spot_img
Home Blog Page 3187

ଜାମ୍ମୁ-କାଶ୍ମୀରର ପୁଞ୍ଚରେ ଏନକାଉଣ୍ଟର ; ୪ ଆତଙ୍କବାଦୀ ନିପାତ୍

ଶ୍ରୀନଗର: ଜାମ୍ମୁ-କାଶ୍ମୀରରେ ସୁରକ୍ଷାକର୍ମୀଙ୍କୁ ବଡ଼ ସଫଳତା । ଏନକାଉଣ୍ଟରରେ ୪ ଆତଙ୍କବାଦୀ ନିହତ । ଗତକାଲି ରାତି ସାଢ଼େ ୧୧ଟାରେ ପୁଞ୍ଚ ଅଞ୍ଚଳରେ ଆତଙ୍କବାଦୀ ଲୁଚି ରହିଥିବା ଜଣାପଡ଼ିବା ପରେ ସର୍ଚ୍ଚ ଅପରେସନ ଆରମ୍ଭ ହୋଇଥିଲା । ଉଭୟପଟୁ ଗୁଳି ଚାଳନା ହୋଇଥିବା ବେଳେ ରାତି ତମାତ ଡ୍ରୋନ ଓ ନାଇଟ ସର୍ଭିଲାନ୍ସ ସହଯୋଗରେ ସର୍ଚ୍ଚ ଅପରେସନ ଜାରି ରହିଥିଲା ।

ଆଜି ସକାଳୁ ୪ ଆତଙ୍କବାଦୀଙ୍କୁ ଏନକାଉଣ୍ଟର କରିଛନ୍ତି ସୁରକ୍ଷାକର୍ମୀ । ନିହତ ୪ ଆତଙ୍କବାଦୀ ବିଦେଶୀ ନାଗରିକ ହୋଇଥିବା ସନ୍ଦେହ କରଯାଉଛି । ସେମାନଙ୍କ ନିକଟରୁ ୪ ଏକେ ୪୭ ରାଇଫଲ୍ସ ଜବତ ହୋଇଛି । ଏବେ ବି ପୁଞ୍ଛ ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି ।

କେରଳର ପୂର୍ବତନ ମୁଖ୍ୟମନ୍ତ୍ରୀ ଓମନ ଚାଣ୍ଡିଙ୍କ ପରଲୋକ

ନୂଆଦିଲ୍ଲୀ :  କେରଳର ପୂର୍ବତନ ମୁଖ୍ୟମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଓମନ ଚାଣ୍ଡିଙ୍କ ପରଲୋକ । ୭୯ ବର୍ଷ ବୟସରେ ଓମନଙ୍କ ନିଧନ । ଅସୁସ୍ଥତା ଯୋଗୁ ଗତ କିଛିଦିନ ଧରି ବେଙ୍ଗାଳୁରୁର ଏକ ହସ୍ପିଟାଲରେ ଚିକିତ୍ସିତ ଥିଲେ । ଆଜି ସକାଳୁ ତାଙ୍କର ପରଲୋକ ଘଟିଛି । ଏ ନେଇ କେରଳ ପିସିସି ସଭାପତି କେ ସୁଧାକରଣ ସୂଚନା ଦେଇଛନ୍ତି । ପୂର୍ବତନ ମୁଖ୍ୟମନ୍ତ୍ରୀଙ୍କ ପରଲୋକ ଯୋଗୁ ଆଜି କେରଳରେ ଛୁଟି ଘୋଷଣା କରାଯାଇଛି ।

OTP ସେୟାରିଂ ମାମଲା : ଗୁଇନ୍ଦା ତଥ୍ୟ ଲିକ୍ ପାଇଁ ବିଦେଶ ଯାଇଥିଲା ଦେଶଦ୍ରୋହୀ

ଭୁବନେଶ୍ୱର : ଦୁବାଇ, ପାକିସ୍ତାନ ବୁଲିବାକୁ ଯାଇଥିଲେ ଦେଶଦ୍ରୋହୀ । ଓଟିପି ସେୟାରିଂ ମାମଲାରେ ଆତଙ୍କବାଦୀ ଲିଙ୍କ ଅଭିଯୋଗରେ ଗିରଫ ହୋଇ ଜେଲରେ ଥିବା ଅଭିଜିତ ସଞ୍ଜୟ ଜାମ୍ବୁରେ, ପଠାଣି ସାମନ୍ତ ଓ ପଶ୍ଚିମବଙ୍ଗର ଗୁଡୁ କୁମାର ଗୁଇନ୍ଦା ତଥ୍ୟ ଲିକ ପାଇଁ ବିଦେଶ ଯାଇଥିଲେ । NIA ତଦନ୍ତ ସମୟରେ ଏଭଳି କିଛି ଗୁରୁତ୍ୱପୂର୍ଣ୍ଣ ତଥ୍ୟ ପଦାକୁ ଆସିଛି ।

