କୋଲକାତା: ପଶ୍ଚିମବଙ୍ଗରେ ନିର୍ବାଚନୀ ହିଂସା । କୋଚ୍ ବିହାରରେ ଆଉ ଜଣେ ଟିଏମସି ନେତାଙ୍କୁ ଗୁଳି କରି ହତ୍ୟା କରାଯାଇଛି । ହାଟାରେ ନିର୍ବାଚନ ପ୍ରଚାର କରି ଫେରୁଥିବା ବେଳେ ତୃଣମୂଳ କଂଗ୍ରେସର ଜଣେ କର୍ମୀଙ୍କୁ ଗୁଳି କରି ହତ୍ୟା କରଯାଇଛି । ଅନ୍ୟ ୫ ଜଣ ଆହତ ହୋଇଥିବା ସୂଚନା ମିଳିଛି । ରାଜ୍ୟରେ ବିଜେପି ହିଂସା ଭିଆଉଛି ବୋଲି କହିଛନ୍ତି ମନ୍ତ୍ରୀ ଉଦୟନ ଗୁହା । ଗତକାଲି ଟିଏମସିର ନିର୍ବାଚନୀ ପ୍ରଚାର ବଳେ ଗୁଳିମାଡ଼ରେ ୪ ଜଣ କର୍ମୀ ଗୁରୁତର ହୋଇଥିଲେ । ସିପିଆଇଏମ ପକ୍ଷରୁ ଗୁଳିମାଡ଼ କରାଯାଇଥିବା ଦଳ ଅଭିଯୋଗ କରିଥିଲା । ପଞ୍ଚାୟତ ନିର୍ବାଚନକୁ ନେଇ ପଶ୍ଚିମବଙ୍ଗରେ ହାଇଭୋଲଟେଜ ଡ୍ରାମା ଜାରି ରହିଛି । ଏବେସୁଦ୍ଧା ହିଂସାରେ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ କୁଚ ବିହାର, ଉତ୍ତର, ଦକ୍ଷିଣ ୨୪ ପ୍ରଗଣା, ମୁର୍ସିଦାବାଦ, ବୀରଭୂମ, ପୂର୍ବ ମେଦିନାପୁର ଆଦି ଅଞ୍ଚଳରେ ହିଂସା ଜାରି ରହିଛି ।
ଦିନକୁ ଦିନ ଉଗ୍ର ହେଉଛି ମଣିପୁର ହିଂସା, ଭିଡିଓ ଜାରି କରି ସେନାର ଶାନ୍ତି ପ୍ରତିଷ୍ଠା ଅପିଲ
ଇମ୍ଫାଲ: ଲିଭୁନି ମଣିପୁର ନିଆଁ । ମେ’ ୩ ତାରିଖରୁ ଆରମ୍ଭ ହୋଇଥିବା ସଂଘର୍ଷ ଦିନକୁ ଦିନ ଉଗ୍ର ହେଉଛି । ଶହେରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ବେଳେ ହଜାର ହଜାର ଲୋକଙ୍କ ଘର ଜଳାଇ ଦିଆଯାଇଛି । ମଣିପୁରରେ ଦୀର୍ଘମାସ ଧରି ଜାରି ରହିଥିବା ହିଂସା ଯୋଗୁ ଲୋକଙ୍କ ପଳାୟନ ମଧ୍ୟ ଆରମ୍ଭ ହୋଇଯାଇଛି । ଆଖି ଆଗରେ ସର୍ବସ୍ବ ଧ୍ବଂସ ହୋଇଯିବା ପରେ, ଆତ୍ମୀୟଙ୍କୁ ହରାଇବା ପରେ ଅନ୍ୟ ରାଜ୍ୟରେ ମୁଣ୍ଡ ଗୁଞ୍ଜିବାକୁ ବାଧ୍ୟ ହୋଇଛନ୍ତି ।
ସେପଟେ ପୂର୍ବୋତ୍ତର ରାଜ୍ୟରେ ଶାନ୍ତି ସ୍ଥାପନା ପାଇଁ ସେନା ପକ୍ଷରୁ ଭିଡିଓ ଜାରି କରାଯାଇ ଅପିଲ କରାଯାଇଛି । ହିଂସା ଗ୍ରସ୍ତ ରାଜ୍ୟରେ ଶାନ୍ତି ଓ ସାମାନ୍ୟ ସ୍ଥିତି ଫେରାଇ ଆଣିବାକୁ ସ୍ଥାନୀୟ ଲୋକଙ୍କ ସମର୍ଥନ ଲୋଡିଛି ଆର୍ମି । ମହିଳା କର୍ମକର୍ତ୍ତାମାନେ ଜାଣିଶୁଣି ରାସ୍ତା ଅବରୋଧ କରିବା ସହ ସୁରକ୍ଷାବଳର ଅପରେସନରେ ବାଧା ସୃଷ୍ଟି କରୁଛନ୍ତି । ଧନ ଜୀବନର ରକ୍ଷା ପାଇଁ ସବୁ ବର୍ଗର ଲୋକ ସେନାକୁ ସହଯୋଗ କରିବାକୁ ଅପିଲ କରାଯାଇଛି ।
ହିମାଚଳରେ ପ୍ରକୃତିର ତାଣ୍ଡବ, ଅତି ପ୍ରବଳ ବର୍ଷା ପରେ ଫ୍ଲାସ ଫ୍ଲଡ୍
ଧର୍ମଶାଳା: ମୌସୁମୀ ଆରମ୍ଭରୁ ପ୍ରଳୟ ଚିତ୍ର । ପାହାଡ଼ି ରାଜ୍ୟରେ ପ୍ରକୃତିର ତାଣ୍ଡବ । ହିମାଚଳ ପ୍ରଦେଶରେ ପ୍ରବଳ ବର୍ଷା , ଭୂସ୍ଖଳନ ପରେ ବନ୍ୟା ସ୍ଥିତି । ଲ୍ୟାଣ୍ଡସ୍ଲାଇଡ୍ ଯୋଗୁ ଅଧିକାଂଶ ହାଇଓ୍ବେ ବନ୍ଦ ହୋଇଥିବା ବେଳେ ଯାତାୟାତ ବାଧାପ୍ରାପ୍ତ ହୋଇଛି । ଫ୍ଲାସଫ୍ଲଡ୍ ଯୋଗୁ ଅନେକ ଲୋକ ଜଳବନ୍ଦୀ ଅବସ୍ଥାରେ ରହିଛନ୍ତି । ପାଙ୍ଗୀ-କିଲାଡ ହାଇଓ୍ବେରେ ପାହାଡ଼ ଧସିଯିବା ଯୋଗୁ ଉଭୟ ପଟେ ଗାଡ଼ିମୋଟର ଅଟକି ରହିଛି । ଚଣ୍ଡିଗଡ଼-ମନାଲି ହାଇଓ୍ବେ ମଧ୍ୟ ଲ୍ୟାଣ୍ଡସ୍ଲାଇଡ ଯୋଗୁ ଜାମ୍ ହୋଇଛି । ମଣ୍ଡି-କୁଲ୍ଲୁ ରାସ୍ତାର ପ୍ରାୟ ୭୦ କିମି ଫ୍ଲାସଫ୍ଲଡ, ଭୂସ୍ଖଳନ ଯୋଗୁ ପ୍ରଭାବିତ ହୋଇଛି । ସେପଟେ ଲଗାଣ ବର୍ଷା ପରେ ଗଙ୍ଗା ସମେତ ଅନ୍ୟ ଶାଖା ନଦୀରେ ବି ଜଳସ୍ତର ବୃଦ୍ଧି ପାଇଛି । ହିମାଚଳ ପ୍ରଦେଶରେ ପ୍ରବଳ ବର୍ଷା ପରେ ୩ଶହରୁ ଅଧିକ ରାସ୍ତା ବନ୍ଦ କରିଦିଆଯାଇଛି । ଆଜି ହିମାଚଳରେ ଘଡ଼ଘଡ଼ି ସହ ପ୍ରବଳ ବର୍ଷା ସମ୍ଭାବନା ଥିବାରୁ ଅରେଞ୍ଜ ଆଲର୍ଟ ଜାରି କରିଛି ପାଣିପାଗ ବିଭାଗ ।
ସେପଟେ ଉତ୍ତରାଖଣ୍ଡ ନୈନିତାଲରେ ଅତି ପ୍ରବଳ ବର୍ଷା ପରେ ଲ୍ୟାଣ୍ଡସ୍ଲାଇଡ ଯୋଗୁ ରାସ୍ତା ଧସିବା ସହ ପାଇପ ଲାଇନ ମଧ୍ୟ କ୍ଷତିଗ୍ରସ୍ତ ହୋଇଛି । ଗତ କିଛି ଦିନ ଧରି ରାସ୍ତା ଧସୁଥିବା ନେଇ ଅଭିଯୋଗ ସତ୍ତ୍ବେ ପ୍ରଶାସନ ପଦକ୍ଷେପ ନନେବା ଯୋଗୁ ଗ୍ରାମୀଣ ଅଞ୍ଚଳରୁ ଯାତାୟାତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି ବୋଲି ସ୍ଥାନୀୟ ଲୋକେ କହିଛନ୍ତି । ଉତ୍ତରାଖଣ୍ତରେ ପ୍ରାୟ ୪୫ଟି ରାସ୍ତାରେ ଯାତାୟାତ ଠପ୍ ହୋଇଥିବା ବେଳେ ଶତାଧିକ ପର୍ଯ୍ୟଟକ ବିଭିନ୍ନ ସ୍ଥାନରେ ଫସି ରହିଛନ୍ତି । ବର୍ଷା, ବନ୍ୟା, ଲ୍ୟାଣ୍ଡସ୍ଲାଇଡ ଯୋଗୁ ପର୍ଯ୍ୟଟକମାନଙ୍କ ପାଇଁ ସ୍ବତନ୍ତ୍ର ଆଡଭାଇଜରୀ ଜାରି କରାଯାଇଛି ।
ICC ବିଶ୍ବକପ୍-୨୦୨୩ କାର୍ଯ୍ୟସୂଚୀ ଜାରି, ଅକ୍ଟୋବର ୧୫ରେ ଭାରତ-ପାକ୍ ମହାମୁକାବିଲା
ମୁମ୍ବାଇ: ICC ବିଶ୍ବକପ୍-୨୦୨୩ କାର୍ଯ୍ୟସୂଚୀ ଜାରି । ଅକ୍ଟୋବର ୧୫ରେ ଭାରତ-ପାକିସ୍ତାନ ମହାମୁକାବିଲା । ଗୁଜରାଟ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ମୁହାଁମୁହିଁ ହେବେ ଦୁଇ ପାରମ୍ପରିକ ପ୍ରତିଦ୍ବନ୍ଦ୍ବୀ । ଦିନିକିଆ ବିଶ୍ୱକପ ୫ ଅକ୍ଟୋବରରୁ ଆରମ୍ଭ ହେବ । ଇଂଲଣ୍ଡ-ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ ଉଦଘାଟନୀ ମ୍ୟାଚ୍ । ଉଦଘାଟନୀ ମ୍ୟାଚ୍ ଅହମ୍ମଦାବାଦରେ ଖେଳାଯିବ । ୮ ଅକ୍ଟୋବରରେ ଅଷ୍ଟ୍ରେଲିଆ ସହ ପ୍ରଥମ ମ୍ୟାଚ ଖେଳିବ ଟିମ୍ ଇଣ୍ଡିଆ । ଅକ୍ଟୋବର ୧୧ରେ ଭାରତ-ଆଫଗାନିସ୍ତାନ ମ୍ୟାଚ୍ । ମୁମ୍ବାଇ, କୋଲକାତାରେ ଖେଳାଯିବ ଦୁଇ ସେମିଫାଇନାଲ । ନଭେମ୍ବର ୧୯ରେ ଫାଇନାଲ ମ୍ୟାଚ୍ ଅହମ୍ମଦାବାଦରେ ଖେଳାଯିବ । ICC ଦିନିକିଆ ବିଶ୍ୱକପରେ ଭାରତ ଦୁଇ ଥର ଚାମ୍ପିୟନ ହୋଇଥିବା ବେଳେ ଥରେ ରନର୍ସ ଅପ୍ ଟାଇଟଲ ବିଜୟୀ ହୋଇଛି । ୨୦୧୩ରେ କ୍ୟାପଟେନ କୁଲ୍ ମହେନ୍ଦ୍ର ସିଂ ଧୋନିଙ୍କ ଅଧିନାୟକତ୍ବରେ ଶେଷଥର ଚାମ୍ପିଅନ୍ସ ଟ୍ରଫି ଜିତିଥିଲା ଟିମ୍ ଇଣ୍ଡିଆ ।
ଦିଗପହଣ୍ଡି ବସ୍ ଦୁର୍ଘଟଣାର ତନାଘନା, ପଚରାଉଚରା ପରେ ଗିରଫ ହେଲେ OSRTC ବସ୍ ଡ୍ରାଇଭର
