ଭୁବନେଶ୍ବର: ବମିଖାଲ ରେଳ ଧାରଣାରେ ପଡ଼ିଛି ସ୍ବାମୀ ସ୍ତ୍ରୀଙ୍କ ଖଣ୍ଡ ବିଖଣ୍ଡିତ ଶବ । ପାରିବାରିକ କଳହରୁ ଉଭୟ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା ।
ଉଭୟଙ୍କ ଘର କଟକ ଜିଲ୍ଲାରେ ହୋଇଥିବା ବେଳେ, ଶାନ୍ତିପଲ୍ଲି ବସ୍ତିରେ ରହି ଶ୍ରମିକ ଭାବେ କାମ କରୁଥିଲେ । ଘଟଣାସ୍ଥଳରେ ରେଳବାଇ ଥାନା ପୋଲିସ ପହଞ୍ଚି ତଦନ୍ତ ଜାରି ରଖିଛି ।
ସମ୍ବଲପୁର: ଉପରମୁଣ୍ଡରେ ବର୍ଷା ଯୋଗୁଁ ବଢୁଛି ହୀରାକୁଦ ଜଳଭଣ୍ଡାରର ଜଳସ୍ତର । ଜଳଭଣ୍ଡାରକୁ ବନ୍ୟାଜଳ ପ୍ରବେଶର ମାତ୍ରା ବଢ଼ିବାରେ ଲାଗିଛି । ସକାଳ ୬ଟା ସୁଦ୍ଧା ଡ୍ୟାମ ଭିତରକୁ ୧ ଲକ୍ଷ ୧୬ ହଜାର ୯୮୨ ଘନଫୁଟ ଜଳ ପ୍ରବେଶ କରୁଥିବା ବେଳେ, ୫ଟି ସ୍ଲୁଇସ୍ ଗେଟ୍ ଓ ବିଭିନ୍ନ କେନାଲ ଦେଇ ସମାନ ପରିମାଣର ବନ୍ୟା ଜଳ ନିଷ୍କାସିତ ହେଉଛି ।
ବର୍ତ୍ତମାନ ଡ୍ୟାମର ଜଳସ୍ତର ୬୧୪.୪୭ ଫୁଟରେ ପହଞ୍ଚିଛି । ହୀରାକୁଦରୁ ଚଳିତ ବର୍ଷର ପ୍ରଥମ ବନ୍ୟାଜଳ ନିଷ୍କାସନ ପରେ ତଳିଆ ଅଞ୍ଚଳର ଲୋକଙ୍କ ସତର୍କ କରାଯାଇଛି ।
ଟାଙ୍ଗୀ: ୧୬ ନମ୍ବର ଜାତୀୟ ରାଜପଥ ଚଣ୍ଡେଶ୍ବର ଓଭରବ୍ରିଜ ଉପରେ ଦୁର୍ଘଟଣା । ଶୋଇଥିବା ଗୋରୁ ପଲ ଉପରେ ଚଢିଗଲା ଟ୍ରକ୍ । ଘଟଣାସ୍ଥଳରେ
୧୦ରୁ ଅଧିକ ଗୋରୁଙ୍କ ମୃତ୍ୟୁ ହୋଇଥିବା ବେଳେ ୫ରୁ ଅଧିକ ଗୋରୁ ଗୁରୁତର ଅଛନ୍ତି । ପୋଲିସ୍ ଦୁର୍ଘଟଣା ଘଟାଇଥିବା ଟ୍ରକକୁ ଜବତ କରିବା ସହ ଚାଳକଙ୍କୁ ଗିରଫ କରିଛି ।