ସେଠାରେ କାହାକୁ ଭେଟିଥିଲେ ? କି ତଥ୍ୟ ପାକିସ୍ତାନ ଗୁପ୍ତଚରଙ୍କୁ ପ୍ରଦାନ କରିଛନ୍ତି, ସେ ସମ୍ପର୍କରେ ଅଧିକ ତଦନ୍ତ ପାଇଁ ଇଣ୍ଟରପୋଲର ସହାୟତା ନେବ NIA । ସେପଟେ କୋର୍ଟରେ ଆବଶ୍ୟକୀୟ କାଗଜପତ୍ର ଦାଖଲ କରିନଥିବାରୁ ଆଜି ପଠାଣି ସାମନ୍ତକୁ ରିମାଣ୍ଡରେ ନେବନି ପଶ୍ଚିମବଙ୍ଗ STF । ଏବେ ମଧ୍ୟ ୧୦୦ ଏଜେଣ୍ଟ ମ୍ୟୁଲ ଆକାଉଣ୍ଟ, ପ୍ରି ଆକ୍ଟିଭେଟ ସିମ୍ ଜରିଆରେ କାରବାର ଚଳାଇଥିବା ନେଇ ସୂଚନା ପାଇଛି ଓଡ଼ିଶା STF । ତଦନ୍ତ ସମୟରେ ହାନିଟ୍ରାପରେ ଅଧିକାଂଶ ଫସୁଥିବା ଜଣାପଡିଛି ।

ସ୍ତ୍ରୀକୁ ଟାଙ୍ଗିଆରେ ହାଣି ହତ୍ୟା କଲା ସୈତାନ ସ୍ବାମୀ

ବାଲେଶ୍ବର  : ବାଲେଶ୍ବର ଜିଲ୍ଲା ଜଳେଶ୍ବର ଥାନା ଚାଲନ୍ତି ଗାଁରେ ଅଭାବନୀୟ ଘଟଣା । ସ୍ତ୍ରୀକୁ ଟାଙ୍ଗିଆରେ ହାଣି ହତ୍ୟା କଲା ସୈତାନ ସ୍ବାମୀ । ହତ୍ୟା ପରେ ସ୍ତ୍ରୀ ପାଖରେ ଶୋଇ ପଡିଲା ସ୍ବାମୀ । ସୂଚନା ଅନୁଯାୟୀ, ବାଲେଶ୍ବର ଜିଲ୍ଲା ଜଳେଶ୍ବର ଥାନା ଅନ୍ତର୍ଗତ ଚାଲନ୍ତି ଗ୍ରାମର ଅର୍ଜୁନ ଦଣ୍ଡପାଟ ପଶ୍ଚିମବାଡ଼ ପଞ୍ଚାୟତର ଲିଲିଙ୍କୁ ବିବାହ କରିଥିଲେ ।

ବିବାହ ପର ଠାରୁ ଲିଲିଙ୍କୁ ସ୍ବାମୀ ଓ ଶାଶୁ ଘର ଲୋକେ ଯୌତୁକ ପାଇଁ ନିର୍ଯାତନା ଦେଇ ଆସୁଥିଲା । ହେଲେ ଗତକାଲି ବିଳମ୍ବିତ ରାତିରେ ପରିବାର ଲୋକଙ୍କ ଉପସ୍ଥିତିରେ ସ୍ବାମୀ ଅର୍ଜୁନ, ସ୍ତ୍ରୀ ଲିଲିଙ୍କୁ ଟାଙ୍ଗିଆରେ ହାଣି ହତ୍ୟା କରିଛି । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରିଛି ।

