ନନ୍ଦିଘୋଷ ବ୍ୟୁରୋ: ବାହାନଗା ଟ୍ରେନ ଟ୍ରାଜେଡି ମାମଲାରେ ଚାର୍ଜସିଟ୍ ଦାଖଲ କରିଛି ସିବିଆଇ । ଗିରଫ ୩ରେଳ ଅଧିକାରୀଙ୍କ ବିରୋଧରେ ଚାର୍ଜସିଟ୍ । ଏହି ତିନି ଜଣଙ୍କ ଉପରେ ଦାୟିତ୍ୱହୀନତା ଏବଂ ପ୍ରମାଣ ନଷ୍ଟ ନେଇ ଆରୋପ ରହିଛି । ଏମାନଙ୍କୁ ଜୁଲାଇ ମାସରେ ଗିରଫ କରାଯାଇଥିଲା । ଆଇପିସିର ଦଫା ୩୦୪(୨), ୩୪ରେ ଚାର୍ଜସିଟ୍ । ୧୯୮୯ ରେଲୱେ ଆକ୍ଟ ୧୫୩ ଧାରାରେ ଚାର୍ଜସିଟ୍ । ସିଗନାଲ ଇନଚାର୍ଜ ଅରୁଣ କୁମାର ମହାନ୍ତଙ୍କ, ସୋରୋ ଏସଏସଇ(ସିଗନାଲ) ମହମ୍ମଦ ଅମୀର ଖାନ ଏବଂ ଟେକ୍ନିସିଆନ ପପ୍ପୁ କୁମାରଙ୍କ ନାଁରେ ଚାର୍ଜସିଟ୍ ଦାଖଲ କରିଛି ସିବିଆଇ । ଉଲ୍ଲେଖଯୋଗ୍ୟ, ଗତ ଜୁନ୍ ୨ ତାରିଖରେ ବାଲେଶ୍ୱରର ବାହାନଗା ଷ୍ଟେସନ ପାଖରେ ଟ୍ରେନ୍ ଦୁର୍ଘଟଣା ହୋଇଥିଲା । ଏହି ଦୁର୍ଘଟଣାରେ ୨୯୩ ଜଣଙ୍କ ମୃତ୍ୟୁ ହୋଇଥିଲା ।
ଜଙ୍ଗଲରେ ଜମୁଛି ଜୁଆର ଆସର, ଉଡୁଛି ଲକ୍ଷ ଲକ୍ଷ ଟଙ୍କା
ରାଉରକେଲା: ଜଙ୍ଗଲରେ ଜମୁଛି ଜୁଆର ଆସର । ଉଡୁଛି ଲକ୍ଷ ଲକ୍ଷ ଟଙ୍କା । କିଏ ଜିତୁଛି ତ କିଏ ହରାଉଛି ସର୍ବସ୍ୱ । ଜୁଆ ପାଇଁ ବଢୁଛି ଅପରାଧୀକ କାର୍ଯ୍ୟ । ଚଢାଉ କରି ୮ ଜୁଆଡ଼ିଙ୍କୁ ଗିରଫ ପରେ ଖୋଲୁଛି ଗୁମର । ରାଉରକେଲା ସରକାରୀ ସ୍ବୟଂ ଶାସିତ ମହାବିଦ୍ୟାଳୟ ପଛପଟ ଜଙ୍ଗଲରେ ଚାଲିଥିବା ଜୁଆ ଆଡ୍ଡାରେ ରଘୁନାଥପାଲି ଥାନା ପୋଲିସ ପକ୍ଷରୁ ଚଢ଼ାଉ । ୮ ଜଣ ଜୁଆଡିଙ୍କୁ ଗିରଫ କଲା ପୋଲିସ । ଗିରଫ ଜୁଆଡିଙ୍କ ନିକଟରୁ ଜୁଆରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରାଯିବା ସହ ନଗଦ ୬୬ ହଜାର ଟଙ୍କା, ୮ ଟି ବାଇକ ଓ ୫ ଟି ମୋବାଇଲ ଫୋନ ଜବତ କରାଯାଇଛି । ତେବେ ଏହି ଜୁଆ କାରବାର କିଏ କରୁଥିଲେ ଓ କିଏ କିଏ ସମ୍ପୃକ୍ତ ଅଛନ୍ତି ସେନେଇ ପୋଲିସ ପକ୍ଷରୁ ଅଧିକ ତଦନ୍ତ ଆରମ୍ଭ ହୋଇଛି ।
ରାଉରକେଲା ସହର ସମେତ ସୁନ୍ଦରଗଡ଼ ଜିଲ୍ଲାର ବିଭିନ୍ନ ସ୍ଥାନରେ ଜୁଆ ଆଡ୍ଡା ଚାଲିଥିବା ଅଭିଯୋଗ ହେଉଛି । କେଉଁଠି କୁକୁଡା ଲଢେଇ ଜରିଆରେ ଜୁଆ କାରବାର ହେଉଥିବା ବେଳେ ଆଉ କେଉଁଠି ତାସ ଓ ଘୁଡୁଘୁଡିପଟିରେ ଚାଲିଛି ଜୁଆ ଚାଲୁଥିବା ଅଭିଯୋଗ ଆସୁଛି । ଜୁନ ୧୫ ତାରିଖ ରାଜଗାଙ୍ଗପୁର ଥାନା ପୋଲିସ ଡୁଡକାବାହାଲ ଗ୍ରାମରେ ଚାଲିଥିବା ଜୁଆ ଆଡ୍ଡାରେ ଚଢ଼ାଉ କରି ୫୨ ଜଣଙ୍କୁ ଗିରଫ କରିବା ସହ ଗୋଟିଏ ୪ ଚକିଆ ଗାଡି, ୫୫ଟି ବାଇକ ଓ ୩୩ ହଜାର ଟଙ୍କା ଜବତ କରିଥିଲା ପୋଲିସ୍ ।
ଚାଇନାରେ ସାଇକ୍ଲୋନ ‘ସାଓଲା’ର ତାଣ୍ଡବ, ୯ ଲକ୍ଷ ଲୋକଙ୍କୁ ସ୍ଥାନାନ୍ତର
ନନ୍ଦିଘୋଷ ବ୍ୟୁରୋ : ସାଇକ୍ଲୋନ ସାଓଲା ଚାଇନାରେ ତାଣ୍ଡବ ରଚିଛି । ଦକ୍ଷିଣ ଗୁଆଙ୍ଗଡୋଙ୍ଗ୍ ପ୍ରଦେଶରେ ଘୁର୍ଣ୍ଣିବଳୟ ହେବା ଫଳରେ ଭୟଙ୍କର ପବନ ସବୁକିଛି ଛାରଖାର କରିଛି । ଏହାର ଆଖପାଖ ହଂକଂ, ଶେନଜେନ୍ ଏବଂ ମାକାଉରେ ଏହାର ପ୍ରଭାବ ପଡିଛି | ୯ ଲକ୍ଷ ଲୋକଙ୍କୁ ସ୍ଥାନାନ୍ତର କରିବାକୁ ପଡ଼ିଛି । ଅନେକ ଅଞ୍ଚଳ ପାଣିରେ ବୁଡ଼ି ରହିଛ । ବିଦ୍ୟୁତ୍ ଓ ଜଳ ସମସ୍ୟା ଉପୁଜିଛି । ହଂକଂ ଏବଂ ଅନ୍ୟାନ୍ୟ ପ୍ରଦେଶରେ ବିମାନ ଉଡ଼ାଣ ବାତିଲ କରାଯାଇଥିଲା, ସ୍କୁଲ ବନ୍ଦ ହୋଇଯାଇଥିଲା ଏବଂ ବ୍ୟବସାୟ ଏକ ପ୍ରକାର ଠପ ହୋଇଯାଇଥିଲା । ସ୍ଥଳଭାଗରେ ଲ୍ୟାଣ୍ଡଫଲ କରିବା ପୂର୍ବରୁ ଘଣ୍ଟା ପ୍ରତି ୨୦୦ କିଲୋମିଟର ଥିଲା | ଗୁଆଙ୍ଗଡୋଙ୍ଗ ଏବଂ ଫୁଜିଆନ୍ ପ୍ରଦେଶରେ ସର୍ବାଧିକ କ୍ଷତି ଘଟିଛି। ଲ୍ୟାଣ୍ଡଫଲ ପର୍ବରୁ ସାଇକ୍ଲୋନ୍ ଦୁର୍ବଳ ହୋଇଯାଇଥିଲା। ଚାଇନାରେ ଅବତରଣ ପୂର୍ବରୁ ହଂକଂରେ ସାଇକ୍ଲୋନ ଗତି ଅତ୍ୟଧିକ ଥିଲା । ସହରର ପାଣିପାଗ ବିଭାଗ କହିଛି ଯେ ସହରର ଅନେକ ଅଞ୍ଚଳ ପାଣିରେ ବୁଡି ରହିଛି ।
ଚାଇନାର ଗୁଆଙ୍ଗଡୋଙ୍ଗ, ଶେନଜେନ୍, ମାକାଉ ଏବଂ ଏହାର ଆଖପାଖ ପ୍ରଦେଶରେ ଅନେକ ଘର ନଷ୍ଟ ହୋଇଯାଇଛି । ଦ୍ରୁତ ଗତିରେ ମାଡ଼ିଅାସିଥିବା ଫଳରେ ଶହ ଶହ ଗଛ ଉପୁଡ଼ି ଯାଇଥିଲା । ହଂକଂର କାଉସୱେ ବାଇ ଜିଲ୍ଲାରେ ଅନେକ ଅଟ୍ଟାଳିକା ନଷ୍ଟ ହୋଇଯାଇଛି। ବିଶ୍ୱର ସବୁଠୁ ବଡ ଜୁଆ ଖେଳ ହବ ମାକାଉରେ ଶୁକ୍ରବାର ରାତିରେ ବନ୍ଦ ହେବା ପରେ ଶନିବାର ସକାଳ ୮ ଟାରୁ କାଜିନୋ ଖୋଲିବାକୁ ଅନୁମତି ଦିଆଯାଇଛି ବୋଲି ସ୍ଥାନୀୟ ପ୍ରଶାସନ କହିଛନ୍ତି। ଚୀନ୍ ଅଧିକାରୀ କହିଛନ୍ତି ଯେ ଗୁଆଙ୍ଗଡୋଙ୍ଗର ଜୁହୁ ସହରରେ ସାଓଲା ଘଣ୍ଟା ପ୍ରତି ୧୬୦ କିଲୋମିଟର ବେଗରେ ପବନ ବହିଥିଲା ଏବଂ ଏଠାରେ ଅନେକ ଅଞ୍ଚଳରେ ଭୂସ୍ଖଳନ ଘଟିଥିବାର ସୂଚନା ମିଳିଛି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁସାରେ ଗୁଆଙ୍ଗଡୋଙ୍ଗର ଶେନଜେନ୍ ସହରରେ ଏକ ଗଛ ଖସି ପଡ଼ି ତାଙ୍କ ଗାଡିକୁ ଧକ୍କା ଦେବା ପରେ ଜଣଙ୍କର ମୃତ୍ୟୁ ଘଟିଛି। ଚୀନ୍ ରେଳବାଇ କହିଛି ଯେ ଗୁଆଙ୍ଗଡୋଙ୍ଗରେ ରେଳ ଚଳାଚଳ ସ୍ଥାନୀୟ ସମୟ ସକାଳ ୮:30 ରୁ ଧୀରେ ଧୀରେ ପୁନଃ କାର୍ଯ୍ୟ ଆରମ୍ଭ କରିବାକୁ ଅନୁମତି ଦିଆଯାଇଛି। ବାତ୍ୟା ଆଶଙ୍କା ଥିବାରୁ ଏଠାରେ ରେଳ ଚଳାଚଳ ଉପରେ ପ୍ରତିବନ୍ଧକ ଲଗାଯାଇଥିଲା। 
ଶେନଜେନର ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ ସାଇକ୍ଲୋନ ସାଓଲା ଫଳରେ ଏଠାରେ ରେଡ୍ ଆଲର୍ଟ ଜାରି କରାଯାଇଥିଲା। ବର୍ତ୍ତମାନ ଏହାକୁ ହଳଦିଆ ଆଲର୍ଟରେ ପରିଣତ କରାଯାଇଛି | ବର୍ଷା ଏବଂ ଭୟ ଆଶଙ୍କା ପ୍ରାୟ ହଟିଛି ତଥାପି ଲୋକଙ୍କୁ ଘରେ ରହିବାକୁ ପରାମର୍ଶ ଦିଆଯାଇଛି। ବର୍ତ୍ତମାନ ତାଇୱାନ ବିପଦରେ,ଏଠାରେ କିଛି ବିମାନ ବାତିଲ କରିବାକୁ ପଡ଼ିଛି | ଆସନ୍ତା ସପ୍ତାହରେ ଏଠାରେ ପ୍ରବଳ ବର୍ଷା ହେବାର ଆଶଙ୍କା ରହିଛି । ଏଠାରେ ଲୋକଙ୍କୁ ସମୁଦ୍ର ଉପକୂଳ ଏବଂ ପାର୍ବତ୍ୟ ଅଞ୍ଚଳଠାରୁ ଦୂରରେ ରହିବାକୁ ଚେତାବନୀ ଦିଆଯାଇଛି।
ସଙ୍କଟମୋଚକ ସାଜିଛନ୍ତି ଓଡ୍ରାଫ ଓ ଅଗ୍ନିଶମ ଟିମ୍, ପ୍ରାକୃତିକ ବିପର୍ଯ୍ୟୟ ବେଳେ ଜୀବନକୁ ବାଜି ଲଗାଇ ଉଦ୍ଧାର କାର୍ଯ୍ୟ