ଭୁବନେଶ୍ବରରୁ ବ୍ରହ୍ମପୁର ଯାଉଥିବା ଏକ ମାଲବାହୀ ଟ୍ରକ୍ ଗୋରୁ ପଲ ଉପରେ ଚଢି ଯିବାରୁ ଏଭଳି ଅଭାେବନୀୟ ଘଟଣା ଘଟିଛି । ଫଳରେ ୧୦ ରୁ ଅଧିକ ଗୋରୁଙ୍କ ମୃତ୍ୟୁ ହୋଇଥିଲା । ୫ ରୁ ଅଧିକ ଗୋରୁ ଗୁରୁତର ହୋଇଥିଲେ । ଦୁର୍ଘଟଣା ଫଳରେ ଗାଡି ମୋଟର ଚଳାଚଳ ବନ୍ଦ ରହିଥିଲା । ପୋଲିସ୍ ଓ ଅଗ୍ନିଶମ ବାହିନୀର ଉଦ୍ଧାର କାର୍ଯ୍ୟ ପରେ ରାସ୍ତାରେ ଗାଡି ଚଳାଚଳ ସ୍ୱାଭାବିକ ହୋଇଛି ।
ଇମ୍ଫାଲ: ମଣିପୁର ହିଂସାକୁ ରାଜ୍ୟ ଓ କେନ୍ଦ୍ର ସରକାର ଚାହିଁଥିଲେ ସମ୍ପୂର୍ଣ୍ଣ ଭାବେ ବର୍ଜନ କରାଯାଇ ପାରିଥାନ୍ତା । ମଣିପୁରର ଜଣେ ବିଜେପି ବିଧାୟକ ଏଭଳି ବୟାନ ଦେଇଛନ୍ତି । ହିଂସା ଆରମ୍ଭରୁ ସାମାନ୍ୟ ଘଟଣାକୁ ଜୋର ଦେଇ ବନ୍ଦ କରିବାର ଥିଲା । ହେଲେ ହିଂସାକାରୀ ପରୋକ୍ଷରେ ସରକାର ଓ ପ୍ରଶାସନର ପ୍ରୋତ୍ସାହନ ପାଇଲେ । ଯାହାକୁ ସେମାନେ ଦୁରୁପଯୋଗ କରି ସାରା ରାଜ୍ୟରେ ହିଂସାକୁ ଚରମସ୍ତରକୁ ନେଲେ ।
କୁକି ସମ୍ପ୍ରଦାୟ ଅଞ୍ଚଳରେ ସ୍ବତନ୍ତ୍ର ଭାବେ ପ୍ରଶାସନକୁ ଆଲର୍ଟ ରଖିବାକୁ ମୁଖ୍ୟମନ୍ତ୍ରୀଙ୍କୁ ଅନେକ ଥର ଚିଠି ଲେଖାଯାଇଥିଲା । ହେଲେ ସରକାରଙ୍କ ସମର୍ଥନରେ ମିତେଇ ସମ୍ପ୍ରଦାୟ ଏହା କରେଇବାକୁ ଦେଇନଥିଲେ । ବିଜେପି ସରକାର ମଧ୍ୟ ଏହାକୁ ଅଣଦେଖା କରିଥିଲେ । ଯାହାର ସ୍ଥିତି ଆଜି ଭୟଙ୍କର ହୋଇଛି । କୁକି ଓ ମିତେଇ ସମ୍ପ୍ରଦାୟ ପାଇଁ ସରକାରୀ ସ୍ତରରେ ପ୍ରଶାସନ ଭିନ୍ନ ଭିନ୍ନ କାର୍ଯ୍ୟଧାରା ପ୍ରସ୍ତୁତ କରିଥିଲେ ଏମିତି ସ୍ଥିତି ହୋଇନଥାନ୍ତା ବୋଲି ବିଜେପି ବିଧାୟକ ପାଓଲେଇନାଲ ହାଓକିପ୍ କହିଛନ୍ତି ।