ବଢୁଛି ବ୍ରିଜଭୂଷଣ ସିଂଙ୍କ ଅଡୁଆ, ଆଜି ଦିଲ୍ଲୀ ରାଉଜ ଆଭେନ୍ୟୁ କୋର୍ଟରେ ହେବେ ହାଜର

ନୂଆଦିଲ୍ଲୀ : ବ୍ରିଜଭୂଷଣ  କୁସ୍ତି ଯୋଦ୍ଧାଙ୍କୁ ଯୌନଶୋଷଣ ମାମଲା । ବଢୁଛି ବ୍ରିଜଭୂଷଣ ଅଡ଼ୁଆ । ଆଜି ଦିଲ୍ଲୀର ରେଜ୍ ଆଭେନ୍ୟୁ କୋର୍ଟରେ ହାଜର ବ୍ରିଜଭୂଷଣ ଶରଣ ସିଂହ । ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ ଗମ୍ଭୀର ଧାରାରେ ମାମଲା ରୁଜୁ ହୋଇଛି । କାର୍ଯ୍ୟାନୁଷ୍ଠାନ ପାଇଁ ପର୍ଯ୍ୟାପ୍ତ ପ୍ରମାଣ ରହିଥିବା କହି ସମନ କରିଥିଲେ କୋର୍ଟ । ଦି

ଲ୍ଲୀ ପୋଲିସ ଜୁନ୍ ୧୫ ତାରିଖରେ ବ୍ରିଜଭୂଷଣଙ୍କ ବିରୋଧରେ ଚାର୍ଜସିଟ୍ ଦାଖଲ କରିଥିଲା । ମହିଳା କୁସ୍ତିଯୋଦ୍ଧାଙ୍କ ଅଭିଯୋଗକୁ ନେଇ ଅନ୍ତର୍ଜାତୀୟ ସ୍ତରରେ ହଇଚଇ ସୃଷ୍ଟି ହେବା ପରେ ପୋଲିସ୍ ଚାର୍ଜସିଟ୍ ଦାଖଲ କରିଥିଲା । ବ୍ରିଜ ଭୂଷଣଙ୍କ ବିରୋଧରେ ଯୌନ ଶୋଷଣ ସମ୍ବନ୍ଧିତ ଆଇପିସି ଧାରା ୩୫୪, ୩୫୪-ଏ ଓ ୩୫୪-ଡି ଏବଂ ବିନୋଦ ତୋମାରଙ୍କ ବିରୋଧରେ ଧାରା ୧୦୯, ୩୫୪, ୩୫୪-ଏ ଓ ୫୦୬ ଅନୁଯାୟୀ ମାମଲା ରୁଜୁ ହୋଇଛି ।

ଅଲିମ୍ପିକ୍ ଏବଂ ଏସୀୟ କ୍ରୀଡ଼ା ପଦକ ବିଜେତାଙ୍କ ସମେତ କୁସ୍ତିଯୋଦ୍ଧାମାନେ ଗତ ଜାନୁଆରୀରେ ବ୍ରିଜଭୂଷଣଙ୍କ ବିରୋଧରେ ଅଭିଯୋଗ ଆଣି ଧାରଣାରେ ବସିଥିଲେ । କୁସ୍ତିଯୋଦ୍ଧାଙ୍କ ଉପରେ ରୁଜୁ ହୋଇଥିବା ମାମଲା ପ୍ରତ୍ୟାହାର ସହ ବ୍ରିଜଭୂଷଣଙ୍କୁ ଗିରଫ କରିବାକୁ ଦାବି କରିଛନ୍ତି କୁସ୍ତିଯୋଦ୍ଧା। ବ୍ରିଜଭୂଷଣ ଦୋଷୀ ସାବ୍ୟସ୍ତ ହେଲେ ତିନି ବର୍ଷ ପର୍ଯ୍ୟନ୍ତ ଜେଲଦଣ୍ଡ ଭୋଗିବାକୁ ପଡ଼ିପାରେ।

ମୌସୁମୀ ଅଧିବେଶନ ପାଇଁ ଆଜି ବିଜେଡି ସଂସଦୀୟ ଦଳ ବୈଠକ

ଭୁବନେଶ୍ୱର : ସଂସଦର ମୌସୁମୀ ଅଧିବେଶନ ପାଇଁ ଆଜି ବସିବ ବିଜେଡିର ସଂସଦୀୟ ଦଳ ବୈଠକ । ଗୃହରେ ଆଭିମୂଖ୍ୟ ନେଇ ବିଜେଡି ପ୍ରସ୍ତୁତ କରୁଛି ରଣକୌଶଳ । ଆଜି ସନ୍ଧ୍ୟା ୭ଟାରେ ଦଳ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବୈଠକ ବସିବ ।