ଦିଗପହଣ୍ଡି: ଦିଗପହଣ୍ଡିରେ ମର୍ମନ୍ତୁଦ ସଡ଼କ ଦୁର୍ଘଟଣାରେ ତନାଘନା । ପଚରାଉଚରା ପରେ OSRTC ବସ୍ ଡ୍ରାଇଭର ମାନସ ପ୍ରଧାନଙ୍କୁ ଗିରଫ କରିଛି ପୋଲିସ । ଘଟଣାର ତଦନ୍ତ କରୁଥିଲେ ଚିକିଟି SDPO ଓ ଦିଗପହଣ୍ଡି ଥାନା ଅଧିକାରୀ । ଗତକାଲି ରାତିରେ ଡ୍ରାଇଭର ସହ ତଦନ୍ତକାରୀ ଟିମ୍ ମଧ୍ୟ ଆଲୋଚନା କରିଥିଲେ । ଆଜି ଡ୍ରାଇଭରଙ୍କୁ କୋର୍ଟ ଚାଲାଣ କରାଯିବ । ଦୁର୍ଘଟଣାର ଆଜି ରିପୋର୍ଟ ଦେବେ ତଦନ୍ତକାରୀ ଟିମ୍ । ଦୁଇ ଜଣ ଇଞ୍ଜିନିୟର ଜଣେ ଅଭିଜ୍ଞ ଡାକ୍ତରଙ୍କ ସମେତ ଏନଫୋର୍ସମେଣ୍ଟ ଡିଏସପି ଏହି ଟିମରେ ସାମିଲ ଅଛନ୍ତି ।
ସେହିପରି MKCG ମେଡିକାଲରେ ଥିବା ଘରୋଇ ମିନି ବସର ଡ୍ରାଇଭରଙ୍କୁ ଭେଟିଛନ୍ତି ତଦନ୍ତକାରୀ ଟିମ୍ । ଘରୋଇ ମିନି ବସର ପରମିଟ ନଥିବା ବେଳେ ଇନସ୍ୟୁରାନ୍ସ ଅବଧୀ ସରିଯାଇଥିଲା । ମିନି ବସ୍ ମାଲିକକୁ ଚିହ୍ନଟ କରାଯାଇଥିବା ବେଳେ, ତାଙ୍କୁ ଖୋଜୁଛି ପୋଲିସ । ଗତକାଲି ଭୟଙ୍କର ଦୁର୍ଘଟଣାରେ ୧୧ ଜଣଙ୍କର ମୃତ୍ୟୁ ହୋଇଥିବା ବେଳେ, ୯ ଜଣଙ୍କର ଚିକିତ୍ସା ଚାଲିଛି । ସେପଟେ ମୃତକଙ୍କ ପରିବାରରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
ଖୋଲିଗଲା ବିରୋଧୀଙ୍କ ଅସଲ ମୁଖା, ସବୁ ସ୍ପଷ୍ଟ କରିଦେଲା ମୁଖ୍ୟମନ୍ତ୍ରୀଙ୍କ ଅଡିଓ ବାର୍ତ୍ତା
ଭୁବନେଶ୍ୱର: ଖୋଲିଗଲା ବିରୋଧୀଙ୍କ ଅସଲ ମୁଖା । ବିକାଶ ଦିଶୁନି, ମିଛ କହି ରାଜ୍ୟବାସୀଙ୍କୁ ଭୁଆଁ ବୁଲାଇବାକୁ ଅପଚେଷ୍ଟା କରୁଛନ୍ତି ବିରୋଧୀ । ମୁଖ୍ୟମନ୍ତ୍ରୀଙ୍କ ଅଡିଓ ବାର୍ତ୍ତା ପରେ ସବୁ କିଛି ସ୍ପଷ୍ଟ ହୋଇଯାଇଛି । ସତ ଜାଣି ସାରିଲେଣି ରାଜ୍ୟବାସୀ । ବିଜେଡି କଥାରେ ନୁହେଁ, କାମରେ ବିଶ୍ୱାସ କରେ ବୋଲି ମୁଖପାତ୍ର ଶ୍ରୀମୟୀ ମିଶ୍ର କହିଛନ୍ତି । ବିରୋଧୀ ପ୍ରଶ୍ନ କରିଥିଲେ ଯେ କାହା ନିର୍ଦ୍ଦେଶରେ ସବୁ ପ୍ରଶାସନିକ କାମ ହେଉଛି? ଏହାର ଉତ୍ତର ମୁଖ୍ୟମନ୍ତ୍ରୀଙ୍କ ଅଡିଓ ବାର୍ତ୍ତା ପରେ ବିରୋଧୀ ପାଇସାରିଛନ୍ତି ବୋଲି କହିଛି ବିଜେଡି ।