ସେପଟେ ମଣିପୁର ଶାନ୍ତି ପଥରେ ଅଗ୍ରସର ହେଉଛି ବୋଲି ମୁଖ୍ୟମନ୍ତ୍ରୀ ଏନ ବିରେନ ସିଂହ କହିଛନ୍ତି । ଗତ ୧୦ ଦିନ ଭିତରେ କୌଣସି ପ୍ରକାର ହତ୍ୟାକାଣ୍ଡ ହୋଇନାହିଁ । ହିଂସାକାରୀଙ୍କୁ ଗିରଫ କରାଯାଉଛି । ପୋଲିସ ସଜାଗ ରହିଛି ବୋଲି ସରକାର କହିଛନ୍ତି । କିନ୍ତୁ ବିରୋଧୀ ଏହାକୁ ମିଛ ବୋଲି କହିବା ସହ ହିଂସା ଏବେ ବି ଚରମସ୍ତରରେ ଅଛି ବୋଲି କହିଛନ୍ତି ।
ଭଦ୍ରକ: ପବିତ୍ର ଶ୍ରାବଣ ମାସର ତୃତୀୟ ସୋମବାରରେ ଆରଡି ପୀଠ ବାବା ଆଖଣ୍ଡଳମଣିଙ୍କୁ ଜଳାଭିଷେକ ପାଇଁ ଭକ୍ତଙ୍କ ସମାଗମ ହୋଇଛି । କାଉଡିଆଙ୍କ ଭିଡକୁ ଦୃଷ୍ଟିରେ ରଖି ମନ୍ଦିର ଓ ଜିଲ୍ଲା ପ୍ରଶାସନ ପକ୍ଷରୁ ପୀଠରେ ବ୍ୟାପକ ବ୍ୟବସ୍ଥା କରାଯାଇଛି ।
କାଉଡିଆମାନେ ଯେପରି ସୁରକ୍ଷିତ ଭାବେ ନଦୀ ପାରି ହୋଇ ଆସିପାରିବେ, ସେଥିପାଇଁ ପୀଠରେ ଥିବା ୩ଟି ନଦୀଘାଟର ଉଭୟ ପାର୍ଶ୍ବରେ ଓଡ୍ରାଫର ୨ଟି ଟିମ ସହ ଅଗ୍ନିଶମ ବାହିନୀ ଓ ପୋଲିସ ମୁତୟନ ରହିଛନ୍ତି । ବାବାଙ୍କ ପାଖରେ କାଉଡିଆଙ୍କ ଶୃଙ୍ଖଳିତ ଜଳଲାଗି ପାଇଁ ମନ୍ଦିର ଭିତରେ ଓ ବାହାରେ କଡା ସୁରକ୍ଷା ବ୍ଯବସ୍ଥା କରାଯାଇଛି ।
ପୁରୀ: ଖୋଲିଲା ଶ୍ରୀମନ୍ଦିର ପଶ୍ଚିମ ଦ୍ବାର । ସକାଳ ୭ଟାରୁ ପୁରୀବାସୀଙ୍କ ପାଇଁ ଖୋଲିଛି ପଶ୍ଚିମ ଦ୍ବାର । ପରିଚୟ ପତ୍ର ଦେଖାଇ ପ୍ରବେଶ କରୁଛନ୍ତି ପୁରୀବାସୀ । ଆବଶ୍ୟକ ହେଲେ ପରବର୍ତ୍ତୀ ସମୟରେ ଅନ୍ୟ ଦୁଇ ଦ୍ବାରା ଖୋଲାଯିବା ନେଇ ନିଷ୍ପତ୍ତି ନିଆଯିବ । ଗତକାଲି ବସିଥିବା ଗୁରୁତ୍ବପୂର୍ଣ୍ଣ ବୈଠକରେ ଏନେ ନିଷ୍ପତ୍ତି ହୋଇଥିଲା । ଛତିଶା ନିଯୋଗ ନିଷ୍ପତ୍ତି ଅନୁଯାୟୀ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ନେଇ ଗଠିତ ସ୍ବତନ୍ତ୍ର ସବ-କମିଟିର ବୈଠକରେ ଏଭଳି ନିଷ୍ପତି ଗ୍ରହଣ କରାଯାଇଛି ।