ସଂସଦର ମୌସୁମୀ ଅଧିବେଶନରେ ଉଭୟ ଗୃହରେ ଦଳ କେଉଁ କେଉଁ ପ୍ରସଙ୍ଗ ସବୁ ଉଠାଇବ ତା ଉପରେ ଆଲୋଚନା ହେବ । ବିଶେଷକରି ରାଜ୍ୟ ସ୍ବାର୍ଥ ସମ୍ବଳିତ ପ୍ରସଙ୍ଗକୁ ମୁଖ୍ୟ ମୁଦ୍ଦା କରି ବିଜେଡି ସାଂସଦରେ ହକ୍ ମାଗିବ । ସଂସଦୀୟ ବୈଠକରେ ମୁଖ୍ୟମନ୍ତ୍ରୀ ସମସ୍ତ ସାଂସଦଙ୍କୁ ଗୁରୁମନ୍ତ୍ର ଦେବେ । ଆସନ୍ତା ୨୦ରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେଉଛି ।

ବେଙ୍ଗାଳୁରୁରେ ବିଜେପି ବିରୋଧରେ ରୋଡମ୍ୟାପ୍, ଆଜି ପ୍ରସ୍ତୁତ ହେବ ବିରୋଧୀଙ୍କ ନିର୍ବାଚନୀ ରଣନୀତି

ବେଙ୍ଗାଲୁରୁ : ବେଙ୍ଗାଲୁରୁରୁ ବିଜେପି ବିରୋଧରେ ରୋଡମ୍ୟାପ୍ । ୨୪ ସାଧାରଣ ନିର୍ବାଚନରେ ବିଜେପିକୁ ଗାଦିଚ୍ୟୁତ କରିବାକୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛନ୍ତି ବିରୋଧୀ । ଦୁଇଦିନିଆ କାର୍ଯ୍ୟକ୍ରମର ଆଜି ଦ୍ବିତୀୟ ଦିନରେ ପ୍ରସ୍ତୁତ ହେବ ନିର୍ବାଚନୀ ରଣନୀତି । ଗୋଟିଏ ମଞ୍ଚରୁ ବିରୋଧୀ ଦେବେ ଏକତା ବାର୍ତ୍ତା । ରାଜ୍ୟରେ ବିଧାନସଭା ନିର୍ବାଚନ, ୟୁସିସି ଏବଂ ସାଧାରଣ ନିର୍ବାଚନରେ ଓ୍ବାନ ସିଟ୍ ଓ୍ବାନ କ୍ୟାଣ୍ଡିଡେଟ ମୁଦ୍ଦା ଉପରେ ଆଲୋଚନା ହେବ ।

କଂଗ୍ରେସ ନେତୃତ୍ବରେ ଅନୁଷ୍ଠିତ ବୈଠକରେ ସାମିଲ ହେବେ ଟିଏମସି, ଆପ୍, ଏନସିପି, ପିଡିପି ସମେତ ୨୬ ଦଳର ନେତା । ପାଟନା ବୈଠକରେ ୧୬ ଦଳର ନେତା ସାମିଲ ହୋଇଥିବା ବେଳେ ଦ୍ବିତୀୟ ବୈଠକରେ ଏମଡିଏମକେ, କେଡିଏମକେ, ଆରଏସପି ଆଦି ନୂଆ ଦଳକୁ ଏଥର ନିମନ୍ତ୍ରଣ କରିଛି କଂଗ୍ରେସ । ୨୦୨୪ରେ ସବୁ ବିରୋଧୀ ଏକାଠି ନିର୍ବାଚନ ଲଢ଼ିଲେ, ୫୫ ପ୍ରତିଶତ ସିଟ୍ ଜିତି ସରକାର ଗଠନ କରିପାରିବେ ।