ଲୋକ ବାସ୍ତବତା କ’ଣ ଅବଗତ ଅଛନ୍ତି । ଲୋକ ଜାଣିଛନ୍ତି, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସରକାର ଓ ପ୍ରଶାସନ ସବୁ କାମ କରୁଛନ୍ତି । ସତ କଥାକୁ ବିରୋଧୀ ଯେତେ ମିଛର ଖୋଳପା ପିନ୍ଧାଇବାକୁ ଅପଚେଷ୍ଟା କଲେ ବି ସତ ଗତକାଲି ସାମ୍ନାକୁ ଆସିଯାଇଛି । ମିଛ କହିବା, ଭୁଆଁ ବୁଲାଇବା ପାଇଁ ହିଁ ସେମାନେ ବିରୋଧୀ ଆସନରେ ବସିଛନ୍ତି । କଲରାକୁ ଯେଉଁଥିରେ ବି ବୁଡ଼ାଇଲେ, ପିତା ଲାଗେ । ଲୋକ ସତ ଜାଣି ସାରିଲେଣି ବୋଲି ବିଜେଡି ମୁଖପାତ୍ର ଶ୍ରୀମୟୀ ମିଶ୍ର କହିଛନ୍ତି ।
ଚାକିରିରୁ ବିଦା ହେଲେ ନବରଙ୍ଗପୁର ଉପଜିଲ୍ଲାପାଳ, ବାଧ୍ୟତାମୂଳକ ଅବସର ଦେଲେ ରାଜ୍ୟ ସରକାର
ଭୁବନେଶ୍ୱର: ନବରଙ୍ଗପୁର ଉପଜିଲ୍ଲାପାଳ ପ୍ରଶାନ୍ତ ରାଉତଙ୍କୁ ଚାକିରିରୁ ବାଧ୍ୟତାମୂଳକ ଅବସର । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ତାଙ୍କୁ ବାଧ୍ୟତାମୂଳକ ଅବସର ଦେଇଛନ୍ତି ରାଜ୍ୟ ସରକାର । କୋଟି କୋଟି ଟଙ୍କା ବେଆଇନ ସମ୍ପତ୍ତି ଠୁଳ କରିଥିଲେ ପ୍ରଶାନ୍ତ । ଭିଜିଲାନ୍ସ ରେଡ୍ ବେଳେ ୫ କୋଟିରୁ ଅଧିକ ଟଙ୍କାର ସମ୍ପତ୍ତି ଜବତ ହୋଇଥିଲା । ଆୟଠାରୁ ୫୦୬ ପ୍ରତିଶତ ଥିଲା ସମ୍ପତ୍ତି । ଏକକାଳୀନ ୯ଟି ସ୍ଥାନରେ ହୋଇଥିଲା ଚଢ଼ାଉ । ଭୁବନେଶ୍ବର, ନବରଙ୍ଗପୁରରେ ଏକାଧିକ ଘରେ ରେଡ୍ କରିଥିଲା ଭିଜିଲାନ୍ସ । ପେଟି ପେଟି ଟଙ୍କା ଓ ଅଚଳାଚଳ ସମ୍ପତ୍ତି ନେଇ ଉତ୍ତର ଦେଇ ନପାରିବା ପରେ ଗିରଫ ହୋଇଥିଲେ ପ୍ରଶାନ୍ତ ରାଉତ ।
ମୋଟ ୫ କୋଟି ୨୧ ଲକ୍ଷ ୯ ହଜାର ୬୫୯ ଟଙ୍କା ସ୍ଥାବର ଅସ୍ଥାବର ସମ୍ପତ୍ତି ଠାବ ହୋଇଥିଲା । ନଗଦ ୩ କୋଟି ୨ ଲକ୍ଷ ଟଙ୍କା, ବ୍ୟାଙ୍କ ଓ ଇନ୍ସ୍ୟୁରାନ୍ସ ଡିପୋଜିଟ ବବାଦରେ ୯୨ ଲକ୍ଷ ୩୪ ହଜାର ଟଙ୍କା, ୫ଟି ପ୍ଲଟ୍, ୩୭ ଲକ୍ଷ ଟଙ୍କାର ଯାନବାହନ, ୨୧ ଲକ୍ଷ ୩୫ ହଜାର ଟଙ୍କାର ସୁନା ଗହଣା, ଏହା ସହ ଦୁଇ ପିଲାଙ୍କ ପାଠ ପଢା ବାବଦରେ ଖର୍ଚ୍ଚ କରିଛନ୍ତି ୮୭ଲକ୍ଷ ଟଙ୍କା । ଦୁର୍ନୀତିଗ୍ରସ୍ତ ଓ ଅପାରଗ ଅଧିକାରୀଙ୍କ ବିରୋଧରେ ରାଜ୍ୟ ସରକାର ଜିରୋ ଟଲରାନ୍ସ ନୀତି ଗ୍ରହଣ କରୁଛନ୍ତି । 