ପୁରୀ ବାସିନ୍ଦାଙ୍କ ପାଇଁ ପଶ୍ଚିମ ଦ୍ବାର ଦେଇ ପ୍ରବେଶ କରିବାକୁ ସ୍ବତନ୍ତ୍ର ବ୍ୟବସ୍ଥା ଗ୍ରହଣ କରିବାକୁ ପୋଲିସ ଓ ଶ୍ରୀମନ୍ଦିର ପ୍ରଶାସନକୁ ଅବଗତ କରାଯାଇଛି । ସେହିଭଳି ଅନ୍ୟ ଦୁଇ ଦ୍ବାର ତଥା ଉତ୍ତର ଓ ଦକ୍ଷିଣ ଦ୍ୱାର ଦେଇ ଭକ୍ତଙ୍କ ପ୍ରବେଶ ନେଇ ପରବର୍ତ୍ତୀ ସମୟରେ ନିଷ୍ପତି ନିଆଯିବ । ଗତକାଲି ବସିଥିବା ବୈଠକରେ ପୁରୀ ଜିଲ୍ଲାପାଳ, ଏସପି, ଉପଜିଲ୍ଲାପାଳଙ୍କ ସମେତ ପରିଚାଳନା କମିଟିର ୫ ଜଣ ସେବାୟତ ସଦସ୍ୟ ଓ ଛତିଶା ନିଯୋଗର ଅନ୍ୟ 3ଜଣ ବରିଷ୍ଠ ସେବାୟତ ସଦସ୍ୟ ଉପସ୍ଥିତ ଥିଲେ ।
ନୂଆଦିଲ୍ଲୀ: ଇମର୍ଜିଂ ଏସିଆ କପ୍ ଜିତିବାର ଭାରତ-ଏ ର ସ୍ୱପ୍ନ ଭାଙ୍ଗିଯାଇଛି । ଭାରତୀୟ ଟିମକୁ ଫାଇନାଲରେ ପାକିସ୍ତାନ-ଏଠୁ ୧୨୮ ରନରେ ପରାଜୟ ମିଳିଛି । ଲଗାତାର ଦ୍ୱିତୀୟଥର ପାଇଁ ପାକିସ୍ତାନ ଟାଇଟଲ୍ ଜିତିବାରେ ସଫଳ ହୋଇଛି । ପାକିସ୍ତାନ କଲମ୍ବୋରେ ଖେଳାଯାଇଥିବା ଫାଇନାଲରେ ୩୫୩ ରନର ବିଶାଳ ଲକ୍ଷ୍ୟ ରଖିଥିଲା । ଜବାବରେ ଭାରତ ୪୦ ଓଭରରେ ୨୨୪ ରନରେ ଅଲଆଉଟ୍ ହୋଇଯାଇଥିଲା । ଭାରତ ପାଇଁ ସର୍ବାଧିକ ରନ୍ ଓପନର ଅଭିଷେଖ ଶର୍ମା (୬୧) କରିଥିଲେ ।
ଅଧିନାୟକ ୟଶ୍ ଧୁଲ ୩୯ ଏବଂ ସାଇ ସୁଦର୍ଶନ ୨୯ ରନର ଇନିଂସ ଖେଳିଥିଲେ । ଏହି ତିନି ଜଣଙ୍କ ବ୍ୟତୀତ ଅନ୍ୟ କୌଣସି ଭାରତୀୟ ଖେଳାଳି ୧୫ ରନ୍ ଛୁଇଁବାରେ ସମର୍ଥ ହୋଇନଥିଲେ । ପାକିସ୍ତାନ ପାଇଁ ସୁଫିୟାନ ମୁକିମ ତିନୋଟି ୱିକେଟ୍ ଅକ୍ତିଆର କରିଥିବା ବେଳେ ଅରଶଦ ଇକାବଲ ଏବଂ ମୁବସିର ଦୁଇଟି ଲେଖାଏଁ ୱିକେଟ୍ ହାସଲ କରିଥିଲେ । ଏହା ପୂର୍ବରୁ ପାକିସ୍ତାନ ଟସ୍ ହାରିବା ପରେ ନିର୍ଦ୍ଧାରିତ ୫୦ ଓଭରରେ ୮ ୱିକେଟ୍ ବିନିମୟରେ ୩୫୨ ରନ୍ ସଂଗ୍ରହ କରିଥିଲା ।
