ଭୁବନେଶ୍ୱର: ବିଜେବି କଲେଜ ଛାତ୍ରଙ୍କୁ ମରଣାନ୍ତକ ଆକ୍ରମଣ । ପୂର୍ବ ଶତ୍ରୁତାରୁ ଆକ୍ରମଣ କରାଯାଇଥିବା ସୂଚନା । ବିଜେବି କଲେଜରେ ଇଣ୍ଟିଗ୍ରେଟେଡ MBA ପଢ଼ୁଥିବା ଛାତ୍ରଙ୍କୁ ମରଣାନ୍ତକ ଆକ୍ରମଣ ହୋଇଛି । ଆକ୍ରମଣରେ ଆହତ ହୋଇଥିବା ଛାତ୍ର ହେଉଛନ୍ତି ଶାଶ୍ୱତ ପଣ୍ଡା । ଏହି ଘଟଣା ବଡ଼ଗଡ଼ ପୋଲିସ ୨ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ଛାତ୍ର ଓ ଆଉ ଜଣେ ଅଣଛାତ୍ର ରହିଥିବା ସୂଚନା ମିଳିଛି ।
ସୁଦାନରେ ଆର୍ମି ଓ ଅର୍ଦ୍ଧସାମରିକ ବାହିନୀ ମଧ୍ୟରେ ତୀବ୍ର ସଂଘର୍ଷ, ଜଣେ ଭାରତୀୟଙ୍କ ସମେତ ୫୬ ମୃତ
ନୂଆଦିଲ୍ଲୀ: ଅଶାନ୍ତ ସୁଦାନ । ଆର୍ମି ଓ ଅର୍ଦ୍ଧସାମରିକ ବାହିନୀ ମଧ୍ୟରେ ସଂଘର୍ଷ ତୀବ୍ର ଆକାର ଧାରଣ କରିଛି । ହିଂସାରେ ୫୬ରୁ ଅଧିକ ଲୋକ ପ୍ରାଣ ହରାଇଥିବାବେଳେ ୬୦୦ରୁ ଅଧିକ ଲୋକ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଜଣେ ଭାରତୀୟ ଥିବା ସୂଚନା ମିଳିଛି । ମୃତକ ହେଉଛନ୍ତି ଡାଲ ଗ୍ରୁପ କମ୍ପାନୀରେ କାର୍ଯ୍ୟରତ ଆଲବର୍ଟ ଅଗଷ୍ଟାଇନ । ଖାର୍ଟୁମରେ ସବୁଠାରୁ ତୀବ୍ର ଆକାର ଧାରଣ କରିଛି ହିଂସା । ସୁଦାନରୁ ସାଉଦି ଆରବ ଅଭିମୁଖେ ଯିବା ଲାଗି ଉଡାଣ ଆରମ୍ଭ କରିଥିବା ଏୟାରବସ୍ ଏ୩୩୦ ଉପରେ ବି ହୋଇଛି ଆକ୍ରମଣ । ତେବେ ଆଶ୍ଚର୍ଯ୍ୟଜନକ ଭାବେ ରକ୍ଷା ପାଇଯାଇଛନ୍ତି ସମସ୍ତ ଯାତ୍ରୀ ଓ କ୍ରିଉ ମେମ୍ବର । ସେପଟେ ସମ୍ଭାବ୍ୟ ଆକ୍ରମଣ ଆଶଙ୍କାରେ ସୁଦାନ ଅଭିମୁଖୀ ବିମାନଗୁଡିକୁ ଫେରାଇ ନିଆଯାଇଛି ।
ବିଶ୍ବର ସବୁଠାରୁ ଦରିଦ୍ର ରାଷ୍ଟ୍ର ଭାବେ ପରିଗଣିତ ସୁଡାନରେ ଦିନକୁ ଦିନ ସ୍ଥିତି ବିଗିଡିବାରେ ଲାଗିଛି । ରାଷ୍ଟ୍ରପତି ଭବନ ଓ ଖାର୍ଟୁମ ବିମାନ ବନ୍ଦରକୁ ଅର୍ଦ୍ଧସାମରିକ ବାହିନୀ ନିଜ କବଜାକୁ ନେଇଥିବା ସୂଚନା ମିଳିଛି । ରେଗୁଲାର ଆର୍ମିରେ ପାରାମିଲିଟାରୀ ରାପିଡ ସପୋର୍ଟ ଫୋର୍ସ ବା ଆରଏସଏଫକୁ ସାମିଲ କରିବା ପ୍ରସଙ୍ଗକୁ ନେଇ ସାମରିକ ନେତା ଆବଦେଲ ଫତାହ ଅଲ-ବୁହାନ ଓ ଅର୍ଦ୍ଧସାମରିକ ବାହିନୀ ନେତା ଜେନେରାଲ ମହମ୍ମଦ ହାମଦାନ ଡାଗଲୋଙ୍କ ମଧ୍ୟରେ ସଂଘର୍ଷ ଜାରି ରହିଛି । ମହମ୍ମଦ ହାମଦାନ କହିଛନ୍ତି- ସମସ୍ତ ଆର୍ମି ବେସକୁ ଅଧିକୃତ କରିବା ଯାଏ ସଂଗ୍ରାମ ଜାରି ରହିବ । ସେପଟେ ସାମରିକ ନେତା ଆବଦେଲ ଫତାହ କହିଛନ୍ତି- ଅର୍ଦ୍ଧସାମରିକ ବାହିନୀକୁ ସମ୍ପୂର୍ଣ୍ଣ ନିଷ୍କ୍ରିୟ ନ କରିବା ଯାଏ କୌଣସି କଥାବାର୍ତ୍ତା କରାଯିବ ନାହିଁ । ଶାନ୍ତିପୂର୍ଣ୍ଣ ସମାଧାନ ଲାଗି ଆମେରିକା, ବ୍ରିଟେନ, ଇୟୁ, ଚୀନ ଓ ଋଷ ପକ୍ଷରୁ ଉଦ୍ୟମ ଆରମ୍ଭ ହୋଇଛି ।
ରାଜଧାନୀରେ ବଡ଼ ଧରଣର ଲୁଟ୍, ଗ୍ରୀଲ୍ ତାଡ଼ି ଲୁଟି ନେଲେ ୩ ଲକ୍ଷ ଟଙ୍କା
ଭୁବନେଶ୍ୱର: ଭୁବନେଶ୍ୱରରେ ବଡ଼ ଧରଣର ଲୁଟ୍ । ଏକ ଘଣ୍ଟାର ଅପରେସନରେ ଲୁଟିନେଲେ ୩ ଲକ୍ଷ ଟଙ୍କା । ଗଜପତିନଗରରେ ଇଲେକ୍ଟ୍ରିକାଲ କଣ୍ଟ୍ରାକ୍ଟରଙ୍କ ଅଫିସରେ କଳାକନା ବୁଲାଇଲେ ୪ ଦୃର୍ବୁତ୍ତ । ଗ୍ରିଲ୍ ତାଡି ଲୁଟି ନେଲେ ୩ ଲକ୍ଷ ଟଙ୍କା, ଗୋଲଡ ଓ ସିଲଭର କଏନ । ଲୁଟ୍ ବେଳର ଦୃଶ୍ୟ ସିସିଟିଭିରେ କଏଦ ହୋଇଛି । ୪ ଜଣ ଲୁଟେରା ବିଳମ୍ବିତ ରାତିରେ ଆସିଥିଲେ । ଦୁଇଜଣ ବାହାରେ ଥିବା ବେଳେ ଦୁଇଜଣ ଭିତରକୁ ପଶିଥିଲେ । ଚୋରି ଅଭିଯୋଗ ପରେ ତଦନ୍ତ ଆରମ୍ଭ କରିଛି ପୋଲିସ । ଘଟଣାସ୍ଥଳରେ ପୋଲିସ ଓ ଫରେନସିକ ଟିମ ପହଞ୍ଚି ତନାଘନା ଆରମ୍ଭ କରିଛି ।
ଝାରସୁଗୁଡ଼ା ଉପନିର୍ବାଚନ ପୂର୍ବରୁ ପୋଲିସର ଫ୍ଲାଗମାର୍ଚ୍ଚ
ଝାରସୁଗୁଡ଼ା: ପାଖଉଛି ଝାରସୁଗୁଡ଼ା ଉପନିର୍ବାଚନ । ନିର୍ବାଚନ ତାରିଖ ପାଖେଇବା ସହ ଝାରସୁଗୁଡ଼ାରେ ବଢ଼ୁଛି ରାଜନୈତିକ ଉଷ୍ମତା । ନିର୍ବାଚନକୁ ଦୃଷ୍ଟିରେ ରଖି ଝାରସୁଗୁଡ଼ା ଟାଉନ ଥାନା ଓ ସଦର ଥାନା ଅଞ୍ଚଳରେ ପୋଲିସର ଫ୍ଲାଗ ମାର୍ଚ୍ଚ କରାଯାଇଛି। ଝାରସୁଗୁଡ଼ାରେ ଆଇନ ଶୃଙ୍ଖଳା ପରିସ୍ଥିତି ନିୟନ୍ତ୍ରଣ ରଖିବା