ଭୁବନେଶ୍ବର: ଭୁବନେଶ୍ବରରେ ଲୁଗା ଦୋକାନରେ ନିଆଁ । ରବି ଟକିଜ୍ ସ୍ଥିତ ଲୁଇସ୍ ରୋଡ୍ ନିକଟରେ ଥିବା ମୁନସାନିଂ ଲୁଗା ଦୋକନରେ ନିଆଁ ଲାଗିବାରୁ ଜଳିପୋଡ଼ି ନଷ୍ଟ ହୋଇଯାଇଛି ଶହ ଶହ ଦାମୀ ଲୁଗା । ଖବର ପାଇ ନିଆଁକୁ ଆୟତ୍ତ କରିଛି ଦମକଳ ବାହିନୀ । ଜଳି ଯାଇଥିବା ଲୁଗାର ଆନୁମାନିକ ମୂଲ୍ୟ ୫ରୁ ୧୦ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି । ସର୍ଟସର୍କିଟ ଯୋଗୁଁ ଭୋର ସମୟରେ ନିଆଁ ଲାଗିଥିଲା । ଦୋକାନରୁ ଧୂଆଁ ବାହାରୁଥିବାରୁ ସ୍ଥାନୀୟ ଲୋକ ଦୋକାନ ମାଲିକ ଏ. ଚଦ୍ର ଶେଖର ରାଓଙ୍କୁ ଖବର ଦେଇଥିଲେ । ମାଲିକ ଧୂଆଁ ଦେଖି ଦମକଳ ବିଭାଗକୁ ଖବର ଦେଇଥିଲେ । କଳ୍ପନା ଛକରେ ଥିବା ଅଗ୍ନିଶମ ବାହିନୀର ଗୋଟିଏ ଗାଡ଼ି ପହଞ୍ଚି ନିଆଁକୁ ଆୟତ୍ତ କରିଥିଲେ । ଦୋକାନଟି ସଟର୍ ପଡ଼ିଥିବାରୁ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡ଼ିଥିଲା ।
ଆଜି ଶୂନ୍ୟ ଛାୟା ଦିବସ, ଦିନ ୧୧ଟା ୪୩ରେ ରାଜଧାନୀରେ ଦୃଶ୍ୟମାନ ହେବନି ଛାଇ
ଭୁବନେଶ୍ୱର: ଆଜି ଭୁବନେଶ୍ୱରରେ ଦୃଶ୍ୟମାନ ହେବ ନାହିଁ ଛାଇ । ଦିନ ୧୧ଟା ୪୩ ମିନିଟରେ ହଜିଯିବ ନିଜ ଛାଇ । ବର୍ଷରେ ଦୁଇ ଥର ସୂର୍ଯ୍ୟ ଆମ ମୁଣ୍ଡ ଉପରେ ରହେ ଏବଂ ଆମର ଛାଇ ଦୃଶ୍ୟମାନ ହୋଇନଥାଏ । ଯାହାକୁ ଜ୍ୟୋର୍ତିବିଜ୍ଞାନୀମାନେ ଶୂନ୍ୟ ଛାୟା ଦିବସ ବା ଜିରୋ ସ୍ୟାଡୋ ଦିବସ ବୋଲି କହିଥାନ୍ତି । ଏହି ଦିବସ କେବଳ ମକର କ୍ରାନ୍ତି ଓ କର୍କଟ କ୍ରାନ୍ତି ଭିତରେ ଥିବା ଅଞ୍ଚଳରେ ହିଁ ଘଟିଥାଏ । ଏଣୁ କନ୍ୟାକୁମାରୀ ଠାରୁ ଭାରତର ମଧ୍ୟଭାଗରେ ଥିବା କର୍କଟ କ୍ରାନ୍ତି ମଧ୍ୟରେ ଥିବା ସବୁ ଅଞ୍ଚଳରେ ଏପ୍ରିଲରୁ ଜୁନ୍ ଓ ଜୁନରୁ ଅଗଷ୍ଟ ମାସ ମଧ୍ୟରେ ବର୍ଷକୁ ଦୁଇ ଥର ଶୂନ୍ୟ ଛାୟା ଘଟିଥାଏ ।
