ନୂଆଦିଲ୍ଲୀ: ନିର୍ବାଚନ କମିଶନଙ୍କ ବଡ଼ ନିଷ୍ପତ୍ତି । ତିନୋଟି ଜାତୀୟ ରାଜନୈତିକ ଦଳ ହରାଇଲେ ମାନ୍ୟତା । ଯଥା ମମତା ବାନାର୍ଜୀଙ୍କ ତୃଣ ମୂଳ କଂଗ୍ରେସ ଟିଏମସି, ଶରଦ ପାୱାରଙ୍କ ଏନସିପି ହରାଇଲା ଜାତୀୟ ରାଜନୈତିକ ଦଳର ମାନ୍ୟତା । ସେହିପରି ସିପିଆଇ ବି ହରାଇଲା ଜାତୀୟ ଦଳ ମାନ୍ୟତା ।
ଅରବିନ୍ଦ କେଜ୍ରିୱାଲଙ୍କ ଆମ ଆଦମୀ ପାର୍ଟି ଏହି କ୍ରମରେ ସାମିଲ ହୋଇଛି । ଯଥା ସଫଳତା ହାସଲ କରିଛି ଆପ୍ । ଦିଲ୍ଲୀ ପରେ ପଞ୍ଜାବରେ ସରକାର ଗଢିଛି ଆମ ଆଦମୀ ପାର୍ଟି । ଅନେକ ରାଜ୍ୟରେ ବିଧାୟକ ମଧ୍ୟ ନିର୍ବାଚିତ ହୋଇଛନ୍ତି ।
ଭୁବନେଶ୍ୱର: ପଶ୍ଚିମ ଓଡ଼ିଶା ବିକାଶ ପରିଷଦର ଅସିତ୍ ତ୍ରିପାଠୀଙ୍କ ଅଧ୍ୟକ୍ଷତାରେ ବୈଠକ । ୨୦୨୩ -୨୪ ରାଜ୍ୟ ବଜେଟରେ ସରକାରଙ୍କ ଦ୍ୱାରା ଅନୁଦାନ ବୃଦ୍ଧି ପାଇଁ ୨୦୦ କୋଟିରୁ ୩୨୫ କୋଟି ପର୍ଯ୍ୟନ୍ତ ପରିଷଦକୁ ଅବଗତ କରାଇଥିଲେ ଏବଂ ଏଥିପାଇଁ ମାନ୍ୟବର ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଥିଲେ। ଅସମ୍ପୂର୍ଣ୍ଣ କମ୍ୟୁନିଟି ସେଣ୍ଟର ଏବଂ କଲ୍ୟାଣ ମଣ୍ଡପ ସମାପ୍ତ ପାଇଁ ପରିଷଦ ଦ୍ୱାରା ନିଆଯାଇଥିବା ପଦକ୍ଷେପ ବିଷୟରେ ଏହାକୁ ସମସ୍ତ ସଦସ୍ୟ ପ୍ରଶଂସା କରିଥିଲେ ଯେଉଁଥିପାଇଁ ଚଳିତ ବର୍ଷ ୧୨୫ କୋଟି ଟଙ୍କାର ବ୍ୟୟ ବରାଦ କରାଯାଇଛି ।
ପରିଷଦର ଅନୁଦାନ ପ୍ରାପ୍ତ ପ୍ରକଳ୍ପର କାର୍ଯ୍ୟକାରିତା, ଜନସାଧାରଣଙ୍କ ବ୍ୟବହାର ପାଇଁ ପ୍ରକଳ୍ପର ଉପଯୋଗ, ଅଡିଟୋରିୟମ୍, ପର୍ଯ୍ୟଟନ ସମ୍ବନ୍ଧୀୟ କାର୍ଯ୍ୟକଳାପ ସମେତ ଜୀବିକା ପ୍ରୋଜେକ୍ଟ ଭଳି ବୃହତ ତଥା ଦୃଶ୍ୟମାନ ପ୍ରକଳ୍ପର ନିର୍ମାଣ, ସାମଗ୍ରିକ ରୂପାନ୍ତର ଏବଂ ସ୍ୱଚ୍ଛତା ପାଇଁ ନିଆଯାଇଥିବା ବିଭିନ୍ନ ପଦକ୍ଷେପ ଉପରେ ପରିଷଦର ଅଧ୍ୟକ୍ଷ ଗୁରୁତ୍ୱାରୋପ କରିଛନ୍ତି । ସମସ୍ତ ସଦସ୍ୟଙ୍କୁ ସଂଘବଦ୍ଧ ହିସାବରେ କାର୍ଯ୍ୟ କରିବାକୁ ସେ ଆହ୍ଵାନ କରିଛନ୍ତି । ପରିଷଦର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଡକ୍ଟର ଅଜିତ୍ କୁମାର ମିଶ୍ର ବୈଠକର ଆଲୋଚନା ପାଇଁ କାର୍ଯ୍ୟସୂଚୀ ବର୍ଣ୍ଣନା କରିଥିଲେ ।
ପରିଷଦ ବୈଠକରେ ମାନ୍ୟବର ସାଂସଦ / ବିଧାୟକ / ଅନ୍ୟମାନଙ୍କ ଦ୍ୱାରା ସୁପାରିଶ କରାଯାଇଥିବା ୧ ଡିସେମ୍ବର ୨୦୨୨ ରୁ ୩୧ ମାର୍ଚ୍ଚ ୨୦୨୩ ମଧ୍ୟରେ ୫୬୬ ଗୋଟି ପ୍ରକଳ୍ପର ୫୪.୮୧ କୋଟି ଟଙ୍କାର ଅନୁମୋଦନ କରାଯାଇଥିଲା । WODC ଅନୁଦାନ ପ୍ରାପ୍ତ କମ୍ୟୁନିଟି ସେଣ୍ଟର୍ସ / କଲ୍ୟାଣ ମଣ୍ଡପଗୁଡିକର 1147 ନମ୍ବର ପୂରଣ ପାଇଁ ଗ୍ରହଣ କରାଯାଇଥିବା ପ୍ରସ୍ତାବଗୁଡିକ ୬୪.୨୪ କୋଟି ଟଙ୍କା , ବିଭିନ୍ନ ଜିଲ୍ଲାକୁ ୪ ଜଣ ବୈଷୟିକ ବ୍ୟକ୍ତିଙ୍କ ଯୋଗଦାନ, ସୋସିଆଲ୍ ମିଡିଆ ସେଲର କାର୍ଯ୍ୟକାରିତା ସ୍ପଷ୍ଟ ଭାବରେ ବିଚାରବିମର୍ଶ କରାଯାଇଥିଲା ଏବଂ ପରିଷଦରେ ଅନୁମୋଦିତ ହୋଇଥିଲା ।
ଦେବଗଡ ବିଧାୟକ ସୁବାଷ ଚନ୍ଦ୍ର ପାଣିଗ୍ରାହୀ, ଲଞ୍ଜିଗଡ ବିଧାୟକ ପ୍ରଦିପ କୁମାର ଦିଶାରୀ, ବରଗଡ ବିଧାୟକ ଦେବେଶ ଆଚାର୍ଯ୍ୟ, ଖଡିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ ମଧ୍ୟ WODC ପ୍ରକଳ୍ପ କାର୍ଯ୍ୟକାରୀ କରିବା ସହ ବିଭିନ୍ନ ପ୍ରସଙ୍ଗ ଉଠାଇଥିଲେ । ପରିଷଦର ଅନୁଦାନ ବୃଦ୍ଧି ପାଇଁ ମାନ୍ୟବର ମୁଖ୍ୟମନ୍ତ୍ରୀଙ୍କୁ ସେମାନେ କୃତଜ୍ଞତା ଜଣାଇଛନ୍ତି । ବୈଠକରେ ପରିଷଦର ପରାମର୍ଶଦାତା ଏବଂ ସମସ୍ତ ୯ ଜଣ ବିଶେଷଜ୍ଞ ସଦସ୍ୟ ମଧ୍ୟ ନିଜ ନିଜ ଜିଲ୍ଲାର ସମସ୍ୟାଗୁଡିକ ଉପସ୍ଥାପନ କରିଥିଲେ |
ଦିସପୁର: ଦେଶରେ ସ୍ବାଧୀନତା ପରେ ଶିକ୍ଷା ବ୍ୟବସ୍ଥାରେ ଉନ୍ନତି ହୋଇଛି । ଲୋକମାନେ ପୂର୍ବ ଅପେକ୍ଷା ଅଧିକ ସଚେତନ ବି ହୋଇଛନ୍ତି । ତଥାପି ଆଜି ମଧ୍ୟ ଏପରି କିଛି ପ୍ରଥା ରହିଛି, ଯାହା ସଭ୍ୟ ସମାଜକୁ କଳଙ୍କିତ କରୁଛି। ପ୍ରତିବର୍ଷ ନର ବଳି ଦିଆଯିବାର ଖବର ବିଭିନ୍ନ ଅଞ୍ଚଳରୁ ସାମ୍ନାକୁ ଆସୁଛି। ନିକଟରେ ଆସାମ ପୋଲିସ ଜଣେ ମହିଳାଙ୍କୁ ବଳି ଦିଆଯିବା ଘଟଣାରେ ୫ ଜଣଙ୍କୁ ଗିରଫ କରିଛି।
ପୋଲିସ ଚାରି ବର୍ଷକାଳ ୪୦ରୁ ଅଧିକ ଲୋକଙ୍କୁ ପଚରାଉଚରା କରିବା ପରେ ଅଭିଯୁକ୍ତକୁ ଗିରଫ କରିଛି। ଏହା ପୂର୍ବରୁ କେରଳ, ଛତିଶଗଡ ଏବଂ ଝାଡଣ୍ଡରୁ ମଧ୍ୟ ଏଭଳି ମାମଲା ରୁଜୁ ହୋଇଛି।
ଛତିଶଗଡର ରାୟପୁରରେ ନର ବଳି ଦିଆଯିବା ଘଟଣାରେ ଅଭିଯୁକ୍ତ ତାନ୍ତ୍ରିକଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ଏଥି ସହ କେରଳରେ ଦୁଇଜଣ ମହିଳାଙ୍କୁ ବଳି ଦିଆଯାଇଥିଲା। ଝାଡ଼ଖଣ୍ଡରେ ମଧ୍ୟ ଦୁଇ ନିରୀହ ପିଲା ନରବଳିର ଶିକାର ହୋଇଥିଲେ ।
ପୂର୍ବରୁ କଲିକତା କାଳୀ ପୂଜା ଅବସରରେ ନର ବଳିର ଏକ ଖରାପ ପରମ୍ପରା ଥିଲା। ୧୮୨୮ ରୁ ୧୮୩୩ ପର୍ଯ୍ୟନ୍ତ କଲିକତାର ଗଭର୍ଣ୍ଣର ଜେନେରାଲ୍ ଥିବା ୱିଲିୟମ୍ ବେଣ୍ଟିନକ୍ ଏହା ବିରୁଦ୍ଧରେ ଏକ ଅଭିଯାନ ଆରମ୍ଭ କରିଥିଲେ ଏବଂ ଏହି ଅଭ୍ୟାସକୁ ବନ୍ଦ କରିଥିଲେ। ତଥାପି ଏହି ଖରାପ ପରମ୍ପରା ପୂର୍ବପରି ଜାରି ରହିଛି ।
ଆପଣ ଏହା ଜାଣି ଆଶ୍ଚର୍ଯ୍ୟ ହେବେ ଯେ ଅନ୍ଧବିଶ୍ୱାସ ଏବଂ ଯାଦୁକରୀ ସମ୍ବନ୍ଧୀୟ ମାମଲାର ମୁକାବିଲା ପାଇଁ ଦେଶର କେବଳ ଆଠଟି ରାଜ୍ୟରେ ଆଇନ ପ୍ରଣୟନ କରାଯାଇଛି। ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ୧୯୯୯ ପରେ ଲାଗୁ ହୋଇଥିବା ଏହି ନିୟମଗୁଡ଼ିକରେ କଳା ଯାଦୁ ବା ଅନ୍ଧବିଶ୍ୱାସକୁ ବ୍ୟାଖ୍ୟା କରାଯାଇ ନାହିଁ ।
ଏହି ମାମଲାରେ ଦଣ୍ଡବିଧାନର ବ୍ୟବସ୍ଥା ମଧ୍ୟ ଆଠଟି ରାଜ୍ୟରେ ଭିନ୍ନ ଅଟେ। କେରଳରେ କଳା ଯାଦୁ ଏବଂ ଯାଦୁକୁ ବନ୍ଦ କରିବା ପାଇଁ ୨୦୧୯ ରେ ଏକ ବିଲ୍ ଆଗତ କରାଯାଇଥିଲା, ଯାହା ଏପର୍ଯ୍ୟନ୍ତ ପାସ ହୋଇନାହିଁ । ତଥାପି, ଅନେକ ସଂଗଠନ କ୍ରମାଗତ ଭାବରେ ଦେଶରେ ଏକ ଜାତୀୟ ଆଇନ କାର୍ଯ୍ୟକାରୀ କରିବାକୁ ଦାବି କରୁଛନ୍ତି।