5T ଓ ମୋ ସରକାର ବ୍ୟବସ୍ଥାରେ ମିଳିଥିବା ଫିଡବ୍ୟାକ୍ ଭିତ୍ତିରେ କାର୍ଯ୍ୟାନୁଷ୍ଠାନ ନିଆଯାଉଛି । ପ୍ରଶାନ୍ତ ରାଉତଙ୍କୁ ମିଶାଇ ଏପର୍ଯ୍ୟନ୍ତ ୧୮୮ଜଣ ଅଧିକାରୀଙ୍କ ବିରୋଧରେ ଆକ୍ସନ୍ ନିଆଯାଇଛି । ଏହା ମଧ୍ୟରୁ ୧୮ରୁ ଅଧିକ ଅଧିକାରୀଙ୍କୁ ବାଧ୍ୟତାମୂଳକ ଅବସର ଦିଆଯାଇଥିବା ବେଳେ ୬୦ରୁ ଅଧିକ ଅଧିକାରୀଙ୍କୁ ବହିଷ୍କାର କରାଯାଇଛି ।
ଭୁବନେଶ୍ୱର ସାଂସଦଙ୍କୁ ବିଜେଡିର ପାଞ୍ଚ ପ୍ରଶ୍ନ, କେବେ ସରିବ ଖୋର୍ଦ୍ଧା-ଭୁବନେଶ୍ବର ଜାତୀୟ ରାଜପଥ ମରାମତି
ଭୁବନେଶ୍ୱର: ବିକାଶରେ ଖୁସି ନାହାନ୍ତି ବିରୋଧୀ, ଭଙ୍ଗୁଆଳି ସାଜିଛି ବିଜେପି । ୪ ବର୍ଷ ଭୁବନେଶ୍ବର ସଂସଦୀୟ କ୍ଷେତ୍ରର ସାଂସଦ ଅପରାଜିତା ଷଡ଼ଙ୍ଗୀ ଭୁବନେଶ୍ବରବାସୀ ତଥା ଓଡ଼ିଶାବାସୀଙ୍କ ପାଇଁ କ’ଣ କରିଛନ୍ତି । ମ୍ୟାଡାମ ଅପରାଜିତାଙ୍କୁ ବିଜେଡିର ୫ ପ୍ରଶ୍ନ । ଇସ୍କନ ସର୍ଭିସ ରୋଡ୍ ଜାତୀୟ ରାଜପଥରେ ବର୍ଷା ଦିନେ ପାଣି ଜମୁଛି । ରୋଗୀ, ଛାତ୍ରଛାତ୍ରୀ ଜନସାଧାରଣ ଅସୁବିଧାରେ ପଡ଼ୁଛନ୍ତି । ଗତ ଚାରି ବର୍ଷ ଧରି ଏଠାରେ ବର୍ଷା ହେଲେ ଜଳ ନିଷ୍କାସନ ହୋଇ ପାରୁନି । ଜଳବନ୍ଦୀ ସ୍ଥିତି କେବେ ସୁଧୁରିବ? ସେ ଦିଗରେ କ’ଣ ପଦକ୍ଷେପ ନେଇଛନ୍ତି ସାଂସଦ ? ଭୁବନେଶ୍ୱର ଓ ଖୋର୍ଦ୍ଧା ଜାତୀୟ ରାଜପଥ ଦେଇ ଦୁଇ ଘଣ୍ଟା ଲାଗୁଛି । କାରଣ ରୋଡ୍ ମରାମତି ଚାଲିଥିବାରୁ ଗାଡି ଠିକ୍ ଭାବେ ଯାଇପାରୁନି । ଏହି ଲାଇଫଲାଇନ ରାସ୍ତା କାମ କେବେ ସୁଦ୍ଧା ସରିବ ଉତ୍ତର ରଖନ୍ତୁ ମ୍ୟାଡାମ ସାଂସଦ ।