ଚଳିତ ବର୍ଷ ଏହି ଦିବସ ଆଜି ଭୁବନେଶ୍ବର ସହରରେ ଓ ଆସନ୍ତାକାଲି ମଧ୍ୟାହ୍ନ ୧୧ଟା ୪୩ ମିନିଟ ସମୟରେ କଟକ, ୨୮ ତାରିଖରେ ବୁର୍ଲା ଓ ୨୯ ତାରିଖରେ ବାରିପଦାରେ ଶୂନ୍ୟ ଛାୟା ଦୃଶ୍ୟମାନ ହେବ । ଏହି ଦୃଶ୍ୟ ଦେଖିବା ପାଇଁ ସର୍ବସାଧାରଣଙ୍କ ପାଇଁ ଭୁବନେଶ୍ବରସ୍ଥିତ ପଠାଣି ସାମନ୍ତ ପ୍ଲାନେଟାରିୟମରେ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ।
ସକାଳୁ ରାଜଧାନୀ ସବୁଠୁ ଉତ୍ତପ୍ତ, ସକାଳ ୮.୩୦ ସୁଦ୍ଧା ଭୁବନେଶ୍ୱର ତାପମାତ୍ରା ୩୩.୬ ଡିଗ୍ରୀ
ଭୁବନେଶ୍ୱର: ସକାଳୁ ସକାଳୁ ରାଜଧାନୀ ସବୁଠୁ ଉତ୍ତପ୍ତ । ସକାଳ ୮.୩୦ ସୁଦ୍ଧା ରାଜଧାନୀ ଭୁବନେଶ୍ୱରରେ ୩୩.୬ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଆସନ୍ତା ୪ ଦିନ ପର୍ଯ୍ୟନ୍ତ ରାଜ୍ୟରେ ପାଣିପାଗ ସ୍ଥିତି ସମାନ ରହିବ । ଅଧିକାଂଶ ସ୍ଥାନରେ ତାପମାତ୍ରା ୪୨ ଡିଗ୍ରୀ ଉପରେ ରହିବା ସହ ସାମାନ୍ୟରୁ ମଧ୍ୟମ ଧରଣର ବର୍ଷା ଲାଗି ରହିବାର ଆଶଙ୍କା ରହିଛି । ଆଭ୍ୟନ୍ତରୀଣ ଓଡ଼ିଶାର ବିଭିନ୍ନ ସ୍ଥାନରେ ୪୨ ଡିଗ୍ରୀ ଉପରେ ପାରଦ ରହିବାର ଆକଳନ କରିଛି ପାଣିପାଗ କେନ୍ଦ୍ର ।
ସୁନ୍ଦରଗଡ଼, ସମ୍ବଲପୁର, ଅନୁଗୁଳ, ବୌଦ୍ଧ, ସୋନପୁର, ବରଗଡ଼, ବଲାଙ୍ଗୀର, କଳାହାଣ୍ଡି ଓ ଝାରସୁଗୁଡ଼ାରେ ପାରଦ ଉପରମୁହାଁ ରହିଛି । ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମ, ନୟାଗଡ଼, କନ୍ଧମାଳ, କଟକ, ଢେଙ୍କାନାଳ, ଯାଜପୁର, ଭଦ୍ରକ, ମୟୂରଭଞ୍ଜ, କେନ୍ଦୁଝର ଓ ବାଲେଶ୍ବର ଜିଲ୍ଲାରେ ଘଡ଼ଘଡ଼ି ବିଜୁଳି ସହ ବର୍ଷା ହେବାର ସମ୍ଭାବନା ରହିଛି । ସେହିପରି ଆସନ୍ତାକାଲି ୮ ଜିଲ୍ଲାକୁ କାଳବୈଶାଖୀ ପାଇଁ ସତର୍କତା ଜାରି କରାଯାଇଛି ।