ପାକିସ୍ତାନ ପାଇଁ ତୟମ ତାହିର (୭୧ ଟି ବଲରେ ୧୦୮ରନ୍) ଶତକ ମାରିଥିଲେ । ତାଙ୍କ ବ୍ୟତୀତ ସଇମ ଅୟୁବ (୫୯ ରନ୍), ସାହିବଜାଦା ଫରହାନ (୬୫ ରନ୍) ଅର୍ଦ୍ଧଶତକ ମାରିଥିଲେ । ସେହିପରି ମୁବସିର ମଧ୍ୟ ୩୯ ରନର ଯୋଗଦାନ କରିଥିଲେ । ଭାରତ ପକ୍ଷରୁ ରାଜୱର୍ଦ୍ଧନ ହଙ୍ଗରଗେକର ଏବଂ ରିୟାନ ପରାଗ ଦୁଇଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ । ଏଠାରେ ଉଲ୍ଲେଖଯୋଗ୍ୟ ଯେ, ଏହା ଟୁର୍ଣ୍ଣାମେଣ୍ଟର ପଞ୍ଚମ ସଂସ୍କରଣ ଥିଲା ।
ଏପର୍ଯ୍ୟନ୍ତ ସୁଦ୍ଧା ଚାରିଥର ଏହି ଟୁର୍ଣ୍ଣାମେଣ୍ଟ ଅଣ୍ଡର-୨୩ ରୂପରେ ଖେଳାଯାଇଥିଲା । ୨୦୧୩ରେ ଭାରତ ସର୍ବପ୍ରଥମେ ଚମ୍ପିଆନ ହୋଇଥିଲା । ଏହାପରେ ୨୦୧୭ ଏବଂ ୨୦୧୮ରେ ଶ୍ରୀଲଙ୍କା ବ୍ୟାକ ଟୁ ବ୍ୟାକ ଟାଇଟଲ ଜିତିଥିଲା । ୨୦୧୯ରେ ପାକିସ୍ତାନ ଚମ୍ପିଆନ ହୋଇଥିଲା । ଚଳିତଥରକୁ ମିଶାଇ ସେ ଲଗାତାର ଦୁଇଟି ଟାଇଟଲ୍ ଜିତିଛି ।
ପୁରୀ: କାଲିଠୁ ପୁରୀବାସୀଙ୍କ ପାଇଁ ଖୋଲିବ ଶ୍ରୀମନ୍ଦିର ପଶ୍ଚିମ ଦ୍ବାର । ଏନେଇ ବୈଠକରେ ହୋଇଛି ଗୁରୁତ୍ବପୂର୍ଣ୍ଣ ନିଷ୍ପତ୍ତି । ଆସନ୍ତାକାଲି ସକାଳ ୭ଟାରୁ ପୁରୀବାସୀଙ୍କ ପାଇଁ ପଶ୍ଚିମ ଦ୍ବାର ଖୋଲିବ । ପରିଚୟ ପତ୍ର ଦେଖାଇ ପ୍ରବେଶ କରିପାରିବେ ପୁରୀବାସୀ । ଆବଶ୍ୟକ ହେଲେ ପରବର୍ତ୍ତୀ ସମୟରେ ଅନ୍ୟ ଦୁଇ ଦ୍ବାରା ଖୋଲାଯିବା ନେଇ ନିଷ୍ପତ୍ତି ନିଆଯିବ ବୋଲି ଉପଜିଲ୍ଲାପାଳ ଭବତାରଣ ସାହୁ ସୂଚନା ଦେଇଛନ୍ତି । ଛତିଶା ନିଯୋଗ ନିଷ୍ପତି ଅନୁଯାୟୀ ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ନେଇ ଗଠିତ ସ୍ୱତନ୍ତ୍ର ସବ-କମିଟିର ବୈଠକରେ ଏଭଳି ନିଷ୍ପତି ଗ୍ରହଣ କରାଯାଇଛି ।