ପାଇଁ ଓ କୌଣସି ପ୍ରକାରର ଅପ୍ରୀତିକର ପରିସ୍ଥିତି ଯେମିତି ସୃଷ୍ଟି ନହୁଏ ତାକୁ ନେଇ ଏହି ଫ୍ଲାଗ ମାର୍ଚ୍ଚ କରାଯାଇଥିଲା। ଏହି ଫ୍ଲାଗ ମାର୍ଚ୍ଚରେ ଝାରସୁଗୁଡ଼ା ଏସପି ସ୍ମିଥ୍ ପରମାର, SDPO ନିର୍ମଳ ମହାପାତ୍ର, ଟାଉନ ଥାନା ଅଧିକାରୀ ରଞ୍ଜନ ବିଶ୍ବାଳ ଓ ସଦର ଥାନା ଅଧିକାରୀଙ୍କ ସମେତ ପୋଲିସ ଅଧିକାରୀମାନେ ଉପସ୍ଥିତ ଥିଲେ।
ଆସନ୍ତାକାଲିଠାରୁ ପୁଣି ସକାଳୁଆ ସ୍କୁଲ, ସାଢ଼େ ୬ରୁ ୧୧ ପର୍ଯ୍ୟନ୍ତ ଚାଲିବ କ୍ଲାସ୍
ଭୁବନେଶ୍ୱର: ଆସନ୍ତାକାଲିଠାରୁ ପୁଣି ସକାଳୁଆ ସ୍କୁଲ। ଏଥର ସମୟରେ ପରିବର୍ତ୍ତନ କରାଯାଇଛି। ସକାଳ ୭ଟାରୁ ସାଢ଼େ ୧୧ ବଦଳରେ ସାଢ଼େ ୬ରୁ ୧୧ଟା ଯାଏଁ କ୍ଲାସ ଚାଲିବ। ଗ୍ରୀଷ୍ମ ପ୍ରବାହ ସ୍ଥିତି ଦେଖି ଜିଲ୍ଲାପାଳମାନେ ଚାହିଁଲେ କ୍ଲାସ୍ ଟାଇମିଂରେ ପରିବର୍ତ୍ତନ କରିପାରିବେ। ଗତକାଲି ଏନେଇ ସ୍କୁଲ ଓ ଗଣଶିକ୍ଷା ବିଭାଗ ନିଷ୍ପତ୍ତି ନେଇଥିଲା । କାଲିଠୁ ରାଜ୍ୟ ସମସ୍ତ ସରକାରୀ ଓ ବେସରକାରୀ ସ୍କୁଲ ଖୋଲିବ । ସ୍କୁଲରେ ପାନୀୟ ଜଳ ଓ ଅନ୍ୟାନ୍ୟ ସୁବିଧା ଉପଲବ୍ଧ କରାଇବା ପାଇଁ ନିର୍ଦ୍ଦେଶ ଦିଆଯାଇଛି । ପ୍ରବଳ ଗ୍ରୀଷ୍ମ ପ୍ରବାହ ପାଇଁ ଏପ୍ରିଲ ୧୨ରୁ ୧୬ତାରିଖ ପର୍ଯ୍ୟନ୍ତ ସ୍କୁଲ ବନ୍ଦ ରହିଥିଲା ।
ପୁଣି ବଢ଼ିଲା କର୍ଣ୍ଣାଟକରେ ବିଜେପି ସଙ୍କଟ, ଦଳ ଛାଡ଼ିଲେ ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ସେଟ୍ଟର
ବେଙ୍ଗାଲୁରୁ: ପୁଣି ବଢ଼ିଲା କର୍ଣ୍ଣାଟକରେ ବିଜେପି କ୍ରାଇସିସ୍ । ବିଜେପି ଛାଡ଼ିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ଜଗଦୀଶ ସେଟ୍ଟର । ଟିକେଟରୁ ବଞ୍ଚିତ ସେଟ୍ଟର କିଛି ଦିନ ଧରି ହାଇକମାଣ୍ଡଙ୍କୁ ବିରୋଧ କରିଆସୁଥିଲେ । ବିଜେପି ପ୍ରାର୍ଥୀ ତାଲିକାରୁ ବାଦ୍ ପଡ଼ିବା ପରେ ସେ ଦଳରୁ ଇସ୍ତଫା ଦେଇଛନ୍ତି । ସେ ମଧ୍ୟ ବିଧାୟକ ପଦରୁ ଇସ୍ତଫା ଦେବେ ବୋଲି କହିଛନ୍ତି । କଂଗ୍ରେସ ସରକାର ଅମଳରେ ବିରୋଧୀ ଦଳ ନେତା ଭୂମିକା ତୁଲାଇଥିବା ସେଟ୍ଟରଙ୍କ ଲାଗି ଏବେ ଦଳୀୟ ନେତା ଚିନ୍ତାରେ ପଡ଼ିଛନ୍ତି ।