ଓଡ଼ିଶା ସିମକାର୍ଡକୁ ପାକିସ୍ତାନରେ ଅପରେଟ ଘଟଣା; ମାଷ୍ଟରମାଇଣ୍ଡ ପଠାଣି ସାମନ୍ତ ଲେଙ୍କାର ୨ ସହଯୋଗୀ ଅଟକ
ଭୁବନେଶ୍ୱର: ଓଡ଼ିଶା ସିମକାର୍ଡକୁ ପାକିସ୍ତାନରେ ଅପରେଟ ମାମଲାରେ ତନାଘନା । ମାଷ୍ଟରମାଇଣ୍ଡ ପଠାଣି ସାମନ୍ତ ଲେଙ୍କାର ଦୁଇ ସହଯୋଗୀ ଅଟକ । ଦେଶଦ୍ରୋହୀ କାର୍ଯ୍ୟ କରୁଥିବା ଅଭିଯୋଗରେ ଯାଜପୁରରୁ ଉଠାଇ ଆଣିଛି STF । ଖୁବଶୀଘ୍ର ଫରେନ୍ସିକ ଲ୍ୟାବକୁ ପଠାଯିବ ଅଭିଯୁକ୍ତଙ୍କ ମୋବାଇଲ । ଆବଶ୍ୟକସ୍ଥଳେ ସୋସିଆଲ ମିଡିଆ ବ୍ୟବହାର ନେଇ ଯାଞ୍ଚ କରିବେ ଆଇଟି ଏକ୍ସପର୍ଟ । ଏନଆଇଏ ଓ ଗୁଇନ୍ଦା ବିଭାଗକୁ ସମସ୍ତ ତଥ୍ୟ ପ୍ରଦାନ କରିଛି ଏସଟିଏଫ ।
ଅନ୍ୟପକ୍ଷରେ ଆସନ୍ତାକାଲିଠୁ ରିମାଣ୍ଡରେ ଆସିବ ପଠାଣି ସାମନ୍ତ । ୫ ଦିନିଆ ରିମାଣ୍ଡ ପାଇଁ ଆବେଦନ କରିଥିଲା ଏସଟିଏଫ । ଦିଲ୍ଲୀ, ରାଜସ୍ଥାନ, ଗୁଜରାଟ ଓ ପଶ୍ଚିମବଙ୍ଗରେ ଥିବା ପାକିସ୍ତାନୀ ଆଇଏସଆଇ ଏଜେଣ୍ଟଙ୍କ ସହ ରହିଥିଲା ସମ୍ପର୍କ । ତଦନ୍ତ ବେଳେ ଏସଟିଏଫକୁ ମିଳିଛି ସାଙ୍ଘାତିକ ତଥ୍ୟ । କେଉଁ କେଉଁ ଅଂଚଳରୁ ସିମକାର୍ଡ କିଣା ହୋଇଥିଲା ସେନେଇ ଚାଲିଛି ଖୋଳତାଡ଼ । କେବେଠାରୁ ପାକିସ୍ତାନ ଆଇଏସଆଇ ଏଜେଣ୍ଟ ଲିଙ୍କରେ ଥିଲେ ଏନେଇ ଚାଲିଛି ତଦନ୍ତ । ପୂର୍ବରୁ ଅଫିସିଆଲ ଡାଟା ଲିକ ନେଇ ଜଲପାଇଗୁଡି ଥାନାରେ ରହିଛି ମାମଲା । ସେପଟେ ଟେଲିକମ ପ୍ରଭାଇଡରଙ୍କୁ ମଧ୍ୟ ସ୍କାନରକୁ ନେଇଛି ଏସଟିଏଫ । ଟ୍ରାଞ୍ଜାକ୍ସନ ଯାଞ୍ଚ ପାଇଁ ନ୍ୟାସନ୍ୟାଲ ପେମେଣ୍ଟ କର୍ପୋରେସନକୁ ଲେଖାଯାଇଛି ଚିଠି ।
ନୂଆପଡ଼ା ଗସ୍ତରେ 5T ସଚିବ, ଗଦରାମାଲ ନିଲଜିରେ ମେଗା ଉଠା ଜଳସେଚନ ପ୍ରକଳ୍ପର କଲେ ଅନୁଧ୍ୟାନ
