ପ୍ରଥମ ରାଉଣ୍ଡରେ ପରାଜିତ ହୋଇ ବାହାରି ଯାଇଛନ୍ତି । ଦୁବାଇରେ ମଙ୍ଗଳବାର ମିର୍ଜା ଏବଂ ତାଙ୍କର ଆମେରିକାନ ପାର୍ଟନର ମ୍ୟାଡିସନ କିଜଙ୍କୁ ଋଷିଆର ବେରୋନିକା କୁଦେରମେଟୋବା ଏବଂ ଲ୍ୟୁଡମିଲା ସୈମସୋନୋଭା ୬-୪ ରେ ପରାଜିତ କରିଛନ୍ତି । ୩୬ ବର୍ଷୀୟ ସାନିୟା ମିର୍ଜା ଏକ ମାସ ପୂର୍ବେ ଟେନିସରୁ ସନ୍ୟାସ ନେବେ ବୋଲି ଘୋଷଣା କରିଥିଲେ ।
ଏବଂ କହିଥିଲେ ଯେ ଦୁବାଇରେ ସେ ନିଜ କ୍ୟାରିଅରର ଶେଷ ମୁକାବିଲା ଖେଳିବେ । ସାନିୟା ମିର୍ଜା ନିଜ କ୍ୟାରିଅରରେ ୬ ଗ୍ରାଣ୍ଡସ୍ଲାମ ଟାଇଟଲ ଜିତି ସାରିଛନ୍ତି । ଏଥିରେ ୩ ୱିମେନ୍ସ ଡବଲ୍ସ ଏବଂ ୩ ମିକ୍ସ ଡବଲ୍ସ କ୍ୟାଟେଗୋରୀରେ ଆସିଛି । ସାନିୟା ଶେଷ ଗ୍ରାଣ୍ଡସ୍ଲାମ ୨୦୧୬ରେ ଜିତିଥିଲେ । ସାନିୟା ଗତ ମାସରେ ଖେଳାଯାଇଥିବା ବର୍ଷର ପ୍ରଥମ ଗ୍ରାଣ୍ଡସ୍ଲାମ ଅଷ୍ଟ୍ରେଲିଆନ ଓପନର ମିକ୍ସଡ ଡବଲ୍ସ କ୍ୟାଟେଗୋରୀରେ ରନରଅପ୍ ହୋଇଥିଲେ । ସେ ରୋହନ ବୋପନ୍ନାଙ୍କ ସହ ପେୟାର ବନାଇଥିଲେ ।
ନବ ଦାସଙ୍କୁ ଧମକ ଦେଉଥିଲେ ଧର୍ମେନ୍ଦ୍ର ଓ ଜୟନାରାୟଣ: ରୁଦ୍ର ମହାରଥୀ
ଭୁବନେଶ୍ୱର: ସ୍ବର୍ଗତ ମନ୍ତ୍ରୀ ନବକିଶୋର ଦାସଙ୍କୁ ଧମକ ଦେଉଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଜୟନାରାୟଣ ମିଶ୍ର । ଏଭଳି ବିସ୍ଫୋରକ ବୟାନ ଦେଇଛନ୍ତି ପିପିଲି ବିଧାୟକ ରୁଦ୍ରପ୍ରତାପ ମହାରଥୀ । ସେ କହିଛନ୍ତି ପଦମପୁର ଉପନିର୍ବାଚନ ସମୟରେ ପାର୍ଟି ରଣନୀତି ବିଷୟରେ ଆଲୋଚନା ବେଳେ ନବ ଦାସ କହିଥିଲେ ତାଙ୍କୁ ଧର୍ମେନ୍ଦ୍ର ପ୍ରଧାନ ଓ ଜୟନାରାୟଣ ମିଶ୍ର ଧମକ ଦେଉଛନ୍ତି । ଏମିତିକି ପଦମପୁର ଉପନିର୍ବାଚନକୁ ନଆସିବା ସହ ଦୂରେଇ ରହିବା ପାଇଁ ନବ ଦାସଙ୍କୁ ଉଭୟେ ଧର୍ମେନ୍ଦ୍ର ଓ ଜୟନାରାୟଣ କହିଥିଲେ । କାହାକୁ ଡରେ ନାହିଁ ବୋଲି ନବ ଦାସ କହିଥିଲେ ବୋଲି ରୁଦ୍ର କହିଛନ୍ତି ।