ତାଙ୍କ ବିରୋଧରେ ଦଳର ନେତାମାନେ ଷଡ଼ଯନ୍ତ୍ର କରିଛନ୍ତି ବୋଲି ଅଭିଯୋଗ କରିଛନ୍ତି ସେଟ୍ଟର । ମୁଖ୍ୟମନ୍ତ୍ରୀ ବାସବରାଜ ବୋମାଇ, କେନ୍ଦ୍ରମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ସହ ଆଲୋଚନା କରି ବିଫଳ ହେବା ପରେ ସେ ଶେଷରେ ଇସ୍ତଫାର ପଥ ବାଛିଥିଲେ । ତେବେ ସେ ନିର୍ବାଚନ ଲଢିବେ ବୋଲି କହିଛନ୍ତି ସେଟ୍ଟର । ପୂର୍ବରୁ ରାଜନୀତିରୁ ସନ୍ନ୍ୟାସ ନେଇଛନ୍ତି କେ ଏସ ଇଶ୍ୱରପ୍ପା । ସେହିପରି ବିଜେପିରୁ ଇସ୍ତଫା ଦେଇଥିଲେ ପୂର୍ବତନ ଉପମୁଖ୍ୟମନ୍ତ୍ରୀ ଲକ୍ଷ୍ମଣ ସାବଡ଼ି ।
ସିବିଆଇ ଅଫିସରେ ହାଜର ହେଲେ କେଜ୍ରିଓ୍ୱାଲ, ସିବିଆଇ ଅଫିସ ବାହାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି
ନୂଆଦିଲ୍ଲୀ: ଦିଲ୍ଲୀର ବିବାଦୀୟ ମଦ ନୀତି ମାମଲା । ସିବିଆଇ ଅଫିସରେ ହାଜର ହେଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ । ସିବିଆଇ ଅଫିସ ବାହାରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । କେଜ୍ରିଓ୍ବାଲଙ୍କ ସହ ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ୱନ୍ତ ମାନ୍ ଓ ଅନ୍ୟ କ୍ୟାବିନେଟ ମନ୍ତ୍ରୀ ଯାଉଥିବା ବେଳେ ପୋଲିସ ସେମାନଙ୍କୁ ଅଧାରାସ୍ତାରେ ଅଟକାଇଛି । ପୋଲିସ କାର୍ଯ୍ୟାନୁଷ୍ଠାନକୁ ବିରୋଧ କରି ଲୋଧି ରୋଡରେ ଧାରଣା ଦେଇଛନ୍ତି ଆପ୍ ନେତା । ସେପଟେ ସିବିଆଇରେ ହାଜର ହେବା ପୂର୍ବରୁ ସୋସିଆଲ ମିଡିଆରେ ଭିଡିଓ ସେୟାର କରି ବିଜେପି ଓ କେନ୍ଦ୍ରୀୟ ଏଜେନ୍ସି ଉପରେ ବର୍ଷିଛନ୍ତି କେଜରିଓ୍ବାଲ । ୫ ମିନିଟ ୨୭ ସେକେଣ୍ଡର ଭିଡିଓରେ କେଜ୍ରିଓ୍ବାଲ କହିଛନ୍ତି, ଏହି ଲୋକମାନ ବହୁତ ଶକ୍ତିଶାଳୀ । ବିଜେପି