ନୂଆପଡ଼ା: କଳାହାଣ୍ଡି ପରେ ନୂଆପଡ଼ା ଗସ୍ତରେ 5T ସଚିବ ଭି.କେ ପାଣ୍ଡିଆନ୍ । ସିନାପାଲି ବ୍ଲକ ନିଲଜି ଗଦରାମାଲ ଗସ୍ତ କରି ମେଗା ଉଠା ଜଳସେଚନ ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିଛନ୍ତି ଭିକେ ପାଣ୍ଡିଆନ । ସ୍ଥାନୀୟ ଜନସାଧାରଣଙ୍କୁ ସାକ୍ଷାତ କରି ବିଭିନ୍ନ ସମସ୍ୟା ବାବଦରେ ଆଲୋଚନା କରିଛନ୍ତି । ନୂଆପଡ଼ା ସିନାପାଲିରେ ରହିବନି ପାନୀୟ ଜଳ ଓ ଜଳସେଚନ ସମସ୍ୟା । ଖୁବଶୀଘ୍ର ଦୂର ହେବ ପିଇବା ପାଣି ଓ ଜଳସେଚନ ସମସ୍ୟା । ଜଳସେଚନ ହେବା ଦ୍ୱାରା ୮୯୦ ହେକ୍ଟର ଚାଷ ଜମିକୁ ମିଳିବ ପାଣି । ସିନାପାଲିର ୭ଟି ସ୍ଥାନରେ ଉଦନ୍ତି ନଦୀ ଉପରେ ମେଗା ଲିଫ୍ଟ ହେଇପାରିବ । ୧୦ରୁ ୧୨ ହେକ୍ଟର ଚାଷ ଜମି ସବୁଜ ହେବ । ଏହାଦ୍ୱାରା ଉପକୃତ ହେବେ ଚାଷୀ । ଏହାପରେ ବୋଡେନ ବ୍ଲକ ଲିଟିସରର୍ଗି ହାଇସ୍କୁଲ ଗସ୍ତ କରି ଛାତ୍ରଛାତ୍ରୀଙ୍କ ସହ ଆଲୋଚନା କରିଛନ୍ତି 5T ସଚିବ । କିଭଳି ଚାଲିଛି ପାଠପଢ଼ା, ସ୍ମାର୍ଟ କ୍ଲାସ ରୁମ୍ ଓ ଲାବରେଟେରୀ ବୁଲି ଦେଖିବା ସହ ଶିକ୍ଷକ, ସ୍କୁଲ ମ୍ୟାନେଜମେଣ୍ଟ କମିଟି ଓ ଅଭିଭାବକଙ୍କ ସହ ଆଲୋଚନା କରିଛନ୍ତି ଭିକେ ପାଣ୍ଡିଆନ୍ ।
ଏହାପରେ ବୋଡେନ ବ୍ଲକ ସଦରରେ ଥିବା ମିଶନ ଶକ୍ତି କାଫେ ପରିଦର୍ଶନ କରିବେ । ସେଠାରୁ ସେ ପାତଳଗଙ୍ଗା ମନ୍ଦିର ଗସ୍ତ କରି ଠାକୁରଙ୍କ ଦର୍ଶନ କରିବା ସହ ମନ୍ଦିର ଉନ୍ନତିକରଣ ନେଇ ଲୋକଙ୍କ ସହ ଆଲୋଚନା କରିବେ । ପରେ ସେ ଖରିଆର ବ୍ଲକ ସଦରରେ ଥିବା ଆମ ହସ୍ପିଟାଲ ପରିଦର୍ଶନ କରି ରହିଥିବା କିଛି ସମସ୍ୟାର ଅନୁଧ୍ୟାନ କରିବେ । ଏଠାରେ ରୋଗୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ପରେ ସେ କୋମନା ବ୍ଲକର କୋନାବିରା ମେଗା ଉଠା ଜଳସେଚନ ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିବେ । ସେଠାରୁ ସେ କୋମନା ବ୍ଲକ ସୁନାବେଡ଼ା ଗସ୍ତ କରିବେ । ସୁନାବେଡାରେ ସୁନା ଦେଇ ମନ୍ଦିର ପରିଦର୍ଶନ କରିବା ସହ ଚୋକଟିଆ-ଭୁଞ୍ଜିଆ ଆଦିମ ଜନଜାତି ସହ ଆଲୋଚନା କାର୍ଯ୍ୟକ୍ରମ ରହିଛି ।
