ନୂଆଦିଲ୍ଲୀ: ଦିଲ୍ଲୀରେ ଛାତିଥରା ଦୁର୍ଘଟଣା । କେତେକ କାର୍, ବାଇକ ଓ ସ୍କୁଟରକୁ ଧକ୍କା ଦେଲା ଦ୍ରୁତଗାମୀ ବସ୍ । ଘଟଣାସ୍ଥଳରେ ଜଣେ ପ୍ରାଣ ହରାଇଥିବାବେଳେ ଜଣେ ଆହତ ହୋଇଛନ୍ତି । ଦୁର୍ଘଟଣାର ସିସିଟିଭି ଚିତ୍ର ସମ୍ପୂର୍ଣ୍ଣ କଏଦ ହୋଇଛି । ଆଜି ଦିଲ୍ଲୀର ରୋହିଣୀ ଅନ୍ତର୍ଗତ ବିଶ୍ରାମ ଚୌକରେ ଅପରାହ୍ଣ ୨ଟା ୪୫ରେ ଡିଟିସିର ଏକ ଦ୍ରୁତଗାମୀ ବସ୍ କେତେକ କାରକୁ ଧକ୍କା ଦେବା ସହ ଯାତ୍ରୀ ପ୍ରତୀକ୍ଷାଗାର ନିକଟରେ ରହିଥିବା କେତେକ ବାଇକ ଓ ସ୍କୁଟରକୁ ଧକ୍କା ଦେଇଥିଲା । ଏହି ଘଟଣାରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବାବେଳେ ଜଣେ ବ୍ୟକ୍ତି ଆହତ ହୋଇଛନ୍ତି । ଦୁର୍ଘଟଣା ଦେଖି ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ଡ୍ରାଇଭରଜଣକ ନିୟନ୍ତ୍ରଣ ହରାଇବାରୁ ଏହି ଦୁର୍ଘଟଣା ଘଟିଥିବା କୁହାଯାଇଛି । ଡ୍ରାଇଭରକୁ ପୋଲିସ ନିଜ ହେପାଜତକୁ ନେଇ ତଦନ୍ତ କରିଛି । ଗତମାସରେ ଡିଟିସିର ଏକ ବସ ଧକ୍କାରେ ଜଣେ ୩୬ ବର୍ଷ ବୟସ୍କ ମହିଳାଙ୍କ ମୃତ୍ୟୁ ଘଟିଥିଲା ।
ହମାସ ମୁଖ୍ୟ ଇସମାଇଲ ହାନିଆ ଘର ଉପରେ ମିସାଇଲ୍ ଆଟାକ୍
ଗାଜା: ଇସ୍ରାଏଲ ଓ ହମାସ ମଧ୍ୟରେ ଚାଲିଥିବା ଯୁଦ୍ଧ ୨୯ ଦିନରେ ପହଞ୍ଚିଲାଣି । ଏହାମଧ୍ୟରେ ଖବର ଆସୁଛି ଯେ ହମାସ ମୁଖ୍ୟ ଇସମାଇଲ ହାନିଆଙ୍କ ଘର ଉପରକୁ ମିସାଇଲ୍ ମାଡ଼ କରିଛି ଇସ୍ରାଏଲ୍ ସେନା। ଅଲ-ଆକସା ରେଡିଓର ରିପୋର୍ଟ ଅନୁଯାୟୀ, ଇସ୍ରାଏଲ ଡ୍ରୋନ ଦ୍ୱାରା ଗାଜା ସ୍ଥିତ ଇସମାଇଲ ହାନିଆର ଘର ଉପରକୁ କ୍ଷେପଣାସ୍ତ୍ର ପକାଇଛି। ତେବେ ଏହି ଆକ୍ରମଣ ସମୟରେ ଇସମାଇଲ ଘରେ ନଥିବା ବେଳେ ତାଙ୍କ ପରିବାର ସଦସ୍ୟ କେହିଥିଲେ କି ନା ଜଣାପଡିନାହିଁ।
ସୂଚନାନୁସାରେ, ଗାଜା ସହରକୁ ସବୁ ଦିଗରୁ ଘେରି ରହିଛି ଇସ୍ରାଏଲ। ଦୁଇ ଦିନ ମଧ୍ୟରେ ୧୫୦ରୁ ଅଧିକ ହମାସ ଆତଙ୍କବାଦୀ ନିହତ ହୋଇଛନ୍ତି ଇସ୍ରାଏଲ୍ ସେନାବାହିନୀ ଗାଜାକୁ ସବୁଆଡୁ ଘେରାବନ୍ଦୀ କରିଛି। । ଏପଟେ ଇସ୍ରାଏଲ ଦାବି କରିଛି ଯେ ବର୍ତ୍ତମାନ ପର୍ଯ୍ୟନ୍ତ ୧୦୦୦ ହମାସ୍ ଆତଙ୍କବାଦୀଙ୍କୁ ହତ୍ୟା କରାଯାଇଛି । ଏହି ଘଟଣାରେ ଇସ୍ରାଏଲର ୨୪ ସୈନିକଙ୍କ ଜୀବନ ଯାଇଛି । କେବଳ ଗାଜାରେ ୧୦ ହଜାରରୁ ଅଧିକ ଲୋକ ପ୍ରାଣ ହରାଇଥିବାବେଳେ ଇସ୍ରାଏଲରେ ୧୪୦୦ ଜଣଙ୍କ ମୃତ୍ୟୁ ଘଟିଛି।