ବିଜେପି ସହ ମୁକାବିଲା ଲାଗି ଓ୍ବାନ ସିଟ ଓ୍ବାନ କ୍ୟାଣ୍ଡିଡେଟ ଫର୍ମୁଲାରେ ପ୍ରାର୍ଥୀ ଦେବାକୁ ଯୋଜନା କରୁଛନ୍ତି ବିରୋଧୀ । ୨୦୧୪ ଲୋକସଭା ନିର୍ବାଚନରେ ବିଜେପି ନେତୃତ୍ବାଧୀନ ଏନଡିଏକୁ ୩୮.୫ ଓ ୨୦୧୯ରେ ୪୫ ପ୍ରତିଶତ ଭୋଟ ମିଳିଥିଲା । ସେହିପରି କଂଗ୍ରେସ ସମେତ ଅନ୍ୟ ବିରୋଧୀ ଦଳକୁ ମିଳିଥିଲା ୨୦୧୪ରେ ୬୧.୫ ପ୍ରତିଶତ ଓ ୨୦୧୯ରେ ୫୫ ପ୍ରତିଶତ ଭୋଟ । ଏଥର ଯଦି ବିରୋଧୀ ଏକ ହୋଇ ନିର୍ବାଚନ ଲଢ଼ନ୍ତି, ତେବେ ବିଜେପିକୁ ହରାଇବା ସହଜ ହେବ ବୋଲି ମହାମେଣ୍ଟର ମୁଖ୍ୟ ଏଜେଣ୍ଡା ରହିଛି । ସେପଟେ ବିଜେପି ନେତୃତ୍ବାଧୀନ ଏନଡିଏରେ ଥିବା ୯ଟି ବଡ଼ ରାଜନୈତିକ ଦଳ ଛାଡ଼ିବା ପରେ ମେଣ୍ଟ ଦୁର୍ବଳ ହୋଇପଡ଼ିଛି ବୋଲି କହିଛି ଆମ ଆଦମୀ ପାର୍ଟି ।

ଆସୁଛି ବଡ ବର୍ଷା, ୧୯ରୁ ୨୨ ଯାଏଁ ଅବିଶ୍ରାନ୍ତ ମୂଷଳ ଧାରାରେ ବର୍ଷିବ

ଭୁବନେଶ୍ୱର: ଆସୁଛି ବଡ ବର୍ଷା । ୧୯ରୁ ୨୨ ଯାଏଁ ଅବିଶ୍ରାନ୍ତ ମୂଷଳ ଧାରାରେ ବର୍ଷିବ। ଫୁଲିବ ନଦୀ, ଧସିବ ପାହାଡ! ସହରାଞ୍ଚଳରେ ଉଛୁଳିବ ଡ୍ରେନ୍। ସୃଷ୍ଟି ହେବ ଟ୍ରାଫିକ୍ ସମସ୍ୟା। ଦକ୍ଷିଣ ଆଭ୍ୟନ୍ତରୀଣ ଓଡ଼ିଶାରେ ସଂଗୀନ ହେବ ସ୍ଥିତି। ଅଧିକାଂଶ ଜିଲ୍ଲାରେ ୨ଶହ ମିଲିମିଟରରୁ ଅଧିକ ବର୍ଷିବା ସମ୍ଭାବନା। ସତର୍କ କରାଇଲା ପାଣିପାଗ କେନ୍ଦ୍ର। ଗତକାଲି ଉତ୍ତର-ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଦୁର୍ବଳ ହୋଇ ଉତ୍ତର ଛତିଶଗଡ ଆଡକୁ ଗତି କରିଛି। ପ୍ରଭାବରେ ଆସନ୍ତାକାଲି ପର୍ଯ୍ୟନ୍ତ ଆଭ୍ୟନ୍ତରୀଣ ଓଡ଼ିଶାର ସବୁ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହେବ।

ଛତିଶଗଡ ଉପରମୁଣ୍ଡରେ ମଧ୍ୟ ବର୍ଷାର ପରିମାଣ ବଢ଼ିବ। ଫଳରେ ବିଭିନ୍ନ ନଦୀର ଜଳସ୍ତର ଧିରେ ଧିରେ ବଢିବ। ଏହାସହ ଆସନ୍ତା ୨୪ଘଣ୍ଟା ମଧ୍ୟରେ ଉତ୍ତର-ପଶ୍ଚିମ ବଙ୍ଗୋପସାଗରରେ ଆଉ ଏକ ଘୂର୍ଣ୍ଣିବଳୟ ସୃଷ୍ଟି ହେବ। ୧୯ ତାରିଖ ବେଳକୁ ଏହା ଲଘୁଚାପର ରୂପ ନେଇ ଛତିଶଗଡମୁହାଁ ହେବ। ପ୍ରଭାବରେ ଦକ୍ଷିଣ ଓଡ଼ିଶାର ଗଞ୍ଜାମ, ଗଜପତି, ରାୟଗଡା, ମାଲକାନଗିରି, କୋରାପୁଟ, ନବରଙ୍ଗପୁର ଆଦି ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହେବ ବୋଲି ଆକଳନ କରିଛି ପାଣିପାଗ କେନ୍ଦ୍ର ।