ଆସନ୍ତାକାଲି ରାଜ୍ୟ ମନ୍ତ୍ରିମଣ୍ଡଳ ସଂପ୍ରସାରଣ, ଲୋକସେବା ଭବନ କନଭେନସନ ହଲରେ ଶପଥ ନେବେ ନୂଆ ମନ୍ତ୍ରୀ
ଭୁବନେଶ୍ୱର: ଆସନ୍ତାକାଲି ହେବ ରାଜ୍ୟ ମନ୍ତ୍ରିମଣ୍ଡଳ ସମ୍ପ୍ରସାରଣ । ଲୋକସେବା ଭବନର କନଭେନସନ ସେଣ୍ଟରରେ ପୂର୍ବାହ୍ମରେ ଶପଥ ଉତ୍ସବ ଅନୁଷ୍ଠିତ ହେବ । ନୂଆ ମନ୍ତ୍ରୀଙ୍କୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ଶପଥପାଠ କରାଇବେ । ସପ୍ତାହ ତଳେ ମନ୍ତ୍ରିମଣ୍ଡଳରୁ ଇସ୍ତଫା ଦେଇଥିଲେ ୨ ମନ୍ତ୍ରୀ । ଇସ୍ତଫା ଦେଇଥିଲେ ଗଣଶିକ୍ଷା ମନ୍ତ୍ରୀ ସମୀର ଦାଶ ଓ ଶ୍ରମ ମନ୍ତ୍ରୀ ଶ୍ରୀକାନ୍ତ ସାହୁ । ଏହାସହ ବାଚସ୍ପତି ବିକ୍ରମ କେଶରୀ ଆରୁଖ ମଧ୍ୟ ଦେଇଥିଲେ ଇସ୍ତଫା ।
ବୃନ୍ଦାବାହାଲରେ 5T ସଚିବ ଭିକେ ପାଣ୍ଡିଆନ, ଖୁବଶୀଘ୍ର ବିଭିନ୍ନ ସମସ୍ୟାର ସମାଧାନ ପାଇଁ ଦେଲେ ପ୍ରତିଶ୍ରୁତି
କଳାହାଣ୍ଡି: ବିକାଶ ରାସ୍ତାରେ କଳାହାଣ୍ଡି ଗୋଲାମୁଣ୍ଡାର ବିକାଶ ଗାଡ଼ି । ଖୁବଶୀଘ୍ର ଅଞ୍ଚଳରେ ଶିକ୍ଷା, ସ୍ୱାସ୍ଥ୍ୟ ଗମନାଗମନ ଓ ପାନୀୟ ଜଳ ସମସ୍ୟାର ହେବ ସମାଧାନ । ବୃନ୍ଦାବାହାଲରେ ପହଞ୍ଚି ଏପରି ପ୍ରତିଶ୍ରୁତି ଦେଇଛନ୍ତି 5T ସଚିବ ଭିକେ ପାଣ୍ଡିଆନ । ହଜାର ହଜାର ମିଶନ ଶକ୍ତି ମହିଳା ଓ ସାଧାରଣ ଲୋକ ପହଞ୍ଚି ଫୁଲ ପକାଇ ସ୍ବାଗତ କରିଥିଲେ । ଲୋକଙ୍କ ସହ ସିଧାସଳଖ କଥା ହେବା ସହ ସେମାନଙ୍କ ଦାବି ପତ୍ର ସବୁ ନିଜେ ସେମାନଙ୍କଠାରୁ ଗ୍ରହଣ କରିଥିଲେ ଭିକେ ପାଣ୍ଡିଆନ । ଜଳସେଚନ ପାଇଁ ଦରଖାସ୍ତ ଖୁବଶୀଘ୍ର ଅନୁମୋଦନ ପାଇବ । ଆଡ଼ିବନ୍ଧ ପୁନରୁଦ୍ଧାର ହେବ । ଇନ୍ଦ୍ରାବତୀ ବାମ କେନାଲରେ ପାଣି ପହଞ୍ଚିବାରେ ଅସୁବିଧା ହେଉଛି, ତା’ର ଶୀଘ୍ର ସମାଧାନ କରାଯିବ । ଯେକୌଣସି ଟେକନିକାଲ ସମସ୍ୟା ରହିଛି ତା’ର ଖୁବଶୀଘ୍ର ସମାଧାନ ହେବ ବୋଲି ପ୍ରତିଶ୍ରୁତି ଦେଇଛନ୍ତି 5T ସଚିବ ।