ଇସ୍ରାଏଲ ସେନା ମୁଖପାତ୍ର କହିଛନ୍ତି ଯେ ସୈନିକମାନେ ଅସ୍ତ୍ରଶସ୍ତ୍ର ଏବଂ ଏୟାରକ୍ରାଫ୍ଟ ଜରିଆରେ ହମାସ ଉପରେ ଆକ୍ରମଣ କରୁଛନ୍ତି। ସେନାଙ୍କ ଟାର୍ଗେଟରେ ରହିଛି ହମାସ୍ କମାଣ୍ଡ୍ ସେଣ୍ଟର, ଦୁଇଟି ଲଞ୍ଚିଂ ପୋଜିସନ୍, ତିନୋଟି ସୁଡଙ୍ଗ ଏବଂ ଆଣ୍ଟି ଟ୍ୟାଙ୍କ ମିସାଇଲ୍ ଲଞ୍ଚିଂ ସେଣ୍ଟର।
ଜେଲ ଗଲେ ଟୁଟୁ ନାୟକ
ଭୁବନେଶ୍ବର: ଗିରଫ ହୋଇ ୧୪ ଦିନିଆ ବିଚାର ବିଭାଗୀୟ ହାଜତକୁ ଗଲେ ସିନେ ପ୍ରଯୋଜକ ସଞ୍ଜୟ ନାୟକ ଓରଫ ଟୁଟୁ । ମହିଳା ସାମ୍ବାଦିକଙ୍କୁ ମାଡ଼ ମାରିବା ଅଭିଯୋଗରେ ଟୁଟୁ ନାୟକଙ୍କୁ ଗିରଫ କରିଛି ଖାରବେଳ ନଗର ଥାନା ପୋଲିସ । ଗିରଫ ପରେ ଟୁଟୁଙ୍କୁ କୋର୍ଟରେ ହାଜର କରାଯାଇଥିଲା । ଟୁଟୁ ନାୟକଙ୍କ ଜାମିନ ଆବେଦନ ଶୁଣାଣିକୁ ସଂରକ୍ଷିତ ରଖିଛନ୍ତି JMFC କୋର୍ଟ । ଆସନ୍ତା ସୋମବାର ଜାମିନର ପୁନଃଶୁଣାଣି ହେବ । ମହିଳା ସାମ୍ବାଦିକଙ୍କୁ ମାଡ଼ ମାରିଥିବାନେଇ ଗତକାଲି ଅଭିଯୋଗ ହୋଇଥିଲା । ପୋଲିସର ଏକ ସ୍ବତନ୍ତ୍ର ଟିମ୍ ଟୁଟୁଙ୍କୁ ପଚରାଉଚରା କରିବା ପରେ ଗିରଫ କରିଥିଲା । ତାଙ୍କ ବିରୋଧରେ ଦଫା 354, 294, 341, 323ରେ ମାମଲା ରୁଜୁ ହୋଇଛି ।
ବିଏମସିର ମାଷ୍ଟର ପ୍ଲାନ୍, ହଟିବ ଅଳିଆ ପାହାଡ଼
ଭୁବନେଶ୍ବର: ଭୁବନେଶ୍ବରରେ ବର୍ଜ୍ୟ ପରିଚାଳନା ପାଇଁ ବିଏମସିର ମାଷ୍ଟର ପ୍ଲାନ । ଗାଢ଼କଣ ହେବ ଡମ୍ପିଂ ମୁକ୍ତ । ଟିଟିଏସ୍ ଠାରେ ଟେରେକ୍ସ ଓ୍ବାରିୟର୍ ମେସିନରେ ପରୀକ୍ଷଣ ପରେ ଆରମ୍ଭ ହୋଇଛି ପକ୍ରିୟା କରଣ । ୬ ମାସର ଭିତରେ ହଟିବ ଅଳିଆ ପାହାଡ଼ । ଟେରେକ୍ସ ଓ୍ବାରିୟର କେମିତି କାମ କରୁଛି ବୁଲି ଦେଖିଛନ୍ତି ବିଏମସି କମିଶନର । ସେପଟେ ଯେଉଁମାନେ ପୃଥକୀକରଣକୁ ସହଯୋଗ ଓ ନିୟମ ପାଳନ କରୁନହାନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବିଏମସି ବୋଲି କମିଶନର କହିଛନ୍ତି ।