ଗତ ୨୪ଘଣ୍ଟାରେ ରାଜ୍ୟରେ ବିସ୍ତୃତ ବର୍ଷା ଅନୁଭୂତ ହୋଇଛି। ସୋନପୁର ଜିଲ୍ଲାର ବିନିକାଠାରେ ସର୍ବାଧିକ ୧୬୫.୨ ମିଲିମିଟର ରେକର୍ଡ ହୋଇଥିବା ବେଳେ ସମ୍ବଲପୁରର ଧାନକୌଡାରେ ୧୫୫ ମିଲିମିଟର, ଜୁଜୁମରାରେ ୧୩୬ମିମି ଏବଂ ବରଗଡରେ ୧୨୮.୪ ମିଲିମିଟର ବର୍ଷା ରେକର୍ଡ ହୋଇଛି। ୬ଟିସ୍ଥାନରେ ଅତି ପ୍ରବଳ ବର୍ଷା ରେକର୍ଡ ହୋଇଥିବା ବେଳେ ୧୨ ସ୍ଥାନରେ ପ୍ରବଳ ବର୍ଷା ରେକର୍ଡ ହୋଇଛି।

ଲଗାଣ ବର୍ଷା ଯୋଗୁଁ ସମ୍ବଲପୁର ସାକ୍ଷୀପଡ଼ା ରେଲଓ୍ବେ ଅଣ୍ଡରପାସ୍ ବୁଡ଼ିବାରୁ ଯାତାୟତ ବାଧାପ୍ରାପ୍ତ ହୋଇଥିଲା। ଅଇଁଠାପାଲିର ବିଭିନ୍ନ ଅଞ୍ଚଳ ପାଣି ଘେରରେ ରହିଛି । ସକ୍ରିୟ ମୌସୁମୀ ପ୍ରଭାବରେ ଗତ ୨୪ଘଣ୍ଟାରେ ଅନୁଭୂତ ବର୍ଷାରେ ୩% ନିଅଣ୍ଟିଆ ଭରଣା ହୋଇଛି। ରାଜ୍ୟରେ ଚଳିତ ମୌସୁମୀ ଋତୁରେ ଆଜି ସୁଦ୍ଧା ୩୦୭.୮ ମିମି ବର୍ଷା ରେକର୍ଡ ହୋଇଛି। ଏହା ସ୍ୱାଭାବିକ ବର୍ଷା ୩୮୨.୮ ମିମି ତୁଳନାରେ ୨୦ପ୍ରତିଶତ କମ୍। ତେବେ ସାମ୍ଭବ୍ୟ ଲଘୁଚାପ ରାଜ୍ୟରେ ବନ୍ୟାର ପରିସ୍ଥିତି ସୃଷ୍ଟି କରିବା ଆଶଙ୍କା ରହିଛି।

ଦେବଗଡ଼ରେ 5T ସଚିବଙ୍କ ମାରାଥନ ସମୀକ୍ଷା, ଲୋକଙ୍କ ଘରେ ଘରେ ପହଞ୍ଚିବ ବିଶୁଦ୍ଧ ପାନୀୟ ଜଳ

ଦେବଗଡ଼: ଦେବଗଡ଼ ବିକାଶର ନୂଆ ଅଧ୍ୟାୟ । ଶିକ୍ଷାଠୁ ସ୍ବାସ୍ଥ୍ଯ, କୃଷିଠୁ ପର୍ଯ୍ୟଟନ, ସବୁଠି ଲାଗିବ ରୂପାନ୍ତରଣ ସ୍ପର୍ଶ । ଲୋକଙ୍କ ଘରେଘରେ ପହଞ୍ଚିବ ବିଶୁଦ୍ଧ ପାନୀୟ ଜଳ । ଏଥିପାଇଁ ବାରାକୋଟ, ରିଆମାଳ ଓ ତିଳେଇବଣୀ ବ୍ଲକରେ ୬୦୯ କୋଟି ଟଙ୍କାରେ ପ୍ରକଳ୍ପ ନିର୍ମାଣ ଚାଲିଛି । ଜନସାଧାରଣଙ୍କ ଦୁଆରେ ପହଞ୍ଚି ସମସ୍ୟା ଶୁଣିଛି ସିଏମଓ । ପ୍ରବଳ ବର୍ଷା ସତ୍ତ୍ବେ ସମସ୍ୟାର ଅନୁଧ୍ୟାନ କରିଛନ୍ତି ଫାଇଭ-ଟି ସଚିବ ଭିକେ ପାଣ୍ଡିଆନ । ଲଗାଣ ବର୍ଷାରେ ରେନକୋଟ ପିନ୍ଧି ଲୋକଙ୍କଠାରୁ ସମସ୍ୟା ଶୁଣିଥିଲେ ।