ତିନି ଚାରି ବର୍ଷ ତଳେ କ୍ୟାପିଟାଲ ରିଜିଅନର ମାଷ୍ଟର ପ୍ଲାନ ହୋଇଥିଲା, ବାସ୍ତବିକ ରୂପ କେବେ ନେବ ? ଟେଲିକମ୍ ଏବେ ଜରୁରୀ ସେବାରେ ପରିଣତ ହୋଇଛି । ଖୋର୍ଦ୍ଧା ଜିଲ୍ଲାର ଅନେକ ବ୍ଲକରେ ଡାଟା ସ୍ପିଡ୍ ବା ଟେଲି ଡେନସିଟି ପାଇ ପାରିଲେନି । ଏ ବାବଦରେ ସେ କେନ୍ଦ୍ରକୁ ଜଣାଇଛନ୍ତି କି ? ବ୍ୟଙ୍କିଂ ସେବା ଅଧିକ ରହିଲେ ଜନସାଧାରଣ ଅଧିକରୁ ଅଧିକ ସୁବିଧା ପାଇବେ । ବ୍ୟାଙ୍କଂ ନେଟଓ୍ୱାର୍କ ବଢ଼ାଇବା ପାଇଁ ଭୁବନେଶ୍ୱର ସାଂସଦ ଏ ଦିଗରେ କ’ଣ ପଦକ୍ଷେପ ନେଇଛନ୍ତି ବୋଲି ପ୍ରଶ୍ନ କରିଛନ୍ତି ବିଜେଡି ମୁଖପାତ୍ର ଶ୍ରୀମୟୀ ମିଶ୍ର । କେବଳ ସେତିକି ନୁହେଁ ପୁରୀ ପରିକ୍ରମା ପ୍ରକଳ୍ପକୁ ଅଟକାଇବା ପାଇଁ ସେ ନିଜ ଅନୁଗତଙ୍କ ସହ ସୁପ୍ରିମକୋର୍ଟରେ PIL ଫାଇଲ କରିଥିଲେ, ଯାହା ଖାରଜ ହେଲା । ସେହିପରି ଏକାମ୍ର ପ୍ରକଳ୍ପ ଅଟକାଇବାକୁ ଚେଷ୍ଟା କରିଥିଲେ. ହେଲେ ଆଜି ଯାଏ ସେ କ୍ଷମା ପ୍ରାର୍ଥନା କରି ନାହାନ୍ତି । ଓଡ଼ିଆଙ୍କ ମନରେ ଦୁଃଖ ଦେଇ କାହିଁକି କ୍ଷମା ମାଗି ନାହାନ୍ତି ବୋଲି ପ୍ରଶ୍ନ କଲା ବିଜେଡି । ଆତ୍ମପ୍ରଚାରରେ, ପ୍ରତି ବର୍ଷ ରଙ୍ଗୀନ ରିପୋର୍ଟ କାର୍ଡ ଦେଲେ, ଲୋକଙ୍କ ପେଟ ପୂରିବନି । ଦିଲ୍ଲୀ ଦରବାରରେ ଲୋକଙ୍କ ସ୍ବର ପହଞ୍ଚାଇଥିଲେ ଲୋକଙ୍କ ସମସ୍ୟା ଦୂର ହୁଅନ୍ତା ବୋଲି ବିଜେଡି କହିଛି ।
ଭିଜିଲାନ୍ସ ଜାଲରେ ସରକାରୀ ବାବୁ, ଦିଗପହଣ୍ଡି ରେଞ୍ଜର କାହ୍ନୁଚରଣ ପଟ୍ଟନାୟକଙ୍କ ଘରେ ଚଢ଼ାଉ
ବ୍ରହ୍ମପୁର: ପୁଣି ଭିଜିଲାନ୍ସ ଜାଲରେ ସରକାରୀ ବାବୁ । ଦିଗପହଣ୍ଡି ରେଞ୍ଜରଙ୍କ ଗାଡ଼ିରୁ ମିଳିଲା ଲକ୍ଷେ ୫୮ ହଜାର ଟଙ୍କା । ଏତେ ଟଙ୍କା କେଉଁଠୁ ଆସିଲା, ଦେଇପାରିଲେନି ଉତ୍ତର । ଘରେ ଛାପା ମାରିଛି ଭିଜିଲାନ୍ସ । ରେଞ୍ଜନ କାହ୍ନୁଚରଣ ପଟ୍ଟନାୟକଙ୍କ ଘର ସମେତ ଦିଗପହଣ୍ଡି ସରକାରୀ କାର୍ଯ୍ୟାଳୟ, ସରକାରୀ ବାସଭବନରେ ଚାଲିଛି ଭିଜିଲାନ୍ସ ଚଢ଼ାଉ । ବ୍ରହ୍ମପୁରର ୬ ଜଣିଆ ଟିମ୍ ରେଡ୍ କରୁଛନ୍ତି । ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ଦିଗପହଣ୍ଡିସ୍ଥିତ କାର୍ଯ୍ୟାଳୟରୁ ଘରକୁ ଫେରୁଥିବା ବେଳେ ଗଣିଆନାଳ ଛକରେ ବ୍ରହ୍ମପୁର ଭିଜିଲାନ୍ସ ଟିମ୍ ଚଢ଼ାଉ କରିଥିଲା । ଗାଡ଼ିରୁ ନଗଦ ଲକ୍ଷେ ୫୮ହଜାର ଟଙ୍କା ଏବଂ ସରକାରୀ ବାସଭବନ ସମେତ ଘରୁ ମିଳିଛି ଟଙ୍କା । ରାତି ତମାମ ଭିଜିଲାନ୍ସ ଟିମ ତଦନ୍ତ କରୁଥିବା ବେଳେ ଦିଗପହଣ୍ଡି କାର୍ଯ୍ୟାଳୟ ଏବଂ ସରକାରୀ ବାସଭବନରେ ରାତି ୨ଟା ବେଳେ ୬ ଜଣିଆ ଟିମ୍ ଆସି ଫେରିଛନ୍ତି । ବ୍ରହ୍ମପୁର ତୁଳସୀନଗର ୭ନମ୍ବର ଲାଇନରେ ଚଢ଼ାଉ ଜାରି ରହିଛି । ସ୍ଥାବର ଅସ୍ଥାବର ସମ୍ପତ୍ତିର ଖୋଳତାଡ଼ ଚାଲିଛି ।
ଶ୍ରୀମନ୍ଦିର ସିଂହଦ୍ବାରର କରାଯାଉଛି ରୂପା ଛାଉଣୀ, ଶ୍ରୀଜିଉଙ୍କ ନବଦିନାତ୍ମକ ଯାତ୍ରା ପୂର୍ବରୁ ସରିବ କାମ
ପୁରୀ: ବାହୁଡ଼ିବେ ଶ୍ରୀଜିଉ । ସୁନ୍ଦର ହେଉଛି ଶ୍ରୀମନ୍ଦିରର ସିଂହଦ୍ବାର, ହେଉଛି ରୂପା ଛାଉଣୀ । ପୂର୍ବ ନିଷ୍ପତ୍ତି ଅନୁସାରେ ମହାପ୍ରଭୁଙ୍କ ନବଦିନାତ୍ମକ ଯାତ୍ରା ସମୟରେ ସିଂହଦ୍ବାର ରୂପା ଛାଉଣୀ କାର୍ଯ୍ୟ କରାଯାଉଛି । ଅନ୍ତିମ ପର୍ଯ୍ୟାୟରେ ପହଞ୍ଚିଛି ରୂପା ଛାଉଣୀ କାମ । ସିଂହଦ୍ବାରରେ ମୁମ୍ବାଇରୁ ଆସିଥିବା ୫୦୦ କେଜି ଓଜନର ଦୁଇଟି ଷ୍ଟିଲ୍ ଫ୍ରେମ୍ ଲଗାସରିଛି । ସେଥିରେ ଦାତା ଦେଇଥିବା ରୂପାରେ ନିର୍ମିତ ଚାଦରକୁ କବାଟରେ ଲଗାଯାଉଛି ।
ବାହୁଡ଼ା ଯାତ୍ରା ପୂର୍ବରୁ ଅର୍ଥାତ୍ ଆଜି ରାତି ସୁଦ୍ଧା ରୂପା ଛାଉଣୀ ସରିବାକୁ ଲକ୍ଷ୍ୟ ରଖାଯାଇଛି । ରୂପା ଛାଉଣୀ ହୋଇଗଲେ ସିଂହଦ୍ବାର ସୁନ୍ଦର ଦିଶିବ । କାଲି ଭକ୍ତ ଦେଖିବେ ସିଂହଦ୍ବାରର ନୂତନ ସୁନ୍ଦର ରୂପା । ମୂଳ ସିଂହଦ୍ୱାର ଭଳି ମାପ, ଓଜନ, ଡିଜାଇନ ଓ ଉତ୍କଳୀୟ କାରୁକାର୍ଯ୍ୟ ସମ୍ପୂର୍ଣ୍ଣ ଅବିକଳ ଭାବେ ସିଂହଦ୍ୱାର ପ୍ରସ୍ତୁତ ହୋଇଛି । ସିଂହଦ୍ବାର ସମ୍ମୁଖ ଭାଗ ଅଞ୍ଚଳକୁ ସିଲ୍ କରି ଭକ୍ତଙ୍କ ପାଇଁ କଟକଣା ଲଗାଯାଇଛି । ପୂର୍ବରୁ ଶ୍ରୀମନ୍ଦିର ଭିତରେ ୮ଟି ଦ୍ବାରର ରୂପା ଛାଉଣୀ ହୋଇଛି ।