ଭୁବନେଶ୍ୱର: ସଙ୍କଟମୋଚକ ଓଡ୍ରାଫ ଓ ଅଗ୍ନିଶମ ଟିମ୍ । ପ୍ରତି ପରିସ୍ଥିତିରେ ସହାୟତା ପାଇଁ ତୟାର । ବନ୍ୟା ହେଉ କି ବାତ୍ୟା, ଜୀବନ ରକ୍ଷା ପାଇଁ ଜୀବନକୁ ଲଗାନ୍ତି ବାଜି । ବାହାର ରାଜ୍ୟରେ ମଧ୍ୟ ଜୀବନ ବଞ୍ଚାଇ ସୃଷ୍ଟି କରିଛନ୍ତି ଉଦାହରଣ । ଏଥିପାଇଁ ସେମାନଙ୍କୁ ଦିଆଯାଏ ମିଳିତ ଫିଲ୍ଡ ଟ୍ରେନିଂ ଓ ଏକ୍ସରସାଇଜ । ବିଶେଷକରି ରାଜ୍ୟରେ ବନ୍ୟା ସମୟରେ କିଭଳି ରେସକ୍ୟୁ ଅପରେସନ କରାଯିବ, ପ୍ରଖର ସ୍ରୋତରେ କିପରି ବୋଟ୍ ଚଳାଯିବ, ଲୋକଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ଆଣିବା ସହ ରିଲିଫ ସାମଗ୍ରୀ କିଭଳି ଯୋଗାଇ ଦିଆଯିବ ସେଥିପାଇଁ ଭିନ୍ନ ଭିନ୍ନ କୌଶଳର ପ୍ରଶିକ୍ଷଣ ନେଉଛନ୍ତି ୪୦ ଜଣ ଯବାନ । କଟକର ନରାଜ ଓ ଧବଳେଶ୍ବର ଗଡ଼ାରେ ଆୟୋଜିତ ଟ୍ରେନିଂ ସେସନରେ ରବର ବୋଟ, OBM, ଡେଭିଡ ସିଷ୍ଟମ ଓ RDS ଭଳି ଅତ୍ୟାଧୁନିକ ଯନ୍ତ୍ରପାତି ସହ ରାଜ୍ୟର ୨୦ଟି ଓଡ୍ରାଫ ୟୁନିଟରୁ ୨୫ ଜଣ ଓ ଭିନ୍ନ ଭିନ୍ନ ଫାୟାର ଷ୍ଟେସନର ୧୫ ଜଣ ଯବାନ ସାମିଲ ହୋଇଛନ୍ତି ଏହି ସ୍ୱତନ୍ତ୍ର ରେସକ୍ୟୁ ଅପରେସନ ଟ୍ରେନିଂରେ ।
ରାଜ୍ୟକୁ ଅନେକ ପ୍ରାକୃତିକ ବିପର୍ଯ୍ୟୟର ସାମ୍ନା କରିଛି । ରାଜ୍ୟ ସରକାରଙ୍କ ଜିରୋ କାଜୁଆଲଟିକୁ ସାକାର କରିଛନ୍ତି ଏହି ଉଦ୍ଧାରକାରୀ ଦଳ । ଖାସ କରି ବନ୍ୟା ସମୟରେ ଏମାନଙ୍କ ସାମ୍ନାରେ ଥାଏ ଅନେକ ଚାଲେଞ୍ଜ । ସେଥିପାଇଁ କେବଳ ଦିନ ନୁହଁ ବରଂ ରାତିର ଅନ୍ଧକାର ଭିତରେ ପ୍ରତିକୂଳ ପରିସ୍ଥିତିର ସାମ୍ନା କରି କିଭଳି ଉଦ୍ଧାର କାର୍ଯ୍ୟ କରାଯାଇ ପାରିବ ସେନେଇ ବି ରାତିରେ ସେମାନଙ୍କୁ ଦିଆଯାଉଛି ପ୍ରଶିକ୍ଷଣ । GPS କୋଡ଼ିଂ ସାହାଯ୍ୟରେ ପାଣି ଭିତରେ କିଭଳି ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ପହଞ୍ଚି ଲୋକଙ୍କୁ ଉଦ୍ଧାର କରାଯାଇ ପାରିବ ସେଥିପାଇଁ ୧୫ ଦିନ ଧରି ଦିଆଯାଇଛି ସ୍ୱତନ୍ତ୍ର ତାଲିମ । ଆଗକୁ ତାଲିମ କାର୍ଯ୍ୟକ୍ରମରେ ଅଧିକ ଯବାନ ସାମିଲ ହେବା ନେଇ ଯୋଜନା ରହିଛି ।
ଚନ୍ଦ୍ରରେ ଶାନ୍ତିରେ ଶୋଇବେ ବିକ୍ରମ ଏବଂ ପ୍ରଜ୍ଞାନ, ଶେଷ ପର୍ଯ୍ୟାୟ କାର୍ଯ୍ୟ ଜାରି
ନୂଆଦିଲ୍ଲୀ: ଚନ୍ଦ୍ରର ଅନୁସନ୍ଧାନରେ ଭାରତର ଚନ୍ଦ୍ରଯାନ-୩ ମିଶନ ଆଉ ଏକ ଉଲ୍ଲେଖନୀୟ ସଫଳତା ହାସଲ କରିଛି । ରୋଭର ପ୍ରଜ୍ଞାନ ଚନ୍ଦ୍ରପୃଷ୍ଠରେ ସଫଳତା ପୂର୍ବକ ୧୦୦ ମିଟର ଦୂରତା ନିର୍ଦ୍ଧାରିତ କରିଛି । ଏହି ଉପଲବ୍ଧି ସେବେ ଆସିଛି ଯେବେ ଭାରତୀୟ ମହାକାଶ ଅନୁସନ୍ଧାନ ସଂଗଠନ (ଇସ୍ରୋ) ଚନ୍ଦ୍ରରେ ସୂର୍ଯ୍ୟର ଆଲୋକ କମ ହେବା କାରଣରୁ ବିକ୍ରମ ଲ୍ୟାଣ୍ଡର ଏବଂ ପ୍ରଜ୍ଞାନ ରୋଭର ଉଭୟଙ୍କୁ ସ୍ଲିପ ମୋଡରେ ରଖିବା ନେଇ ପ୍ରସ୍ତୁତି କରୁଛି । ଅର୍ଥାତ ଚନ୍ଦ୍ରରେ ଥିବା ଚନ୍ଦ୍ରଯାନ-୩ ମିଶନର ଉଭୟ ଅଂଶ ଶାନ୍ତିରେ ଶୋଇବାକୁ ପ୍ରସ୍ତୁତ ଅଛନ୍ତି । ଇସ୍ରୋ ମୁଖ୍ୟ ଏସ୍ ସୋମନାଥ ଭାରତର ପ୍ରଥମ ସୂର୍ଯ୍ୟ ମିଶନର ସଫଳ ଲଞ୍ଚ ପରେ ଏହାର ଘୋଷଣା କରିଛନ୍ତି ।
ଇସ୍ରୋ ମୁଖ୍ୟ ଏସ୍ ସୋମନାଥ ଶନିବାର କହଛନ୍ତି ଚନ୍ଦ୍ରକୁ ପଠାଯାଇଥିବା ଚନ୍ଦ୍ରଯାନ-୩ର ରୋଭର ଏବଂ ଲ୍ୟାଣ୍ଡର ସଠିକ ଭାବେ କାମ କରୁଛି ଏବଂ ଯେହେତୁ ଚନ୍ଦ୍ରରେ ଏବେ ରାତି ହୋଇଯିବ ଏଥିପାଇଁ ଏହାକୁ ନିଷ୍କ୍ରିୟ କରାଯିବ । ସୋମନାଥ କହିଛନ୍ତି ଲ୍ୟାଣ୍ଡର ବିକ୍ରମ ଏବଂ ରୋଭର ପ୍ରଜ୍ଞାନ ଏବେ ବି କାମ କରୁଛନ୍ତି । ସେ କହିଛନ୍ତି ଯେ, ଭଲ ଖବର ଏହା ଯେ ଲ୍ୟାଣ୍ଡରରୁ ରୋଭର ଅତିକମରେ ୧୦୦ ମିଟର ଦୂରତା ନିର୍ଦ୍ଧାରିତ କରିଛି ଏବଂ ଆମେ ଆସନ୍ତା ଗୋଟିଏ କିମ୍ବା ଦୁଇଦିନରେ ଉଭୟଙ୍କୁ ନିଷ୍କ୍ରିୟ କରିବାର ପ୍ରକ୍ରିୟା ଆରମ୍ଭ କରିବାକୁ ଯାଉଛୁ, କାରଣ ସେଠାରେ ରାତି ହେବାକୁ ଯାଉଛି ।
୧୪ ଜୁଲାଇ ୨୦୨୩ରେ ସତୀଶ ଧୱନ ସ୍ପେଶ ସେଣ୍ଟରରୁ ଲଞ୍ଚ କରାଯାଇଥିବା ଚନ୍ଦ୍ରଯାନ-୩ ଭାରତକୁ ଚନ୍ଦ୍ରପୃଷ୍ଠରେ ସଫଳତାପୂର୍ବକ ଅବତରଣ କରିବାରେ ଚତୁର୍ଥ ଦେଶ ଏବଂ ଚନ୍ଦ୍ରର ଦକ୍ଷିଣ ଧ୍ରୁବ ପାଖରେ ଏପରି କରିବରେ ପ୍ରଥମ ଦେଶ ବନାଇଥିଲା । ମିଶନର ପ୍ରାଥମିକ ଉଦ୍ଦେଶ୍ୟ ପାଣିର ଅନ୍ନେଶ୍ୱଣ କରିବା ଏବଂ ଚନ୍ଦ୍ର ପୃଷ୍ଠର ବିଶେଷତ୍ୱକୁ ଅଧ୍ୟୟନ କରିବା ଥିଲା । ଏହା ପୂର୍ବରୁ ଇସ୍ରୋ କହିଥିଲା ଯେ ଚନ୍ଦ୍ରଯାନ-୩ ମିଶନର ରୋଭର ପ୍ରଜ୍ଞାନରେ ଲାଗିଥିବା ଅନ୍ୟ ଏକ ଉପକରଣ ମଧ୍ୟ ଭିନ୍ନ ଏକ ଜ୍ଞାନକୌଶଳର ଉପଯୋଗ କରି ଚନ୍ଦ୍ରରେ ସଲଫରର ଉପସ୍ଥିତି ନେଇ ଅନୁସନ୍ଧାନ କରିଥିଲା । ଏଥିିସହିତ ଅନ୍ୟ କିଛି ଏଲିମେଣ୍ଟ ଥିବା ନେଇ ମଧ୍ୟ ଲ୍ୟାଣ୍ଡର ସନ୍ଧାନ ପାଇଥିଲା ।
ଖୋଲିଲା NRI କୋଟାରେ ଆଡମିଶନ ଠକେଇ, ଦୁଇ ଅଭିଯୁକ୍ତଙ୍କୁ ଗିରଫ କଲା କମିଶନରେଟ୍ ପୋଲିସ
ଭୁବନେଶ୍ୱର: ଅପରେସନ NRI ଆଡମିଶନ ସ୍କାମ୍ । ପଇସା ବାଲା ପିଲାଙ୍କୁ ଆଡମିଶନ ଅଫର । ନାମୀଦାମୀ ଶିକ୍ଷାନୁ୍ଷ୍ଠାନରେ ଏଣ୍ଟ୍ରିର ସୁଯୋଗ । ଆଶାୟୀଙ୍କୁ ମ୍ୟାନେଜମେଣ୍ଟ ଓ ଏନଆରଆଇ କୋଟାର ଥୋପ । ରାଜଧାନୀରେ ଠକ ଖୋଲିଥିଲେ ସଂସ୍ଥା । ଅଭିନନ୍ଦନ ବାରିକ ଓ ରାଜେଶ୍ ରୋସନ ସାହୁ । ଜଣେ ଡିପ୍ଲୋମା ଓ ଅନ୍ୟ ଜଣେ ବି-ଟେକ୍ ପାସ ଆଉଟ୍ । ଦୁଇ ଜଣ ଭୁବନେଶ୍ବର ନୟାପଲ୍ଲୀରେ ୮ ବର୍ଷ ହେଲା ଖୋଲିଥିଲେ ଡିଏଫ ଆକାଡେମୀ । ଏମବିବିଏସ, ବି-ଟେକ, ଫାର୍ମା, ଏମବିଏ, ନର୍ସି, ଲ’ ଆଡମିଶନ ପାଇଁ ପ୍ରମୁଖ ବିଶ୍ବବିଦ୍ୟାଳୟରେ ସିଟ୍ କରାଇଦେବାକୁ ଦେଉଥିଲେ ଅଫର । ଏଥିପାଇଁ ନେଉଥିଲା ମୋଟା ଅଙ୍କର ଟଙ୍କା । ଝାରୁସୁଗୁଡାର ଜଣଙ୍କୁ ଠାରୁ ଦାମୀ ବିଶ୍ବବିଦ୍ୟଳୟରେ ମେଡିକାଲ ସିଟ୍ ପାଇଁ ଆଡମିଶନ କରାଇ ଦେବାକୁ କହି ନେଇଥିଲେ ୩ ଲକ୍ଷ ଟଙ୍କା । ମ୍ୟାନେଜମେଣ୍ଟ କୋଟାରେ ଆଡମିଶନ ପରେ ଜାତୀୟ ସ୍ବାସ୍ଥ୍ୟ ଶିକ୍ଷା ଅନୁଷ୍ଠାନ ପକ୍ଷରୁ ଟଙ୍କା ଫେରିଥାଏ । ହେଲେ ଅଭିଯୋଗକାରୀକୁ ଟଙ୍କା ନ ମିଳବା ପରେ ଥାନାରେ ଅଭିଯୋଗ ହୋଇଥିଲା । ତଦନ୍ତ ପରେ ରାକେଟର ଖୋଲିଛି ଗୁମର ।