ଇଙ୍ଗୀତରେ ସିବିଆଇ କାମ କରୁଛି । ମୋତେ ଗିରଫ କରିବାକୁ ବିଜେପି ନିର୍ଦ୍ଦେଶ ଦେଇଥାଇପାରେ । ସିବିଆଇ ବିଜେପି ଦ୍ବାରା ପରିଚାଳିତ ବୋଲି କେଜ୍ରିଓ୍ବାଲ କହିଛନ୍ତି । କେନ୍ଦ୍ର ସରକାର ସତ୍ତା ଲୋଭରେ ଏକଛତ୍ରବାଦ ଶାସନ ଚଲାଇଥିବା କହିଛନ୍ତି କେଜ୍ରିୱାଲ ।
ତେବେ ସିବିଆଇରେ ହାଜର ପୂର୍ବରୁ କେଜ୍ରିଓ୍ବାଲ ରାଜଘାଟରେ ପହଞ୍ଚି ଗାନ୍ଧିଜୀଙ୍କ ସ୍ମୃତିରେ ପୁଷ୍ପମାଲ୍ୟ ଅର୍ପଣ କରିଥିଲେ । ସେପଟେ କେଜ୍ରିଓ୍ବାଲଙ୍କୁ ସମନକୁ ନେଇ ଆପ୍ ସମର୍ଥକ ଦିଲ୍ଲୀ ରାଜରାସ୍ତାରେ ପ୍ରତିବାଦ କରିଛନ୍ତି । ପୋଲିସ କେତେଜଣ ପ୍ରତିବାଦକାରୀଙ୍କୁ ଉଠାଇନେଇଛି । ପୂର୍ବରୁ ସମାନ ମାମଲାରେ ଗିରଫ ହୋଇ ଜେଲରେ ଅଛନ୍ତି ପୂର୍ବତନ ଉପମୁଖ୍ୟମନ୍ତ୍ରୀ ମନିଷ ସିସୋଦିଆ ।
ସୁନ୍ଦରଗଡ଼ ମେଡିକାଲ୍ କଲେଜରେ ନିଯୁକ୍ତି ନାଁରେ ଠକେଇ, ୪ ଜଣଙ୍କୁ ଗିରଫ କଲା ପୋଲିସ
ସୁନ୍ଦରଗଡ଼: ସୁନ୍ଦରଗଡ଼ ମେଡ଼ିକାଲ୍ କଲେଜରେ ନିଯୁକ୍ତି ନାଁରେ ଠକେଇ । ୪ ଜଣ ଅଭିଯୁକ୍ତଙ୍କୁ ଗିରଫ କଲା ପୋଲିସ । ଗିରଫ ଅଭିଯୁକ୍ତମାନଙ୍କୁ ସୁନ୍ଦରଗଡ ଟାଉନ୍ ଥାନାରେ ଅଟକ ରଖି ପଚରାଉଚରା କରାଯାଉଛି । ସୁନ୍ଦରଗଡ଼ ମେଡ଼ିକାଲ କଲେଜରେ ବିଭିନ୍ନ ପଦବୀରେ ଚାକିରି ଦେବା ନାମରେ କିଛି ଦଲାଲ ୧୭ ହଜାରରୁ ୭୦ ହଜାର ଟଙ୍କା ଠକି ନକଲି ନିଯୁକ୍ତି ପତ୍ର ଦେଉଥିବା ଅଭିଯୋଗ ହୋଇଛି। ଅଭିଯୋଗ ପରେ ସୁନ୍ଦରଗଡ଼ ଟାଉନ ଥାନା ପୋଲିସ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଥାନାରେ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛନ୍ତି।
ୟୁପିରେ ଜଙ୍ଗଲରାଜ, ବନ୍ଧୁକ ମୁନରେ ଚାଲିଛି ଉତ୍ତର ପ୍ରଦେଶ ସରକାର