୭ଦିନ ଭିତରେ ଲୋକଙ୍କ ସମସ୍ୟାର ସମାଧାନ ହେବ ବୋଲି ପ୍ରତିଶ୍ରୁତି ଦେଇଛନ୍ତି ଭିକେ ପାଣ୍ଡିଆନ । ଦେବଗଡ଼ର ପ୍ରସିଦ୍ଧ ମାଆ ଝାଡେଶ୍ବରୀ ମନ୍ଦିରର ହେବ ରୂପାନ୍ତରଣ । ଏଥିପାଇଁ ପୀଠକୁ ଯାଇ ପୂଜାର୍ଚ୍ଚନା କରିବା ସହ ପୂଜକ ଓ ଭକ୍ତଙ୍କ ସହ ଆଲୋଚନା କରିଥିଲେ ଭିକେ ପାଣ୍ଡିଆନ । ଶ୍ରାବଣର ଦ୍ବିତୀୟ ସୋମବାରରେ ପୀଠକୁ ଆସିଥିବା କାଉଡ଼ିଆଙ୍କ ସହିତ ମଧ୍ୟ ଆଲୋଚନା କରିଥିଲେ । ପରେ ତିଳେଇବଣି ମିଶନ ଶକ୍ତି କାଫେକୁ ଯାଇ ଜଳଖିଆ କରିଥିଲେ । ବଳମ ଆଦର୍ଶ ଖେଳ ପଡ଼ିଆରେ ମିଶନ ଶକ୍ତି ମା’ଙ୍କ ସହିତ ମଧ୍ୟ ଆଲୋଚନା କରିଥିଲେ ।

ଦେବଗଡ଼ର ଘରେଘରେ ପହଞ୍ଚିବ ବିଶୁଦ୍ଧ ପାନୀୟ ଜଳ । ରିଆମାଳ ଓ ବାରକୋଟ ବ୍ଲକରେ ଜାନୁଆରୀ ସୁଦ୍ଧା ପିଇବା ପାଣି ସମସ୍ୟାର ସମାଧାନ ହେବ । ଏଥିପାଇଁ ରାଜ୍ୟ ସରକାର ୧୦୦ କୋଟି ଟଙ୍କା ଖର୍ଚ୍ଚ କରୁଛନ୍ତି । ଖୁବଶୀଘ୍ର ଅନ୍ୟସମସ୍ତ ଅଞ୍ଚଳରେ ବି ପାନୀୟ ଜଳର ସୁବିଧା କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ଫାଇଭ-ଟି ସଚିବ । କଁସର ଫାଇଭ-ଟି ସ୍କୁଲ ପରିଦର୍ଶନ କରିଥିଲେ ଭିକେ ପାଣ୍ଡିଆନ । ଉତ୍ସାହର ସହିତ ହକି ଷ୍ଟିକ ଗେଟ ମାଧ୍ୟମରେ ଫାଇଭ-ଟି ସଚିବଙ୍କୁ ସ୍ବାଗତ କରିଥିଲେ ଛାତ୍ରଛାତ୍ରୀ ।

ଲଗାଣ ବର୍ଷା ସତ୍ତ୍ବେ ବିଭିନ୍ନ ସ୍ଥାନରେ ଲୋକଙ୍କ ଅଭିଯୋଗ ଶୁଣିଥିଲେ ଫାଇଭ-ଟି ସଚିବ । ମନ୍ଦିର, ମସଜିଦ, କମ୍ୟୁନିଟି ସେଣ୍ଟର ପାଇଁ ଆସିଥିବା ଆବେଦନପତ୍ର ୭ ଦିନ ମଧ୍ୟରେ ସମାଧାନ କରାଯିବ । ଚାଷୀଙ୍କ ସମସ୍ୟା ମଧ୍ୟ ତୁରନ୍ତ ସମାଧାନ ହେବ। ସରକାର ଦେଉଥିବା ଅନୁଦାନକୁ ସ୍ବଚ୍ଛତାର ସହ ବିନିଯୋଗ କରିବାକୁ ଆହ୍ବାନ ଦେଇଛନ୍ତି ଭିକେ ପାଣ୍ଡିଆନ । ଯେଉଁଠି ଜନତା ସେଇଠି ସିଏମଓ । ଲୋକଙ୍କ ପାଇଁ ପ୍ରଶାସନ । ରାଜ୍ୟ ସରକାରଙ୍କ ସେବା ମନ୍ତ୍ରକୁ ନେଇ ଜନତାଙ୍କ ପାଖରେ ପହଞ୍ଚୁଛନ୍ତି ଫାଇଭ-ଟି ସଚିବ । ଯାହା ଦେବଗଡ଼ ଗସ୍ତ ସମୟରେ ପ୍ରମାଣିତ ହୋଇଛି ।