ଆସନ୍ତାକାଲି ଠାରୁ ନିଷ୍ପତି ଅନୁସାରେ ଦର୍ଶନ ପାଇଁ ପୁରୀ ବାସିନ୍ଦାଙ୍କ ପାଇଁ ପଶ୍ଚିମ ଦ୍ବାର ଦେଇ ପ୍ରବେଶ କରିବାକୁ ସ୍ୱତନ୍ତ୍ର ବ୍ୟବସ୍ଥା ଗ୍ରହଣ କରିବାକୁ ପୋଲିସ ଓ ଶ୍ରୀମନ୍ଦିର ପ୍ରଶାସନକୁ ଅବଗତ କରାଯାଇଛି । ସେହିଭଳି ଅନ୍ୟ ଦୁଇ ଦ୍ବାର ତଥା ଉତ୍ତର ଓ ଦକ୍ଷିଣ ଦ୍ୱାର ଦେଇ ଭକ୍ତଙ୍କ ପ୍ରବେଶ ନେଇ ପରବର୍ତ୍ତୀ ସମୟରେ ନିଷ୍ପତି ନିଆଯିବ । ବୈଠକରେ ପୁରୀ ଜିଲ୍ଲାପାଳ, ଏସପି, ଉପଜିଲ୍ଲାପାଳଙ୍କ ସମେତ ପରିଚାଳନା କମିଟିର ୫ ଜଣ ସେବାୟତ ସଦସ୍ୟଙ୍କ ସହ ଛତିଶା ନିଯୋଗର ଅନ୍ୟ 3ଜଣ ବରିଷ୍ଠ ସେବାୟତ ସଦସ୍ୟ ଉପସ୍ଥିତ ଥିଲେ ।
ନନ୍ଦିଘୋଷ ବ୍ୟୁରୋ: ମୋକିମ ଓ ଚିରଞ୍ଜୀବଙ୍କ ନିଲମ୍ବନର ପ୍ରତିବାଦ କରି କଂଗ୍ରେସରୁ ବହିଷ୍କାର ହୋଇଥିବା ନାରାୟଣ ଯେନା ପିସିସି ସଭାପତିଙ୍କ ଅନୈତିକ କାରବାର ନେଇ ଅଭିଯୋଗ କରିଛନ୍ତି । ଆଜି ଏକ ସାମ୍ବାଦିକ ସମ୍ମିଳନୀରେ ରାଜ୍ୟର ଜଣେ ବରିଷ୍ଠ ବିଜେପି ନେତାଙ୍କ ସହ ଦିଲ୍ଲୀର ଏକ ତାରକା ହୋଟେଲରେ ଶରତ ପଟ୍ଟନାୟକଙ୍କ ଡ଼ିଲ୍ ନେଇ ଅଭିଯୋଗ କରିଛନ୍ତି ନାରାୟଣ ଯେନା । ନାରାୟଣ ଅଭିଯୋଗ କରିଛନ୍ତି, ଆମେ ଯେଉଁ ଦଳ ସହ ଲଢେଇ କରିବାକୁ ଅଣ୍ଟା ଭିଡ଼ୁଛୁ, ସେଇ ଦଳର ନେତାଙ୍କ ସହ ନିଜ ବ୍ୟକ୍ତିଗତ ସ୍ବାର୍ଥ ପାଇଁ ହାତ ମିଳାଇବା କେତେଦୂର ଯୁକ୍ତିଯୁକ୍ତ ବୋଲି ସେ ପ୍ରଶ୍ନ କରିଛନ୍ତି ।