ଲକ୍ଷ୍ନୌ: ୟୁପିରେ ଜଙ୍ଗଲରାଜ । ବିପର୍ଯ୍ୟସ୍ତ ଆଇନଶୃଙ୍ଖଳା । ବନ୍ଧୁକ ମୁନରେ ଚାଲିଛି ଉତ୍ତର ପ୍ରଦେଶ ସରକାର । ଗ୍ୟାଙ୍ଗଷ୍ଟର ବ୍ରଦର୍ସଙ୍କୁ କଡ଼ା ସୁରକ୍ଷା ଭିତରେ ହତ୍ୟା ପରେ ୟୁପି ସରକାରଙ୍କ ଉପରେ ଅଙ୍ଗୁଳି ଉଠାଇଛନ୍ତି ବିରୋଧୀ । ସରକାରଙ୍କୁ ଉତ୍ତରଦାୟୀ କରିବା ସହ ରାଷ୍ଟ୍ରପତି ଶାସନ ଲାଗୁ କରିବାକୁ ଦାବି କରିଛନ୍ତି ବିରୋଧୀ । ନ୍ୟାୟିକ ବ୍ୟବସ୍ଥା ଉପରେ ସରକାରଙ୍କର ଭରସା ନାହିଁ ବୋଲି କହିଛନ୍ତି AIMIM ମୁଖ୍ୟ ଅସଦୁଦ୍ଦିନ ଓଓ୍ୱେସୀ । ସେପଟେ ଅତିକକୁ ହତ୍ୟା ପରେ ୟୁପିର କିଛି ସ୍ଥାନରେ ଆତସବାଜୀ କରାଯିବା ସହ ସେଲିବ୍ରେସନ କରାଯିବା ନିନ୍ଦନୀୟ ବୋଲି ଓଓ୍ୱେସୀ କହିଛନ୍ତି । ଯେଉଁ ରାଜ୍ୟରେ ହତ୍ୟାକରୀଙ୍କୁ ହିରୋ ଆଖ୍ୟା ଦିଆଯାଏ, ସେହି ସମାଜରେ କୋର୍ଟ ଓ ନ୍ୟାୟପାଳିକାର ଆବଶ୍ୟକତା କ’ଣ ବୋଲି ପ୍ରଶ୍ନ କରିଛନ୍ତି ଓଓ୍ୱେସୀ ।
ଅନ୍ୟପକ୍ଷରେ ଟ୍ୱିଟ୍ କରି ସିଧା ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଟାର୍ଗେଟ କରିଛନ୍ତି ୟୁପିର ପୂର୍ବତନ ମୁଖ୍ୟମନ୍ତ୍ରୀ ତଥା ସମାଜବାଦୀ ପାର୍ଟି ନେତା ଅଖିଳେଶ ଯାଦବ । କଡ଼ା ସୁରକ୍ଷାରେ ଦୁଇଜଣଙ୍କୁ ହତ୍ୟା କରାଯାଇଥିବା ବେଳେ ସାଧାରଣ ଲୋକେ କେତେ ସୁରକ୍ଷିତ ବୋଲି ପ୍ରଶ୍ନ କରିଛନ୍ତି ଅଖିଳେଶ । ଜାଣିଶୁଣି ଲୋକଙ୍କ ଭିତରେ ଭୟର ବାତାବରଣ ସୃଷ୍ଟି କରାଯାଉଛି ବୋଲି ଅଖିଳେଶ ଟ୍ବିଟ୍ କରିଛନ୍ତି । ଏଭଳି ଜଘନ୍ୟ ଅପରାଧ ପାଇଁ ରାଜ୍ୟ ସରକାରଙ୍କୁ ବରଖାସ୍ତ କରିଦିଆଯାଏ ବୋଲି କହିଛନ୍ତି ବିଏସପି ମୁଖ୍ୟ ମାୟାବତୀ । ୟୁପି ସରକାରରେ ଆଇନ ବ୍ୟବସ୍ଥା ଉପରେ ଏହା ବିରାଟ ପ୍ରଶ୍ନ ଚିହ୍ନ ସୃଷ୍ଟି କରିଛି । ସୁପ୍ରିମକୋର୍ଟ ନିଜ ଆଡ଼ୁ ମାମଲାରେ ହସ୍ତକ୍ଷେପ କରିବା ଆବଶ୍ୟକ ବୋଲି ମାୟାବତୀ କହିଛନ୍ତି ।
ସେପଟେ ୟୁପିରେ ଧ୍ୱସ୍ତ ଆଇନଶୃଙ୍ଖଳାକୁ ନେଇ ବର୍ଷିଛନ୍ତି ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହେଲଟ । ରାଜ୍ୟରେ ଆଇନଶୃଙ୍ଖଳା ବଜାୟ ରଖିବା ସରକାରଙ୍କର ଦାୟିତ୍ୱ । ହେଲେ ସରକାର ଏଥିରେ ବିଫଳ ହୋଇଛନ୍ତି । ୟୁପିରେ ଯାହା ଘଟୁଛି ତା’ ଉପରେ ପୁରା ଦେଶର ନଜର ରହିଛି ବୋଲି ଗେହେଲଟ କହିଛନ୍ତି । ସେହିପରି ଆଇନଶୃଙ୍ଖଳା ଓ ନ୍ୟାୟିକ ପ୍ରକ୍ରିୟାର ଉଲ୍ଲଂଘନ କରିବା ଗଣତନ୍ତ୍ର ପାଇଁ ଉଚିତ ନୁହେଁ ବୋଲି କହିଛନ୍ତି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ । ସମ୍ବିଧାନର ରକ୍ଷା କରିବା ସହ ଅପରାଧୀକୁ କଠୋର ଶାସ୍ତି ମିଳିବା ଦରକାର । ମାତ୍ର ଦେଶର ଆଇନଶୃଙ୍ଖଳା ବଜାୟ ରଖିବା ଆବଶ୍ୟକ ବୋଲି ପ୍ରିୟଙ୍କା କହିଛନ୍ତି । ୟୁପିରେ ସମ୍ବିଧାନ, ଲୋକତନ୍ତ୍ର ଓ ଆଇନ ବ୍ୟବସ୍ଥାର ଏନକାଉଣ୍ଟର କରାଯାଇଛି । ସରକାର ଏହାର ଜବାବ ଦିଅନ୍ତୁ । ରାଜ୍ୟରେ ରାଷ୍ଟ୍ରପତି ଶାସନ ଲାଗୁ କରାଯାଉ ବୋଲି କହିଛନ୍ତି ଜେଡିୟୁ ନେତା ନିରଜ କୁମାର ।
ନୂଆପଡ଼ା ସିଲିଆରିବାହାରାରେ ବାଘ ଆତଙ୍କ, ଗାଈକୁ ଶିକାର କରି ଜଗିଛି କଲରା ପତରିଆ
ନୂଆପଡ଼ା: ନୂଆପଡ଼ା ସିଲିଆରିବାହାରାରେ ବାଘ ଭୟ । ଗାଈକୁ ଶିକାର କରି ଜଗିଛି ବାଘ । ମୋବାଇଲରେ କଏଦ ହୋଇଛି କଲରାପତରିଆର ଚିତ୍ର । ନୂଆପଡ଼ା ରେଞ୍ଜ ଧରମବନ୍ଧା ସେକ୍ସନର ମୂଷରୀଙ୍ଗ ସଂରକ୍ଷିତ ଜଙ୍ଗଲ ସ୍ଥିତ ସିଲିଆରିବାହାରା ଗାଁରେ ବାଘ ବୁଲୁଥିବା ଦେଖିବାକୁ ମିଳିଛି । ଆଜି ସକାଳୁ ଗାଈକୁ ଶିକାର କରି ଶିକାରକୁ ଜଗି ରହିଥିଲା । ଏହି କଲରାପତରିଆ ବାଘର ଚିତ୍ର ମୋବାଇଲ କ୍ୟାମେରାରେ କଏଦ ହୋଇଛି । ପୂର୍ବରୁ ଖାଦ୍ୟ ଅନ୍ବେଷଣରେ ଆସି ବାଘ ଶିକାର ପାଇଁ ଜଗି ରହିଥିଲା । ଜଙ୍ଗଲରେ ଗାଈକୁ ବାଘ ଶିକାର କରି ଖାଇଥିଲା । ହେଲେ ଗାଈକୁ ଖାଇବା ପରେ ବାଘ ଜଙ୍ଗଲକୁ ଯାଇ ପାରିନଥିଲା । ସ୍ଥାନୀୟ ଯୁବକ ବାଘର ଫଟୋ ଓ ଭିଡିଓ ମୋବାଇଲ କ୍ୟାମେରାରେ କଏଦ କରିଛନ୍ତି । ବନଖଣ୍ଡ ଅଧିକାରୀ ସୁଶୀଲ ତ୍ରିପାଠୀଙ୍କ ସମେତ ଏକ ଟିମ୍ ଘଟଣାସ୍ଥଳକୁ ଯାଇଛନ୍ତି। ଶିକାର ପରେ ଦୁଇ ବାଘ ମଧ୍ୟରେ ଲଢେଇ ଯୋଗୁ ବାଘ ଥକି ଥିବା ଅନୁମାନ କରିଛି ବନବିଭାଗ ।