ଏନଆରଆଇ କୋଟା କ’ଣ ? କେମିତି ଠକ କରୁଥିଲେ ଠକେଇ ? ବିଦେଶରେ ରହୁଥିବା ଲୋକମାନଙ୍କ ଆଡମିଶନ ପାଇଁ ଅନେକ ଶିକ୍ଷାନୁଷ୍ଠାନରେ ଏନଆରଆଇ କୋଟା ରହିଥାଏ । ସେହି ସବୁ କୋଟା ସିଟକୁ ଆଶାୟୀକୁ ସୁବିଧାରେ କରାଇ ଦେବାକୁ କହି ମୋଟା ଅଙ୍କରେ ଟଙ୍କା ନେଉଥିଲେ । ଏନଆରଆଇ ସହିତ ପରିଚିତ ନଥାଇ ବି ଜାଲ କାଗଜପତ୍ର କରି ଆଡମିଶନ କରାଉଥିବା ପୋଲିସ ସନ୍ଦେହ କରିଛି । ତଦନ୍ତ ବେଳେ ଦୁଇ ଜଣ ଠକଙ୍କ ନାମରେ ଏବେଶୁ୍ଦ୍ଧା ପ୍ରାୟ ୨୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଠକେଇ କରିଥିବା ପୋଲିସ ସୂଚନା ପାଇଛି । ଦୁଇ ଜଣଙ୍କ ରାକେଟରେ ଏକାଧିକ ଲୋକ କାମ କରୁଥିବା ଜଣାପଡିଛି । ଏପରିକି ପ୍ରତି ଜିଲ୍ଲାରେ ଏହି ଗ୍ୟାଙ୍ଗ ଏଜେଣ୍ଟ ରଖିଥିବା ପୋଲିସ ଜାଣିବାକୁ ପାଇଛି । ଦୁଇ ଜଣଙ୍କ ଠାରୁ ୨ଟି ଦାମୀ କାର, ୨ଟି ଲ୍ୟାପଟପ୍, ୩ ଟି ଟଙ୍କା ଗଣା ମେସିନ, ୪ ଲକ୍ଷ ୫୦ ହଜାର ଟଙ୍କା, ବ୍ରୋଚର, ହ୍ବାଟସଅପ ଚାର୍ଟ ଓ ମୋବାଇଲ ଜବତ ହୋଇଛି । ଦୁଇ ଜଣଙ୍କୁ କୋର୍ଟ ଚାଲାଣ କରିଛି ସ୍ପେଶାଲ କ୍ରାଇମ ୟୁନିଟ । ଆଡମିଶନ ନାଁରେ ଚାଲିଥିବା ସ୍କାମ ସିଣ୍ଡିକେଟ ଗୁମର ଖୋଲିବା ପାଇଁ ରିମାଣ୍ଡରେ ଆଣିବ ପୋଲିସ ।
ବଦଳୁଛି ଡ୍ରଗ୍ସ ମାଫିଆଙ୍କ ନିଶା ଚାଲାଣର ତରିକା, ଛାତ୍ର ବେଶରେ ଆସି କରୁଛନ୍ତି ନିଶା କାରବାର
ଭୁବନେଶ୍ୱର: ବଦଳୁଛି ଡ୍ରଗ୍ସ ମାଫିଆଙ୍କ ଡ୍ରଗ୍ସ ଚାଲାଣ ତରିକା । ଛାତ୍ର ବେଶରେ ପଛରେ ବ୍ୟାଗ୍ ପକାଇ ଆସୁଛନ୍ତି, ଡ୍ରଗ୍ସ ନେଇଯାଉଛନ୍ତି । ୧ କୋଟି ଟଙ୍କାର ବ୍ରାଉନ ସୁଗାର ସହ ୨ ଜଣଙ୍କୁ ଗିରଫ କରାଯାଇଛି । ଏହା ପରେ ଡ୍ରଗ୍ସ ଚାଲାଣର ନୂଆ ତରିକାର ତଥ୍ୟ STF ସାମ୍ନାକୁ ଆସିଛି । ଗିରଫ ଦୁଇ ଜଣ ହେଲେ ପିପିଲିର ଲିପୁନ ପାଣ୍ଡେ ଓ ଖୋର୍ଦ୍ଧା ଶରଧାପୁରର ସେକ୍ ଆବାସ । ଉଭୟ ପିପିଲି ଟୋଲ ଗେଟ୍ ପାଖରେ ବାଇକ୍ ଧରି ଡିଲ୍ ପାଇଁ ଛିଡା ହୋଇଥିଲେ । ଖବର ପାଇ STF ମାଡିବସିଥିଲା । ଗିରଫ ଦୁଇ ଅଭିଯୁକ୍ତଙ୍କ ମଧ୍ୟରୁ ସେକ୍ ଆବାସ ଫାର୍ମାସିଷ୍ଟ ହୋଇଥିବା ବେଳେ ଲିପୁନ ଗ୍ୟାରେଜ ମିସ୍ତ୍ରୀ । ୨୦୨୦ରୁ ଏବେ ସୁଦ୍ଧା STF ୭୩ କେଜି ବ୍ରାଉନସୁଗର ଜବତ କରିଥିବା ବେଳେ ୧୭୪ ଜଣ ନିଶା ମାଫିଆଙ୍କୁ ଗିରଫ କରିଛି ।
୧୯୪୫ ସେପ୍ଟେମ୍ବର ୨ରେ ଶେଷ ହୋଇଥିଲା ଦ୍ୱିତୀୟ ବିଶ୍ୱଯୁଦ୍ଧ, କେତେ ଭୟଙ୍କର ଥିଲା ଆସନ୍ତୁ ଜାଣିବା…
ନନ୍ଦିଘୋଷ ବ୍ୟୁରୋ : ଆଜକୁ ୭୮ ବର୍ଷ ପୂର୍ବେ ଅର୍ଥାତ୍ ୨ ସେପ୍ଟେମ୍ବର ୧୯୪୫ ରେ ଶେଷ ହୋଇଥିଲା ଦ୍ୱିତୀୟ ବିଶ୍ୱଯୁଦ୍ଧ । ଏହା ବିଶ୍ୱ ଇତିହାସରେ ସବୁଠାରୁ ଲମ୍ବା ଯୁଦ୍ଧ ଥିଲା | ଯେଉଁଥିରେ କୋଟି କୋଟି ଜୀବନ ନଷ୍ଟ ହୋଇଯାଇଥିଲା । ସୈନିକ କିମ୍ବା ସାଧାରଣ ଲୋକ, ସମସ୍ତଙ୍କର ମୃତ୍ୟୁ ହୋଇଥିଲା | ସମଗ୍ର ବିଶ୍ୱ ଦୁଇଟି ଭାଗରେ ବିଭକ୍ତ ହେଲା | ସହଯୋଗୀମାନେ ଫ୍ରାନ୍ସ, ଗ୍ରେଟ୍ ବ୍ରିଟେନ, ଆମେରିକା, ସୋଭିଏତ୍ ୟୁନିଅନ୍ ଏବଂ ଚୀନ୍ ସହ ଅନ୍ତର୍ଭୁକ୍ତ ଥିଲେ। ଦ୍ୱିତୀୟ ଗୋଷ୍ଠୀ ଥିଲା ଜର୍ମାନୀ, ଇଟାଲୀ ଏବଂ ଜାପାନ | କହିବାକୁ ଗଲେ କେବଳ ଏହି ଦେଶଗୁଡ଼ିକ ଆଗରେ ଥିଲେ, କିନ୍ତୁ ସମଗ୍ର ବିଶ୍ୱ ପ୍ରଭାବିତ ହୋଇଥିଲା । ଅନେକ ସ୍ଥାନରେ ଯୁଦ୍ଧ ହୋଇଥିଲା। ସୈନିକମାନେ ଜଳ, ସ୍ଥଳ ଏବଂ ଆକାଶରେ ପରସ୍ପର ସହିତ ଯୁଦ୍ଧ କରିଥିଲେ | ଏହି ଯୁଦ୍ଧରେ ଭାରତ ସିଧାସଳଖ ଜଡିତ ହୋଇନଥାଇପାରେ କିନ୍ତୁ ଏହାର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା। ଭାରତ ସେତେବେଳେ ବ୍ରିଟେନ ତରଫରୁ ଯୁଦ୍ଧ କରୁଥିଲା । ସହଯୋଗୀ ରାଷ୍ଟ୍ରର ସୈନ୍ୟବାହିନୀଠାରୁ ଆରମ୍ଭ କରି ନେତାଙ୍କ ପର୍ଯ୍ୟନ୍ତ ସମସ୍ତେ ଭାରତୀୟ ସୈନିକମାନଙ୍କ ସାହସିକତାକୁ ଅଭିବାଦନ ଜଣାଇଥିଲେ। ତାଙ୍କର ଅବଦାନକୁ ପ୍ରଶଂସା କରାଯାଇଥିଲା |
ଏହି ଯୁଦ୍ଧ ଦ୍ୱାରା ୭୦ରୁ ଅଧିକ ଦେଶ ସିଧାସଳଖ ପ୍ରଭାବିତ ହୋଇଥିଲେ। ୧୦ କୋଟିରୁ ଅଧିକ ସୈନିକ ଏଥିରେ ଭାଗ ନେଇଥିଲେ। ଜାପାନର ହିରୋସିମା ଏବଂ ନାଗାସାକି ଉପରେ ୬ ଅଗଷ୍ଟ ଏବଂ ୯ ଅଗଷ୍ଟ ୧୯୪୫ ରେ ପରମାଣୁ ଆକ୍ରମଣ ହୋଇଥିଲା । ବହୁ ଆହତ ହେବା ପରେ ଯୁଦ୍ଧ ଧୀରେ ଧୀରେ ଏହାର ଶେଷ ଆଡକୁ ଗଲା ଏବଂ ସେପ୍ଟେମ୍ବର ୨ ରେ ଆନୁଷ୍ଠାନିକ ଭାବ ଶେଷ ହୋଇଥିଲା । ଦ୍ୱିତୀୟ ବିଶ୍ୱଯୁଦ୍ଧ ଆନୁଷ୍ଠାନିକ ଭାବରେ ୧୯୩୯ ରୁ ୧୯୪୫ ପର୍ଯ୍ୟନ୍ତ ଚାଲିଥିଲା । ଜୁଲାଇ ୧୯୩୭ ରେ, ମାର୍କୋ ପୋଲୋ ବ୍ରିଜ ଘଟଣାରେ ଜାପାନ ଚୀନ୍ ଉପରେ ଆକ୍ରମଣ କରି ବେଜିଂକୁ କାବୁ କରିଥିଲା । ସୋଭିଏତ୍ ୟୁନିଅନ୍ ମଧ୍ୟ ଚାଇନାକୁ ସାହାଯ୍ୟ କରିଥିଲା । ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଯୋଗାଇ ଦିଆଯାଉଥିଲା କିନ୍ତୁ ଏହାର କୌଣସି ପ୍ରଭାବ ପଡିନଥିଲା । ଚୀନ୍ ସେନା ମଧ୍ୟ ତିନି ମାସ ମଧ୍ୟରେ ସାଂଘାଇକୁ ହରାଇଲା। ଜାପାନୀ ସୈନିକମାନେ ଚୀନ୍ ସେନାକୁ ପଛକୁ ଠେଲିଥିଲେ। ନାନକିଙ୍ଗକୁ କାବୁ କରିବା ପରେ ଜାପାନ ସେନା ଲକ୍ଷ ଲକ୍ଷ ଚାଇନାର ଅସ୍ତ୍ରଶସ୍ତ୍ର ସୈନିକ ଏବଂ ସାଧାରଣ ନାଗରିକଙ୍କୁ ଅତି ନିର୍ମମ ଭାବରେ ହତ୍ୟା କରିଥିଲା। ଚୀନ୍-ଜାପାନ ମୁହାଁମୁହିଁ ହୋଇଥିଲେ, ଏହି ସମୟରେ ଜର୍ମାନୀ ୟୁରୋପରେ ନିଜର ସାମ୍ରାଜ୍ୟ ବିସ୍ତାର କରିବାର ଉଦ୍ଦେଶ୍ୟରେ ସେପ୍ଟେମ୍ବର ୧, 1୧୯୩୯ରେ ପୋଲାଣ୍ଡ ଉପରେ ଆକ୍ରମଣ କରିଥିଲା । ଏହାର ପରେ ଫ୍ରାନ୍ସ ଜର୍ମାନୀ ଉପରେ ଆକ୍ରମଣ ଘୋଷଣା କରିଥିଲା । ଇଂଲଣ୍ଡ ଏବଂ ଅନ୍ୟାନ୍ୟ କମନୱେଲଥ ଦେଶ ଫ୍ରାନ୍ସକୁ ସମର୍ଥନ କରିଥିଲେ, ଅନେକ ବିରୋଧ ମଧ୍ୟ କରିଥିଲେ । ଯୁଦ୍ଧରେ ଜର୍ମାନୀ ୧୯୩୯ ରୁ ୧୯୪୧ ମଧ୍ୟରେ ୟୁରୋପର ଏକ ବଡ଼ ଅଂଶ ଦଖଲ କଲା | ସେତେବେଳେ ଫ୍ରାନ୍ସ ହାରିଗଲା, ଗ୍ରେଟ୍ ବ୍ରିଟେନ ଏବଂ କମନୱେଲଥ୍ ଦେଶଗୁଡିକ ଆକ୍ସିସ୍ ଶକ୍ତି ସହିତ ଯୁଦ୍ଧ କରୁଥିଲେ। ଏହିପରି, ଆଫ୍ରିକା ଠାରୁ ଆଟଲାଣ୍ଟିକ୍ ଏବଂ ଆମେରିକା ପର୍ଯ୍ୟନ୍ତ ଯୁଦ୍ଧ ଆରମ୍ଭ ହୋଇଥିଲା | ଯୁଦ୍ଧରେ ଜର୍ମାନ ଗୋଷ୍ଠୀ ପକ୍ଷରୁ ଲଢିବା ପାଇଁ ଜାପାନ ମଧ୍ୟ ଏହି ଅଞ୍ଚଳରେ ପହଞ୍ଚିଥିଲା । ଯୁଦ୍ଧ କଦାପି କିଛି ଦିଏ ନାହିଁ, ଏହି ଯୁଦ୍ଧରେ ମଧ୍ୟ କିଛି ମିଳିଲା ନାହିଁ | କେବଳ ହିଁ କେବଳ ସମସ୍ତେ ବିନାଶର ବିଭିସିକାକୁ ଦେଖିଲେ |