୪ ଜିଲ୍ଲାରେ କଂଗ୍ରେସର ଭବିଷ୍ୟତ ବ୍ଲୁ ପ୍ରିଣ୍ଟ ବାବଦରେ ତଥ୍ୟ ଦେଇ ନିଜର ଫାଇଦା ନେଇଛନ୍ତି ଶରତ ପଟ୍ଟନାୟକ । ମୁମ୍ବାଇରେ ଏକ ଆଇଟି କମ୍ପାନୀରେ ତାଙ୍କ ଜ୍ବାଇଁ ଚାକିରୀ କରୁଛନ୍ତି । ହେଲେ ତାଙ୍କ ସେଠି ଅସୁବିଧା ହେବାରୁ ସେହି କମ୍ପାନୀର ସିଇଓଙ୍କୁ ହଟାଇବାକୁ ପିସିସି ସଭାପତି ବିଜେପି ନେତାଙ୍କ ସହ ଡ଼ିଲ୍ କରି ସଫଳ ହୋଇଛନ୍ତି । ସିଇଓଙ୍କୁ କମ୍ପାନୀରୁ ବାହାର କରିବା ସହ ନିଜ ନାତୁଣୀକୁ ମ୍ବମ୍ବାଇର ଏକ ପ୍ରତିଷ୍ଠିତ ସ୍କୁଲରେ ଆଡ଼ମିସନ କରିଛନ୍ତି । ତେଣୁ ଉଭୟ ନେତାଙ୍କ ନିଲମ୍ବନ ପ୍ରତିବାଦ କରିବା ତାଙ୍କର ଅଧିକାର ଏବଂ ସେ କିଛି ଭୂଲ୍ କରିନାହାନ୍ତି ବୋଲି କହିବା ସହ ପୁଣି ଥରେ ତୁରନ୍ତ ଦୁଇ ନେତାଙ୍କ ଉପରୁ ନିଲମ୍ବନ ଉଠାଇବା ସହ ତାଙ୍କ ଉପରୁ ବହିଷ୍କାର ଆଦେଶ ପ୍ରତ୍ୟାହାର କରିବାକୁ ଦାବି କରିଛନ୍ତି ।
ଭୁବନେଶ୍ୱର: ରଦ୍ଦ ହେଲା କନିଷ୍ଠ ଯନ୍ତ୍ରୀ (ସିଭିଲ) ମେନ୍ ଲିଖିତ ପରୀକ୍ଷା-୨୦୨୨ । ପରୀକ୍ଷା ରଦ୍ଦ ନେଇ ଓଏସଏସସି ପକ୍ଷରୁ ସୂଚନା । ବାଲେଶ୍ବର ଏସପି ସାଗରିକା ନାଥଙ୍କ ରିପୋର୍ଟ ଆଧାରରେ ରଦ୍ଦ । ଗତ ୧୬ ତାରିଖରେ ହୋଇଥିବା ପରୀକ୍ଷା ରଦ୍ଦ । ଆସନ୍ତା ସେପ୍ଟେମ୍ବର ୩ରେ ପୁଣିଥରେ ହେବ ପରୀକ୍ଷା । ଏନେଇ ଟ୍ୱିଟ୍ କରି ସୂଚନା ଦେଇଛନ୍ତି ଓଏସଏସସି ସଚିବ ଅଭୟ । ଗତ ୧୬ ତାରିଖରେ ହୋଇଥିବା ପରୀକ୍ଷା ପୂର୍ବରୁ ପ୍ରଶ୍ନପତ୍ର ଡିଲ୍ ନେଇ ମିଳିଥିଲା ସୂଚନା । ଓଏସଏସସିର ସୂଚନା ଆଧାରରେ ରେଡ୍ କରିଥିଲା ବାଲେଶ୍ୱର ପୋଲିସ । ଓଡ଼ିଶା ସୀମାନ୍ତ ଦୀଘାରେ ହୋଇଥିଲା ରେଡ୍ । ଜଣେ ମହିଳାଙ୍କ ସମେତ ୯ ଜଣଙ୍କୁ କାବୁ କରିଥିଲା ପୋଲିସ । ଏହି ୯ଜଣ ଏକ ଆନ୍ତଃରାଜ୍ୟ ରାକେଟ ବୋଲି ମିଳିଛି ସୂଚନା ।