ଭୁବନେଶ୍ୱର: ରମାଦେବୀ ମହିଳା ବିଶ୍ୱବିଦ୍ୟାଳୟରେ ଆରମ୍ଭ ହୋଇଛି ବସନ୍ତ ଉତ୍ସବର ଅଷ୍ଟମ ସଂସ୍କରଣ । ଉତ୍ସବକୁ ଉଦଘାଟନ କରିଛନ୍ତି ପ୍ରଖ୍ୟାତ ସାହିତ୍ୟିକା ଡକ୍ଟର ଗାୟତ୍ରୀବାଳା ପଣ୍ଡା, ଭୁବନେଶ୍ବର ମେୟର ସୁଲୋଚନା ଦାସ ଏବଂ ଅଭିନେତ୍ରୀ ବର୍ଷା ପ୍ରିୟଦର୍ଶିନୀ । ୫ ଦିନ ଧରି ଚାଲିବାକୁ ଥିବା ଏହି ବସନ୍ତ ଉତ୍ସବରେ ଛାତ୍ରୀମାନଙ୍କ ମଧ୍ୟରେ ବିଭିନ୍ନ ପ୍ରତିଯୋଗୀତା ଅନୁଷ୍ଟିତ ହେବ ।
ରମାଦେବୀ ମହିଳା ବିଶ୍ବବିଦ୍ୟାଳୟରେ ପାଠ ପଢୁଥିବା ଛାତ୍ରୀମାନଙ୍କ ମଧ୍ୟରେ ନିବିଡ ବନ୍ଧନ ସୃଷ୍ଟି କରିବା ସହ ଉତ୍ସାହ ଭରିବା ପାଇଁ ଏଭଳି ବସନ୍ତ ଉତ୍ସବ ଆୟୋଜନ କରାଯାଇଛି । ଶେଷ ଦିନରେ ବିଶ୍ବବିଦ୍ୟାଳୟର ସମସ୍ତ ଛାତ୍ରଛାତ୍ରୀମାନେ ହୋଲି ଖେଳିବେ । ଏହି ଅବସରରେ ଛାତ୍ରୀମାନଙ୍କୁ ନିଜ କ୍ୟାରିୟର ପ୍ରତି ଧ୍ୟାନ ଦେବାକୁ ଅତିଥିମାନେ ପରାମର୍ଶ ଦେଇଥିଲେ ।
ନୂଆଦିଲ୍ଲୀ: ମାଇକ୍ରୋ ବ୍ଲଗିଂ ସାଇଟ ଟ୍ବିଟର ମାଲିକ ଏଲନ ମସ୍କ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଫଲୋ କରିଛନ୍ତି । ମସ୍କଙ୍କର ଏଲନ ଆଲର୍ଟ ନାଁରେ ଥିବା ଆକାଉଣ୍ଟର ଏହାକୁ ନେଇ ଏକ ଟ୍ବିଟ କରିଛି ।
ମସ୍କ ପିଏମଙ୍କୁ ଫଲୋ କରିବା ଦେଖି ୟୁଜର୍ସଙ୍କର ମଜାଦାର ଆକ୍ସନ ଆସିବା ଆରମ୍ଭ ହୋଇଯାଇଛି । ଜଣେ ୟୁଜର୍ ଏହାକୁ ନେଇ କମେଣ୍ଟ ଦେଇଛନ୍ତି । ସେ ଲେଖିଛନ୍ତି ଏବେ ଟେସଲା ଭାରତ ଆସିବାକୁ ଯାଉଛି ।
Elon Musk is now following Narendra Modi (@narendramodi)
— ELON ALERTS (@elon_alerts) April 10, 2023