ଭାରତ ସେତେବେଳେ ବ୍ରିଟେନର ଏକ ଅଂଶ ଥିଲା ଏବଂ ଭାରତରେ ଥିବା ସେନା ବ୍ରିଟେନର ଆଦେଶରେ ଲଢେଇକରୁଥିଲେ । କିନ୍ତୁ ସମସ୍ତ ରାଷ୍ଟ୍ର ଭାରତର ଅବଦାନକୁ ପ୍ରଶଂସା କରିଥିଲେ । ବ୍ରିଟିଶ ରାଜା ପ୍ରଥମେ ଯୁଦ୍ଧକୁ ଦୁଇ ଲକ୍ଷ ସୈନିକ ପଠାଇଥିଲେ ଯେଉଁଥିରେ ବହୁ ସଂଖ୍ୟକ ଭାରତୀୟ ଥିଲେ। ଯୁଦ୍ଧ ଅାଗକୁ ବଢିଥିବା ବେଳେ ଭାରତୀୟ ସୈନିକମାନଙ୍କର ଭୂମିକା ଏବଂ ସଂଖ୍ୟା ମଧ୍ୟ ବୃଦ୍ଧି ପାଇଲା । ଏହି ଯୁଦ୍ଧରେ ବହୁ ସଂଖ୍ୟକ ଭାରତୀୟ ସୈନିକ ସହଯୋଗୀ ସୈନ୍ୟବାହିନୀରେ ରହିଥିଲେ। ଯେତେବେଳେ ଯୁଦ୍ଧ ଶିଖରରେ ପହଞ୍ଚିଲା, ସାରା ବିଶ୍ୱରେ ୨.୫ ମିଲିୟନରୁ ଅଧିକ ଭାରତୀୟ ସୈନିକ ଯୁଦ୍ଧ କରୁଥିଲେ | ସରକାରୀ ଭାବେ ୮୭ ହଜାରରୁ ଅଧିକ ସୈନିକ ନିହତ ହୋଇଥିଲେ। ଅନେକ ମଧ୍ୟ ନିଖୋଜ ହୋଇଯାଇଥିଲେ। ସେତେବେଳେ ଭାରତୀୟ ସେନାର ମୁଖ୍ୟ ଫିଲ୍ଡ ମାର୍ଶଲ ସାର୍ କ୍ଲୋଡ୍ ଆଚିନ୍ଲେକ୍ କହିଥିଲେ ଯେ ଭାରତୀୟ ସେନା ବିନା ପ୍ରଥମ ଓ ଦ୍ୱିତୀୟ ବିଶ୍ୱଯୁଦ୍ଧରେ ଜିତିବା ଅସମ୍ଭବ।
ମୁଖ୍ୟମନ୍ତ୍ରୀଙ୍କ ଐତିହାସିକ ନିଷ୍ପତ୍ତି, ହୀରାକୁଦ ବନ୍ଧ ବିସ୍ଥାପିତମାନଙ୍କୁ ସରକାର ଦେବେ ଜମିପଟ୍ଟା
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଏକ ଐତିହାସିକ ନିଷ୍ପତ୍ତି ନେଇ ବିଭିନ୍ନ ସ୍ଥାନରେ ଜମି ସମସ୍ୟାର ସମାଧାନ କରାଯାଇ ଲୋକଙ୍କୁ ପଟ୍ଟା ଦେବାପାଇଁ ନୀତିଗତ ନିଷ୍ପତ୍ତି ନେଇଛନ୍ତି । ସୂଚନାଯୋଗ୍ୟ ଯେ ମୁଖ୍ୟମନ୍ତ୍ରୀଙ୍କ 5T ସଚିବ ଭିକେ ପାଣ୍ଡିଆନ ତାଙ୍କର ଜିଲ୍ଲାଗସ୍ତ ସମୟରେ ଜମିଜମା ସଂପର୍କିତ ଅନେକ ଅଭିଯୋଗ ଲୋକଙ୍କଠାରୁ ପାଇଥିଲେ। ହୀରାକୁଦ ବନ୍ଧ ବିସ୍ଥାପିତ ମାନଙ୍କର ଦୀର୍ଘ ବର୍ଷର ସମସ୍ୟା, ଅନ୍ୟ ସ୍ଥାନରେ ସରକାରୀ ଜମିରେ ବହୁ ଦିନ ଧରି ରହୁଥିବା ଲୋକଙ୍କର ଜମି ଅଧିକାର ସମସ୍ୟା, ରୟତ ସମସ୍ୟା – ଏହିପରି ଅନେକ ସମସ୍ୟା ସଂପର୍କରେ 5T ସଚିବଙ୍କୁ ଜଣାଇଥିଲେ । ଏ ବିଷୟରେ 5T ସଚିବ ମୁଖ୍ୟମନ୍ତ୍ରୀଙ୍କୁ ଅବଗତ କରାଇବା ପରେ, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଆଜି ଏ ସଂପର୍କରେ ଏକ ଉଚ୍ଚସ୍ତରୀୟ ବୈଠକ ଡକାଯାଇ ନିଷ୍ପତ୍ତି ନିଆଯାଇଛି । ବୈଠକରେ 5T ସଚିବ ଭିକେ ପାଣ୍ଡିଆନଙ୍କ ସହିତ ଉନ୍ନୟନ କମିଶନର ଅନୁ ଗର୍ଗ, ରାଜସ୍ବ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ସତ୍ୟବ୍ରତ ସାହୁ, ଗଞ୍ଜାମ ଓ ଝାରସୁଗୁଡା ଜିଲ୍ଲାର ଜିଲ୍ଲାପାଳ ଏବଂ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ବୈଠକରେ ଜମିଜମା ସମସ୍ୟାର ସ୍ଥାୟୀ ସମାଧାନ କରାଯାଇ ଲୋକଙ୍କୁ ପଟ୍ଟା ଯୋଗାଇ ଦେବାକୁ ନିଷ୍ପତ୍ତି କରାଯାଇଛି ।