ଡମ୍ପିଂ ଫ୍ରି ସିଟି ହେବ ରାଜଧାନୀ । ହଟିବ ଅଳିଆ ପାହାଡ଼ । ବର୍ଜ୍ୟ ପରିଚାଳନା ପାଇଁ ମାଷ୍ଟର ପ୍ଳାନ୍ । ବିଦେଶୀ ଢାଞ୍ଚାଚରେ ବିଏମସି ଆଣିଲା ଟେରେକ୍ସ ଓ୍ବାରିୟର । ୬ ମାସରେ ଗାଢକଣ ହେବ ବର୍ଜ୍ୟମୁକ୍ତ । ଘଣ୍ଟାକୁ ୫୦ ଟନର ବର୍ଜ୍ୟ ପକ୍ରିୟାକରଣ କରିବ ଓ୍ବାରିୟର । ଦିନେ ଏ ରାସ୍ତା ପଟେ ଗଲେ ଦୁର୍ଗନ୍ଧରେ ନାକ ଫାଟି ଯାଉଥିଲା । ହେଲେ ଆଜି ଏଠି ବିଏମସି କମିଶନର ସକାଳୁ ଚାହା ପିଇଉଛନ୍ତି । ସୈନିକ ସ୍କୁଲ ପଛପଟ ଠାରେ ଟିଟିଏସ ଠାରେ ଟେରେକ୍ସ ୱାରିୟର ଦ୍ବାରା ବଜ୍ୟ ପରିଚାଳନା କରାଯାଉଛି ।
କେମିତି ଅପରେଟ କରୁଛି ଟେରେକ୍ସ ୱାରିୟର ମେସିନ ସମୀକ୍ଷା କରିଛନ୍ତି । ସହରରୁ ବାହାରୁଥିବା ମିଶ୍ରିତ ବର୍ଜ୍ୟ କିପରି ପୃଥକୀକୃତ କରି ଶୁଖିଲା ବସ୍ତୁକୁ ବଡରୁ ଛୋଟ କରି ବାଛିବା, ପଡିରହିଥିବା ବର୍ଜ୍ଯର ପୃଥକୀକରଣ, ସହ ପ୍ରତିଦିନ ଆସୁଥିବା ବର୍ଜ୍ୟର ପ୍ରକ୍ରିୟାକରଣ, ସ୍ବତନ୍ତ୍ର ଜୈବିକ ଦ୍ରବଣର ପ୍ରୟୋଗରେ ବର୍ଜ୍ୟର କ୍ଷୟ ପ୍ରକ୍ରିୟା କରାଯାଇ ପରିମଳ ପରିଚାଳନା କରାଯାଉଛି । ବାହାରୁ ଥିବା ଜୈବ ପଦାର୍ଥକୁ ଖାଲ କମାରେ ମାଟି ପରି ବ୍ୟବହାର ହୋଇ ପାରିବ । ସେହିଭଳି ବାହାରୁଥିବା ପ୍ଳାଷ୍ଟିକୁ ସିମେଷ୍ଟ କମ୍ପାନୀକୁ ଦିଆଯିବ । ଅଳିଆ ଗଦାରୁ ଗନ୍ଧ ବାହାରୁ ଥିବାରୁ ଗନ୍ଧକୁ କମାଇବା ପାଇଁ ବାୟୋ-କେମିକାଲ ସ୍ପ୍ରେ କରାଯାଉଛି । ଟେରେକ୍ସ ଓ୍ବାରିୟର୍ ମେସିନ୍ ଦ୍ଵାରା ଏକ ଘଂଟାକୁ ପ୍ରାୟ ୫୦ ଟନ୍ ର ବର୍ଜ୍ୟ ପ୍ରକ୍ରିୟାକରଣ କରୁଛି ।
ସେପଟେ ଟିଟିଏସ ଠାରେ ବଜ୍ୟ ପରିଚାଳନା ପାଇ ଟ୍ରମେଲ୍ କାର୍ଯ୍ୟ ଶେଷ ପର୍ଯ୍ୟୟରେ । ୮ଟି ଟ୍ରମେଲ ଦ୍ବାରା ଘଣ୍ଟା ଏକ ଘଣ୍ଟାକୁ ୭୦ ରୁ ୮୦ ଟନନ୍ ବର୍ଜ୍ୟ ପ୍ରକ୍ରିୟାକରଣ ହେବ । ଏହି କାର୍ଯ୍ୟ ପ୍ରାୟ ୧୫ ଦିନ ମଧ୍ୟରେ ଶେଷ ହେବ । ଟ୍ରମେଲ୍ରେ ପୃଥକକୀରଣ କାର୍ଯ୍ୟ ଆରମ୍ଭ ହେଲ ୬ ରୁ ୭ ମାସ ମଧ୍ୟରେ ଅଳିଆଗଦା କମି ଆସିବ । ଏହାପରେ ପ୍ରତି ଦିନ ୨ ହଜାର ଟନ ପକ୍ରିୟାକରଣ ହେବ । ଓଦା ଓ ଶୁଖିଲା ଅଳିଆକୁ ଅଲଗା ଅଲଗା କରି ସଫେଇ ଗାଡିକୁ ଦେବାକୁ ଲୋକଙ୍କୁ ଅପିଲ କରିଛନ୍ତି କମିଶନର । ଯେଉଁମାନେ ପୃଥକୀକରଣକୁ ସହଯୋଗ କରୁନହାନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବ ବିଏମସି । ପଦକ୍ଷେପକୁ ସ୍ବାଗତ କରିଛନ୍ତି ଗାଡକଣ ବାସିନ୍ଦା ।
ପୁଅର ସ୍ବପ୍ନ ସାକାର କରିବା ପାଇଁ ମାଆର ସଂଘର୍ଷ
ସୁବର୍ଣ୍ଣପୁର: ହ୍ବିଲ ଚେୟାରରେ ବସି ସୁନ୍ଦର ଭବିଷ୍ୟତ ଗଢିବାର ଇଚ୍ଛା । ଶାରୀରିକ ଅକ୍ଷମତାକୁ ମାତ ଦେଇ ପାଠ ପଢିବାର ଝୁଙ୍କ। କିଏ ବ୍ରେନ ଷ୍ଟ୍ରୋକର ଶିକାର ହୋଇଛି ତ କାହାର ଶରୀର ଅଧା ଅଚଳ। ତଥାପି ପାଠ ପଢା ଜାରି ରହିଛି । ଠିକରେ ଚଲାବୁଲା କରିପାରୁନଥିବା ମହାକାଳପଡା ଏବଂ ସୁବର୍ଣ୍ଣପୁର ଡୁଙ୍ଗୁରିପାଲିର ଦୁଇ ଶିକ୍ଷାର୍ଥୀଙ୍କୁ ବ୍ୟାଟେରି ଚାଳିତ ହ୍ବିଲ ଚେୟାର ଯୋଗାଇଦେବାକୁ ପରିବାର ଲୋକଙ୍କ ଅନୁରୋଧ ।
ପୁଅର ଶିକ୍ଷା ପାଇଁ ମାଆର ସଂଘର୍ଷ । ଦାରିଦ୍ର୍ୟ ସତ୍ତ୍ଵେ ପୁଅକୁ ଭଲ ମଣିଷ କରିବାର ଜିଦ୍। ସ୍ଵପ୍ନ ଆଗରେ ତୁଚ୍ଛ ଲାଗୁଛି ସମସ୍ୟା । ସୁବର୍ଣ୍ଣପୁର ଡୁଙ୍ଗୁରିପାଲି ବ୍ଲକ ଚିଦାନନ୍ଦପଡ଼ାର ସୁଶୀଲ ବାଗ ଜନ୍ମରୁ ସେ ଦିବ୍ୟାଙ୍ଗ । ଦୁଇ ଗୋଡରେ ଚାଲି ପାରୁଛନ୍ତି ନା ଠିକରେ ଖାଇ ପାରୁଛନ୍ତି । ପ୍ରଥମ ଶ୍ରେଣୀରୁ କଲେଜ ପର୍ଯ୍ୟନ୍ତ ମା ପୁଅକୁ ହୁଇଲ ଚେୟାରରେ ନେବା ଆଣିବା କଲେ । ସ୍ଵାମୀ କବି ବାଗ ମାନସିକ ରୋଗରେ ଆକ୍ରାନ୍ତ । ସରକାରଙ୍କଠାରୁ ପାଉଥିବା ଚାଉଳ ଓ ଭତ୍ତା ଟଙ୍କାରେ ଚଳୁଛନ୍ତି ୩ ପ୍ରାଣୀ କୁଟୁମ୍ବ। ତଥାପି ଯେତେ କଷ୍ଟ ହେଉନା କାହିଁକି ପୁଅ ଭଲ ପଢ଼ି ଭଲ ମଣିଷ ଟିଏ ହେବ ବୋଲି ମାଆର ଇଚ୍ଛା । ପୁଅକୁ ସରକାରଙ୍କ ତରଫରୁ ଏକ ବ୍ୟାଟେରୀ ଚାଳିତ ଗାଡ଼ି ଯୋଗାଇ ଦିଆଗଲେ ଉପକୃତ ହୋଇପାରନ୍ତେ ବୋଲି ମାଆ କହିଛନ୍ତି ।
କେନ୍ଦ୍ରାପଡା ମହାକାଳପଡା ରାମଚନ୍ଦ୍ରପୁର ଗାଁର ମିତାଲି ଖଟୁଆ । ମସ୍ତିଷ୍କାଘାତ ବା ବ୍ରେନ୍ ଷ୍ଟୋକର ଶିକାର ହୋଇଥିଲେ। ମିତାଲିର ବାମପଟ ଗୋଡ ହାତ ଠିକ୍ ଭାବରେ କାମ କରୁନଥିଲା। ଯେଉଁଥିପାଇଁ ମିତାଲି ପୂର୍ବଭଳି ସ୍ବାଭାବିକ ଭାବରେ ଚଳପ୍ରଚଳ କରି ପାରିଲେନାହିଁ। କଷ୍ଟେମଷ୍ଟେ ୧୦ମ ବୋର୍ଡ ପରୀକ୍ଷା ଦେଇଥିଲେ । ଏବେ ସେ ଯୁକ୍ତ ଦୁଇ କଳାର ଶିକ୍ଷାର୍ଥୀ । ଜିଲ୍ଲା ପ୍ରଶାସନ ପକ୍ଷରୁ ଗୋଟିଏ ବ୍ୟାଟେରୀ ଚାଳିତ ତିନି ଚକିଆ ସାଇକେଲ ଯୋଗାଇ ଦିଆଗଲେ କଲେଜ ଯିବା ଆସିବା ପାଇଁ ମିତାଲିକୁ ସୁବିଧା ହୋଇ ପାରନ୍ତା ବୋଲି କହିଛନ୍ତି।
ଆସନ୍ତା ୨୧ ତାରିଖରୁ ବିଧାନସଭାର ଶୀତକାଳିନ ଅଧିବେଶନ
ଭୁବନେଶ୍ବର: ଷୋଡ଼ଶ ବିଧାନସଭାର ଚତୁର୍ଦ୍ଦଶ ଅଧିବେଶନ ଆସନ୍ତା ୨୧ ତାରିଖରୁ ଆରମ୍ଭ ହେବ । ଦିନ ୧୧ଟାରେ ଆରମ୍ଭ ହେବ ଶୀତକାଳିନ ଅଧିବେଶନ । ଶୀତକାଳିନ ଅଧିବେଶନ ଆରମ୍ଭ ହେବା ନେଇ ସୂଚନା ଦେଇଛନ୍ତି ବିଧାନସଭା ସଚିବ । ତେବେ ୨୧ ତାରିଖରୁ ଆରମ୍ଭ ହେବାକୁ ଥିବା ଏହି ଅଧିବେଶନ ଡିସେମ୍ବର ୩୦ ତାରିଖ ଯାଏ ଚାଲିବ । ପୂର୍ବ ଅଧିବେଶନ ସମୟରେ ବିରୋଧୀଙ୍କ ହଟ୍ଟଗୋଳ ପାଇଁ ଗୃହ ଅଧାଦିନ ମୁଲତବୀ ରହିଥିଲା ।
ଶ୍ରୀମନ୍ଦିର ରତ୍ନ ଭଣ୍ଡାରର ହେବ ଲେଜର ସ୍କାନିଂ
ପୁରୀ: କାର୍ତ୍ତିକ ପୂର୍ଣ୍ଣିମା ପରଦିନ ନଭେମ୍ବର ୨୮ ତାରିଖରେ ଶ୍ରୀମନ୍ଦିର ରତ୍ନଭଣ୍ଡାରର ଲେଜର ସ୍କାନିଂ କରାଯିବ । ପର୍ଯ୍ୟାୟ କ୍ରମେ ସ୍କାନିଂ କରିବାକୁ ନିଷ୍ପତ୍ତି ହୋଇଛି । ସ୍କାନିଂ ପରେ ବାହାର ରତ୍ନଭଣ୍ଡାରର ସ୍ଥିତି ଜଣାପଡ଼ିବ । ଫାଟ ଓ କେତେ ପରିମାଣରେ କ୍ଷତି ହୋଇଛି, ସେନେଇ ସ୍କାନିଂ ରିପୋର୍ଟରୁ ସୂଚନା ମିଳିବ । ଟେକ୍ନିକାଲ କମିଟି ସହ ଆଲୋଚନା ପରେ ଶ୍ରୀମନ୍ଦିର ପ୍ରଶାସନ ଏହି ନିଷ୍ପତ୍ତି ନେଇଛି । ରତ୍ନଭଣ୍ଡାର ବାହାର ପଟ କାନ୍ଥର ଲେଜର ସ୍କାନିଂ ପରେ ଆବଶ୍ୟକ ପଡ଼ିଲେ ଭିତର ରତ୍ନଭଣ୍ଡାର ଓ ପାର୍ଶ୍ଵ ଦେବଦେବୀଙ୍କ ମନ୍ଦିରର ମଧ୍ୟ ଲେଜର ସ୍କାନିଂ କରାଯିବ । ଲେଜର ସ୍କାନିଂ ପାଇଁ ଆବଶ୍ୟକ ସହଯୋଗ ଶ୍ରୀମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନ ଯୋଗାଇଦେବେ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ରଞ୍ଜନ କୁମାର ଦାସ ସୂଚନା ଦେଇଛନ୍ତି।
କୁଳଡିଆ ଅଭୟାରଣ୍ୟରେ ଜମୁଛି ପର୍ଯ୍ୟଟକଙ୍କ ଭିଡ଼
ବାଲେଶ୍ବର: ପ୍ରକୃତିର ମଜା ନେବାକୁ ଚାହୁଁଛନ୍ତି ? ଖୋଲିଛି ବାଲେଶ୍ୱର ନୀଳଗିରିର କୁଳଡିଆ ଅଭୟାରଣ୍ୟ। ପ୍ରାକୃତିକ ପରିବେଶ ସହିତ ବନ୍ୟଜନ୍ତୁଙ୍କୁ ଅତି ନିକଟରୁ ଦେଖିବାର ମିଳିବ ସୁଯୋଗ। ନଭେମ୍ବର ୧ରୁ ଖୋଲିଛି ଅଭୟାରଣ୍ୟ । ପ୍ରଥମ ଦିନରେ ପୁଷ୍ପ ଗୁଚ୍ଛ ଦେଇ ଏବଂ ମିଠା ଖୁଆଇ ପର୍ଯ୍ୟଟକଙ୍କୁ ସ୍ବାଗତ କରାଯାଇଥିଲା। ଅଭୟାରଣ୍ୟର ଆକର୍ଷଣ ସାଜିଛି ନେଚର୍ସ କ୍ୟାମ୍ପ । ମିଳିବ ବୋଟିଂର ସୁବିଧା।
ଚାରିଆଡେ ସବୁଜ ବନାନି। ଘଞ୍ଚ ଜଙ୍ଗଲକୁ ପକ୍ଷୀଙ୍କ କିଚିରି ମିଚିର ଶବ୍ଦ। ନେଚର କ୍ୟାମ୍ପରେ ରାତ୍ରିଯାପନର ମଜା । ଶୀତ ଋତୁ ଆରମ୍ଭରୁ ଏସବୁ ସୁବିଧା ମିଳିବ କୁଳଡିହା ଅଭୟାରଣ୍ୟ । ନଭେମ୍ବର ୧ରୁ ଖୋଲିଲାଣି ବାଲେଶ୍ୱର ନୀଳଗିରିର କୁଳଡିହା ଅଭୟାରଣ୍ୟ। ପରିବାର ସହ ସମୟ ବିତାଇବାକୁ ଏଠାକୁ ପହଞ୍ଚିଲେଣି ପର୍ଯ୍ୟଟକ । କିଏ ଖାଇବାରେ ବ୍ୟସ୍ତ ତ କିଏ ଫଟୋ ଉଠାଇବାରେ ଲାଗିଛି । ଅଭୟାରଣ୍ୟ ଖୋଲିବା ପରେ ପର୍ଯ୍ୟଟକଙ୍କୁ ପୁଷ୍ପଗୁଚ୍ଛ ଏବଂ ମିଠା ଖୁଆଇ ସ୍ଵାଗତ କରାଯାଇଥିଲା । ଅଭୟାରଣ୍ୟ ମଧ୍ୟରେ ରହିଛି ନେଚର୍ସ ପାର୍କ, ୯ଟି ଟେଣ୍ଟ ହାଉସ୍।
ଦୀର୍ଘ ସାଢ଼େ ଚାରି ମାସ ପରେ ପର୍ଯ୍ୟଟକଙ୍କ ପାଇଁ ଅଭୟାରଣ୍ୟ ଖୋଲାଯିବା ପରେ ପର୍ଯ୍ୟଟକଙ୍କ ଭିତରେ ବେଶ୍ ଉତ୍ସାହ ଦେଖିବାକୁ ମିଳିଛି। ଅଭୟାରଣ୍ୟରେ ବିଭିନ୍ନ ବନ୍ୟଜନ୍ତୁ ପର୍ଯ୍ୟଟକଙ୍କ ଆକର୍ଷଣ ସାଜିଛନ୍ତି। ଭାଲୁ, ବାଘ, ହାତୀ, କୁଟୁରା, ହରିଣ, ସମ୍ବର, ବାରା ଆଦି ବନ୍ୟଜନ୍ତୁ ସମେତ ଶୁଆ, ଶାରୀ, ଚିଲ, ମୟୂର, କୁଚିଳାଖାଈ ସହ ବହୁ ବିଦେଶୀ ପକ୍ଷୀ ମଧ୍ୟ ଏଠାରେ ଦେଖିବାକୁ ମିଳନ୍ତି। ବ୍ୟସ୍ତବହୁଳ ଜୀବନରୁ ଟିକେ ସମୟ କାଢି ଏଠାକୁ ଆସି ଲୋକେ ଶାନ୍ତିରେ ପ୍ରକୃତିକୁ ମନ ଭରି ଉପଭୋଗ କରନ୍ତି ।
ଇସ୍ରୋ ଚିଫ୍ ଏସ୍. ସୋମନାଥଙ୍କ ଜୀବନ ଉପରେ ଅଧାରିତ ପୁସ୍ତକକୁ ନେଇ ବିବାଦ ! କେ. ଶିଭନଙ୍କ ସମ୍ପର୍କରେ ଲେଖିଛନ୍ତି ଏଭଳି କଥା..
