spot_img

Latest Posts

ବାତ୍ୟା ‘ଆକଓ୍ବାନ୍’ ପ୍ରଭାବରେ ୩୯ଟି ଟ୍ରେନ୍ ବାତିଲ୍

ନନ୍ଦିଘୋଷ ବ୍ୟୁରୋ: ଓଡ଼ିଶା ଉପକୂଳ ଆଡ଼କୁ ମାଡ଼ି ଆସୁଛି ବାତ୍ୟା ‘ଆକଓ୍ବାନ୍’ । ଆସନ୍ତାକାଲି ଏହା ଗୋପାଳପୁର ନିକଟରେ ଲ୍ୟାଣ୍ଡଫଲ୍ କରିବାର ସମ୍ଭାବନା ରହିଛି । ଏହାକୁ ଦୃଷ୍ଟିରେ ରଖି ଯାତ୍ରୀଙ୍କ ସୁରକ୍ଷା ଏବଂ ରେଳ ଚଳାଚଳରେ ବିପଦ ଏଡ଼ାଇବା ପାଇଁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି । ଏଥିପାଇଁ ନଭେମ୍ବର ୧୯, ୨୦ ଏବଂ ୨୧ ତାରିଖରେ ୩୯ଟି ଟ୍ରେନ୍ ଚଳାଚଳକୁ ବାତିଲ୍ କରାଯାଇଛି। ବିଶେଷ କରି ପୁରୀ, ଭୁବନେଶ୍ୱର, କଟକ ଏବଂ ବ୍ରହ୍ମପୁରରୁ ଯାତାୟାତ କରୁଥିବା ବହୁ ସଂଖ୍ୟକ ଟ୍ରେନ୍ ଏହାଦ୍ୱାରା ପ୍ରଭାବିତ ହୋଇଛି। ବାତିଲ୍ ହୋଇଥିବା ଟ୍ରେନ୍ ମଧ୍ୟରେ ଓଡ଼ିଶାକୁ ପଡ଼ୋଶୀ ରାଜ୍ୟ ସହ ସଂଯୋଗ କରୁଥିବା ଅନେକ ଦୂରଗାମୀ ଏକ୍ସପ୍ରେସ୍, ବନ୍ଦେ ଭାରତ, ପାସେଞ୍ଜର ଏବଂ ମେମୁ ଟ୍ରେନ୍ ଅନ୍ତର୍ଭୁକ୍ତ ରହିଛି।

ବାତିଲ୍ ହୋଇଥିବା ପ୍ରମୁଖ ଟ୍ରେନ୍‌ଗୁଡ଼ିକ ମଧ୍ୟରେ ଭୁବନେଶ୍ୱର–ବିଶାଖାପାଟଣା ବନ୍ଦେ ଭାରତ ଏକ୍ସପ୍ରେସ୍ (୨୦୮୪୧/୨୦୮୪୨), ହାଓଡ଼ା–ପୁରୀ ବନ୍ଦେ ଭାରତ ଏକ୍ସପ୍ରେସ୍ (୨୨୮୯୫/୨୨୮୯୬), ଟାଟାନଗର–ବ୍ରହ୍ମପୁର ବନ୍ଦେ ଭାରତ ଏକ୍ସପ୍ରେସ୍ (୨୦୮୯୧/୨୦୮୯୨) ଏବଂ ପୁରୀ–ଯଶୋବନ୍ତପୁର ଗରିବ ରଥ ଏକ୍ସପ୍ରେସ୍ (୨୨୮୮୩/୨୨୮୮୪) ରହିଛି।

ତେଣୁ ଯାତ୍ରୀମାନଙ୍କୁ ଏ ସମ୍ପର୍କରେ ଧ୍ୟାନ ଦେବାକୁ ଏବଂ ସେହି ଅନୁଯାୟୀ ନିଜର ଯାତ୍ରା ଯୋଜନା କରିବାକୁ ପରାମର୍ଶ ଦିଆଯାଇଛି। ଏହାସହ ଯାତ୍ରା ଆରମ୍ଭ କରିବା ପୂର୍ବରୁ ନ୍ୟାସନାଲ୍ ଟ୍ରେନ୍ ଏନକ୍ୱାରି ସିଷ୍ଟମ୍ (NTES) କିମ୍ବା ରେଳବାଇର ଅନ୍ୟାନ୍ୟ ସରକାରୀ ଅନୁସନ୍ଧାନ ମାଧ୍ୟମରୁ ଟ୍ରେନ୍‌ର ସଦ୍ୟତମ ସମୟ ସାରଣୀ ଏବଂ ଅନ୍ୟାନ୍ୟ ତଥ୍ୟ ଯାଞ୍ଚ କରିବାକୁ ଯାତ୍ରୀମାନଙ୍କୁ ଅନୁରୋଧ କରାଯାଇଛି।

Latest Posts

Don't Miss