କୋଉଁଠି ନା କୋଉଁଠି ନବକିଶୋରଙ୍କ ହତ୍ୟା ପଛରେ ଜୟନାରାୟଣ ମିଶ୍ର ଏବଂ ଧର୍ମେନ୍ଦ୍ର ପ୍ରଧାନଙ୍କ ସମ୍ପୃକ୍ତି ସନ୍ଦେହ ଘେରରେ ରହୁଛି । ଜୟନାରାୟଣ ମିଶ୍ର ଯାହାଙ୍କ ନାଁରେ ୧୬ଟି ଅପରାଧିକ ମାମଲା ରହିଛି । ପବ୍ଲିକ ପ୍ଲେସରେ ଅନ୍ ଡିଉଟି ପୋଲିସ ଅଫିସରଙ୍କୁ ଆକ୍ରମଣ କରିବାକୁ ପଛାଉ ନାହାନ୍ତି । ବରିଷ୍ଠ ହୋଇ ସେମାନଙ୍କଠୁ କ’ଣ ଶିଖିବେ ଯୁବ ବିଧାୟକ ବୋଲି ପ୍ରଶ୍ନ କରିଛନ୍ତି ରୁଦ୍ର ।
ବାଲେଶ୍ବର ଫାମିଲି କୋର୍ଟ ହତା ପାଲଟିଲା ରଣକ୍ଷେତ୍ର, ଛାଡ଼ପତ୍ର ମାମଲା ବିଚାର ବେଳେ ମାରପିଟ୍
ବାଲେଶ୍ବର: ବାଲେଶ୍ବର ପରିବାର ଅଦାଲତ ପରିସର ପାଲଟିଲା ରଣକ୍ଷେତ୍ର । ପରିବାର ଅଦାଲତରେ ଛାଡ଼ପତ୍ର ମାମଲାର ବିଚାର ଚାଲିଥିବା ବେଳେ ଦମ୍ପତିଙ୍କ ମାରପିଟ୍ । ସ୍ବାମୀ ରତିକାନ୍ତଙ୍କ ହ୍ୟାଲିମେଟ୍ ମାଡ଼ରେ ଆହତ ହୋଇ ମେଡିକାଲରେ ଭର୍ତ୍ତି ହେଲେ ସ୍ତ୍ରୀ ରଶ୍ମିରେଖା । ଚାନ୍ଦିପୁର ଥାନା ମଝିକିଆ ଗାଁର ରତିକାନ୍ତ ପାଣିଗ୍ରାହୀ ଓ ରଶ୍ମିରେଖା ପାଣିଗ୍ରାହୀଙ୍କର ଗତ ୩ ବର୍ଷ ପୂର୍ବେ ବିବାହ ହୋଇଥିଲା । ଉଭୟଙ୍କ ମଧ୍ୟରେ ଗଣ୍ଡଗୋଳ ହେବାରୁ ପରିବାର ଅଦାଲତରେ ଛାଡପତ୍ର ମାମଲା ଦାୟର କରାଯାଇଥିଲା । ମାମଲା ବିଚାରାଧୀନ ଥିବା ବେଳେ ଆଜି କୌଣସି କାରଣରୁ ଉଭୟେ କୋର୍ଟ ପରିସର ଆଗରେ ହାତାହାତି ହୋଇଥିଲେ । ଉଭୟଙ୍କ ମଧ୍ୟରେ ବଚସା ଓ ମାରପିଟ୍ ଏତେ ଜୋର ହୋଇଥିଲା ଯେ ରତିକାନ୍ତ ରଶ୍ମୀରେଖାଙ୍କୁ ହେଲିମେଟରେ ମୁଣ୍ଡକୁ ମାରିଥିଲେ । ଫଳରେ ରଶ୍ମୀରେଖା ଅଚେତ ହୋଇପଡ଼ିଥିଲେ ।