ଏଠାରେ ଆପଣଙ୍କୁ କହି ରଖିବାକୁ ଚହୁଁଛୁ ଯେ, ଟ୍ବିଟରରେ ଅଧିକ ଫଲୋଅର୍ସ ଥିବା ନେତାଙ୍କ ମଧ୍ୟରେ ପିଏମ ନରେନ୍ଦ୍ର ମୋଦି ଅନ୍ୟତମ । ତାଙ୍କର ୮୭.୭ ମିଲିଅନରୁ ଅଧିକ ଫଲୋଅର୍ସ ଅଛନ୍ତି । ଏବେ ଏହି ଫଲୋଅର୍ସଙ୍କ ମଧ୍ୟରେ ଟ୍ବିଟର ମାଲିକ ଏଲନ ମସ୍କଙ୍କ ନାଁ ବି ଯୋଡ଼ି ହୋଇଯାଇଛି । ଟେସଲା କାର ଏବଂ ଟ୍ବିଟରକୁ ନେଇ ଏଲନ ମସ୍କ ସବୁବେଳେ ଚର୍ଚ୍ଚାରେ ଥାଆନ୍ତି । ନିକଟରେ ସେ ଟ୍ବିଟରର ପକ୍ଷୀ ଲୋଗୋ ବଦଳାଇ କୁକୁର ଲୋଗ ଦେଇଥିଲେ ।
ପିପିଲି: ଚତୁର୍ଥ ଆନ୍ତର୍ଜାତୀୟ ଚିତ୍ରକଳା ଶିଳ୍ପୀ ଶିବିର ଓ ପ୍ରଦର୍ଶନୀ ପିପିଲିରେ ଆୟୋଜିତ ହୋଇଯାଇଛି । ଯୋଗଦେଲେ 5ଟି ଦେଶର 47 ଚିତ୍ରଶିଳ୍ପୀ । ପିପିଲିର ଜନାର୍ଦ୍ଦନ ପରମଗୁରୁଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଜଳେଶ୍ବର ଆର୍ଟ ଫାଉଣ୍ଡସନ ଦ୍ବାରା ଏହି ପ୍ରଦର୍ଶନୀର ଅୟୋଜିତ ହୋଇଥିଲା । ଆଜି ପୁରୀ ଜିଲ୍ଲା ପିପିଲି ଉତ୍ତରା ବଜାର ସ୍ଥିତ ସକୁନ୍ତଳା ଆର୍ଟ ଗ୍ୟାଲେରୀରେ ମୁଖ୍ୟ ଅତିଥି ଭାବେ OTDCର ଅଧ୍ୟକ୍ଷ ଲେନିନ୍ ମହାନ୍ତି ଓ ସ୍ଥାନୀୟ ବିଧାୟକ ଯୋଗଦେଇ ପ୍ରଦର୍ଶିତ ଚିତ୍ରକଳା ବୁଲି ଦେଖିଥିଲେ ।
ଗତ ତିନି ଧରି ଚିତ୍ରଶିଳ୍ପୀ ମାନେ କୋଣାର୍କରେ ରହି ଓଡ଼ିଶାର ବିଭିନ୍ନ ଐତିହ ସମ୍ପର୍କରେ ଚିତ୍ରକଳା କର୍ମଶାଳା ଭାଗ ନେଇଥିଲେ । ବିଶେଷକରି ଭାରତ, ତୁର୍କୀ, ଭିଏତନାମ, ନେପାଲ ଏବଂ ବଙ୍ଗଳାଦେଶର 17 ଜଣ ମହିଳା ଓ 30 ଜଣ ପୁରୁଷ ଚିତ୍ର ଶିଳ୍ପୀ ନିଜ ନିଜର ଚିତ୍ର କଳାର ପ୍ରଦର୍ଶନ କରିଥିଲେ । ମିଳିତ ଅନୁଷ୍ଠାନ ପକ୍ଷରୁ ସମସ୍ତ ଚିତ୍ରଶିଳ୍ପୀଙ୍କୁ ଉପସ୍ଥିତ ଅତିଥିଙ୍କ ଦ୍ବାରା ଉତ୍ତରୀୟ ଓ ମାନପତ୍ର ଦେଇ ସମ୍ବର୍ଦ୍ଧିତ କରାଯାଇଥିଲା ।