ଝାରସୁଗୁଡା ଜିଲ୍ଲାରେ ହୀରାକୁଦ ବନ୍ଧ ବିସ୍ଥାପିତମାନଙ୍କର ସମସ୍ୟା ୫୦ ବର୍ଷରୁ ଅଧିକ ସମୟର । ଲଖନପୁର ତହସିଲର ୧୮ଟି ଗାଁ ଓ ଝାରସୁଗୁଡା ତହସିଲର ଗୋଟିଏ ଗାଁ, ଏହିପରି ୧୯ଟି ଗାଁର ଜମି ସମସ୍ୟାର ସମାଧାନ ପାଇଁ ବୈଠକରେ ନିଷ୍ପତ୍ତି କରାଯାଇଛି । ୧୭୪୯ଟି ପରିବାରକୁ ପ୍ରାୟ ୩୨୩୧ ଏକର ଜମି ଉପରେ ଅଧିକାର ଦିଆଯିବ। ଡିସେମ୍ବର ମାସରୁ ଲିମେଇତିକ୍ରା, ସାହାସବାଗ, ଲାଛିପଲ୍ଲୀ, ପାତ୍ରପଲ୍ଲୀ ଓ ଡୁଆଁମୁଣ୍ଡା – ଏହି ୫ଟି ଗାଁରେ ପଟ୍ଟା ବଣ୍ଟନ ଆରମ୍ଭ ହେବ ।
ଗଞ୍ଜାମ ଜିଲ୍ଲାକୁ ଗତ ଅଗଷ୍ଟ ୨୬ ତାରିଖରେ 5T ସଚିବ ଗସ୍ତ କରିଥିଲେ। ସେଠାରେ ଲୋକଙ୍କ ସମସ୍ୟା ଶୁଣିବା ପରେ ମାତ୍ର ୫ ଦିନରେ ଜମି ସମସ୍ୟାର ସମାଧାନ ହୋଇଛି। ବୈଠକର ନିଷ୍ପତ୍ତି ଅନୁଯାୟୀ ଗଞ୍ଜାମ ଜିଲ୍ଲାର ସୋରଡା ବ୍ଲକର ୧୭ଟି ଗ୍ରାମର ୮୮୩ ଜଣ ଲୋକଙ୍କୁ ଘରଡିହ ପଟ୍ଟା ଦିଆଯିବ ଏବଂ ୨୦୨୩ ସେପ୍ଟେମ୍ବର ୨୨ ସୁଦ୍ଧା ସମସ୍ତ ପଟ୍ଟାବଣ୍ଟନ ପ୍ରକ୍ରିୟା ଶେଷ ହେବ । ସେହିପରି ୧୬୮ ଜଣ ଲୋକଙ୍କୁ ଚାଷଜମି ପାଇଁ ପଟ୍ଟା ଦିଆଯିବ ଏବଂ ଏହି ପ୍ରକ୍ରିୟା ଅକ୍ଟୋବର ପହିଲାରୁ ଆରମ୍ଭ ହେବ।
5T ସଚିବ ଭିକେ ପାଣ୍ଡିଆନଙ୍କ ଜିଲ୍ଲା ଗସ୍ତ ସମୟରେ ମିଳିଥିବା ଲୋକଙ୍କ ବିଭିନ୍ନ ଅଭିଯୋଗର ସମାଧାନ ନିମନ୍ତେ ସମୟ ବଦ୍ଧ ପଦକ୍ଷେପ ନେବା ପାଇଁ ମୁଖ୍ୟମନ୍ତ୍ରୀ ବିଭିନ୍ନ ବିଭାଗ ତଥା ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି । ଚଳିତ ସେପ୍ଟେମ୍ବର ମଧ୍ଯ ଭାଗରେ ମୁଖମନ୍ତ୍ରୀ ଏହାର ଅଗ୍ରଗତି ସମ୍ପର୍କରେ ସମୀକ୍ଷା କରିବେ ।
ରାଜଧାନୀରେ ପୁଣି ମାତିଲେ ଲୁଟେରା, ସୁନା ଦୋକନରୁ ସଟର ତାଡ଼ି ଲୁଟ୍
ଭୁବନେଶ୍ୱର: ରାଜଧାନୀରେ ପୁଣି ମାତିଲେ ଲୁଟେରା । ସୁନା ଦୋକନରୁ ସଟର ତାଡ଼ି ଲୁଟ। ଇନ୍ଫୋସିଟି ଥାନା ପଟିଆ ଷ୍ଟେସନ ନିକଟ କଳାରାହାଙ୍ଗ ମା ମଙ୍ଗଳା ଜୁଏଲାରୀରୁ ଲୁଟ ହୋଇଛି । ଦୋକାନର ସଟର ତଡିବା ପୂର୍ବରୁ ଲାଗିଥିବା ସିସିଟିଭିକୁ ବାଉଁଶରେ ବୁଲାଇ ଦେଇଥିଲେ ଲୁଟେରା । ଗତକାଲି ବିଳମ୍ବିତ ରାତିରେ ଘଟିଛି ଘଟଣା । ସିସିଟିଭିରେ କଏଦ ହୋଇଛି ଘଟଣା । ଇନ୍ଫୋସିଟି ଥାନା ପୋଲିସ, ସନ୍ଧାନୀ କୁକୁର ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ଦୋକାନରୁ ଫିଙ୍ଗର ପ୍ରିଣ୍ଟ ସଂଗ୍ରହ କରିଛି ଟିମ୍ । ଶାବଳରେ ସଟର ତାଡ଼ିଛନ୍ତି ଏକାଧିକ ଲୁଟେରା । ସମସ୍ତ ଲୁଟେରା ପେଷାଦାର ଥିବା ପୋଲିସ ସନ୍ଦେହ କରୁଛି ।
ସୁନା ଦୋକାନ ପାଖରେ ଥିବା ବ୍ୟାଙ୍କର ସିସିଟିଭି ସହିତ ଆଖପାଖରେ ଲାଗିଥିବା ସିସିଟିଭି ଫୁଟେଜ ଆଧାରରେ ପୋଲିସ ଛାନବିନ୍ କରୁଛି । ଦୋକାନ ଭିତରେ ଲକର ଥିଲା । ଲକର ଭାଙ୍ଗି ବାକୁ ଉଦ୍ୟମ କରି ବିଫଳ ହୋଇଛି । କ୍ୟାସ କାଉଣ୍ଟର ଭାଙ୍ଗି ୧୫ ହଜାର ଟଙ୍କା ନେଇଛନ୍ତି ଲୁଟେରା। ସୁନା ଦୋକାନ ସୋକେଶରେ ଇମିଟେସନ ଥିଲା। ସେଥିରେ ହାତ ମାରିନାହାନ୍ତି ଲୁଟେରା ।