ବିଜେପିକୁ ଟାର୍ଗେଟ କଲେ ପ୍ରମିଳା ମଲ୍ଲିକ, କହିଲେ ପୂର୍ବରୁ ବିଜେପି ନବ ଦାସଙ୍କ ବିରୋଧରେ କରିଛି ଷଡ଼ଯନ୍ତ୍ର
ଭୁବନେଶ୍ୱର: ନବ ଦାସଙ୍କ ହତ୍ୟା ମାମଲାରେ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କୁ ଶାଣିତ ଆକ୍ରମଣ କରିଛନ୍ତି ରାଜସ୍ବ ମନ୍ତ୍ରୀ ପ୍ରମିଲା ମଲ୍ଲିକ । ଜୟନାରାୟଣଙ୍କୁ ନୀଳବର୍ଣ୍ଣ ଶୃଗାଳ ବୋଲି ସମ୍ବୋଧିକ କରି ସେ କହିଛନ୍ତି ଯେ ସେ ନିଜେ ହତ୍ୟାକାରୀ ହୋଇଥିବାରୁ ସମସ୍ତଙ୍କୁ ଆଙ୍ଗୁଳି ନିର୍ଦ୍ଦେଶ କରୁଛନ୍ତି । ନିଜକୁ ବଞ୍ଚାଇବାକୁ ଯାଇ ତାଙ୍କ ନାଁରେ ୧୬ଟି ବଡ଼ ଅପରାଧିକ ମାମଲା ରହିଛି । ସେ ଏବେ ଜାମିନରେ ଅଛନ୍ତି । ନବ ଦାସଙ୍କ ହତ୍ୟା ମାମଲାରେ ସେ ଯେଉଁ ମନ୍ତବ୍ୟ ଦେଉଛନ୍ତି ତାହା ଗ୍ରହଣୀୟ ନୁହେଁ । ଏଭଳି କହି ବିଜେପିକୁ ଟାର୍ଗେଟ କରିଛନ୍ତି ମନ୍ତ୍ରୀ ପ୍ରମିଳା ମଲ୍ଲିକ । ୨୦୧୭ ମସିହା ଗଞ୍ଜାମ ଲକ୍ଷ୍ମୀଦତ୍ତ ପ୍ରଧାନ ହତ୍ୟା ମାମଲାରେ ହତ୍ୟାକାରୀଙ୍କୁ ଉତ୍ତରାଖଣ୍ଡରେ ଲୁଚେଇ ରଖିଥିଲେ ବିଜେପି ନେତା ।
ହତ୍ୟାକାରୀଙ୍କୁ ସୁରକ୍ଷା ଦେବାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମ୍ପୃକ୍ତି ଥିଲା ବୋଲି ଅଭିଯୋଗ ହୋଇଥିଲା । ହତ୍ୟାକାଣ୍ଡରେ ସାମିଲ ହେବା, ହତ୍ୟାକାରୀଙ୍କୁ ସୁରକ୍ଷା ଦେବା ବିଜେପି ନେତାଙ୍କର ଅଭ୍ୟାସ । ୨୦୧୮ ମସିହା ବିଜେପୁର ଦିଲେଶ୍ବର ସାହୁ ହତ୍ୟା ଘଟଣାରେ ମଧ୍ୟ ବିଜେପି ସାମିଲ । ଏହି ହତ୍ୟାକାଣ୍ଡରେ ଜୟନାରାୟଣ ମିଶ୍ର ଓ ଇରାଶିଶ୍ ଆଚାର୍ଯ୍ୟ ଗିରଫ ହୋଇଥିଲେ । ଜୟନାରାୟଣ ଏବେ ବେଲରେ ଅଛନ୍ତି । ପଦମପୁର ଉପନିର୍ବାଚନ ସମୟରେ ନବ ଦାସଙ୍କୁ ବିଜେପି ନେତା ଧମକ ଦେଇଥିଲେ । ପଶ୍ଚିମ ଓଡ଼ିଶାରେ ନବ ଦାସ ଯେଉଁଭଳି ଭାବେ ସଂଗଠନ କରିଥିଲେ ତାକୁ ନେଇ ବିଜେପି ଭୟଭୀତ ଥିଲା । ପଶ୍ଚିମ ଓଡ଼ିଶାରେ ବିଜେପିର ସତ୍ତା ହଜିଯାଇଥାନ୍ତା ବୋଲି କହିଛନ୍ତି ପ୍ରମିଳା ମଲ୍ଲିକ । ଏଥିସହ ମୁଁ ମରିଗଲି, ମୋତେ ମାରନା ବୋଲି କହି ବାଉଳେଇ ହେଉଛନ୍ତି ଜୟନାରାୟଣ । ନବ ଦାସଙ୍କ ହତ୍ୟା କାଣ୍ଡରେ କ୍ରାଇମବାଞ୍ଚ ରିପୋର୍ଟକୁ ଅପେକ୍ଷା କରନ୍ତୁ, ନହେଲେ ଆଗୁଆ ସରେଣ୍ଡର କରନ୍ତୁ ବୋଲି କହି ଜୟନାରାୟଣଙ୍କୁ ଚ୍ୟାଲେଞ୍ଜ କରିଛନ୍ତି ପ୍ରମିଳା ମଲ୍ଲିକ । ଜୟନାରାୟଣଙ୍କ ଦେହ ଭଲ ନାହିଁ । ତାଙ୍କର ମାନସିକ ସ୍ଥିତି ଠିକ୍ ନାହିଁ । ବାଚସ୍ପତିଙ୍କୁ କହି ବିଶ୍ରାମ ନିଅନ୍ତୁ ବୋଲି କହିଛନ୍ତି ପ୍ରମିଳା ମଲ୍ଲିକ ।
ମାନସିକ ଭାରସାମ୍ୟ ହରାଇଛନ୍ତି ବିରୋଧୀ ଦଳ ନେତା: ସସ୍ମିତ ପାତ୍ର
ଭୁବନେଶ୍ୱର: ମାନସିକ ଭାରସାମ୍ୟ ହରାଇଛନ୍ତି ବିରୋଧୀ ଦଳ ନେତା ଜୟନାରାୟଣ ମିଶ୍ର । ତାଙ୍କର ତୁରନ୍ତ ଚିକିତ୍ସା ହେବା ଦରକାର । ଦୁଇ ଜଣ ଜଣାଶୁଣା ବ୍ୟକ୍ତିବିଶେଷଙ୍କୁ ନବକିଶୋର ଦାସ ହତ୍ୟା ମାମଲାରେ ଆଙ୍ଗୁଳି ଦେଖାଇବା ଆଦୌ ଗ୍ରହଣୀୟ ନୁହେଁ ବୋଲି ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି । ସେମାନେ ଅନବରତ ରାଜ୍ୟର ବିକାଶ ପାଇଁ କାମ କରୁଛନ୍ତି ବୋଲି ସସ୍ମିତ ପାତ୍ର କହିଛନ୍ତି ।
ସେହିପରି ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ମନ୍ତବ୍ୟକୁ କଡ଼ା ସମାଲୋଚନା କରିଛନ୍ତି ସାଂସଦ ଅମର ପଟ୍ଟନାୟକ । ଟୁଇଟ କରି ସମାଲୋଚନା କରିଛନ୍ତି ବିଜେଡି ସାଂସଦ ଅମର ପଟ୍ଟନାୟକ । ଜୟନାରାୟଣଙ୍କ ମନ୍ତବ୍ୟକୁ ପାଗଳର ପ୍ରଳାପ ବୋଲି କହିଛନ୍ତି ଅମର ।