ନୂଆଦିଲ୍ଲୀ: ଇସ୍ରୋ ଚିଫ୍ ଏସ.ସୋମନାଥଙ୍କ ଜୀବନକୁ ଉପରେ ଆାଧାରିତ ପୁସ୍ତକ ’ନୀଲାବୁ କୁଡିଚା ସିମଗଲ’ରେ ପୂର୍ବତନ ଇସ୍ରୋ ମୁଖ୍ୟ କେ. ଶିଭମଙ୍କୁ ନେଇ ଅଭିଯୋଗ ଆଣିଛନ୍ତି ଏସ. ସୋମନାଥ । ଏହି ପୁସ୍ତକରେ ଲେଖା ଆଛି ଶିଭମ ଚାହୁଁ ନଥିଲେ ସୋମନାଥ ଇସ୍ରୋ ମୁଖ୍ୟ ବନନ୍ତୁ । ଏହାସହ ସେ ଚିଫ୍ ବନିବାରେ ମଧ୍ୟ ବାଧା ସୃଷ୍ଟି କରିଥିବା ପୁସ୍ତକରେ ପ୍ରକାଶ ପାଇଥିବା କୁହାଯାଉଛି। ଯାହାକୁ ନେଇ ଦକ୍ଷିଣ ଭାରତୀୟ ଗଣମାଧ୍ୟମରେ ଚର୍ଚ୍ଚାର ବିଷୟ ପାଲଟିଛି । ତେବେ ଏହାକୁ ନେଇ ସୋମନାଥଙ୍କୁ ଗଣମାଧ୍ୟମ ପ୍ରତିନିଧି ପ୍ରଶ୍ନ କରାଯାଇଥିବାବେଳେ ସେ କହିଛନ୍ତି କି, କୌଣସି ଉଚ୍ଚ ପଦ ଅଧିକାର କରିବା ପୂର୍ବରୁ ବହୁ ବାଧା ବିଘ୍ନକୁ ସାମନା କରିବାକୁ ପଡ଼ିବ । ମୋ ଜୀବନରେ ଘଟିଥିବା ଘଟଣାକୁ ଏହି ପୁସ୍ତକରେ ବର୍ଣ୍ଣନା କରିଛି । ମୁଁ କୌଣସି ବ୍ୟକ୍ତି ବିଶେଷଙ୍କୁ ଟାର୍ଗେଟ କରିନାହିଁ । ଚନ୍ଦ୍ରଯାନ-୨ ବିଫଳ ହେବାର ମୁଖ୍ୟ କାରଣ ହେଉଛି ଏହା ଉପରେ ସମସ୍ତ ପରୀକ୍ଷା କରାଯାଇନଥିଲା । କାହାକୁ ସମାଲୋଚନା କରାଯିବା ପାଇଁ ଏହି ପୁସ୍ତକ ରଚନା କରାଯାଇନାହିଁ ବୋଲି ସେ ପ୍ରକାଶ କରିଥିବାବେଳେ ଖୁବଶୀଘ୍ର ଏହା ବଜାରକୁ ଆସିବ ବୋଲି ପ୍ରତିକ୍ରିୟା ରଖିଛନ୍ତି ।
କାହା ସ୍ବାର୍ଥରେ ଶବ ରାଜନୀତି?
ଭୁବନେଶ୍ବର: ଗଣମାଧ୍ୟମର ଦାୟିତ୍ୱ ହେଉଛି ସତ ସାମ୍ନାକୁ ଆଣିବା । କିନ୍ତୁ କିଛି ଗଣମାଧ୍ୟମ ଖବରକୁ ରୋଚକ କରିବା ବା ଉଦ୍ଦେଶ୍ୟମୂଳକ ଭାବେ ଟାର୍ଗେଟ କରି ମିଛ ଖବର ପ୍ରକାଶ କରିବା ଭଳି ଘଟଣା ସାମ୍ନାକୁ ଆସିଛି । ଗୋଟିଏ ଗାଡି ଦୁର୍ଘଟଣାକୁ ନେଇ ଏବେ ଚର୍ଚ୍ଚା ବଢ଼ିବାରେ ଲାଗିଛି । ଗତ ୩୧ ତାରିଖ ଅପରାହ୍ନ ୩ଟା ୩୦ ମିନିଟ୍ । ଭୁବନେଶ୍ବର ୟୁନିଟ ୮ ପଟୁ ଆସି ନଅ ତାଲା ପଟକୁ ଯିବାକୁ ପାୱାର୍ ହାଉସ ଟ୍ରାଫିକରେ ଛିଡା ହୋଇଥାଏ ଏକ କଳା ରଙ୍ଗର ରେଞ୍ଜ ରୋଭର । ଠିକ ସେହି ସମୟରେ ଗ୍ରୀନ ସିଗନାଲ ଥିବା ବେଳେ କମିଶନରେଟ ପୋଲିସ ମୁଖ୍ୟାଳୟ ପଟୁ ରାଜଭବନ ଆଡକୁ ଯାଉଥିଲା ଗୋଟିଏ ପଲସର ବାଇକ । ହଠାତ ସେହି ସମୟରେ ରେଞ୍ଜ ରୋଭର ପଛ ପଟେ ସାଇରନ ଦେଇ ଆସି ଲାଗିଥିଲା ଗୋଟିଏ ଆମ୍ବୁଲାନ୍ସ । ଟ୍ରାଫିକ ପୋଷ୍ଟରେ ଥିବା କନଷ୍ଟେବଳ ଆମ୍ବୁଲାନ୍ସକୁ ସାଇଡ ଦେବାକୁ ଇସାରା ଦେଇଥିଲେ ।