ଭୁବନେଶ୍ୱର: ଦକ୍ଷତା ବିକାଶ ବିଭାଗର ସାମ୍ବାଦିକ ସମ୍ମିଳନୀ । ବିଭାଗୀୟ ମନ୍ତ୍ରୀ ପ୍ରୀତିରଞ୍ଜନ ଘଡେଇ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି । ଓଡ଼ିଶାରେ ପ୍ରଥମଥର ହେବାକୁ ଯାଉଛି ଦକ୍ଷତା କନକ୍ଲେଭ । କର୍ଯ୍ୟକ୍ରମର ଲକ୍ଷ୍ୟ ହେଉଛି ପ୍ରତିଭା ମାନଙ୍କୁ ଆଗକୁ ଆଣିବା । ଯେଉଁ ଉଦ୍ଦେଶ୍ୟରେ କଳିଙ୍ଗ ଷ୍ଟାଡିୟମରେ ଏପ୍ରିଲ ୨୦,୨୧ ଓ ୨୨ ତାରିଖରେ ଅନୁଷ୍ଠିତ ହେବାକୁ ଯାଉଛି ।
ଓଡ଼ିଶାର ଯୁବକ-ଯୁବତୀ ସଠିକ ସମୟରେ ପ୍ଲାଟଫର୍ମ ଖୋଜିଲେ ମଧ୍ୟ ପାଇ ପାରନ୍ତି ନାହିଁ । କିନ୍ତୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶାର ଯୁବକ ଯୁବତୀଙ୍କ ଅଭିନବ ପରିକଳ୍ପନା କରିଛନ୍ତି । ଏହି ସ୍କିଲ କନକ୍ଲେଭରେ ନିଜର ପାରଦର୍ଶିତା ଦେଖାଇ ନିଯୁକ୍ତି ପାଇପାରିବେ ଦକ୍ଷ ଯୁବକ-ଯୁବତୀ । ପ୍ରତିଟି ବ୍ୟକ୍ତି ନିଜକୁ ଦକ୍ଷ କରିବାର ଆବଶ୍ୟକତା ରହିଛି । ଯେତେବେଳେ ଦକ୍ଷତାର ଅଭାବ ରହିଥାଏ, ସେତେବେଳେ ନିଯୁକ୍ତି ଅଭାବ ସୃଷ୍ଟି ହୋଇଥାଏ ।
ତେଣୁ ସଠିକ ପ୍ଲାଟଫର୍ମରେ ସବୁ ବର୍ଗର ପିଲାଙ୍କୁ ନିଯୁକ୍ତି ଦେବା ସରକାରଙ୍କ ମୂଳ ଲକ୍ଷ୍ୟ । ଏହି କାର୍ଯ୍ୟକ୍ରମରେ ଯୋଗ ଦେଇ ନିଜ ଭିତରେ ଥିବା ପ୍ରତିଭାକୁ ପ୍ରଦର୍ଶନ କରିପାରିବେ । ଯଦ୍ୱାରା ନିଜର କନ୍ଫିଡେନ୍ସ ଲେବଲ ବଢିପାରିବ । ସେମାନେ ନିଯୁକ୍ତି ପାଇପାରିବେ, ନିଜେ ଜଣେ ଜଣେ ଉଦ୍ୟୋଗୀ ହୋଇପାରିବେ । ଯାହା ସରକାରଙ୍କ ମୂଳ ଲକ୍ଷ୍ୟ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଦକ୍ଷତା ବିକାଶ ମନ୍ତ୍ରୀ ପ୍ରୀତି ରଞ୍ଜନ ଘଡେଇ ।
ଖୋର୍ଦ୍ଧା: ନିରାକାରପୁର ଥାନା ନୂଆଗଡ଼ରେ ଚାଞ୍ଚଲ୍ୟ । ସାମାନ୍ୟ ବଚସାରୁ ପଡୋଶୀଙ୍କୁ ପିଟିପିଟି ହତ୍ୟା । ଏମିତି ଏକ ବିଭତ୍ସ ହତ୍ୟା ଘଟିଛି ଖୋର୍ଦ୍ଧା ଜିଲ୍ଲା ନୂଆଗଡ଼ ଅଞ୍ଚଳରେ । ମୃତକ ହେଲେ ୪୨ ବର୍ଷିୟ କୃଷ୍ଣଚନ୍ଦ୍ର ମାଝୀ । କାହିଁକି ପଡୋଶୀ ହତ୍ୟାକଲେ, ହତ୍ୟାକାଣ୍ଡର ପ୍ରକୃତ କାରଣ କଣ ତାହା ଅସ୍ପଷ୍ଟ ରହିଥିବାବେଳେ ପୁର୍ବ ଶତ୍ରୁତାକୁ ଏଭଳି ହୋଇଥିବା ସନ୍ଦେହ କରାଯାଉଛି ।