ସେହିପରି ପିଇବା ପାଣି ସମସ୍ୟା ବି ଶୀଘ୍ର ସମାଧାନ ହେବ । ବିଜୁସେତୁ ଯୋଜନାରେ ଖୁବଶୀଘ୍ର ପୋଲ ହେବ, ରାସ୍ତା ଦୂରାବସ୍ଥା ବି ସୁଧୁରିବ । କେବଳ ସେତିକି ନୁହେଁ, ଗୋଲାମୁଣ୍ଡାର ଯେଉଁ ହାଇସ୍କୁଲ ଓ କଲେଜ 5T ରୂପାନ୍ତରିତ ହୋଇନି ଖୁବଶୀଘ୍ର ହେବ । ଏହାଦ୍ବାରା ସ୍ମାର୍ଟ କ୍ଲାସରୁମ୍ , ଲାଇବ୍ରେରୀ, ଲାବରେଟୋରୀ ପାଇବେ ଛାତ୍ରଛାତ୍ରୀ ।ପିଲାଙ୍କ ସ୍ବପ୍ନ ପୂରଣ କରିବା ମୁଖ୍ୟମନ୍ତ୍ରୀଙ୍କ ପ୍ରାଥମିକତା । ଡିସେମ୍ବର ସୁଦ୍ଧା ହାଇସ୍କୁଲ ସବୁ ରୂପାନ୍ତିରକରଣ ହେବ । ଡିସେମ୍ବରରେ ରୂପାନ୍ତରିତ ହାଇସ୍କୁଲର ଉଦଘାଟନ କରିବେ ମୁଖ୍ୟମନ୍ତ୍ରୀ, ଜାନୁଆରୀରେ ପିଲା ନୂଆ କ୍ଲାସରୁମରେ ପଢ଼ିବେ ବୋଲି କହିଛନ୍ତି 5T ସଚିବ ଭିକେ ପାଣ୍ଡିଆନ ।
ମୁଣ୍ଡଳୀ ବ୍ରିଜ ଉପରୁ ମହାନଦୀକୁ ଡେଇଁଲେ ଯୁବତୀ, ବ୍ରିଜ୍ ଉପରେ ରହିଛି ସ୍କୁଟି
କଟକ: ବାରଙ୍ଗ ଥାନା ମୁଣ୍ଡଳୀ ମହାନଦୀ ବ୍ରିଜ୍ ଉପରୁ ଜଣେ ଯୁବତୀଙ୍କ ସ୍କୁଟି ଉଦ୍ଧାର । ସ୍କୁଟି ଥୋଇ ଯୁବତୀ ଜଣକ ମହାନଦୀକୁ ଡେଇଁ ଆତ୍ମହତ୍ୟା କରିଥିବା ସନ୍ଦେହ । ଯୁବତୀ ଜଣକ ହେଉଛନ୍ତି ସୁନ୍ଦରପଦା ଅଞ୍ଚଳର ଐଶ୍ୱରୀୟା ପରିଜା । ଯୁବତୀ ଜଣକ ଭୁବନେଶ୍ୱର ସ୍ଥିତ ଏକ ଘରୋଇ ବିଶ୍ୱ ବିଦ୍ୟାଳୟରେ ଅଧ୍ୟୟନ କରୁଥିଲେ । ଗତକାଲି ସନ୍ଧ୍ୟା ୬.୩୦ରେ ଭୁବନେଶ୍ୱର ଆସିଥିଲେ ଯୁବତୀ । ଯୁବତୀ ଜଣକ ମୁଣ୍ଡଳୀ ବ୍ରିଜ୍ ନିକଟରେ ସ୍କୁଟି ଥୋଇ ନିଖୋଜ ହୋଇଯାଇଛନ୍ତି । ଖବର ପାଇ ଘଟଣାସ୍ଥଳରେ ଗୋଡିସାହି ଫାଣ୍ଡି ପୋଲିସ ପହଁଚି ଯୁବତୀ ଜଣକ ମହାନଦୀକୁ ଡେଇଛନ୍ତି କି କୁଆଡେ ଚାଲି ଯାଇଛନ୍ତି ସେନେଇ ତଦନ୍ତ ଜାରି ରଖିଛି ପୋଲିସ । ଅଗ୍ନିଶମ ବିଭାଗ ମଧ୍ୟ ଘଟଣାସ୍ଥଳରେ ତନାଘନା ଜାରି ରଖିଛି ।
ନୂଆପଡ଼ା ଗସ୍ତରେ ଭିକେ ପାଣ୍ଡିଆନ୍, ଉନ୍ନୟନ କାର୍ଯ୍ୟର କରିବେ ସମୀକ୍ଷା
ନୂଆପଡ଼ା: ନୂଆପଡ଼ା ଲେଖିବ ବିକାଶର ନୂଆ ଅଧ୍ୟାୟ । ଜିଲ୍ଲା ଗସ୍ତରେ ଯିବେ 5T ସଚିବ ଭିକେ ପାଣ୍ଡିଆନ୍ । ସକାଳ ୭ଟା ୩୦ରେ ପ୍ରଥମେ ସେ ସିନାପାଲି ବ୍ଲକ ନିଲଜି ଗଦରାମାଲ ଗସ୍ତ କରିବେ । ମେଗା ଉଠା ଜଳସେଚନ ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିବେ ଭିକେ ପାଣ୍ଡିଆନ୍ । ପରେ ସ୍ଥାନୀୟ ଜନସାଧାରଣଙ୍କୁ ସାକ୍ଷାତ କରି ବିଭିନ୍ନ ସମସ୍ୟା ବାବଦରେ ଆଲୋଚନା କରିବେ । ପରେ ବୋଡେନ ବ୍ଲକ ଲିଟିସରର୍ଗି ହାଇସ୍କୁଲ ଗସ୍ତ କାର୍ଯ୍ୟକ୍ରମ ରହିଛି । ସେଠାରେ ସେ ସ୍କୁଲ ଉନ୍ନତିକରଣ କାର୍ଯ୍ୟର ଅନୁଧ୍ୟାନ କରିବା ସହ ଛାତ୍ରଛାତ୍ରୀଙ୍କ ସହ ଆଲୋଚନା କରିବେ । ସେଠାରୁ ସେ ବୋଡେନ ବ୍ଲକ ସଦରରେ ଥିବା ମିଶନ ଶକ୍ତି କାଫେ ପରିଦର୍ଶନ କରିବେ ।
ଏହା ପରେ 5T ସଚିବ ପାତଳଗଙ୍ଗା ମନ୍ଦିର ଗସ୍ତ କରି ଠାକୁରଙ୍କ ଦର୍ଶନ କରିବା ସହ ମନ୍ଦିର ଉନ୍ନତିକରଣ ନେଇ ଲୋକଙ୍କ ସହ ଆଲୋଚନା କରିବେ । ପରେ ସେ ଖରିଆର ବ୍ଲକ ସଦରରେ ଥିବା ଆମ ହସ୍ପିଟାଲ ପରିଦର୍ଶନ କରି ରହିଥିବା କିଛି ସମସ୍ୟାର ଅନୁଧ୍ୟାନ କରିବେ । ଏଠାରେ ରୋଗୀଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ଏହାପରେ ସେ କୋମନା ବ୍ଲକର କୋନାବିରା ମେଗା ଉଠା ଜଳସେଚନ ପ୍ରକଳ୍ପ କାର୍ଯ୍ୟର ଅନୁଧ୍ୟାନ କରିବେ । ସେଠାରୁ 5T ସଚିବ କୋମନା ବ୍ଲକ ସୁନାବେଡା ଗସ୍ତ କରିବେ । ସୁନାବେଡାରେ ସୁନା ଦେଇ ମନ୍ଦିର ପରିଦର୍ଶନ କରିବା ସହ ଚୋକଟିଆ-ଭୁଞ୍ଜିଆ ଆଦିମ ଜନଜାତି ସହ ଆଲୋଚନା କାର୍ଯ୍ୟକ୍ରମ ରହିଛି ।