ଓଡ଼ିଶାରେ କମିଛି ଗରିବୀ ସଂଖ୍ୟା, ୫ ବର୍ଷ ଭିତରେ ୫୦ ପ୍ରତିଶତ ହ୍ରାସ ପାଇଛି ଦାରିଦ୍ର୍ୟତା

ଭୁବନେଶ୍ୱର: ଓଡ଼ିଶାରେ କମିଛି ଗରିବୀ ସଂଖ୍ୟା । ଗତ ୫ ବର୍ଷ ଭିତରେ ୫୦ ପ୍ରତିଶତ ହ୍ରାସ ପାଇଛି ଦାରିଦ୍ର୍ୟତା । ରାଜ୍ୟ ସରକାରଙ୍କର ଖାଦ୍ୟ ସୁରକ୍ଷା ଯୋଜନା, ମାଗଣା ସ୍ବାସ୍ଥ୍ୟସେବା, ଗ୍ରାମାଞ୍ଚଳରେ ସ୍ବଚ୍ଛ ପାନୀୟ ଜଳ, ସହରାଞ୍ଚଳରେ ଡ୍ରିଙ୍କ ଫ୍ରମ ଟ୍ୟାପ ଓ ଉନ୍ନତ ଶିକ୍ଷା ଭିତ୍ତିଭୂମି ଯୋଗୁଁ ଦାରିଦ୍ୟ ହ୍ରାସ କରିବାରେ ରାଜ୍ୟ ପାଇଛି ସଫଳତା । କେନ୍ଦ୍ର ସରକାରଙ୍କର ନୀତି ଆୟୋଗ ପକ୍ଷରୁ ପ୍ରକାଶ ପାଇଥିବା ଦାରିଦ୍ୟତା ହ୍ରାସ ନେଇ ବହୁମୁଖୀ ସ୍ତରୀୟ ରିପୋର୍ଟରେ ଓଡ଼ିଶା ଭଲ ସ୍ଥାନରେ ରହିଛି ।

ରିପୋର୍ଟ ଅନୁଯାୟୀ ୨୦୧୫-୧୬ରେ ରାଜ୍ୟରେ ୨୯ ଦଶମିକ ୩୪ ପ୍ରତିଶତ ଗରିବୀ ଥିବା ବେଳେ ୨୦୧୯ରୁ ୨୦୨୧ ବେଳକୁ ଏହା ୧୫ ଦଶମିକ ୬୮ ପ୍ରତିଶତକୁ ହ୍ରାସ ପାଇଛି । ଯାହାକି ଅନ୍ୟ ରାଜ୍ୟ ତୁଳନାରେ ଓଡ଼ିଶା ବହୁ ଆଗରେ ରହିଛି । ୧୬ଟି ଜିଲ୍ଲା ଦାରିଦ୍ୟ ହ୍ରାସ କରିବାରେ ସଫଳତା ପାଇଛନ୍ତି । ସବୁଠୁ କମ ଗରିବ ଲୋକ ରହିଛନ୍ତି ପୁରୀ ଜିଲ୍ଲାରେ । ପୁରୀ ସମେତ ରାଜ୍ୟର ୧୪ଟି ଜିଲ୍ଲା ଦାରିଦ୍ୟ ହ୍ରାସ ପାଇଁ ଅନେକ ଯୋଜନା କାର୍ଯ୍ୟକାରୀ କରି ଉଲ୍ଲେଖନୀୟ ସଫଳତା ପାଇଛନ୍ତି । ଜାତୀୟ ସ୍ତରରେ ଦାରିଦ୍ର୍ୟତା ହାର ୧୪ ଦଶମିକ ୯୬ ପ୍ରତିଶତ ଥିବା ବେଳେ ଓଡ଼ିଶା ସରକାରଙ୍କର ବହୁମୁଖୀ କାର୍ଯ୍ୟକ୍ରମ ଯୋଗୁଁ ଅଧିକାଂଶ ଜିଲ୍ଲା ଏକ ଅଙ୍କରେ ସୀମିତି ରହିଛି ।