ସେପଟେ ପୋଲିସ ସୂଚନା ପାଇ ଘଟଣାସ୍ଥଳରେ ପହଁଚିଛି । ମାମଲାରେ ଜଣଙ୍କୁ ଅଟକ ରଖି ତଦନ୍ତ କରୁଛି ପୋଲିସ । ଘଟଣାରେ ଯିଏ ମଧ୍ୟ ସଂଶ୍ଲିଷ୍ଟ ରହିଥିବେ ଆଇନ୍ ଅନୁଯାୟୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଜଣେ ବରିଷ୍ଠ ପୋଲିସ ଅଧିକାରୀ ।
ମୁମ୍ବାଇ: ଆପଣଙ୍କୁ କ’ଣ ଲାଗିଲା ମୁଁ ଆଉ ଆସିବିନି? ଡରିଯିବି? ଏବେ ଡରିବା ପାଳି ଆଉ କାହାର? ଏମିତି କିଛି କହି ପୁଣି ଚର୍ଚ୍ଚାରେ ରିଆ ଚକ୍ରବର୍ତ୍ତି । ଏଥର ଛୋଟ ପରଦାରେ ନିଜର ଆଟିଟ୍ୟୁଡ ଦେଖାଇଛନ୍ତି ରିଆ । ଦେଇଛନ୍ତି କଡ଼ା ଜବାବ ।
MTV ରୋଡିଜର ଆଗାମୀ ସିଜନ୍ ୧୯ରେ ଅଭିନେତ୍ରୀ ରିୟା ଚକ୍ରବର୍ତ୍ତୀ ‘କର୍ମ ୟା କାଣ୍ଡ’ରେ ବସ୍ ଲେଡି ଭାବରେ ନଜର ଆସିବେ। ଭାରତର ସବୁଠାରୁ ଲୋକପ୍ରିୟ ଆଡଭେଞ୍ଚର ସାହସିକ ରିଅଲିଟି ଟେଲିଭିଜନ୍ ଶୋ MTV ରୋଡିଜ୍ ଫ୍ରାଞ୍ଚାଇଜ୍ ଚଳିତଥର ୧୯ତମ ସିଜିନରେ ‘କର୍ମ ୟା କାଣ୍ଡ’ର ରୋମାଞ୍ଚକର ଥିମ୍ ସହିତ ଆସିବାକୁ ଯାଉଛି ।
ଏହି ସିଜିନ ଅଭିନେତା ସୋନୁ ସୁଦଙ୍କ ଦ୍ୱାରା ଆୟୋଜିତ ହେବାକୁ ଯାଉଛି ଏବଂ ଏହି ଶୋ’ ୩ ଗ୍ୟାଙ୍ଗ ଲିଡର ଅଛନ୍ତି । ଯେଉଁଥିରେ ଅଭିନେତ୍ରୀ ରିୟା ଚକ୍ରବର୍ତ୍ତୀ, ପ୍ରିନ୍ସ ନାରୁକା, ଏବଂ ଗୌତମ ଗୁଲାଟି ଅଛନ୍ତି ।
View this post on Instagram
ଅନେକ ଭାଷାର ଫିଲ୍ମରେ ନିଜର ପରିଚୟ ସୃଷ୍ଟି କରିଥିବା ଅଭିନେତ୍ରୀ ରିୟା ଚକ୍ରବର୍ତ୍ତୀଙ୍କର ଏହି ବ୍ରାଣ୍ଡ ସହିତ ଏକ ପୁରୁଣା ସମ୍ପର୍କ ଅଛି । ସେ ଅନେକ ଶୋ’ରେ ଏକ ଲୋକପ୍ରିୟ ହୋଷ୍ଟ ଭାବେ ଏକ ମଜବୁତ କ୍ୟାରିଅର୍ ତିଆରି କରିଛନ୍ତି ।