କିନ୍ତୁ ସାଇଡ଼ ହେବାକୁ ରାସ୍ତା ନଥିବାରୁ ଆଗକୁ ଚାଲି ଆସିଥିଲେ ରେଞ୍ଜରୋଭର ଡ୍ରାଇଭର । ଫଳରେ ରାଜଭବନ ପଟକୁ ଯାଉଥିବା ଏହି ପଲସର ଦୁର୍ଘଟଣା ଗ୍ରସ୍ତ ହୋଇଥିଲା । ବାଇକ ଚାଳକ କାହ୍ନୁ ଚରଣ ନାୟକ ଓ ସାଙ୍ଗରେ ଥିବା ସମ୍ପର୍କୀୟ ଲୋପାମୁଦ୍ରା ସାହୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି ହୋଇଥିଲେ । ଚିକିତ୍ସାଧୀନ ଅବସ୍ଥାରେ ଗତକାଲି ଲୋପାମୁଦ୍ରାଙ୍କ ମୃତ୍ୟୁ ହୋଇଛି । ମୃତ୍ୟୁ ପରେ ଲୋପାମୁଦ୍ରାଙ୍କ ଅଙ୍ଗଦାନ କରିଛନ୍ତି ତାଙ୍କ ପରିବାର । ବର୍ତ୍ତମାନ କାହ୍ନୁଚରଣ ସୁସ୍ଥ ଥିବା କହିଛନ୍ତି ଡାକ୍ତର । ଘଟଣା ଦିନ କ୍ୟାପିଟାଲ ଥାନା ପୋଲିସ ଗାଡିଟିକୁ ସିଜ କରିଥିଲା । ଗାଡି ଡ୍ରାଇଭର ସୌଭାଗ୍ୟ କୁମାର ବାଗକୁ କେସ ନମ୍ବର ୬୪୩ ଦଫା ୨୭୯,୩୩୭, ୩୩୮, ୧୮୪ MV ଆକ୍ଟ ରେ କୋର୍ଟ ଚାଲାଣ କରିଥିଲା । ଏ ହେଉଛି କମିଶନରେଟ ପୋଲିସ ପକ୍ଷରୁ ଜାରି ହୋଇଥିବା ପ୍ରେସ ରିଲିଜ ।
ଆଉ ହେଉଛି ପୋଲିସ ପିଆରଓ ଙ୍କର କିଛି ସମୟ ପରର କ୍ଲାରିଫିକେସନ । ପ୍ରଥମେ ଜାରି ହୋଇଥିବା ରିଲିଜ ରେଞ୍ଜରୋଭରର ନମ୍ବର OD 33 AF 6726 ବୋଲି ଲେଖାଯାଇଥିଲା । ଯାହା ଏକ ଟାଇପିଂ ମିଷ୍ଟେକ ବୋଲି କିଛି ସମୟ ପରେ କ୍ଲାରିଫାଏ କରିଥିଲେ ପିଆରଓ । କିନ୍ତୁ କିଛି ଗଣମାଧ୍ୟମ କିଛି ନବୁଝି ଖବରକୁ ରୋଚକ କରିବା ଆଶାରେ ବିଭ୍ରାନ୍ତିକର ଖବର ପ୍ରକାଶ କରିଥିଲେ । RTO ତଥ୍ୟ ମୁତାବକ ରେଞ୍ଜରୋଭର ଗାଡି ନଂ ଓଡି-୨୩-କେ- ୦୦୦୬ର ମାଲିକାନା ଝାରସୁଗୁଡାର ଆର୍ମର-ରେ ଭେଂଚର୍ସ ପ୍ରାଇଭେଟ୍ ଲିମିଟେଡ୍ ନାଁରେ ରହିଛି । ଆଇନ ଅନୁଯାୟୀ ଅଭିଯୁକ୍ତ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ହୋଇଛି । ଯେହେତୁ ଝାରସୁଗୁଡାର ଆର୍ମର-ରେ ଭେଂଚର୍ସ ପ୍ରାଇଭେଟ୍ ଲିମିଟେଡ୍ ର ନିର୍ଦ୍ଦେଶକ ଦିବଂଗତ ନେତା ନବ ଦାସଙ୍କ ପୁଅ ବିଶାଲ ଦାସ ରହିଛନ୍ତି, ତେଣୁ ଗୋଟିଏ ପଲିଟିକାଲ ଷ୍ଟଣ୍ଟ ଚାଲିଥିବା ଘଟଣା ନଜରକୁ ଆସିଛି ।