ଅସ୍ଥାୟୀ ଭାବେ ମିଗ୍-୨୧ ଯୁଦ୍ଧ ବିମାନର ସମସ୍ତ ଉଡ଼ାଣ ବନ୍ଦ କଲା ବାୟୁସେନା
ନୂଆଦିଲ୍ଲୀ: ମିଗ୍-୨୧ ଯୁଦ୍ଧ ବିମାନକୁ ନେଇ ବଡ଼ ନିଷ୍ପତ୍ତି ନେଇ ଭାରତୀୟ ବାୟୁସେନା । ସମସ୍ତ ମିଗ୍-୨୧ ଯୁଦ୍ଧ ବିମାନର ଉଡ଼ାଣ ବନ୍ଦ କରିଛି ବାୟୁସେନା । ରାଜସ୍ଥାନରେ ଏକ ମିଗ୍-୨୧ ଯୁଦ୍ଧ ବିମାନ ଦୁର୍ଘଟଣାଗସ୍ତ ହେବାର ଦୁଇ ସପ୍ତାହ ପରେ ଏହି ବଡ଼ ନିଷ୍ପତ୍ତି ନେଇଛି ବାୟୁସେନା । ଖବର ସରବରାହ ସଂସ୍ଥା ଏଏନଆଇର ଏକ ରିପୋର୍ଟ ଅନୁସାରେ ମିଗ୍-୨୧ ଯୁଦ୍ଧ ବିମାନର ସମସ୍ତ ଉଡ଼ାଣକୁ ଅସ୍ଥାୟୀ ଭାବେ ରଦ୍ଦ କରାଯାଇଛି କାରଣ ୮ ମଇରେ ହୋଇଥିବା ଦୁର୍ଘଟଣାର ତଦନ୍ତ ଏବେ ଜାରି ରହିଛି ଏବଂ ଦୁର୍ଘଟଣାର କାରଣ ନେଇ ଯାଞ୍ଚ ଚାଲିଛି ।
ଦୀର୍ଘ ସମୟ ଧରି ମିଗ୍-୨୧ ଭାରତୀୟ ବାୟୁସେନାର ପ୍ରମୁଖ ଆଧାର ଭାବେ ଜଣାଯାଉଥିଲା । ୧୯୬୦ ଦଶକର ଆରମ୍ଭରେ ବାୟୁସେନାରେ ସାମିଲ ହେବା ପରେ, ଭାରତୀୟ ବାୟୁସେନା ନିଜର ସମଗ୍ର ଯୁଦ୍ଧ କୌଶଳକୁ ଆଗକୁ ବଢ଼ାଇବା ପାଇଁ ୭୦୦ରୁ ଅଧିକ ମିଗ୍-୨୧ ଯୁଦ୍ଧ ବିମାନର କ୍ରୟ କରିଥିଲା । ବର୍ତ୍ତମାନ ବାୟୁସେନା ପାଖରେ ପ୍ରାୟ ୫୦ ବିମାନ ସହ ତିନି ମିଗ୍-୨୧ ସ୍କ୍ୱାଡ୍ରନ ରହିଛି । ବାୟୁସେନା ଗତ ବର୍ଷ ଅବଶିଷ୍ଟ ମିଗ୍-୨୧ ଯୁଦ୍ଧ ସ୍କ୍ୱାଡ୍ରନଗୁଡ଼ିକୁ ଫେଜ୍ କରିବା ପାଇଁ ତିନି ବର୍ଷର ସମୟ ସୀମା ଚୂଡାନ୍ତ କରିଥିଲା ।
ସୋଭିୟତ ମୂଳର ଏହି ବିମାନର ସ୍କ୍ୱାଡ୍ରନକୁ ହଟାଇବାର ଯୋଜନା ଭାରତୀୟ ବାୟୁସେନାର ଆଧୁନୀକରଣ ଅଭିଯାନର ଅଂଶ ଅଟେ । ରାଜସ୍ଥାନ ଆକାଶରେ ଦୁର୍ଘଟଣାଗ୍ରସ୍ତ ଯୁଦ୍ଧ ବିମାନ ଏକ ନିୟମିତ ପ୍ରଶିକ୍ଷଣ ଉଡ଼ାଣରେ ଥିଲା ଯେବେ ଏହା ଦୁର୍ଘଟଣାଗ୍ରସ୍ତ ହୋଇଯାଇଥିଲା । ପାଇଲଟ ସାମାନ୍ୟ ଆହତ ହୋଇଥିଲେ । ଏହାପରେ ଦୁର୍ଘଟଣାର ସଠିକ କାରଣ ଜାଣିବା ପାଇଁ ତଦନ୍ତ ଆରମ୍ଭ କରାଯାଇଥିଲା ।