ରୋଡିଜ ନୂଆ ସିଜିନର ଏକ ଅଂଶ ହେବା ବିଷୟରେ ଗ୍ୟାଙ୍ଗ ଲିଡର ରିଆ ଚକ୍ରବର୍ତ୍ତୀ କହିଛନ୍ତି ଯେ, ମୁଁ MTV ରୋଡିଜ୍ କର୍ମ ୟା କାଣ୍ଡର ଅଂଶ ହୋଇ ମୁଁ ଅତ୍ୟନ୍ତ ଆନନ୍ଦିତ । MTV ସହିତ କାମ କରିବା ମୋ ପାଇଁ ପୁଣି ଘରକୁ ଫେରି ଆସିବା ଭଳି ମନେ ହୁଏ । ମୁଁ ସୋନୁ ସୁଦ ଏବଂ ସାଥୀ ଗ୍ୟାଙ୍ଗ ଲିଡରଙ୍କ ସହ କାମ କରିବା ନେଇ ଉତ୍ସାହିତ ଅଛି ।
ନୂଆଦିଲ୍ଲୀ: ଭାରତରେ ଯୁଦ୍ଧଗ୍ରସ୍ତ ରାଷ୍ଟ୍ରର ବୈଦେଶିକ ମନ୍ତ୍ରୀ। ଦିଲ୍ଲୀସ୍ଥିତ ବୈଦେଶିକ ମନ୍ତ୍ରଣାଳୟ କାର୍ଯ୍ୟାଳୟରେ ପହଞ୍ଚିଛନ୍ତି ୟୁକ୍ରେନ ବିଦେଶ ମନ୍ତ୍ରୀ ଏମିନି ଡିଜାପୋର୍ଭା । ଋଷିଆ ଓ ୟୁକ୍ରେନ ଯୁଦ୍ଧ ଆରମ୍ଭ ହେବା ପରଠାରୁ ୟୁକ୍ରେନର କୌଣସି ମନ୍ତ୍ରୀ ପ୍ରଥମ ଥର ପାଇଁ ଭାରତ ଗସ୍ତରେ ଆସିଛନ୍ତି। ବୈଦେଶିକ ମନ୍ତ୍ରଣାଳୟ ସହ ଆଲୋଚନା କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ୟୁକ୍ରେନ୍ ଯିବା ପାଇଁ ନିମନ୍ତ୍ରଣ କରିବେ ବୋଲି ଜଣାପଡ଼ିଛି ।
ଭାରତ ଓ ୟୁକ୍ରେନ ମଧ୍ୟରେ ଦ୍ବିପାକ୍ଷିକ ସମ୍ପର୍କ ଓ ବିଶ୍ବ ସମସ୍ୟା ନେଇ ଆଲୋଚନା ହେବ । ଋଷର ଆକ୍ରମଣ ଯୋଗୁ ୟୁକ୍ରେନର ହୋଇଥିବା କ୍ଷତି ସମ୍ପର୍କରେ ସବିଶେଷ ତଥ୍ୟ ଦେବେ ଏମିନି । ଗତବର୍ଷ ଭାରତ ସରକାର ୟୁକ୍ରେନ ରାଷ୍ଟ୍ରପତି ଜେଲେନସ୍କିଙ୍କ ଆଲୋଚନା କରିଥିଲେ । ଯୁଦ୍ଧ ସମୟରେ କୌଣସି ସହାୟତାର ଆବଶ୍ୟକ ପଡିଲେ ସହାୟତା ଦିଆଯିବ ବୋଲି ଭାରତ ସରକାର କହିଥିଲେ ।
ଭାରତ ଉଭୟ ଋଷ ଓ ୟୁକ୍ରେନଠାରୁ ସମଦୂରତା ରକ୍ଷା କରୁଥିବା ବେଳେ ୟୁକ୍ରେନ ପ୍ରତି ସମର୍ଥନ ପାଇଁ ଏମିନି ନିବେଦନ କରିପାରନ୍ତି । ବର୍ତ୍ତମାନ ପର୍ଯ୍ୟନ୍ତ ଋଷର ଆକ୍ରମଣକୁ ଭାରତ ନିନ୍ଦା କରିନଥିବା ବେଳେ ୟୁକ୍ରେନ କୂଟନୈତିକ ପ୍ରସ୍ତାବ ରଖିପାରେ ବୋଲି ବୈଦେଶିକ ବିଶେଷଜ୍ଞ ଅନୁମାନ କରିଛନ୍ତି ।
